ထိုသူက ရန်မူဟန် မပြသလို သေမျိုးတစ်ဦးသာ ဖြစ်နေဆဲဖြစ်သည်။ သူများ အထင်မှားသွားတာလား။ ရမ်ရှန့်၏ အကြည့်တို့က ပန်းကန်သုံးလုံးထံ ကျရောက်သွားသည်။ သေမျိုးတို့၏ အစားအစာ ဖြစ်သော်ငြား လုံးဝ မစားရသည်ထက်တော့ တော်ပါသေးသည်။ သူရှေ့ကလူမှာ သေမျိုးဟု တွေးနေစဉ်တွင်ပင် ရမ်ရှန့်၏ လက်တို့က အမြစ်အဖြစ်သို့ ပြောင်းစပြုလာတော့သည်။
"သခင်လေးရွိုင်း မီးဖိုထဲမှာက ဒီအာဟာရဟင်းလျာတွေပဲ ရှိတယ် ..."
ဒီနိုက အားတုံ့အားနာဟန်ဖြင့် စကားအချို့ ပြောမည့်ဆဲဆဲတွင် သူ့ရှေ့ရှိ သခင်လေးရွိုင်းသည် ပန်းကန်လုံးကို ယူကာ ပါးစပ်ထဲသို့ လောင်းချလိုက်သည်ကို တွေ့လိုက်ရသည်။ ပထမတစ်ပန်းကန် နောက်ထပ် တစ်ပန်းကန် ပြီးတော့ နောက်တစ်ပန်းကန်
ဒါ ဒါ သူက ဝါးတောင် မဝါးတော့ဘူးလား ...
ဒီနိုက ခပ်တိုးတိုး မေးလိုက်သည်။ ရမ်ရှန့်က ချက်ခြင်း ခေါင်းငြိမ့်ပြလာသည့်အတွက် သူလည်း နောက်ထပ်သုံးပန်းကန် ယူလာပြန်သည်။ ရမ်ရှန့်လည်း ပါးစပ်ထဲသို့ တစ်ချိုးတည်း လောင်းထည့်လိုက်ပြန်၏။
ဒီနိုက နောက်သုံးပန်းကန် ယူလာပြန်ကာ သူကလည်း ထပ်လောင်းထည့်လိုက်ပြန်သည်။
"သခင်လေးရွိုင်း အများကြီးစားမိရင် အစာအိမ် နာလာလိမ့်မယ် နောက်မှ တစ်ခေါက် ထပ်စားနော် ..."
ဒီနိုမှာ သူ့နဖူးတွင် ချွေးစတို့ သီးလာသည်ဟုပင် ခံစားမိလာတော့သည်။ မီးဖိုကို ၆ ခါ ပြေးလိုက်ရကာ ရမ်ရှန့်က ၁၈ ပန်းကန် စားပစ်ခဲ့သည်။
ဟင်းလျာတစ်နပ်တိုင်းမှာ သာမန်စစ်သားတို့၏ အာဟာရလိုအပ်ချက်အတိုင်း ထည့်သွင်းထားခြင်း ဖြစ်သည်။ စွမ်းရည်ပိုင်ရှင်တို့မှာတော့ ပိုစားနိုင်သော်ငြား ၁၈ ပန်းကန်ဟူသည့် အတိုင်းအတာမှာ မာရှယ်နှင့်ပင် ရင်ဘောင်တန်းနိုင်နေပြီဖြစ်သည်။
လူသားတို့မှာ အများကြီး မစားနိုင်ကြောင်း သိလိုက်ရသည့်အတွက် ရမ်ရှန့်လည်း စိတ်ပျက်လက်ပျက်ဖြင့် ခေါင်းငြိမ့်ကာ ထပ်စားမည့်အကြံကို စွန့်လွှတ်လိုက်ရသည်။
စိတ်သက်သာရာ ရသွားသော ဒီနိုလည်း သက်ပြင်းအသာချကာ မေးလိုက်သည်။
"လိုချင်တာရော ရှိသေးလား ..."
"နောက်တစ်နပ်ကျ ပိုပြီး များများလေး စားလို့ရမလားဟင် ..."
ရမ်ရှန့်က တိုးတိုးလေး ပြောလိုက်သည်။ ယခင် သူတွေ့ဖူးသည့် ဗီလိန်များနှင့် မတူစွာ ဒီလူကတော့ လူကောင်းတစ်ဦး ဖြစ်ပုံပေါက်သည်။
ဆယ်ကျော်သက်လေး၏ အသံမှာ ကလေးပေါက်စလိုမျိုး တိုးတိတ်ညင်သာလှသည်။ သူ့လေယူလေသိမ်းမှာ အနည်းငယ် ကွဲပြားနေသော်ငြား နားဝင်ပီယံ ရှိလှသည်။ တစ်ခုပဲ သူပြောတဲ့စကားတွေကကျ ...
ဒီနိုက ကောင်လေး၏ဗိုက်ကို တစူးတစိုက် ကြည့်လိုက်သည်။ ဒီလိုကြီးစားလို့ အဆင်ပြေပါ့မလား ...
"မရဘူးလားဟင် ဒါဆိုလည်း နည်းနည်းလေး လျော့လိုက်မယ်လေ ..."
ရမ်ရှန့်က ကရုဏာသက်ဖွယ်ကောင်းလှစွာသော အကြည့်တို့ဖြင့် ကြည့်ကာ ပြောလိုက်သည်။
"ရတာပေါ့ ခဏနေရင် ယူလာပေးပါ့မယ် ..."
ဒီနိုက သူ့နားရောက်လာကာ ချွေးများရွှဲနေသော လက်ဖဝါးနှစ်ဖက်ကို သုတ်ပေးလိုက်သည်။
သူက အခုလေးတင်မှ စားပြီးတာ မဟုတ်ဘူးလား ဒါက စွမ်းရည်ပိုင်ရှင်တွေမှ လုပ်လေ့ရှိတာမျိုးလေ သူကို့ အရေးမပေးသင့်ဘူးထင်တယ် ...
ရမ်ရှန့်က အပြုံးခပ်ကြီးကြီးတစ်ပွင့်ကို ချိတ်ဆွဲရင်း ပြောလိုက်သည်။
ရုတ်ချည်းလိုလိုပင် ဒီနိုသည် အိမ်ထောင်ပြု သားမွေးချင်စိတ် ပေါက်လာတော့သည်။ သူ့ကလေးလေးကရော ဒီလိုမျိုးပဲ ချစ်စရာကောင်းပြီး ကောင်းကောင်းမွန်မွန် ပြုမူတတ်လောက်လား..."
မဟုတ်ဘူး ဒါက မာရှယ်ရဲ့ ဇနီးလောင်းလေ ကလေး မဟုတ်ဘူး ...
ဒီနိုက ငေးတိငေးငိုင်ဖြင့် ထွက်လာလိုက်သည်။
စစ်သင်္ဘောက မြို့တော်ကြယ်သို့ တစ်ဟုန်ထိုး ပျံသန်းလာစဉ်တွင် မြို့တော်သားများမှာလည်း သတင်းရထားပြီးဖြစ်သည်။
အိမ်တော်ထိန်းအိုကြီးက လက်ထဲမှ ဆက်သွယ်ရေးကိရိယာနှင့်အတူ စံအိမ်ထဲ ဝင်လာပြီး မျက်နှာချင်းဆိုင် စားသောက်နေကြသော အမျိုးသားတစ်ဦးနှင့် အမျိုးသမီးတစ်ဦးကို တွေ့လိုက်ရသည်။
အမျိုးသားမှာ တစ်ခေါင်းလုံး ဆွတ်ဆွတ်ဖြူကာ အတော်ပင် အသက်ရနေပြီဖြစ်သည်။ ချောင်းကိုလည်း တစ်ချိန်လုံး အဆက်မပြတ်ဆိုးနေသည်။ အမျိုးသမီးမှာတော့ အတော်ကို ငယ်ရွယ်ကာ လှပနေပေသည်။
ထိုမိန်းမလှလေးက သူမရှေ့ရှိ သက်ကြီးပိုင်းအမျိုးသားကို ကြည့်နေကျမဟုတ်သည့် သိမ့်မွေ့သော အကြည့်တို့ဖြင့် ကြည့်လိုက်သည်။
ထိုသူနှစ်ဦးမှာ လူသားမျိုးနွယ် ဖက်ဒရယ်၏ အင်အားကြီး မိသားစုငါးစုမှ ကျောက်မိသားစု၏ အုပ်ချုပ်သူ ကျောက်ဖမ်းနှင့် သူ့ဇနီး ရှန်းချိုးရှစ်ဖြစ်သည်။
"သခင်ကြီး သခင်မ မဟာမိတ်တပ်ပေါင်းစုရဲ့ အာကာသယာဉ်က တစ်ခုခုဖြစ်သွားတယ်လို့ ကြားသိရပါတယ် ..."
အိမ်တော်ထိန်းက တီးတိုးပြောလိုက်သည်။
ရှန်းချိုးရှစ်က မျက်မှောင်တို့ကို အသာကြုတ်ကာ မေးလိုက်သည်။
အိမ်ထိန်းလည်း ဖြစ်ပျက်ခဲ့သည်များကို စုံစေ့အောင် ရှင်းပြကာ အာကာသယာဉ်ပေါက်ကွဲမှုမှာ ပြင်းထန်ကြောင်းကိုလည်း တစ်ပါတည်း ထည့်ပြောလိုက်သည်။
"လင်းယွီကို ဒီကလေးနဲ့ တကယ် လက်ထပ်ပေးချင်တာလား။ လင်းယွီရဲ့ ခန္ဓာကိုယ်က ..."
ကျောက်ဖမ်းက ပြောလိုက်သည်။
သားဖြစ်သူမှာ လအနည်းငယ်ထပ်ပိုကာ အသက်မရှင်နိုင်တော့ကြောင်းနှင့် သူ့ကိုယ်ထဲမှ စွမ်းအင်တို့ ကမောက်ကမ ဖြစ်ကာ ပေါက်ကွဲမထွက်ခင် မြို့တော်ကြယ်နှင့် ဝေးရာသို့ ပို့သင့်ကြောင်း အပြောခံရပေါင်းလည်း မနည်းတော့ပေ။
ဂြိုဟ်ပေါ်တွင် ဥချမည့် ဇာ့ဂ်ဘုရင်မ၏ အဖျက်စွမ်းအင်အားလုံးမှာ သူ့သားကိုယ်ထဲတွင် ရောက်နေသည်။ သားဖြစ်သူမှာ ယခင်ကလိုမျိုး ပြန်မဖြစ်တော့ဘဲ သေမည့်ရက်ကိုသာ စောင့်နေရမည်ကို စိုးကြောက်မိသည်။
"ကုန်သွယ်ရေးဌာနချုပ်ရဲ့ ဥက္ကဌကသာ အတင်းအကြပ် မတိုက်တွန်းရင် ဒီလို ပေါက်ကရအကြံမျိုးကို လက်ခံမှာ မဟုတ်ဘူး ဒါပေမယ့် အဲ့ဒီ့သူရဲ့ စွမ်းအင်ကလည်း နူးညံ့ပေမယ့် ပျော့ညံ့တာမျိုး မဟုတ်ဘူး အနည်းဆုံးတော့ လင်းယွီကို ပိုပြီး သက်သာစေနိုင်မလားလို့ ..."
ရှန်းချိုးရှစ်က သက်ပြင်းချလိုက်သည်။ သိမ်မွေ့စွမ်းအင်ပိုင်ရှင်ကြောင့် သူမသား သက်သာလာနိုင်ရွေ့သာ မဟုတ်ပါလျှင် ထိုကေးကို ကျောက်အိမ်တော်သို့ ဝင်လာရန် လက်ခံမည်မဟုတ်ပေ။
"သူက ကောင်းရင်တော့ ကိုယ်တို့လည်း ကောင်းကောင်း ပျိုးထောင်ကြတာပေါ့ မကောင်းရင်တော့ လာရာလမ်းအတိုင်းသာ ပြန်ခိုင်းလိုက် ..."
ကျောက်ဖမ်းက ပြောလိုက်သည်။
ရှန်းချိုးရှစ်က ခေါင်းကိုသာ ငြိမ့်ပြလိုက်တော့သည်။ သူမ၏ မျက်ဝန်းတွင် မျက်ရည်စတို့က တွဲလွဲခိုနေသည်။ သူမ၏ ခင်ပွန်းသည် နောက်ထပ် နှစ်အချို့သာ နေရတော့မည့်ကိစ္စမှာ ဝမ်းနည်းဖွယ်အကောင်းဆုံးဟု ထင်ခဲ့သော်ငြား မမျှော်လင့်ထားစွာပင် သားဖြစ်သူမှာ လအချို့သာ ရှင်နိုင်တော့မည်ဖြစ်သည်။
