Chapter 49

👥️Chapter 49

ယန်အန်းယု၏ လက်ဖဝါးကို ဆွဲကိုင်ကာ ယီချန်းယန်က သူ့လက်ချောင်းများဖြင့် လက်ဖဝါးထက်သို့ စုတ်ချက်တစ်ချက်ချင်းစီကို ဖြည်းဖြည်းချင်း ရေးပြလိုက်သည်။ 

ယန်အန်းယုကလည်း စုတ်ချက် တစ်ခုချင်းစီတိုင်းကို ဂရုတစိုက် ခံစားကြည့်လိုက်သည်။ 

ချန့် .. ယန် .. ဝမ် ... 

ထို့နောက်တွင် ယီချန်းယန်က စုတ်ချက်များကို ချက်ခြင်း ရပ်တန့်လိုက်သည်။ 

မျက်လွှာကို ပင့်ကာ ယန်အန်းယုနှင့် အကြည့်ချင်း ဆုံလိုက်၏။ မူလက လှိုင်းထခြင်းမရှိ၊ ရေပြင်ညီသဖွယ် ငြိမ်သက်နေသည့် သူ့မျက်ဝန်းတို့မှာ အခြားသော ခံစားချက်များဖြင့် တစ်ဖြည်းဖြည်း ပြည့်နှက်သက်ဝင်လာတော့သည်။ ထိုပုံစံမှာ ကင်မရာ၏ အရှေ့တွင် မြင်ရတတ်သည့် ပုံစံနှင့်လည်း မတူညီ။ ယခုလက်ရှိ ယီချန်းယန်သည် သရုပ်ဆောင်တစ်ဦး မဟုတ်သည့်အတွက် ထိပ်တန်းအဆင့် သရုပ်ဆောင်စွမ်းရည်များကိုလည်း ထုတ်ပြနေရန် မလိုအပ်ချေ၊ ယခုလက်ရှိ သူ့ပုံစံမှာ အလွန် နှစ်လိုဖွယ် ကောင်းနေပေသည်။ 

ယီချန်းယန်၏ အကြည့်တို့မှာ ချစ်စိတ်တို့ ပြည့်လျှံနေသည့် ညင်သာသိမ်မွေ့သော အကြည့်များအဖြစ်သို့ ပြောင်းလဲသွားကာ  သူ၏ နက်ရှိုင်းလှသော ခံစားချက်များနှင့် စစ်မှန်သော နှစ်သက်မှုများကို ထင်ဟပ်စေလျက် ညင်သာစွာဖြင့် ပြောလိုက်သည်။ 

“ယု .. ချန့်ယန်ဝမ်ယု ...”

(ချန့်ယန်ဝမ်ယုမှာ ချန့်က တစ်ထောင်၊ ဝမ်က တစ်သောင်း၊ ယန်နဲ့ယုက သူတို့နှစ်ယောက်ရဲ့ နာမည်ကို ယူထားတာပါ )

ယန်အန်းယု၏ နှလုံးသားတစ်ခုလုံး ရုတ်တရက် တုန်ယင်သွားရသည်။ 

ပြုံးပင် မပြုံးနိုင်၊ နေရာတွင် ကြောင်အလျက်သား ရပ်နေသည့် ယန်အန်းယုကို မြင်လိုက်ရသည့်အခါ ယီချန်းယန်က သူ့နှာခေါင်းထိပ်ကို လေမှုတ်ရင်း ပြောလိုက်သည်။ 

“ဘာလို့လဲ နာမည်က မကောင်းလို့လား ...”

“တ .. တကယ်လို့ ကျွန်တော်က ယန်အန်းယု မဟုတ်ခဲ့ရင်ရော ...”

ယန်အန်းယုက မျက်မှောင်ကြုတ်ကာ မေးလိုက်သည်။ သူ့နှလုံးသားထဲတွင် အစိုင်အခဲတစ်ခု ကျန်ရှိနေဆဲ ဖြစ်သည်။ 

သို့သော် ယီချန်းယန်ကမူ ပြုံးလျက်သာ သူ့ကို ငေးကြည့်နေဆဲပင်။ 

“မင်းက မင်းပဲလေ ဘာနာမည်ပဲဖြစ်ဖြစ် သရုပ်မှန်က ဘာပဲဖြစ်ဖြစ် ကိုယ် သဘောကျရတဲ့သူက အခုလက်ရှိ ကိုယ့်ရှေ့မှာ ရှိနေတဲ့ မင်းကို .. မင်းတစ်ယောက်တည်းကိုပဲ ...”

သူ့စကားများ မဆုံးသေးခင်မှာပင် ယန်အန်းယုက သူ့ရင်ခွင်ထဲသို့ ပြေးဝင်ကာ ခါးကို တင်းကြပ်စွာ ဖက်တွယ်လိုက်သည်။ 

အမြဲလိုလို ပြုံးနေတတ်သည့် အကောင်းမြင်စိတ်ထားပိုင်ရှင် ယန်အန်းယု၏ မျက်လုံးထဲတွင် ငွေ့ရည်များ ရစ်သိုင်းနေခဲ့၏။ မျက်ရည်တို့ ရစ်ဝဲလျက် အက်ကွဲနေသော အသံဖြင့် သူက ပြောလိုက်သည်။ 

“ယီချန်းယန် .. ကျေးဇူး .. ကျေးဇူးအများကြီး တင်ပါတယ် ...”

ယီချန်းယန်၏ ရင်ဘက်တစ်ခုလုံး တသိမ့်သိမ့် တုန်သွားကာ ယန်အန်းယုကို ငုံကာ နမ်းရှိုက်လိုက်မိသည်။ နူးညံ့လှသည့် နှုတ်ခမ်းလေးများကို စုပ်ယူကာ လျှာကို အထဲအထိ ထိုးသွင်းလျက် အနမ်းတို့ကို တစ်ဖြည်းဖြည်း နက်ရှိုင်းစေလိုက်၏။ 

အချင်းချင်း လိမ်ယှက်ရစ်တွယ်သွားသော လျှာများနှင့်အတူ ယီချန်းယန်သည် ယန်အန်းယုကို ပွေ့ချီကာ အိပ်ခန်းထဲသို့ ခေါ်သွားပြီး ကုတင်ပေါ် ဖိချလိုက်တော့သည်။ 

NSFW (ဆင်ဆာ 🥲)

နောက်တစ်နေ့မနက်၌ .. နေမွန်းတည့်လုနီးနီး အချိန်သို့ ရောက်နေသည့်တိုင် ယန်အန်းယုသည် အိပ်ယာထဲ၌ ဇိမ်ခံနေဆဲပင်။ သူ့တစ်ကိုယ်လုံး အပိုင်းပိုင်း စုတ်ဖြဲခံထားရသည်ဟုပင် ခံစားမိနေကာ အသေးငယ်ဆုံးသော လှုပ်ရှားမှုလေး တစ်ခုကပင်လျှင် သူ့ခါးကို မခံမရပ်နိုင်လောက်အောင် နာကျင်နေစေသည်။ ထိုနာကျင်မှုက သူ့အား ယမန်နေ့ညက ဖြစ်ပျက်ခဲ့သမျှ တစ်ခုချင်းစီတိုင်းကို ပြန်လည်ကာ အမှတ်ရစေသည်။ 

“နိုးလာပြီလား ...”

ယီချန်းယန်၏ အသံကို ကြားလိုက်ရသည်နှင့် တစ်ပြိုင်နက် ယန်အန်းယုသည် သူ့ကို ဖျတ်ခနဲ လှမ်းခိုးကြည့်ကာ စောင်ထဲသို့ တိုးဝင်သွားလိုက်တော့သည်။ ယမန်နေ့ညက ဖြစ်ရပ်မှာ သူ၏ ပထမဆုံး အတွေ့အကြုံ ဖြစ်သည့်တိုင် ဆက်တိုက် ငိုကြွေးနေခဲ့ပြီး ယီချန်းယန်ကို ဖက်တွယ်ကာ ကြိမ်ဖန်များစွာ လုပ်ဆောင်ခဲ့သည်ဟု တွေးလိုက်မိရုံဖြင့်ပင် မျက်နှာ မထားတတ်လောက်အောင် ရှက်ရွံ့မိလာ၏။ 

တစ်ကိုယ်လုံး စောင်ပုံထဲသို့ တိုးဝင်သွားသူကို မြင်လိုက်ရသည့်အခါ ယီချန်းယန်ကလည်း လက်မြှောက်အရှုံးပေးဟန်ဖြင့် ရယ်မောရင်း ဘေးနားတွင် ဝင်ထိုင်လိုက်သည်။ 

“မနေ့ညက အရမ်းကြီး  နာနေသေးလား...”

ထိုစကားကို ကြားလိုက်ကာမှ ယန်အန်းယုသည် စောင်ပုံထဲမှ ခေါင်းထွက်လာကာ ရှက်သွေးဖြန်းစွာဖြင့် "အင်း” ဟု ခပ်တိုးတိုး ပြန်ဖြေလိုက်သည်။ 

“ဒါဆို နောက်တစ်ကြိမ်ကျ ကိုယ် ပိုပြီး ညင်သာပါ့မယ် ...”

ထိုသို့ပြောကာ ယန်အန်းယု၏ ခေါင်းကို ပွတ်သပ်ပေးလိုက်သည်။ ပိုးသားသဖွယ် နူးညံ့ပျော့ပျောင်းနေသည့် ဆံနွယ်များကို ကိုင်တွယ်ထိတွေ့ရသည်မှာ အလွန် စိတ်ကျေနပ်ကြည်နူးစဖွယ်ပင် ဖြစ်ပေသည်။ 

“ပိုပြီး ညင်သာပေးရင် ...”

ယန်အန်းယုက ခေါင်းကို ယမ်းကာ ဆက်မပြောတော့။ 

“ဟမ် ...”

ယီချန်းယန်က နားမလည်လိုက်ချေ။ 

“ချန်းယန် ကျွန်တော့်ကို ထူပေးပါဦး ...”

သူက ပြောလိုက်သည်။ ယီချန်းယန်ကို နာမည်တပ်၍ ခေါ်ခွင့်ရသည်မှာ သူ့အဖို့ ကောင်းချီးတစ်ခုအလားပင်။ 

ယီချန်းယန်က ပြုံးကာဖြင့် သူ့ကို ဆွဲထူပြီး သူ့ပုခုံးပေါ်သို့ မှီထိုင်စေလိုက်သည်။ 

“ချန်းယန် နာတယ်ဆိုပေမယ့် ....”

ယန်အန်းယုက သူ့နားရွက်နားသို့ တိုးကပ်ကာ ဖွဖွလေး ပြောလိုက်သည်။ 

“အားပြင်းတာက ပိုပြီး ခံစားလို့ ကောင်းတယ် ...”

စကားလုံးများဖြင့် ကျီစယ်ခံလိုက်ရရှာသည့် ယီချန်းယန်သည် အသည်းယားသည့်စိတ်ကို မထိန်းချုပ်နိုင်တော့ဟန်ဖြင့် ယန်အန်းယုကို နှာဖျားချင်းတေ့ကာ နမ်းရှိုက်လိုက်မိတော့သည်။ 

“ယန်အန်းယု .. ဘာလို့ ဒီလောက်တောင် ချစ်ဖို့ကောင်းနေရတာလဲ ...”

ယန်အန်းယုကလည်း သူ့ကို တုန့်ပြန်ကျီစယ်လိုက်သည်။ 

“ယီချန်းယန် ခင်ဗျားကလည်း ဘာလို့ ဒီလောက်တောင် ချောမောခန့်ညားနေရတာလဲ မျက်လုံးလေးတွေကလည်း ကြည့်လို့ကောင်း နှာတံလေးကလည်း ကြည့်လို့ကောင်း ပါးစပ်လေးကလည်း .. အာ့ ...”

စကားမဆုံးသေးခင်မှာပင် သူ့နှုတ်ခမ်းများသည် ယီချန်းယန်၏ ချိတ်ပိတ်အနမ်းကို ခံစားလိုက်ရတော့သည်။ 

“ဝုတ် ဝုတ် ...”

ပထမထပ်ရှိ coco ၏ ဟောင်သံ ထွက်ပေါ်လာ၏။ 

ဗိုက်ဆာလှနေပြီကို ဒီသခင်နှစ်ယောက်က အခုထိ အိပ်ယာထဲမှာ နှုတ်ခမ်းချင်း စစ်တိုက်နေကြလို့ မပြီးနိုင်သေးဘူး ...

ယန်အန်းယု စားသောက်ရန် ပြင်ဆင်သည့် အချိန်တွင် နေ့လည်စာစားချိန်သို့ပင် ရောက်နေပြီ ဖြစ်သည်။ ယီချန်းယန်က သူ့ကို အိပ်ယာထဲမှ မထွက်စေဘဲ စိတ်ရှည်ရှည်ဖြင့် တစ်လုပ်ချင်း ခွံ့ကျွေးခဲ့သည်။ 

အလွန်အမင်း ရင်းနှီးလှပါသည့် ကိုယ်ချင်းနှီးနှောသည့် အဆင့်ကိုပင် ကျော်ဖြတ်ခဲ့ပြီး ဖြစ်သည့်အတွက် ယန်အန်းယုသည် အနည်းငယ် နေရခက်ခဲ့သည့်တိုင် တစ်ဖြည်းဖြည်း နေသားကျလာခဲ့သည်။ သူ ရုပ်ရှင်ဧကရာဇ်ယီ၏ ပြုစုမှုများအပေါ် နှစ်သက်ပျော်ရွှင်စ ပြုလာ၏။ 

“ချန်းယန် ကျွန်တော်လည်း “Outstanding X”  အကြောင်း ကြားလိုက်မိတယ် ...”

သူက ပြောလိုက်သည်။ 

“ဒီလောက်ကောင်းတဲ့ အခွင့်အရေးကြီးကို .. တကယ်ကို သရုပ်မဆောင်ချင်တာလား ...”

ယီချန်းယန်က ခေါင်းကိုသာ ယမ်းပြလိုက်၏။ 

“ကိစ္စမရှိပါဘူး အနာဂတ်မှာလည်း တစ်ခြား အခွင့်အရေးတွေ ထပ်ရှိလာဦးမှာပါ ..."

ယီချန်းယန်သည် ငယ်စဉ်ကတည်းက တစ်ကိုယ်တော်မိဘဖြင့်သာ ကြီးပြင်းလာခဲ့ရသူ ဖြစ်သည်။ မိဘတစ်ဦးတည်းသာ ရှိခဲ့သည့်အပြင် အေးစက်ကာ လျစ်လျူရှုတတ်သည့် ပင်ကိုယ်စရိုက်ကို ပိုင်ဆိုင်ထားသူ ဖြစ်သည့်အလျောက် သူသည် အခြား သက်တူရွယ်တူများထက် ပိုမိုရင့်ကျက်ကာ လက်တွေ့ကျကျ တွေးခေါ်စဉ်းစားတတ်ခဲ့ပေသည်။ အနုပညာလောကထဲသို့ ဝင်ရောက်ပြီးကာစ သူ၏ ကြယ်ပွင့်လမ်းကြောင်း အစပိုင်းမှာ ချောမွေ့ခြင်း မရှိ၊ အနိမ့်အမြင့် အတက်အကျ များစွာဖြင့် ပြည့်နှက်နေခဲ့သည်။ သို့သော် သူ့ကို စစ်မှန်ထက်သန်စွာ အားပေးကြသည့် ပရိသတ်များနှင့် မိခင်ဖြစ်သူ၏ အတိုင်းထက်အလွန် ကူညီထောက်ပံ့ပေးမှုများကြောင့် သူ လက်ရှိ ရောက်နေသည့် နေရာထက် ပိုမိုကာ တောက်ပမြင့်မားသည့် နေရာသို့ ရောက်ရှိနိုင်ရန် အစွမ်းကုန် ကြိုးစားခဲ့သည်။ 

သူက ထိုသို့ ကြိုးစားမှသာလျှင် ပရိသတ်များ၏ စစ်မှန်သော အားပေးမှုနှင့် ထိုက်တန်လိမ့်မည်ဟု ခံယူခဲ့သည်။ “ရုပ်ရှင်ဧကရာဇ်” ဟူသော ဂုဏ်ပုဒ်ဖြင့် မိခင်ဖြစ်သူ၏ နောက်ဆုံးသော ဆန္ဒကို ဖြည့်ဆည်းပေးနိုင်ခဲ့ပြီးနောက်တွင်မူ ယီချန်းယန်သည် အားလပ်ချိန် မရှိလုနီးပါး ဖြစ်သည်အထိ ရုပ်ရှင်ရိုက်ကူးရသည်ကို အကျင့်ဖြစ်သွားတော့၏။ ထို့အပြင် ထိုကဲ့သို့ မလုပ်ရန် သူ့ကို တားမြစ်မည့်လူဟူ၍လည်း တစ်ဦးတစ်ယောက်ပင် မရှိခဲ့ချေ။ 

“ကျွန် .. ကျွန်တော် အကြောင်းအရင်းကို နည်းနည်းလေး ခန့်မှန်းမိသွားပြီ ထင်တယ် ချန်းယန် ကျွန်တော့်ကြောင့် ခင်ဗျား ဒီလိုမျိုး ဆုံးဖြတ်ချက် ချလိုက်ရတာမျိုးကို တကယ် မဖြစ်စေချင် ...”

ယီချန်းယန်က သူ့စကားများကို ဖြတ်ပြောလိုက်သည်။ 

“ရှောင်ယု .. ကိုယ် မင်းနဲ့ ခွဲပြီး မနေနိုင်ဘူး ...”

အတိတ်က ယီချန်းယန်၏ ဘဝတစ်ခုလုံးကို အလုပ်ကသာ အပိုင်သိမ်းထားခဲ့သည်။ သို့သော် ယခုမူ အလုပ်ထက် ပိုမိုကာ အရေးပါသူတစ်ဦး သူ့ဘဝထဲသို့ ရောက်ရှိလာပြီ ဖြစ်သည်။ 

နွေးထွေးလှသည့် ခံစားချက်တစ်ခုက ယန်အန်းယု၏ နှလုံးသား အောက်ခြေအထိ စီးဆင်းသွားကာ မင်သက်အံ့ဩသွားပြီး သူ့ကို ရှေ့ဆက်ကာ အကြုံမပြုနိုင်တော့ချေ။ 

ထိုညတွင် ယန်အန်းယုသည် အစ်ကိုဖြစ်သူ ယန်ကျွယ့်ကို သူ့ဘက်မှ စတင်ကာ ဖုန်းခေါ်ပြီး လက်နက်ချလိုက်သည်။ 

“ကော ကျွန်တော်က ချန်းယန်စီ ရောက်နေတာ ...”

“ဟမ့် .. အစောကြီးကတည်းက ခန့်မှန်းပြီးသား ..."

ယန်ကျွယ့်က အေးစက်စွာဖြင့် သရော်လိုက်သည်။ 

“ကြည့်ရတာ မင်းတို့နှစ်ယောက်ရဲ့ ဆက်ဆံရေးက တော်တော်လေး ကောင်းနေတဲ့ပုံပဲ နာမည်ခေါ်တဲ့ ပုံစံတွေတောင် ပြောင်းကုန်ပြီဆိုတော့လေ ...”

“အင်း .. ကျွန်တော်တို့နှစ်ယောက်ကြားက ဆက်ဆံရေးက ခြေလှမ်းအကျယ်ကြီးတစ်လှမ်း ရှေ့တက်သွားပြီလေ ...”

ယန်အန်းယုက ခေါင်းတဆတ်ဆတ်ငြိမ့်ကာ ခပ်ပြုံးပြုံးဖြင့် ပြောလိုက်သည်။ ထို့နောက်တွင် သိလိုစိတ်အပြည့်ဖြင့် ဆက်မေးလိုက်ပြန်၏။ 

“ကော ကောလည်း အမြဲတမ်း ညဉ့်နက်ပြီဆိုကာမှ နွော်ရှီရဲ့ အိမ်ထဲကို တိတ်တိတ်လေး ခိုးဝင်နေကြပဲ မဟုတ်လား အခုရော အခြေအနေက ဘယ်လို ဖြစ်နေပြီလဲ ...”

“ခိုးဝင်တယ် ဟုတ်လား ...”

“ငါက ပွင့်လင်းမြင်သာမှု အပြည့်နဲ့ လူသိရှင်ကြား အလည်သွားတာကွ ပြီးတော့ စီးပွားရေးကိစ္စတွေ ဆွေးနွေးဖို့ သွားတာ ...”

“အိုး .. စီးပွားရေးကိစ္စတွေက ညဉ့်နက်မှ ဆွေးနွေးရတာပေါ့ ဟုတ်ပါပြီ ဥက္ကဌယန် ပျော်နေရင် ပြီးတာပါပဲ ...”

ယန်အန်းယုက ဝတ်ကျေတန်းကျေ ပြောလိုက်သည်။ ယန်ကျွယ့်၏ ထိုစကားကို မည်သူကမှ ယုံကြည်ကြလိမ့်မည် မဟုတ်ချေ။ 

ယန်ကျွယ့်က အနည်းငယ် မကျေမနပ် ဖြစ်သွားသည့်ဟန်ပင်၊ စကားသံ တိတ်သွား၏။ 

“စောစောက မင်းပြောလိုက်တာ ဘာ .. ဟို ယီချန်းယန်နဲ့ အဆင့်တက်သွားပြီ ဟုတ်လား အဲဒီ့ ခွေးလိုကောင်က မင်းကို စားလိုက် ...”

ယန်ကျွယ့်က ထို ၁၈ နှစ်အထက် အကြောင်းအရာများကို လုံးဝ ထုတ်မပြောလိုဟန်ပင်။ 

“အင်း ...”

ယန်အန်းယုက ရှက်ရွံ့စွာဖြင့် ပြန်ဖြေလိုက်သည်။ 

“ကော ချန်းယန်က ကျွန်တော့်ကို အမြဲတမ်း ကောင်းကောင်းမွန်မွန်ပဲ ဆက်ဆံတာပါ ကောနဲ့ သူ့ကြားမှာ နားလည်မှု လွဲနေတာတွေများ ရှိနေတာလား ...”

“ဘာလို့ မုန်းနေတာလဲဆို အဖေ့ကို သတ်လိုက်လို့လေ ...”

ယန်ကျွယ့်က ရှည်ရှည်ဝေးဝေး မစဉ်းစားဘဲ ပြောလိုက်ခြင်း ဖြစ်သော်ငြား ယန်အန်းယုမှာမူ သေလုမတတ် ထိတ်လန့်သွားတော့သည်။ 

“ဘယ် .. ဘယ်လို အဖေက နေမကောင်းဖြစ်ပြီး ဆုံးသွားတာ မဟုတ်လား ...”

“ရှောင်ယု .. တအားကြီး မျက်ပြူးဆန်ပြာ ဖြစ်မသွားပါနဲ့ ဟာသက်သက်ပဲ ပြောလိုက်တာပါ ...”

ယန်ကျွယ့်က အမြန် ပြန်ပြောလိုက်သည်။ 

“ယီချန်းယန်အကြောင်း ဆက်မပြောတော့ဘူး ...”

ယန်အန်းယု ပြောင်းလဲသွားချိန်မှစ၍ သူ့ညီလေးအပေါ် ယီချန်းယန်၏ သဘောထားမှာလည်း လုံးဝဥဿုံ ပြောင်းလဲသွားကြောင်း သူကိုယ်တိုင်လည်း အကဲခတ်မိသည်။ ထန်းကော်က သူ့ကို ထိန်ချန်ထားသည့် ကိစ္စများ အများအပြား ရှိနေသည့်တိုင် သူ့တွင် စုံစမ်းရန် အခြားသော နည်းလမ်းများစွာ ရှိနေဆဲပင်။ 

ယန်အန်းယု ပွဲဦးထွက်ချိန်မှစကာ အမျိုးမျိုးသော ကိစ္စများစွာ ဖြစ်ပွားခဲ့သည်။ ဘေးမှ ရပ်ကြည့်ရင်း ကိစ္စအားလုံးကို မျက်မြင် ကြုံတွေ့လိုက်ရသည့် ယန်ကျွယ့်သည်လည်း ဤတစ်ကြိမ်တွင် ယီချန်းယန်၏ နှလုံးသား အမှန်တကယ်ပင် လှုပ်ရှားသွားခဲ့ပြီဖြစ်ကြောင်း သဘောပေါက်ခဲ့ပေသည်။ 

ယီချန်းယန်မှာလည်း ဒီလိုမျိုး ညင်သာသိမ်မွေ့ပြီး ချစ်ပေးတတ်တဲ့ တစ်ဖက်ခြမ်းမျိုး ရှိသေးတယ်လား ... ဟိုးအရင်ကသာဆို ယုံတောင် ယုံမိမှာ မဟုတ်ဘူး ...

“ရှောင်ယု အခုအချိန်မှာ မင်းရဲ့ ကျော်ကြားမှုက မြင့်တက်နေပြီ အဲဒါကြောင့် အခွင့်အရေးကို အမိအရ ဆုပ်ကိုင်ထားရမယ် နားလည်လား “Challenge First Time” က အခုမှ တစ်ဝက်ပဲ ‌ရှိသေးတယ် သေချာပေါက်ကို ကြိုးကြိုးစားစား လုပ်ရမယ်နော်  ...”

“ကောင်းပါပြီ ...”

ယန်အန်းယုက ဖုန်းကို ချလိုက်၏။ နှလုံးသားထဲတွင်လည်း နောက်ထပ် စိတ်ပိုင်းဖြတ်မှုတစ်ရပ် ဖြစ်ပေါ်လာခဲ့သည်။ 

ယန်ကျွယ့်က ငါတို့ရဲ့အဖေ ယန်ဖန်းနဲ့ ပတ်သက်တဲ့ ကိစ္စကို ဟာသအဖြစ် ပြောတယ်ဆိုတာ ဖြစ်နိုင်ပါ့မလား သူက သေချာပေါက်ကို တစ်ခုခု ဖုံးကွယ်ထားတာပဲ ဖြစ်ရမယ် မဟုတ်မှလွဲရော ယန်ဖန်း သေတာက ယီချန်းယန်နဲ့များ တစ်ခုခု ပတ်သက်နေလို့လား  ...

ဘေးနားရှိ ဆိုဖာတွင်ထိုင်ကာ coco နှင့် ဆော့နေသည့် ယီချန်းယန်ကို လှမ်းကြည့်လိုက်ပြီးနောက် ယန်အန်းယုသည် အနားသို့ ပြုံးပြုံးလေး လျှောက်လာလိုက်သည်။ 

“ချန်းယန် စစ်တုရင် ကစားကြရအောင် ...”

ယီချန်းယန်က ကြောင်အသွား၏။ 

“အခုလား ...”

“အင်း .. အရင်ကဆို အဖေနဲ့ မကြာခဏ စစ်တုရင် ကစားခဲ့ဖူးတယ် မဟုတ်လား ...”

ယီချန်းယန်က တစ်ခုခု ပြောလိုသည့်ဟန်ဖြင့် အကြည့်တို့ အနည်းငယ် လှုပ်ခတ်သွားတော့သည်။ သို့သော် နောက်ဆုံးတွင်မူ မည်သည့်စကားကိုမှ မပြောဖြစ်လိုက်ချေ။ 

ထို့နောက်တွင် ... အလေးအနက် အာရုံစူးစိုက်ကာ စစ်တုရင် ကစားနေသည့် ယီချန်းယန်၏ ပုံစံကို အကဲခတ်ရင်း ယန်အန်းယု၏ အတွေးစတို့ နောက်တစ်ကြိမ် ပြောင်းလဲသွားပြန်တော့သည်။ 

သူနဲ့ ယန်ဖန်းကြားက ဆက်ဆံရေးက တအား နက်ရှိုင်းတဲ့ဟာ ဘယ်လိုလုပ် ဒါမျိုး ဖြစ်နိုင်မှာလဲ ...

“ဘာတွေ တွေးနေတာလဲ ...”

ဟန်ပျက်နေသည့် သူ့ပုံစံကြောင့် ယီချန်းယန်က ထုတ်မေးလိုက်တော့သည်။ 

ယန်အန်းယုထံတွင် မေးခွန်းများစွာ ရှိနေသော်လည်း လက်ရှိအခြေအနေအရ .. သူတို့နှစ်ဦးလုံးထံတွင် ထိုကိစ္စနှင့် ပတ်သက်၍ ဆွေးနွေးလိုခြင်း အလျဉ်းရှိမနေချေ။ ထို့ကြောင့် သူက ယီချန်းယန်ကို ရွှန်းရွှန်းစားစား စိုက်ကြည့်ကာ ပြောလိုက်တော့သည်။ 

“ချန်းယန် ကြည့်ရတာလေ ကျွန်တော့်ကောက ခင်ဗျားကို ဘယ်တုန်းကမှ သဘောမကျခဲ့ဖူးတဲ့ပုံပဲ ...”

“သူက ကိုယ့်ကို မုန်းနေတာ ...”

ယန်အန်းယု “...”

ဒီစကားက .. အရမ်းကို ပွင့်လင်းလွန်းမနေဘူးလား ...

“သူတင် မကပါဘူး ကိုယ့်ကို မုန်းနေတဲ့ လူတွေက နောက်ထပ်လည်း အများကြီး ရှိသေးတယ် ...”

ယီချန်းယန်က မထူးဆန်းလေဟန်ဖြင့် ပြောလိုက်သည်။ သူ့မျက်ဝန်းတို့မှာလည်း လှိုင်းထန်ခြင်းမရှိ၊ ပကတိ ငြိမ်သက်နေပေသည်။ 

“သူတို့မှာလည်း အကြောင်းပြချက်တွေ ရှိနေမှာပေါ့ ကိုယ်ကလည်း အဲဒီ့လောက်အထိ ကောင်းတဲ့လူမှ မဟုတ်တာ အဲဒါကြောင့် လူတိုင်းက ကိုယ့်ကို သဘောကျလာအောင်လည်း မလုပ်နိုင်ဘူးလေ ...”

“အမှန်ပဲ ...”

သူက ထိုသို့ပြောကာ ယီချန်းယန်၏ လက်ကို ဆွဲကိုင်လိုက်သည်။ 

“ဒါပေမယ့် ကျွန်တော်ကတော့ ခင်ဗျားကို အမြဲတမ်း သဘောကျနေမှာ ...”

*****

များမကြာမီ “Challenge First Time” ၏ ဆဌမအပတ်အတွက် ရိုက်ကူးရေး လုပ်ရမည့် အချိန်သို့ ရောက်ရှိလာတော့သည်။ အုပ်စုဖွဲ့ပြီးသည့်နောက်တွင် ယန်အန်းယုသည် ထန်းရှောင်နှင့် တစ်သင်းတည်း ဖြစ်သွားသည်။

ဤသည်မှာ သူ့အဖို့ ထန်းရှောင်နှင့် ပထမဆုံးအကြိမ် တစ်သင်းတည်း ဖြစ်ခဲ့ခြင်း ဖြစ်သည်။ ယန်အန်းယုက သူ့အဖြစ်ကို ခါးသီးစွာ ရယ်မောလိုက်မိတော့သည်။ 

ကြည့်ရတာ ဒီတစ်ပတ်ရဲ့ မစ်ရှင်က ပိုပြီးတော့ကို ခက်ခဲတော့မှာပဲ ...

👥️