MM Story Teller

Chapter 79

Viewers 4k

👻Chapter 79

ပုတီးစေ့လေး (12)

လျိုဟန့်အဖြစ်အပျက်က ချူဟွိုက်ကို အထောက်အထား များစွာ ပေးလေသည်။

စတုတ္ထမြောက်နေ့တွင် ကွမ်ရင်မယ်တော်လေးအပေါ် ကန့်သတ်ချက်များ ပြေကျသွား၍ သရဲများ ပေါ်ထွက်လာသည်။

ကွမ်ရင်မယ်တော်လေး၏ ပထမဆုံး ပစ်မှတ်က ကျောက်စိမ်းရုပ်မိန်းကလေးကို ဖျက်ချပေးမည့် လျိုဟန်ပင်။

ကွမ်ရင်မယ်တော်လေး၏ ပွင့်လာသော စွမ်းရည်က အခြား သရဲများကို ကြိုးကိုင်ခြယ်လှယ်နိုင်ခြင်း ဖြစ်၍ မစ်ရှင်ထဲတွင် သရဲက သေချာပေါက် သုံးယောက်ထက်မနည်း ရှိနိုင်လောက်မည်။

ချူဟွိုက်က ကျောက်စိမ်းရုပ်မိန်းကလေး သူ့ကို ရှာတွေ့သွားသည့်နေ့တွင် သူမက ရုတ်တရက် သနားသွားတာကြောင့်မျိုး မဟုတ်ပဲ တစ်ခုခုကြောင့် ရန်မူမလာနိုင်တာမှန်း သေချာသိလေသည်။ နောက်ပိုင်းတွင် သူက ကွမ်ရင်မယ်တော်လေးနှင့် ပြိုင်ပွဲဝင်များ၏ အမွှာမွေးချင်းများက သူတို့ကိုယ်စား သတ်ဖို့လုပ်နေရသည့် အကြောင်းရင်းကို ဆက်စပ်မိသွားချိန် ချက်ချင်း သဘောပေါက်သွားရသည်။

ကွမ်ရင်မယ်တော်လေးသာ ပြိုင်ပွဲဝင်တွေကို ရန်ပြုလို့ရတယ်ဆိုရင် ဘာလို့ အလုပ်ရှုပ်ခံပြီး တခြားသရဲတွေကို ခိုင်းနေရဦးမှာလဲ....

ထူးခြားသည့် အကြောင်းရင်းရှိနိုင်၍ ကွမ်ရင်မယ်တော်လေးနှင့် ကျောက်စိမ်းရုပ်မိန်းကလေးတို့က ပြိုင်ပွဲဝင်များကို ကိုယ်တိုင် အန္တရာယ်မပေးနိုင်ခြင်းဖြစ်မည်။

ထို့ပြင် ထိုထူးခြားသည့် အကြောင်းရင်းကလည်း လွတ်မြောက်နိုင်မည့် လမ်းစ ဖြစ်နိုင်သည်။

လျိုဟန်၏ အစ်ကိုက အလုပ်တွင် ထိခိုက်ပြီး သေသွားခဲ့ကာ ပင်မြင့်စံနေရသည့် လျိုဟန့်အပေါ် နာကျည်းမုန်းတီးချက်များ ကိန်းအောင်းနေခဲ့၍ လျိုဟန့်အသက်ကို ခြိမ်းခြောက်လာမည့် သရဲအဖြစ် ပေါ်လာခဲ့သည်။

လျိုဟန့်ပြောပြချက်တွင် ယခင်နေ့ညက နံရံထက် သွေးစွန်းနေပြီး မြေကြီးကလည်း သွေးကွက်များ အရိုးအပိုင်းအစများ ဖုံးလွှမ်းနေ၍ သရဲက ထိုအဖြစ်အပျက်ကို ပြန်ပြီး အသက်သွင်းချင်သည့်ပုံပင်။ စွန်းကျားမူ၏ ဖွင့်ဟပြောဆိုချက်အရ သူ၏ အမွှာညီက ရေနစ်သေခဲ့ဟန်ရှိသည်။

နံရံနဲ့ အိမ်က လျိုဟန့်အစ်ကိုကို ပေါ်လာစေနိုင်တယ်ဆိုရင် ရေကလည်း စွန်းကျားမူရဲ့ ညီကို ပေါ်လာစေနိုင်တယ်....

နောက်ထပ်လည်း စွန်းကျားမူက ရေစည်ထဲမှ ရုတ်တရက် ဆန့်ထွက်လာသည့် လက်တစ်ဖက်နှင့် အသတ်ခံလိုက်ရနိုင်သလို ရေချိုးနေရင်း အသက်ရှူကျပ်ပြီး အမောဆို့သွားနိုင်သည်။ သို့သော်လည်း သူက ရေနှင့်ပတ်သတ်မိလျှင် အသက်သေဆုံးနိုင်သည်။

ချူဟွိုက်က မြစ်ဘေးတွင် ထိုင်ချလိုက်ရင်း လက်ကောက်ဝတ်ပေါ် မေးတင်ပြီး စွန်းကျားမူ၏ စိတ်ပျက်ဝမ်းနည်းနေသည့်ပုံစံကို ကြည့်နေမိသည်။

ချူဟွိုက်က သူ့ကို သနားသလို အကြည့်လေးတစ်ချက်ပင် စွန့်ကြဲမလာချေ။

စွန်းကျားမူနှင့် တစ်ထပ်တည်း တူသည့် သရဲက သူ့ခန္ဓာကိုယ်ကို ရစ်ပတ်ထားပြီး ကြောင်က ကြွက်ကို ဖမ်းသလိုမျိုး နည်းနည်းချင်း ဆွဲချနေသည်။ စွန်းကျားမူ၏ မျက်နှာတစ်ပြင်လုံးက ရေထဲမြုပ်နေပြီး အောက်စီဂျင် ပြတ်လပ်လာ၍ အဆုတ်ထဲ ရေဝင်လာသည်။ မြစိမ်းရောင် မြစ်ရေပြင်ကို ဖြတ်၍ တရွေ့ရွေ့ ဝေးကွာသွားသည့် ကမ္ဘာကြီးကို ကြည့်နေမိသည်။

ရွေးချယ်မှု မှားသွား၍ နောင်တရခြင်းများစွာဖြင့်....

စွန်းမိသားစုတွင် အမွှာညီအစ်ကို နှစ်ယောက် ရှိလေသည်။ အကြီးက စွန်းကျားမူ ဖြစ်ပြီး အငယ်က စွန်းကျားဟယ် ဖြစ်သည်။

စွန်းမေမေက ကလေးမွေးပြီးနောက်ပိုင်း မကြာခဏ နေမကောင်းဖြစ်လာ၍ တာအိုဘုန်းတော်ကြီးများ ပင့်ပြီး မေးကြည့်ခဲ့သည်။ တာအိုဘုန်းတော်ကြီးက စွန်းကျားဟယ်တွင် မိဘညီအစ်ကိုမောင်နှမများနှင့် ဇနီးသည်ကို အန္တရာယ်ပေးနိုင်သည့် "အဆိပ်သင့်ကံကြမ္မာငါးမျိုး" ကို ပိုင်ဆိုင်ထားသည်ဟု ပြောခဲ့သည်။ မှားသည်ဖြစ်စေ မှန်သည်ဖြစ်စေ လူအချို့က ယုံကြည်ခဲ့လေသည်။

စွန်းကျားမူလို ဥာဏ်ကောင်းသော်လည်း ဤအစွဲကြောင့် စွန်းကျားဟယ်မှာ ကောင်းကောင်း အဆက်ဆံမခံရပေ။ စွန်းကျားမူနာမည်ရှိ 'သစ်သား' ဆိုသည့် စာလုံးက အပိုရိုက်ချက်တစ်ခုလို ဖြစ်နေ၍ လူတိုင်းက စွန်းကျားဟယ်ကို လူပိုလို သဘောထားဆက်ဆံကြသည်။

နောက်ပိုင်းတွင် စွန်းကျားဟယ်အငယ်လေးက အချိန်တော်တော်ကြာ စဥ်းစားရင်း အကွက်ချခဲ့ပြီး တစ်နေ့တွင် အပြစ်ကင်းသော အစ်ကိုဖြစ်သူကို ရေထဲ တွန်းချခဲ့သည်။ ချူဟွိုက်က သူ့ကို ကြည့်နေခဲ့သလိုမျိုး သူကလည်း စွန်းကျားမူ ရေထဲတစ်စတစ်စ နစ်မြုပ်သွားသည်ကို ကြည့်နေခဲ့သည်။

စွန်းကျားဟယ်က ငိုယိုပြီး အိမ်ကို အပြေးပြန်လာကာ မိဘများကို ပြောပြခဲ့သည်

" ညီလေးစွန်းကျားဟယ်က ရေထဲ ကျသွားပြီ...."

မကြာမီ "စွန်းကျားဟယ်" ၏ အလောင်းကို ဆယ်မိခဲ့သည်။ စွန်းကျားမူကို သတ်ပြီးနောက် စွန်းကျားဟယ်က စွန်းကျားမူ ဖြစ်လာလေသည်။

သွေးရောင်ကျဲကျဲက ရေအောက်ခြေမှ ပေါ်လောပေါ်လာပြီး ရေမျက်နှာပြင်ပေါ်သို့ တဖြေးဖြေးပျံ့သွားလေသည်။ ချူဟွိုက်က ကြောင်ငယ်လေးကို ပြန်ချီထားလိုက်ရင်း လက်သွယ်သွယ်လေးများနှင့် အမွှေးမည်းမည်းလေးကို ပွတ်သတ်ပေးနေလိုက်သည်။ သူက ဘာမှမဖြစ်ခဲ့သလို လှည့်ထွက်သွားလိုက်၏။

***

တဲအိမ်ထဲတွင် စုန့်ချင်းက စွန်းကျားမူ၏ သေဆုံးမှုကို အာရုံခံမိသွား၍ စိတ်လှုပ်ရှားသွားသလို ရုတ်တရက် မျက်လုံးများ လက်လာပြီး ရက်စက်သည့်ပုံစံ ပေါ်လာသည်။

သူတို့က ချူဟွိုက်ပြန်အလာကို စောင့်ပြီးသည်နှင့် ရွာထဲက အခြေအနေကို စုံစမ်းရန် အတူတူထွက်ကြတော့မည် ဖြစ်သည်။

လျိုဟန်က ပတ်တီးဖြေနေရင်း ကိုယ့်ကိုယ်ကို ဆေးထည့်နေချိန် စုန့်ချင်းက အမူအရာကင်းမဲ့နေသော မျက်နှာနှင့် အပြင်ထွက်သွားသည်ကို တွေ့လိုက်ရသည်။

လျိုဟန်က စုန့်ချင်း၏ ကျန်းမာရေးကို အနည်းငယ် စိတ်ပူ၍ လှမ်းမေးလိုက်သည် " ဘယ်သွားမလို့လဲ....စုန့်ချင်း....ချူဟွိုက် ပြန်မလာသေးဘူးလေ....ကျွန်တော်ရော အတူတူလိုက်ပေးခဲ့ရမလား..."

စုန့်ချင်းက သူ့ကို စိတ်ဝင်စားဟန်မပြချေ။ သူမက လမ်းလျှောက်နေသော အလောင်းကောင်လိုမျိုး စက်ရုပ်ဆန်ဆန် အပြင်ထွက်သွားလေသည်။

သူမက ပိန်ပါးလွန်း၍ စူပို့ပို့ဗိုက်ကလေးသာ မရှိလျှင် သူမကို သတိထားမိနိုင်မည် မဟုတ်ပေ။ သူမ၏ အရိုးသာရှိသော ခန္ဓာကိုယ်လေးကြောင့် လျိုဟန်မှာ အရိုးစုတစ်ခုကို ကြည့်နေရသည့်အတိုင်း ခံစားမိသည်။

လျိုဟန်က မသက်မသာ ခံစားမိ၍ ပတ်တီးအမြန်စီးပြီး စုန့်ချင်းနောက်လိုက်ရန် ပြင်လိုက်ချိန် ချူဟွိုက် ပြန်ရောက်လာခဲ့သည်။

ချူဟွိုက်က လျိုဟန်၏ စိုးရိမ်တကြီးပုံစံကို တွေ့လိုက်၍ မေးလိုက်သည် " ဘာဖြစ်လို့လဲ...."

လျိုဟန်က ပြန်ဖြေလာသည် " စုန့်ချင်း....စုန့်ချင်းက တစ်ယောက်တည်း ထွက်သွားလို့....ဘယ်သွားမလဲ မေးတာကို ဘာမှပြန်ဖြေမသွားဘူး...."

စုန့်ချင်းက တရွေရွေ့ လျှောက်သွားခြင်းဖြစ်သော်လည်း ချူဟွိုက်နှင့် လျိုဟန်မှာ ရှာမတွေ့နိုင် ဖြစ်နေသည်။

ချူဟွိုက်က နားမလည်သလို ဖြစ်နေချိန် စုန့်ချင်းက မလှမ်းမကမ်းက တောင်ခြေနားတွင် ပေါ်လာပြီး သူတို့ဆီ လျှောက်လာလေသည်။

လျိုဟန်က ရောက်လာပြီး သတိပေးလာသည် " စုန့်ချင်း....ဘယ်သွားမယ်ဆိုတာ ဘာလို့ ပြောမသွားရတာလဲ....မင်းက ကျွန်တော်နဲ့ ချူဟွိုက်ကို သက်သက်စိတ်ပူအောင် လုပ်နေတာ...."

စုန့်ချင်းက တောင်းပန်လာပြီး စကားတစ်ခွန်းမဆိုပဲ ပြုံးပြလာသည်။

ချူဟွိုက်က သူမမျက်နှာပေါ်ရှိ သဘောကျသလို ပြုံးယောင်သန်းပြီးနောက် နှုတ်ခမ်းစေ့ပိတ်သွားသော အမူအရာကို တွေ့လိုက်ရသည်။

သူ့လက်ထဲက ကြောင်လေးကလည်း တစ်ခုခု အာရုံခံမိသွားပြီး ချူဟွိုက်လည်ပင်းပေါ် ကုတ်တက်လာကာ နှစ်ကြိမ်ခန့် ပွတ်သတ်နေရင်း စုန့်ချင်းဘက်ကို တညောင်ညောင် လှည့်အော်နေသည်။

စုန့်ချင်း၏ လည်ပင်းကြောတို့ တောင့်တင်းသွားပြီး ချူဟွိုက် လက်ထဲက ကြောင်လေးကို ကျောချမ်းဖွယ် အကြည့်တစ်ချက် ပို့ပေးလိုက်သည်။

ချူဟွိုက်က အကောင်ငယ်လေးကို တင်းတင်းပွေ့ထားရင်း ပြန်လှည့်သွားပြီး ပြောလိုက်သည် " အပြင်ထွက်ပြီးတော့ အခြေအနေကို စုံစမ်းကြည့်ဖို့ လိုမယ်...."

လျိုဟန်က အနောက်က လိုက်လာပြီး သိချင်စိတ်နှင့် မေးလာသည် " ဘာလို့ ဘာမှ ပြောမသွားရတာလဲ ....စုန့်ချင်း...."

" စိတ်မဆိုးပါနဲ့....ကျွန်တော်က အပြစ်တင်ချင်တာ မဟုတ်ပါဘူး....မင်း ဒုက္ခရောက်သွားမှာစိုးလို့ စိတ်ပူမိရုံပါ...." လျိုဟန်က စိုးရိမ်သလို မေးလာသည်။

စုန့်ချင်းက ခေါင်းခါပြလိုက်သော်လည်း သူမအကြည့်က အေးစက်ပြီး အလှမ်းဝေးနေသလိုပင်။

" မင်းဘာလို့ ပြန်မပြောတာလဲ....ကျွန်တော့်ကို လန့်အောင်လုပ်နေတာ...." လျိုဟန်က စိတ်အေးသွားအောင် ပြောလိုက်မိသည်။ သူ့လေသံကြောင့် စုန့်ချင်း စိတ်ဆိုးသွားလောက်မည်ဟုလည်း တွေးမိခြင်းပင်။

လျိုဟန်က ချူဟွိုက်ဆီ အမှီလိုက်နိုင်သွား၍ မေးလာသည် " ဘာလို့ မတွေ့တာလဲ စွန်း...."

ချူဟွိုက်က စကားစဖြတ်ပြီး ဝင်ဖြေလာသည် " သူ့ကို သရဲက သတ်သွားပြီ...."

" ဘာကြီး...." လျိုဟန်က အံ့သြသွားသလို ရေရွတ်လိုက်ရင်း ချူဟွိုက်မျက်နှာကို တွန့်ဆုတ်တွန့်ဆုတ် ကြည့်လိုက်မိသည်။

ချူဟွိုက်က သူတွေးနေသည့် အရာကို သိ၍ အပြုံးလေးနှင့် ပြန်ဖြေလိုက်သည် " ကျွန်တော်က ဘာလုပ်နိုင်မှာမို့လဲ...."

လျိုဟန်က အသံတိတ်သွားသည်။

အိမ်ငယ်လေးသို့ ပြန်ရောက်သည့်အချိန် စုန့်ချင်းက ပုံလဲသွားတော့သည်။

ချူဟွိုက်နှင့် လျိုဟန်တို့က အပြင်ထွက် စုံစမ်းခဲ့ကြရာ ကွမ်ရင်မယ်တော်လေးက ရွာသားများကို လွှတ်ပေးလိုက်ပြီမှန်း သိလိုက်ရသည်။ ရွာသားများအားလုံးက အိမ်ပြန်သွားကြပြီး အခြားရက်များကဲ့သို့ တောင်ခြေရှိ ကွမ်ရင်မယ်တော်လေး နတ်နန်းဆီ ချောင်းပေါက်မတတ် သွားနေကြဆဲပင်။ ရှောင်ကွမ်ရင်ရွာလေးက ပုံမှန်အတိုင်း အေးအေးဆေးဆေး ပြန်ဖြစ်သွားလေသည်။

လျိုဟန်က ချူဟွိုက်ကို စိတ်လှုပ်ရှားသလို မေးလာသည် " ဒါဆို ကျွန်တော်တို့ စုန့်ချင်းကို ကျွန်တော့်အိမ် ခေါ်သွားလို့ ရပြီပေါ့....အဲ့ဒီမှာ ဆေးဝါးအထောက်အပံ့ ပစ္စည်းတွေ ရှိတယ်....ကျွန်တော်တို့ ကျောက်စိမ်းမိန်းကလေးကို ခွဲထုတ်လို့ရပြီ...."

ချူဟွိုက်၏ နာဖူးကြောတို့ အနည်းငယ် ပြေလျော့သွားသည်။ နောက်ဆုံးတော့ သတင်းကောင်း ကြားရပြီပဲ....

ချူဟွိုက်က ရွာသူကြီးလည်း ယခုချိန်ဆို အိမ်ပြန်ရောက်ပြီး ညပုလဲ ပျောက်နေမှန်း သိသွားမည့်အဖြစ်ကို တွေးမိရင်း လျိုဟန့်ကို ပြောလိုက်သည် " ခင်ဗျား အရင်ပြန်နှင့်လိုက်....ကျွန်တော့်မှာ လုပ်စရာရှိသေးလို့ ခဏနေ ပြန်လာခဲ့မယ်...."

သူက ညပုလဲကို တူးပြီး ရွာသူကြီးအိမ်ကို သွားချင်သေးသည်။

သူက ညပုလဲ မြုပ်ထားသည့် နေရာကို ရောက်သွားချိန် မြေဆီလွှာပေါ်ရှိ ပေါင်းပင်ကျိုးတိုးကျိုးတဲများကို ကြည့်ရင်း မျက်နှာအမူအရာ အနည်းငယ် ပြောင်းလဲသွားသည်။

တစ်ယောက်ယောက်က လာမွှေသွားပြီပဲ....

မြေဆီလွှာက အဆွခံထားရ၍ ချူဟွိုက်မျက်လုံးများ ရုတ်တရက် နက်မှောင်သွားသည်။ ညပုလဲ မရှိတော့ဘူး....

ဖြတ်ခနဲ ပေါ်လာသည့် အတွေးတစ်ခုကြောင့် ကောင်ငယ်လေးက အိမ်အသေးလေးဆီ ပြေးသွားလေသည်။ ချူဟွိုက်ကလည်း ချက်ချင်း သဘောပေါက်သွား၍ အမြန် လှည့်ပြန်သည်။

ညပုလဲရှိတဲ့ နေရာကို သူသိသွားပြီ....

အိမ်အသေးလေးတွင် စုန့်ချင်းက ဗိုက်ပေါ် လက်တင်ထားရင်း ကုတင်ပေါ် လှဲအိပ်နေပြီး သူမရုပ်သွင်က တော်တော်လေး ပြောင်းလဲနေသည်။ ယခင်က စုန့်ချင်းမှာ နူးညံ့ပြီး နာနာခံခံပုံစံလေး ရှိသော်လည်း ယခု သူမရုပ်ရည်က နတ်နန်းထဲရှိ ကွမ်ရင်မယ်တော်လေး ရုပ်တုလို ကြော့ရှင်းပြီး ဂုဏ်ရှိန်ရှိသည့် သူတစ်ယောက်လို ဖြစ်နေသည်။

လျိုဟန်က သူမ ပင်ပန်းနေခြင်း ဖြစ်မည်ဟု တွေးမိပြီး ဂရုမထားမိသော်လည်း ချူဟွိုက်က အပြေးရောက်လာပြီး စုန့်ချင်းဆီ တည့်တည့်လျှောက်သွားမှန်း တွေ့လိုက်ရသည်။

“ ချူဟွိုက်....သွားမနိုးနဲ့လေ....စုန့်ချင်းက အိပ်နေတာ...." လျိုဟန်က သတိပေးရန် ပြင်လိုက်သော်လည်း ချူဟွိုက်က စုန့်ချင်းမေးစေ့ကို ပင့်ပြီး ပါးစပ်ကို ဖွင့်နေမှန်း တွေ့လိုက်ရသည်။

အလင်းရောင်တစ်ခု ထွက်လာ၍ လျိုဟန်၏ မျက်နှာက ချက်ချင်းတောင့်ခဲသွားရသည်။

စုန့်ချင်းပါးစပ်ထဲတွင် ညပုလဲက ရှိနေသည်။

သမိုင်းရာဇဝင်ထဲတွင် ဧကရာဇ်များက သေသွားသည့်အချိန် ပါးစပ်ထဲ ကျောက်စိမ်း ထည့်လေ့ရှိပြီး မျိုးရိုးမြင့်များက ပုလဲထည့်လေ့ရှိကာ စာသင်သားများက ဆန်စေ့ထည့်ပြီး သာမန်ပြည်သူများက အကြွေစေ့ ထည့်လေ့ရှိကြသည်။ ဤရိုးရာက အချိန်ကြာလာသည်နှင့်အမျှ ပြောင်းလဲလာပြီး စည်းမျဥ်းများလည်း မတင်းကျပ်တော့ပေ။

အရာဝတ္ထုတစ်ခုခုကို ထည့်ရသည့် ရည်ရွယ်ချက်က ဖြစ်နိုင်ခြေနှစ်ချက် ရှိလေသည်။ ပထမတစ်ချက်က သရဲများကို လာဘ်ထိုးပြီး နေရာကောင်းတစ်ခု ရှာချင်၍ ဖြစ်ပြီး နောက်တစ်ခုက သေသူ၏ ဝိဥာဥ်ကို ချိတ်ပိတ်ပြီး လျှောက်သွားနေသော သရဲမဖြစ်အောင် တားဆီးခြင်းပင်။

ညပုလဲက သေသူ၏ ပါးစပ်ထဲ အမှန်တကယ် ရှိနေပြီး ထိုသေသည့်သူကလည်း ကွမ်ရင်မယ်တော်လေးနှင့် တော်တော်လေး ဆင်တူနေသည်။

👻

Prev Next