Chapter 48

👥️Chapter 48

တစ်ကိုယ်လုံး တွဲလွဲခိုကာ ဟန်ချက်ပျက်သွားသည့်အတွက် သတိလက်လွတ် ဖြစ်နေသော ယန်အန်းယုသည် ရင်ခွင်ကျယ်ကြီး၏ ပွေ့ဖက်မှုထဲသို့ ကျရောက်သွား၏။ ရင်းနှီးနေသည့် ခံစားချက်မှာလည်း ပိုမိုကာ ပြင်းထန်လာသည့်အတွက် အံ့ဩတကြီးဖြင့် မော့ကြည့်မိလိုက်သည်။ 

"ယီချန်းယန် .. ဘယ်လိုလုပ် ခင်ဗျား ဖြစ်နေတာလဲ ..." 

ယီချန်းယန်က အသာအယာ ပြုံးပြလိုက်သည်။ 

ထို့နောက်တွင် ဝန်ထမ်းတစ်ဦးက ယန်အန်းယုအား အဝတ်အစားလဲရန် ခေါ်သွားကာ ‌အစောပိုင်းက ရိုက်ကူးထားသည်များအား သူ အဝတ်အစားလဲနေသည့် အချိန်အတွင်း ကျန်သရုပ်ဆောင်များကို ပြသလိုက်သည်။ 

စင်စစ်အားဖြင့် ယနေ့မစ်ရှစ်မှာ ပါဝင်သူတစ်ဦးကို ထုတ်ပယ်ရန် မဟုတ်။ ဂိမ်းအသေးစားလေးဖြင့် စတင်ကာ အထူးစပါယ်ရှယ် ဖိတ်ကြားထားသည့် ဧည့်သည်တော် ယီချန်းယန်ကို ထုတ်ပြခြင်း ဖြစ်သည်။ 

"အားလုံးပဲ မင်္ဂလာပါ ..." 

အပြာရောင် အားကစားဝတ်စုံကို ဝတ်ထားသည့် ယီချန်းယန်က ပြုံးကာ နှုတ်ဆက်လိုက်သည်။ 

ဟုန်ယောင် ဦးဆောင်သည့် ကျန်ငါးဦးက သူ့ကို အားရဝမ်းသာ လက်ခုပ်တီးလျက် ကြိုဆိုလိုက်ကြသည်။ 

အစ်ကိုကြီး ဟုန်ယောင်၏ မျက်နှာမှာ တစ်ခုခုကို ရုတ်တရက် သဘောပေါက်သွားသည့်ဟန်ပင်။ 

"အိုး လက်စသတ်တော့ ဒီလိုကိုး ဒါဆို အစပိုင်းတုန်းက ခြောက်ယောက်မှာ ငါးယောက်ပဲ ပါဝင်ခွင့်ရမယ်ဆိုတဲ့ စည်းကမ်းက အတုကြီးပေါ့ ဟုတ်လား ..." 

"အခုမှ သဘောပေါက်တာပေါ့ .. မင်းရဲ့ တုန့်ပြန်တာကြီးကလည်း နှေးလိုက်တာ ..." 

ဖန်ယိရှန်က နှိပ်ကွက်လိုက်သည်။ 

"ဒါရိုက်တာကြီး ဒီနားလေး ကြွပါဦး လာပါ လုံးဝ မရိုက်ဘူးလို့ ကတိပေးပါတယ် ..." 

‌ဟုန်ယောင်က အင်္ကျီလက်ကို ပင့်တင်ကာ ပြောလိုက်သည်။ 

ထိုစဉ် ရှဲ့ယန်ကလည်း ဝင်ပြောလာ၏။ 

"ငါလည်း ထူးဆန်းပါတယ်လို့ ခံစားမိနေတာ စောစောက ရှောင်ယု ထောင်ချောက်ထဲ ပြုတ်ကျသွားတုန်းကလေ သူ့ခန္ဓာကိုယ်က ဖျတ်လက်တက်ကြွပါတယ် ဆိုပေမယ့် ဒီစိန်ခေါ်မှုက တအား ခက်ခဲလွန်းတယ်လေ ပြောမရဘူး ပရိသတ်တွေသာ ဒါကို တီဗီမှာ မြင်လိုက်ရရင် prank လုပ်တဲ့ ရှိုးလို့တောင် ထင်ချင်ထင်သွားမှာ ..." 

"မဟုတ်လို့လား ..." 

ယီချန်းယန်က မျက်စပစ်ကာ ဝင်ပြောလိုက်သည်။ 

"ဟေး ဒါကတော့ လုံးဝကြီးကို မမှန်ပါဘူးနော် ..." 

သူမက အမောတကော ရှင်းပြလိုက်သည်။ 

"ချန်းယန်ရေ မင်းက တအား အလုပ်များတဲ့သူဆိုတော့ ရသစုံရှိုးတွေကို ကြည့်ဖို့ အချိန်ရှိပါ့မလား မသိပေမယ့် ငါတို့ရဲ့ "challenge First Time" ကတော့ တကယ်ကို အကောင်းမြင်စိတ်တွေ၊ သတ္တိတွေကို လှုံ့ဆော်ပေးနိုင်တဲ့ အစီအစဉ် တစ်ခုပါနော် ..." 

"အင်း ..." 

ချင်နွော်ရှီနှင့် ထန်းရှောင်ကလည်း ပြုံးကာ ခေါင်းငြိမ့်ပြလိုက်ကြသည်။ 

ရိုက်ကူးရေး ပဉ္စမအပတ်သို့ ရောက်လာသည့်အခါ ထုတ်လုပ်ရေးအဖွဲ့၏ စိန်ခေါ်မှုများမှာ ပို၍ပင် မဆီမလျော် ဖြစ်လာကာ ပါဝင်သူများအား အစီအစဉ် စတင်ကတည်းက အရှုပ်ထုပ်များထံ တွန်းပို့ပေးနှင့်ပြီး ဖြစ်သည်။ အထူးသဖြင့် ဒုက္ခအခံရဆုံးသူမှာ နံပါတ် ၆ ကို ရွေးလိုက်မိသည့် ကံဆိုးသူလေး ယန်အန်းယုပင် ဖြစ်ပေသည်။ အထူးဧည့်သည်တော် ယီချန်းယန်ကို ဖိတ်ကြားပြီးနောက် ဤအပတ်အတွက် ရိုက်ကူးမှုကို တရားဝင် စတင်လိုက်ကြသည်။ 

လူခုနစ်ဦးသည် မဲနှိုက်ကာ အသင်းများ အသီးသီး ဖွဲ့စည်းလိုက်ကြသည်။ ယန်အန်းယုနှင့် ယီချန်းယန်မှာ အသင်း မတူကြ။ ယန်အန်းယု၏ အသင်းထဲတွင် ချင်နွော်ရှီ၊ ထန်းရှောင်နှင့် ဟုန်ယောင်တို့ ပါဝင်ပြီး အသက်နှစ်ခုကို ပိုင်ဆိုင်ထားသည့် ယီချန်းယန်ကမူ ရှဲ့ယန်၊ ဖန်ယိရှန်တို့နှင့် တစ်သင်းတည်း ကျခဲ့သည်။ 

အနိုင်အရှုံး ဆုံးဖြတ်ရတော့မည့် အချိန်၌ အဖွဲ့တစ်ဦးချင်းစီ၏ ကိုယ်စားပြုများမှာ ယန်အန်းယုနှင့် ယီချန်းယန်တို့ အသီးသီး ဖြစ်သွားကြတော့သည်။  တစ်ဦးက ကျန်တစ်ဦး၏ မျက်နှာကို စက္ကန့်နှစ်ဆယ်အတွင်း မင်များဖြင့် သုတ်လိမ်းပေးရမည် ဖြစ်ကာ မင် ပိုပေသည့် အသင်းက ရှုံးနိမ့်မည် ဖြစ်သည်။ 

စည်းမျဉ်းမှာ အလွန် ရိုးရှင်းလှသည်။ သို့သော် မင်များအား တစ်ဖက်လူ၏ မျက်နှာပေါ်သို့ တိုက်ရိုက် လောင်းချခွင့် ပြုမထားချေ။

ယီချန်းယန်က စာရေးသည့် စုတ်တံကို မင်ထဲသို့ နှစ်ကာ ယန်အန်းယု၏ ရှင်းသန့်နေသည့် မျက်နှာလှလှလေးပေါ်သို့ ရေးဆွဲလိုက်သည်။ သို့သော် သူသည် စီနီယာများအပေါ် အမြဲတစေ ရိုရိုသေသေ ဆက်ဆံတတ်သည့် အဖွဲ့၏ အငယ်ဆုံးလေးအပေါ် အလွန်အမင်း သက်ညှာနေကြောင်းကို မျက်စိပါသူတိုင်း ရှင်းရှင်းလင်းလင်း မြင်နေရပေသည်။ 

“ရှောင်ယုရဲ့ မျက်နှာ တစ်ခြမ်းက ဘာမှတောင်  မရှိဘူး သူ့နဖူးကလည်း ပြောင်ရှင်းနေတာပဲ ချန်းယန် မင်းက တအားကို ညင်သာလွန်းနေတယ် ...”

ရှဲ့ယန်က မတတ်နိုင်တော့လေဟန်ဖြင့် ပြုံးကာ ပြောလိုက်သည်။ 

ယီချန်းယန်က ငြင်းဆန်ခြင်း မပြုဘဲ ပြုံးရုံသာ ပြုံးနေလိုက်သည်။ 

ယန်အန်းယုကလည်း သူ့ကို တိတ်တိတ်လေး ခိုးကြည့်လိုက်၏။ မျက်နှာထက်တွင် မည်သည့် အရိပ်အယောင်မှ မပြသည့်တိုင် စိတ်ထဲတွင်မူ သူသည်လည်း ကျေနပ်နေမိပေသည်။ 

ထို့နောက် ယန်အန်းယု၏ အလှည့်သို့ ရောက်သည့်အခါတွင်မူ သူသည် ပြိုင်ဖက်အသင်းအား အားရပျော်ရွှင်စွာဖြင့် ကစားတော့သည်။ မင်များအား လက်ဖဝါးထဲသို့ တိုက်ရိုက် လောင်းထည့်ကာ ယီချန်းယန်၏ မျက်နှာကို ထို မင်ပေနေသည့် လက်ဖြင့် ပွတ်သပ်လိုက်သည်။ ချောမောခန့်ညားလှသည့် အမျိုးသားနတ်ဘုရားအဖြစ်မှ မျက်နှာတစ်ခုလုံး မင်ပေနေသူအဖြစ်သို့ တစ်မဟုတ်ချင်း ရောက်ရှိသွားသူအား ငေးကြည့်ရင်း အားလုံး၏ နှလုံးသား ကြေကွဲသွားကြရတော့သည်။ အရှုံးအနိုင်မှာလည်း သိသိသာသာ ကွဲပြားနေပေသည်။ 

“ဟေး ရှောင်ယု အကြင်နာမဲ့လိုက်တာကွာ မင်းက .. မင်းအိုင်ဒေါကို ဒီလိုနည်းလမ်းနဲ့ ဆက်ဆံလိုက်တာပေါ့ ဟုတ်လား ...”

ဖန်ယိရှန်က မေးလိုက်သည်။ 

“ကိစ္စမရှိပါဘူး ဒီလိုပုံစံမျိုးနဲ့ ဖြစ်နေရင်တောင် ကျွန်တော့်အတွက်တော့ စီနီယာယီက အချောမောဆုံး ဖြစ်နေတုန်းပါပဲ ...”

ဖန်ယိရှန်က ချက်ခြင်းဆိုသလို တံတွေးသီးသွားကာ ဟုန်ယောင်နှင့် ရှဲ့ယန်တို့က ဝါးလုံးကွဲ ရယ်မောလိုက်ကြတော့၏။ ချင်နွော်ရှီ၏ နှုတ်ခမ်းထောင့်စွန်းတို့ပင်လျှင် ကော့တက်သွားခဲ့သည်။ သို့သော် ထန်းရှောင်၏ အကြည့်တို့မှာမူ အဓိပ္ပါယ်မဖော်တတ်လောက်အောင် ရှုပ်ထွေးနေခဲ့သည်။ 

ထို့နောက် နောက်ထပ်ပွဲစဉ်တွင် နှစ်ဖက်အသင်းသည် ရွှံ့ကန်ထဲတွင် ယှဉ်ပြိုင်ရမည် ဖြစ်သည့်အတွက် သူတို့၏ အိုင်ဒေါပုံရိပ်ကို လုံးဝဥဿုံ စွန့်ပစ်လိုက်ကြရတော့သည်။ ရိုက်ကူးရေး လုပ်နေစဉ်တစ်လျှောက် အမျိုးမျိုးသော ထင်မှတ်မထားသည်များ ဖြစ်ပွားခဲ့ရာ ဟာသရိုက်ချက်များလည်း မရေမတွက်နိုင်လောက်အောင် ထွက်ရှိခဲ့သည်။ ရိုက်ကူးတည်းဖြတ်မှုအပြီး အစီအစဉ်ကို တရားဝင် ထုတ်လွှင့်သည့်အခါ ထိုအပိုင်းများက ကြည့်ရှုသူများအား ကျိန်းသေ ရယ်မောစေနိုင်လိမ့်မည် ဖြစ်သည်။ 

ရိုက်ကူးရေး အဆုံးသတ်ချိန်တွင်မူ .. အစောပိုင်း အချိန်များက ကံဆိုးမိုးမှောင်ကျကာ ခက်ခဲပင်ပန်းခဲ့ရသည့် ယန်အန်းယုသည် အသင်းသားများနှင့်အတူ အနိုင်ရရှိသွားခဲ့သည်။ 

ရက်အနည်းငယ်ခန့် ပင်ပန်းဆင်းရဲခဲ့ရပြီးနောက် ရိုက်ကူးရေး ပြီးဆုံးသွားသည်နှင့်တစ်ပြိုင်နက် ယန်အန်းယုသည် ယီချန်းယန်ထံမှ ဖုန်းခေါ်ဆိုမှုကို လက်ခံရရှိလိုက်သည်။ 

“ကိုယ် ဒီအစီအစဉ်မှာ ပါလာမယ်လို့ မင်းကို ကြိုမပြောထားမိတော့ တအား စိတ်ဖိစီးသွားမယ်လို့ ထင်နေခဲ့တာ မထင်ထားဘူး တော်တော်လေးကို ပျော်ပျော်ရွှင်ရွှင် ကစားခဲ့တာပဲ ...”

“ဘာပဲဖြစ်ဖြစ် ကျွန်တော်တို့က ဒီထက်ပိုပြီး စိတ်ဖိစီးစရာ၊ ရှက်စရာကောင်းတဲ့ ကိစ္စတွေ အများကြီး လုပ်ခဲ့ပြီးသားပဲလေ ...”

ယန်အန်းယုက တိုးတိုးလေး ရေရွတ်လိုက်သည်။ 

“ဒါက ဘာမှတောင် မဟုတ်တော့ပါဘူး ...”

စိတ်လှုပ်ရှားစရာ၊ ရှက်စရာကိစ္စတွေ ဟုတ်လား ....

ယီချန်းယန်က တိတ်တိတ်လေး ခိုးရယ်လိုက်ကာ အကြည့်တို့မှာလည်း တစ်ဖြည်းဖြည်း နက်မှောင်သွားသည်။ အရေးကြီးကိစ္စတစ်ခု ပျောက်ဆုံးနေသည့်ဟန်ပင်။ 

“ပြီးတော့ အစ်ကိုကြီး ဟုန်ယောင်ကလည်း ကျွန်တော့်ကို ပြောထားဖူးတယ် ဒီလိုအစီအစဉ်တွေမှာဆို ပိုပြီးတော့ ပွင့်ပွင့်လင်းလင်း ရှိသင့်တယ်တဲ့ ...””

သူက ထပ်ပြောလိုက်သည်။ 

“အင်း .. မင်း ဒီနေ့ လုပ်သွားတာ အရမ်းကောင်းတယ် ...”

“ဒါဆို ဆုကရော ...”

ရုပ်ရှင်ဧကရာဇ်၏ အကျင့်လုပ်ပေးမှုကြောင့် ယန်အန်းယုသည်ပင်လျှင် ဆုကို တောင်းဆိုတတ်စ ပြုလာတော့သည်။ 

“ဒီမှာလေ ...”

ယီချန်းယန်က ပြုံးပြလိုက်သည်။ 

“ဘာလဲ ...”

“ကိုယ့် အိမ်ကို လာတဲ့နေ့မှ ပြောပြမယ် ...”

ယီချန်းယန်က သူ၏ သိလိုစိတ်ကို ဆက်လက်ကာ ရှင်သန်စေလိုက်သည်။ များမကြာမီ ယန်အန်းယုသည် S မြို့သို့ ပြန်ရောက်လာကာ ထန်းကော်အား သူ့ကို ယီချန်းယန်၏ သစ်တောအုပ်ဗီလာသို့ လိုက်ပို့ပေးရန် ခြိမ်းခြောက်တောင်းဆိုလိုက်သည်။ 

“မစ္စတာယီ ဒီအတောအတွင်း သခင်လေးကို အပ်ပါတယ်နော် ...”

“အင်း ...”

ယီချန်းယန်က ခေါင်းငြိမ့်ပြလိုက်သည်။ 

“ပင်ပန်းသွားရပြီ ...”

“ထန်းကော်ရေ ကျေးဇူးပဲနော် အိုး ဟုတ်သားပဲ ငါ တိတ်တိတ်လေး ထွက်ပြေးသွားမှန်း ချီကောသာ သိသွားရင် သေချာပေါက် စိတ်ဆိုးဦးမှာပဲ ငါ့အတွက်ပါ ကူချော့ပေးဖို့ မမေ့နဲ့နော် ...”

“ဒါက တအားကြီး မခက်ဘူး မဟုတ်လား သေချာပေါက် အကူအညီ တောင်းပါတယ် နောက်မှ စားကောင်းတာတွေ အများကြီး ဝယ်ကျွေးမယ်နော် ငါ ဒီရက်ပိုင်းမှ သဘောပေါက်လိုက်တာ ချီကောက မင်းစကားကိုဆို ကောင်းကောင်း နားထောင်သလိုပဲနော် ...”

သူက မျက်စိတစ်ဖက် မှိတ်ပြကာ ပြောလိုက်သည်။

ထိုစကားကို ကြားလိုက်ရသည့် ထန်းကော်မှာ အံ့အားသင့်သွားရရှာ၏။ 

“ဟမ် ..  သခင်လေး နားလည်မှု လွဲနေပြီ ထင်တယ် ...”

“ဘာမှ နားလည်မှု မလွဲပါဘူး ချီကောက မင်းကိုဆို ငါ့ထက်တောင် ပိုပြီး ကောင်းပေးသေးတယ် ....”

ယန်အန်းယုက ယုံကြည်ချက်အပြည့်ဖြင့် ပြောလိုက်သည်။ 

ထန်းကော် “...”

ယန်အန်း ထွက်သွားပြီးနောက် ယီချန်းယန်က ယန်အန်းယု၏ ခေါင်းကို အသာ ပုတ်ပေးကာ နူးညံ့စွာဖြင့် ပြောလိုက်သည်။ 

“ဒီလောက် ညဉ့်နက်နေတာတောင် ခိုးထွက်လာသေးတယ် ပင်ပန်းနေပြီ မဟုတ်လား ...”

ယန်အန်းယုက ခေါင်းကို ယမ်းပြကာ ယီချန်းယန်၏ ခါးကို တင်းကြပ်စွာ ဖက်တွယ်လိုက်သည်။ 

“အခု ခင်ဗျားကို မြင်လိုက်ရတော့ နည်းနည်းလေးတောင် မပင်ပန်းတော့ဘူး ...”

ယီချန်းယန်က တစ်ခဏမျှ ကြောင်အသွားပြီးနောက် ချက်ခြင်းဆိုသလို သူ့ကို ပွေ့ချီလိုက်၏။ 

“ဘာ ဘာဖြစ်လို့လဲ ...”

ယီချန်းယန်က စကားတစ်ခွန်းမှ မဆိုဘဲ ပြုံးပြကာ သူ့ကို ဗီလာ ဒုတိယထပ်ရှိ တောင်ဘက်ဆုံးအခန်းထဲသို့ ခေါ်သွားလိုက်သည်။ 

အခန်း၏ အလယ်တွင် စန္ဒယားတစ်ခု ရှိနေကာ လရောင်ဖွေးဖွေးက ဝရန်တာမှတစ်ဆင့် ဖြာကျနေခဲ့သည်။ အနက်ရောင်စန္ဒယား၏ မျက်နှာပြင်မှာ တလက်လက် တောက်ပနေကာ အလွန်အမင်း တင့်တယ်ခမ်းနားနေပေသည်။ 

“ယန်အန်းယု ကိုယ် မင်းအတွက် သီချင်းတစ်ပုဒ်လောက် ဆိုပေးပါရစေ ...”

“အင်း …”

ယန်အန်းယုက ကြောင်အသွားရ၏။

သီချင်းဆိုပေးမယ် ဟုတ်လား ယီချန်းယန်က သရုပ်ဆောင် လုပ်ကတည်းက သီချင်း ဆက်မဆိုတော့ဘူး မဟုတ်လား ...

“ဟိုးအရင်က သီချင်းတွေကို ပြန်ဆိုမလို့လား ...”

သူက မေးလိုက်သည့်တိုင် ယီချန်းယန်က ပြန်မဖြေ။ 

ယန်အန်းယုကို သူ့ဘေးတွင် နေရာချကာ စန္ဒယားအဖုံးကို လှပ်လိုက်သည်။ သွယ်လျလျ လက်ချောင်းများက စန္ဒယားခလုတ်ပေါ်သို့ ဝဲပျံကျဆင်းသွားကာ သံစဉ်တို့ တစ်ဖြည်းဖြည်း စီးကျထွက်ပေါ်လာပြီး ...

“....”

ယန်အန်းယုမှာ လုံးဝ နားမလည်နိုင်ရှာတော့။ သူသည် ထိုသံစဉ်ကို အနည်းငယ်မျှပင် ရင်းနှီးသိရှိနေခြင်း မရှိ၊ ၎င်းမှာ ယီချန်းယန် ဆိုခဲ့ဖူးသည့် သီချင်းများထဲမှတစ်ပုဒ် မဟုတ်သည့်အပြင် သူကိုယ်တိုင်ပင်လျှင် တစ်ကြိမ်တစ်ခါမျှ မကြားခဲ့ဖူးချေ။

သောတအာရုံ တစ်ခုလုံးကို ဝဲဂယက် ထသွားအောင် ကျီစယ်လှုပ်ခတ်လိုက်သည့် ကြည်နူးဆွတ်ပျံ့ဖွယ် တေးသံစဉ်မှာ ကြားရသူအဖို့ ရင်တသိမ့်သိမ့် ဖြစ်ဖွယ်ရာပင်။ 

ယန်အန်းယု၏ နှလုံးသားမှာလည်း  မသိမသာ တုန်ရီသွားကာ သူ့နှလုံးသားနှင့် မြင်လွှာတစ်ခုလုံးကို ယီချန်းယန်က သိမ်းပိုက်ထားတော့သည်။ 

ချောမောခန့်ညားလှသည့် မျက်နှာကို အောက်သို့ ခပ်စိုက်စိုက် ငိုက်ချထားသည့် ယီချန်းယန်၏ အာရုံစူးစိုက်မှု အပြည့်နှင့် သွင်ပြင်သဏ္ဌာန်မှာ ညင်သာသိမ်မွေ့လွန်းလှသည်။ သူ့နှုတ်ခမ်းတို့ လှုပ်ရှားသက်ဝင်လာကာ အခက်အခဲများစွာနှင့် ပြည့်နှက်နေသည့် ကာလများစွာကို ကြုံတွေ့ဖြတ်သန်းလာခဲ့ရမှုတို့ကြောင့် သူ၏ ညှို့ဓာတ်ပြင်းလှသည့် အသံမှာ ပို၍ပင် ကြည်နူးဆွတ်ပျံ့ဖွယ် ကောင်းလာ၏။ 

Chorus အပိုဒ်သို့ ရောက်သည့်အခါ မူလက ညင်သာသိမ်မွေ့လွန်းသည့် ခံစားချက်များသည် ရုတ်ချည်းဆိုသလို ထက်သန်တက်ကြွလာလေသည်။ ယီချန်းယန်က အမြင့်သံဖြင့် သီဆိုလိုက်ကာ သီချင်း၏ စာသားများကလည်း သူ၏ အချစ်နှင့် ဆန္ဒများကို ထင်ထင်ရှားရှား ဖွဲ့နွဲ့ညွှန်ပြနေသည့်အတွက် သီဆိုမှုကို နားဆင်နေသည့် ယန်အန်းယုသည် ပတ်ဝန်းကျင်တစ်ခုလုံးကို မေ့လျော့ကာ စွဲမက်ဖွယ် သီဆိုမှုထဲသို့ လုံးဝဥဿုံ နစ်မြောစီးဝင်သွားတော့သည်။ 

ယီချန်းယန်က စန္ဒယားခလုတ်ကို လွှတ်လိုက်ကာ သီချင်းကို အဆုံးသတ်လိုက်ချိန်အထိ ယစ်မူးစီးဝင်နေသည့် ယန်အန်းယုမှာ အသိစိတ် ကပ်မလာသေးချေ။ ထို့နောက်တွင်မှ သောင်းသောင်းဖျဖျ လက်ခုပ်တီးကာ ချီးကျူးဂုဏ်ပြုလိုက်လေသည်။ 

“အရမ်း .. အရမ်းကို နားထောင်လို့ ကောင်းတာပဲ ယီချန်းယန် ခင်ဗျားကတော့လေ တကယ်ကို အံ့ချီးဖွယ်ပဲ ...”

သူက အကျယ်တဝံ့ ထုတ်ပြောကာ ချီးကျူးလိုက်သည်။ အလွန်အမင်း စိတ်လှုပ်ရှားနေမှုကြောင့် အချိန်အနည်းငယ်ခန့် ကြာသည်အထိ ပြောစရာစကား ပျောက်ရှသွားခဲ့ရပေသည်။ 

ယန်အန်းယု၏ ချစ်စဖွယ် အပြစ်ကင်းစင်သည့် အမူအယာကို တွေ့လိုက်ရသည့်အခါ ယီချန်းယန်သည် သဘောတကျ ပြုံးမိသွားရသည်။ သူ သီချင်းမဆိုဖြစ်တော့သည်မှာ အလွန်ကြာမြင့်နေပြီ ဖြစ်ရာ အကြိမ်အနည်းငယ်ခန့် လေ့ကျင့်ထားပြီး ဖြစ်သည့်တိုင် စိတ်လှုပ်ရှားနေသောကြောင့် အကောင်းဆုံး မသီဆိုနိုင်ခဲ့ချေ။ သို့သော် ဤ “ပရိသတ်ကောင်းလေး” ကမူ သူ့ကို နည်းမျိုးစုံဖြင့် အစွမ်းကုန် ချီးကျူးပေးနေပေသည်။

“ယီချန်းယန် ဒါ ခင်ဗျားရဲ့ သီချင်းအသစ်လား .. ဘယ်အချိန်ကစပြီး သီချင်းတွေ ပြန်ရေးနေတာလဲ ...”

သူက သိလိုစိတ်အပြည့်ဖြင့် မေးလိုက်သည်။ 

“အခုတလောမှပါ ...”

ယီချန်းယန်က အကျဉ်းချုံး ပြန်ဖြေလိုက်သည်။ သူ့ကိုယ်သူ ယန်အန်းယုကို သဘောကျမိနေပြီဖြစ်ကြောင်း သဘောပေါက်သွားချိန်မှစ၍ သူ့အတွက် သီချင်းရေးပေးလိုစိတ်များ ဖြစ်ပေါ်ခဲ့ပေသည်။ 

ယီချန်းယန်သည် အဆိုတော်ဟူသည့် အလုပ်ဖြင့် အနုပညာလမ်းကြောင်းကို စတင်ခဲ့ခြင်း ဖြစ်ကာ သူသည် ဂီတနှင့် ပတ်သက်၍ လွန်စွာလည်း အားတက်သရော ဖြစ်ခဲ့ဖူးပေသည်။ သို့သော် ထို့နောက်ပိုင်းတွင် အမျိုးမျိုးသော ကိစ္စရပ်များ ဖြစ်ပွားခဲ့၏။ သူ ထုတ်မပြောနိုင်သည့် ကိစ္စများနှင့် ကြုံလာလေတိုင်း၊ မှားယွင်းကာ ပြောမိမည်ကို စိုးရိမ်မိလေတိုင်း သူ့ခံစားချက်များကို ထိန်းချုပ်ပုံသွင်းလိုသည့် ဆန္ဒတို့ ဖြစ်ပေါ်လာလေတိုင်း ယီချန်းယန်သည် ထိုခံစားချက်များအား သီချင်းအဖြစ်သို့ ပြောင်းလဲရန် စဉ်းစားခဲ့ဖူးပေသည်။ 

“ဒီသီချင်းအတွက် ကိုယ် ကျီချမ်ကိုလည်း အကူအညီ တောင်းခဲ့ရသေးတယ် ...”

သူက ပြောလိုက်သည်။ 

ထိုစကားကို ကြားသည့်အခါ ယန်အန်းယုက တစ်စုံတစ်ခုကို ချက်ခြင်း သဘောပေါက်သွား၏။ 

“ဒါဆို Shawn ကော ဟိုတလောက ခင်ဗျားကို ဆက်တိုက် ဖုန်းခေါ်နေတာ ဒီကိစ္စအတွက်ပေါ့ ဟုတ်လား ...”

“အင်း ...”

ယီချန်းယန်က ခေါင်းငြိမ့်ပြလိုက်သည်။ 

ယန်အန်းယုကလည်း ငါနဲ့ ကျန်းကျီချမ်ကြားက ဆက်ဆံရေးအကြောင်းကို အာရုံစိုက်နေတုန်းပဲကို ...

ယန်အန်းယုက စိတ်သက်သာရာ ရသွားဟန်ဖြင့် ပြုံးလိုက်၏။ 

“ဒီသီချင်းရဲ့ နာမည်က ဘာလဲဆိုတာ မမေးတော့ဘူးလား ...”

ယီချန်းယန်က ကူကယ်ရာမဲ့စွာဖြင့် မေးလိုက်သည်။ သူသည် ယန်အန်းယုတစ်ဦးတည်းအတွက် သီးသန့် သီချင်းဆိုပြပြီး ဖြစ်သည့်တိုင် တစ်ဖက်လူ၏ တုန့်ပြန်မှုမှာမူ များစွာ နှေးကွေးနေပေသည်။ 

ယန်အန်းယုက သူ့ကို ကြောင်အစွာဖြင့် ပြန်စိုက်ကြည့်လိုက်သည်။ 

“ဘာ .. ဘာတဲ့လဲ ...”

“မင်းလက်တွေကို ဆန့်ထုတ်လိုက် ...”

ယီချန်းယန်က ခပ်ဖွဖွ ပြုံးကာ ပြောလိုက်သည်။ 

“အိုး ...”

ယန်အန်းယုက နာခံမှုအပြည့်ဖြင့် လက်ကို ဆန့်ထုတ်ပေးလိုက်၏။ သူ့နှလုံးခုန်သံမှာ သိသိသာသာ မြန်ဆန်လှကာ စိတ်ထဲတွင်လည်း မှန်းဆချက်တစ်ခု မသိမသာ ထွက်ပေါ်လာခဲ့သည်။ သို့သော် ထိုမှန်းဆချက်ကို အတည်မပြုရဲခဲ့ချေ။ 

စောစောက ယီချန်းယန် ဆိုသွားတဲ့ သီချင်းက အရမ်းကို လှပတဲ့ အချစ်ဇာတ်လမ်းတစ်ပုဒ်အကြောင်းလေ အချစ်တွေကို ဖွင့်ဟဝန်ခံဖို့ စိတ်လှုပ်ရှားနေခဲ့တာတွေ နှေးကွေးတုန့်ဆိုင်းမိနေတာတွေ ပြီးတော့ အချစ်နွံထဲကို ရူးရူးမူးမူး နစ်ဝင်သွားတာတွေ .. ဒါ .. ငါ့အတွက် ယီချန်းယန် ရေးပေးထားတဲ့ သီချင်းများလား ...

👥️