Chapter 43

👥️Chapter 43

ရိုက်ကူးရန် အပိုင်းအနည်းငယ်သာ ကျန်ရစ်တော့သည့် ယီချန်းယန်သည် ရိုက်ကူးရေးကို အရင်ဆုံး အပြီးသတ်နိုင်ခဲ့သည်။ သို့သော် သူက ချက်ခြင်း ပြန်မသွားဘဲ ယန်အန်းယုကို စောင့်ဆိုင်းရန် C မြို့တွင် တစ်ပတ်ခန့် ဆက်နေခဲ့သည်။ 

ထို့နောက်တွင် သူတို့နှစ်ဦးသည် S မြို့သို့ လေယာဉ်တစ်စီးတည်း စီးကာ ပြန်လာခဲ့ကြသည်။ 

လေယာဉ် ပထမတန်း၌ လပေါင်းများစွာ မနားတမ်း ရိုက်ကူးရေး လုပ်ခဲ့ရသည့်အတွက် နွမ်းနယ်ပင်ပန်းနေသော ယီချန်းယန်နှင့် ယန်အန်းယုတို့သည် တစ်ယောက်နှင့်တစ်ယောက် မှီထားလျက် အိပ်မောကျနေခဲ့ကြသည်။ 

တလိပ်လိပ် တက်နေသည့် မီးခိုးငွေ့များနှင့်အတူ စစ်မြင်းတို့၏ မြည်ဟီးသံကိုလည်း တရစပ် ကြားနေရ၏။ မြေပြင်တစ်ခုလုံး သွေးစွန်းသည့် အလံများဖြင့် ပြည့်နှက်နေကာ ပျက်စီးနေသည့် ခေါင်းဆောင်းခမောက်နှင့် သံချပ်ကာများကိုလည်း နေရာအနှံ့ တွေ့နေရသည်။ လူသေအလောင်းများမှာလည်း မရေမတွက်နိုင်လောက်အောင်ပင် များပြား စုပုံနေကာ ဤသည်မှာ သူ့အိပ်မက်ထဲတွင် မကြာခဏ မြင်တွေ့ခဲ့ရသည့် စစ်မြေပြင်ပင် ဖြစ်ပေသည်။ 

ယီချန်းယန်က စစ်မြေပြင်၏ အပြင်ဘက်တွင် ရပ်နေခဲ့သည်။ သူသည် ထိုနေရာသို့ အပြေးသွားကာ တပ်သားများနှင့်အတူ ကြောက်ရွံ့ခြင်းကင်းစွာဖြင့် တိုက်ပွဲဝင်လိုစိတ်များ မကြာခဏ ဖြစ်ပေါ်ခဲ့သော်လည်း ပြေးသွားရန် ကြံလေတိုင်း မမြင်နိုင်သည့် နံရံတစ်ချပ်က သူ့ကို ကာဆီးထားခဲ့သည်။ 

ထို့နောက်တွင် တစ်စုံတစ်ယောက်က သူ့နာမည်အား ခေါ်နေသည်ကို ကြားလိုက်ရတော့သည်။ 

“ယီ ... ယီချန်းယန်! ယီချန်းယန်! …”

ဘယ်သူလဲ ... 

ယီချန်းယန်သည် အသံရှင်မှာ မည်သူမည်ဝါဖြစ်ကြောင်း မပိုင်းခြားနိုင်၊ စိုးရိမ်မှုတို့ ဖိစီးနေသည့် လူငယ်လေးတစ်ဦး၏ ပူပန်တကြီး အော်ခေါ်နေသံဖြစ်ကြောင်းကိုသာ သိနေခဲ့သည်။ 

“စစ်သူကြီး .. စစ်သူကြီး အရှင် ဘယ်မှာလဲ ...”

သံချပ်ကာဝတ်စုံကို ဝတ်ဆင်ထားသည့် လူငယ်လေးတစ်ဦး သူ့မြင်ကွင်းတွင် ပေါ်ထွက်လာခဲ့သည်။ မျက်နှာမှာ လွန်စွာ သန့်စင်လှပသော်ငြား သူ့အမူအယာမှာမူ နာကျင်မှုကြောင့် ကူကယ်ရာမဲ့နေသည့်ဟန်ပင်။ 

“စစ်သူကြီး .. ကျွန်တော် အရှင့်ကို ရှာမတွေ့ ...”

ယီချန်းယန်က လူငယ်လေးကို ငေးကြည့်နေရင်း စိတ်ဖိစီးစွာဖြင့် ပြောလိုက်သည်။ 

“မင်း ဘယ်သူ့ကို ရှာနေတာလဲ ငါက စစ်သူကြီး မဟုတ်ဘူး ...”

မမြင်နိုင်သည့် နံရံတစ်ခု ခြားထားသည့်အတွက် ထိုလူငယ်လေးသည် သူ့စကားကို ကြားနိုင်လိမ့်မည် မဟုတ်ဟုသာ ထင်ထားခဲ့သည်။ သို့သော် ... ထင်မှတ်မထားစွာဖြင့် .. ထို လူငယ်လေးသည် သူ့စကားများကို အမှန်တကယ်ပင် ကြားနိုင်ခဲ့ကာ ချက်ခြင်းဆိုသလို မျက်လွှာကို ပင့်လျက် သူ့ကို စိုက်ကြည့်လာခဲ့သည်။ 

ယီခန်းယန်ကလည်း ကြောင်အသွား၏။ 

ဒီ .. ရှေးခေတ်က လူငယ်လေးက ငါ့စကားတွေကိုပဲ ကြားနေရတာ မဟုတ်ဘဲ လူကိုပါ မြင်နိုင်နေတာလား ...

လူငယ်လေး၏ မျက်ဝန်းတို့ ဝင်းလက်သွားကာ စိတ်ခံစားချက်အပြည့်ဖြင့် သူ့ထံသို့ လက်ကို ဆန့်တန်းလိုက်သည်။ ယီချန်းယန်ကလည်း နှလုံးသား နူးညံ့ပျော့ပျောင်းသွားကာ ထိုလူငယ်လေးကို ဆုပ်ကိုင်ထားလိုစိတ်များ ဖြစ်ပေါ်လာတော့၏။ 

အတိတ်က အိပ်မက်များထဲတွင် ယီချန်းယန်သည် မည်မျှပင် ကြိုးစားခဲ့ပါစေ အချည်းနှီးပင်။ လူငယ်လေး၏ လက်ကို ဆွဲကိုင်တော့မည် ကြံလေတိုင်း သွေးရောင်သဖွယ် ရဲရဲနီနေသည့် အလင်းတန်းတစ်ခုက ရုတ်ချည်းဆိုသလို ပေါ်ထွက်လာခဲ့သည်။ 

သို့သော် ဤတစ်ကြိမ်တွင်မူ သူသည် ထို လူငယ်လေး၏ လက်ကို ဆုပ်ကိုင်ဖမ်းဆုပ်နိုင်ခဲ့သည်။ 

လေယာဉ် ပထမတန်း၌ .. ယီချန်းယန်သည် အိပ်ရာမှ နိုးထလာသည့်တိုင် မိန်းမောနေဆဲပင်။ သူက သူ့ပုခုံးပေါ်သို့ မှီကာ အိပ်မောကျနေသည့် ယန်အန်းယုကို စိုက်ကြည့်လိုက်၏။ မျက်လုံးတို့ကို တင်းတင်းပိတ်ကာ နှုတ်ခမ်းနှစ်လွှာကို ယောင်ယောင်လေး ဟထားလျက် အိပ်မောကျနေသည့် ထိုကလေးကြီး၏ ပုံစံမှာ လွန်စွာ ချစ်ခင်နှစ်လိုစဖွယ်ပင်။ 

ယီချန်းယန်က ခပ်တိုးတိုး ရယ်မောလိုက်သည်။ အိပ်မက်၏ နောက်ဆုံးအပိုင်းကို ပြန်တွေးမိလိုက်ပြီးနောက် .. သူသည် ယန်အန်းယု၏ လက်ကို သာသာလေး ဆွဲကိုင်လိုက်တော့သည်။ 

S မြို့သို့ ပြန်ရောက်လာပြီးနောက် အသစ်အသစ်သော အချိန်ဇယားများကြောင့် ယီချန်းယန်နှင့် ယန်အန်းယုတို့သည် တစ်ဦးနှင့်တစ်ဦး အချိန်ပြည့် ပူးကပ်နေချိန် မရှိကြတော့ချေ။ သို့သော် သူတို့သည် တစ်ဦးအပေါ် တစ်ဦးက အပြည့်အဝ နားလည်ပေးထားသည့်အတွက် ထိုကိစ္စနှင့် စပ်လျဉ်း၍ အငြင်းပွားမှု တစ်စုံတစ်ရာမျှ မရှိခဲ့ကြပေ။ 

လတ်တလော နာမည်ကျော်နေသည့် “ဆယ်ကျော်သက်အိုင်ဒေါ” ဟု သတ်မှတ်၍ ရနေပြီဖြစ်သည့် ယန်အန်းယုသည် ဖက်ရှင်အမှတ်တံဆိပ်တစ်ခုက ကျင်းပသည့် အခမ်းအနားပွဲတစ်ခုကို တက်ရောက်ခဲ့သည်။ 

အခမ်းအနား၌ .. တဖျတ်ဖျတ် လက်နေသည့် ကင်မရာမီးရောင်တို့၏ အောက်တွင် .. အနောက်တိုင်းဝတ်စုံ အဖြူနှင့် အနက်ကို တွဲဖက်ကာ ဝတ်ဆင်ထားပြီး ဖဲပွင့်ပုံလည်စည်းကိုပါ ဆင်ယင်ထားသည့် ယန်အန်းယုသည် ဖိနှိပ်နိုင်စွမ်း ပြင်းထန်သည့် တော်ဝင်ဆန်သော အငွေ့အသက်ကို ပေးစွမ်းနေခဲ့သည်။ သို့သော် ပြုံးလိုက်သည်နှင့်တစ်ပြိုင်နက် ပါးနှစ်ဖက်တွင် ရုတ်တရက် ပေါ်ထွက်လာသည့် ပါးချိုင့်လေး နှစ်ခုကြောင့် သူ့ပုံစံမှာ နူးညံ့သိမ်မွေ့သည့် အမျိုးသားကောင်းတစ်ဦးအဖြစ်သို့ တစ်မဟုတ်ချင်း ပြောင်းလဲသွားတော့သည်။

ထိုပွဲကို တက်ရောက်လာသည့် အခြားသော အနုပညာရှင်များလည်း အများအပြား ရှိနေပေသည်။ အချို့မှာ သူ၏ စီနီယာများ ဖြစ်ကြသည့် နာမည်ကျော်ကြားနှင့်ပြီး ဖြစ်သော ဝါရင့် သရုပ်ဆောင်များ ဖြစ်ကြကာ အခြားလူများမှာမူ သူနှင့် သက်တူရွယ်တူ ပွဲဦးထွက်ကာစ ပါရမီရှင် ကြယ်ပွင့်လေးများ ဖြစ်ပေသည်။ ယန်အန်းယုသည် ထိုကြယ်ပွင့်လေးများအကြောင်း မကြာခဏ ကြားခဲ့ဖူးသည့်တိုင် သူတို့နှင့် တစ်ခါမှ တိုက်ရိုက် ဆက်သွယ်ပြောဆိုခဲ့ဖူးခြင်း မရှိပေ။ 

ထို့အပြင် တက်ရောက်လာကြသူများအနက် သူနှင့် ကုမ္ပဏီတစ်ခုတည်း ဖြစ်သော အသစ်စက်စက် သရုပ်ဆောင် ထန်းရှောင်လည်း ပါဝင်ပေသည်။ 

ဖြူလွလွ လေကာကုတ်အင်္ကျီကို ဝတ်ဆင်ထားသည့် ထန်းရှောင်၏ ပြုမူပြောဆိုပုံများမှာ အလွန် ညင်သာသိမ်မွေ့ပြီး တင့်တယ်လှကာ သူ့ပရိသတ်များ ပေးထားသည့် “မင်းသားလေးရှောင်” ဟူသော အမည်ပြောင်နှင့် များစွာ လိုက်ဖက်လှပေသည်။ 

သူက ယန်အန်းယုအနီးသို့ ချဉ်းကပ်ကာ စတင်၍ မိတ်ဆက်စကား ဆိုလိုက်သည်။ 

“ဟယ်လို ယန်အန်းယု ...”

သူက ယဉ်ကျေးပျူငှာသည့် အပြုံးတစ်ပွင့်နှင့်အတူ လက်တစ်ဖက်ကို ဆန့်တန်းလိုက်သည်။ 

ယန်အန်းယု၏ မျက်ဝန်းထဲတွင် အံ့အားသင့်မှုတို့ ပေါ်ထွက်သွားသော်ငြား ချက်ခြင်းပင် ပြန်လည်ပျောက်ကွယ်သွားကာ ခပ်ဖျော့ဖျော့ ပြုံးပြလျက် လက်ဆွဲနှုတ်ဆက်လိုက်သည်။ 

“ဟယ်လို ...”

“မနက်ဖြန်များ၏အသံ” ကို ယှဉ်ပြိုင်စဉ်က ယန်အန်းယုသည် အကြိုလူရွေးပွဲကိုပင် အောင်မြင်ခဲ့ခြင်း မရှိခဲ့ပေ။ ထို့အပြင် ထန်းရှောင်သည်လည်း S မြို့တော်၏ ဒေသခံ မဟုတ်သည့်အတွက် အခြားဒေသတစ်ခုမှ ဝင်ရောက်ယှဉ်ပြိုင်ရသည့်အတွက် သူတို့နှစ်ဦးသည် တစ်ကြိမ်တစ်ခါမျှပင် ကိုယ်တိုင် ဆုံတွေ့ခဲ့ဖူးခြင်း မရှိပေ။ 

ပြိုင်ပွဲပြီးဆုံးသည့်နောက်ပိုင်းတွင်လည်း ထန်းရှောင်သည် ရှန်းဟွမ်မီဒီယာနှင့် စာချုပ်ချုပ်ဆိုခဲ့ကာ ယန်အန်းယုကမူ အခြားဒေသများတွင် ရုပ်ရှင်ရိုက်ကူးရင်း အလုပ်များနေသည့်အတွက် ဆုံတွေ့ရန် အခွင့်အရေး မရရှိခဲ့။ ယနေ့တွင်မှ ပထမဆုံးအကြိမ် ဆုံတွေ့ကြရခြင်း ဖြစ်သည်။ 

“အမြဲတမ်း မင်းကို တွေ့ဖူးချင်နေခဲ့တာ ဒါပေမယ့် အခွင့်အရေး မရှိခဲ့ဘူးလေ ...”

ထန်းရှောင်က ပြောလိုက်သည်။ သူ့မျက်လုံးထဲရှိ အပြုံးရိပ်များမှာလည်း တစ်ဖြည်းဖြည်း ကြီးထွားလာခဲ့သည်။ 

“ဒါပေမယ့် ဒီနေ့ အတွေ့အကြုံအရကတော့ .. ထင်ထားတဲ့ အတိုင်းပါပဲ လူတစ်ယောက်ကို ကိုယ်တိုင် တွေ့လိုက်ရတာက သူ့အကြောင်းကို နေရာအနှံ့ကနေ ကြားရတာထက် ပိုကောင်းတယ်ဆိုတာ တကယ်ပဲကိုး ...”

“အိုး ...”

ယန်အန်းယုက ခပ်ဖျော့ဖျော့ ပြုံးလိုက်သည်။ ဤသို့သော ယဉ်ကျေးဖော်ရွေသည့် လောကွက်စကားများကို သက်တော်စောင့် ဖြစ်ခဲ့စဉ် အချိန်က စစ်သူကြီးအား အတင်း မျက်နှာချိုသွေးနေသည့် အမတ်များထံမှ မကြာခဏ ကြားခဲ့ရဖူးပြီး ဖြစ်ပေသည်။ 

“ကျွန်တော်လည်း ထပ်တူပါပဲ ...”

ယန်အန်းယုက ထိုသို့ ပြောလိုက်သည့်တိုင် စိတ်ထဲတွင်မူ သတိကြီးကြီးထားကာ အကဲခတ်လိုက်သည်။ ထန်းရှောင်မှာ အပေါ်ယံသွင်ပြင်အရ ပြီးပြည့်စုံသည်ဟု ထင်မှတ်ရသည့်တိုင် သူ၏ အတွေးများမှာ မခန့်မှန်းနိုင်လောက်အောက် နက်ရှိုင်းရှုပ်ထွေးနေပေသည်။

“ကျွန်တော့်အထင်တော့ သိပ်မကြာခင် နောက်တစ်ခေါက် ထပ်တွေ့ကြရဦးမယ် ထင်တယ် .. အနာဂတ်မှာ အလုပ် အတူတူ တွဲလုပ်ရဖို့ မျှော်လင့်နေမိပါပြီ ...”

အနာဂတ်မှာ အလုပ်အတူတူ တွဲလုပ်ဖို့ ???? 

ယန်အန်းယုက စိတ်ရှုပ်ထွေးသွားတော့သည်။ ထန်းရှောင်၏ စကားများထဲတွင် ဖုံးကွယ်ထားသော အဓိပ္ပါယ်တစ်ခု ပါဝင်နေသည်ဟုလည်း ခံစားမိလာ၏။ 

နှစ်ရက်ကြာပြီးနောက် .. ယန်အန်းယုထံသို့ “Challenge First Time” အမည်ရ ပရိုဂရမ်တစ်ခု၏ ဖိတ်ကြားလွှာ ရောက်လာခဲ့သည်။ အစီအစဉ်တွင် ဟာသသရုပ်ဆောင် ဟုန်ယောင်၊ နာမည်ကျော် တင်ဆက်သူ ဖန်ယိရှန်၊ တီဗီဘုရင်မ ရှဲ့ယန်နှင့် တက်သစ်စ အဆိုတော် ချင်နွော်ရှီ၊ ထန်းရှောင်တို့လည်း ဧည့်သည်အဖြစ် ပါဝင်ထားပေသည်။ 

သူသည် အခြားသော အနုပညာရှင်များနှင့် မရင်းနှီးသော်ငြား ချင်နွော်ရှီ၏ အမည်ကို မြင်လိုက်ရသည့်အတွက် စိတ်အေးသွားရတော့သည်။ ထို့နောက်တွင် ...

ဘာလို့ ထန်းရှောင်ပါ  ပါနေတာလဲ ... 

ယန်အန်းယုမှာ မျက်ခွံတို့ တဆတ်ဆတ် လှုပ်သွားကာ နိမိတ်မကောင်းသည့် ခံစားချက်တစ်ခု ပေါ်ထွက်လာတော့သည်။ 

“Challenge First Time” ၏ ပထမဆုံး season ကို ပြီးခဲ့သည့် ဂျူလိုင်လက ထုတ်လွှင့်ပြသခဲ့ကာ ထုတ်လွှင့်ပြသပြီး တစ်ပတ်အတွင်းမှာပင် မြောက်များစွာသော ချီးကျူးမှုတို့ကို ပိုင်ဆိုင်ရရှိခဲ့ကာ တစ်ပတ်ကြာပြီးနောက်တွင် ချီးကျူးသံတို့မှာ ပို၍ပင် ကျယ်လောင်လာခဲ့သေးသည်။ rating မြင့်မားရုံသာမက ထိုအစီအစဉ်အပေါ် ပရိသတ်၏ စိတ်ဝင်တစား ဆွေးနွေးကြမှုများမှာလည်း ဆက်လက်ကာ အရှိန်မပျက် တည်ရှိနေဆဲ ဖြစ်သည့်အတွက် အခြား အခြားသော ရသစုံရှိုးများကို လုံးဝဥဿုံ ဖိနှိပ်ထားနိုင်ခဲ့သည်။ 

၎င်းသည် တစ်ကိုယ်တော်အတွေ့အကြုံကို အားပေးသည့် အကြီးအကျယ် စီစဉ်ထားသော ရသစုံရှိုး ဖြစ်ပေသည်။ season တစ်ခုလျှင် ရက်သတ္တပတ် ရှစ်ပတ်နှုန်းဖြင့် ဖွဲ့စည်းထားကာ  တစ်ပတ်ချင်းစီတိုင်းတွင် မတူညီသည့် လတ်တလော၌ နာမည်ကြီးနေသော အကြောင်းအရာများ သို့မဟုတ် လူ့ဘောင်သဘာဝကို ပေါ်လွင်ထင်ရှားစေသည့် theme များဖြင့် အစီအစဉ် ရေးဆွဲထားသည်။ ပါဝင်မည့် အနုပညာရှင်များသည် စွန့်စားခန်း အများအပြား ပါဝင်သည့် ဂိမ်းများ၌ သာမန်ဇာတ်ကောင်လေးများအဖြစ် ပါဝင်ရရုံသာမက ရံဖန်ရံခါတွင် အလုပ်ကြမ်းသမားများ၏ သာမန် နေထိုင်မှုဘဝအတိုင်း လိုက်လံနေထိုင်က ထိုသူတို့ကို စိန်ခေါ်ပြီး ခက်ခဲပင်ပန်းဖွယ် task များကို ပြီးမြောက်အောင်မြင်အောင် ကြိုးစားကြရသည်။ ယေဘုယျအားဖြင့် တစ်ပတ်ချင်းစီတိုင်း၏ အစီအစဉ်များမှာ မတူညီကြပေ၊ ထို့အပြင် ရိုက်ကူးရေးအဖွဲ့က လျှို့ဝှက် ဧည့်သည်တော်တစ်ဦးကိုပါ အပတ်စဉ် ဖိတ်ကြားပေးလေ့ ရှိခဲ့သည်။ 

“Challenge First Time” မှာ အလွန် နာမည်ကျော်ကြားကာ ၎င်း၏ ထုတ်လုပ်ရေးအဖွဲ့မှာလည်း များစွာ ထူးချွန်လပေသည်။ ကြည့်ရှုသူများထံမှ အမျိုးမျိုးသော ဆန္ဒမဲများကို ကောက်ခံခဲ့ပြီးသည့်နောက် ရိုက်ကူးရေးအဖွဲ့သည် မည်သူ့အား ဖိတ်ကြားရမည်ကို ဝေဖန်ဆုံးဖြတ်လိုက်ကြတော့သည်။ အချို့မှာ လတ်တလော ကျော်ကြားနေသည့် နတ်ဘုရား၊ နတ်ဘုရားမများ ဖြစ်ကြကာ အချို့မှာမူ ကြည့်ရှုသူများ၏ မုန်းတီးခြင်းကိုလည်း တစ်ကြိမ်တစ်ခါမှ မရရှိခဲ့ဖူးသလို လျှမ်းလျှမ်းတောက် ကျော်ကြားခြင်းလည်း မရှိသော်ငြား ရသစုံရှိုးများနှင့် ပတ်သက်လာလျှင် ပါရမီပါသည်ဟု သတ်မှတ်၍ ရနိုင်သည့် ဝါရင့် အနုပညာရှင်များ ဖြစ်ပေသည်။ 

ဖိတ်ကြားလွှာကို လက်ခံရရှိခဲ့ပြီးနောက် ယန်အန်းယုသည် ချင်နွော်ရှီနှင့်အတူ အစီအစဉ်တစ်ခုကို အတူတူ တက်ရောက်ခွင့် ရတော့မည် ဖြစ်သည့်အတွက် အလွန်ပျော်ရွှင်မိသွားတော့သည်။ သို့သော် ထန်းရှောင်နှင့် စပ်လျဉ်း၍မူ ...

သူ “နှလုံးသား၌ ထုဆစ်လေသော” ကို ရိုက်ကူးစဉ် အချိန်က ကောလီရှုသည် ထိုထန်းရှောင်ကို ပျစ်ပျစ်နှစ်နှစ် ဝေဖန်ခဲ့ဖူးကြောင်း ယခုအထိ မှတ်မိနေဆဲ ဖြစ်သည်။ 

ထို့နောက်တွင် သူက ဖက်ရှင်ရှိုး၌လည်း ထိုထန်းရှောင်က သူတို့အချင်းချင်း ပြန်တွေ့ရလိမ့်ဦးမည်ဟု ပြောခဲ့ကြောင်းကိုပါ မှတ်မိသွားတော့၏။ သူ ထင်ထားသည့်အတိုင်းပင် ထိုတစ်ယောက်သည် သတင်းအချက်အလက်များကို အားလုံးထက် ကြိုတင်ကာ ရထားခြင်း ဖြစ်သည်။ ထန်းရှောင်၏ နောက်ကွယ်၌ အင်အားကြီး ကျောထောက်နောက်ခံ ရှိနေသည်ဟူသည့်  ကောလဟာလမှာ အမှန်ဖြစ်နေသည့်ဟန်ပင်။ 

ဝမ်းသာအယ်လဲ ဖြစ်ရာမှ အနည်းငယ် တောင့်တင်းသွားပြီး ချီတုံချီချနှင့် စိုးရိမ်မကင်း ဖြစ်ဟန်သို့ ပြောင်းလဲသွားသည့်အတွက် ဘေးနားတွင် အကဲခတ်နေသည့် ချီစန်းက ပြောလိုက်သည်။ 

“ရှောင်ယု .. ပြဿနာ ရှိနေလို့လား ...”

“တကယ်လို့ မင်း စိတ်မပါရင် နည်းလမ်းတစ်ခုခု ရှာပြီး ငြင်းလိုက်မယ်လေ ...”

“ရပါတယ် ...”

ယန်အန်းယုက ခေါင်းကို ယမ်းပြလိုက်သည်။ စင်စစ်အားဖြင့် သူသည်လည်း အချို့သော အခြေအနေများကို ကောင်းစွာ နားလည်သဘောပေါက်နေပေသည်။ 

ဤတစ်ကြိမ်တွင် သူ၊ ချင်နွော်ရှီနှင့် ထန်းရှောင်တို့ အစီအစဉ်တစ်ခုထဲ၌ အတူတူ ပါဝင်လာခြင်းမှာ ရှန်းဟွမ်မီဒီယာ၏ အထက်မှ တာဝန်ရှိသူများ၏ ပူးပေါင်းဆုံးဖြတ်ချက်ဟု ယူဆနိုင်ပေသည်။ ထို့ကြောင့် ယန်ကျွယ့်အနေဖြင့်လည်း များစွာ ဝင်ရောက်စွက်ဖက်ရန် မသင့်လှသည့်အပြင် ရသစုံရှိုးများထံမှ မြောက်များစွာသော စီးပွားရေးနှင့် ဈေးကွက်ဖြန့်ကျက်ရေး အခွင့်အလမ်းများ ရရှိနိုင်ပေသည်။ ထို့ကြောင့်လည်း ဤနှစ်ပိုင်းအတွင်း ပြည်တွင်း၌ အမျိုးမျိုးသော ရသစုံရှိုးများ အများအပြား ပေါ်ထွက်လာခဲ့ခြင်း ဖြစ်သည်။ သူ့အတွက်လည်း ဤ “Challenge First Time” ၌ ပါဝင်ခွင့် ရခြင်းမှာ အခွင့်အရေးကောင်းတစ်ခု ဖြစ်ပေသည်။ 

“ချီကော အများကြီး စိတ်မပူပါနဲ့ .. တစ်ချို့ကိစ္စတွေကို ကျွန်တော် သေချာလေး အာရုံစိုက်ပါ့မယ် ...”

ယန်အန်းယုက အဓိပ္ပါယ်ပြည့်ဝနေသည့် အကြည့်တို့ဖြင့် ပြုံးကာ ပြောလိုက်သည်။ 

“ပြီးခဲ့တဲ့ season နဲ့စာရင် ဒီတစ်ခေါက်က ပိုပြီး စိတ်ဝင်စားစရာ ကောင်းလိမ့်မယ်နဲ့ တူတယ်နော် ...”

ချီစန်း “...”

ဒီကောင်လေးက ယီချန်းယန်ရဲ့ အရှေ့မှာဆိုရင်တော့ ရူးသလိုပေါသလိုလိုနဲ့ တကယ့်တကယ်တမ်း တစ်ခြားလူတွေ တစ်ခြားပြဿနာတွေကို ကိုင်တွယ်ရမယ့် အချိန်လည်း ရောက်ရော တကယ်ကို ပါးနပ်ပြီး သတိကြီးတာပဲ ...

ထိုသို့ဖြင့် ရိုက်ကူးရေး စတင်မည့်ရက်သို့ ရောက်ရှိလာတော့သည်။ ယန်အန်းယုသည်လည်း ရိုက်ကူးရေး ပြုလုပ်မည့် မြောက်ပိုင်း F မြို့တော်သို့ ရောက်ရှိလာခဲ့၏။ 

“နွော်ရှီ ...”

သူက ဝမ်းသာအားရဖြင့် လက်ယမ်းနှုတ်ဆက်လိုက်သည်။ 

ရိုက်ကူးရေးအဖွဲ့က ထုတ်ပေးထားသည့် အချိန်ဇယားအရ လက်ရှိအချိန်မှာ အားလုံး စုံညီစွာ လူစုရမည့် အချိန် မဟုတ်သေးချေ။ ယန်အန်းယုသည် သတ်မှတ်အချိန်ထက် ပို၍ စောစွာ ထွက်လာခဲ့သော်ငြား ချင်နွော်ရှီမှာ သူ့ထက်ပင် ပိုပြီး စောနေသေးကြောင်း သဘောပေါက်သွားတော့သည်။ 

သူ့အသံကို ကြားလိုက်ရသည်နှင့် တစ်ပြိုင်နက် ချင်နွော်ရှီကလည်း အပြုံးတစ်ခုကို ဆင်မြန်းလျက် နောက်သို့ လှည့်ကြည့်လာခဲ့သည်။ သူ့နောက်မှ အမောတကော လိုက်လာသည့် ရိုက်ကူးရေးသမားကလည်း နှမြောတဿ ဖြစ်စွာဖြင့် တိတ်တခိုး သက်ပြင်းချကာ မိန်းမပျိုပေါင်း ထောင်သောင်းမကကို သေစေနိုင်လောက်သည့် ထိုအပြုံးလှလှလေးအား အလျင်အမြန် မှတ်တမ်းတင်လိုက်တော့သည်။ 

“ဟေး ရှောင်ယု ငါ သတိထားမိသလောက်ဆို “သောင်ရှင်း” ရိုက်ကူးရေး ပြီးသွားကတည်းက မင်းပုံစံက လုံးဝကို ပြောင်းလဲသွားသလိုပဲနော် အမှန်အတိုင်းပြော ကောင်းတဲ့ကိစ္စ တစ်ခုခု ဖြစ်ခဲ့တယ် မဟုတ်လား ...”

အစီအစဉ်ကို တရားဝင် စတင်ရိုက်ကူးနေပြီ ဖြစ်သည့်အတွက် ချင်နွော်ရှီသည် သူနှင့် ပေါ့ပေါ့ပါးပါး ပြောနိုင်နေပြီ ဖြစ်သည်။ 

သူငယ်ချင်းကောင်းများ ဖြစ်ကြသည့်တိုင် ယန်အန်းယုသည် သူနှင့် ယီချန်းယန်၏ ဆက်ဆံရေးကို ချင်နွော်ရှီနှင့် ကောလီရှုအား ထုတ်မပြောခဲ့ဖူးချေ။ သို့သော် ချင်နွော်ရှီ၏ IQ နှင့် EQ မှာ ကောလီရှုထက် အဆများစွာ ပိုမိုမြင့်မားရာ ဤအဆိုတော်သည် ထိုအကြောင်းကို အစောပိုင်းကတည်းက ကြိုတင်ခန့်မှန်းမိနှင့်ပြီးပင် ဖြစ်နိုင်ပေသည်။ 

ချင်နွော်ရှီက ခေါင်းကို ငုံ့ချကာ နှုတ်ခမ်းတို့ ကွေးညွတ်လျက် ယန်အန်းယု၏ လက်ချောင်းများကို မျက်စပစ်ပြလိုက်သည်။ 

စကားသံ တစ်ခွန်းမှပင် ထွက်မလာသည့်တိုင် သူ၏ အဓိပ္ပါယ် ပြည့်ဝလှသည့် အကြည့်တို့မှာ ဤကဲ့သို့ ပြောနေသည့် အလားပင်။ ‘ဒါက မင်းမိသားစုထဲက တစ်ယောက်နဲ့ ပတ်သက်နေတာ မဟုတ်လား’ 

ယန်အန်းယုက သူ စတင်ကူးပြောင်းလာစဉ်က ပျက်စီးနေသည့် လက်ထပ်လက်စွပ်ကို ကြင်နာသော နှလုံးသားပိုင်ရှင် ချင်နွော်ရှီက ကောက်တွေ့ခဲ့ပြီး သူ့ကို ပြန်လာပေးခဲ့ကြောင်း ပြန်အမှတ်ရသွားတော့သည်။

သူက အနည်းငယ် ကြောင်အသွားပြီးကာမှ နေရခက်စွာဖြင့် ခေါင်းငြိမ့်ပြလိုက်သည်။ 

“အင်း .. ဒါပေမယ့် နွော်ရှီ ငါ ဒါနဲ့ပတ်သက်ပြီး တစ်ခါမှ ထုတ်မပြောခဲ့ဖူးတော့လေ .. စိတ်မဆိုးပါနဲ့ ...”

ချင်နွော်ရှီက ပြုံးနေဆဲပင်။ စင်စစ်အားဖြင့် သူသည် ယန်အန်းယု၏ ယီချန်းယန်အပေါ် ဆက်ဆံပုံကို ဟိုးယခင်ကတည်းက ခန့်မှန်းမိနေပြီး ဖြစ်ပေသည်။ 

လူတိုင်းတွင် လျှို့ဝှက်ချက်ကိုယ်စီ ရှိကြသည့်အတွက် သူသည် ထိုကိစ္စအပေါ် စိတ်မကွက်ချေ။ ထို့အပြင် သူတို့သည် ယခုအချိန်တွင် အနုပညာရှင်များ ဖြစ်နေကြပြီ ဖြစ်သည့်အတွက် စကားတစ်ခွန်းချင်းစီကိုပင်လျှင် အထူးတလည် အာရုံစိုက်ရတော့မည်  ဖြစ်ပေသည်။ 

“ဘာတွေ ပြောနေကြတာလဲ ...”

ထိုစဉ် အပြုံးတစ်ခုကို ဆင်မြန်းထားသည့် ထန်းရှောင်က သူတို့အနားသို့ ဖြည်းဖြည်းချင်း ချဉ်းကပ်လာကာ မေးလိုက်သည်။ 

ချင်နွော်ရှီ၏ အမူအယာ ပြောင်းလဲသွားကာ ယန်အန်းယုကမူ ရှေ့သို့ တိုးလာပြီး ပြန်ဖြေလိုက်သည်။ 

“ဘာမှ မဟုတ်ပါဘူး ဒီတိုင်း နွော်ရှီကို သူ သီချင်း ဘယ်လိုဆိုရမလဲ ဆိုတာကို သင်ဖို့ အချိန် ဘယ်လောက် ယူခဲ့ရလဲ ဆိုတာရယ် .. ပြီးတော့ ဘယ်လိုဖြစ်ပြီးများ ဒီလောက်တောင် ချောမောတဲ့ ကောင်လေးအဖြစ် ကြီးပြင်းလာရတာလဲ ဆိုတာရယ် ... ဒီလောက်ပါပဲ ...”

ချင်နွော်ရှီ “...”

ထန်းရှောင်၏ အကြည့်တို့ အနည်းငယ် ပြောင်းလဲသွားကာ ပြုံးလျက်ပင် ပြန်ပြောလိုက်သည်။ 

“မင်းလည်း ကြည့်ကောင်းတာပါပဲ ...”

“ချီးကျူးပေးတဲ့အတွက် ကျေးဇူးတင်ပါတယ် ...”

ယန်အန်းယုက နှုတ်ခမ်းတို့ ကော့ညွတ်လျက် ပြောလိုက်သည်။ 

ဟုန်ယောင်နှင့် ဖန်ယိရှန်တို့ကလည်း အချိန်မီပင် ရောက်လာခဲ့ကြသည်။ ဟာသသရုပ်ဆောင် ဟုန်ယောင်က သူတို့သုံးဦးအကြားသို့ အတင်း တိုးဝင်ကာ မေးစေ့ကို ပွတ်သပ်လျက် ပြောလိုက်သည်။ 

“ယို့ .. ငါ့ရဲ့ ရူပကာတစ်ခုတည်းနဲ့တင် လုံလောက်နေပြီ မှတ်နေတာ ပရိုဂရမ်အဖွဲ့က ဆယ်ကျော်သက်အိုင်ဒေါလေးတွေကိုပါ ထပ်ဖိတ်လိမ့်ဦးမယ်လို့ ထင်မထားဘူး ကြည့်ရတာ ငါတို့ ရိုက်ကူးရေး အဖွဲ့ရဲ့ အလှအပ ခံစားတတ်မှုက တော်တော်လေးကို အဆင့်မြင့်တဲ့ပုံပဲ ...”

“လောင်ဟုန်ရဲ့ မင်းလို ဝက်အိုကြီးက ငါတို့အားလုံးရဲ့ ဆွဲဆောင်မှုတွေကို ဆွဲချမပစ်ပါဘူးဆိုတာ သေချာရဲ့လား ...”

နာမည်ကျော် တင်ဆက်သူ ဖန်ယိရှန်က အရွှန်းဖောက်လိုက်သည်။ 

“အိုက်ယား ငါပြောပြမယ် လောင်ဖန်ရဲ့ မင်းက ...”

ဟုန်ယောင်က ဖန်ယိရှန်ကို ပြန်လည်ချေပမည် ပြုစဉ် ရယ်မောသံတစ်ခု၏ နှောင့်ယှက်ခြင်းကို ခံလိုက်ရသည်။ 

“ဟားဟား ...”

ရုပ်မြင်သံကြားလောက၏ ဖျတ်လတ်တက်ကြွသော အလှလေး ရှဲ့ယန်က ဆံနွယ်ရှည်များကို တဖျတ်ဖျတ် ခါယမ်းလျက် ကင်မရာအရှေ့သို့ ရောက်ရှိလာသည်။ အနက်ရောင် ရှပ်အင်္ကျီနှင့် သားရေဘောင်းဘီရှည်ကို ဝတ်ဆင်ထားသည့် သူမ၏ “ချောမောခန့်ညားမှု” မှာ ကျန် အမျိုးသားအနုပညာရှင်များထက် အောက်မကျပေ။

“ယန်ကျဲ မင်္ဂလာပါ ...”

ထန်းရှောင်က အရှေ့သို့ ထွက်လာကာ သူမကို အရင်ဆုံး နှုတ်ဆက်လိုက်သည်။ ပါဝင်မည့် ဧည့်သရုပ်ဆောင်များအနက် ပွင့်လင်းကာ ပေါင်းသင်းရလွယ်ကူသည့် ရှဲ့ယန်သည် နာမည်အကြီးဆုံးဖြစ်သည်။

👥️