အပိုင်း ၁၂၁ ( The President 21 )

ယန်ကျင်းဇီသည် သူကိုယ်တိုင် ကူးပြောင်းလာခဲ့သော ဖြစ်ရပ်ကြောင့် ဤကဲ့သို့ ထူးဆန်းထွေလာများအား ပိုမိုလက်ခံနိုင်စွမ်း ရှိလာသည်။ ယခု ကျန်းယွင်ရှိူ့၏ စကားကို နားထောင်ပြီးနောက် သူ့ကဲ့သို့ ကမ္ဘာကူးပြောင်းလာသော တစ်စုံတစ်ဦး ရှိနိုင်မည်ဟု သူသည် တွေးမိသည်။

သူသည် ကမ္ဘာမကူးပြောင်းလာခင် အတိတ်ကို အမှတ်ရမှု မရှိဘဲ ကူးပြောင်းလာသော်ငြား ထိုလူက မှတ်ဉာဏ်ဖြင့် ကူးပြောင်းလာနိုင်သည် သို့မဟုတ် အနာဂတ်မှ အတိတ်သို့ ပြန်ရောက်လာခြင်းပင် ဖြစ်နိုင်သေးသည်။

ခဏ၊ ဒါကို ကမ္ဘာကူးပြောင်းလာတာလို့ မခေါ်သင့်ဘူး။ ဒါပေမယ့်.... ပြန်လည်မွေးဖွားတာလား?

ယန်ကျင်းဇီသည် ကျန်းယွင်ရှိူ့ကို ကြည့်ကာ ရုတ်တရက် မေးသည် : “ ယွင်ရှိူ့၊ မင်းနဲ့ အမေ အရင်တစ်ခေါက် ဈေးဝယ်ထွက်တုန်းက သုံ့ချင်းလင်နဲ့ တွေ့ခဲ့လား? သုံ့ချင်းလင်က ဝမ်ရှန်းချောင်နာမည်ကိုလည်း မင်းရှေ့မှာ ပြောခဲ့တာလား? ”

“ မင်း ဘယ်လိုသိလဲ? ” ကျန်းယွင်ရှိူ့သည် မကျေမနပ်ဖြစ်ပြီး ယန်ကျင်းဇီ၏ ရင်ဘတ်ပေါ်တွင် မေးစေ့ကို တင်ကာ ယန်ကျင်းဇီကို မေးစေ့ဖြင့် “ထိုး” လိုက်သည်။

သူသည် ယန်ကျင်းဇီရှေ့တွင် သုံ့ချင်းလင်အကြောင်း မပြောချင်သောကြောင့် ယန်ကျင်းဇီကို ထိုအကြောင်း မပြောပြခဲ့ချေ။

“ အမေ ပြောပြတယ်။ ” ယန်ကျင်းဇီသည် ခေါင်းမော့ပြီး ကျန်းယွင်ရှိူ့ကို နမ်းလိုက်သည် – သူ့ရှေ့မှာ လှဲနေတဲ့ ဒီမျက်နှာကို မနမ်းဘဲ မနေနိုင်ဘူး!

ကျန်းယွင်ရှိူ့က နှစ်ကြိမ်နှစ်ခါ နှာမှုတ်လိုက်သည် : “ သူ ပြောခဲ့တယ်... ဘာဖြစ်လို့လဲ? ”

“ အဲ့တုန်းက အခြေအနေကို မင်း ကိုယ့်ကို ပြောပြပါဦး။ ” ယန်ကျင်းဇီက ပြောသည်။

ကျန်းယွင်ရှိူ့သည် ယန်ကျင်းဇီကို နောက်တစ်ကြိမ် ကိုက်ပြီးနောက် တွန့်ဆုတ်စွာ စတင်ပြောပြသည်။ ပြောပြပြီးသောအခါတွင် သူက ဆက်ပြောသည် : “ မင်းကို သူနဲ့ တွေ့ခွင့်မပေးဘူး။ မင်း သူနဲ့ စကားမပြောရဘူး။ ”

ကျန်းယွင်ရှိူ့ရဲ့ သဝန်တိုနေတဲ့ ပုံစံက အရမ်းချစ်စရာကောင်းတယ်!

ယန်ကျင်းဇီသည် သူ့ကို ဖိလိုက်ပြီး နမ်းလိုက်သည်။

သူ ဘာဖြစ်နေလဲ သိပြီ၊ သုံ့ချင်းလင်က ပြန်လည်မွေးဖွားလာတယ်!

သူသည် ကျန်းယွင်ရှိူ့ကို ပစ်မှတ်ထားသူကို ရှာဖွေခဲ့ဖူးသော်လည်း ယခင်က မရှာနိုင်ခဲ့ချေ။ ယခု စဉ်းစားကြည့်လိုက်သော်... အဲ့ဒီ့လူက သုံ့ချင်းလင် ဖြစ်လိမ့်မယ်!

သူ ကူးပြောင်းလာချိန်တွင် သုံ့ချင်းလင် ပြန်လည်မွေးဖွားလာသည်မှာ သုံးလကြာပြီးဖြစ်လောက်သည်... ပြန်လည်မွေးဖွားခြင်းကြောင့်သာလျှင် သုံ့ချင်းလင်၏ မူလပိုင်ရှင်အပေါ် သဘောထားက သိသိသာသာ ပြောင်းလဲသွားသည်။

သုံ့ချင်းလင် ပြန်လည်‌မမွေးဖွားမီတွင် သူသည် မူလပိုင်ရှင်နှင့် ကျန်းယွင်ရှိူ့တို့ကြောင့် မတရားခံခဲ့ဖူးလောက်သဖြင့် သူ့တွင် မူလပိုင်ရှင်ရှေ့၌ ကောင်းမွန်သော သဘောထား မရှိချေ။ ကျန်းယွင်ရှိူ့အတွက်မူ...

သုံ့ချင်းလင်က ကျန်းယွင်ရှိူ့ကို ‘ကမ္ဘာမြေပေါ်မှ ကောင်းကင်ဘုံ’ မှာ ပေါ်လာစေတဲ့ မက်ဆေ့ချ်စာတိုကို ပို့ခဲ့တယ်မလား?

အဲ့ဒီ့“မဖွယ်မရာဓာတ်ပုံတွေ”ကိုလည်း သုံ့ချင်းလင်က ဝယ်ပြီးတော့ ကျန်းယွင်ရှိူ့ကို ချောက်ချတယ် ဟုတ်တယ်မလား?

ဒီတစ်ခေါက် ခိုးချတဲ့ ကိစ္စကလည်း သုံ့ချင်းလင်ရဲ့ အကြံအစည်ပဲ ဖြစ်ရမယ်!

ဒီလူ ရူးနေတာလား?

သို့သော် ယခုမူ သူ့တွင် သုံ့ချင်းလင်ကို ဂရုစိုက်ရန် အချိန်မရှိပေ။

သူနှင့် ကျန်းယွင်ရှိူ့တို့သည် ရေချိုးပြီးနောက် မည်သည့်အဝတ်အစားကိုမျှ မဝတ်ထားဘဲ ကျန်းယွင်ရှိူ့က သူ့ခန္ဓာကိုယ်ကို ကိုက်နေဆဲဖြစ်သည်။ သူ့မှာ ခံနိုင်ရည်ရှိနေရင် သူတော့ နတ်ဘုရား ဖြစ်နေလောက်ပြီ!

အွန်လိုင်းပေါ်က ကိစ္စကတော့ ဖြစ်ချင်ရာသာ ဖြစ်ပလေ့စေ!

မည်သို့ပင်ဖြစ်စေ ကျန်းယွင်ရှိူ့၏ အခွေအသစ်တွင် ထို Twitter မှ သီချင်းတစ်ပုဒ်လေးပင် မရှိချေ။

ယန်ကျင်းဇီသည် ကျန်းယွင်ရှိူ့နှင့်အတူ ပျော်ရွှင်စွာ အိပ်ပျော်သွားသော်လည်း အင်တာနက်သုံးစွဲသူများက ငြင်းခုံနေကြဆဲဖြစ်ပြီး အခြေအနေများ ပိုဆိုးလာသည်။

ကျန်းယွင်ရှိူ့၏ အခွေအသစ်တွင် ထို Twitter မှ သီချင်းများ ပါဝင်သည် ဟူသော အတွင်းလူများစွာ၏ သတင်းများကြောင့်ပင်။

“ ဒါ ဘယ်က အတွင်းသိတွေလဲ! အခွေမှာ အဲ့သီချင်းတွေ မရှိဘူး! ” လုယွီရှောင်သည် သတင်းရပြီး အင်တာနက်ပေါ်တွင် ကြည့်ရှုနေသည်။ သီချင်းအနည်းငယ်၏ အစပိုင်းများကို နားထောင်ပြီးနောက် သူသည် အလွန်စိတ်ဆိုးသည်။

ကျန်းယွင်ရှိူ့က ကူးချတယ်လို့ လူတစ်ယောက်က ပြောနေတယ်!

ကျန်းယွင်ရှိူ့၏ သီချင်းများတွင် သက်ဝင်လှုပ်ရှားမှုနှင့် ချိုမြိန်မှုများတို့ဖြင့် ပြည့်နှက်နေပြီး ၎င်းတို့ကို နားထောင်ရသောကြောင့် သူသည်ပင် သူ့သွားများကို ဆုံးရှုံးလုနီးပါးဖြစ်ရသည်။ သီချင်းများကို ကူးချရန်ကား လုံးဝ မဖြစ်နိုင်။

ပိုအရေးကြီးတာက Twitter ပေါ်က သီချင်းတွေက အခွေထဲမှာ လုံးဝ မပါဘူး!

“ မစ္စတာလု၊ ဒီကိစ္စနောက်ကွယ်မှာ ရေတပ်တစ်ခု ရှိတယ်။ ” ကုမ္ပဏီ၏ PR ဌာနမှ လူက လုယွီရှောင်ကို ဤကိစ္စနှင့်ပတ်သက်ပြီး ပြောပြကာ ဆိုသည် : “ အတွင်းသိ ဆိုတဲ့ လူတွေကလည်း တကယ်တော့ ရေတပ်ကပါ။ ”

လုယွီရှောင်သည်လည်း ၎င်းကို သတိပြုမိပြီး လေးနက်သော အမူအရာဖြင့် မေးသည် : “ ဒါဆို ငါတို့ ဘာလုပ်သင့်လဲ? ” သူသည် ဤကဲ့သို့သော ကိစ္စများကို ကိုင်တွယ်ရာတွင် မတော်သောကြောင့် ကျွမ်းကျင်သူများကို မေးမြန်းခြင်းက ပိုကောင်းသည်။

ထိုလူက ပြောသည် : “ မစ္စတာလု၊ အခွေထဲမှာ ဒီသီချင်းတွေ မရှိဘူးလို့ မင်း ပြောထားတယ်။ ဒီတော့ ငါ့ရဲ့အကြံဉာဏ်က ဒီကိစ္စကို အရေးမလုပ်ဖို့ပါပဲ။ ” ဤလူသည် PR ဌာနမှ ဖြစ်ပြီး လုပ်ငန်း၏ ဤအပိုင်းအတွက်သာ တာဝန်ရှိသည်။ ကျန်းယွင်ရှိူ့၏ အခွေကို ထုတ်လုပ်နေချိန်တွင် လျှို့ဝှက်ဆောင်ရွက်မှုများမှာ အလွန်ကောင်းမွန်လှရာ သူသည် အခွေကို နားမထောင်ရသေးသောကြောင့် လုယွီရှောင်ကို အမြန်လာရှာရသည်။

အခွေတွင် ဤသီချင်းများ လုံးဝ မပါမှတော့ ၎င်းကို အရေးမလုပ်သင့်ချေ။ ဒီလူတွေက ကျန်းယွင်ရှိူ့အတွက် ပရိုမိုရှင်းကူဆင်းပေးနေတာပဲ!

ခဏလေး၊ နောက်ကွယ်က လူက ရေတပ်ကို ခေါ်ပြီး “ကျန်းယွင်ရှိူ့ ခိုးကူးမှု” ကိစ္စကို အကြီးအကျယ် ဖြစ်အောင် လုပ်နေတယ်၊ ဒါက ကျန်းယွင်ရှိူ့ကို ပရိုမိုရှင်းဆင်းပေးတာပဲ မဟုတ်ဘူးလား? ဒီအသိုင်းအဝိုင်းထဲမှာ ကိုယ့်ကိုယ်ကို ဒုက္ခပေးခြင်း ဆိုတဲ့ ဝါဒဖြန့်တာမျိုး ရှိတယ်မလား?

“ ဒါဆို သူတို့ကို လွှတ်ထားလိုက်! ” လုယွီရှောင်က ဆိုသည်။ စကားပြော‌ပြီးနောက် သူသည် နောက်သီချင်းတစ်ပုဒ်ကို ဖွင့်လိုက်သည် : “ Twitter ပေါ်မှာ တင်ထားတဲ့ သီချင်းတွေက တကယ် ကောင်းတယ်... နေဦး၊ ဒီဟာက ‘Lights’ ထွက်တုန်းက ထွက်တာပဲ။ အာ၊ ကျန်းယွင်ရှိူ့ အရင်က ငါ့ကို တီးပြဖူးတယ်။ အဲ့တုန်းက သူ ပြောတာကတော့ သူ ဒီသီချင်းကို အခွေအသစ် ‘Waning’ ထဲ ထည့်ချင်တယ်တဲ့။ ဒါပေမယ့် နောက်ပိုင်း သူ ယန်ကျင်းဇီနဲ့ ကြိုက်ပြီး စိတ်ပြောင်းသွားတယ်... ”

“ အခြားတစ်ခုခုရှိသေးလား? ”

“ ဟုတ်တယ်! ငါ သူ ဒီအပိုင်းကို တီးတာ ကြားဖူးတယ်။ အဲ့တုန်းက ငါ သဘောကျခဲ့တယ်! ” လုယွီရှောင်သည် အတွေးနက်သွားပြီး တစ်ခုခုတွေးမိသည် : “ အရင်က အခွေထုတ်နေတုန်း ယန်ကျင်းဇီက လုပ်ငန်းစဉ်တစ်ခုလုံးကို လျှောက်လိုက်ပြီး လုံခြုံ‌ရေးအဆင့်ကိုလည်း တိုးမြှင့်ခဲ့တယ်။ သူက သီချင်းပေါက်ကြားမှာကို တစ်နေ့လုံး စိုးရိမ်နေတယ်။ ကျန်းယွင်ရှိူ့ရဲ့ သီချင်းက အရင်တုန်းက ပေါက်ကြားဖူးလို့များလား? ”

ထိုအချိန်တွင် ယန်ကျင်းဇီက အလွန်တင်းကြပ်စွာ စောင့်ကြည့်နေခဲ့သည်။ သူသည်ပင် စိတ်ထဲမှ ပြောဆိုဖူးသည်။ သူသည် ယန်ကျင်းဇီက အတွေးလွန်နေသည်ဟု ခံစားခဲ့ရသည်။ သို့ရာတွင် ယခု သူ စဉ်းစားကြည့်လိုက်သော် ဂီတနှင့် အခွေများအကြောင်း ဘာမှမသိသော ယန်ကျင်းဇီက လုံခြုံရေးကို အလွန့်အလွန် အရေးထားခဲ့ရာ အရင်က ပေါက်ကြားဖူးတာပဲ ဖြစ်ရမယ်!

ကျန်းယွင်ရှိူ့က သီချင်းတွေအကုန်လုံးကို ပြောင်းရတာ မထူးဆန်းတော့ဘူး!

လုယွီရှောင်သည် ဤသို့တွေးမိလေလေ၊ ဤသို့သာ ဖြစ်ရမည်ဟု ခံစားမိလေလေ ဖြစ်သည် : “ နောက်ကွယ်က လူက ကျန်းယွင်ရှိူ့နောက် လိုက်နေတာပဲ! ကံကောင်းတာက ယန်ကျင်းဇီက ကြိုတင်ပြင်ဆင်ထားတယ်! ဒီတစ်ခါ သူတို့ကတော့ ဝါးခြင်းတောင်းနဲ့ ရေသယ်ချင်နေပြီ! ”

“ ဝါးခြင်းတောင်းက အလွတ်ဖြစ်နေရုံတင်မကဘူး၊ ငါတို့ကိုလည်း ကူကြေညာပေးသေးတယ်။ ” PR ဌာနမှ လူက ဆိုသည်။

ကျန်းယွင်ရှိူ့နှင့် ယန်ကျင်းဇီတို့က လူသိရှင်ကြား တွဲနေလျှင်ပင် လူကြိုက်များနှုန်းက မြင့်သော်လည်း အရမ်းမမြင့်ချေ။ အဆုံးတွင်မူ လူတော်တော်များများက စန္ဒရားဆရာကို လုံးဝ ဂရုမစိုက်ကြပေ။

ကျန်းယွင်ရှိူ့၏ အခွေကို စိတ်ဝင်စားသူက ပို၍ပင် နည်းသေးသည်... ဤသို့သော အခွေအစစ်မျိုးက တန်ဖိုးကြီးသည်။ လူအများက အင်တာနက်ပေါ်တွင် ကျန်းယွင်ရှိူ့နှင့် ယန်ကျင်းဇီတို့၏ ဖရဲသီးများကို စားကြလျှင်ပင် သူတို့က ကျန်းယွင်ရှိူ့၏ အခွေကို စိတ်မဝင်စားချေ။ 

ဒါပေမယ့် အခုတော့ ဒီအခွေကို အာရုံစိုက်တဲ့လူတွေ ပိုပိုများလာပြီ!

ဒါက ကောင်းတဲ့ကိစ္စပဲ!

ဒါပေါ့၊ ကိစ္စကောင်း ဖြစ်ပေမယ့် တစ်ခုခုဖြစ်မှာစိုးလို့ စောင့်ကြည့်ဖို့တော့ လိုသေးတာပေါ့။

PR ဌာန (ပြည်သူ့ဆက်ဆံရေးဌာန) မှ လူများသည် အချိန်ပိုဆင်းရန် ညတွင်းချင်း အခေါ်ခံရသည်။ ဤအချိန်တွင် ရေတပ်ကလည်း အချိန်ပိုအလုပ်ဆင်းနေသည်။

“ဒါက မင်းတို့ အမွှမ်းတင်ခဲ့တဲ့ စန္ဒရားမင်းသားလေးလား? လက်ရာတွေက ခိုးကူးထားတာတွေ!”

“ကျန်းယွင်ရှိူ့ ဂီတစက်ဝိုင်းထဲက ထွက်သွား!”

“ကျန်းယွင်ရှိူ့က တော်တော်လည်တယ်။ သူက ဘယ်သူမှမသိတဲ့ နိုင်ငံခြားက သီချင်းတွေကို ခိုးကူးပြီး တရုတ်မှာ အခွေထုတ်ပြီး ရောင်းစားတယ်။”

“ဒါက ငါတို့နိုင်ငံကို မျက်နှာ‌ပျက်စေတယ်!”

“ငါ မူရင်း‌တေးရေးစီ သွားပြီးပြီ။ သူက ကျန်းယွင်ရှိူ့ကို တရားစွဲနိုင်တယ်!”

…

ရေတပ်သည် ဝေဖန်သော ကောမန့်မျိုးစုံကို လျင်မြန်စွာ ဖြန့်ချိနေသည်။

အင်တာနက်အသုံးပြုသူတချို့လည်း သက်ရောက်ခံလိုက်ရသည် : ”ကျန်းယွင်ရှိူ့က ဒီလိုမျိုးလို့ ငါ မထင်ထားဘူး။”

“သူ့ရဲ့ ဂီတပါရမီရှင် ဆိုတဲ့ ဂုဏ်သတင်းက အကုန်လုံး ဟန်ပြပဲမလား?”

“ဒီနေ့ခေတ်မှာ သူတို့တွေအကုန်လုံးက နာမည်ဟန်ပြပြီး ဈေးကွက်ချဲ့ထွင်တဲ့အပေါ်မှာ မှီခိုနေကြတာပဲမလား?”

…

လူစုကြီးဟာ “မင်းက တစ်ခွန်း၊ ငါက တစ်ခွန်း” ဖြင့် ဆက်လက်စကားပြောဆိုနေကြပြီး ကျန်းယွင်ရှိူ့နှင့် ယန်ကျင်းဇီတို့က လုံးဝ မတုံ့ပြန်သည်ကို တွေ့လိုက်ရသည်။ အဲ့တော့ သူတို့တွေက ပိုပြီးတက်ကြွလာကြတယ်!

သေချာတာပေါ့၊ ကျန်းယွင်ရှိူ့က ထိုသို့သောအမှုကို ပြုမည်မဟုတ်ဟု အခိုင်အမာ ယုံကြည်သော လူတချို့ ရှိသေးသည်။

“ငါက စန္ဒရားတီးသင်‌နေတဲ့ ကျောင်းသားပါ။ ကျန်းယွင်ရှိူ့က တကယ် ခံစားချက်ပြင်းပြတယ်။ သူ ကူးချမယ် ဆိုတာကို ငါ မယုံဘူး။”

“ကျန်းယွင်ရှိူ့က ယန်ကျင်းဇီရဲ့ မိသားစုစီက အသိအမှတ်ပြုခံနိုင်ပြီး ပိုက်ဆံလည်း ရှိတယ်။ သူက ခိုးကူးစရာ လိုသေးလို့လား?”

“ငါ ကျန်းယွင်ရှိူ့ကို ယုံတယ်!”

…

ဖြေရှင်းပေးသူများပင် ရှိသေးသည် : “ငါ့အိမ်က ဂီတအခွေဆိုင် ဖွင့်တယ်။ နေ့ခင်းတုန်းက ကျန်းယွင်ရှိူ့ရဲ့ အခွေကို လာပို့သွားတယ်။ ငါ အခွေတစ်ခွေကို အထူးတလည် ဖွင့်ကြည့်ပြီး နားထောင်ပြီးပြီ။ သီချင်းတွေက လုံးဝ မတူဘူး!”

သို့သော် ညဘက်တွင် လူများစွာက အိပ်မောကျသွားပြီဖြစ်ရာ ကျန်းယွင်ရှိူ့အတွက် စကားပြောပေးသူ အများအပြား မရှိခဲ့ဘဲ နောက်ဆုံးတွင် သူ့ကို ရေတပ်က လွှမ်းမိုးသွားသည်။

နောက်ဆုံးတော့ မိုးလင်းသွားပြီဖြစ်သည်။

ယန်ကျင်းဇီသည် မနက်စောစော နိုးလာပြီး ဖုန်းကို ဦးစွာဖွင့်ကြည့်သည်။

သူ့ဖုန်းတွင် မက်ဆေ့ခ်ျများစွာ ရောက်နေပြီး ၎င်းတို့အားလုံးမှာ မနေ့ညက အဖြစ်အပျက်ကို လာမေးကြခြင်း ဖြစ်သည်။ သို့သော် ယန်ကျင်းဇီသည် တစ်ယောက်ချင်းစီ စာမပြန်ဘဲ သူ၏ သူငယ်ချင်း အသိုင်းအဝိုင်းထဲတွင် ပို့စ်တစ်ခုကိုသာ တင်လိုက်သည် : “အားလုံး အဆင်ပြေတယ်!”

ယန်ကျင်းဇီက သူ၏ သူငယ်ချင်း အသိုင်းအဝိုင်းထဲတွင် ဤပို့စ်ကို တင်လိုက်သောအခါ အွန်လိုင်းဆူညံမှုက ပို၍ပင် ဆိုးရွားလာသည်။

အဘယ့်ကြောင့်ဆိုသော် သီချင်းများကို တင်ထားသူက tweet တစ်ခုကို ပို့လာသောကြောင့်ဖြစ်သည်။ ၎င်း၏ ဖြစ်နိုင်လောက်သော ဆိုလိုရင်းဟာ ယခင်က သူ တင်ထားသော သီချင်းများမှာ သူ၏ အားလပ်ချိန်အတွင်း အပျော်တမ်း ရေးသားထားခြင်း ဖြစ်သည်။ ယခုအခါတွင် တစ်စုံတစ်ဦးက ခိုးကူးထားသည်ဟု သူ ကြားလိုက်ရသည်။ သူသည် အလွန်စိတ်ဆိုးမိပြီး ကူးယူသူက သူ့ကို ရှင်းပြချက် ပေးနိုင်မည်ဟု မျှော်လင့်မိသည်။

ဤလူ၏ tweet ထွက်လာသည်နှင့်တပြိုင်နက် အွန်လိုင်းပေါ်တွင် ကျန်းယွင်ရှိူ့အကြောင်း ပြောသူများဟာ ပိုပိုများလာသည်။

မနေ့ညက စောစောအိပ်ရာဝင်ပြီး ဤအဖြစ်အပျက်ကို တစ်ခါမှ မကြားဖူးသူ အများအပြားသည်လည်း ဤအဖြစ်အပျက်ကို သိသွားကြသည်။ ယန်ကျင်းဇီနှင့် ကျန်းယွင်ရှိူ့တို့၏ Weibo တို့အောက်တွင် မေးခွန်းများစွာ ရှိလာကြသည်။

သုံ့ချင်းလင်သည် ဤအခြင်းအရာများကို ကြည့်ပြီး သူ၏ နှုတ်ခမ်းထောင့်များက စိတ်ကျေနပ်စွာဖြင့် အပေါ်သို့ ကွေးတက်သွားသည်။

အဲ့အချိန်တုန်းက ယန်ကျင်းဇီက သူ့ကို ကျန်းယွင်ရှိူ့ တီးခဲ့တဲ့ သီချင်းတွေအကုန်လုံးကို အတင်းတီးခိုင်းခဲ့တယ်။ အခု... သူ ဝဋ်လည်နေပြီမလား?

တစ်ခါတစ်ရံတွင် သုံ့ချင်းလင်သည် သူ ပြန်လည်မွေးဖွားလာရသည့် အကြောင်းအရင်းကို မသိပေ။

သို့သော် သူသည် စဉ်းစားကြည့်သောအခါ ‌ပြန်လည်မွေးဖွားလာရခြင်းဟာ လက်စားချေဖို့သာ ဖြစ်သည်ဟု ခံစားရသည်။

သူက ယန်ကျင်းဇီနဲ့ ကျန်းယွင်ရှိူ့တို့ ကောင်းကောင်းခံစားရအောင် လုပ်ပေးရမယ်!

ခပ်မှိန်မှိန် အငှားခန်းထဲတွင် သုံ့ချင်းလင်သည် ကွန်ပြူတာ ဖန်သားပြင်ကို မျက်လုံးနီရဲရဲများဖြင့် ကြည့်လျက်ရှိသည်။

သူသည် ကျန်းယွင်ရှိူ့၏ အခွေကို ဖန်တီးထုတ်လုပ်သော ကုမ္ပဏီ၏ တရားဝင်ဝက်ဘ်ဆိုက်ကို refresh လုပ်နေသည်။

ကျန်းယွင်ရှိူ့၏ အခွေကို တရားဝင်ဝက်ဘ်ဆိုက်တွင် မှာယူနိုင်ပြီး ထိုအချိန်၌ အစမ်းဗားရှင်းကို ရရှိနိုင်မည်ဖြစ်သည်။

သို့သော်... ထိုကိစ္စ ဖြစ်ပြီးနောက် အခွေကို တရားဝင်ဝက်ဘ်ဆိုက်တွင် ရောင်းချလောက်တော့မည် မဟုတ်ချေ။

သုံ့ချင်းလင်က ပြုံးသည်။

ဤအချိန်၌ပင် တရားဝင်ဝက်ဘ်ဆိုက်တွင် အခွေတစ်ခွေက ထွက်ရှိလာသည်။

သူတို့က ကျန်းယွင်ရှိူ့ရဲ့ အခွေကို တင်ထားရဲသေးတာလား? သုံ့ချင်းလင်သည် လှောင်ရယ်လိုက်ပြီး ကြည့်ရှုလိုက်သည်။

ထိုအခွေကို မြင်သော် သူသည် အံ့ဩသွားသည်။

ဘာလို့ “Waning” မဟုတ်တာလဲ? ဘာကြောင့် ဒီအခွေက “Day and Night” ဖြစ်နေတာလဲ?

တကယ်ပဲ ဘာဖြစ်နေတာလဲ?

သုံ့ချင်းလင်သည် လူအများ နားဆင်နိုင်ရန်အတွက် အစမ်းပြထားသော သီချင်းတစ်ဝက်ကို မသိစိတ်၏ စေ့ဆော်မှုအရ ဖွင့်မိလိုက်သည်။

သုံ့ချင်းလင်ကဲ့သို့ပင် လူများစွာသည် တရားဝင်ဝက်ဘ်ဆိုက်တွင် အခွေထွက်ရှိမည်ကို စောင့်ဆိုင်းနေကြပြီး ယခု အခွေက အွန်လိုင်း‌ပေါ်ရောက်လာသည်နှင့်တပြိုင်နက် သူတို့သည်လည်း သုံ့ချင်းလင်ကဲ့သို့ပင် အခွေ၏ အစမ်းဗားရှင်းကို ဖွင့်လိုက်ကြသည်။

ရွှင်ပျမြူးကြွသော အမိုက်စားသီချင်းက ချက်ချင်း ထွက်လာသည်။

ဤသီချင်းသံဟာ နားထောင်သူကို ပျော်ရွှင်စေပြီး ကျန်းယွင်ရှိူ့ ဖန်တီးလေ့ရှိသော တေးသွားပုံစံနှင့် အလွန်ကွဲပြားကာ ကူးချသည်ဟု ကျန်းယွင်ရှိူ့ အပြောခံရ‌သည့် တေးသွားနှင့်လည်း လုံးဝဥဿုံ ကွဲပြားသည်။ 

သုံ့ချင်းလင်သည် ရေခဲရေတစ်ပုံးနှင့် လောင်းချခံလိုက်ရသကဲ့သို့ ဖြစ်သွားပြီး သူ့တစ်ကိုယ်လုံးက ခေါင်းမှခြေဖျားအထိ အေးစက်သွားသည်။

ကျန်းယွင်ရှိူ့က ‘Waning’ နဲ့ လုံးဝ ကွဲပြားတဲ့ အခွေတစ်ခွေကို ထုတ်လိုက်တာ ဖြစ်နိုင်လား?

မဟုတ်ဘူး၊ ဤကား မဖြစ်နိုင်။ ‘Lights’ မထွက်မီကပင် ‘Waning’ မှ သီချင်းတချို့ကို ဖန်တီးထားခဲ့သည်။ ကျန်းယွင်ရှိူ့က အခွေအသစ် ထုတ်ချင်လျှင် ၎င်းတို့ကို မထည့်သွင်းရန်မှာ မဖြစ်နိုင်‌ချေ – သူက လွန်ခဲ့တဲ့ လအနည်းငယ်အတွင်းမှာ သီချင်းအသစ်ဆယ်ပုဒ်ကို မရေးနိုင်ခဲ့လောက်ဘူး!

ဒီတစ်ပုဒ်ကသာ မတူတဲ့ တစ်ခုတည်းသော အစမ်းဗားရှင်း ဖြစ်နိုင်တယ်!

သူ အခွေဝယ်ပြီး နားထောင်တော့မယ်!

သုံ့ချင်းလင်သည် ဤသို့တွေးပြီး အိမ်ထဲမှ ‌အမြန်ပြေးထွက်သွားသည်။

တစ်ချိန်တည်းမှာပင် လူအများအပြားသည် အခွေများကို သွားရောက်ဝယ်ယူနေကြသည်။

ကျိုးအန်းသည် အနုပညာတက္ကသိုလ်တစ်ခုတွင် ဂီတကို သင်ကြားပို့ချပေးသည့် ဆရာတစ်ဦး ဖြစ်ပြီး စန္ဒရားတီးပညာရှင်တစ်ဦးလည်း ဖြစ်သည်။

သူသည် ကျန်းယွင်ရှိူ့ကို အမြဲသဘောကျခဲ့ပြီး ကျန်းယွင်ရှိူ့က အလွန်စိတ်ခံစားချက်ပြင်းပျသည်ဟု ခံစားမိသည်။ ကျန်းယွင်ရှိူ့၏ မဖွယ်မရာ ဓာတ်ပုံများ ထွက်လာသောအခါ သူက အမြဲတစေ ဤသို့ပြော၏ : “ ဒီပုံတွေက အတုပဲဖြစ်နိုင်တယ်! ပုံတွေက အမှန်ဖြစ်တယ်ဆိုရင်တောင်မှ ကျန်းယွင်ရှိူ့က လက်မထပ်ရသေးဘူး။ သူက အသက်ပိုကြီးတဲ့ အမျိုးသမီးတွေကို သဘောကျတယ်၊ ငါ သူ့ရွေးချယ်မှုကို လေးစားတယ်! ငါ ကြိုက်တာက သူ့ဂီတကိုပဲ၊ သူ့ရဲ့ ကိုယ်ပိုင်ဘဝကို ငါ အလေးမထားဘူး! "

နောက်ပိုင်းတွင် ကျန်းယွင်ရှိူ့နှင့် ယန်ကျင်းဇီတို့က အတူရှိကြပြီး သူက သက်ပြင်းပိုချသည်။

သူသည် ကျန်းယွင်ရှိူ့၏ လိင်စိတ်တိမ်းညွတ်မှုကို ဂရုမစိုက်သော်လည်း ကျန်းယွင်ရှိူ့က သူ့ကို နားလည်သော တစ်စုံတစ်ယောက်အား ရှာဖွေသင့်သည်ဟု သူသည် တွေးမိသည်။ ချမ်းသာပေမယ့် ဂီတကို လုံးဝ နားမလည်တဲ့သူကို မရှာသင့်ဘူး!

အကျဉ်းချုပ်ရလျှင် သူသည် ကျန်းယွင်ရှိူ့၏ဘက်တွင် အမြဲရှိနေလေသည်။

ဒါပေမယ့် သူ ဒီမနက် အိပ်ရာစောစောနိုးတော့ ကျန်းယွင်ရှိူ့က ကူးချနေတယ်လို့ သူ ကြားလိုက်ရတယ်!

သူသည် မယုံချင်ဘဲ အခွေဝယ်ရန် ချက်ချင်း ပြေးထွက်လာသည်။

လမ်းတစ်လျှောက်တွင် သူသည် နေရာအနှံ့ ပျံ့နှံ့နေသော အသံကိုလည်း ဖွင့်ပြီး နားထောင်ကြည့်သည်။

အပုဒ်သုံးဆယ် သို့မဟုတ် သုံးဆယ်ကျော် ထိုသီချင်းများဟာ စတိုင်ပုံစံ တူညီပြီး လူတစ်ဦးတည်းက ဖန်တီးထားသကဲ့သို့ ဖြစ်နေသော်ငြား ၎င်းတို့ထဲတွင် ‘Lights’ တွင် ပါဝင်သည့် သီချင်းများစွာ ရှိနေသည်။

တကယ်ပဲ ဘာဖြစ်နေတာလဲ?

ကျိုးအန်းသည် အနီးအနားရှိ အခွေ‌များ ရောင်းချသော စတိုးဆိုင်သို့ ရောက်သွားပြီး သူ့ကျောင်းသား သုံ့ချင်းလင်ကို တွေ့လိုက်ရသည်။

သုံ့ချင်းလင်သည် အပြင်ထွက်လာစဉ် သူ့ဖုန်းကိုပင် ယူမလာမိသောကြောင့် သူ့တွင် လုံးဝ ပိုက်ဆံမရှိသော်လည်း သူက သူဌေးကို နှောင့်ယှက်နေသည် : “ သူဌေး၊ ကျွန်တော့်ကို အခွေတစ်ချပ် ပေးပါ။ နောက်ကျရင် ကျွန်တော် ပိုက်ဆံပြန်လာပေးမယ်! ”

“ သူဌေး၊ ကျေးဇူးပြုပြီး။ ”

“ ကျွန်တော် ပိုက်ဆံပြန်မပေးဘဲ မနေပါဘူး... ”

...

သို့ရာတွင် သူဌေးက ဆန္ဒမရှိပေ – သုံ့ချင်းလင်၏ မသပ်မရပ် ပုံစံနှင့် အင်အားကင်းမဲ့နေပုံတို့မှာ တစ်ချက်ကြည့်ရုံဖြင့် ကျသင့်ငွေ မရှင်းမည့် လူနှင့် တူနေပေသည်...

“ ဒါဆို သူဌေး၊ အခွေဖွင့်ပြီး ကျွန်တော့်ကို နားထောင်ခွင့်ပေးပါလား? ” သုံ့ချင်းလင်က ထပ်မေးသည်။

သူဌေးက သဘောမတူသေးပေ – “ လူငယ်လေး၊ ငါ့ကို မနှောင့်ယှက်နဲ့တော့။ ငါ အခုမှ တံခါးဖွင့်ထားပြီး ငါ့ပစ္စည်းတွေကို နေရာမချရသေးဘူး! ”

သူဌေးက သုံ့ချင်းလင်ကို အာရုံမစိုက်ချင်တော့သော်လည်း ဤအချိန်တွင် ကျိုးအန်း ရောက်လာသည်။

ကျိုးအန်းက ဝင်လာလာချင်း ပြောသည် : “ သူဌေး၊ ငါ ကျန်းယွင်ရှိူ့ရဲ့ အခွေတစ်ချပ် ဝယ်မယ်။ ငါ နားထောင်ဖို့ ဖွင့်ပေးပါဦး။ ”

ဧည့်သည်များက အခွေဝယ်ပြီး အသေအချာပင် သူတို့က အခွေကို ဖွင့်ကာ နားထောင်နိုင်သည်။ သူဌေးက သဘောတူပြီး အခွေကို စတင်ဖြည်သည်။ ကျိုးအန်းက သုံ့ချင်းလင်ကို ကြည့်သည် : “ သုံ့ချင်းလင်! ငါ မင်းကို မှတ်မိတယ်။ မင်းမှာ ကျန်းယွင်ရှိူ့နဲ့ တူညီတဲ့ ဂီတအကြိုက် ရှိတယ်။ မင်းလည်း ကျန်းယွင်ရှိူ့က ကူးချမှာ မဟုတ်ဘူးလို့ ထင်တယ်မလား? ”

သုံ့ချင်းလင်သည် သူ့ဆရာကို လျစ်လျူရှုပြီး သူဌေးကိုသာ စိုက်ကြည့်နေသည်။

သူဌေးသည် ‌အခွေကို သီချင်းစက်ထဲတွင် ထည့်သွင်းပြီးဖြစ်ကာ မကြာမီတွင် ကောင်းမွန်သော စန္ဒရားသံက ထွက်ပေါ်လာသည်။

“ ဒီသီချင်း မဟုတ်ဘူး... နောက်တစ်ပုဒ်ကို ဖွင့်ပါ! ” သုံ့ချင်းလင်က စိတ်လှုပ်ရှားစွာပြောသည်။

သို့သော် သူဌေးက ကျိုးအန်းကို လှမ်းကြည့်သည် – ဒီအခွေကို ဝယ်တာက ကျိုးအန်းလေ!

“ နောက်တစ်ပုဒ်ကို ပြောင်းလိုက်ပါ။ ” ကျိုးအန်းက ဆိုသည်။ ဤသီချင်းက အလွန်ကောင်းပြီး သူသည် တကယ့်ကို နားထောင်ချင်ပါသော်ငြား ယခုမူ... သူသည် သီချင်းအားလုံးကို တစ်ခေါက်နားထောင်ပြီးမှသာ စိတ်ချနိုင်မည်ဖြစ်သည်။

နောက်သီချင်းတစ်ပုဒ်က မကြာမီ ထွက်ပေါ်လာသည်...

“ မဟုတ်ဘူး၊ ထပ်ပြောင်း! ”

“ နောက်သီချင်း၊ နောက်တစ်ပုဒ်ကို ထပ်ပြောင်း! ”

“ မဟုတ်သေးဘူး! ပြောင်းဦး! ”

…

သုံ့ချင်းလင်သည် အလွန်စိတ်လှုပ်ရှားနေပြီး သူ့တစ်ကိုယ်လုံး တုန်ယင်နေခြင်းကိုပင် မထိန်းချုပ်နိုင်ပေ။

အစပိုင်းတွင် ကျိုးအန်းသည် သုံ့ချင်းလင်က သူ့ကဲ့သို့ပင် ကျန်းယွင်ရှိူ့၏ ပရိသတ် ဖြစ်ပြီး ကျန်းယွင်ရှိူ့ ခိုးမကူးကြောင်း သက်သေအထောက်အထားကို လာရှာသည်ဟု တွေးခဲ့သည်။ ယခုမူ သူသည် ပိုကြည့်လေလေ တစ်ခုခုမှားနေသည်ဟု ပိုခံစားရလေလေ ဖြစ်သည်။ 

ဒီသုံ့ချင်းလင်၊ သူ ဒီမှာ တကယ်ပဲ ဘာလုပ်နေတာပါလိမ့်?

သုံ့ချင်းလင်သည် ကျန်းယွင်ရှိူ့၏ ခိုးကူးမှုဆိုင်ရာ သက်သေအထောက်အထားများကို ရှာဖွေရန် ဤနေရာတွင် ရောက်ရှိနေခြင်းဖြစ်သည်။

သို့သော် သူသည် သီချင်းအားလုံးကို နားထောင်ခဲ့ပြီး ၎င်းတို့၌ သူ့ယခင်ဘဝမှ ကျန်းယွင်ရှိူ့၏ ‘Waning’ အမည်ရှိ အခွေတွင် ပါဝင်သော သီချင်းများနှင့် တူညီသည့် သီချင်းတစ်ပုဒ်တစ်လေပင် မရှိချေ။

“ ဒါ ကျန်းယွင်ရှိူ့ရဲ့ အခွေ မဟုတ်ဘူး ဆိုတာ သေချာတယ်! ” သုံ့ချင်းလင်က ပြောသည်။

“ ဘာလို့ ဒါက ကျန်းယွင်ရှိူ့ရဲ့ အခွေ မဟုတ်ရမှာလဲ? ငါ့ရဲ့ ဒီဆိုင်မှာ ကော်ပီအစစ်တွေပဲ ရောင်းတယ်! ဒါက မနေ့ကမှ ရောက်တာ! ” သူဌေးက ဆိုသည်။

ကျိုးအန်းကလည်း ဝင်ပြောလာသည် : “ ပုံစံက နည်းနည်းပြောင်းလဲသွားပေမယ့် ကျန်းယွင်ရှိူ့ရဲ့ လက်ရာသံ ရှိနေတုန်းပဲ။ ဒါက ကျန်းယွင်ရှိူ့ရဲ့ အခွေ မှန်တယ်။ ငါ သူ့ကို ဒီလိုမျိုး ကြီးကြီးမားမား တိုးတက်ပြောင်းလဲပြီး အဆင့်တစ်ဆင့် ထပ်တက်သွားလိမ့်မယ်လို့ မထင်ထားခဲ့ဘူး! ”

ကျိုးအန်းသည် အလွန်ပျော်ရွှင်ပြီး စကားဆက်တိုက်ပြောနေသော်လည်း ထို့နောက်တွင်တော့ သူက သုံ့ချင်းလင်ကို ကြည့်လိုက်သည် : “ သုံ့ချင်းလင်၊ မင်း ဒီနေ့ ဘာဖြစ်နေတာလဲ? ဘာလို့ မင်း ဒီလိုပုံစံ ဖြစ်နေတာလဲ? ”

သူသည် သုံ့ချင်းလင်က အနည်းငယ် ရူးသွပ်နေသည်ဟု ထင်မိသည်။ သို့သော် သူသည် အလွန်ပညာတတ်ပြီး လူများကို ထိုသို့မပြောတတ်ပေ။

မည်သို့ပင်ဖြစ်စေ သုံ့ချင်းလင်သည် ကျိုးအန်းကို လျစ်လျူရှုကာ လှည့်၍ ထွက်ပြေးသွားသည်။

ကျိုးအန်း : “ ... ”

ကျိုးအန်းသည် ခေါင်းလှည့်ပြီး သူ့ကို အခွေနှစ်ခွေ ထပ်ပေးရန် သူဌေးကို ပြောလိုက်သည်။

သူ့မှာ သိမ်းထားဖို့ တစ်ခွေ၊ နားထောင်ဖို့ တစ်ခွေနဲ့ လက်ဆောင်ပေးဖို့ တစ်ခွေ ရှိသွားပြီ!

ကျိုးအန်းသည် ကျန်းယွင်ရှိူ့က ခိုးကူးမထားကြောင်း သေချာသွားသောအခါ တခြားလူအများအပြားသည်လည်း သေချာသွားကြသည်။

“တချို့လူတွေက တကယ် အံ့သြစရာကောင်းတယ်။ အခွေက မထွက်သေးဘူး။ သူတို့က ခိုးကူးတယ်လို့ ပြောနေပြီ! ကူးယူထားတယ်လို့ သူတို့ ပြောတဲ့ သီချင်းတွေနဲ့ အခွေမှာ ပါတဲ့ သီချင်းတွေက လုံးဝ မတူဘူး! ရယ်စရာကြီးလို့ မင်းတို့ မထင်ကြဘူးလား?”

“ငါ ကျန်းယွင်ရှိူ့ရဲ့ အခွေကို နားထောင်ပြီးပြီ။ သီချင်းတွေက အွန်လိုင်းက ဟာတွေနဲ့ တစ်ခုမှ မတူဘူး။”

“သီချင်းတွေက အတူတူပဲလို့ အတွင်းသိတွေက မပြောဘူးလား? ဘယ်နားက တူတာလဲ!”

…

သံသယများအပြင် လူတိုင်းက ကျန်းယွင်ရှိူ့ကိုလည်း ချီးကျူးကြသည် : “ကျန်းယွင်ရှိူ့ရဲ့ ဒီတစ်ခေါက် အခွေက လူတွေကို ပျော်ရွှင်အောင် လုပ်နိုင်တယ်!”

“အရမ်းမိုက်တယ်!”

“နားထောင်လို့ အရမ်းကောင်းတယ် အား အား အား အား!”

“ကျန်းယွင်ရှိူ့၊ ငါ မင်းကို ချစ်တယ်!”

…

လူအုပ်စုကြီးတစ်စုသည် အင်တာနက်ပေါ်တွင် ကျန်းယွင်ရှိူ့ကို ချစ်ရေးဆိုနေကြပြီး ဤအချိန်မှသာ ကျန်းယွင်ရှိူ့က အိပ်ရာနိုးလာသည်။

သူသည် မနေ့ညက ယန်ကျင်းဇီအပေါ်တွင် သွားရောက်မလှုပ်ရှားခဲ့သင့်ပေ... နောက်ဆုံးကျတော့လည်း ခံစားရတာက သူပဲ!

ကံကောင်းစွာဖြင့် ယန်ကျင်းဇီ၏ စွမ်းရည်များသည် ယခုအခါ ပိုမိုကောင်းမွန်လာသည်။ သူသည် အဆင်မပြေမဖြစ်ရုံတင်မကဘဲ အလွန်သက်တောင့်သက်သာ ဖြစ်နေလေသည်...

____