Chapter 75

👥️Chapter 75

"အား...."

ရုတ်တရက် ခရီးသည်ထိုင်ခုံမှာ ထိုင်နေသော ယန်အန်းယုက သူ့ခေါင်းကို လက်တစ်ဖက်နှင့်ဖိပြီး အော်ဟစ်လိုက်၏။

ကား​မောင်းသမားက သူ့ကို စိုးရိမ်တကြီးနှင့်  မေးလေသည်။

 "မစ္စတာယန် ဘာဖြစ်နေတာလဲ"

ကွဲထွက်တော့မလို ခေါင်းကိုက်နေသော  ယန်အန်းယုက သူ၏ဖြူဖျော့အောက်နှုတ်ခမ်းကို ကိုက်ကာ တုံ့ပြန်မှု မပြုနိုင်လောက်ဖြစ်နေသည်။ရှုပ်ထွေးလွန်းသော မှတ်ဉာဏ်များ ရုတ်တရက် ခေါင်းထဲ ဝင်လာပြီး သူ ခေါင်းကို အကြိမ်ကြိမ် ထုရင်း ချွေးအေးများ စီးကျလာသည်။

"မစ္စတာယန် မစ္စတာယန် ဘာ...ဘာ​တွေဖြစ်နေတာလဲ

ကားမောင်းသမားက အလွန်ထိတ်လန့်သွားပြီး ဖြူဖျော့လာကာ ကားမောင်းသည်ကို ဂရုမစိုက်နိုင်တော့လောက်နီးနီးဖြစ်နေသည်။

နောက်ဆုံးတွင် ပျောက်ဆုံးသွားသော မှတ်ဉာဏ်များ အားလုံး ပြန်လည်ရောက်ရှိလာပြီး ယန်အန်းယု မရုန်းကန်နိုင်တော့ဘဲ အရာအားလုံးကို ပြန်လည်သတိရသွားခဲ့သည်။

စိုစွတ်​နေသော မျက်လုံးထောင့်များနှင့်အတူ ယန်အန်းယုက မျက်ရည်အချို့ကို ထိန်းထားရင်း ရေရွတ်လိုက်၏။

"လက်စသတ်တော့...လက်စသတ်တော့ ငါတို့က...သိတာ ကြာပြီပဲ... တာ့​ယု..."

"ဘာ ဘာတွေလဲ... မစ္စတာယန် ဘာတွေပြောနေတာလဲ"

ကားမောင်းသမားက သူ့ပြောစကားကို လုံးဝနားမလည်။

ယန်အန်းယု ခေါင်းပြန်မော့လိုက်ရာ သူတို့ရှေ့တည့်တည့်တွင် ထရပ်ကားကြီးတစ်စီးကိုတွေ့လိုက်ရသည်။သူ ဒါရိုက်ဘာကို အလျင်စလို ဖိချလိုက်သည်။

ထို့နောက်မှာတော့ ယန်အန်းယု သူ့နားထဲမှာ ကျယ်လောင်သော အသံတစ်ခုကို ကြားလိုက်ရပြီး မျက်လုံးထဲက သွေးနီရောင် အလင်းတန်းတစ်ခုဖြတ်ပြေးသွားသည်ကို ခံစားလိုက်ရ၏။၎င်းနောက် သူ သတိလစ်သွားခဲ့သည်။

ယာဉ်မတော်တဆမှု ဖြစ်ပွားပြီးနောက် သတင်း မီဒီယာများက သဘာဝအတိုင်း ချက်ချင်း ထုတ်ပြန်ကြေညာခဲ့သည်။

"Sမြို့တော် အရှေ့ခရိုင်ရဲ့ အထင်ကရ အရှေ့လမ်းမကြီးမှာ ဒီနေ့မွန်းလွဲပိုင်းမှာ ကားတစ်စီး ကုန်တင်ကားနောက်မြှီးနဲ့ အရှိန်ပြင်းစွာ တိုက်မိမှု ဖြစ်ပွားခဲ့ပါတယ်...ကားထဲမှာ အမျိုးသား နှစ်ဦး ပါခဲ့ပြီး ယာဉ်မောင်းက လူငယ်တစ်ယောက်ရဲ့ ကာကွယ်ပေးမှုကြောင့် ဒဏ်ရာ ကြီးကြီးမားမား မရရှိခဲ့ဘူးလို့သိရပါတယ်...ထိုလူငယ်က နာမည်ကြီးတက်သစ်စအိုင်ဒေါ ယန်အန်းယုဖြစ်ကြောင်း အတည်ပြုပြီးပါပြီ... ယန်အန်းယုရဲ့ ခေါင်းက သွေးထွက်လွန်နေပြီး လောလောဆယ်မှာတော့ အရေးပေါ်ကယ်ဆယ်ရေးတွေ လုပ်နေ..."

*******

ယန်အန်းယု မတော်တဆဖြစ်သည်က နှစ်ပတ်လောက်ရှိပြီဖြစ်၏။

အသက်အန္တရာယ်မှ လွတ်မြောက်ခဲ့သော်လည်း ယန်အန်းယုက အချိန်အ​တော်ကြာသည့်တိုင် နိုးလာမည့် အရိပ်အယောင် မပြပေ။သူ့ကို အချိန်တစ်ခုလောက် ဆက်ပြီး စောင့်ကြည့်နေရမည်ဟု ဆရာဝန်က ဆိုသည်။အခြေအနေက ဤအတိုင်းဆက်သွားပါက ကိုမာဝင်သည့်အခြေအနေသို့ ပြောင်းလဲသွားနိုင်သည်။

'ဝါး' ရိုက်ကူး​ရေးအဖွဲ့တွင်၊ အရေးကြီးသောခေါင်းဆောင်မင်းသား ဤအဆင့်ထိ ဖြစ်ပျက်သွားသဖြင့် ဒါရိုက်တာဖူချန်းယွမ်လည်း မျက်နှာတည်သွားမည်က သေချာပေါက်ဖြစ်သော်လည်း ယန်အန်းယုနေရာတွင် အစားထိုးခြင်းမပြုရန် မရမကခေါင်းမာနေပြီး အနှီလူငယ်က သူ့ရင်ထဲက 'ဝါး' ဟု ယုံကြည်နေဆဲဖြစ်လေသည်။

ဒါရိုက်တာဖူက အချိန်အနည်းငယ်ဆက်ဆွဲရန်အတွက်နှင့် ရန်ပုံငွေနှင့် အကျိုးဆက်အားလုံးကို တာဝန်ယူရန်လိုလားလေသည်။

အဆိုပါဇာတ်ကားက လောလောဆယ်တွင် ရိုက်ကူးမှုရပ်တန့်သွားသဖြင့် အခြားသရုပ်ဆောင်များမှာ ဘာလုပ်ရမှန်းမသိ လမ်းပျောက်ကာအားကိုးရာမဲ့ကျန်ခဲ့၏။ထိုအချိန်မှာ ထန်းရှောင်ကမူ မကြာမီ နောက်ထပ်ရုပ်ရှင် 'ပေ့ချန်း မှတ်တမ်းများ' တွင် ပါဝင်မည်ဖြစ်သည်။

ယခုတစ်ကြိမ်တွင် သူသည် ဇာတ်ပို့မျှသာဖြစ်ပြီး အပိုင်းများစွာပါဝင်သည့် ဒုတိယအမျိုးသားဇာတ်ဆောင်မဟုတ်သော်လည်း သူနှင့်ပူးပေါင်းဆောင်ရွက်မည့်သူများသည် အကုန် နာမည်ကြီးများချည်းဖြစ်လေသည်။ရုပ်ရှင်ဧကရာဇ် ရှုရှစ်ယွမ်လည်း ပါဝင်သောကြောင့် 'ပေ့ချန်းမှတ်တမ်းများ' သည် ၎င်း၏ပရိုမိုးရှင်းကာလအတွင်း အလွန်မြင့်မြင့်မားမား မျှော်လင့်ခံ​နေရပြီဖြစ်သည်။ 

သည်​ညနေခင်းမှာ ထန်းရှောင် ရိုက်ကူးရေး ပြီးသွားပြီးနောက် ဟိုတယ်ကုတင်ပေါ်ကို လဲချလိုက်သည်။

" 'ပေ့ချန်းမှတ်တမ်းများ' မှာ မင်းမှာ အပိုင်းအများကြီးမရှိဘူး...ဒါကြောင့် ငါ မင်းကို ခွင့်တစ်ရက်တောင်းပေးခဲ့တယ်...မနက်ဖြန်ကျရင် မင်းလည်း လင်းယုန်ဂိမ်းသတင်းစာရှင်းလင်းပွဲပါဝင်ရမယ်"

ထိုအချိန်မှာ သူ၏မန်နေဂျာ ဝူရှောက်က ပြောလိုက်၏။

"အိုး" 

ထန်းရှောင်က မှုန်ကုပ်ကုပ်နှင့် ပြန်ဖြေ​ပြီး သူ့မျက်လုံးများက မည်းနက်နေပြီး လှုပ်ရှားရန် ပျင်းလွန်းနေခဲ့သည်။ 

၎င်းကိုမြင်သောအခါ ဝူရှောက်က စိတ်မချမ်းသာစွာဖြင့် မျက်မှောင်ကြုတ်ကာဆိုလိုက်၏။

"ထန်းရှောင်... အခုက မင်းအ​မြင့်ကိုတက်ဖို့ အခွင့်ကောင်းပဲ...ဒါပေမဲ့ မင်းစိတ်အခြေအနေကောင်းမနေဘူး... မင်းရဲ့အခြေအနေကလည်း အထွတ်အထိပ်ကို ရောက်မ​နေဘူး... မင်း–"

သူ့ဖုန်းမြည်သံကြောင့် ထန်းရှောင် သူ့ဖုန်းကို ကြည့်လိုက်ရာတွင် ဟွမ်ချွမ်းဖြစ်နေသည်ကိုတွေ့လိုက်ရသဖြင့် ဖုန်းထပ်ချလိုက်ပြန်သည်။

"မင်း သူ့ကို အပြစ်တင်နေတုန်းလား" 

ဝူရှောက်က မေး​လေသည်။

"သူက စိတ်မြန်လွန်းတယ်...သူက ကျွန်​တော်နဲ့ မတိုင်ပင်ဘဲ အကွက်​ရွှေ့ပြီး ကျွန်​တော်တို့ အစီအစဉ်ရဲ့ တစ်စိတ်တစ်ပိုင်းကို ရှေ့ကို ရွှေ့ပစ်ခဲ့တယ်" 

ထန်းရှောင်က စိတ်အခြေအနေမကောင်းစွာ ဆိုသည်။

"သူက နှစ်ရက်လောက်ရှေ့ ရွှေ့လိုက်ရုံတင်ပါ"

ထန်းရှောင်က သဘောမတူပါဘဲ ခါးသက်သက် ရယ်မောလိုက်၏။ 

"မစ္စတာဝူ ခဏလေးအတွင်းမှာ ဘယ်လောက် ပြောင်းလဲသွားနိုင်တယ် ဆိုတာ ခင်ဗျားသိလား...အများအား​ဖြင့် ခြေတစ်လှမ်းမှာသွားတိုင်း မတော်တဆ ဖြစ်တာချည်းပဲ"

၎င်းကိုကြားသောအခါ ဝူရှောက်က လေးလေးနက်နက်သုံးသပ်ကြည့်မိသွားသည်။

ယန်ကျွယ့်က ယာယီ ရာထူးမှဆင်းခဲ့ပြီး ယခု ရှန်းဟွမ်တစ်ခုလုံးကို ယန်မိသားစုက ဦးလေးမှ စီမံခန့်ခွဲ​နေခြင်းဖြစ်သည်။သူတို့ အခွင့်ကောင်းအကြီးကြီးရထားခဲ့သည်။ယခင်လျှို့ဝှက်ပူးပေါင်းဆောင်ရွက်မှုများအတွင်း ယန်မိသားစု၏ ဦးလေးသည် ထန်းရှောင်အား အစွမ်းကုန် ပံ့ပိုးပေးခဲ့သည်။

ယခု ရှန်းဟွမ်ကုမ္ပဏီတွင်၊ထန်း​ရှောင်နှင့် တပြိုင်တည်း ပွဲဦးထွက်သူတက်သစ်စများထဲမှာ ဟွမ်ချွမ်းက သူ့အတွက် ခြိမ်းခြောက်မှုလုံးဝမရှိပေ၊ချင်နွော်ရှီက ကွင်းထဲက အထုတ်မခံရသေးလောက်ပေမဲ့ သူ၏လက်ရှိကျော်ကြားမှုမှာ သိသိသာသာကျဆင်းသွားခဲ့ပြီး ယာယီအားဖြင့် ဘာလှုပ်ရှားမှုမှမရှိပေ။ ယှဉ်ပြိုင်နိုင်မှုအရှိဆုံးသူဖြစ်နေသင့်သည့် ရှန်းသုန်းဟောင့်ကမူ....

ပြီးခဲ့သည့် အပတ်က သတင်းစာရှင်းလင်းပွဲတွင်၊ ရှန်းသုန်း​ဟောင့်က သူ့ဘက်ကနေစ၍ ချင်နွော်ရှီအတွက် ရပ်တည်ပေးခဲ့ပြီး စင်​မြင့်နောက်ကွယ်မှာပဲ လှုပ်ရှားမှုများလုပ်​ရန် ​ပြင်​နေလေသည်။

"မတော်တဆဆိုတာ အနည်းနဲ့အများတော့ ရှောင်ရခက်ပါတယ်" 

ဝူရှောက်က ဖြည်းညှင်းစွာဆိုသည်။

"ထန်းရှောင် မင်းက အရမ်းနာမည်ကြီးနေပြီ...ဒါကြောင့် ယန်အန်းယုကလွဲရင် လက်ရှိမှာ အရာအားလုံးက သာသာယာယာဖြစ်နေတုန်းပဲ"

ယင်းက မှန်သည်၊မတော်တဆမှုဖြစ်ထားသော ယန်အန်းယုက သတိလစ်နေဆဲဖြစ်သည်။ဤသည်က ဆန်ကျင့်ဘက်အနေဖြင့် သူတို့၏​​လာမည့်အစီအစဥ်များကို ရှုပ်ထွေးသွားစေခဲ့၏။

"ယန်အန်းယုက အကြီးမားဆုံး မတော်တဆပဲ"

ထန်းရှောင်က ရုတ်တရက် မတ်တပ်ထရပ်ပြီး ဝူ​ရှောက်ကို အေးစက်စွာ ကြည့်လိုက်သည်။ တစ်စုံတစ်ယောက်က ယန်အန်းယုကို ထည့်ပြောသရွေ့ သူ့တုံ့ပြန်မှုက အလွန်ကြီးနေလိမ့်မည်ပင်။

သို့သော် ဝူရှောက်က ပြုံးလိုက်ပြီးဆို၏။

"စိတ်အေးအေးထား ထန်းရှောင်...ယန်အန်းယုက ဆက်ပြီး သတိမေ့နေတယ်ဆိုရင် ဒါက ယီချန်းယန်ကို အကြီးမားဆုံး လက်စားချေမှုပဲ မဟုတ်ဘူးလား"

"ခင်ဗျားပါးစပ်ပိတ်ထား" 

ထန်းရှောင်က သူ့ကို ပြင်းပြင်းထန်ထန် စိုက်ကြည့်​လေပြန်သည်။

"ထန်းရှောင်... အခု မင်းတစ်ကိုယ်လုံး ကမောက်ကမ ဖြစ်နေပြီ...မင်းက ထင်ထားတာထက် ယန်အန်းယုကို ပိုသ​ဘောကျပုံရတယ်"

"..." 

ထန်းရှောင်က ခေတ္တတန့်သွားပြီး သရော်တော်တော်ပြောလေသည်။

"မစ္စတာဝူ ခင်ဗျားက နည်းနည်းတော့ ဂရုစိုက်လွန်း​နေတယ်...အသိစိတ်ကို နှစ်ရှည်လများ ရောင်းစားခဲ့တဲ့ ခင်ဗျားလိုလူက လစာနဲ့ အလုပ်လုပ်ဖို့ပဲလိုတယ်"

၎င်းကိုကြားသောအခါ ဝူရှောက်က မျက်မှောင်ကြုတ်ရုံ​ပြုလိုက်ပြီး သူ့စကားများကို မငြင်းဆန်ခဲ့ပေ။ 

*****

အခြားတစ်ဖက်တွင်၊ Sမြို့တော် တောင်ပိုင်းခရိုင်၌

ယနေ့ ချင်နွော်ရှီက ရှန်းသုန်းဟောင့်၏ ဖိတ်ကြားချက်ကို လက်ခံရရှိပြီး သူ့အိမ်သို့ ရောက်ရှိလာခဲ့သည်။

"သုန်းဟောင့် အခု ငါတို့အားလုံးက အိမ်ထဲမှာ သော့ခတ်နေကြတာဆိုတော့ အားလပ်ရက် အပန်းဖြေခရီးလို့ပဲ တွေးလိုက်ပါ...ဒီလိုမျိုးကလည်း အတော်လေးကောင်းပါတယ်"

ချင်နွော်ရှီက ထိုသို့ပြောလိုက်ရင်း သူ့မျက်နှာပေါ်မှာ မြင်ရခဲသော အေးအေးလူလူအပြုံးတို့ရှိနေလေသည်။

"အ​တော်​​​လေးကောင်းတယ်လို့ မင်းကတကယ်ထင်တယ်ပေါ့" 

ရှန်းသုန်းဟောင့်၏ အကြည့်က ပြောင်းသွား၏။

ချင်နွော်ရှီက အံ့အားသင့်သွားကာ ခေါင်းညိတ်၍ဆိုလေသည်။သူ့လေသံထဲမှာ အကူအညီမဲ့မှုတချို့အထင်းသားမြင်နေရသည်။

"ဟုတ်တယ်...အဖေက အမြဲတမ်း ဆန့်ကျင်နေပေမဲ့ ငါ ငယ်ငယ်ကတည်းက သီချင်းဆိုရတာ ကြိုက်တယ်...သုန်းဟောင့်လည်း ဒီလိုပဲ မဟုတ်လား"

ရှန်းသုန်းဟောင့်က စကားမပြောဘဲ မျက်တောင်များကို အနည်းငယ်အောက်စိုက်လိုက်သည်။

"သုန်း​ဟောင့်...မင်းနဲ့ အခုလိုမျိုးပြုံးပြုံးရွှင်ရွှင်ပြန်ပြီး စကားပြောနိုင်ပြီး မင်းအိမ်ကို ဧည့်သည်အဖြစ်နဲ့တောင်လာနိုင်မယ်လို့ ငါဘယ်တုန်းကမှ မထင်ခဲ့မိဘူး" 

ချင်နွော်ရှီက ရုတ်တရက် တမ်းတမ်းတတ ပြောလိုက်သည်။

လွန်ခဲ့သည့် နှစ်ပတ်က အရှုပ်တော်ပုံသည် သူတို့ကို များစွာဆုံးရှုံးစေခဲ့သော်လည်း သူတို့နှစ်ဦး အချင်းချင်းကိုလည်း ပြန်လည်ရရှိခဲ့ကြသည်။

"ငါလည်း မထင်ထားဘူး" 

ရှန်းသုန်းဟောင့်က ထိုသို့ပြောပြီး ချင်​နွော်ရှီ၏မျက်နှာကို တောက်လောင်နေသောအကြည့်များဖြင့် ကြည့်လိုက်၏။ 

"အဲဒီနေ့ မင်းတစ်ယောက်တည်း ပုန်းပြီး ငိုနေတာကိုမြင်လိုက်ရတဲ့အချိန်ထိ"

"မင်း...မင်း မြင်သွားတာလား" 

ချင်နွော်ရှီ လန့်သွားသည်။

"အင်း...မင်းက အထက်တန်းကျောင်းတုန်းကအတိုင်းရှိနေတုန်းပဲ"

သူ့အပေါ် အများပြည်သူ့ သဘောထား ၏ဖိအားများ၊ သူ့ဖန်များ၏ အဆက်မပြတ် အငြင်းပွားမှုများ၊မဒန်ယန်က သူနှင့် ယန်ကျွယ့်ကို သဘောမတူခြင်း... အထက်ပါအချက်များအားလုံးက ဆက်တိုက်ဆိုသလို ချင်​နွော်ရှီ၏ စိတ်ဓာတ်ကို အဆက်မပြတ် တင်းနေအောင် ဆွဲဆန့်ခဲ့ပြီး သူ့ကို အလွန်နာကျင်စေခဲ့​လေသည်။

ယန်အန်းယုက ဒဏ်ရာပြင်းပြင်းထန်ထန်ရပြီး မေ့မြောနေကာ ဤမျှအချိန်ကြာသည့်တိုင် နိုးမလာသေးသည်က ထပ်ပေါင်းလိုက်သောအခါ သူ့ကို မယုံနိုင်လောက်အောင် အပြစ်ရှိသလိုခံစားရပြီး နောင်တရစေခဲ့ကာ ပြိုလဲခါနီးအထိဖြစ်ခဲ့လေသည်။စင်စစ်အားဖြင့် ယန်အန်းယုကို မတော်တဆဖြစ်ခဲ့ခြင်းမှာ သူ့ကြောင့်ဖြစ်ပြီး ဤအရာအားလုံးကို ဖြစ်ပေါ်စေခဲ့သူမှာ သူဖြစ်လေသည်။

ယန်အန်းယုက တလျှောက်လုံး ​မေ့မြောနေခဲ့သည်။ရှန်းသုန့်ဟောင်သည်လည်း ကုမ္ပဏီတစ်ခုတည်းက ဖြစ်သဖြင့် ယန်အန်းယု၏ မတော်တဆမှုက သူ့အပေါ် လုံး၀ကြီး မသက်ရောက်သည်မျိုးမဟုတ်သောကြောင့် သူ၏ကိုယ်ချင်းစာမှုကိုဖော်ပြရန် လူနာလာကြည့်ချင်ခဲ့သည်။

ဆေးရုံကိုသွားသည့်အခါ အိမ်သာထဲမှာ တစ်ယောက်တည်းလော့ချနေသည့် ချင်နွော်ရှီကို တွေ့ရှိခဲ့၏။

ချင်နွော်ရှီက သူ့အသံကို ချုပ်တည်းထားပြီး သူ့မျက်ရည်များကိုပင် အတတ်နိုင်ဆုံး တိတ်တိတ်လေး ခိုးကျနေခဲ့သည်။

ထိုအချိန်တွင် ရှန်းသုန်းဟောင့် အတိတ်က အမှတ်တရများစွာကို ရုတ်တရက် တွေးမိသွားသည်။

နှစ်ယောက်စလုံး ကျောင်းနံရံမှ ခုန်တက်ကာ အတန်းလစ်၍ကလပ်သွားကြ ဂိမ်းဆော့ကြပြီး ဆရာများ၏ အပြစ်ပေးခြင်းကို ခံခဲ့ရကာ အတန်းနှင့် အဆောင်များတွင် ပြဿနာမျိုးစုံကို ဖြစ်စေခဲ့သော်လည်း တစ်ယောက်ကို တစ်ယောက် ဖေးမကာ အတန်းတက်ရင်း အတူတူ စာသင်ခဲ့ကြသည်၊သူတို့ကိုယ်တိုင်ရေးဖွဲ့ထားသည့် သီချင်းများကို သီဆိုကာ တီးဝိုင်းဖွဲ့ရန် စိတ်ကူးယဉ်ခဲ့ကြသည်။

တဖြည်းဖြည်း ပေါင်းရင်းနှင့် ရှန်းသုန်းဟောင့်လည်း ချင်နွော်ရှီကို  နားလည်လာခဲ့သည်။

 သူက သူ့သူငယ်ချင်းများနှင့် မိသားစုရှေ့မှာ မျက်ရည်ကျရသည်ထက် ဘာကိုမှဂရုမထားဘဲ ရယ်ရန်ရွေးချယ်တတ်သူဖြစ်သည်။

ယခင်တုန်းက ရှန်းသုန်းဟောင့် ချင်နွော်ရှီ၏ အပြုံးကြောင့် တစ်ကြိမ်ထက်မက စိတ်လှုပ်ရှားခဲ့ပြီး သူ ဒီအပြုံးကို ကောင်းကောင်းကာကွယ်မယ်ဟု တိတ်တဆိတ် ကျိန်ဆိုခဲ့ဖူးသည်။ဒါပေမဲ့ အခု ဘာကြောင့်...

ယခုတစ်ကြိမ် ချင်​နွော်ရှီ၏အရှုပ်တော်ပုံများနှင့် ပတ်သက်၍ ရှန်းဟွမ်က သူ၏ဖန်များနှင့် အင်တာနက်သုံးစွဲသူများအပေါ် အလွန်ကို ဟက်ဟက်ပက်ပက်မရှိမှန်းသိသာလေသည်။ကျိုးကြောင်းဆီလျော်သည့် ရှင်းလင်းချက်မပေးဘဲ မေးခွန်းများကိုလည်း ရှောင်ခဲ့သည်။အိတ်ဖွင့်ပေးစာကိုလည်း ဒွိဟ​ဖြစ်ဖွယ်ရေးသားထားခဲ့ပြီး ဤကိစ္စကို ပို၍ရှုပ်ထွေးအောင်ပဲ လုပ်ချင်နေသည်။

ယန်ကျွယ့်မရှိတော့သဖြင့်၊ရှန်းဟွမ်၏ အဓိကကိစ္စရပ်များစွာကို ယန်မိသားစု၏ ဦးလေးမှ ဆုံးဖြတ်ခဲ့ပြီး၊ ရှန်းဟွမ်က ချင်နွော်ရှီ၏ လှုပ်ရှားမှုများကို လုံးလုံးလျားလျား ကန့်သတ်ထားခဲ့သည်။သူ့Weibo၊Twitterနှင့်အခြားအကောင့်များက သူ့မန်နေဂျာ၏ထိန်းချုပ်ခြင်းကိုခံထားရရုံသာမက သူတို့က ချင်နွော်ရှီကို သူ့မျက်နှာကိုလည်း အများပြည်သူအား ပြသခွင့်မပြုပေ။ချင်နွော်ရှီက ခွင့်ပြုချက်မရှိဘဲ လုပ်ခဲ့လျှင် ဒဏ်ကြေးအမြောက်အမြား လျော်ကြေးပေးရန် ဖိအားပေးခံရနိုင်သည်။

ထက်မြက်သောသတင်းမီဒီယာအချို့က တစ်စုံတစ်ခုကို သတိပြုမိခဲ့သည်။ ရှန်းဟွမ်က ချင်​နွော်ရှီကို လုံးလုံးလျားလျား ဖိနှိပ်ပြီး ပြီးမှ သူ့ကို ဖြည်းညှင်းစွာ စွန့်ပစ်ရန် ပြင်ဆင်နေခြင်းဖြစ်နိုင်သည်။

တစ်ဖက်တွင်၊မဒမ်ယန်ကလည်း ယန်အန်းယု၏ကားအက်စီးဒင့်ကြောင့် သားဖြစ်သူ ယန်ကျွယ့်ကို ​စောလွှတ်ပေးခဲ့သည်။

ထို့နောက် ယန်ကျွယ့်က မဒမ်ယန် နှင့် ရှန်းဟွမ်၏ အတိုက်အခံ အားလုံးကို လျစ်လျူရှုပြီး ချင်​နွော်ရှီ၏ ပြစ်ဒဏ်ကြေးများကို တလိုတလား တာဝန်ယူခဲ့သည်။ယခုတစ်ကြိမ်တွင် ရှန်းဟွမ်ဥက္ကဋ္ဌအနေဖြင့် ၎င်းကို မပြုလုပ်ခဲ့ဘဲ ချင်နွော်ရှီကို စိတ်နှလုံးအကြွင်းမဲ့ ချစ်မြတ်နိုးကာ ကာကွယ်ပေးနိုင်သည့်ယောကျာ်းဖြစ်သော သူကိုယ်တိုင်အနေဖြင့် ပြုလုပ်ခဲ့ခြင်းဖြစ်ပေသည်။

ယန်ကျွယ့်က ဤလောက(လုပ်ငန်း/နယ်ပယ်)ထဲက အခြားသူငယ်ချင်းများကို ဆက်သွယ်အကူအညီတောင်းပြီးနောက် အွန်လိုင်းတွင် ရှင်းလင်းချက်ပို့စ်အချို့ကို ထုတ်ပြန်ကာ ချင်နွော်ရှီအတွက် သတင်းစာရှင်းလင်းပွဲကို စီစဉ်ပေးခဲ့သည်။

ချင်နွော်ရှီမှာ နောက်ဆုံးတွင် အခြေအနေကို တရားဝင်ရှင်းပြရန် အခွင့်အရေးရခဲ့သဖြင့် အဓိကသတင်းမီဒီယာများက ၎င်းအား အသေးစိတ် အာရုံစိုက်ခဲ့ကြပြီး အကုန်လုံးက သတင်းထောက်များကို စေလွှတ်လိုက်​ကြသည်။သို့သော်လည်း ဖန်များက ရှုပ်ထွေးသည့်ခံစားချက်ကို ခံစားနေကြရသည်။သူတို့ စိတ်လှုပ်ရှားနေကြပေမဲ့ အမှန်တရားက ရက်စက်လွန်း​နေမှာကိုလည်းကြောက်နေသည်။သို့သော်လည်း ယင်းအစား ၎င်းတို့အား မျှော်လင့်ချက်အချို့ပေးခဲ့​လေသည်။

သတင်းစာရှင်းလင်းပွဲပြုလုပ်သည့်နေ့တွင် ရှန်းသုန်းဟောင့် ထိုနေရာကို တစ်ယောက်တည်း တိတ်တိတ်​လေး လာကြည့်ရှုခဲ့သည်။

ဟွမ်ချွမ်းက သူ၏ အနုပညာလမ်းကြောင်းကို မဖျက်ဆီးချင်ပါက ချင်​နွော်ရှီ၏ အရေးအခင်းတွင် ဝင်မပါရန် သူ့ကိုအကြိမ်ကြိမ်အခါခါ သတိပေးခဲ့သည်။ခဏလေး သတိလက်လွတ်ဖြစ်သွားသည့်အတွက်ကြောင့်နှင့် အသေးငယ်ဆုံးသော မရှင်းလင်းသည့် သဘောထားကြောင့်နှင့် မီဒီယာများက တစ်စုံတစ်ခုကို တူးထုတ်နိုင်ရန် ဖြစ်နိုင်ချေအလွန်ရှိ​လေသည်။ ထိုအချိန်ရောက်သောအခါ ဒုက္ခရောက်မည့်သူက ရှန်းသုန်းဟောင့်ကိုယ်တိုင်ပဲဖြစ်၏။

သို့​ပေမဲ့ ယခု ရှန်းသုန်းဟောင့် ယင်းကအရေးမပါတော့သလို ခံစားရသည်။

သတင်းစာရှင်းလင်းပွဲ တစ်ဝက်လောက်အရောက်မှာ ချင်နွော်ရှီက သူအထက်တန်းကျောင်းမှထွက်ရသည့်အကြောင်းရင်းကို ဆွေးနွေးသောအခါ ရုန်းသုန်းဟောင့်က ရုတ်တရက်ပေါ်လာပြီး အံ့အားသင့်ဖွယ်စကားများကို ထုတ်ဖော်ပြောဆိုခဲ့သည်။

တကယ်တမ်းမှာ အထက်တန်းကျောင်းတွင် ရှန်းသုန်းဟောင့်ကို တိတ်တိတ်လေး ခိုးပြီးတစ်ဖက်သတ်ချစ်ခဲ့သူက ချင်နွော်ရှီမဟုတ်ပေ။ဆန့်ကျင်ဘက်အနေဖြင့် သူကသာ ချင်နွော်ရှီကို ချစ်မိခဲ့သူဖြစ်လေသည်။

ချက်ချင်းပင် သတင်းစာရှင်းလင်းပွဲနေရာက အုတ်အုတ်ကျက်ကျက်ဖြစ်သွား၏။

မရေမတွက်နိုင်သော မျက်လုံးများရှေ့တွင် ရှန်းသုန်းဟောင့်က မိုက်ကို မြှောက်ကာ သူ၏ဖန်များကို ဦးစွာ တောင်းပန်စကား ပြောကြားပြီးနောက် အကြောင်းအရာများစွာကို ပြောဆိုခဲ့သည်။

ထိုအချိန်တွင် သူက ကောင်းမွန်လှစွာသော ချင်​နွော်ရှီကို အလွန်သဘောကျပြီး သူ့ကို အမြဲတိတ်တဆိတ် ခိုးချစ်နေခဲ့သော်လည်း မပြောရဲခဲ့သဖြင့် ထိုအတောအတွင်း ချင်​နွော်ရှီက ဤကိစ္စကို အစမှအဆုံးအထိ မသိခဲ့ပေ။သူက သေချာပေါက်ကို လူတိုင်း၏အချစ်နှင့် ထိုက်တန်သူဖြစ်လေသည်။

ထိုအကြောင်းအရာများကို သူပြောသောအခါ ရှန်းသုန်းဟောင့်၏ မျက်လုံးများက တဖျပ်ဖျပ်လက်နေ​ပြီး သူ့မျက်နှာက ရိုးသားမှုအပြည့်ရှိနေသည်။ထိုအချိန်တွင် သူ၏ နှစ်ပေါင်းများစွာက စိတ်အထုံးက ရုတ်ချည်းပြေသွားခဲ့သည်။

ယန်ကျွယ့်က ချင်နွော်ရှီရှီကို ပေးနိုင်သည့်အရာ တကယ်ကို အများကြီး၊ အများကြီးရှိပေမဲ့ သူက ချင်နွော်ရှီကိုပေးနိုင်သည့်အရာ အနည်းငယ်ပဲရှိ၍နေမည်။

ယခုလို လုပ်ရသည်အား သူအ​ပြည့်အဝပျော်နေခဲ့လေသည်။

👥️