အပိုင်း ၁၁၉ ( The President 19 )

လုယွီရှောင်သည် ယန်ကျင်းဇီ ပေးသော နာမည်များကို ပြတ်ပြတ်သားသား သဘောမတူဘဲ အကြောင်းပြချက်ဖြင့် ငြင်းဆန်သည်။

ယန်ကျင်းဇီသည်လည်း သူ့နာမည်က အရမ်းဆိုးသည်ကို သဘောပေါက်ပြီး နောက်ဆုံးတွင် လုယွီရှောင်၏ နာမည်ပြောင်းဖို့ တောင်းဆိုချက်ကို သဘောတူလိုက်သည်။

သို့သော် ကျန်းယွင်ရှိူ့က အနည်းငယ် စိတ်ဓာတ်ကျသွားသည် : “ ယန်ကျင်းဇီရဲ့နာမည်က တော်တော်ကောင်းတယ်လို့ ငါ ထင်မိတယ်။ ”

လုယွီရှောင် : “ ဟ့! ” မင်းကတော့ သေချာပေါက် ယန်ကျင်းဇီ ဆိုတဲ့ ဒီမြေခွေးကြောင့် ယစ်မူးနေပြီ!

မည်သို့ပင်ဖြစ်စေ နောက်ဆုံးတွင် အခွေ၏နာမည်ကို “Day and Night” အဖြစ် သတ်မှတ်လိုက်ကြသည်။

“ ကဗျာမှာ *‘နှစ်ဦးနှစ်ဖက်ကြားက ချစ်ခြင်းမေတ္တာ ခိုင်မြဲနိုင်တာ သေချာရင် ဘာကြောင့်များ သူတို့က နေ့ရောညပါ အတူရှိနေဖို့ လိုအပ်တာလဲ?’ လို့ ရေးဖွဲ့တယ်။ ဒါပေမယ့် နေ့ရောညပါ အတူရှိနေဖို့ ဆန္ဒပိုရှိကြတာပဲလေ။ မင်းတို့နှစ်ယောက် တစ်ချိန်လုံး အတူရှိနေနိုင်မယ်ဆို ဘယ်လောက်ကောင်းလိုက်မလဲ။ ” လုယွီရှောင်သည် သူက အသက်လေးဆယ်ကျော်ပြီ ဖြစ်သော်လည်း အခြားသူများ၏ အချစ်ကို ပြသခြင်းအား ကြည့်ရှုရရုံတင်မက ဘေးနားမှ သူတို့ကို ချီးကျူးရသေးသည်ဟု တွေးမိသည်။ တကယ် ဝမ်းနည်းဖို့ကောင်းတယ်!

ယန်ကျင်းဇီက အတော်လေး နှစ်ခြိုက်သွားသည် : “ ဒါက နာမည်ကောင်းပဲ! ယွင်ရှိူ့နဲ့ ငါက ငါတို့တစ်ဘဝလုံးကို နေ့ရောညပါ အတူတူ ကုန်ဆုံးသွားကြမှာ။ ”

ကျန်းယွင်ရှိူ့ကမူ... ယန်ကျင်းဇီက ကောင်းတယ်လို့ ပြောမှတော့ သေချာပေါက် ကောင်းတယ်!

အခွေအမည်ကို ဆုံးဖြတ်ပြီးနောက်တွင် သူတို့သည် အခွေ၏ သီချင်းနာမည်များကို စတင်ဆွေးနွေးကြသည်။ နောက်ဆုံးတွင် လူအများကို ဆွံ့အသွားစေနိုင်သော သီချင်းနာမည်များကို ထူးခြားသော အဓိပ္ပာယ်နှင့် *“Red Beans” ကဲ့သို့ ကဗျာအတော်ဆန်သော နာမည်များဖြင့် အစားထိုးလိုက်ကြသည်။

အလှည့်အပြောင်း တချို့ပြီးနောက် လုယွီရှောင်သည် အလွန်ပင်ပန်းနေပြီး အထူးသဖြင့် ပြုစုပျိုးထောင်ရန်အတွက် ယန်ကျင်းဇီကို အနုပညာကျောင်းထဲသို့ ပစ်ချလိုက်ချင်သည်။

ဒီလူက မတုံးဘူး၊ ဘာလို့ ဘာအနုပညာဆဲလ်မှ မရှိရတာလဲ‌?!

လုယွီရှောင်သည် ယန်ကျင်းဇီကို သဘောမကျသော်ငြား သူ၏ ယန်ကျင်းဇီကို သဘောမကျမှုက ခဏတာသာ ဖြစ်ပြီး သူက ယန်ကျင်းဇီကို နောက်တစ်ကြိမ် သဘောကျသွားပြန်သည်။ သူသည် ယန်ကျင်းဇီက ချစ်ဖို့ကောင်းလွန်းသည်ဟုပင် တွေးမိသည် – ယန်ကျင်းဇီက ဒီအခွေထုတ်လုပ်ရေးမှာ ငါးမီလီယံ ထည့်မြှုပ်နှံဖို့ ဆုံးဖြတ်ခဲ့တယ်!

ငါးမီလီယံ! ငါးမီလီယံတဲ့!

ဒီအခွေရဲ့ အရည်အသွေးက အရမ်းတိုးတက်လာမှာ သေချာတယ်!

အနုပညာဆဲလ် မရှိရင်တောင် ကိစ္စကြီးကြီးမားမား မဟုတ်ဘူး။ ယန်ကျင်းဇီက အနုပညာ ဖွံ့ဖြိုးတိုးတက်အောင် ပိုက်ဆံသုံးဖို့ ဆန္ဒရှိနေတာ၊ သူက အနုပညာကို မြတ်နိုးသူပဲ!

လုယွီရှောင်သည် ယန်ကျင်းဇီနှင့် ပျော်ရွှင်စွာ ဆွေးနွေးပြီး နောက်ဆုံးတွင်မူ ကျန်းယွင်ရှိူ့ တီးခတ်ဖူးသော ကမ္ဘာကျော် စန္ဒရားသီချင်းများ ပါဝင်မည့် အခွေချပ်၊ အခွေအသစ်တစ်ချပ်ကို ထုတ်လုပ်ရေးတွင် ကျန်းယွင်ရှိူ့အတွက် ထည့်သွင်းမြှုပ်နှံရန် ယန်ကျင်းဇီကို စည်းရုံးလိုက်နိုင်သည်။

ကောင်းပြီ၊ အမှန်တော့ “သိမ်းသွင်းစည်းရုံးခြင်း” ဟု မပြောနိုင်ချေ။ ယန်ကျင်းဇီက သူ၏ ပေါ့ပေါ့ပါးပါး ထည့်သွင်းပြောချိန်တွင်ပင် သဘောတူခဲ့ပြီး သူ့ထက်ပင် ပိုမိုတက်ကြွသေးသည်။

ထို့ကြောင့် အဆုံးတွင် ကျန်းယွင်ရှိူ့ ထုတ်ဝေလိုသော အခွေမှာ တစ်ခွေမှ နှစ်‌ခွေအဖြစ် ပြောင်းလဲသွားသည်။ ထိုမျှတင်မက ကမ္ဘာကျော် စန္ဒရားသီချင်းများနှင့် ပြည့်နှက်နေသော အခွေကို “Waning” ဟု ခေါ်ရန် သူတို့က ဆုံးဖြတ်လိုက်ကြသည်။

အခွေထဲမှ သီချင်းများဟာ သိပ်ပြီး မရွှင်မြူးကြချေ။

လုယွီရှောင်သည် ယန်ကျင်းဇီ၏ ရင်းနှီးမြှုပ်နှံမှုကို ရရှိပြီး အလုပ်များကာ ကျန်းယွင်ရှိူ့သည်လည်း အခွေကို စတင်အသံသွင်းသည်။

ဤကာလအတွင်း ယန်ကျင်းဇီသည် လုပ်ငန်းစဉ်တစ်ခုလုံးတွင် လိုက်ပါပြီး ကျန်းယွင်ရှိူ့အတွက် စီးပွားရေးအကျိုးဆောင်အဖြစ် ဆောင်ရွက်လေသည်။

ယန်ကျင်းဇီသည် ဂီတကို နားမလည်သော်ငြား လူများကို အကဲခတ်နိုင်သည်။

ဤခရီးစဉ်တစ်လျှောက်တွင် သူသည် လုယွီရှောင်က လူကောင်းတစ်ဦး ဖြစ်ကြောင်း သိလိုက်ရသည်။ သူက တေးဂီတကို အမှန်တကယ် ချစ်မြတ်နိုးသည်။ သူသည် သေချာပေါက် ကျန်းယွင်ရှိူ့၏ တေးဂီတကို ခိုးယူကာ ကျန်းယွင်ရှိူ့ကို ချောက်ချခြင်းမျိုး လုံးဝ လုပ်လိမ့်မည်မဟုတ်ချေ။ ဤကိစ္စမျိုး ဖြစ်လာလျှင် ယန်ကျင်းဇီသည် လုယွီရှောင်၏ ကုမ္ပဏီကို ကိုယ်တိုင်ကိုယ်ကျ ဖြေရှင်းမည်ဖြစ်သည်။

လုယွီရှောင်၏ ကုမ္ပဏီမှ လူများသည် လျှို့ဝှက်ရေး သဘောတူညီချက်များကို လက်မှတ် ရေးထိုးခဲ့ကြပြီး သဘာဝအားဖြင့် သူတို့သည်လည်း ထိုသို့လုပ်ဆောင်မည်မဟုတ်ချေ။

ပို၍အရေးကြီးသည်မှာ မူလဇာတ်ကြောင်းထဲတွင် ကျန်းယွင်ရှိူ့ကို ခိုးကူးသည်ဟု စွပ်စွဲသူမှာ မည်သည့်အကျိုးအမြတ်ကိုမျှ မရရှိခဲ့ချေ – ထိုလူက ကျန်းယွင်ရှိူ့ကို တရားစွဲခြင်းမပြုခဲ့ရာ သဘာဝကျစွာပင် လျော်ကြေး‌ရမည်မဟုတ်။

ဒါဆို အဲ့ဒီ့လူက ဘယ်သူလဲ? ပြီးတော့ သူက ဘာကြောင့် အဲ့လိုလုပ်ချင်တာလဲ?

ယန်ကျင်းဇီသည် ပဟေဠိဖြစ်နေပြီး ဤအချိန်တွင် ကျန်းယွင်ရှိူ့သည် အခွေသစ်ကို စတင်၍ ပရိုမိုရှင်းဆင်းနေပြီဖြစ်သည်။

ဤပရိုမိုးရှင်းတွင် လုယွီရှောင်သည် ယန်ကျင်းဇီ၏ အကြံပြုချက်ကို လက်ခံပြီး အခွေ၏ အသေးစိတ် အကြောင်းအရာများကို ထုတ်ဖော်ပြောကြားခြင်း လုံးဝ မရှိဘဲ ကျန်းယွင်ရှိူ့၏ အခွေဟာ တစ်လအတွင်း ထွက်ရှိမည်ဟုသာ ပြောကြားလိုက်သည်။

ဤလျှို့ဝှက်ဆန်းကြယ်သော ဝါဒဖြန့်မှုမျိုးသည် လူများစွာကို အလွန်စူးစမ်းလိုစိတ် ဖြစ်စေပေသည်။ ဤကာလအတွင်း လူအများအပြားသည် ဤအခွေကို စောင့်မျှော်ကြသည်။

အခွေကို တစ်လကြာပြီးမှ ထုတ်ဝေမည်ဖြစ်သော်ငြား ကျန်းယွင်ရှိူ့သည် သူ လုပ်စရာရှိသော အလုပ်မှန်သမျှကို လုပ်ဆောင်ပြီးဖြစ်ကာ အလွန်ပျော်ရွှင်စွာဖြင့် အလုပ်ကို ပြီးမြောက်ခဲ့သည်။

သူသည် အသံသွင်းစတူဒီယိုတစ်ခုသို့ သွားပြီး တေးဂီတကို အသံသွင်းလေ့ရှိကာ သူ၏ ကိုယ်ကျင့်စရိုက်နှင့် သန့်ရှင်းသပ်ရပ်မှုတို့ကြောင့် မကြာခဏ လူအများနှင့် မပျော်မရွှင်ဖြစ်ခဲ့ဖူးသည်။ ဒါပေမယ့် အခု ယန်ကျင်းဇီက သူ့နောက်လိုက်လာတော့ သူ တခြားလူတွေနဲ့ လုံးဝ ကတောက်ကဆ မဖြစ်တော့ဘူး!

ယန်ကျင်းဇီက လူတွေနဲ့ မိတ်ဖွဲ့တာ အရမ်းတော်ပြီး အရမ်းလည်း ချမ်းသာတယ်!

သူသည် လက်ဆောင်များနှင့် စာအိတ်နီများကို ပေးကမ်းခြင်းအား နှစ်သက်ပြီး ဝန်ထမ်းများကိုလည်း စားစရာများ ပေးကမ်းသည်။ သဘာဝအားဖြင့် သူတို့၏ ကျန်းယွင်ရှိူ့ကို နှစ်သက်မှုက တဟုန်ထိုး မြင့်တက်သွားသည်။

ပိုမိုအရေးကြီးသည်မှာ... ယခင်က ကျန်းယွင်ရှိူ့ တစ်ယောက်တည်း ရောက်လာစဉ်တွင် သူ့ပုံစံဟာ လိုက်လျောညီထွေ ပေါင်းသင်းရန် မလွယ်ကူပုံ အမြဲပေါ်သည်။ ယခုမူ သူနှင့် ယန်ကျင်းဇီတို့သည် အတူလမ်း‌လျှောက်ကြပြီး သူက ယန်ကျင်းဇီကို လှည့်ကြည့်တိုင်း ပြုံးပြသည်။ သူနှင့် လိုက်လျောညီထွေ ပေါင်းသင်းရန်မှာ ခက်ခဲပုံမပေါ်တော့ချေ။ ကြည့်လိုက်တာနဲ့... သူ့ပုံစံက အရမ်းချိုနေတယ်!

ကျန်းယွင်ရှိူ့သည် ဤအကြိမ်ရှိ သူ့အလုပ်မှာ အထူးသာယာသည်ဟု ခံစားရပြီး သူသည် အလုပ်ပြီးသည့်အထိ လုံးဝ မပင်ပန်းခဲ့ပေ။

ဤအကြောင်းကြောင့် သူ့အလုပ်ပြီးသည့်နေ့တွင် သူသည် အမေယန်၏ ဈေးဝယ်ထွက်ရန် ဖိတ်ကြားချက်ကို လက်ခံလိုက်သည်။

ကျန်းယွင်ရှိူ့သည် လွန်ခဲ့သော ရက်အနည်းငယ်ကတည်းက အင်တာနက်ပေါ်တွင် အမေယန်နှင့် ဆက်သွယ်နေခဲ့သည်။ ထို့ကြောင့် အမေယန်နှင့် တွေ့ဆုံသောအခါ သူသည် ပို၍များစွာ သက်တောင့်သက်သာ ရှိလာသည်။ အမေယန်သည် ကျန်းယွင်ရှိူ့နှင့် ပေါင်းသင်းနည်းကို ယန်ကျင်းဇီထံမှ လေ့လာပြီးဖြစ်သည်။ သူ(မ)သည် ကျန်းယွင်ရှိူ့တွင် လူမှုရေး ကသိကအောက်ဖြစ်မှု ရှိကြောင်းကိုလည်း သိထားသောကြောင့် သူနှင့် လိုက်လျောညီထွေ နေထိုင်ရန် အကြောင်းအရာ အနည်းငယ်ကိုလည်း သင်ယူထားသည်။

“ မင်းနဲ့ ကျင်းဇီရဲ့ ဆက်ဆံရေးက အခြေကျတော့မယ်။ ငါ မင်းကို ဘာမှမပေးရသေးဘူး။ ဒီနေ့ မင်း တစ်ခုခုရွေးလိုက်၊ ငါ ငွေရှင်းမယ်။ ” အမေယန်သည် ကျန်းယွင်ရှိူ့ကို ချစ်ခင်ကြင်နာစွာ ကြည့်သည်။

သူတို့မိသားစုတွင် group chat ရှိပြီး သူ(မ)၏သားသည် လွန်ခဲ့သော ရက်အနည်းငယ်က group ထဲတွင် ကျန်းယွင်ရှိူ့၏ သူ့ထံသို့ ငွေလွှဲမှတ်တမ်းကို လာပို့သွားသည်။

အမှန်ပဲ၊ ကျန်းယွင်ရှိူ့က သူ ရသမျှငွေတွေ အကုန်လုံးကို သူ(မ)ရဲ့သားစီ လွှဲပေးတယ်!

အမေယန်သည် သူ(မ)၏သားက လွန်လွန်းသည်ဟု ခံစားရသည်။ သူတို့မိသားစုတွင် ငွေမရှားပါးချေ။ ဘယ်လိုလုပ် သူ(မ)ရဲ့သားက ကျန်းယွင်ရှိူ့ စန္ဒရားတီးပြီး ရှာလာတဲ့ ငွေတွေကို သုံးနိုင်ရတာလဲ?

သူ(မ)ရဲ့သားက ဒီလိုအရှက်မဲ့တဲ့ လုပ်ရပ်ကို ဘယ်လိုတောင် လုပ်ရဲတာလဲ!

စကားမစပ် သူ(မ)သည် သားဖြစ်သူကို group ထဲတွင် အပြစ်တင်ခဲ့ပြီး သူ(မ)၏သားက သူ့ကိုယ်သူ ကာကွယ်ပြောဆိုနေဆဲဖြစ်သည် : “အမေ၊ ‌ယောက်ျားတစ်ယောက်က ပိုက်ဆံရှိလာရင် ဆိုးသွမ်းလာလိမ့်မယ်လို့ အမေ ပြောခဲ့တယ်မလား? ကျန်းယွင်ရှိူ့က ကျွန်တော့်ကို ပိုက်ဆံတွေ အကုန်ပေးရင် သူ့မှာ ပိုက်ဆံမရှိတော့ဘဲ ထွက်လည်း မပြေးနိုင်တော့ဘူး။ အဲ့ဒါ မကောင်းဘူးလား?”

ထိုစကားကို ကြားပြီးနောက် အမေယန်သည် သားဖြစ်သူ၏ခေါင်းကို ရိုက်ခွဲပစ်ချင်မိသည်။

ကျန်းယွင်ရှိူ့မှာ ပိုက်ဆံမရှိပေမယ့် သူ(မ)ရဲ့သားက ချမ်းသာတယ်! သူ(မ)ရဲ့သားက ဆိုးသွမ်းချင်တာလား?!

သေချာတာပေါ့၊ သူ(မ)သည် စဉ်းစားရုံသာ ဖြစ်ပြီး သားဖြစ်သူကို အမှန်တကယ် မရိုက်နှက်နိုင်ပေ။

သူ(မ)၏သား လှည့်ယူထားသော ကျန်းယွင်ရှိူ့၏ ပိုက်ဆံများအတွက်မူ... သူ(မ)သည် ပြန်လည်လျော်ပေးရန်သာ ကြိုးစားနိုင်သည်။

ဥပမာအားဖြင့် အနီရောင်စာအိတ်ကြီးတချို့ကို ကျန်းယွင်ရှိူ့ထံသို့ လွှဲပြောင်းခြင်းနှင့် ကျန်းယွင်ရှိူ့အတွက် တစ်စုံတစ်ခု ဝယ်ပေးခြင်းတို့ဖြစ်သည်။

“ ကျွန်တော် မလိုပါဘူး... ” အမေယန်က သူ့အတွက် တစ်ခုခုဝယ်ပေးချင်သည်ဟု ပြောသောအခါ ကျန်းယွင်ရှိူ့က အလျင်အမြန် ငြင်းဆိုလိုက်သည်။

ဘာလို့ ယန်အိမ်က လူတွေက သူ့အတွက် ပစ္စည်းတွေ ဝယ်ပေးရတာ အရမ်းသဘောကျကြတာလဲ? ယန်ကျင်းဇီသည် နိုင်ငံခြားရှိ သူ့ဆရာ နေထိုင်သော အသိုင်းအဝိုင်းမှ အိမ်တစ်လုံးကို လွန်ခဲ့သော ရက်အနည်းငယ်ကမှ သူ့အတွက် ဝယ်ပေးပြီး ရှယ်ယာများစွာကိုလည်း သူ့အား ပေးခဲ့သည်... သူသည် သူ့ပိုက်ဆံအားလုံးကို ယန်ကျင်းဇီအား ပေးလျှင်တောင် ၎င်းကို မတတ်နိုင်ပေ။ ယခုအခါတွင် ယန်ကျင်းဇီ၏ အမေကလည်း သူ့အတွက် တစ်ခုခုဝယ်ပေးချင်နေပြန်သည်။

“ ဘာမှမဖြစ်ဘူး။ ” အမေယန်က ရယ်သည်။ “ အန်တီက အရမ်းချမ်းသာတယ်။ ဝယ်သာဝယ်။ မင်း လက်မခံရင် အန်တီ့ကို မိသားစုဝင်လို့ သဘောမထားတာပဲနော်! ”

ကျန်းယွင်ရှိူ့ ဘာပြောရမလဲ မသိတော့ပေ။

အမေယန်က မေးသည် : “ မင်း ဘယ်အဝတ်အစားတံဆိပ်ကို ကြိုက်လဲ? ”

ကျန်းယွင်ရှိူ့သည် သူ မကြာခဏ ဝတ်လေ့ရှိသော အမှတ်တံဆိပ်တစ်ခုကို ပြောပြသည်။ ဤအမှတ်တံဆိပ်သည် ၎င်း၏ အရည်အသွေး မြင့်မားမှုနှင့် ရိုးရှင်းမှုကြောင့် လူသိများသည်။ ဈေးနှုန်းကမူ... နွေရာသီ အဝတ်အစားများသည် အများအားဖြင့် တစ်ရာ သို့မဟုတ် နှစ်ရာသာ ရှိပြီး ဆောင်းရာသီ အဝတ်အစားများသည် အနည်းငယ် ဈေးပိုကြီးသော်လည်း သိပ်အများကြီးတော့ မဟုတ်ချေ။

အမေယန် : “ ...ကျင်းဇီက မင်းကို ပိုကောင်းတဲ့ အဝတ်အစားတွေ မဝယ်ပေးဘူးလား? ”

“ ဒီတံဆိပ်က အရမ်းကောင်းတယ်။ အဝတ်လျှော်စက်ထဲ တန်းထည့်လျှော်လို့ရတယ်... ” ကျန်းယွင်ရှိူ့က ဆိုသည်။ ဤအမှတ်တံဆိပ်တွင် အဖြူရောင် အဝတ်အစားများစွာ ရှိသည်။ အဝတ်လျှော်စက်ကလည်း သန့်ရှင်းစွာ လျှော်ဖွပ်နိုင်သည်။ အရမ်းကောင်းတယ်! 

အမေယန် : “ ... ” ဒီကလေးက တကယ် လက်တွေ့ကျလွန်းတယ်!

စဉ်းစားပြီးနောက် အမေယန်သည် နောက်ဆုံးတွင် ကျန်းယွင်ရှိူ့ကို နာရီဝယ်ပေးရန် ခေါ်သွားသည်။

“ အန်တီ၊ ဒီနာရီက အရမ်းဈေးကြီးတယ်… ”

“ ‌ဈေးမကြီးဘူး။ ဘယ်လောက်မို့လို့လဲ! မင်း ယူလိုက်! ”

“ အန်တီ… ”

“ အန်တီနဲ့ သူစိမ်းဆန်မနေနဲ့။ ဒါနဲ့ ငါ့ကို အန်တီလို့ မခေါ်နဲ့တော့။ ကျင်းဇီ ခေါ်သလိုမျိုးပဲ ငါ့ကို “အမေ” လို့ ခေါ်။ ” အမေယန်က ပြောသည်။

ကျန်းယွင်ရှိူ့သည် အမေယန်ကို ကြောင်အစွာ စိုက်ကြည့်မိသည်။ သူ့တွင် ငယ်ငယ်ကလေးဘဝကတည်းက အမေ မရှိခဲ့ပေ...

“ မင်း ဆန္ဒရှိလား? ” အမေယန်က ထပ်မေးသည်။

“ ‌အမေ... ” ကျန်းယွင်ရှိူ့သည် တိုးဖွဖွ ရေရွတ်လိုက်ပြီး သူ့မျက်ဝန်းများမှာ မျက်ရည်တချို့နှင့် ထူးခြားပြောင်မြောက်သော ခံစားချက်များကြောင့် တလက်လက် တောက်ပနေသည် : “ အမေ ”

ဒီကလေး၊ ဘာကြောင့် ဒီကလေးက... အရမ်းရိုးသားပြီး နူးနူးညံ့ညံ့နဲ့ ချစ်ဖို့ကောင်းရတာလဲ!

အမေယန်တော့ ကျန်းယွင်ရှိူ့ကြောင့် အရမ်းပျော့ပျောင်းသွားရပြီ!

သူ(မ)၏ သမီးက ကြမ်းကြမ်းတမ်းတမ်း ပြုမူဆောင်ရွက်တတ်သော အမျိုးသမီး ဖြစ်ပြီး သူ(မ)၏ သားက တကယ့်ကို ငယ်ငယ်ကတည်းက အလွန်ဆိုးသွမ်းသည်။ သားဖြစ်သူ အရွယ်ရောက်လာသောအခါ သူ(မ)သည် သူနှင့် အလွန်မရင်းနှီးတော့ပေ။ ယခုမူ သူ(မ)သည် ဤသို့နူးညံ့ပြီး လိမ္မာရေးခြားရှိသော ကလေးနှင့် တွေ့ရသည်...

“ အေး! ယွင်ရှိူ့က တကယ် လိမ္မာတယ်။ အမေ မင်းကို ခေါ်ပြီး ပစ္စည်းတွေ သွားဝယ်မယ်! ” အမေယန်သည် အလွန်ပျော်နေသည်။

ကျန်းယွင်ရှိူ့သည် ဤတစ်ကြိမ်တွင် အမှန်တကယ် မငြင်းနိုင်ပေ။

‌မေ့လိုက်တော့၊ သူသည် အနာဂတ်တွင် ယန်ကျင်းဇီကို ပေးရန်အတွက် ငွေပိုရှာရပေမည်။

ယန်ကျင်းဇီသည် သူ့အတွက် ပိုက်ဆံများစွာ သုံးခဲ့သည်။ သူသည် သူ့ဘဝ၏ ကျန်တစ်သက်တာလုံးတွင်ပင် ပြန်ပေးရန် မတတ်နိုင်တော့ဟု ခံစားရသည်... ဒါဆိုလည်း ကျန်တဲ့တစ်သက်လုံးမှာ ပြန်ပေးကြတာပေါ့!

နောက်ထပ်သော တစ်သက်တာများ အနည်းငယ်အတွင်း ပြန်ပေးရပြီး နောက်ထပ်သော တစ်သက်တာများစွာတွင်လည်း ဆက်လက်ပေးနေရလျှင် အကောင်းဆုံး ဖြစ်သည်။

အနုပညာများဟာ ဆက်နွယ်နေကြသည်။ ကျန်းယွင်ရှိူ့၏ အလှရသ ခံစားမှုက တကယ့်ကို အလွန်ကောင်းသည်။ အမေယန်နှင့် ဈေးဝယ်ထွက်နေစဉ် သူသည် အမေယန်ကိုလည်း အကြံဉာဏ်တချို့ ပေးစွမ်းနိုင်သည်။ 

သူသည် ရိုးရိုးရှင်းရှင်းနှင့် သက်သာချောင်ချိသော ပစ္စည်းများကို နှစ်သက်ပြီး အမေယန်သည်လည်း ဤပစ္စည်းများကို သဘောကျသည်။ နှစ်ယောက်သားဟာ ပိုပိုပြီး အဆင်ပြေလာသည်။ သူတို့သည် ယန်ကျင်းဇီအကြောင်း စကားပြောကြသောအခါ...

ယန်ကျင်းဇီ ကလေးဘဝတုန်းက ဝဝတုတ်တုတ်နဲ့ အသားမည်းနေတာတောင် သူက ကြည့်လို့ကောင်းတယ်လို့ ကျန်းယွင်ရှိူ့ အခိုင်အမာ ပြောနေတာကို တွေ့လိုက်ရတော့ အမေယန်က သူ့ကို (ကျန်းယွင်ရှိူ့ကို) သေလောက်အောင် ချစ်မိတယ်!

ဒီကလေးက သူ(မ)ရဲ့သားအပေါ် တကယ် ကြင်နာတယ်... ဘာလို့ သူက အရမ်းချစ်ဖို့ကောင်းနေတာလဲ!

အမေယန်သည် ပစ္စည်းကောင်းများ အားလုံးကို ဝယ်ယူ၍ ကျန်းယွင်ရှိူ့ကို ပေးချင်လာသည်။

ကျန်းယွင်ရှိူ့က မလိုချင်ဘဲ ယန်ကျင်းဇီအတွက် တစ်ခုခု ရွေးဝယ်ရန်သာ စဉ်းစားနေသည်။

အမေယန်တွင် သူ(မ)၏သားကို ရိုက်နှက်ချင်စိတ်များ နောက်တစ်ကြိမ် ရုတ်တရက် ပေါ်လာပြန်သည်။

သူ(မ)ရဲ့ မြေခွေးလိုသားက ကျန်းယွင်ရှိူ့ကို ဘယ်လိုစွဲမက်ဖွယ်ဟင်းချိုမျိုးတွေ ကျွေးထားတာလဲ!

အမေယန်နှင့် ကျန်းယွင်ရှိူ့တို့ ဈေးဝယ်ထွက်နေစဉ် သုံ့ချင်းလင်နှင့် သူ့အတန်းဖော်များကလည်း ဤကုန်တိုက်သို့ ရောက်လာသည်။

သုံ့ချင်းလင်နှင့် ကောင်းပေါ်ဟောင်တို့ လမ်းခွဲထားသည်မှာ ကြာပြီဖြစ်သည်။

ဤအချစ်က သူ့ကို အလွန်နာကျင်စေသည်။ သူ့ယခင်ဘဝနှင့် ဤဘဝမှ ကိစ္စများစွာဟာ ရောထွေးကုန်ပြီး သူ့ကို ကောင်းမွန်စွာ မစားနိုင်၊မအိပ်နိုင် ဖြစ်စေကာ သူသည် ပို၍ပင် အလွန်ညှိုးနွမ်းသွားရသည်ဟု ခံစားရသည်။

ယနေ့တွင် သူသည် အတန်းဖော်များနှင့် ဈေးဝယ်ထွက်ပြီး စိတ်အပန်းဖြေချင်သည်။

အနုပညာကျောင်းမှ ကျောင်းသားများသည် ယေဘူယျအားဖြင့် အိမ်တွင် ငွေရှိကြပြီး ပိုက်ဆံအများကြီး သုံးကြသောကြောင့် ဇိမ်ခံစတိုးဆိုင်ကို အတူတူ သွားကြသည်။

သုံ့ချင်းလင်သည် ယခုအချိန်တွင် “ဝင်ငွေ” မရှိတော့ဘဲ စျေးဝယ်ခြင်းသည် ယခင်ကဲ့သို့ မလန်းဆန်းတော့ချေ။ အချိန်အများစုတွင် သူသည် ဈေးမဝယ်တော့ပေ။ ရလဒ်ကမူ ကြည့်ရှုပြီးနောက် သူသည် ကျန်းယွင်ရှိူ့နှင့် အမေယန်တို့ကို တကယ်ပင် တွေ့လိုက်ရသည်။

ဤလူနှစ်ယောက်ကို အတူတူမြင်လိုက်ရသော် သူ့နှလုံးမှာ ဒိတ်ခနဲ ခုန်ပြီး ဇာတ်ပွဲကောင်းတစ်ပွဲ ကြည့်ဖို့ စိတ်ကူး ပေါ်လာသည်။

ယန်ကျင်းဇီ၏ မိခင်ဟာ မည်မျှခက်ခဲကြောင်းကို သူသည် သူ့ယခင်ဘဝတွင် သင်ယူခဲ့ရသည်။

ထိုအချိန်တွင် ယန်ကျင်းဇီ၏ မိခင်နှင့် အစ်မသည် သူ့ကို အတော်လေး အထင်သေးသည်။ သူတို့က သူ့ကို မျက်နှာကောင်း မပြဘဲ ယန်ကျင်းဇီကို သူနှင့် လမ်းခွဲ၍ ပိုကောင်းသော တစ်ယောက်ကို ရှာခိုင်းခဲ့သည်...

ကျန်းယွင်ရှိူ့လည်း သူတို့နဲ့ တွေ့ရင် သူ့လိုပဲ အဆုံးသတ်သွားလောက်တယ်!

မဟုတ်သေး၊ ကျန်းယွင်ရှိူ့က သူ့ထက်တောင် ပိုဆိုးသွားနိုင်တယ်။

ထိုအချိန်က ယန်ကျင်းဇီ၏အမေ စိတ်ကျေနပ်သည့် တစ်ခုတည်းသော ကိစ္စမှာ သူ၏ အိမ်မှုကိစ္စများကို ကောင်းမွန်စွာ လုပ်ဆောင်ခြင်းပင် ဖြစ်သည်။ ဤအမျိုးသမီးတွင် ပြင်းထန်မောက်မာသော အကြည့် ရှိနေပြီး သူ့ကို အိမ်မှုကိစ္စများ ပိုလုပ်၍ ယန်ကျင်းဇီကို ကောင်းကောင်းဂရုစိုက်ခိုင်းခဲ့သည်။

ဒါပေမယ့် ကျန်းယွင်ရှိူ့... ကျန်းယွင်ရှိူ့လို လူမျိုးက အိမ်အလုပ်တွေ ဘယ်လိုလုပ်ရမလဲ ဆိုတာကို မသိနိုင်ဘူးမလား?

ဤသို့တွေးကာ သုံ့ချင်းလင်သည် ကျန်းယွင်ရှိူ့နှင့် အမေယန်တို့အနားသို့ ရောက်သွားပြီးနောက် အမေယန်၏စကားကို ကြားလိုက်ရသည် : “ ယန်ကျင်းဇီက ဘာမှမလိုဘူး။ မင်း သူ့အတွက် ရွေးစရာမလိုဘူး။ မင်း ဒီအိတ်ကို ကြိုက်လား? အမေ မင်းအတွက် ဝယ်ပေးမယ်။ ”

“ အမေ၊ ကျွန်တော့်မှာ အိတ်တစ်လုံး ရှိတယ်... ”

“ နောက်ထပ်နည်းနည်း ထပ်ဝယ်လည်း ဘာမှမဖြစ်ဘူး! ” အမေယန်သည် တစ်စုံတစ်ဦးကို အိတ်ထုပ်ခိုင်းလိုက်ပြီးနောက် ကျန်းယွင်ရှိူ့ကို ပြောသည် : “ အမေ့မှာ ပိုက်ဆံရှိတယ်။ မင်း သုံးလို့ရတယ်! ယန်ကျင်းဇီမှာ ပိုက်ဆံရှိတယ်။ မင်း သူ့ဆီက ပိုပြီးတော့တောင် သုံးနိုင်သေးတယ်!

ကျန်းယွင်ရှိူ့သည် မည်သို့ဖြေရမည်ကိုပင် မသိတော့ပေ။

အမေယန်က ထပ်ပြောသည် : “ ပြီးတော့ မင်း သူ့ကိုပဲ အရမ်းကြီး အာရုံစိုက်မနေနဲ့။... အိမ်အလုပ်တို့ဘာတို့ သူ့ကိုသာ လုပ်ခိုင်းလိုက်။ ယောက်ျားတွေကို အရမ်းအလိုလိုက်လို့ မဖြစ်ဘူး! ”

ကျန်းယွင်ရှိူ့ : “ ... ” တကယ်တော့ အိမ်မှုကိစ္စ ထိန်းသိမ်းတာကလွဲလို့ ကျန်တဲ့ သူတို့ရဲ့ အိမ်မှုကိစ္စတွေကို ယန်ကျင်းဇီကပဲ လုပ်လေ့ရှိတယ်။ 

သုံ့ချင်းလင် : “ ... ” ဒီလိုမဖြစ်သင့်ဘူး ဆိုတာ သေချာတယ်!

____

*နှစ်ဦးနှစ်ဖက်ကြားက ချစ်ခြင်းမေတ္တာ ခိုင်မြဲနိုင်တာ သေချာရင် ဘာကြောင့်များ သူတို့က နေ့ရောညပါ အတူရှိနေဖို့ လိုအပ်တာလဲ? - ( ချင်ကွမ်း ရေးသားသော ‘ငှက်ကျားတံတားပေါ်မှ မသေမျိုးများ’ ကဗျာမှ ) စုံတွဲတွေဟာ အချင်းချင်း နက်နက်ရှိုင်းရှိုင်း ချစ်မြတ်နိုးသရွေ့ ရုပ်ပိုင်းဆိုင်ရာ အတူရှိနေဖို့ မလိုအပ်တော့ဘူး။ တရုတ်လူမျိုးတွေက ကွဲကွာပြီး ရေမြေခြားနေတဲ့ ချစ်သူစုံတွဲတွေကြားက နက်ရှိုင်းတဲ့ ချစ်ခြင်းမေတ္တာကို ဖော်ပြဖို့ ဒီကဗျာကို မကြာခဏ သုံးလေ့ရှိ

တယ်။

*Red Beans - ပဲနီလေးများ၊ လွမ်းဆွတ်ခြင်း၏ သင်္ကေတလည်း ဖြစ်သည်။