Chapter 74

👥️Chapter 74

[ယန်အန်းယုV: ကျားယို! မင်းရဲ့သီချင်းလိုပဲ ငါတို့ မင်း@ချင်နွော်ရှီ ဘေးမှာအမြဲရှိနေမယ်]

သူက သူ၏ သူငယ်ချင်းကောင်း ချင်နွော်ရှီကို မန်ရှင်းကာ သူ့ကို အပြည့်အဝ ထောက်ခံမည့်အကြောင်း ထုတ်ဖော်ပြောဆိုခဲ့သည်။မိနစ်အနည်းငယ်အကြာမှာပဲ ပွဲဦးထွက်ခါစ ကောလီရှုက ဤပို့စ်ကို ပြန်မျှဝေပြီး သူလည်း သူ့သူငယ်ချင်းများဘက်က ရပ်တည်မည်ဆိုသည့် သူ၏သဘောထားကို ထုတ်ဖော်ခဲ့​လေသည်။

သူ့အား ခုခံကာကွယ်ရန် လူနှစ်ဦး ကိုယ်တိုင်ကိုယ်ကျ ပေါ်ထွက်လာသဖြင့် ချင်​နွော်ရှီ၏ အစစ်အမှန် ဖန်များသည် အသိစိတ်မဲ့သော မီဒီယာများကို တိုက်ခိုက်ခဲ့ကြပြီး သက်သေကို ရှာရန် ကြိုးစားခဲ့ကြသည်။သူတို့က ချင်နွော်ရှီကို ထောက်ခံယုံကြည်ကြောင်း ပို့စ်တင်ခဲ့ကြပြီး ဖန်တွေ့ဆုံပွဲကိုမူလအစီအစဥ်အတိုင်း ကျင်းပရန်နှင့် ထိုအချိန်မှာ ချင်နွော်ရှီက အမှန်တရားကို ထုတ်ဖော်ပြောပြရန် မျှော်လင့်နေကြသည်။

သို့သော် ညနေခြောက်နာရီတွင် တရားဝင်ဆိုက်မှ နောက်နေ့ဖန်တွေ့ဆုံပွဲကိုဖျက်သိမ်းကြောင်းသတင်းထုတ်ပြန်ခဲ့၏။

ထို့နောက် ချင်နွော်ရှီ ၏ ပရိုမိုးရှင်းများနှင့် ထောက်ခံချက် လှုပ်ရှားမှုများအားလုံး မရှိတော့ပေ။

အမျိုးမျိုးသော လူကြိုက်များသောသီချင်းစာရင်းများတွင် သူ၏သီချင်းများသည် ထိပ်ဆုံးဆယ်ပုဒ်စာရင်းမှ ဆင်းသက်ခဲ့ရသည်။သူ့ဘက်ကနေ အခိုင်အမာရပ်တည်နေသည့် မေတ္တာစစ်နှင့်ချစ်သည့် သူငယ်ချင်းတစ်ယောက်စ နှစ်ယောက်စမှလွဲ၍  ဖန်များစွာသည် ကယောက်ကယက်ဖြစ်နေသောအခြေအနေမှာ ရှိနေကြသည်။သူတို့က ချင်နွော်ရှီ ယခုလို ပုန်းအောင်းနေပုံကလည်း ထိုနှစ်တုန်း သူတို့အပေါ် ရှင်းပြချက်​ပေးရန် အကြွေးတင်နေသည့် သူ့အမေ ဟဲဟန်ချမ်နှင့်တူသည်ဟု ခံစား​နေကြရသည်။

နောက်တစ်ရက်ကြာပြီးနောက်၊ ည ၁၀ နာရီခန့်တွင် ယန်အန်းယု ချင်နွော်ရှီ ၏ဖုန်းကို​ခေါ်ကြည့်ရာ ချင်နွော်ရှီက နောက်ဆုံးတွင် ဖုန်းကိုင်လိုက်​လေသည်။

"နွော်ရှီ မင်းအဆင်ပြေရဲ့လား...အခုဘယ်မှာလဲ"

ယန်အန်းယုက အထိတ်ထိတ်အပျာပျာမေးလိုက်၏။

"ဘယ်မှာနေရမှာလဲ... ကုမ္ပဏီက ငါ့ကို အခု ဘာမှလုပ်မရအောင် တားမြစ်ထားတယ်...ငါ ဟိုတယ်မှာ တည်းနေတာ"

ချင်နွော်ရှီက ခါးသက်သက်ရယ်လိုက်မိသည်။

"ရှောင်ယု တကယ်တော့ အရှုပ်တော်ပုံတွေ ပေါက်ကြားလာတဲ့အတွက်ကြောင့် မဟုတ်ရင်... ငါတောင် မသိတဲ့ အရာတွေ ရှိ​နေဦးမှာ"

ယန်အန်းယု ချက်ချင်းကြက်သေသေသွားသည်။

"ရှောင်ယု ငါအဖေနဲ့ စစ်ဆေးပြီးပြီ... သူက တကယ်ပဲ ငါ့မွေးစားအဖေပဲ...ဟဲဟန်ချမ်က ငါ့အမေအစစ်"

ချင်နွော်ရှီ၏အသံထဲမှာ ကြီးစွာသော အကူအညီမဲ့မှုများပေါ်လွင်၍နေသည်။

"ငါ့အဖေက ကျွန်တော့်ကို အနုပညာလောကထဲ ဝင်ဖို့ အမြဲဆန့်ကျင်နေတာ အံ့သြစရာမဟုတ်ဘူးပဲ"

နွမ်းနယ်ပြီး အားအင်မရှိသော အသံကိုကြားပြီး ယန်အန်းယု၏နှလုံးသားက ချဉ်စူးလာသလို ခံစားလိုက်ရသည်။

"နွော်ရှီ ဒီကိစ္စမှာ မင်းမှာ ရွေးချယ်စရာ မရှိခဲ့ဘူးလေ... အရမ်းကြီး ဝမ်းနည်းမနေပါနဲ့"

"ဘာကို ဝမ်းနည်းရမှာလဲ... ရှောင်ယု ငါ အခုဘယ်လိုမျိုး ခံစားနေသင့်မှန်းကိုမသိ​တော့ဘူး... ငါတကယ်ပင်ပန်းနေပြီ"

"​နွော်ရှီ မင်း စင်ပေါ်မှာ ပထမဆုံးသီချင်းဆိုတုန်းက ခံစားခဲ့ရတဲ့ ပျော်ရွှင်မှုလိုမျိုး ပျော်ရွှင်စရာတွေကို တွေးကြည့်ပါ...ငါ မင်းကို စောင့်နေတယ်၊ ​​ငါ့အသ်ကိုနဲ့ မင်းရဲ့ ဖန်တွေလည်းမင်းကို စောင့်နေကြတယ်...မင်းစိတ်ငြိမ်ငြိမ်ထားရမယ်နော်" 

ယန်အန်းယုက ချင်နွော်ရှီကို အသံကျယ်ကျယ်နှင့် အားပေးလိုက်၏။

"အင်း ငါသိပါတယ် ဒါပေမဲ့ ယန်ကျွယ့်... သူ..." 

ချင်နွော်ရှီက ဆက်မပြောတော့ပဲ သူ့မျက်လုံးတွေ မှောင်မဲနေပြီး သူ့တစ်ကိုယ်လုံး ချက်ချင်း အများကြီး ပိုစိတ်ပျက်လက်ပျက်ဖြစ်လာသည်။

"ဟုတ်တယ်... ငါ ​ကောရဲ့ ဖုန်းကို လုံးဝခေါ်မရဘူး...နွော်ရှီ မင်းကော...သူ့ကို အခု ဆက်သွယ်လို့ရလား"

"ငါလည်း သူ့ကို ခေါ်လို့မရဘူး"

ချင်နွော်ရှီက ဤတစ်ကြိမ်တွင် ယန်ကျွယ့်က သူ့ကို ကာကွယ်ရန် အချိန်မီ ထွက်လာခဲ့ခြင်း မရှိသည့်အပြင် ရုတ်တရက်ကြီး ဘာလှုပ်ရှားမှုလည်း မရှိခဲ့တော့သဖြင့် အကြောင်းရင်းကို အကြမ်းဖျင်း ခန့်မှန်းထားခဲ့သည်။

"ရှောင်ယု တကယ်တော့ ယန်ကျွယ့်က ယောက်ျားတွေကို စိတ်မဝင်စားသလို နည်းနည်းမှလည်း သဘောလည်းမကျဘူး... သူက ယန်မိသားစုရဲ့ ပိုင်ဆိုင်မှုကို အမွေဆက်ခံပြီး သူ့ရဲ့သွေးသားကို ဆက်ထိန်းထားရမှာမို့လို့ သူနဲ့ငါက..."

ချင်နွော်ရှီ သူ့ကိုယ်သူ ရယ်မောလိုက်၏။

"အစကတည်းက မဖြစ်နိုင်တာ"

"ဖြစ်နိုင်ပါတယ် နွော်ရှီရ"

ယန်အန်းယုက ချက်ချင်းဆိုသလို ပြန်ပက်လိုက်လေသည်။

"ငါဆို ချန်းယန်မတွေ့ခင်က ယောက်ျားတစ်ယောက်အတွက် ငါကျရှုံးလိမ့်မယ်လို့ လုံးဝ မမျှော်လင့်ထားဘူး... ဒါကြောင့် သူ မင်းကို သဘောကျတယ်ဆိုတာကို ငါယုံကြည်တယ်...လိင်နဲ့မဆိုင်ဘူး"

ချင်နွော်ရှီ လန့်​ဖြန့်သွားလေသည်။

"..."

"နွော်ရှီ မင်းကို သူ ဘယ်လို ဆက်ဆံလဲ ငါမသိဘူး...ဒါကြောင့် သူငါ့ကို ဘယ်လို ဆက်ဆံတယ် ဆိုတာပဲ ငါပြော​ပြမယ်...ကောရဲ့ ဒေါသက တစ်ခါတလေ နည်းနည်း ကြမ်းပေမဲ့ ရံဖန်ရံခါ ကလေးဆန်တဲ့ အပြုအမူတွေ လုပ်တတ်တယ်... အစပိုင်းမှာတော့ သူက သူ့ကိုယ်အမှားကင်းတယ်လို့ယုံကြည်ပြီး တခြားသူတွေကို သူ့ဆန္ဒအတိုင်းစီစဥ်ရတာကို သဘောကျတယ်...အဲဒါကြောင့် ငါ ဖျော်ဖြေရေး​လောထဲ ဝင်သွားသလိုမျိုး တစ်ခုခုလုပ်နေတာကို ပြတ်ပြတ်သားသား ဆန့်ကျင်ခဲ့တယ်"

"ဒါပေမဲ့ နောက်ပိုင်းမှာ သူက တဖြည်းဖြည်း ပြောင်းလဲလာတယ်... သူက ငါရဲ့ ဆုံးဖြတ်ချက်တွေကို နားလည်ပြီး လေးစားမှု​ပေးလာခဲ့တယ်...ယန်မိသားစုက တခြားလူတွေက ငါကို မုန်းတီးပြီး မမြင်ချင်ကြပေမဲ့ သူကငါ့ကို အစ်ကိုကြီးနေရာကနေ ကာကွယ်စောင့်ရှောက်ပေးတယ်...သူ့ရဲ့ငါ့​အပေါ် စိတ်စနောင့်စနင်းဖြစ်မှုတွေကြောင့် ချန်ယန်အပေါ်ထားတဲ့ သူ့ရဲ့သဘောထားက တဖြည်းဖြည်းနဲ့ပြောင်းလဲလာခဲ့တယ်...တစ်ခါတစ်လေ သူက သူ့ခံစားချက်တွေကို အတိအကျမဖော်ပြတတ်ရုံတင်လို့ ငါတွေးမိတဲ့ အချိန်တွေအများ​ကြီးရှိတယ်"

ယန်အန်းယုက ဖြည်းညှင်းစွာပြောနေသည်။ ယခုအချိန်မှာ ယန်ကျွယ့်အကြောင်းပြောသည့်အခါ ယန်အန်းယု သူ့ကို အစ်ကိုကြီးတစ်ယောက်အနေနှင့် အမှန်တကယ် ဆက်ဆံခဲ့သည်။

"​နွော်ရှီ မင်းက အမြဲတမ်း ထက်မြက်တဲ့သူတစ်ယောက်ပါ...မင်းရဲ့ကိုယ့်ကိုယ်ကို ယုံကြည်မှုနဲ့ ရဲရင့်မှုကိုထုတ်ပြလိုက်ပါ...မကြောက်ပါနဲ့"

ယန်အန်းယုက သူ့ကို ထပ်ပြီး အားပေးလိုက်၏။

"ငါ့ကောက သူကတိပေးထားတဲ့အတိုင်း လုပ်တတ်တဲ့သူပါ...နောင်လည်း သူ မင်းကို သေချာပေါက် ကောင်းကောင်းဆက်ဆံမှာပဲ"

၎င်းကိုနား​ထောင်းပြီး ချင်နွော်ရှီ၏ နှလုံးသား အလွန်ကို ထိရှသွားခဲ့သည်။သူ့မျက်လုံးများက အနည်းငယ်ပြောင်းလဲသွားပြီး သူ့နှလုံးသားကလည်း ပို၍တည်ငြိမ်လာသည်။

"ရှောင်ယု ကျေးဇူးတင်ပါတယ်ကွာ... ငါ ဘာလုပ်ရမှန်းသိသွားပါပြီ"

ချင်​နွော်ရှီနှင့် စကားပြောပြီးနောက် ယန်အန်းယု ယီချန်းယန်၏ ဖုန်းခေါ်ဆိုမှုကို လက်ခံရရှိခဲ့သည်။

"ရှောင်ယု ယန်ကျွယ့်ကို ရှာနေတာလား"

"အင်း...ချန်းယန် အစ်ကိုကြီး ဘာဖြစ်​နေတာလဲ သိလား" 

ယန်အန်းယုက အလောတကြီး မေးလိုက်သည်။

"သူ အသည်းအသန်နေမကောင်းဖြစ်နေတယ်ဆိုတာ မယုံဘူး...ယေဘုယျအားဖြင့် အပြင်လူတွေကို သူတို့ပြောပြတဲ့ အကြောင်းပြချက်တွေက အနည်းနဲ့အများ လိမ်ညာနေတာပဲ"

"လောလောဆယ်တော့ မဒမ်ယန်က သူ့ကို ချုပ်နှောင်ထားတာ ဖြစ်နိုင်တယ်"

"ဟမ်" 

ယန်အန်းယု အံ့သြသွားသည်။

"လီယဲ့ ရှာတွေ့ခဲ့တဲ့ အချက်အလက်အရ တစ်ယောက်ယောက်က ယန်ကျွယ့်နဲ့ ချင်နွော်ရှီတို့ရဲ့ ဓာတ်ပုံတွေကို ရိုက်ယူပြီး သူ(မ)ကို ရည်ရွယ်ချက်ရှိရှိ ခြိမ်းခြောက်ဖို့ မဒမ်ယန်ဆီ လျှို့ဝှက်စာပို့ခဲ့တယ်"

"တကယ်တော့ ဒီလိုကိုး"

ယန်အန်းယု မျက်ခုံးကျုံ့သွားသည်။ 

"ဒီတစ်ခါ မဒမ်ယန် တကယ်ကို ဒေါသထွက်နေပုံပဲ...မဟုတ်ရင် သူ ဒီလောက် ပြင်းထန်တဲ့ လှုပ်ရှားမှုမျိုး လုပ်မှာမဟုတ်ဘူး...ကျွန်တော် နွော်ရှီကိုခေါ်ပြီး သူနဲ့ သွားတွေ့သင့်တယ်လို့ထင်တယ်"

"အင်း" 

ယီချန်းယန်က ခေါင်းညိတ်လိုက်သည်။

"မင်းဆန္ဒအတိုင်းလုပ်ပါ​ရှောင်ယု...မင်းဘာပဲလုပ်လုပ် ကိုယ်ကူညီပါ့မယ်"

"ကျေးဇူးတင်ပါတယ် ချန်းယန်"

"မင်းကအရူးလား" 

ယီချန်းယန်က ရယ်ပြီးဆို၏။

"ဒီအတွက် ဘာကျေးဇူးတင်စရာလိုလို့လဲ...ရှောင်ယု ကိုယ်တို့ကမိသားစုတွေလေ"

သူ့စကားအတိုလေးက ယန်အန်းယု၏ နှလုံးသားကို နက်နက်ရှိုင်းရှိုင်း လှုပ်ခတ်သွားစေခဲ့သည်။ဟိုးယခင်လွန်လေပြီးသောအချိန်က စစ်သူကြီးက သူ့ကို ယခုလို တစ်ခါပြောခဲ့ဖူးပေမဲ့ ဤတစ်ခါတော့ စကား၏ အဓိပ္ပါယ်က ပိုထူးခြားပြီး အရေးကြီးလေသည်။

"အင်း...ချန်ယန် ကျွန်​တော်တို့က ထာဝရမိသားစုဖြစ်နေမှာ"

ကံကောင်းထောက်မစွာဖြင့် 'ဝါး' အတွက် အရေးပါသော အခန်းများကို အနည်းနှင့်အများရိုက်ကူးပြီးပြီဖြစ်လေသည်။ယန်အန်းယု၏ လက်ရှိအခန်းများက အချိန်ဇယားမကြပ်ပေ။သူ၏ အခုတလော စိတ်လှုပ်ရှားနေသည့်အခြေအနေကိုမြင်ပြီး သူ ခွင့်​နှစ်ရက်တောင်းသောအခါတွင် ဒါရိုက်တာဖူကလည်း သက်ညှာစွာဖြင့်ခွင့်ပြုပေးခဲ့သည်။

ဤအခွင့်အရေးကိုအရယူပြီး ယန်အန်းယုနှင့် ချင်နွော်ရှီ တို့သည် S မြို့တော်သို့ပြန်ရန် လက်မှတ်များဝယ်ပြီး ယန်မိသားစုထံသွားပြီး မဒမ်ယန် နှင့်တစ်ကြိမ်တွေ့ဆုံရန် တိတ်တဆိတ်ခရီးထွက်ရန် ပြင်ဆင်ကြသည်။

ဤသည်က လျှို့ဝှက်လုပ်ထုံးလုပ်နည်းတစ်ခု ဖြစ်သင့်ပေမဲ့ ကောလဟာလများ အများကြီး ပေါက်ကြားသွားသောကြောင့် သူတို့ လေယာဉ်ပေါ်က ဆင်းလာချိန်မှာ S မြို့တော် လေဆိပ်မှာ လူများ ပြည့်ကျပ်နေခဲ့သည်။

ပရိတ်သတ်အများအပြားရှိ​နေရုံသာမက၊ သတင်း မီဒီယာများနှင့် သတင်းထောက်များလည်း ရောက်ရှိလာကြသည်။လွန်ခဲ့သည့် နှစ်ရက်က အရှုပ်တော်ပုံများ ပေါက်ကြားခဲ့သော  ချင်နွော်ရှီ ဖြစ်သည်ကို သိလိုက်ရသောအခါတွင် ဖြတ်သွားဖြတ်လာများကလည်း စိတ်ဝင်စားလာကြပြီး သိချင်ဖြစ်ကုန်ကြသောကြောင့် လမ်းကြောင်းအားလုံးက လူအုပ်ကြီး၏ ပိတ်ဆို့ခြင်းခံလိုက်ရလေသည်။

ချင်နွော်ရှီ ကိုယ်တိုင် ပေါ်လာသောအခါ၊နေရာက ပို၍ပင်ဆူညံလာပြီး ကောင်းကင်ထိ ဆူညံပွက်​လောရိုက်သွားသည်။

ချင်နွော်ရှီက နေကာမျက်မှန်နှင့် maskတပ်ထားသော်ငြား သူ၏ မျက်တွင်းဟောက်ပက်နှင့်ချောင်ကျနေမှုကို ဖုံးကွယ်ထားနိုင်ခြင်းမရှိသည်ကို တွေ့ရလျှင် ဖန်များက စိတ်မကောင်းဖြစ်ပြီး ငိုကြွေးကြ၏။ခံစားချက်မဲ့သောမျက်နှာဖြင့် အော်ဟစ်ကာ ကျိုးကြောင်းဆီလျော်စွာ ရှင်းပြရန် တောင်းဆိုနေကြသူများလည်း ရှိခဲ့သည်။သတင်းထောက်များကဆိုလျှင် အချင်းချင်းစကားပြောကာ အညှာတာမဲ့ပြီး နှင့် အကဲဆတ်သော မေးခွန်းအမျိုးမျိုးကို မေးမြန်းရန် စီစဉ်နေကြပြီး ပို၍ပင် တက်ကြွနေကြသည်။

စည်းကမ်းထိန်းသိမ်းရေး လုံခြုံရေးများက ခေါင်းကိုက်ကာ ထိုဖန်များကို အေးစက်သောမျက်နှာဖြင့်အပြစ်တင်ဝေဖန်နေကြသည်။တွန်းလိုက်ဆွဲလိုက်လုပ်နေမှုများကြားတွင် ရှေ့ဆုံးတန်းမှ မိန်းမငယ်အချို့ လဲကျလုနီးပါးဖြစ်ခဲ့သည်။

၎င်းကိုမြင်သောအခါ ချင်နွော်ရှီက အလျင်အမြန်သွားပြီး ကူညီပေမဲ့ လူတချို့က ပရမ်းပတာဖြစ်မှုကို အခွင့်ကောင်းယူပြီး သူမျက်နှာတို့ ဆံပင်တို့ကိုဆွဲချင်ကြလေသည်။ သူ့အနားက ယီချန်းယန်၏ တုံ့ပြန်မှုက အလွန်မြန်ပြီး ချင်နွော်ရှီ အလျင်အမြန် နောက်ပြန်ဆွဲလိုက်သည်။

"နွော်ရှီ သတိထား"

နေကာမျက်မှန်နှင့် maskတပ်ထားသော ယန်အန်းယုက ချင်နွော်ရှီကို အဓိပ္ပါယ်ပါပါကြည့်လိုက်၏။တချို့ဖန်များက အလွန်ရူးသွပ်ကြသည်ကို သူနားလည်သည်။ဖန်များစွာက antiများအဖြစ်သို့ပြောင်းသွားကြသဖြင့် အခြေအနေက ဘာဖြစ်မည်ဟုပြော၍မရပေ။

"သူ့ဘေးက...ယန်အန်းယုမလား" နောက်တစ်စက္ကန့်တွင် တစ်ယောက်ယောက်က ယန်အန်းယု ကို မှတ်မိသွားသည်။

"ဟုတ်တယ်... သူပဲဖြစ်မယ်ထင်တယ် အား"

"အားးးး တကယ် ယန်အန်းယုကြီးဟ"

လူအုပ်က ပို၍ပင် စိတ်လှုပ်ရှားလာသည်။

"ယန်အန်းယု  ဒီလိုမျိုး ချင်နွော်ရှီကိုကာကွယ်ပေးရတဲ့ အကြောင်းပြချက်ကို မေးလို့ရမလား... မင်းနှစ်ယောက်က ဖြူစင်တဲ့ ခင်မင်မှုပဲ ရှိတာလား... ဒါမှမဟုတ် ချင်နွော်ရှီမှာ သူ့ကို ကျောထောက်နောက်ခံပြု​နေတဲ့ မင်းမဆန့်ကျင်နိုင်တဲ့ ရာထူကြီးပုဂ္ဂိုလ်တစ်ယောက် ရှန်းဟွမ်မှာရှိနေတာ အမှန်ပဲလား"

ယန်အန်းယု စိတ်ညစ်သွားပြီး မျက်ဖြူလှန်လိုက်သည်။သတင်းထောက်တချို့က ဘာလို့ လျှို့ဝှက်ပူးပေါင်းကြံစည်မှုသီအိုရီတွေကို ဒီလောက်သဘောကျနေတာလဲ...သို့ပေမဲ့ သူ ၎င်းတို့နှင့် ဆက်ဆံရန် ပျင်းလွန်းလှသည်။လောလောဆယ်မှာ သူချင်နွော်ရှီနှင့် ဤနေရာကနေ တတ်နိုင်သမျှအမြန်ဆုံးသာ ထွက်ခွာသွားချင်လေသည်။

လေဆိပ်တွင် ငါးများနှင့် နဂါးများ(လူကောင်း​ရောလူဆိုးပါ)ရောနှောနေကြသည်။ချီစန်း နှင့် ထန်းကော်တို့သည်လည်း ယန်အန်းယု၏ တစ်ဖက်တစ်ချက်တွင် ရှိနေကြသည်။ချီစန်းက ပတ်ပတ်လည်က အခြေအနေကို စောင့်ကြည့်ကာ ခပ်မာမာသတိပေးလေသည်။

"သတိထား...မင်းရဲ့ ဘေးကင်းရေးကို ဂရုစိုက်ပါ"

"အင်း သိပါတယ်"

ယန်အန်းယုက ခေါင်းညိတ်လိုက်သည်။ကျိုးကြောင်းဆီလျော်မှုမရှိသော ဖန်အချို့အပြင် antiဖန်မျိုးလည်းရှိနေမှန်းသူသိသည်။၎င်းတို့သည် နာမည်ကြီးများကို ထူးဆန်းပြီး ကြောက်စရာကောင်းသည့် လက်ဆောင်များကို ပေးရုံသာမက နောက်ယောင်ခံလည်းလိုက်ကာ ပွဲများ လူမြင်ကွင်းများတွင်လည်း ဓားဖြင့် တိုက်ခိုက်မှုများပင် ရှိနေသည်။ယင်းက အတော်လေး ကြောက်စရာကောင်း၏။

ထိုအချိန်တွင် ထန်းကော် သူ့ရင်ဘတ်သူ ပုတ်ကာ ဆိုသည်။

"စိတ်မပူနဲ့ ချီကော...တစ်ခုခု တကယ်ဖြစ်လာရင် ​ကောနဲ့ သခင်လေးကို ကျွန်တော် အသက်စွန့်ပြီး ကာကွယ်မယ်"

၎င်းကိုကြားသောအခါ ချီစန်း၏ နှလုံးသားက နွေးထွေးသွား၏။

သူတို့ လေဆိပ်မှ ခက်ခက်ခဲခဲ ထွက်လာခဲ့ကြသည်။ချင်နွော်ရှီ နှင့် ထန်းကော်တို့၏ နောက်မှ လူအုပ်ကြီးသည် လုံခြုံရေးအစောင့်များ၏ တားဆီးမှုကြောင့် ယာယီအားဖြင့် သူတို့နောက်မလိုက်နိုင်တော့ပေ။

ကားနှစ်စီးရှေ့မှာ ရပ်ထားသည်ကိုမြင်ပြီး ယန်အန်းယု၏အတွေးများပြောင်းသွားသည်။

"နွော်ရှီ အခုပဲ အထောက်အထားတွေ ဖလှယ်ကြရအောင်"

"မင်း ဘာကိုဆိုလိုတာလဲ" 

ချင်နွော်ရှီ အချိန်အတော်ကြာသည့်တိုင် နားမလည်ပေ။

"သူတို့က ရူးသွပ်လွန်းတယ်...​နွော်ရှီ အခုနက မျက်လုံးတွေနီတဲ့အထိ မင်းကို စိုက်ကြည့်နေတဲ့ လူတချို့ကို ငါမြင်လိုက်တယ်...သူတို့က မင်း​နောက်ကို အဆုံးမရှိ လိုက်တော့မှာ သေချာတယ်... ဒါကြောင့် နှစ်ဘက်ခွဲလိုက်ရအောင်...ချီစန်း နဲ့ ထန်းကော်ကို မင်းနဲ့ အရင်ထွက်သွားခိုင်းလိုက်...ငါ့ကားထဲမှာ လူသိပ်မများတာ အကောင်းဆုံးပဲ... ဒရိုင်ဘာပါရင် လုံလောက်ပြီ"

၎င်းကိုကြားသောအခါ ချင်နွော်ရှီ အခိုင်အမာ ခေါင်းခါလိုက်၏။ 

"မဖြစ်ဘူး ရှောင်ယု...မင်းတစ်ခုခုဖြစ်သွားမှာကို ငါကြောက်တယ်"

ချီစန်းကလည်း ချက်ချင်းဆိုသလို မျက်မှောင်ကြုတ်သွားကာ ထန်ကော်က ယန်အန်းယုကို စိုးရိမ်တကြီး ဆွဲ၏။

"ကျွန်တော့်ကို သခင်လေးနဲ့ လိုက်ခွင့်ပြုပါ"

"လူတိုင်းက ခုနက မင်းနဲ့ ချီစန်းကို ငါ့ဘေးမှာ ​မြင်ပြီးပြီ... သူတို့က မင်းတို့ကို မှတ်မိကြမှာ... ဒါ့အပြင် လူများလေလေ၊ အစီအစဥ်က ပိုပျက်စီးဖို့များလေလေပဲ"

ယန်အန်းယုက ထန်းကော်ကိုပုတ်လိုက်၏။

"စိတ်မပူပါနဲ့...ဘယ်လိုပဲဖြစ်ဖြစ် ငါ့ရဲ့ ကိုယ်ခံပညာက မင်းထက် အများကြီး ပိုကောင်းတယ်"

၎င်းကို ပြောပြီးနောက် သူက မျက်လုံးတစ်ဖက်ပင်မှိတ်ပြလိုက်သေးသည်။

ထန်းကော် : "..."

ဒီလိုအချိန်မျိုးမှာ သူ့သခင်လေး မထင်မှတ်ပဲ သူ့ကိုဟာသလုပ်နေပြန်ပါပြီ...

"နွော်ရှီ သိပ်စိတ်မပူပါနဲ့...ဘာကိစ္စကြီးကြီးမားမား ​ဖြစ်နိုင်မှာမလို့လဲ...နောက်မှတွေ့မယ်နော်" 

ထိုသို့ပြောပြီး သူတို့၏ တုံ့ပြန်မှုကို မစောင့်ဘဲ ယန်အန်းယုက ဦးဆောင်ပြီး ပထမကားမှာ ဝင်ထိုင်လိုက်သည်။

ယန်အန်းယု နှင့် ချင်နွော်ရှီ တို့သည် သီးခြားကားများပေါ်တွင် ထိုင်ပြီး မကြာမီတွင် နှစ်ယောက်သား မတူညီသောလမ်းကြောင်းများကနေ သွားခဲ့​ကြသည်။မျှော်လင့်ထားသည့်အတိုင်း ယန်အန်းယုကို ချင်နွော်ရှီဟု အထင်လွဲပြီး သူ့ကား​နောက်ကို အရူးအမူးလိုက်ခဲ့ကြသည်။

သူတို့ကို နောက်ကောက်ချချန်ထားခဲ့နိုင်ရန် ကားက အရှိန်ပိုမြန်လာခဲ့၏။ယန်အန်းယု ရုတ်တရက် သူဤသည်ကိုယခင်က ကြုံတွေ့ဖူးခဲ့သလိုမျိုး ဤအရှိန်နှင့် အလွန်အမင်းရင်းနှီး​​​နေသလို ခံစားလိုက်ရသည်။ထို့နောက် သူ့ခေါင်းက နာကျင်လာလေသည်။

"အား"

👥️