MM Story Teller

Chapter 87

Viewers 4k

👻Chapter 87

ကျင်းထျန်းယိကို ငွေကြေး ထောက်ပံ့ပေးနေတဲ့ ရှူးဂါးမာမီ (1)

နောက်ပိုင်းရက်များတွင် လူတိုင်းလိုလိုက အခန်းပိတ်နေကြပြီး သဲထိတ်ရင်ဖို ရုပ်ရှင်များကို ကြည့်နေကြသည်။

ချူဟွိုက်က ရုပ်ရှင်ကို ရင်တမမနှင့် ကြည့်နေရသည်။

သူ့ကိုယ်ထဲ ကပ်တွယ်နေသည့် သရဲ၏ ဇစ်မြစ်ကို သိလိုက်ရသော်လည်း ပရလောကထဲ ပိတ်မိနေ၍ ဆက်ပြီး စုံစမ်းလို့လည်း မရဖြစ်နေသည်။

သူက သွေးနီလမစ်ရှင်တုန်းက ကျင်းထျန်းယိက ကလေးလေးတစ်ယောက်အား ကမ္ဘာအစစ်သို့ ပြန်ပို့ပေးသည့် အဖြစ်ကို အမှတ်ရသွား၍ သူလည်း ကမ္ဘာအစစ်သို့ ယာယီပြန်၍ရနိုင်သည်ဟု မျှော်လင့်ချက်လေး ထားမိသည်။ သို့သော်လည်း ကျင်းထျန်းယိက တိုက်ခန်းမှူးကသာ ဤအခွင့်အရေး ရနိုင်သည်ဟု ပြောခဲ့သည်။

တိုက်ခန်းမှူးဆိုသည်က မစ်ရှင်အများဆုံး အောင်ပြီးသည့်သူ ဖြစ်ရမည်ပင်။

ချူဟွိုက်က ဤကိစ္စကို လောလောဆယ် ဘေးချိတ်ထားလိုက်သည်။

တီဗွီထက်တွင် အေနှင့်ဘီက စုံစမ်းရန်အတွက် အခန်းနံပါတ်၄၃၉သို့ သွားနေသည့်အပိုင်း ပြနေသော်လည်း ချူဟွိုက်က စိတ်မပါလက်မပါ ကြည့်နေရသည်။

စောစောက ပြထားသည့် အချက်အလက်အတိုင်း ဆိုပါက ဘီက အခန်း၄၃၉တွင် သေတော့မည် ဖြစ်သည်။

ပွဲကြည့်ပရိသတ်တစ်ယောက် အနေနှင့် ချူဟွိုက်က ရုပ်ရှင်ထဲက သရုပ်ဆောင်များထက် ပိုပြီး အတွေ့အကြုံများ၍ နောက်ဖြစ်လာမည့်အရာရော ဘီ၏ကံကြမ္မာကိုပါ ကြိုတင်ခန့်မှန်းနိုင်သည်။ သို့သော်လည်း ဘီအပါအဝင် အခြားသရုပ်ဆောင်များကဖြင့် မှန်းနိုင်မည် မဟုတ်ပေ။

သို့သော်လည်း ဇာတ်ကြောင်းက ရုတ်တရက် အလှည့်အပြောင်း ပေါ်လာသည်။

လိမ္မာပါးနပ်ပုံရသည့် ဘီက ရုတ်တရက် ဗိုက်ကိုနှိပ်ပြီး နာကျင်မှုကို သည်းခံနေရသည့် ပုံစံလေး ပြလာပြီး ကျန်လူများကို တောင်းဆိုလိုက်သည် " ထပ်ပြီး ထိန်းမထားနိုင်တော့ဘူး... သန့်စင်ခန်း သွားချင်လာပြီ...."

အေက စိတ်မရှည်သလို မျက်မှောင်ကြုတ်လိုက်မိသည် " မင်းက အကျပ်အတည်း ဖြစ်နေပါတယ်ဆိုမှ ဘောလုံးကို လွှတ်ချတော့မလို့လား....ငါတို့ အခန်း၄၃၉ကို အတူတူသွားမလို့ လုပ်ထားတာလေ....သည်းမခံနိုင်တော့ဘူးလား...."

ချူဟွိုက်က သရုပ်ဆောင်များ သွားကြရမည့် ဇာတ်ကြောင်း ဖြစ်မည်ဟု နားလည်သွားပြီး အေကလည်း သူ၏ တုံးအသော ကာရိုက်တာအတိုင်း ဘီကို တိုက်တွန်းလိုက်ခြင်း ဖြစ်နေသည်။

ဘီက ထိန်းပြီး ပြုံးပြလိုက်ရသည် " ငါ တကယ် မခံနိုင်တော့ဘူးကွ....ဒါမှမဟုတ် စီနဲ့ သွားလိုက်ပါလားကွာ...."

သူက စီ့ကို သူ့ဘေးတွန်းပို့လိုက်ရင်း သန့်စင်ခန်းထဲ အမြန် ပြေးဝင်သွားသည်။

စီ၏ မျက်နှာက အနည်းငယ် ပြောင်းလဲသွားသော်လည်း အန္တရာယ်ကို အပြည့်အဝ နားမလည်သေးပေ။

ချူဟွိုက်က အံ့သြသွားရင်း ချက်ချင်း အာရုံစိုက်ကာ ပိတ်ကားထက်ကို မလွဲတမ်း ကြည့်နေလိုက်သည်။

သုံးမိနစ်ကြပြီးနောက် စီသေသွားလေသည်။ စီက ဘီ့နေရာကိုယူပြီး သူ့အစား သေသွားခဲ့သည်။ ထို့နောက် ဘီက အမြန်ကိစ္စရှင်းပြီး အန္တရာယ်ကို ရှောင်လွှားရန် ကြံစည်လိုက်သည်။ ရုပ်ရှင်အဆုံးသတ်တွင် သရုပ်ဆောင်ခြောက်ယောက်ထဲမှ ဘီတစ်ယောက်တည်းသာ အသက်ရှင်ကျန်ခဲ့လေသည်။

စိတ်ထဲ ခိုးလိုးခုလုဖြစ်သွားရပြီး နောက်ပိုင်း ချူဟွိုက်ကြည့်သည့် ရုပ်ရှင်တော်တော်များများတွင် အများစုက " အမြစ်ဖြတ်သုတ်သင် ရုပ်ရှင်" များ ဖြစ်နေခဲ့သည်။ "စွန့်လွှတ်အနစ်နာခံခြင်း ဟိုတယ်" ဆိုသည့် ဤရုပ်ရှင်ကမူ အသက်ရှင်ကျန်ရစ်သူ တစ်ဦးရှိနေခဲ့သည်။

ချူဟွိုက်က ရုပ်ရှင်ရိုက်နေစဥ်အတွင်း လိုက်နာရမည့် လျှို့ဝှက်စည်းမျဥ်းများလည်း ရှိနေမှန်း နားလည်သဘောပေါက်သွားသည်။ ဘီက တစ်ခုခုကြောင့် အန္တရာယ်ကို ကြိုသိသွားရင်း နည်းလမ်းရှာပြီး ထွက်ပြေးသွားကာ စီ့ကို အစားဝင်ခိုင်းလိုက်လေသည်။

ရုတ်တရက် တံခါးသံ မြည်လာသည်။ ချူဟွိုက်က သွားဖွင့်ပေးလိုက်ရာ ကျင်းထျန်းယိကို တွေ့လိုက်ရသည်။

ကျင်းထျန်းယိက တီဗွီကို အကြည့်ရောက်သွားပြီး အံ့သြသွားလေသည် " မင်းလည်း ဒါကို ကြည့်နေတာလား....ကိုယ် အခုလေးတင် ဒီအကြောင်း ပြောမလို့ လာခဲ့တာ...."

ချူဟွိုက်က DVDခြင်းလေးကို ညွှန်ပြလိုက်ပြီး မေးလိုက်သည် " ခင်ဗျားပြောတုန်းက ရုပ်ရှင်ထဲမှာဆို သေဖို့ ရာခိုင်နှုန်းက သိပ်မများဘူးဆို....ဒါပေမယ့် ဒီရုပ်ရှင်တွေကကျ ဘာလို့ လူတိုင်းလိုလို သေနေကြတာလဲ...."

“ ဒီ 'စွန့်လွှတ်အနစ်နာခံခြင်း ဟိုတယ်' ဆိုတဲ့ ရုပ်ရှင်ကလွဲလို့ပေါ့...." ချူဟွိုက်က ထပ်ဖြည့်ပြောလိုက်သည်။

ကျင်းထျန်းယိက နားလည်ရန်ခက်ခဲသည့် အရာတစ်ခုကို ပြောပြလာသည် " ဘာလို့လဲဆိုတော့ ကမ္ဘာကြီးက အသက်ရှင်ဖို့ အခွင့်အလမ်းရှိနိုင်တဲ့ စည်းမျဥ်းတွေရှိတယ်ဆိုတာ ပြိုင်ပွဲဝင်တွေကို သိမသွားစေချင်ဘူးလေ...."

ချူဟွိုက် နားလည်သွားသည် " ဒါဆို သူတို့ကလည်း ကျွန်တော်တို့ကို ခြောက်လန့်ဖို့ ကြိုးစားနေကြတာပေါ့...."

" ဟုတ်တယ်..." ကျင်းထျန်းယိက ခေါင်းညိမ့်ပြလာသည် " ဒီဇာတ်ညွှန်းတွေကို ပရလောကကပဲ စီစဥ်ညွှန်ကြားပေးတာလေ...."

ချူဟွိုက်က ခေါင်းညိမ့်ပြလိုက်ပြီး မေးလာသည် " ဒါဆို သူတို့က ဒီ 'စွန့်လွှတ်အနစ်နာခံခြင်း ဟိုတယ်' ဆိုတဲ့ ရုပ်ရှင်ကိုကျ ဘာလို့ သိမ်းထားတာလဲ...."

ကျင်းထျန်းယိက သူ့ဆီကနေ ရီမုတ်လှမ်းယူလိုက်ရာ မတော်တဆ လက်ချင်းထိမိသွားလေသည်။ ချူဟွိုက်က လက်ပြန်ရုတ်လိုက်ရင်း လက်ချောင်းထိပ်များကို မသိမသာ ပွတ်သပ်မိသည်။

ကျင်းထျန်းယိက ရုပ်ရှင်ကို ပြန်ရစ်ကြည့်လိုက်ရင်း ဘီက သန့်စင်ခန်းကို သွားမည့်အခန်းတွင် ရပ်လိုက်သည်။ သူက ဘီကို ညွှန်ပြလိုက်ရင်း ရှင်းပြလာသည်

" သူက အရင်တုန်းက ကိုယ်တို့တိုက်ခန်းရဲ့ တိုက်ခန်းမှူးဖြစ်ခဲ့တာကြောင့် အဲ့ဒီရုပ်ရှင်ရဲ့ တစ်ယောက်တည်းသော အသက်ရှင်ကျန်ရစ်ခဲ့တဲ့သူ ဖြစ်တယ်...."

ချူဟွိုက်က တစ်ခဏမျှ မေ့လဲမတတ် ဖြစ်သွားရင်း တီဗွီဘက်ကို လက်ညှိုးထိုးပြလာပြီး အက်ကွဲနေသည့် လေသံဖြင့် မေးလာသည်

" ဒါဆို ဒီရုပ်ရှင်က...."

"ဟုတ်တယ်" ကျင်းထျန်းယိက အတည်ပြုပေးလိုက်သည် " ဒီရုပ်ရှင်က မနှစ်က ကိုယ်တို့ တိုက်ခန်းက ရိုက်ထားခဲ့တာ...ပြီးတော့ ခြောက်ယောက်ထဲမှာ ငါးယောက်က အတွေ့အကြုံမရှိသေးတဲ့ အသစ်လေးတွေ ဖြစ်နေခဲ့တယ်...."

ကျင်းထျန်းယိက ရှင်းပြလာသည် " ကမ္ဘာကြီးက ဒီတိုက်ခန်းရုပ်ရှင်ကို အပိုင်သိမ်းမသွားခဲ့ဘူး....ဒါကြောင့် ဒီရုပ်ရှင်ကို မူလအတိုင်း သိမ်းထားပြီးတော့ ကိုယ်တို့ ကိုးကားလို့ရအောင် ပေးထားခဲ့တာ...."

ချူဟွိုက်က လှောင်ရယ်လိုက်သည် " ကိုးကားလို့ရအောင် ဟုတ်လား....တခြား အတွေ့အကြုံနုသေးတဲ့ အသစ်လေးတွေကို သူ့အစား သေခိုင်းတာမျိုးကိုလား....ဒီလိုလူမျိုးကို ခေါင်းဆောင်အဖြစ် ရခဲ့တဲ့ အသစ်လေးတွေကတော့ ကံဆိုးခဲ့တာပဲ...."

ချူဟွိုက်က မာနကြီးသည့်သူ ဖြစ်ပြီး ကိုယ်ကျိုးအတွက် အခြားသူများကို စွန့်လွှတ်အနစ်နာခံခိုင်းသည့် ထိုနည်းလမ်းမျိုးကို စက်ဆုပ်ရွံရှာမိသည်။

ချူဟွိုက်က အနည်းငယ် မျက်ခုံးပင့်မိသွားသည်။ " သူ့လုပ်ဆောင်ချက်အတိုင်းဆို သူက ဇာတ်ကြောင်းကို ကြိုသိနေတာ သိသာနေတာပဲလေ...ဒါပေမယ့် သူ့အဖွဲ့သားတွေကို ကယ်တင်ဖို့ ဇာတ်ကြောင်းပြင်မယ့်အစား သရဲဆီ ထိုးကျွေးပြီး အနစ်နာခံခိုင်းတယ်ပေါ့...."

ကျင်းထျန်းယိက ရင်တုန်လာရသည်။

သူနှင့်ချူဟွိုက်တို့က ကိုယ်ကိုယ်တိုင်အတွက်ရော အခြားသူများကိုပါ အကျိုးရှိသွားလျှင် အကောင်းဆုံး ဖြစ်သည်ဟု ခံယူချက်ချင်း တူသည့်သူဖြစ်၍ ထိုအတိုင်း မဖြစ်နိုင်လျှင်လည်း အခြားသူများကို အန္တရာယ်မပေးပဲ အကျိုးရှိမည့်ကိစ္စမျိုး လုပ်မည်ဖြစ်သည်။

အစောင့်အရှောက်များက အပြစ်ကျူးလွန်သူများထက် အတိတ်ဘဝကံကြောင့် ရောက်ရှိလာကြရသည့် ချူဟွိုက်တို့လို လူများကို ကာကွယ်ပေးကြရသည်။

သို့သော်လည်း ယခုအချိန်တွင် ကျင်းထျန်းယိက ချူဟွိုက်ကို ကြည့်လိုက်ပြီး သူ့ကိုယ်သူ မေးခွန်းထုတ်မိသည်။ ချူဟွိုက်သာ တစ်နေ့မှာ မိစ္ဆာဖြစ်လာရင် သူဘာလုပ်ရမလဲ....

ကျင်းထျန်းယိက ရုတ်တရက် ရယ်မောမိသည်။

သူတတ်နိုင်သမျှ သူ့ကို ကူညီပေးနေဦးမည် ဖြစ်ကာ နောက်တွန့်မနေပဲ ပြန်ပို့ပေးမည် ဖြစ်သည်။

" ခင်ဗျား ဘာရယ်နေတာလဲ...." ချူဟွိုက်က သိချင်စိတ်ကြောင့် အနားတိုးလာသည်။

ကျင်းထျန်းယိက ရေခဲတောင်နှင့်တူပြီး ချူဟွိုက် မြင်ရသမျှအရာအားလုံးက ရေမျက်နှာပြင်အထက်မှ ထိပ်အချွန်သေးသေးလေး တစ်ခုသာ ဖြစ်သည်။ တိမ်မြုပ်ထားသည့် အပိုင်းက များလွန်း၍ ဤလူက အစစ်အမှန်မဟုတ်သလို ခံစားမိစေသည်။

ထိုသူက လုံးဝ ယုံကြည်ရသည့်သူမျိုး ဖြစ်ပြီး လေးစားထိုက်သည့်သူလည်း ဖြစ်သည်။

ကျင်းထျန်းယိက ရုတ်တရက် ရှေ့တိုးလာပြီး နှာခေါင်းရှုံ့၍ ပြောလာသည် " နောက်ဆုံးမှာ တိုက်ခန်းမှူး ဘာဖြစ်သွားလဲ သိချင်လား...."

ချူဟွိုက်က ပုခုံးတွန့်ပြလိုက်သည် " သူက အသက်ရှင်လျက်နဲ့ ကမ္ဘာအစစ်ကို ပြန်သွားနိုင်ခဲ့တာမို့လား...."

ကျင်းထျန်းယိက သူ့ကို အနားကပ်လာခိုင်းလိုက်သည်။

တစ်ခဏမျှ တွန့်ဆုတ်နေပြီးနောက် ချူဟွိုက်က သိချင်စိတ်ကြောင့် ထပ်ပြီး ကပ်သွားလိုက်သည်။

ကျင်းထျန်းယိက နူးနူးညံ့ညံ့ ရယ်လိုက်ရင်း အဖြေပေးလာသည် " နောက်ထပ်မစ်ရှင်တစ်ခုမှာ သူက ကိုယ်သတ်တာကို ခံလိုက်ရတယ်...."

ကျင်းထျန်းယိက ဖွဖွလေး ပြုံးပြလာသည် " အဲ့ဒါက ကိုယ် ပထမဆုံး တိုက်ခန်းထဲ ဝင်လာတဲ့အချိန်မှာ ဖြစ်ခဲ့တာ....သူက ကိုယ့်ကို ယဇ်ပူဇော်ဖို့ လုပ်ခဲ့တယ်လေ...ဒါပေမယ့် နောက်ဆုံးမှာ ယဇ်ပူဇော်ခံလိုက်ရတဲ့သူက သူဖြစ်သွားတာ...."

“ သောက်ကျိုးနည်း....တန်ပြန်သတ်ခံလိုက်ရတာလား...မိုက်ချက်ပဲ...." ချူဟွိုက်က စိတ်တိုင်းကျသွားသလို ပြောလာရင်း မျက်လုံးလေးများက တလက်လက်တောက်ပနေသည်။

နှစ်ယောက်သား စကားပြောနေသည့်အချိန် သတိပေးခြင်းမရှိပဲ ချူဟွိုက်က ခေါင်းထဲ တဆစ်ဆစ် နာကျင်လာရသည်။

သွေးစာတန်းများ ပေါ်ပေါက်လာသည်။

[ တိုက်ခန်း၂၃၃ရဲ့ ၂၀၂၀အတွက် နှစ်သစ်ကူး သဲထိတ်ရင်ဖို ရုပ်ရှင်ကတော့ သွေးလန့်စရာ အပန်းဖြေစံအိမ်ကြီး ဖြစ်ပါတယ်]

[ရုပ်ရှင်မိတ်ဆက် : လူငယ်ခုနစ်ယောက်ဟာ ပိတ်ရက်မှာ အပန်းဖြေဖို့အတွက် မြို့ဆင်ခြေဖုံးက ဗီလာတစ်ခုကို ငှားရမ်းခဲ့ပါတယ်....ဒါပေမယ့် ကြောက်စရာကောင်းတဲ့ ကိစ္စတွေက ဖြစ်ပွားလာတဲ့အခါမှာတော့....အဲ့ဒီကိစ္စရဲ့ နောက်ကွယ်က အမှန်တရားက ဘာများဖြစ်နေမလဲ....]

[ ရုပ်ရှင်ကြာချိန် : ယခုအပတ် သောကြာနေ့ညမှာ စထွက်ပြီး တနင်္ဂနွေနေ့ နေ့လည်မှာ ပြန်လာရမှာ ဖြစ်ပါတယ်]

[ ဇာတ်ညွှန်းတွေကိုတော့ အထပ်တစ်ထပ်စီရဲ့ စာတိုက်ပုံးတွေမှာ ပို့ထားပြီးပါပြီ....ကျေးဇူးပြုပြီး စစ်ဆေးကြည့်လိုက်ပါ]

[ ဇာတ်ကောင်များက အတည်ပြုထားပြီးသားမို့လို့ အပြောင်းအလဲ လုပ်လို့မရမှန်း ကျေးဇူးပြုပြီး သတိပြုပေးပါရန်]

[ ကြောညာချက် အဆုံးသတ် : တိုက်ခန်း၂၃၃မှ နေထိုင်သူများ နှစ်သစ်မှာ ပျော်ရွှင်ပါစေဟု ဆုမွန်ကောင်း တောင်းပေးလိုက်ပါတယ်]

ချူဟွိုက်က မော့ကြည့်လိုက်ရာ ကျင်းထျန်းယိနှင့် အကြည့်ချင်းဆုံသွားရသည် " ကျွန်တော်တော့ ပုံစံကို ကြည့်ရင်း အန္တရာယ်အငွေ့အသက်ကို ခံစားနေရတယ်..."

ကျင်းထျန်းယိက လှောင်ရယ်လိုက်သည် " သတင်းကောင်းလည်း ရှိပါတယ်....ရုပ်ရှင်မိတ်ဆက်အတိုင်းဆို မျှော်လင့်ချက်မရှိတော့ပဲ အစုလိုက်အပြုံလိုက် သေသွားရမယ့် သဲထိတ်ရင်ဖို ရုပ်ရှင်မျိုး မဟုတ်ဘူး....ရုပ်ရှင်မှာ ' အမှန်တရား' ဆိုတာ ပါနေတယ်...."

ချူဟွိုက်က ခေါင်းညိမ့်ပြလိုက်သည်။

သုံးရက်ကြာပြီးနောက် သူတို့က ရုပ်ရှင်လောကသို့ ဝင်သွားကြရသည်။

သောကြာနေ့ည...

မျက်စိကျိန်းလောက်အောင် တောက်ပနေသော နီယွန်မီးများက ညကို စိုးမိုးထားသည့် အေမြို့တော်တွင် လူသွားလူလာများသည့် ဘားနေရာတစ်ခုလည်း ရှိနေသည်။

ကျင်းထျန်းယိက ဘရန်းတံဆိပ်ပါသည့် အဝတ်အစားများ ဝတ်ထားပြီး အနက်ရောင်ဘောက်ကွပ် မျက်မှန်တပ်ထားကာ မျက်ခုံးမျက်လုံးတို့ ထင်းထွက်နေသော်လည်း ခပ်ရှုပ်ရှုပ်ဆံပင်လေးက ငယ်ရွယ်ပြီး တုံးအသည့်သူတစ်ယောက် ပုံစံမျိုး ပေးနေသည်။

သူ့ဇာတ်ကောင်က မိန်းမကြီးများကို ချူစားသည့် အပျော်ကောင်လေး ပုံစံမျိုးပင်။

ဇာတ်ကောင်နာမည်က ကျိုးလင်းဖြစ်သည်။

ကျိုးလင်းက ဆင်းရဲသည့် နေရာမှလာ၍ ကောလိပ်တက်ရန် ချေးငွေထုတ်ခဲ့ရသည်။ သူက စာကြိုးစားပြီး နာမည်တစ်ခု ရအောင် လုပ်ချင်ခဲ့သော်လည်း ငွေစက္ကူများနှင့် မြို့ပြ၏ခမ်းနားကြီးကျယ်မှုအောက် နစ်မြောသွားပြီး သူနှင့်အခြားသူများကို နှိုင်းယှဥ်တတ်လာသည်။

သူက ပိုက်ဆံကို လက်လွတ်စပယ် သုံးပစ်လိုက်သော်လည်း ငွေရှာနိုင်သည့် အရည်အချင်း မရှိသေးပေ။ သူ့တွင် အရည်အချင်း မရှိသော်လည်း ကံကောင်း၍ သူ့မျက်နှာလေးက အကျိုးပေးပြီး အိပ်ရာပေါ်တွင်လည်း စွမ်းဆောင်ရည် ကောင်းသည့်သူ ဖြစ်သည်။ သူက အခွင့်အရေး ယူလိုက်ရန် ဆုံးဖြတ်ကာ ဂေးဘားပိုင်ရှင်ဖြစ်သူနှင့် တိတ်တိတ်လေး ချိတ်ဆက်ခဲ့လေသည်။

တိုက်ခန်းနေသည့်သူများအတွက် ဇာတ်ညွှန်းက သီးသန့်လျှို့ဝှက်ထား၍ အခြားသူများကို ပြ၍မရပေ။ သူတို့ပြချင်လျှင်ပင် အခြားသူများက ဇာတ်ညွှန်းကို ဖတ်၍မရနိုင်ချေ။ ထို့ပြင် ဇာတ်ညွှန်း၏ အဆုံးပိုင်းတွင်လည်း နေထိုင်သူများက အခြားသူများနှင့် ဇာတ်ကောင်ချင်း ဆက်သွယ်၍မရဟု ပြောသွားခဲ့သည်။ ထို့ကြောင့် ကျင်းထျန်းယိက သူ့ကို ထောက်ပံ့ပေးနေသည့် ဂေးဘားပိုင်ရှင်က မည်သူမှန်း သေချာမသိပေ။

သို့သော်လည်း ချူဟွိုက်တော့ မဖြစ်နိုင်ပေ။ အကြောင်းမှာ ရှူးဂါးမာမီက အမျိုးသမီးတစ်ယောက် ဖြစ်နေပြီး မီးခိုးရောင် စာလုံးလေးများနှင့် ပို့လာခဲ့သည့် မက်ဆေ့ချ်ကလည်း စိတ်အနှောင့်အယှက်ဖြစ်စရာကောင်းလွန်း၍ တစ်ကိုယ်လုံးပင် တုန်တက်သွားရသည့်အတွက်ကြောင့်ပင်။

ဤလောက၏ ရည်ရွယ်ချက်က အချိုးအစားမကျသော သတင်းအချက်အလက်ကို ဖန်တီးပြီး ရုပ်ရှင်ကို ခက်ခဲအောင် လုပ်ချင်၍ ဖြစ်သည်။

ရုပ်ရှင်ထဲတွင် ပြိုင်ပွဲဝင်များက အစပိုင်းတွင် သူတို့ဇာတ်ကောင်နေရာကို ကျေနပ်နိုင်သော်လည်း နောက်ပိုင်း အချိတ်အဆက်မိသွားချိန်တွင်ဖြင့် အတားအဆီးများ အပြည့်ပေါ်လာမည် ဖြစ်သည်။

မီးခိုးရောင် စာလုံးလေးများပါသည့် မက်ဆေ့ချ် ပို့လာသည့် အသံက ရုတ်တရက် တောင်ခနဲ မြည်လာသည်။

မင်းရဲ့အသည်းလေး " အချစ်.... ရောက်နေပြီလား....တစ်ယောက်တည်း စောင့်နေရတာ အထီးကျန်လိုက်တာနော်...."

ကျင်းထျန်းယိ၏ မျက်နှာက တောင့်တင်းသွားရသည်။ သူ့ခေါင်းကိုက်လာပြီ ဖြစ်သည်။

ဤအဆင့်တွင် ဇာတ်လမ်းက ဇာတ်ကောင်နေရာကို ပရိတ်သတ်ဘက်ကို မိတ်ဆက်ပေးမည် ဖြစ်၍ အဓိကဇာတ်ကြောင်းကို ချမပြသေးပေ။ သွေးစာတန်းက သူ့ကို 'သူ့အသည်းလေး' ဆိုသည့်သူအား သွားကြိုရန် သတိပေးခဲ့၍ပင်။

ဤဇာတ်လမ်း၏ အစပိုင်းက စနေနေ့တွင် ကျိုးလင်း၏ မွေးနေ့ရှိ၍ သူ့မမက အပန်းဖြေစံအိမ်တစ်ခု ငှားခဲ့လေသည်။ ကျိုးလင်းက သူ၏ ကောလိပ်အတန်းဖော်များကိုပါ ဖိတ်ထားခဲ့လေသည်။

ဇာတ်ကောင်အချက်အလက်နှင့် အဖွင့်ဇာတ်ကြောင်းမှလွဲလျှင် ဇာတ်ညွှန်းက မှာကြားချက်အနည်းသာ ရှိသည်။ ထို့ကြောင့် သူက ထိုအတိုင်းလိုက်နာပြီး ထိုလူ့ကို သွားကြိုရုံရှိတော့သည်။

သို့သော်လည်း "မင်းရဲ့ အသည်းလေး" ဆိုသည့် ရင်ထိတ်စရာ အသံနေအသံထားကြောင့် သူက ကို့ရို့ကားယားဝန်ဆောင်မှုမျိုး လုပ်ပေးရမည်လား သိချင်လာရသည်။

ရုပ်ရှင်ထဲတွင် ဇာတ်ကောင်နေရာ ပုံစံချထားသည်က အလွန်ကြီးကျယ်လွန်းပြီး ပရိတ်သတ်ကို ဆွဲဆောင်ဖို့အတွက် ဖြစ်မှန်း ကျင်းထျန်းယိက နားလည်လေသည်။

ကျိုးလင်း " ကျွန်တော် ရောက်ကာနီးပါပြီ...."

ပြန်စာပို့လိုက်ပြီးနောက် ကျင်းထျန်းယိက သူ့ရှေ့က ဘားကို မော့ကြည့်လိုက်သည်။

သူက အထဲကို လျှောက်သွားလိုက်ရာ ချက်ချင်းပင် မပြတ်မသား အကြည့်များကို ဆွဲဆောင်မိသွားလေသည်။

“ ရှောင်ကျိုး....အစ်မရှန်ကို လာရှာတာလား...." အဖျော်ဆရာက ပြုံးပြလာသည်။

ကျင်းထျန်းယိ " ဟုတ်တယ်....အစ်မရှန်ရော ...."

သူက ရှူးဂါးမာမီနှင့် ပတ်သတ်၍ အချက်အလက် အနည်းအကျဥ်း ရထားလေသည်။ ထိုလူ့နာမည်က ရှန်ဟွိုက်ဖြစ်ပြီး ငယ်ရွယ်လှ၍ ဟောဟောဒိုင်းဒိုင်းနှင့် တည့်တိုးဆန်သည့်သူ ဖြစ်သည်။

" ဟိုမှာလေ...." အဖျော်ဆရာက ဖရုံစေ့အချို့ကို ခွဲလိုက်ရင်း မလှမ်းမကမ်းက လူအုပ်ဆီ ညွန်ပြလိုက်သည်။

တစ်ယောက်ယောက်က တိုင်ပတ်ပြီး ကနေခြင်းပင်။

လူအုပ်ထဲမှ အရပ် ၁.၈မီတာခန့် ရှည်သည့် ပိန်ပိန်ရှည်ရှည် လူတစ်ယောက်က ညှို့ချက်ပြင်းသည့် လှိုင်းတွ

န့်ဆံပင်ရှည်ကြီးများနှင့် ရင်ကိုမော့ပြီး ကျောကို ကော့ထားလေသည်။

အလှမ်းဝေးနေ၍ ကျင်းထျန်းယိက မျက်နှာကို ရှင်းရှင်းလင်းလင်း မမြင်ရပေ။

သူက လျှောက်သွားလိုက်ရာ တိုင်ပတ်ကနေသည့် တစ်ယောက်က သူ့ကို ပြုံးပြလာသည်။ ကျင်းထျန်းယိ၏ ဖုန်းမှာ မြေပေါ်သို့ ချက်ချင်း လွှတ်ကျသွားရသည်။

သူမှာ ရယ်လိုက်မိမလို ဖြစ်သွားရ၏။

ထိုလူက ချူဟွိုက် ဖြစ်နေသည်။

ကျင်းထျန်းယိက သူ့ဇာတ်ကောင်ကို အဓိပ္ပါယ်မရှိ စုတ်ပြတ်သတ်နေသည်ဟု ထင်ခဲ့သော်လည်း ချူဟွိုက်နေရာနှင့်ယှဥ်ကြည့်လိုက်လျှင် သူ့မှာ ပြောစရာစကားပင် မရှိတော့ပေ။

သူက စောစောက ရထားသည့် မီးခိုးရောင် စာလုံးလေးများနှင့် ရေးထားသော မက်ဆေ့ချ်အကြောင်း အမှတ်ရသွားချိန် နှုတ်ခမ်းက အလိုလို ပြုံးလာရသည်။

လောကကြီးက တော်တော် အံ့သြဖို့ကောင်းတာပဲ....ကျွတ်ကျွတ်....ချူဟွိုက် ဇာတ်ညွှန်းဖတ်တဲ့နေ့တုန်းက သူ့ကို စိတ်ဆိုးမာန်ဆိုး နှင်ထုတ်တာ ဒါကြောင့်ကိုး....

ချူဟွိုက်က ကျင်းထျန်းယိကို မြင်လိုက်ချိန် သေချင်စိတ်ပေါက်လာရသည်။

သေစမ်း....လောကကြီးက ဇာတ်ကြောင်းနဲ့ကိုက်အောင်လို့ သူ့ကို တိုင်ပတ်အကစွမ်းရည်တွေပါ ပေးထားသေးတယ်ဟ....

သူက နာရီဝက်ခန့် အရူးတစ်ယောက်လို ပတ်ကနေရပြီး ကျိုးလင်းက လာကြိုတော့မည်ဆို၍ သူ့မှာ ပျော်သွားရသော်လည်း ယခုတွင်ဖြင့်.....

ဖာခ့်

သူ့ဇာတ်ကောင်က ပိုက်ဆံနည်းနည်းရှိသည့် cross-dressingဘားပိုင်ရှင်တစ်ယောက် ဖြစ်သည်။

သူက ကျိုးလင်းကို ရူးရူးမူးမူးဖြစ်နေပြီး သူ၏'soulmate'အဖြစ်ပါ သဘောထားခဲ့သည်။

ဒီကမ္ဘာကြီးက သောက်တလွဲတွေပဲ..

သူက ထိုသို့တွေးနေသော်လည်း မျက်နှာထက် အပြုံးတပ်လိုက်ပြီး ကျင်းထျန်းယိကို စကားဆိုလိုက်သည်

" အချစ်....."

ကျင်းထျန်းယိက လျှောက်လာပြီး ထိုင်ချလိုက်ကာ ခုနစ်စင်တီမီတာ ရှစ်စင်တီမီတာခန့် မြင့်သော ဒေါက်မြင့်ဖိနပ်ကို စီးပေးလာသည်။ သူက ချူဟွိုက်ရင်ဘတ်ကို တစ်ချက်ခိုးကြည့်လိုက်ရင်း တိုးတိုးလေးကပ်ပြောလာသည်

" ဒါ တကယ်ပဲလား...."

ချူဟွိုက်က ရယ်လိုက်မိသည် " ဒီကို ရောက်နေပြီပဲ....ခင်ဗျား ဘယ်လိုထင်လို့လဲ...."

ကျင်းထျန်းယိက မျက်ခုံးပင့်မိသွားရင်း အနည်းငယ် စိတ်ပျက်သွားသည့်ပုံပင်။

ချူဟွိုက်က တစ်စက္ကန့်မျှ အံ့သြသွားရသည်။

နောက်ဆုံးမစ်ရှင်မှ ပြန်ရောက်ပြီးသည့်အချိန် ချူဟွိုက်က ပျင်းရိပြီး စပ်စုချင်စိတ်ပေါ်လာ၍ လိင်တူချစ်ကြိုက်သည့် ဝတ္ထုများကို ရှာဖတ်ခဲ့သည်။ သူက ရင်ဘတ်ကြီးကြီးနှင့် အမျိုးသားများက အောက်ပုဂ္ဂိုလ်အဖြစ် နေရသည့် အခန်းများကို ရောက်သွားသည့်အချိန် ထိတ်လန့်သွားပြီး သူလည်း ဤအခြေအနေကို ဆက်ထိန်းထားနိုင်ပါ့မလား သံသယဝင်လာရသည်။

ကျင်းထျန်းယိ ဖြစ်သွားသည့် မျက်နှာအမူအရာက အနည်းငယ် ထူးဆန်းနေသည်။

ချူဟွိုက်နှင့် ကျင်းထျန်းယိတို့ အတူထွက်သွားပြီးနောက် ဘား၏ အမှောင်ထောင့်တစ်နေရာတွင် စက္ကူတစ်ရွက်လို ဖြူဆုတ်နေသည့် မျက်နှာနှင့် အမည်းရောင်ဝတ်ထားသော လူတစ်ယောက်က စကားပြောစက်ကို ကိုင်ပြီး အေးစက်စက်လေသံနှင့် ပြောလိုက်သည်

" အပျိုလေးနဲ့ ပိုင်းလုံးတို့ ဘားထဲက ထွက်သွားပြီး အပန်းဖြေဗီလာဆီ သွားနေကြပြီ...."

👻

Prev Next