MM Story Teller

Chapter 40

Viewers 4k

🌍Chapter 40

မီးခြစ်ဆံယောကျာ်းက သူ၏လက်ထဲမှ မှန်ပြောင်းကိုပြန်ချလိုက်ပြီး ကျောပိုးအိတ်ကိုလွယ်ကာ အောက်ထပ်သို့ အလျင်အမြန်ဆင်းသွားလိုက်ပြီး ထိုလူကြီး၏နောက်မှလိုက်သွားတော့သည်။

ထန်မော့ မည်းမှောင်သော လမ်းကြားတွင်ပုန်းကွယ်နေလျက် မျက်လုံးများကိုမှိတ်ကာ အသက်ကို ပြင်းပြင်းရှုလိုက်သည်။ ထို့နောက် သူ၏အမြင်အာရုံတွင် အလင်းရောင်တစ်ခု ဖြတ်ခနဲလင်းသွားပြီး ထိုလူကြီး၏ခေါင်းပေါ်တွင် စာလုံးကြီးကြီးတချို့ပေါ်လာခဲ့သည်။

[ခိုး၀င်သူ]

ထန်မော့နှုတ်ခမ်းကို ကိုက်လျက် ထိုလူကြီးနောက်မှ အမြန်လိုက်သွားတော့သည်။

ညမှောင်လာသည်နှင့် ထိုလယ်သာဂျက်ကတ်နှင့် လူကြီးက စတိုးဆိုင်လေးတစ်ခု၏တံခါးကို ကန်ဖွင့်လျက် ၀င်သွားခဲ့သည်။ ထိုတံခါးကန်ဖွင့်ခံလိုက်ရသည်နှင့် ဆိုင်အတွင်း၌အိပ်နေသော အမျိုးသမီးမှာ ကြောက်လန့်စွာ တုန်ယင်သွားခဲ့လေသည်။

"ဘာတွေကြည့်နေသေးတာလဲ လစ်တော့"

ထိုအမျိုးသမီးကြီးမှာ ပါးစပ်ကိုဖွင့်လျက် တစ်ခုခုဆိုရန်ပြင်လိုက်သော်လည်း ထိုလူကြီးကခြေထောက်က်ု မြှောက်လျက် အမျိုးသမီးကြီး၏ ၀မ်းဗိုက်ကို ကန်ထည့် လိုက်တော့သည်။ အမျိုးသမီးကြီးမှာ နာကျင်စွာ ညည်းညူလျက် အိတ်ကိုပင် မယူနိုင်တော့ပဲ ပြေးထွက်သွား၏။

သို့နှင့် လယ်သာဂျက်ကတ်နှင့် လူကြီးမှာ စိတ်ကြီး၀င်သော အပြုံးဖြင့် အမျိုးသမီးကြီးလှဲနေခဲ့သော နေရာ၌ပင် လှဲချလိုက်တော့သည်။

တိတ်ဆိတ်သော စတိုးဆိုင်ထဲတွင် နာရီသံတချက်ချက်က ကျယ်လောင်နေခဲ့သည်။ လယ်သာဂျက်ကတ်နှင့်လူကြီးက မျက်လုံးအစုံကို မှိတ်ထားပြီးနောက် အသက်ရှူသံက ပို၍ကျယ်လောင်လာခဲ့ပြီး နာရီသံကိုပင် ဖုံးလွှမ်းလုနီးပါးပင်။

အမှောင်ထုထဲ၌ ပေါ့ပါးသော အရိပ်တစ်ခုက စတိုးဆိုင်းထဲသို့ ဖြတ်ခနဲ၀င်လာခဲ့သည်။ စက္ကန့်ပိုင်းအတွင်းမှာပင် ကြီးမားသောမီးခြစ်ဆံကြီးက ကောင်းကင်ပေါ်မှကျလာပြီး ထိုလူကြီး၏ ညာဘက်ခြေထောက်အား ရိုက်ချလိုက်တော့သည်။

ခရက်...

အရိုးကျိုးသံနှင့်အတူ ထိုလူကြီးက နာကျင်စွာ ညည်းညူလိုက်သည်။

ထန်မော့က တစ်ဖက်လူအား အသက်ရှူခွင့်ပင် မပေးခဲ့ချေ။ ကြီးမားသော မီးခြစ်ဆံကြီးမှာ ထိုယောကျာ်းကြီး၏ ၀မ်းဗိုက်၊ တင်ပါးနှင့် ပေါင် နေရာအနှံကို တိုက်ခိုက်နေခဲ့သည်။ အသားထူသောနေရာများကို ရိုက်ခြင်းက တဖက်လူကို နာကျင်စေရုံသာဖြစ်ပြီး သေတော့သေမည်မဟုတ်၊ ထို့ကြောင့် ထိုယောကျာ်းကြီးမှာ နာကျင်စွာသာ အော်နေခဲ့လေသည်။

"မင်းကိုသတ်မယ်"

ခရက်...

ကြီးမားသော စားပွဲကြီးက ထန်မော့ရှေ့တွင် ပေါ်လာခဲ့သည်။

ထန်မော့ မီးခြစ်ဆံကြီးအား ဝေ့ယမ်းလိုက်လျှင် ထိုစားပွဲကြီးအား ထိခတ်မိလျက် စားပွဲမှာ အစိတ်စိတ်အမွှာမွှာ ကျိုးပဲ့သွားတော့သည်။ အံ့အားသင့်မှုတစ်ခု ထန်မော့၏မျက်လုံးထဲ ထင်ဟပ်လာသော်လည်း တိုက်ခိုက်မှုအား ပို၍ အရှိန်မြှင့်လိုက်လေသည်။ လယ်သာဂျက်ကတ်နှင့် လူကြီးမှာ သူ၏စွမ်းရည်က ထန်မော့ရှေ့တွင် အလွယ်တကူဖျက်ဆီးခံလိုက်ရသည်ကို မြင်လျှင် ညှာတာပေးရန်အော်ဟစ် အသနားခံလာတော့သည်။

ထန်မော့ခါးကိုကိုင်းလျက် ထိုလူကြီး၏ လည်သာဂျက်ကတ်ကိုဆောင့်ဆွဲလိုက်သည်။

"ဒါက အခုငါ့ဟာပဲ နားလည်လား"

သန်သန်မာမာယောကျာ်းကြီးမှာ လယ်သာဂျက်ကတ်ကိုချွတ်လျက် တုန်တုန်ရီရီဖြင့် ခေါင်းတဆတ်ဆတ်ငြိမ့်လာခဲ့သည်။

"နားလည်ပါပြီ နားလည်ပါပြီ။ မင်းရဲ့ဟာပါ"

ထန်မော့မှာ လိုချင်တာကိုရပြီးနောက် လယ်သာဂျက်ကတ်နှင့်အတူ လှည့်ထွက်သွားတော့သည်။

သူထွက်သွားသည်နှင့် မတိုင်ခင်က နှင်ထုတ်ခံလိုက်ရသော အမျိုးသမီးကြီးမှာ ပြန်ရောက်လာပြီး ထိုလူကြီးမှာ ရိုက်နှက်ခံထားရသည်ကိုမြင်လျှင် စိတ်တိုတိုနှင့် ဆိုင်ထဲမှ ကန်ထုတ်လိုက်သည်။ထို့နောက် သူမ၏အိတ်ကိုဆွဲလျက် ထိုလူကို အကြိမ်ရေတချို့ အားရအောင် ကန်ပြီးမှ ထွက်ပြေးသွားခဲ့သည်။

ထန်မော့လမ်းချိုးတစ်ခုအား ၀င်လိုက်ပြီး လယ်သာဂျက်ကတ်ကို ပစ်ထုတ်လိုက်ပြီး စွမ်းရည်စာအုပ်ကို ထုပ်ယူလိုက်သည်။

[စွမ်းရည်: ရိုက်လေ ရိုက်ကြည့်စမ်းပါ]

[ပိုင်ရှင်: ကျောက်လုံဖုန်း (ခိုး၀င်သူ)]

[အမျိုးအစား: လေးဖက်မြင်]]

[အသုံးပြုပုံ: အနီးအနားမှ အရာ၀တ္တုများကို ဒိုင်းကာအဖြစ် အသုံးပြုခြင်း၊ ကြားအလပ်ကြာချိန်မရှိ]

[အဆင့်: ၁]

[ကန့်သတ်ချက်: ရွေ့လျားနိုင်သော အရာ၀တ္တုမျိုးဖြစ်ရမည်။ ဆယ်မီတာထက်ပိုဝေးသော အရာ၀တ္တုမျိုးမဖြစ်ရ၊ အနားယူချိန် ၅မိနစ်]

[မှတ်ချက်: ကျောက်လုံဖုန်း : "မင်းလာပြီး ရိုက်လေ ရိုက်ကြည့်စမ်းပါ

ထန်မော့: "ဒီလိပ်ကောင်ကို သေတဲ့အထိ ရိုက်ပစ်မယ်"]

[ထန်မော့ဗားရှင်း အသုံးပြုရန်အညွှန်း: ဒိုင်းကာပစ္စည်း၏ဧရိယာမှာ သုညဒဿမငါးမီတာထက်မပိုရ၊ ၃မီတာထက်လည်း ပိုမဝေးရ၊ အနားယူချိန် ဆယ်မိနစ်၊ ဟေး မှင်စာ ထန်မော့ကတော့ သတ်ရခက်တော့မှာပဲနော်]

ထန်မော့မှာ စာအုပ်ကိုဖွင့်လိုက်သည်နှင့် ဤအပေါစားစာအုပ်၏ ညစ်ညစ်ပါတ်ပါတ်ပါးစပ်ကြောင့် အံကြိတ်မိလုနီးပါးပင်။ ဤအပေါစားစာအုပ်မှာ သူ၏စွမ်းရည်လည်း ဖြစ်နေသေးသည်။ တစ်ခါတလေ ထန်မော့ ထိုစာအုပ်ကို ဆွဲဖြဲပစ်ချင်မိသည်။

အစကမူ ထန်မော့လည်း ထိုစာအုပ်၏ အရှက်မဲ့မှုများကို အသားကျနေပြီဟုထင်ခဲ့မိသည်။ သို့သော် 'မှင်စာလေး'ဟူသည့် စကားလုံးကိုမြင်လိုက်သည်နှင့် သူ၏မျက်ခွံများ မလှုပ်မိပဲမနေနိုင်ခဲ့ချေ။ သူကစာအုပ်ကို ပိတ်ချလိုက်ပြီး လွှင့်ပစ်ချင်စိတ်ကို သည်းခံလိုက်သည်။

ဤသည်မှာ သူ၏စွမ်းရည်ဖြစ်နေသ၍ အသားကျအောင် ကြိုးစားသင့်သည်။

ထန်မော့ အံကိုကြိတ်လျက် အနီးအနားရှိအိမ် တစ်အိမ်ထဲသို့၀င်လိုက်ကာ မိုးလင်းသည်အထိစောင့်နေလိုက်သည်။

အနက်ရောင်မျှော်စင်မှ သူ့အား' ဆယ်ရက်အတွင်း အနက်ရောင်မျှော်စင် ပထမထပ်ကိုတိုက်ခိုက်ရမည်'ဟု ပြောခဲ့စဥ်ကတည်းက သူကနန်ကျင်းလမ်းတွင် ဤကဲ့သို့ချောင်းမြောင်းတိုက်ခိုက်မှုများကို စတင်ခဲ့ခြင်းပင်။

ထန်မော့၏လက်ရှိ စွမ်းရည်များထဲတွင် မီးမှုတ်ခြင်းနှင့် လေစွမ်းအင်တို့ကသာ တိုက်ခိုက်ရေးစွမ်းရည်များဖြစ်သည်။ သူ့တွင် စွမ်းရည်များစွာ လိုအပ်နေသေးသည်။

တခြားလူများ၏ စွမ်းရည်များမှာ အသုံးမ၀င်သည့်တိုင် ကန့်သတ်ချက်များများစားစားမရှိလှ။ ထန်မော့ကတော့ ထိုရရှိထားသောစွမ်းရည်များကို တစ်နေ့တွင် တစ်ကြိမ်သာ အသုံးပြုနိုင်သည်။ အကယ်၍ သန်မာသော ရန်သူနှင့်ရင်ဆိုင်ရပြီး အချိန်အကြာကြီးတိုက်ခိုက်ရမည်ဆိုပါက အသုံး၀င်တော့မည်မဟုတ်ချေ။ ယခုသူက မျှော်စင်တိုက်ခိုက်ဂိမ်းကို ၀င်ရတော့မည်။

လွန်ခဲ့သောလေးရက်မှစ၍ ထန်မော့သည် ရှောင်ဖေးဖေး၏စွမ်းရည်ကို အသုံးပြုလျက် လမ်းတစ်လျှောက် ခိုး၀င်သူကိုရှာဖွေခဲ့သည်။ မတိုင်ခင်က ထိုကလေးမလေး၏စွမ်းရည်ကို အသုံးမ၀င်ဘူးဟု ထင်ခဲ့မိသည်။

စွမ်းရည်နိုးထပြီးသား ကစားသမားများက တရား၀င်ကစားသမားနှင့် ခိုး၀င်သူများသာရှိလေသည်။ ၄င်းတို့တွင် ထူးခြားသော အသွင်အပြင်မျိုးဟူ၍လည်း မရှိချေ။ ထန်မော့က စွမ်းရည်ပိုင်ရှင်အမျိုးမျိုးကို တွေ့ဖူးလေသည်။ တိုက်အဖွဲ့အစည်းမှ သန်သန်မာမာနှင့် စွမ်းရည်ပိုင်ရှင်နှင့်တူသော ဂျက်မှ လွဲလျှင် တရား၀င်ကစားသမားနှင့် အရံကစားသမားကြားမှ ကွာခြားချက်မှာ မရှိသလောက်ပင်။

ထို့ကြောင့် ခိုး၀င်သူကိုရှာဖွေရန် ပိုလွယ်ခြင်းပင်။

ခိုး၀င်သူတိုင်းမှာ ဂိမ်းမစတင်ခင်ကတည်းက လူသတ်သမားများပင်။

တချို့လူသတ်သမားများမှာ အလွန်ဖုံးကွယ်နိုင်ပြီး သာမာန်လူနှင့်မခြားချေ။ သို့သော် တချို့လူသတ်သမားများကတော့၊ ရက်စက်ပြီး ဒေါသကြီးပုံပေါက်ကာ သူတို့၏ မျက်နှာတွင် မကောင်းမှုကို ရေးထိုးထားသည့်အတိုင်းပင်။ သူ စွမ်းရည်ကို တစ်နေ့တွင်တစ်ကြိမ်သာသုံးနိုင်သည်ဖြစ်၍ ခိုး၀င်သူဟု ၉၀ရာခိုင်နှုန်းသေချာသူကိုမှသာ အသုံးပြုနိုင်မည်ပင်။

ခိုး၀င်သူတိုင်းတွင် မတူညီသောစွမ်းရည်ကိုယ်စီရှိကြပြီး သူပေါ့သေးသေးမတွေးရဲချေ။ တစ်ယောက်ချင်းစီအား သေချာအကဲခတ်ရသည်။ ထို့နောက် သူ၏ 'စားပြီးနားမလည်' စွမ်းရည်ကို သုံး၍ တပါးသူများ၏စွမ်းရည်များကို စုဆောင်းခဲ့သည်။

ထန်မော့ ထိုအိမ်အတွင်းရှိ ကုတင်ပေါ်တွင် လဲလျက် မနက်ဖြန် မည်သည့်နေရာသို့သွား၍ ခိုး၀င်သူသွားရှာရဦးမည်ကို စဥ်းစားနေမိသည်။

သူနန်ကျင်းလမ်းကိုရွေးချယ်ခဲ့သည်မှာ ထိုလမ်းက တခြားနေရာများထက် လူပိုထူထပ်၍ပင်။ ခိုး၀င်သူကိုရှာဖွေရန်လည်း လွယ်ကူသည်။ ကံမကောင်းသည်က လေးရက်ခန့်ချောင်းမြောင်း တိုက်ခိုက်ခဲ့ပြီးနောက်တွင် 'မီးခြစ်ဆံနှင့် လူထူးလူဆန်း'ဟူသော အမည်က အနည်းငယ်လူသိပိုများလာခဲ့ချေပြီ။ ထို့နောက် နန်ကျင်းလမ်းကို လာသော ကစားသမားများလည်း အတော်လေးကိုနည်းသွားခဲ့သည်။

ထန်မော့သူ၏မေးစေ့ကို ထိ၍စဥ်းစားနေမိသည်။

"ဒီနားကမနီးမဝေးမှာ စူပါမားကတ်တစ်ခုရှိတယ်ဆ်ုတော့ အဲဒီကိုနေရာပြောင်းရင်ကောင်းမလားပဲ"

****

မှောင်မိုက်သော ညသန်းခေါင်...

ဂိမ်းအချိန်မဟုတ်သည်မို့ တရုတ်ပြည်ကြီးမှာ တိတ်ဆိတ်နေခဲ့သည်။

နောက်တစ်နေ့တွင် ထန်မော့ နန်ကျင်းလမ်းမှ အမြန်ထွက်ခွာပြီး စူပါမားကတ်ကိုသွားခဲ့သည်။

သုံးရက်ကြာပြီးနောက် ပူဒုန်မြို့၏ စူပါမားကတ်တွင် ဖြစ်သည်။

သန်သန်မာမာ နိုင်ငံခြားသားတစ်ဦးမှာ မြေအောက်ထပ်တစ်ခုမှ ထွက်လာခဲ့ပြီး မြေပေါ်သို့ခုန်တက်လိုက်သည်။ ထိုသူကအလွန်သန်မာပုံပေါ်ပြီး ခြေလှမ်းတိုင်း မြေကြီးမှာ လှုပ်ခတ်သွားသည့်နှယ်၊ တခြားကစားသမားများမှာ ထိုနိုင်ငံခြားသား၏ အဝေးမှရှောင်လျက် သွားကြသည်အထိ၊ ရွှေ၀ါရောင်ဆံပင်များနှင့် အသားဖြူဖြူ နိုင်ငံခြားသားမှာ သူ၏ခေါင်းကို မသိနားမလည်သလို ကုတ်လျက် ရှေ့သို့ တူရှူထွက်သွားတော့သည်။

ထိုသူထွက်သွားသည်နှင့် ထန်မော့၁နာရီခန့် ငြိမ်သက်စွာစောင့်နေရာမှ မျက်လုံးကိုဖြတ်ခနဲ ဖွင့်လိုက်သည်။

ဂျက်ဖြတ်သွားသည်မှာ ၃မိနစ်ကြာပြီးတော့မှ သူနောက်မှ ခပ်သုတ်သုတ်လိုက်သွားခဲ့သည်။

မိနစ်၂၀ခန့်လျှောက်သွားပြီးနောက် ထန်မော့မှာ ဂျက်သည် စက်ရုံ၀န်းတစ်ခုသို့၀င်သွားသည်အားတွေ့လိုက်ရသည်။ ထိုသူက အိုဟောင်းနေသော စက်ရုံအဆောက်အဦးကိုဖြတ်လျက် သံပန်းများကိုကျော်သွားခဲ့သည်။ သို့သော် ထိုအတိုင်းထွက်သွားတော့မည်ဟု ထင်လိုက်သော်လည်း ဂျက်က လူတစ်ကိုယ်စာ ၀င်ပေါက်ဟောင်းတစ်ခုရှေ့ ရုတ်ချည်းရပ်လိုက်သည်အား တွေ့လိုက်ရလေသည်။ ထိုအပေါက်ပေါ် ဂျက်ကရပ်လိုက်ပြီး ချက်ချင်းဆိုသလို ပျောက်ကွယ်သွားတော့သည်။

ထန်မော့ အဆောက်အအုံဟောင်းထဲမှ ထွက်လာပြီး အဆိုပါ သံချေးကိုက်နေသော လူတစ်ကိုယ်စာအပေါက်၏ အဖုံးထံလျှောက်သွားလိုက်သည်။ ထို့နောက် သူသည်ထိုအပေါက်ပေါ်နင်းလိုက်ရန် တွန့်ဆုတ်မနေခဲ့ချေ။

"တင်းတောင်~ တစ်ဦးချင်း ဖြစ်စဥ်ဂိမ်း 'ဘေကိုသတ်ပါ' ကိုအသက်သွင်းလိုက်ပါပြီ။ ၂၀၁၇ နို၀င်ဘာလ ၃၀ရက်၊ ၁၁နာရီ ၂၆မိနစ် မှာ ကစားသမားထန်မော့ ဂိမ်းထဲကို ၀င်ရောက်လာခဲ့ပါပြီ"

"ဂိမ်းကိုပြင်ဆင်နေပါသည်"

"အချက်အလက်များကိုပြင်ဆင်နေပါသည်"

ထန်မော့၏ကိုယ်က လျင်မြန်စွာပြုတ်ကျသွားခဲ့သည်။ ရုတ်ချည်းပြုတ်ကျသွားမှုကြောင့် မတုံ့ပြန်နိုင်ခဲ့ချေ။ သို့သော် နောက်ဆုံးတစ်ခေါက်ကကဲ့သို့ ဦးတည်ရာတော့မမဲ့ချေ။ ဤခံစားချက်မှာ ပွေးကြီးကို တွေ့စဥ်ကနှင့် တူလှသည်။ ထန်မော့သူ၏လက်နှစ်ဘက်ကို ဆန့်လိုက်ပြီး လှိုဏ်ခေါင်းနှစ်ဖက်ကို တွန်းလျက် ကိုယ်ကိုထိန်းလိုက်သည်။

ကြာရှည်သော ပြုတ်ကျမှုနောက် ထန်မော့ ပျော့ပြောင်းသော မြေဆီလွှာပေါ်သို့ကျသွားခဲ့သည်။ အမှောင်ထုမှာ သိပ်သည်းလွန်းလှသဖြင့် ကျောပိုးအိတ်ထဲမှ ဓါတ်မီးကိုထုတ်ယူလျက် ပါတ်၀န်းကျင်အား ထွန်းလင်းစေလိုက်သည်။ ဤလှိုဏ်ခေါင်းကြီးမှာ ဦးပွေးကြီးနှင့်တွေ့ခဲ့ရစဥ်ကနှင့် တစ်ပုံစံထဲပင်။ သို့သော် ဤသည်မှာ တစ်ဖက်ပိတ်လှိုဏ်ခေါင်းမျိုးမဟုတ်ပဲ အစွန်းတစ်ဖက်မှာ ဓါတ်မီးအလင်းရောင်မပေါက်နိုင်သည်အထိ ရှည်လျားလေသည်။

ထန်မော့ သူ၏ပတ်ပတ်လည်မှာ လှုပ်ရှားမှုများကို နားစွင့်လိုက်မိသည်။ ဤလှိုဏ်ခေါင်းမှာ ၁ဒဿမ၈မီတာခန့်မြင့်သည်ပင်။ ထန်မော့လမ်းလျှောက်သည့်အခါ ခေါင်းကိုအသာငုံ့ထားရသည်။ သို့မဟုတ်ပါကရွံ့များက သူ၏ဆံပင်များကို ပေကျံသွားစေမည်ဖြစ်၍ပင်။

ထိုလှိုဏ်ခေါင်း၏အတွင်းပိုင်းသို့ တဖြည်းဖြည်း၀င်သွားသည်နှင့် စိုထိုင်းမှုက ပိုတိုးလာခဲ့သည်။ သူ ပတ်၀န်းကျင်အား ဂရုတစိုက်အကဲခတ်နေခဲ့သည်။

ရုတ်ချည်း ပြေးလွှားနေသော ခြေသံတချို့က လှိုဏ်ခေါင်းအတွင်းမှ ပဲ့တင်ထပ်လာခဲ့သည်။ ထန်မော့၏ ရင်ထဲတင်းကြပ်သွားလျက် ဓါတ်မီးကိုပိတ်လိုက်ပြီး နံရံတွင်ကပ်ရပ်လိုက်သည်။

လှိုဏ်ခေါင်းထဲတွင်အလွန်စိုစွတ်နေပြီး ထန်မော့၏ခြေထောက်များမှာ ရွံ့စေးများနှင့် ပေကျံသွားခဲ့သည်။ သူ ညစ်ပါတ်သွားမည်ကို စိတ်မပူခဲ့ချေ။ တစ်ကိုယ်လုံးတွင်ပေကျံနေသော ရွံ့နွံ့များက ထန်မော့အား လှိုဏ်ခေါင်းနှင့် တစ်ထပ်တည်းဖြစ်နေအောင် ပံ့ပိုးပေးထားသကဲ့သို့။

ခြေသံကတဖြည်းဖြည်းနီးလာသည်နှင့်အမျှ ထန်မော့အသက်ရှူကိုပင်အောင့်ထားလိုက်မိသည်။

ပြေးလာနေသောအရာက ဘာမှန်းမသိသော့ကြောင့် သူတိုက်ရိုက် ရင်ဆိုက်၍မဖြစ်ချေ။

သို့သော်လည်း ထန်မော့မီးကိုပိတ်လျက် ရွံ့များကြားတွင် ကပ်နေစေကာမူ ထိုခြေသံများမှာ ထန်မော့ရှေ့မှ ခတ္တသာဖြတ်ကျော်သွားခဲ့ပြီးနောက် ပြန်လှည့်လာခဲ့လေသည်။

ထန်မော့၏ ရင်မှာတင်းကြပ်သွားခဲ့သည်။ ခြေသံမှာ သူ၏ရှေ့သို့ရောက်လာခဲ့သည်။ နှုတ်ခမ်းကိုတင်းတင်းစေ့လျက် မီးခြစ်ဆံအားထုတ်ယူလျက် တိုက်ခိုက်ရန်ပြင်လိုက်သည်။

ထို့နောက်တွင် အားနည်းနေသောအသံက အံ့အားသင့်နေဟန်ဖြင့် ဆိုလာခဲ့သည်။

"ဘုရားရေ မင်းကအသစ်လွှတ်လိုက်တဲ့ အလုပ်သမားလား"

ဖျော့တော့သော အလင်းရောင်က ထန်မော့၏ မျက်နှာပေါ်ထွန်းလင်းလာခဲ့သည်။

၄င်းမှာ နီညိုရောင်ဆံပင်ဖြင့် နိုင်ငံခြားသား လူငယ်လေးဖြစ်သည်။ ထိုသူက မက်ဒေါ်နယ်ဆိုင်၏ ယူနီဖောင်းနှင့်တူသော အနီနှင့်အဖြူ ၀တ်စုံကို၀တ်ဆင်ထားခဲ့သည်။ အိုဟောင်းသောမီးအိမ်တစ်ခုကို လေထဲမှ ဆွဲထုတ်လိုက်လျက် ထန်မော့ရှေ့တွင် ထွန်းလိုက်ခြင်းပင်။

ထိုစကားကိုကြားပြီးနောက် ထန်မော့ မီးခြစ်ဆံကိုထုတ်ယူမည့်အစီအစဥ်ကို ရပ်လိုက်သည်။ သူကခတ္တမျှတွေးတောလိုက်ပြီးနောက် ခေါင်းငြိမ့်လိုက်မိလေသည်။

"မင်းရောက်လာတာ တကယ်ကံဆိုးတာပဲကွာ၊

ဘေကရူးနေပြီ၊ ငါ့ဒဏ်ရာတွေကိုမြင်လား၊ သူလုပ်ထားတာ"

"မင်း..."

ထန်မော့ဘာကိုမှ မဆိုလိုက်ရသေးခင် ထူးဆန်းသော အသံတစ်ခုက လှိုဏ်ခေါင်းတစ်ဖက်မှ ထွက်လာခဲ့သည်။ ၄င်းမှာမြွေသံနှင့်တူသော်လည်း ကွဲပြားပြန်သည်၊ ထို့နောက်တွင် ကြီးမားသောအရာတစ်ခုက လှိုဏ်ခေါင်းတစ်လျှောက် ထိခတ်နေသံကိုလည်း ကြားလိုက်ရလေသည်။

ဘန်း...ဘန်း...

လှိုဏ်ခေါင်းမှာ အမည်မသိသတ္တ၀ါတစ်ကောင်၏ ၀င်တိုက်ခြင်းကိုခံရပြီး ငလျင်နှယ်လှုပ်ခါလာခဲ့လေသည်။ ထန်မော့နှင့် ဆံပင်နီနှင့်ကောင်လေးမှာ ယိုင်နဲ့သွားခဲ့ပြီး နံရံကို ထောက်ကန်လိုက်ရသည်။

ဆံပင်နီနှင့်လူမှာ ကြောက်လန့်သွားခဲ့သည်။

" အဲဒါမွန်းစတားကြီးရဲ့အသံပဲ၊ ရူးနေပြီ၊ အဲဒါကရူးနေပြီ"

ကြောက်လန့်နေသော ကောင်လေးမှာ နောက်သို့သုံးလှမ်းခန့် ဆုတ်သွားပြီး လဲကျတော့မတက်ပင်။ တချိန်ထဲမှာပင် ရွံ့များပေကျံနေသော ထန်မော့၏ မျက်နှာပေါ် အလင်းရောင်တစ်ခု ထွန်းလင်းလာခဲ့သည်။

"အခုက မင်းရဲ့ဂျူတီအလှည့်ပဲ၊ အခြေအနေကိုသွားစစ်ကြည့်လိုက်၊ ငါ..ငါအကူအညီသွားရှာလိုက်ဦးမယ်"

ဆံပင်နီနှင့်လူမှာ ၄င်းကိုဆိုပြီးနောက် အလျင်အမြန် ပြေးထွက်သွားခဲ့သည်။

"ဘာဖြစ်နေလဲသွားကြည့်လိုက်၊ မွန်းစတားကြီးကို မလွတ်သွားစေနဲ့၊ ငါပြန်လာခဲ့ပါ့မယ်"

ထိုသို့ဆိုသော်လည်း ပြေးထွက်သွားခဲ့သော သူမှာ အနည်းငယ်မှ ပြန်လာချင်ပုံမပေါ်ချေ။

ကျယ်လောင်ပြီးစူးရှသော ကလေးသံက သူ၏ခေါင်းထဲတွင် ကြေညာလာခဲ့သည်။

"တင်းတောင်~ မစ်ရှင်ကိုဖွင့်လိုက်ပါပြီ၊ ဘေကို ၃မိနစ်အတွင်းသတ်ပါ"

🪩

Prev Next