Chapter 243

Volume 11 : ဓာတုဗေဒဌာန

Chapter 243 (ဓာတုဓာတ်ပြုမှု ၁၈)

စခန်းသို့ပြန်ရောက်ပြီးနောက် လူတိုင်း၏နားထဲ၌ စက်သံထွက်ပေါ်လာသည်။ "တာဝန်ကျတဲ့ဝန်ထမ်းတွေကို အောင်မြင်စွာ ရှောင်ရှားပြီး သတင်းအချက်အလတ်တချို့ရခဲ့တယ်။ ကျေးဇူးပြုပြီး 3 ရက်အတွင်း ရဲတွေထက်အရင် အမှုကို ဖြေရှင်းပေးပါ။ အမှုကိုဖြေရှင်းတာ ရဲတွေထက် နှေးရင် စာမေးပွဲကျပါမယ်။" 

လျှိုကျောက်ချင်းက မနေနိုင်ဘဲ ကျိန်ဆဲလိုက်သည်။ "Fuck၊ ငါတို့ကို ရဲတွေနဲ့ ပြိုင်ခိုင်းနေတာလား။ စာကြည့်တိုက်က တကယ်စိတ်ပျက်စရာပဲ။"

ယွဲ့ရှင်းဝမ်: "အားလုံး မြန်မြန်လုပ်ရအောင်။"

အချိန်တွေကုန်နေပြီး ခယ်ရှောင်ပင်းသည် မီးသတ်ဌာန၊ ရဲတပ်ဖွဲ့နဲ့ ဆေးရုံက သက်ဆိုင်ရာဖိုင်တွေကို သူ့လက်ပ်တော့ထဲကို ကူးယူဖို့ အချိန်ရှိပေမဲ့ ဖတ်ဖို့ အချိန်မရှိခဲ့ဘူး။ ယခု သူတို့သည် လုံခြုံသော မြေအောက်အခြေစိုက်စခန်းသို့ ပြန်လည်ရောက်ရှိနေပြီဖြစ်သောကြောင့် လူတိုင်းသည် အချက်အလက်များကို အစမှ ပြန်လည်သုံးသပ်နိုင်ပြီဖြစ်သည်။

ခယ်ရှောင်ပင်းသည် မှတ်တမ်းများ၊ စောင့်ကြည့်ဗီဒီယိုများ၊ ဓာတ်ပုံများ စသည်တို့အပါအဝင် အချက်အလက် ဒါဇင်ပေါင်းများစွာကို တစ်ယောက်တည်း ဖတ်နိုင်မည်မဟုတ်သောကြောင့် ယွဲ့ရှင်းဝမ်က ရိုးရိုးရှင်းရှင်းပြောခဲ့သည်။ "စီနီယာအစ်ကိုလျှိုနဲ့ စီနီယာအစ်ကိုရွှီတို့က ဆေးရုံဘက်ကိုကိုင်လိုက်ပါ၊ အဲဒီကိစ္စတွေကို ကျွန်တော်တို့ နားမလည်ဘူး။"

ခယ်ရှောင်ပင်သည် ဆေးရုံမှ ကူးယူထားသော ဖိုင်တွဲကို လျှိုကျောက်ချင်း၏ဖုန်းသို့ တိုက်ရိုက် ပို့ပေးလိုက်သည်။ လျှိုကျောက်ချင်းနှင့် ရွှီယိရှန်းတို့သည် ဘေးသို့ လျှောက်သွားကာ ဖုန်းကို ဖွင့်ပြီး အကြောင်းအရာများကို အစကတည်းက ကြည့်လိုက်သည်။

ရဲဌာနကို အပြင်းထန်ဆုံး ခွဲခြမ်းစိတ်ဖြာနိုင်စွမ်းရှိသူ ယွဲ့ရှင်းဝမ်နှင့် ကျန်းဖျင်စစ်ထံ လွှဲပြောင်းပေးအပ်ခဲ့ပြီး မီးသတ်ဌာနတွင် တွေ့ရှိရသည့် အချက်အလက်များကို ခယ်ရှောင်ပင်းနှင့် ရှင်းယန်တို့က ကိုင်တွယ်ခဲ့သည်။

အုပ်စုဘီမှ ကျန်လူများသည် သံသယရှိသူအများအပြား၏ နေအိမ်များမှ တွေ့ရှိသော အချက်အလက်များကို ဂရုတစိုက် စီစစ်ခဲ့ကြသည်။

လူတိုင်းသည် အလုပ်ခွဲပြီး ပူးပေါင်းလုပ်ဆောင်ကြကာ မြေအောက်ခန်းထဲတွင် တီးတိုးဆွေးနွေးသံများ ရံဖန်ရံခါထွက်ပေါ်လာသည်။

တစ်နာရီအကြာ အချက်အလက်အားလုံးကို ရှင်းလင်းပြီးသောအခါ ယွဲ့ရှင်းဝမ်က လူတိုင်းကို အစည်းအဝေးတစ်ခုခေါ်လိုက်သည်။ "သံသယရှိတဲ့အချက်တွေကို ရွေးပြီး အရင်ပြောပါ။ ရှင်းယန်နဲ့ ရှောင်ခယ်၊ မင်းတို့အရင်ပြောကြ။"

ရှင်းယန်က တည်ငြိမ်စွာ ပြောသည်။ "မီးသတ်တပ်ဖွဲ့ရဲ့ စုံစမ်းစစ်ဆေးမှု ရလဒ်တွေအရ ဓာတုစက်ရုံ ပေါက်ကွဲရတဲ့ အကြောင်းရင်းက ရေဆိုးအလုပ်ရုံမှာ မီးလောင်လွယ်တဲ့ ဓာတ်ငွေ့တွေ ပွင့်ထွက်လာပြီး မီးလောင်ကျွမ်းမှု ဖြစ်ပွားခဲ့ပြီး ဝိုင်ယာကြိုးထဲမှာ လျှပ်စစ်ဓာတ်အားလျှော့ဖြစ်တာကြောင့် သံသယရှိထားတယ်။ အခင်းဖြစ်ပွားရာနေရာမှာ မီးလောင်မှုဟာ 12 နာရီနီးပါးကြာမြင့်ခဲ့ပြီး မီးလောင်မှုဖြစ်ခဲ့တဲ့ အထောက်အထားတွေ လုံးဝလောင်ကျွမ်းသွားခဲ့ပြီး မတော်တဆမှုဖြစ်တာလား၊ လူလုပ်လားဆိုတာကိုတော့ မသိရသေးဘူး။"

ခယ်ရှောင်ပင်း: "အဲဒီညက စက်ရုံအပြင်ဘက် မီးထွက်ပေါက်မှာ ထရပ်ကားတစ်စီးရပ်ထားပြီး လမ်းပိတ်ဆို့ထားလို့ မီးသတ်ကားတွေက မီးလောင်တဲ့နေရာကို အမြန်ဆုံးကယ်ဆယ်ဖို့ မသွားနိုင်ခဲ့ဘူး။ လက်ရှိစုံစမ်းစစ်ဆေးမှုရလဒ်မှာတော့ အဲဒါကမတော်တဆဖြစ်ပြီး ထရပ်ကားမောင်းသူကို ရှာတွေ့သွားပြီဖြစ်သလို အရက်မူးပြီး တရားမဝင်ကားရပ်ခဲ့တာကြောင့် ယာဉ်ထိန်းရဲက ဖမ်းဆီးခဲ့တယ်။"

ယွဲ့ရှင်းဝမ်နှင့် ကျန်းဖျင်စစ်တို့သည် တစ်ယောက်ကို တစ်ယောက် ကြည့်ပြီး ကျန်းဖျင်စစ်က မျက်မှောင်ကြုတ်ကာ ပြောလိုက်သည်။ "မတော်တဆဖြစ်တာလား၊ ဒါက အရမ်းမတိုက်ဆိုင်လွန်းဘူးလား။"

ခယ်ရှောင်ပင်း: "ဒါက အရမ်းတိုက်ဆိုင်တယ်လို့ ငါလည်းထင်မိတယ်။ ဒါပေမဲ့ ထရပ်ကားမောင်းသူရဲ့ ကိုယ်ရေးအကျဉ်းက အရမ်းရိုးရှင်းပြီး ငါတို့ သံသယရှိသူတွေနဲ့ အထူးဆက်ဆံရေးမရှိဘူး။ သူက အသက် 32 နှစ်အရွယ် အမျိုးသားဖြစ်ပြီး မိဘနှစ်ယောက်နဲ့အတူနေတဲ့ တစ်ကိုယ်တည်းသမားပဲ။ ကားမောင်းတဲ့ အတွေ့အကြုံ ဆယ်နှစ်ရှိပြီး ဓာတုစက်ရုံက ကုန်ပစ္စည်းတွေ သယ်ပို့ရာမှာ ကူညီဖို့ တာဝန်ယူခဲ့တယ်... သူ့ကို လူသတ်သမားက လာဘ်ထိုးတယ်လို့ ထင်လား။"

ယွဲ့ရှင်းဝမ်က ခေါင်းယမ်းသည်။ "မဖြစ်နိုင်ပါဘူး၊ ဓာတုစက်ရုံမီးလောင်တာက ဟာသမဟုတ်ဘူး။ လူရာပေါင်းများစွာကို ဘယ်လိုလုပ် လွယ်လွယ်နဲ့ လာဘ်ထိုးလို့ရမှာလဲ။ လူသတ်သမားက ထရပ်ကားမောင်းသူကို ကောင်းကောင်းသိပြီး သူ ကားရပ်ထားတာကို မြင်ခဲ့ပြီးတော့ ပြစ်မှုကျူးလွန်ဖို့ အခွင့်အရေးတစ်ခုစောင့်နေတာလို့ ငါထင်တယ်။"

ကျန်းဖျင်စစ်: "တစ်နည်းအားဖြင့်ပြောရရင် လူသတ်သမားက ဓာတုစက်ရုံတစ်ခုလုံးကို မီးရှို့ဖျက်ဆီးချင်နေတာကြာပါပြီ။ တစ်ဖက်မှာ သူ့ရဲ့လက်စားချေခြင်းပန်းတိုင်ကို အောင်မြင်မှာဖြစ်သလို အခြားတစ်ဖက်မှာ ထရပ်ကားက တံခါးအပြင်မှာ ရပ်ထားပြီး မီးထွက်ပေါက်ကို ပိတ်ဆို့ထားလို့ မနေ့ညမှာလုပ်ဖို့ ရွေးချယ်ခဲ့တာလား။"

"ဒီရေဆိုးအလုပ်ရုံမှာတွေ့ခဲ့ရတဲ့ အလောင်းလေးလောင်းဟာ 'အဲဒီအဖြစ်အပျက်' နဲ့ ဆက်စပ်နေတယ်။ ချန်ရှို့မိန်လည်း မနေ့နေ့လယ်ပိုင်းက နှုတ်ထွက်ပြီးနောက် အသတ်ခံခဲ့ရပေမဲ့ လင်းယွိစန်းကျန်သေးတယ်။" ယွဲ့ရှင်းဝမ်က ကျန်းဖျင်စစ်ကို ကြည့်ပြီး ပြောလိုက်သည်။ "လူသတ်သမားက လင်းယွိစန်းကို မသတ်ဘူးဆိုရင် လက်စားချေတာ မပြီးမြောက်သေးဘူး…"

"လင်းယွိစန်းက သေပြီ။" လျှိုကျောက်ချင်းက ကြားဖြတ်ပြောလိုက်သည်။ "သူ့နာမည်ကို ဆေးရုံရဲ့ ဆေးမှတ်တမ်းတွေမှာ တွေ့ခဲ့တယ်။ သူ့တစ်ကိုယ်လုံး မီးလောင်ဒဏ်ရာတွေအပြင် ကူးစက်မှုဒဏ်ကြောင့် ကယ်ဆယ်ရေးလုပ်ငန်းတွေ ထိရောက်မှုမရှိခဲ့ဘဲ ဆေးရုံကိုပို့ပြီး နာရီဝက်မပြည့်ခင်မှာပဲ သေဆုံးသွားတယ်လို့ ထုတ်ပြန်ခဲ့တယ်။"

လင်းယွိစန်းသည် မနေ့နေ့လယ်ပိုင်းအထိ လူအားလုံး၏ အဓိကသံသယရှိသူဖြစ်ခဲ့ပြီး ချန်ရှို့မိန်သေသောအခါ သူက စက်ရုံမှာ အလုပ်လုပ်နေပြီး ပြစ်မှုကျူးလွန်ရန် အချိန်မရှိကြောင့် ရှင်းယန်နှင့် ခယ်ရှောင်ပင်းတို့က မျက်မြင်သက်သေဖြစ်ခဲ့ကာ သူ့သံသယများကို ဖယ်ထုတ်ခဲ့သည်။

ယခု မီးလောင်ကျွမ်းပြီးနောက် သူသေဆုံးသွားသည်မှာ ယွဲ့ရှင်းဝမ်နှင့် ကျန်းဖျင်စစိတို့၏ ကျိုးကြောင်းဆင်ခြင်မှုသည် အမှန်တရားနှင့် နီးကပ်လာသည်ကို ပြသနေသည်။

ယွဲ့ရှင်းဝမ်က ခေတ္တတိတ်ဆိတ်နေပြီး မေးသည်။ "စီနီယာအစ်ကို ဆေးရုံးမှာ သေကြေဒဏ်ရာရသူစာရင်းရှိလား။"

လျှိုကျောက်ချင်းသည် ယွဲ့ရှင်းဝမ်အား စုစည်းထားသော စာရင်းကို ပေးလိုက်သည်။ "အင်း။ မီးလောင်မှုကြောင့် သေဆုံးသူ 68 ဦးနဲ့ ဒဏ်ရာအပြင်းအထန်ရသူ 45 ဦး ရှိတယ်လို့ သတင်းတွေက ဖော်ပြခဲ့ပေမဲ့ ဆေးရုံဘက်မှာ ဒဏ်ရာအပြင်းအထန်ရသူ 45 ဦးအနက် 12 ဦးကို ကယ်ဆယ်နိုင်ခြင်း မရှိခဲ့ကြောင်း ဖော်ပြထားတယ်။ ဒါ့အပြင် လက်ရှိသေဆုံးသူအတိအကျက 80 ဖြစ်နိုင်ပြီး လူ 33 ဦးကို ကယ်ဆယ်ပြီးနောက် အသက်အန္တရာယ်ကင်းသွားပြီး ICU မှာ စောင့်ကြည့်နေတယ်။"

ရွှီယိရှန်း: "စီနီယာအစ်ကိုလျှိုနဲ့ ငါက စာရင်းတစ်ခုလုံးကို ပြုစုထားပြီးပြီ။ ဘယ်သူက အသက်ရှင်နေသေးလဲဆိုတာသိနိုင်ဖိုပ စီနီယာအစ်မလန်ပြုစုထားတဲ့ ဝန်ထမ်းစာရင်းနဲ့ နှိုင်းယှဉ်နိုင်တယ်။"

သေဆုံးသွားသူ 80 ထဲက အများစုဟာ အမှုနှင့် ဘာမှမသက်ဆိုင်သော ဓာတုစက်ရုံရှိ အပြစ်မဲ့ဝန်ထမ်းများဖြစ်သည်။

အဓိကသံသယရှိသူလေးဦးဖြစ်သည့် ရွှယ်ရှောင်လျန်၊ ယွီချန်မင်း၊ ကျန့်ဝေချန်(ဓာတုစက်ရုံပိုင်ရှင်)နှင့် ရှောင်းဝမ်ဟွေ့တို့သည် မီးလောင်မှုသေဆုံးစာရင်းတွင် မပါဝင်ခဲ့ကြသလို မီးလောင်ဒဏ်ရာရရှိသူများလည်း မဟုတ်ကြောင်း သိရသည်။ ထို့အပြင် ကုန်တင်ကားမောင်းသူ လျှိုရုန်၊ ဂိုဒေါင်မန်နေဂျာ လီတချန်၊ လုံခြုံရေးအစောင့် ရွှယ်ကျီးနှင့် အသက် 27 နှစ်အရွယ် မိန်းကလေး ကျိုးချီချီတို့လည်း ဒဏ်ရာရစာရင်းတွင် မပါဝင်ပေ။

ခယ်ရှောင်ပင်းက ကောက်ချက်ချသည်။ "တစ်နည်းအားဖြင့်ပြောရရင် မီးလောင်မှုကနေ လွတ်မြောက်လာတဲ့ ငါတို့ 12 ယောက်အပြင် အဲဒီအချိန်က မီးလောင်မှုဖြစ်ပွားရာနေရာမှာ မရှိခဲ့တဲ့ ဓာတုစက်ရုံက လူ 7 ဦးလည်း ရှိခဲ့တယ်။ ငါတို့သံသယရှိထားတဲ့ သံသယရှိသူတွေအပါအဝင် ထရပ်ကားမောင်းသူ၊ ဂိုဒေါင်မန်နေဂျာနဲ့ လုံခြုံရေးအစောင့်တို့လည်း ပါတာလား။"

ကျန်းဖျင်စစ်: "အင်း။ လူသတ်သမားက သူ့ကိုယ်သူ သတ်သေလောက်အောင် မိုက်မဲနေမှာမဟုတ်ဘူး။ ဒါကြောင့် လူသတ်သမားက ဒီခုနစ်ယောက်ထဲမှာပဲ ဖြစ်ရမယ်။ ထရပ်ကားမောင်းသူက မနေ့ညက အရက်သောက်ပြီး သက်သေတွေရှိနေလို့ ဖယ်ထုတ်လို့ရတယ်။ ဂိုဒေါင်မန်နေဂျာနဲ့ လုံခြုံရေးအစောင့်တို့က ဓာတုစမ်းသပ်မှုမှာ သက်ဆိုင်ရာ အတွေ့အကြုံမရှိတာကြောင့် လူကိုသတ်ရန်အတွက် ဟိုက်ဒရိုဖလိုရစ်အက်စစ်ကို အများကြီးမထုတ်လုပ်နိုင်ဘူး။"

"ဒါဆို လူသတ်မှုကျူးလွန်သူက ငါတို့ပစ်မှတ်ထားတဲ့ သံသယရှိသူတွေထဲမှာ ရှိနေတုန်းပဲ။" ယွဲ့ရှင်းဝမ်က ချင်လုကို ကြည့်လိုက်သည်။ "သံသယရှိသူလေးယောက်ရဲ့ အိမ်လိပ်စာတွေကို စုံစမ်းပြီး ထူးခြားတာ ဘာတွေ့ခဲ့သေးလဲ။"

ချင်လု: "ရှောင်းဝမ်ဟွေ့ရဲ့ အမူအရာက နည်းနည်းတော့ မူမမှန်ဘူး။ ညသန်းခေါင် အိမ်မှာ တစ်ယောက်တည်း သရဲကားတွေ ကြည့်နေတယ်။ သူ့မိန်းမနဲ့ သမီးက အိမ်မှာ မရှိပေမဲ့ သူ့အိမ်မှာ အိပ်ခန်းသုံးခန်းနဲ့ ဧည့်ခန်းနှစ်ခန်းပါတယ်။ ဓာတုပစ္စည်းတွေ သိုလှောင်ဖို့အတွက် လျှို့ဝှက်ဓာတ်ခွဲခန်း ဒါမှမဟုတ် သိုလှောင်ခန်းတွေမရှိဘူး။ မစ္စတာကျန့်က သုံးထပ်တိုက်ဗီလာမှာနေပြီး ‌ကြီးမားတဲ့မြေအောက်ခန်းမှာ ဝိုင်နီတွေသိုလှောင်ထားတယ်၊ ဗီလာမှာ နာနီ၊ သူ့မိန်းမနဲ့ ကလေးတွေပဲရှိပြီး သူ အိမ်မှာမရှိဘူး။"

ချင်မြောင်က ထပ်ပေါင်းပြောသည်။ "ရွှယ်ရှောင်လျန်ရဲ့ မွေးရပ်မြေက ‌အရမ်းဝေးလံခေါင်သီတဲ့ ကျေးလက်ဒေသမှာ ရှိတယ်။ ချင်လုရဲ့ ကျောက်ထုလွှာလှုပ်ရှားမှုက ဒီလောက်အထိ မသွားနိုင်တဲ့အတွက် အခုအချိန်အထိ ငါတို့ မစုံစမ်းရသေးဘူး။ ယွီချန်မင်းက ဆင်ခြေဖုံးရပ်ကွက်မှာ အိပ်ခန်းနှစ်ခန်းနဲ့ ဧည့်ခန်းနှစ်ခန်းပါတဲ့ အိမ်အိုကြီးမှာ နေထိုင်တယ်။ သူက အိမ်မှာရှိနေပြီး ငါတို့ဖြတ်သွားတဲ့အခါ သူအိပ်မောကျနေတယ်၊ ပြီးတော့ အိမ်ထဲမှာ သူ့ဇနီးဖြစ်နိုင်တဲ့ အမျိုးသမီးတစ်ယောက်ရဲ့ ပုံတူကိုတွေ့ခဲ့တယ်။"

သူမက ဖုန်းကိုဖွင့်ပြီး လူတိုင်းမြင်နိုင်စေရန် ဓာတ်ပုံတစ်ပုံကို ချဲ့ထားသည်။

ပုံတူအမျိုးသမီးသည် အသက် 40 ဝန်းကျင်ရှိပြီး ထိုနှစ်တွင် သေဆုံးသွားသော ကျိုးကျားနန်နှင့် လုံးဝမတူဘဲ သိမ်မွေ့သောအသွင်အပြင်ရှိသည်။

ခယ်ရှောင်ပင်း: "ဒါဆို ယွီချန်မင်ရဲ့ အချက်အလက်ဖောင်မှာ ဖြည့်ထားတဲ့ မုဆိုးမက အနှောင့်အယှက်တစ်ခုများလား။ သူ့မိန်းမက တကယ်ဆုံးသွားပြီ၊ ဒါပေမဲ့ လွန်ခဲ့တဲ့ 25 နှစ်က မီးလောင်မှုမှာ သေဆုံးသွားတဲ့ ကျိုးကျားနန်နဲ့ ဘာမှမဆိုင်ဘူး။ သူ့သံသယက ရှင်းသွားပြီလား။"

ယွဲ့ရှင်းဝမ်က ခေါင်းငြိမ့်လိုက်သည်။ "သူ့ကို သံသယရှိသူအဖြစ် စာရင်းသွင်းခြင်းက ငါတို့ရဲ့ခံစားချက်အရ ဆုံးဖြတ်ချက်ပဲ။ လူသတ်သမားရဲ့ ဆွေမျိုးတွေက တိုက်စားခံရပြီး ရုပ်ပျက်ဆင်းပျက်ဖြစ်သွားသလို သေခြင်းထက် ပိုဆိုးတဲ့ဒဏ်ရာတွေ ခံစားခဲ့ရတယ်လို့ ရှင်းယန်က ယူဆခဲ့တယ်။ ယွီချန်မင်မှာ ပြစ်မှုကျူးလွန်ဖို့ ရည်ရွယ်ချက်မရှိဘူး။ ဒါ့အပြင် မှုခင်းရဲတပ်ဖွဲ့ရဲ့မှတ်တမ်းတွေကြောင့်လည်း သူ့သံသယတွေကို ဖယ်ရှားနိုင်တယ်။ သူ့ဇနီးက လွန်ခဲ့တဲ့ 5 နှစ်က အဆုတ်ကင်ဆာနဲ့ ဆုံးသွားတာ။"

ခယ်ရှောင်ပင်းက သိချင်စွာမေးသည်။ "စက်ရုံထဲမှာ ပျက်စီးနေတဲ့ အလောင်းတွေကို မှုခင်းရဲတပ်ဖွဲ့က တွေ့ပြီးနောက် သူတို့ရဲ့ထွက်ဆိုချက်ပေးဖို့ အသက်ရှင်နေသေးတဲ့သူတွေကို ရှာခဲ့တာ ဟုတ်တယ်မလား။ ရှင်းဝမ်၊ ဖျင်စစ်၊ မင်းတို့ ပြုစုတဲ့အချက်အလက်တွေက အရမ်းအရေးကြီးတယ်။ ငါတို့အားလုံးကို ပြောပြပါဦး။"

ကျန်းဖျင်စစ်က ဆိုသည်။ "ယွီချန်မင်းရဲ့ သံသယကို ရှင်းနိုင်ပြီ။ ရှင်းဝမ်ပြောသလို သူ့ဇနီးက လွန်ခဲ့တဲ့ငါးနှစ်လောက်က အဆုတ်ကင်ဆာနဲ့ ဆုံးပါးသွားခဲ့ပြီး ပြစ်မှုကျူးလွန်ရတဲ့ အကြောင်းရင်းလည်း မရှိဘူး။ မနေ့နေ့လယ်က သူ စက်ရုံမှာမရှိရတာ ဆေးရုံသွားနေလို့ပဲ။ သူ့မှာ ဆီးချိုရှိနေလို့ အင်ဆူလင်ကုသမှုခံယူနေတာ။ သူ့ရဲ့ဆရာဝန်ကလည်း မနေ့နေလယ်က သူဆေးရုံမှာရှိကြောင်း အတည်ပြုခဲ့တယ်။"

ယွဲ့ရှင်းဝမ်: "မစ္စတာကျန့်က အလုပ်ကိစ္စနဲ့ ခရီးထွက်နေပြီး မြို့ထဲမှာမရှိဘူး။ ရဲတွေဆီက ဖုန်းလက်ခံရရှိပြီးနောက် သူက လေယာဉ်လတ်မှတ်ဝယ်ပြီး တစ်ညလုံး အပြေးအလွှား ပြန်လာခဲ့တယ်။ ခရီးစဉ်ကို ကြည့်ပြီး သူ့မှာ ပြစ်မှုကျူးလွန်ဖို့ လုံးဝအချိန်မရှိဘူး၊ ဒီတော့ ဖယ်ထုတ်လို့ရပြီ။"

"ရွှယ်ရှောင်လျန်နဲ့ ကျိုးချီချီတို့က မနေ့ညက အတူတူ ဖျော်ဖြေပွဲတစ်ခု သွားခဲ့တယ်။ ဖျော်ဖြေပွဲပြီးတော့ ည 11 နာရီ ထိုးနေပြီ။ တက္ကစီရှာဖို့ ခက်တဲ့အတွက် အနီးနားက ဟိုတယ်ကို တည်းခိုဖို့ ရှာခဲ့ကြတယ်။ ဒီနည်းနဲ့ သူတို့က ဓာတုစက်ရုံမီးရှောင်ခဲ့ကြပြီး သူတို့နှစ်ယောက်က အချင်းချင်း အလီဘိုင်လုပ်နိုင်တယ်။"

ယွဲ့ရှင်းဝမ်က ခေတ္တရပ်ပြီး လူတိုင်းကို ပြန်ကြည့်လိုက်သည်။ "ရှောင်းဝမ်ဟွေ့ရဲ့ မှတ်တမ်းက အရမ်းထူးဆန်းတယ်။ မနေ့နေ့လယ်က အိမ်မှာပဲနေပြီး အပြင်ကို တစ်ခါမှ မထွက်ခဲ့ဘူးလို့ သူပြောခဲ့တယ်။ ဒါပေမဲ့ ငါ့ကိုတော့ သူ့သမီးကို ဆေးရုံသွားပြီး ဆရာဝန်ပြဖို့အတွက် အဖော်လိုက်ပေးမယ်လို့ ပြောခဲ့တယ်။ ရဲတွေရဲ့ စုံစမ်းစစ်ဆေးမှု အချက်အလက်တွေအရ သူ့မိန်းမနဲ့ သမီးက လွန်ခဲ့တဲ့ငါးနှစ်က မတော်တဆမှုမှာ သေဆုံးသွားပြီလို့ ပြထားတယ်။"

ဒီစကားကြားတော့ လူတိုင်းက အံ့သြတကြီး အချင်းချင်းကြည့်နေကြသည်။

ရွှီယိရှန်းက စိတ်ရှုပ်ထွေးစွာ ပြောသည်။ "ဒါပေမဲ့ သူ့အိမ်ထဲဝင်သွားတော့ ပုံတူဓာတ်ပုံကို မတွေ့ခဲ့ရဘူး။ အိပ်ခန်းနံရံမှာ သူနဲ့သူ့မိန်းမရဲ့ မင်္ဂလာဓာတ်ပုံတစ်ပုံ ချိတ်ထားတာရှိတယ်။ တံခါးနားမှာ မိန်းမဖိနပ်တွေရှိပြီး ရေချိုးခန်းထဲမှာတောင် ရေဆေးခွက်တွေက စုံတွဲခွက်တွေ၊ ကလေးအခန်းထဲမှာ မိန်းကလေးအရုပ်တွေနဲ့ အရုပ်မတွေ အများကြီးရှိတယ်။"

လျှိုကျောက်ချင်းက သူ့ခေါင်းနောက်ကိုကုတ်ပြီး ပြောလိုက်သည်။ "သူ့မိန်းမနဲ့ သမီးက အရင်ကတည်းက ဆုံးသွားပြီကို ဒီပစ္စည်းတွေကို သူဘာလို့ သိမ်းထားသေးတာလဲ၊ ဒါ့ထက် ညသန်းခေါင်မှာ သရဲကားတွေ ကြည့်နေတယ်… သူက တစ္ဆေတွေနဲ့ နတ်တွေကို ယုံတာလား။ ဒီလိုနေ့စဉ်သုံးပစ္စည်းတွေကို သိမ်းထားတာက သူ့မိန်းမနဲ့ သမီးတွေရဲ့ ဝိညာဉ်တွေက အမြဲတမ်း သူနဲ့အတူရှိနေမှာလို့ ထင်နေတာလား။"

ခယ်ရှောင်ပင်းသည် သူ့လက်မောင်းပေါ်က ကြက်သီးမွေးညင်းများကို ပွတ်သပ်ရင်း "ဒီ-ဒီလူက စိတ်ပုံမှန်မဟုတ်ဘူးလား။"

ကျန်းဖျင်စစ်က အေးစက်စွာပြောခဲ့သည်။ "ပိုအရေးကြီးတာက ဓာတုစက်ရုံက လုပ်ဖော်ကိုင်ဖက်တွေကို သူ့မိန်းမနဲ့သမီး သေသွားပြီလို့ မပြောခဲ့ဘူး။ အလုပ်မလာဖို့ အကြောင်းပြချက်အဖြစ် သူ့သမီးခြေထောက်ခေါက်တာကို သူအသုံးချခဲ့တယ်။"

ယွဲ့ရှင်းဝမ်သည် ရှောင်းဝမ်ဟွေ့၏စိတ်ကို နားမလည်နိုင်ခဲ့ဘူး။

သူ့မိန်းမနှင့် သမီးတို့ကို မှတ်မိနေဖို့ သူတို့၏နေ့စဉ်သုံးပစ္စည်းများကို သိမ်ထားတာဆိုရင် 'ငါ့သမီး နေမကောင်းဖြစ်နေတယ်'ဆိုသော အကြောင်းပြချက်နဲ့ အလုပ်မသွားတာက ဘယ်လိုအခြေအနေမျိုးလဲ။ သာမာန်လူများသည် သူတို့ချစ်ရသူများကို ဆုံးရှုံးပြီးနောက် ဝမ်းနည်းပူဆွေးမှုကို မနှိုးဆွစေရန် သူတို့၏နာမည်များကို ဖော်ပြဖို့ ဝန်လေးကြပြီး သူက ဘယ်လိုလုပ် 'သူ့ဆွေမျိုးနေမကောင်းဘူး'ဆိုတာကို ဆင်ခြေအဖြစ် ပြောင်ပြောင်တင်းတင်း မည်သို့သုံးနိုင်သနည်း။ သေဆုံးသွားသောသမီးကို အကြောင်းပြချက်အဖြစ် အသုံးချတာ အပြစ်ရှိသည်ဟု သူမခံစားရဘူးလား။

ရှင်းယန်က မေးသည်။ "သူ့မိန်းမနဲ့ သမီးက ဘယ်လိုသေသွားတာလဲ၊ ပိုမိုရှင်းလင်းတဲ့ ထွက်ဆိုချက်မရှိဘူးလား။"

ယွဲ့ရှင်းဝမ်: "ရဲတပ်ဖွဲ့ရဲ့ ထွက်ဆိုချက်မှာ ရှောင်း‌ဝမ်ဟွေ့က သူ့မိန်းမနဲ့ သမီးတို့ ကျွန်းကို ခရီးသွားပြီး ပင်လယ်ထဲမှာ ရေကူးရင်း မတော်တဆ ရေနစ်သေဆုံးခဲ့တယ်လို့ ဖြေကြားခဲ့တယ်။ ဒါပေမဲ့ ရဲတပ်ဖွဲ့က လွန်ခဲ့တဲ့ ငါးနှစ်လောက်က ကျွန်းပေါ်မှာ ဖြစ်ပွားခဲ့တဲ့ မတော်တဆမှုအားလုံးကို စုံစမ်းစစ်ဆေးခဲ့ပြီး အဲဒီထဲက တစ်ခုမှ ရှောင်းဝမ်ဟွေ့ရဲ့ထွက်ဆိုချက်နဲ့ မကိုက်ညီဘူး။ တစ်နည်းဆိုရရင် ရှောင်း‌ဝမ်ဟွေ့က လိမ်ညာနေတာပဲ။"

ကျန်းဖျင်စစ်: "ဒီလူက တော်တော်လိမ်ညာထားပြီး လောလောဆယ်မှာ ရဲတပ်ဖွဲ့ရဲ့ အဓိကသံသယရှိသူအဖြစ်လည်း စာရင်းသွင်းခံထားရတယ်။"

ဓာတုစက်ရုံမှာ ကွင်းဆက်လူသတ်မှုနှင့် မီးရှို့မှု လူသတ်သမားက တကယ်ပဲ ရှောင်းဝမ်ဟွေ့လား။

#TK