Chapter 47

👥️Chapter 47

"ဟယ်လို ကျီချမ် ..." 

ယီချန်းယန်က ဖုန်းကို ယူကာ ဘေးနားသို့ လျှောက်သွားလိုက်သည်။ 

ယန်အန်းယုက သူ့ကို အနှောင့်အယှက် မပေးဘဲ CoCo ကို ပေါင်ပေါ် တင်ကာသာ အမွေးဖွားဖွားများကို ကူညီကာ ဖြီးသင်ပေးနေလိုက်သည်။ 

များမကြာမီ ယီချန်းယန်၏ ဖုန်းခေါ်ဆိုမှု ပြီးဆုံးသွားတော့၏။ 

"ဘာတဲ့လဲ ..." 

ယန်အန်းယုက မော့ကြည့်ကာ မေးလိုက်သည်။ 

"Shawn ကောက အရေးပေါ်ကိစ္စ တစ်ခုခု ရှ်ိလို့လား ..." 

"သိပ် အရေးကြီးတာ မဟုတ်ပါဘူး ..." 

ယီချန်းယန်က သာမန်မျှသာ ပြန်ဖြေကာ သူ့ဘေးနားသို့ ဝင်ထိုင်လိုက်သည်။ 

"စောစောက ဘာပြောမလို့လဲ ..." 

"ကျွန်တော် ..." 

ယန်အန်းယု၏ အကြည့်တို့ ပြောင်းလဲသွား၏။ ယခုလက်ရှိအချိန်မှာ မသင့်တော်ဟု ခံစားမိလာသည့်အပြင် ကျန်းကျီချမ်၏ ဖုန်းခေါ်ဆိုမှုကလည်း သူ့စိတ်ကို စနိုးစနောင့် ဖြစ်မိစေပေသည်။ 

"ယီချန်းယန် Shawn ကောကလွဲရင် ခင်ဗျား တစ်ခြားလူတွေနဲ့ အဆက်အသွယ်လုပ်တာလည်း တစ်ခါမှ မတွေ့ဖူးဘူးနော် ဒီနှစ်တွေအတွင်း ... ခင်ဗျားဘေးမှာ သူငယ်ချင်းကောင်းဆိုလို့ Shawn ကောတစ်ယောက်တည်းပဲ ရှ်ိခဲ့တာလား ..." 

"..." 

ယီချန်းယန်က ကြောင်အသွားကာ ထို့နောက်တွင်မှ သာမန်ကာလျှံကာ ပြန်ဖြေလိုက်သည်။ 

"အခုကတော့ အဲဒီလိုပဲ ..." 

"အခု? ဒါဆို အရင်ကရော ..." 

နောက်တစ်ကြိမ် အသံတိတ်သွားရပြန်သည့် ယီချန်းယန် "..." 

တစ်ဖက်လူက ထိုအကြောင်းနှင့် စပ်လျဉ်း၍ ရှည်ရှည်ဝေးဝေး ပြောလိုသည့်ဟန် မပြသည့်အတွက် ယန်အန်းယုသည်လည်း ရှေ့ဆက်ကာ မေးမနေတော့ချေ။ သူက ယီချန်းယန်၏ လက်ကို ဆွဲယူကာ အပြုံးဖျော့ဖျော့ဖြင့် ပြောလိုက်သည်။ 

"ယီချန်းယန် .. အနာဂတ်မှာ ခင်ဗျားမှာ ဘယ်လိုမျိုး စိုးရိမ်စရာ၊ စိတ်ညစ်စရာတွေပဲ ရှ်ိလာလာ ခင်ဗျားဘက်ကနေ ရင်ဖွင့်ချင်စိတ် ရှိနေသရွေ့ ကျွန်တော် ‌နားထောင်ပေးပါ့မယ် ..." 

ယီချန်းယန် "အင်း ..." 

*****

ပရိသတ်များ၏ "Challenge First Time" အပေါ် တုန့်ပြန်ချက်မှာ နွေးထွေးသည့် အကောင်းမြင်မှုများဖြင့် ပြည့်နှက်နေသည့်အပြင် ယန်အန်းယု၊ ထန်း‌‌ရှောင်နှင့် ချင်‌‌နွော်ရှီတို့ အပါအဝင် ပါဝင်သူ ခြောက်ဦးလုံးနှင့် စပ်လျဉ်းသည့် ဆွေးနွေးမှုတို့မှာလည်း အဆက်မပြတ် ထွက်ပေါ်လာလေသည်။ ပရိုဂရမ်တွင် ပါဝင်ကြသည့် သရုပ်ဆောင်များ၏ တင်ဆက်မှုသည်သာမက လူမှုအသိုင်းအဝိုင်းနှင့် စပ်လျဉ်းသည့် အထိအရှမခံသော အကြောင်းအရာသည်လည်း ထိုရှိုး၏ လူထုစိတ်ဝင်စားမှုကို တစ်နည်းတစ်ဖုံ မြှင့်တင်ပေးခဲ့ပေသည်။ လူမှုအသိုင်းအဝိုင်း၏ အောက်ဆုံးအလွှာရှိ အောက်ခြေလူတန်းစားများ၏ ဘဝအကြောင်း နားလည်သဘောပေါက်သွားမှုမှတစ်ဆင့် ထိုဘဝများအပေါ် ချီးကျူးထောပနာပြုမှုများ ထိုမှတစ်ဆင့် ပျော်ရွှင်မှု၊ ဝမ်းနည်းမှုနှင့် စိတ်ခွန်အား ပြည့်ဝလာမှုတို့ကိုပါ အစီအစဉ်တစ်လျှောက် ကြုံတွေ့ခံစားလိုက်ရသည့်အတွက် ကြည့်ရှုသူအားလုံး၏ ရင်တွင် အကောင်းမြင်စိတ်တို့ ကိန်းအောင်းဖြစ်ပေါ်လာတော့သည်။ 

ယခုတစ်ခေါက် ပြသသည့် season တွင် မဲနှိုက်ကာ ဆောင်ရွက်ရသည့် မစ်ရှင်များ အများအပြား ပါရှိသည့်အတွက် ဧည့်သရုပ်ဆောင်ခြောက်ဦးသည် ရိုက်ကူးရေးလုပ်မည့် နေရာသို့ ရောက်လျှင်ရောက်ချင်း အသင်းများ ဖွဲ့လိုက်ကြရ၏။ 

ယန်အန်းယုနှင့် ချင်နွော်ရှီတို့မှာ ထူးထူးခြားခြား ရေစက်ရှိသူများဟု ဆို‌ရလောက်အောင်ပင် ရက်သတ္တပတ် အချို့ခန့်အထိ တစ်သင်းတည်း ကျခဲ့ကြသည်။ 

ဒုတိယအပတ်တွင် သူတို့သည် ယုန်ပုံစံ ဝတ်စုံများကို ဝတ်ဆင်လျက် လမ်းမထက်တွင် "Shy" သီချင်းကို မြူးတူးတက်ကြွစွာ ကပြခဲ့ကြရသည်။ (e tran ကတော့ shy သီချင်းဆိုတာက twice ရဲ့ shy shy shy ကို ပြောချင်တာလို့ ထင်ပါတယ်တဲ့) 

တတိယအပတ်တွင် သူတို့သည် ပေါက်စီများကို တမြုံ့မြုံ့ ကိုက်ဝါးရင်း စပါးပင်ပျိုများအား စိုက်ခင်းထဲသို့ ပြောင်းရွှေ့စိုက်ပျိုးပေးကြရကာ ခွေးရူးတစ်ကောင်၏ ထပ်တလဲလဲ လိုက်ဆွဲခြင်းကိုလည်း ကြိမ်ဖန်များစွာ ခံခဲ့ကြရသည်။ စတုတ္ထအပတ်တွင်မူ လူတိုင်းသည် အရဲစွန့်ကာ လုပ်ဆောင်ရမည့် တာဝန်များကို အသီးသီး ရရှ်ိခဲ့ကြသည်။ ထိုအပတ်၌ သူတို့နှစ်ဦးသည် များစွာ ဆက်ဆံပြောဆိုခြင်း မရှိခဲ့သည့်တိုင် ဘေးကြပ်နံကြပ် အခြေအနေနှင့် ကြုံလာရသည့် အချိန်၌ ယန်အန်းယုသည် သူ ရထားသည့် အသက်ကယ်အဆောင်အား ချင်နွော်ရှီကို ပေးခဲ့သည်။ 

ရိုက်ကူးရေး လုပ်နေစဉ်တစ်လျှောက် ယန်အန်းယုနှင့် ချင်နွော်ရှီ၏ တစ်ဉီးကိုတစ်ဦး ဂရုစိုက်ကာ ညီအစ်ကိုအရင်းသဖွယ် ရင်းနှီးနေမှုများကြောင့် အချိန်အတော်ကြာ တိတ်ဆိတ်ငြိမ်သက်နေခဲ့သည့် "ရှီယု" CP သည် နောက်တစ်ကြိမ် ပြန်လည်သက်ဝင်လာတော့သည်။ 

"ရှီယု" CP တစ်ဖြည်းဖြည်း အင်အားကြီးလာမည့် အနေအထားသို့ ရောက်လာသည့်တိုင် "ယန်ယု" ၏ အမာခံ ပရိသတ်များကမူ "ယန်ယုကမှ အချစ်စစ်" "ယန်ယုကမှ အစစ်အမှန်" ဟူသည့် ခေါင်းစီးကိုသာ အသည်းအသန် ကိုင်စွဲထားရင်း "ရှီယု" သည် သူငယ်ချင်းကောင်းများသာ ဖြစ်သည်ဟု အခိုင်အမာ ပြောနေကြဆဲပင်။ သူတို့၏ စကားအရ အောက်ပုဂ္ဂိုလ်နှစ်ဦးတွင် အနာဂတ် ရှိလာနိုင်မည် မဟုတ်ချေ။

အနုပညာလောက၌ အမျိုးမျိုးသော CP များ ရှိကြကာ နှစ်စဉ်နှစ်တိုင်း အချို့သော အနုပညာသတင်း ဝဘ်ဆိုဒ်များက "သင်တို့ အနှစ်သက်ဆုံး နိုင်ငံ့CP" ကို ရွေးချယ်ပါ ဟူသော ခေါင်းစဉ်ဖြင့် poll တစ်ခု စီစဉ်လေ့ ရှိသည်။ ပရိသတ် အခိုင်အမာ ရရှိထားပြီးဖြစ်သည့် အနုပညာလောက၏ နတ်ဘုရားနှစ်ပါး ဖြစ်ကြသော ရှုရှစ်ယွမ်နှင့် မုန့်ယာတို့၏ "ယွမ်မုန့် အကြင်လင်လင်" CP နှင့် နှိုင်းယှဉ်ပါလျှင် ယန်ယုနှင့် ရှီယုတို့၏ ပရိသတ်များမှာ အသည်းအထန် တိုက်ခိုက်နေကြသည်ဟုပင် ဆိုနိုင်ပေသည်။ 

ဤမနက်ခင်း M မြို့တော်၌ ..  ထောင်ပေါင်းများစွာသော ပရိသတ်များအကြားမှ ဖြတ်သန်းကာ ယီချန်းယန်နှင့် လီယဲ့တို့သည် လေဆိပ်မှထွက်၍ ကြိုတင်ငှားရမ်းထားသော ကြယ်ငါးပွင့်ဟိုတယ်ရှိရာသို့ ထွက်လာလိုက်ကြသည်။ 

အခန်းထဲသို့ ရောက်သည်နှင့်တစ်ပြိုင်နက် ယီချန်းယန်သည် သူ၏ အရန်အကောင့်ထဲသို့ ဝင်ကာ ယန်အန်းယုနှင့် သက်ဆိုင်သည့် သတင်းများကို ရှာဖွေကြည့်ရှုလိုက်သည်။ 

ယန်အန်းယုထံ၌ မကောင်းသတင်း ကောလဟာလဟူ၍ မရှိ၊ အကယ်၍ တစ်ခုတစ်လေ ရှ်ိခဲ့လျှင်လည်း ယန်အန်းယုက ၎င်းကို ပြင်းပြင်းထန်ထန် ကိုင်တွယ်ရန် စီစဉ်မည် ဖြစ်သည်။ ယန်အန်းယု၏ နာမည်ကို ရှာဖွေလိုက်သည်နှင့် တစ်ပြိုင်နက် အမျိုးမျိုးသော ဗီဒီယိုအတိုလေးများ၊ gif များကို တွေ့လိုက်ရကာ ထို ဖန်တီးတည်းဖြတ်ထားမှု တစ်ခုချင်းစီတိုင်းက ထောင်ပေါင်းများစွာသော ဖြတ်သွားဖြတ်လာများအား ဖုန်းစခရင်ကို လျှာဖြင့်လျက်ချင်စိတ်များ ဖြစ်လာစေသည်အထိ ဆွဲဆောင်နိုင်လွန်းလှပေသည်။ ထိုပို့စ်များကို သဘောကျစိတ်ကြောင့် ဖုန်းကြည့်နေသည့် ယီချန်းယန်၏ နှုတ်ခမ်းထောင့်စွန်းတို့ပင်လျှင် မသိမသာ ကော့ညွတ်လာရ၏။ 

သူက အချို့သော ဝဘ်ဆိုဒ်ဖိုရမ်များကိုလည်း မကြာခဏ ဝင်ရောက်ဖတ်ရှုလေ့ရှိကာ အလွန် ထူးချွန်ပြောင်မြောက်လှသည့် စာအရေးအသားများကို ဖတ်ရလေတိုင်းလည်း ဆုကြေးငွေအချို့ ချီးမြှင့်လေ့ ရှိပေသည်။ 

(ဒီဝဘ်ဆိုဒ်တွေနဲ့ ပတ်သက်ပြီး ရှေ့အပိုင်းမှာတော့ ပါပြီးသားပါ ယန်အန်းယုနဲ့ ယီချန်းယန်ရဲ့ fanfiction တွေ ရေးတဲ့ ဝဘ်ဆိုဒ်ကို ပြောချင်တာပါ) 

ယန်ယုဖန်ကလပ်ထဲ၌ လတ်တလောတွင် "Mr LY" အမည်ရ စာရေးသူတစ်ဦး ပေါ်ထွက်လာခဲ့၏။ ထိုသူ၏ စာရေးဟန်မှာ ထောက်ပြစရာ မရှ်ိလောက်အောင်ပင် အထူးတလည် ကောင်းမွန်လှကာ ဇာတ်ကြောင်းနှင့် အသားခန်းများမှာလည်း ဖတ်ရှုသူအပေါင်းကို သွားများ နာကျင်ကိုက်ခဲလာသည်အထိ ချိုမြိန်မှုများ ပေးစွမ်းနိုင်ပေသည်။ ထို့အတူ ရံဖန်ရံခါ ထည့်သွင်းထားသည့် ဇာတ်ကွက်အလှည့်အပြောင်းများမှာလည်း အင်မတန် ပူဆွေးဝမ်းနည်းဖွယ် ကောင်းပေသည်။ 

ထို့ကြောင့် ဖန်ကလပ်တစ်ခုလုံး သာမန်ထက် ပိုကာပင် သက်ဝင်လှုပ်ရှားနေကာ ထို Mr.LY ဆိုသူမှာ danmei ဝတ္ထုများကို ရေးလေ့ရှိသည့် နာမည်ကြီး အမျိုးသားစာရေးသူတစ်ဦးဦးက ယန်အန်းယု၏ ချစ်စရာကောင်းမှုများကြောင့် အမည်ဝှက်တစ်ခုကို သုံးကာ ရေးသားခြင်း ဖြစ်မည်ဟု ကောက်ချက်ချလိုက်ကြသည်။

 လုပ်ဖော်ကိုင်ဖက်များ၏ ဝတ္ထုများအပြင် ဖိုရမ်၏ ထိပ်ဆုံးတွင် ထိုသူ၏ ဝတ္ထုကို pin ထောက်ထားကာ မှတ်ချက်နေရာတွင်လည်း အသစ်တစ်ပိုင်း ထပ်တင်ပေးရန် တောင်းဆိုနေသည့် မှတ်ချက်များက နေ့စဉ် နေရာယူထားပေသည်။ 

ယီချန်းယန်ပင်လျှင် အားလပ်ချိန် ရလေတိုင်း ထို Mr LY မှ အပိုင်းသစ် တင်ထားလေပြီလားဟု မကြာခဏ ဝင်ကြည့်တတ်သည်။ အချစ်နွံထဲသို့ နစ်သွားချိန်မှစ၍ ရုပ်ရှင်ဧကရာဇ်သည် ဝတ္ထုဖတ်ရခြင်းကို တစ်နေ့တစ်ခြား ပိုမိုကာ စွဲလန်းလာတော့သည်။ 

သူနှင့် ယန်အန်းယုအကြောင်း ရေးသားထားသည့် ဝတ္ထုများအား စိတ်အေးလက်အေး ဖတ်ရှုနေသည့် ယီချန်းယန်၏ ဘေးတွင်မူ လီယဲ့က မျက်ခုံးနှစ်ဖက်ကို စုတွန့်လျက် ရုပ်ရှင်ဧကရာဇ်အရှင်၏ အချိန်ဇယားများကို ကြည့်ရှုနေခဲ့သည်။ ထိုစဉ် သူ့ဖုန်းမှ မြည်သံ ထွက်ပေါ်လာသည်။ 

ဟွားချန်မီဒီယာ၏ ချောင်ယုက သူ့ကို WeChat မှ စာပို့လာခြင်း ဖြစ်သည်။ 

[ ရှောင်လီယဲ့လေးရေ အားနာလိုက်တာကွာ ကြည့်ရတာတော့ "Outstanding X" ရဲ့ ဇာတ်လိုက်နေရာကို ငါတို့ ရှစ်ယွမ်လေးကပဲ ရသွားတော့မယ်နဲ့ တူတယ် ဟီးဟီးဟီးဟီး] 

လီယဲ့၏ မျက်ခုံးတို့မှာ ပို၍ပင် တွန့်ကွေးသွားတော့၏။ 

ဒီ .. စီနီယာအဟောင်းက တမင်တကာ လာကြွားနေတာလို့ ဘာလို့များ ခံစားမိနေပါလိမ့်နော် ... 

[အိုး ဟုတ်လား ဂုဏ်ပြုပါတယ်] 

သူက ရိုးရိုးရှင်းရှင်းသာ ပြန်ပြောလိုက်သည်။ 

[ဟား ဟား ရှောင်လီယဲ့လေးက အရင်လို ချစ်စရာကောင်းနေတုန်းပဲ (⁠ ⁠˘⁠ ⁠³⁠˘⁠)⁠♥] 

လီယဲ့က တစ်ဖက်လူကို စာပြန်ရန် စိတ်မပါတော့သည့်အတွက် WeChat ကို  log out လုပ်လိုက်တော့သည်။ 

လီယဲ့၏ စိတ်ဖိစီးနေသည့် ပုံစံမျိုးမှာ အင်မတန် ရှားပါးလှရာ ယီချန်းယန်ပင်လျှင် သူ့ကို လှမ်းကြည့်ကာ အကဲခတ်နေလိုက်တော့သည်။ ထို့နောက်တွင် သူက အခြေအနေကို အကြမ်းဖျဉ်း မှန်းဆမိသွားဟန်ဖြင့် မေးလိုက်၏။ 

"မင်းနဲ့ မစ္စတာချောင်နဲ့က အခုထိ ဆက်ဆံရေး ကောင်းကြသေးတဲ့ပုံပဲနော် ..." 

"လုံးဝမှကို ကောင်းမနေဘူး ..." 

လီယဲ့က ချက်ခြင်းလက်ငင်း ငြင်းဆန်လိုက်သည်။ 

သူကဖြင့် အဲဒီ့ စဉ်းလဲကောက်ကျစ်တဲ့ ချောင်မျိုးရိုး မြေခွေးကောင်နဲ့ နည်းနည်းလေးမှကို တစ်ဖွဲ့တည်း မဖြစ်ချင်ပါဘူးနော် ... 

ယီချန်းယန် "..."

သူ၏ တုန့်ပြန်မှုမှာ အနည်းငယ် အလွန်အကျူး ဖြစ်သွားကြောင်း သတိပြုမိလိုက်သည်နှင့်တစ်ပြိုင်နက် လီယဲ့သည် ယခင်ကကဲ့သို့ တည်ငြိမ်သည့် ပုံစံမျိုး ပြန်ဖြစ်အောင် စိတ်ကို ထိန်းချုပ်လိုက်သည်။ 

"မင်း ဒါရိုက်တာကျူးရဲ့ "Outstanding X " မှာ တကယ် သရုပ်မဆောင်ချင်တာလား ..." 

နာမည်ကြီး ဒါရိုက်တာ ကျူးချီပင်းသည် ငါးနှစ်ကျော်ခန့် အသံတိတ်နေရာမှာ နောက်တစ်ကြိမ် လူထု၏ ရှေ့မှောက်သို့ ပြန်လည်ထွက်ပေါ်လာကာ သူ၏ အသစ်စက်စက် 3D ရုပ်ရှင်ဖြစ်သော "Outstanding X" သည်လည်း ပြည်သူတစ်ရပ်လုံး၏ စိတ်ဝင်တစား စောင့်ကြည့်ခြင်းကို ခံနေရသည်။

 အရေးပါသော ဇာတ်ကောင်ဖြစ်သည့် အဓိကဇာတ်ကောင်အတွက် ယီချန်းယန်နှင့် ရှုရှစ်ယွမ်တို့သည်ပင် အပြင်းအထန် တိုက်ခိုက်နေကြသည်ဟု သတင်းများ ထွက်ပေါ်နေပြီး နောက်ဆုံးရသတင်းများတွင်မူ ထိုဇာတ်ကောင်ကို ရှုရှစ်ယွမ်က ရရှိနိုင်လိမ့်မည်ဟု ခန့်မှန်းရေးသားနေကြပေသည်။  

အပြင်လူများကမူ လက်တွေ့အခြေအနေ အမှန်ကို မသိကြချေ။ မီဒီယာများ၏ သတင်းရေးသားမှုတွင် ယမ်းနံ့များ ဖုံးလွှမ်းနေသည့်တိုင် စင်စစ်လက်တွေ့တွင်မူ ယီချန်းယန်နှင့် ရှုရှစ်ယွမ်တို့အကြားတွင် "ယှဉ်ပြိုင်တိုက်ခိုက်" သည့် အနေအထားမျိုး လုံးဝ ရှိမနေခဲ့ချေ။ 

"ရှုရှစ်ယွမ်က အချိန်ကို အလဟဿ ဖြုန်းတီးလွန်းတယ် ဒီဇာတ်ကောင်ကို သူ့ကို ပေးလိုက်ရလို့လည်း ဆိုးကျိူး မရှိပါဘူး ..." 

ယီချန်းယန်က အတက်အကျ မရှိသည့် လေသံဖြင့် ပြောလိုက်သည်။ "Outstanding X" ၏ ရင်းနှီးမြှုပ်နှံမှု ငွေပမာဏမှာ အင်မတန် ကြီးမားလှရာ ၎င်းကို ရိုက်ကူးရာ၌လည်း အချိန်များစွာ ပေးထားရမည် ဖြစ်သည်။ သူသာ ထိုဇာတ်လမ်းအား ရိုက်ကူးရန် လက်ခံလိုက်ပါလျှင် အဓိကဇာတ်ကောင်နေရာ မရသည့်တိုင် ရိုက်ကူးရေးအဖွဲ့နှင့်အတူ နိုင်ငံအနှံ့ လှည့်လည်ကာ ရိုက်ကူးရမည် ဖြစ်သည့်အတွက် ယန်အန်းယုကို တစ်နှစ်နီးပါးခန့် တွေ့နိုင်တော့မည် မဟုတ်ချေ။ 

"အဲဒီလိုလား ဒါပေမယ့် မင်းပုံစံကတော့ သိသိသာသာကြီးကို ဒါကို မလိုချင်နေသလိုပဲနော် ..." 

လီယဲ့က နှုတ်ခမ်းကို တင်းတင်းကိုက်ကာ ယီချန်းယန်၏ အကြံအစည်ကို ဖော်ထုတ်ခြင်း မပြုတော့ရန်သာ ဆုံးဖြတ်လိုက်သည်။ 

ထားလိုက်ပါ ဘာပဲဖြစ်ဖြစ် ငါလည်း ရုပ်ရှင်ဧကရာဇ်ရဲ့ အမှန်အတိုင်း မပြောတတ်တဲ့ အကျင့်ကို နေသားကျနေပြီပဲဟာ ... 

"Challenge First Time" ဒုတိယ season ၏ ပဉ္စမမြောက် အပတ်အတွက် ရိုက်ကူးရေးကိုလည်း M မြို့တွင်ပင် ရိုက်ကူးခဲ့သည်။ 

ရိုက်ကူးရေး စတင်သည့် အချိန်က စိတ်ခွန်အား တက်ကြွမှု အပြည့်ဖြင့် ယနေ့မစ်ရှစ်များကို မျှော်လင့်စောင့်စားနေကြသည့် ဧည့်သည်တော် ခြောက်ဦးသည် ရိုက်ကူးရေးအဖွဲ့ထံမှ လုံးဝ ထင်မှတ်မထားသည့် ထိတ်လန့်စဖွယ် ကြေညာချက်ကို ကြားလိုက်ရတော့သည်။ ယနေ့ပရိုဂရမ်အတွက် ဧည့်သည် ငါးဦးသာ ပါဝင်နိုင်မည်ဖြစ်ကာ ပထမဆုံး ထုတ်ပယ်ရမည့် တစ်ယောက်ကို သူတို့ကိုယ်တိုင် ရွေးချယ်ကြရမည် ဖြစ်သည်။ 

ဘာတွေ ဖြစ်ကုန်တာလဲ ... 

ပါဝင်သူ ခြောက်ဦးစလုံး နားဝေတိမ်တောင် ဖြစ်သွားကြတော့၏။ 

ထို့နောက်တွင်မူ ရိုက်ကွင်းစည်းကမ်းအတိုင်း ဧည့်သည်ခြောက်ဦးသည် ၁ မှ ၆ အထိ နံပါတ်များကို အသီးသီး ရွေးချယ်ကာ နံပါတ်တပ်ထားသည့် တံခါးအတွင်းသို့ ဝင်သွားလိုက်ကြသည်။ 

ယန်အန်းယုက အခန်းနံပါတ် ၆ သို့ ဝင်ကာ အလယ်‌ရှိ အနီရောင် စက်ဝိုင်းဝိုင်းထားသော နေရာတွင် ရပ်လိုက်သည်။ ထို့နောက်တွင် အခန်းထဲရှိ အသံချဲ့စက်မှ အသံ ထွက်ပေါ်လာတော့သည်။ 

"ယန်အန်းယု .. ဘာကြောင့် နံပါတ် ၆ ကို ရွေးခဲ့တာလဲ ..." 

ယန်အန်းယုက အနည်းငယ် ကြောင်အသွားသည်။ အပိုင်းလေးပိုင်း ရိုက်ကူးပြီးနောက် သူ့ထံတွင် သံသယစိတ်အချို့ ကိန်းအောင်းလာပြီ ဖြစ်သည့်တိုင် စိတ်ကို တည်ငြိမ်အောင် ထိန်းထားနိုင်နေဆဲပင်။ 

"အစ်ကိုကြီး ဟုန်ယောင်တို့ ရှဲ့ယန်ကျဲတို့လို ဧည့်သည်တော်တွေကြားမှာ ကျွန်တော်က အငယ်ဆုံးလေ ကျွန်တော်တို့ရဲ့ ရိုက်ကူးရေးအဖွဲ့ကို မိသားစုကြီးတစ်ခုလို့ သဘောထားလို့ ရတော့ အသက်အရ စီလိုက်မယ်ဆို အားလုံးထဲမှာ ကျွန်တော်က ရှောင်လျှို့ (နံပါတ် ၆) မဟုတ်လား ပြီးတော့ ဒီနံပါတ်ကို တကယ်လည်း သဘောကျလို့ အားလုံးပဲ လျှို့လျှို့သာ့ရွှင်းပါ !!! ..."

(လျှို့လျှို့သာ့ရွှင်း - စီးပွားရေး၊ ကျန်းမာရေး အစရှိတဲ့ အဓိက ကဏ္ဍကြီး ခြောက်ရပ်စလုံး ချောချောမွေ့မွေ့နဲ့ အောင်မြင်ပါစေ) 

"ကောင်းပါပြီ ဒါဆို အားလုံး အဆင်ပြေပါစေလို့ ဆုတောင်း‌လိုက်ပါတယ် ..." 

ထို့နောက်တွင်မူ စိတ်ဖိစီးစဖွယ် ဆယ်စက္ကန့်ကြာ ရေတွက်ခြင်း စတင်လာတော့၏။ ရိုက်ကူးရေးအဖွဲ့က မည်သည်ကိုမှ ရှင်းရှင်းလင်းလင်း ရှင်းပြထားခြင်း မရှိသည့်အတွက် သရုပ်ဆောင်ခြောက်ဦးလုံးမှာ ကိုယ်စီကိုယ်စီ အတွေးနွံထဲ နစ်မြောနေကြကာ မျက်နှာထက်တွင်လည်း အမျိုးမျိုးသော စိတ်ဖိစီးမှု အရိပ်အယောင်များကို အတိုင်းသား မြင်တွေ့နေရသည်။ နောက်ဆုံးစက္ကန့် ရေတွက်ပြီးနောက်တွင် ယန်အန်းယု၏ ခြေဖဝါးအောက်ရှိ ကြမ်းခင်း ကျွံကျသွားပြီ တစ်ကိုယ်လုံး အောက်ထဲသို့ ပြုတ်ကျသွားလေသည်။

ယန်အန်းယုက ဘေးနားရှိ ဥမင်လမ်းကြောင်းတစ်လျှောက် လျှောကျသွားကာ စိုစွတ်သည့် မြေကြီးပေါ်ရှိ မည်းမှောင်ကျဉ်းမြောင်းသော နေရာလွတ်တစ်ခုထဲသို့ ရောက်ရှိသွားတော့သည်။ အနံ့အသက်မှာလည်း မကောင်းလှ၊ ချောဆီထည့်ထားသည့် အနံ့မျိုးဟု ကောက်ချက်ချလိုက်သည်။ လျှောကျလာသည့် လမ်းတစ်လျှောက် သူတစ်ကိုယ်လုံးလည်း ထိုဆီများဖြင့် ပေကြံနေပြီ ဖြစ်သည်။ 

အသိစိတ် ပြန်ဝင်လာပြီဖြစ်သည့် တစ်ကိုယ်လုံး ဆီများဖြင့် ပေရေနေသော ယန်အန်းယုသည် ဖျစ်ညှစ်ရယ်မောရင်း မေးခွန်းထုတ်လိုက်တော့သည်။ 

"ဆိုတော့ ဒါက ဇာတ်ကောင်နဲ့ ပတ်သက်တဲ့ဟာပေါ့ ကျွန်တော် အထုတ်ခံလိုက်ရတာလား ..." 

ထို့နောက်တွင် အသံချဲ့စက်မှ စကားသံကို နောက်တစ်ကြိမ် ကြားလိုက်ရပြန်တော့သည်။ 

"မဟုတ်ဘူး တကယ်တော့ မင်းမှာ အခွင့်အရေး ရှိပါသေးတယ် ယန်အန်းယု မင်းမှာ ပြန်လည်နိုးထခြင်း အမှတ်အသား ရှိနေသေးတယ် မဟုတ်လား ..." 

ပြီးခဲ့သည့် အပိုင်းများတွင် သူသည် ပြန်လည်နိုးထခြင်း အမှတ်အသားနှစ်ခုကို ရရှ်ိခဲ့သည်။ သို့သော် ချင်နွော်ရှီနှင့် ရှဲ့ယန်အား ပေးခဲ့လိုက်ပြီး ဖြစ်သည့်အတွက် ယခုလက်ရှိတွင် သူ့ထံ၌ ပြန်လည်ရှင်သန်နိုင်မည့် အခွင့်အရေး လုံးဝ မရှိတော့ချေ။ 

"မရှိတော့ဘူး ..." 

သူက အော်ပြောလိုက်သည်။ မျက်နှာပေါ်တွင် ပေနေသည့် ဆီများကို သုတ်ပစ်ကာ မျက်တောင်တဖျတ်ဖျတ်ခတ်လျက် ပတ်ဝန်းကျင်ကို အကဲခတ်ကြည့်လိုက်သော်ငြား သူ ရောက်နေသည့် နေရာမှာ များစွာ မှောင်မည်းလွန်းလှသည်။ 

"ကောင်းပြီ ဒါဆို မင်း ဒီနေရာကနေ တစ်မိနစ်အတွင်း ချောချောမောမော ထွက်ပြေးနိုင်ရင် ဒီတစ်ပတ်အပိုင်းမှာ ဆက်ပြီး ပါဝင်ခွင့် ရပါမယ် ဒါဆို အချိန်ရေတွက်ခြင်း စတင်ပါတော့မယ် ..." 

ရုတ်ချည်းဆိုသလို သူ့ခေါင်းထက်တွင် လေဝင်ပေါက် အသေးလေးတစ်ခု ပေါ်ထွက်လာသည့်အတွက် ယန်အန်းယုသည် အနီးပတ်ဝန်းကျင်ကို အနည်းငယ် ရှင်းရှင်းလင်းလင်း မြင်နိုင်လာရသည်။ 

စက္ကန့်တို့က တရွေ့ရွေ့ ကုန်ဆုံးသွားသည်။

 ယန်အန်းယု သူ့ရှေ့ရှိ ဆင်ခြေလျှောကို ခြေနင်းတုံးအဖြစ် အသုံးပြုကာ လေဟုန်ခွင်း၍ အလင်းဝင်ပေါက်အား ခန္ဓာကိုယ်ဖြင့် တိုက်ပြီး ဖျက်ဆီးရန် ပြင်လိုက်သည်။ သို့သော် ဆင်ခြေလျှောမှာ ဆီများဖြင့် ဖုံးလွှမ်းနေသည့်အပြင် သူ့ခန္ဓာကိုယ်မှာလည်း အလားတူပင် ချောကျိစိုစွတ်နေသည့်အတွက် နှစ်ကြိမ်တိုင်တိုင် ကြိုးစားသည့်တိုင် လမ်းတစ်ဝက်တွင် ပြန်ပြုတ်ကျလာခဲ့သည်။ 

အံတင်းတင်းကြိတ်ကာ ခြေဖဝါးနှင့် ခြေထောက်ရှိ အတွင်းအားများကို စုစည်းလျက် မျက်နှာပြင်ပေါ်သို့ ခုန်တက်လိုက်ပြီးနောက် ..  နောက်ဆုံးတွင် လေဝင်ပေါက် ရှိရာဆီသို့ တက်လှမ်းနိုင်သွားတော့သည်။ 

အချိန်မှာ ဆယ်စက္ကန့် ကျန်နေသေး၏။ သို့သော် သူ မည်သို့ပင် ကြိုးစားပါစေ ဝင်ပေါက်မှာ ပွင့်မသွားသေးချေ။ သူက ခြေကန်ချက်တစ်ချက်ဖြင့် အလောတကြီး ကန်လိုက်သည့်တိုင် တံခါးက ပွင့်မသွား။ နောက်ဆုံးစက္ကန့်တွင်မှ ကန်ဖွင့်နိုင်လိုက်သည့်တိုင် အပြင်သို့ အချိန်မီ ပြန်ထွက်ရန် မဖြစ်နိုင်‌တော့ချေ။ 

ဒီနေ့အပိုင်း စရိုက်ပြီဆိုကတည်းကကို အထုတ်ခံရမယ့်ကံ ပါနေတာများလား ... 

ယန်အန်းယု၏ မျက်လုံးတို့ မှောင်မည်းသွားရသည်။ 

ထိုသို့သော ဘေးကြပ်နံကြပ် အခြေအနေမျိုးတွင် ကြီးမားသည့် လက်တစ်စုံ ရုတ်တရက် ထွက်ပေါ်လာပြီး သူ့ကို တင်းတင်းကြပ်ကြပ် ဆွဲထားလိုက်၏။ 

ရင်းနှီးနေသည့် နွေးထွေးမှုက သူ့နှလုံးသားကို ရုတ်တရက် တိုက်ခိုက်သွားသည်။ ယန်အန်းယုသည် ကြောင်အလျက်သားဖြင့်ပင် ထိုပုဂ္ငိုလ်၏ အားအင်အပြည့်ဖြင့် ဆွဲထုတ်ခြင်းကို ခံလိုက်ရတော့၏။

👥️