MM Story Teller

Chapter 106

Viewers 6k

🌍Chapter 106

လူရွယ်က သနားစရာအမျိုးသမီးကို ငုံ့ကြည့်လိုက်ပြီး လှုပ်ပင်မလှုပ်ချေ။နှစ်ဦးသား တစ်ဦးကိုတစ်ဦးထိုအတိုင်း အတော်ကြာစိုက်ကြည့်နေခဲ့လေသည်။ ထို့နောက် ထိုအမျိုးသမီး အသည်းအသန်ဖမ်းဆုပ်ထားသော ဘောင်းဘီစမှာ စုတ်ပြဲသွားတော့သည်။

သူမ ပြုတ်ကျမသွားခင်အထိ လူရွယ်အား တောင်းတောင်းပန်ပန်နှင့်ကြည့်နေခဲ့ကာ သူမ၏အော်သံမှာ ကော်ရစ်တာတစ်ခုလုံးပဲ့တင်ထပ်ကျန်ရစ်လေသည်။

ထန်မော့မှာ ထိုမြင်ကွင်းအား ရာဘာကြိုးကို တင်းတင်းဆုပ်လျက် ကြည့်နေခဲ့ရသည်။

လူရွယ်က ထိုအမျိုးသမီးပျောက်ကွယ်သွားရာဆီသို့ အကြာကြီးစိုက်ကြည့်နေခဲ့လေသည်။ ထန်မော့၏အနေအထားမှ လူရွယ်၏မျက်နှာမှ အမူအယာကိုမမြင်နိုင်ချေ။ ထို့နောက်လူရွယ်က ထန်မော့ကို လှည့်ကြည့်ကာ ပြုံးပြလာခဲ့သည်။

"ဒီကြိုးကအရမ်းထူးဆန်းတာပဲ ဖြည်လို့ရလား"

[စွမ်းရည်: ငါကပင်လယ်ဓါးပြဘုရင်ဖြစ်လာမယ့်သူကွ]

……

[အသုံးပြုပုံ: လက်တစ်ဖက်စီမှ ဆွဲငင်အားအလွန်ကောင်းသော ရာဘာကြိုးတစ်ကြိုးစီပစ်လွှတ်နိုင်။ ကျိုးကြောင်းပြသက်ရောက်မှုကြောင့် ချည်နှောင်ခံရသူ သို့မဟုတ် အရာ၀တ္ထုမှာ ၁မိနစ်အတွင်း ရာဘာကြိုးကိုမဖြည်နိုင်]

ထိုလူရွယ်က ကြိုးကိုတကယ်ကြီး ဖြည်ဖို့ကြိုးစားလာတော့သည်။

ထန်မော့တွင် တုန့်ဆိုင်းနေရန်အချိန်မရှိချေ။ လူရွယ်မှာ လက်တစ်ဖက်ဖြင့် နံရံကိုဆွဲလျက် ထန်မော့နှင့်အတူ တွင်းထဲကျမသွားစေရန် ထိန်းထားခဲ့သည်။ ကျန်လက်တစ်ဖက်မှာ ထန်မော့၏ကြိုးကိုဖြည်ရန်ကြိုးစားနေခဲ့လေသည်။

သူ ဤအပြုအမူအတွက် အပြစ်မတင်နိုင်ချေ။ သူသည်ထိုရာဘာကြိုးကို လက်နှစ်ဖက်ဖြင့်ဆွဲလျက် တွင်းထဲမှလွတ်အောင် ရှေ့သို့တိုးနေခဲ့သည်။ စက္ကန့်၆၀ကုန်လွန်သွားချိန်တွင်တွင် ထန်မော့နောက်ဆုံးကြမ်းခင်းကို နင်းနိုင်သွားခဲ့သည်။

သူ လူရွယ်ထံ အမူအယာမဲ့စွာလျှောက်သွားလျက် လက်မောင်းမှ ကြိုးကိုပြန်ဖြည်ပေးလိုက်သည်။

လူရွယ်မှာသူ၏လက်ကိုခါလိုက်ပြီး ဆိုသည်။

"ဒါမင်းရဲ့ အကူပစ္စည်းလား အင်း အချိန်ကိုရပ်တာ... နံရံမှာ လမ်းလျှောက်တာ...ဖြည်လို့မရတဲ့ကြိုး ဒါတွေအကုန်လုံးက အကူပစ္စည်းတွေလား... ဒါမှမဟုတ် စွမ်းရည်တွေလား..."

ထန်မော့သူ့အား ပြန်ဖြေမနေပေ။ သူသည်ရာဘာကြိုးကိုအိတ်ထဲသို့ထည့်လိုက်ပြီး အကူပစ္စည်းနှယ် ဟန်ဆောင်လိုက်သည်။ ကြိုးမှာသူ၏အိတ်ထဲတွင် ချက်ချင်းပျောက်ကွယ်သွားခဲ့သည်။ ထို့နောက်သူရုတ်တရက်ထိုင်ချလိုက်ပြီး ဖိနပ်ကြိုးချည်ချင်ယောင်ဆောင်ကာ ကြမ်းပြင်ပေါ်တွင် စက်၀ိုင်းတစ်ခုကိုရေးဆွဲလိုက်သည်။ ထို့နောက်လူရွယ်ကိုမော့ကြည့်လိုက်လေသည်။

လူရွယ်က သူ့ကိုပြုံးပြနေတုန်းပင်။

သူတို့အကြည့်များဆုံတွေ့သွားခဲ့ကြသည်။

၃မိနစ်ကြာပြီးနောက် လူရွယ်ကပြုံးလိုက်ကာ

"ငါသူ့ကိုဘာလို့မကယ်တာလဲလို့တွေးနေတာလား... သူကြောင့်ငါ့အကြိုက်ဆုံးဘောင်းဘီလေး ပြဲသွားတယ်လေ...သူသာအသက်ရှင်သေးရင် ငါတကယ်အလျော်ပြန်တောင်းမှာ"

"ငါနဲ့မဆိုင်ဘူး"

ထန်မော့အကြည့်လွှဲလိုက်သည်။

"ကျေးဇူးပဲ"

ထို့နောက်ထန်မော့ သစ်သားစင်ဆီလျှောက်သွားလိုက်လေသည်။

လူရွယ်က ထိုစကားကိုကြားလျှင် မျက်လုံးများမှေးကျဥ်းသွားခဲ့လေသည်။

ဤလူရွယ် ထိုအမျိုးသမီးကို ကယ်နိုင်ကြောင်း သံသယ၀င်စရာမရှိချေ။

ထိုအခိုက်အတန့်မျှနှင့်တင် ထိုလူရွယ်၏ခွန်အားနှင့် တုန့်ပြန်နိုင်စွမ်းမှာ သူ့ထက်အားမနည်းသည့်အပြင် ပိုတောင်ပိုနိုင်သေးသည်မှာ သေချာလေသည်။ ကျန်စွမ်းရည်နှင့် အကူပစ္စည်းများကိုဖယ်ထားလျှင် လူရွယ်၏ ခွန်အားချည်းသက်သက်ကပင် သူ့ထက်သန်မာလှသည်။ ကမ္ဘာကြီးအွန်လိုင်းပေါ်မတက်ခင်က ထိုသူဘာလုပ်ခဲ့မှန်းမသိသော်လည်း ဖူ၀မ်သော်ကသာ သူ့ထက်သန်မာနိုင်လိိမ့်မည်။

တစ်စက္ကန့်အတွင်းမှာပင် လူရွယ်မှာ ကြမ်းပြင်ပြိုကျခြင်းမှ လွတ်မြောက်သွားကာ လရောင်ပန်းရှိသည့်နေရာကို ရောက်ရှိသွားခဲ့သည်။ သူသာဆန္ဒရှိပါက ၂စက္ကန့်အတွင်း အမျိုးသမီးကို ဆွဲတင်လိုက်နိုင်သည်။ အဘယ်ကြောင့်ဆိုသော် ထန်မော့ပင်လျှင် ထိုသို့လုပ်နိုင်စွမ်းရှိ၍ပင်။

သို့သော် လူရွယ်က ထိုသို့ဆန္ဒမရှိခဲ့ချေ။

ထန်မော့လည်းစိတ်မ၀င်စားသည့်တိုင် အဘယ်ကြောင့် မကယ်ခဲ့သည်ကိုတော့ နားမလည်ချေ။ သို့သော် ထန်မော့ကိုယ်တိုင်လည်း ရာဘာကြိုးကိုသာ မသုံးခဲ့ပါက ပြုတ်ကျသွားခဲ့မှာဖြစ်သည်။ လူရွယ်မှာ ကြိုးကိုမဖြည်နိုင်ခဲ့၍ ထန်မော့ အကူညီရလိုက်ခြင်းသာ။

သို့သော် သူ ကျေးဇူးတင်စကားဆိုလိုက်ဆဲပင်။

သေချာပေါက်ပင် ကျေးဇူးတင်စကားလည်းဆိုရင်း ကျိန်စာလည်းတိုက်ခဲ့သေးသည်ပင်။ ထိုနှစ်ခုမှာ သက်သက်စီပင်။

ထန်မော့ ထိုကြိုးနှင့် မိမိကိုယ်ကိုဆွဲတင်နေရစဥ် လူရွယ်မှာ ကြိုးကိုမည်သို့ ဖြည်ရန်ကြိုးစားနေခဲ့ကြောင်း ရှင်းရှင်းလင်းလင်းကို မှတ်မိလေသည်။ လူရွယ်တွင် သူ့ကိုကယ်ရန် အကြောင်းပြချက်မရှိသလို ထန်မော့တွင်လည်း သူ့အား ကျိန်စာမတိုက်ရန် အကြောင်းပြချက်မရှိချေ။

ဒီလိုဆိုမှတော့

စက်၀ိုင်းဆွဲပြီး ကျိန်စာတိုက်ပစ်မယ်...

ထန်မော့ဖန်ပေါင်းချောင်ထဲမှ လရောင်ပန်းကိုကြည့်လိုက်သည်။ သူသည်ထိုပန်းကိုသာမာန်ကာလျှံကာစိုက်ကြည့်နေပုံပေါ်သော်လည်း တကယ်တော့ အကဲခတ်နေခြင်းဖြစ်လေသည်။

သူဤလူကိုပို၍ သတိထားရမည့်ဖြစ်သည်။

လရောင်ပန်းမှာ ဤလူ၂ဦးရှင်သန်ကျန်ရစ်လိမ့်မည်ဟု မျှော်လင့်မထားခဲ့ချေ။ သူကတုန်ယင်လျက်ပင်ဆိုလာသည်။

"မင်း...မင်းတို့ရောက်လာတယ်ပေါ့... မြန်လိုက်တာဟေး နေကြဦး ဖန်ပေါင်းချောင်းကိုမဖယ်လိုက်နဲ့ ငါ့ကိုမယူနဲ့၊အန္တရာယ်များတယ်လို့"

ထန်မော့က အသာဆိုလိုက်သည်။

"မင်းကိုကိုင်ရင် အန္တရာယ်များတယ်ပေါ့ လိမ်နေပြန်ပြီလား"

လရောင်ပန်းမှာ တုန်လှုပ်နေခဲ့သည်။

"ငါမလိမ်ဘူးနော်.. မင်းငါ့ကိုတကယ်ကိုင်လို့မရဘူး... ငါ့ကိုမကိုင်နဲ့...ငါ့ကိုမကိုင်နဲ့လို့ ငါ့ကိုကိုင်ရင် ကံဆိုးမှာနော်"

ထန်မော့ကဆိုလိုက်သည်။

"မင်းက မင်းမှာ ရှိတဲ့ ပွင့်ဖတ်အရေအတွက်ထက်ပိုလိမ်ဖူးတာပဲ၊ အခုလေးတင် ၂ခြမ်းမှာ တစ်ခြမ်းက ဘေးကင်းတယ်လို့ လိမ်ခဲ့သေးတယ်လေ။...ဘယ်အခြမ်းပဲရွေးရွေး ကြမ်းပြင်ကပြိုကျပြီး ကျင်းထဲကို ပြုတ်ကျမှာပဲလေ"

ကြောက်ရွံ့နေသော လရောင်ပန်းမှာ သူ့ကိုယ်သူခုခံရန်ကြိုးစားနေခဲ့သည်။

"ဒါပေမယ့်လည်း တစ်လမ်းကတော့ အန္တရာယ်ပိုများခဲ့တာပဲလေ မင်းရွေးတဲ့ လမ်းပဲလေ... လက်ကြီးကိုတွေ့တယ်မလား...တစ်လမ်းက ပိုလုံခြုံတာပဲလေ...ငါမလိမ်ဘူးလေ"

"ငါတို့ကိုတကယ်ကြီး တစ်လမ်းကို ရွေးစေချင်ခဲ့တယ်ပေါ့"

လရောင်ပန်း၏ အသံမှာ ရုတ်ချည်းရပ်တန့်သွားခဲ့သည်။

ထန်မော့အေးစက်စွာဆိုလိုက်သည်။

"ဒီကော်ရစ်တာထဲမှာ ငါတို့လမ်းကိုရွေးနေတာမဟုတ်ဘူး နေရာကိုပဲ လမ်းကကြမ်းပြင်ပဲ ကြမ်းပြင်ပေါ်မှာလျှောက်တာက အန္တရာယ်များတယ်ဆိုရင် ငါနံရံပေါ်လျှောက်ခဲ့တာက ထောင်ချောက်ကို နင်းမိစရာအကြောင်းမရှိဘူး တကယ့်ထောင်ချောက်က ကြမ်းပြင်ပဲလေ ငါတို့ဆက်သွားသ၍ ထောင်ချောက်ကို ရှောင်လို့မရဘူး...မင်းကို ဖမ်းရမယ့် အခက်ဆုံးလမ်းက တစ်လမ်းကိုမှ မရွေးတာပဲ"

မည်သည့်လမ်းကိုပဲ ရွေးရွေးအတူတူပင်။ ခက်ခဲသောလမ်းနှင့် ပို၍ခက်ခဲသောလမ်းသာရှိတာဖြစ်သည်။

လရောင်ပန်းမှာ ထိုရွေးချယ်မှု၂ခုကို ပေးခဲ့သည်မှာ အကြောင်းပြချက်ရှိသည်။ တစ်ခုမှာ အသင်းကိုသွေးခွဲရန်ပင်။ ထန်မော့တို့မှာ ၃ယောက်လုံးတပြိုင်တည်းရှေ့တက်သွားပြီး မည်သူ့ကိုမှ အခွင့်အရေးပိုမရစေခဲ့ချေ။ အကယ်၍ အခြားအသင်းဆိုပါက သဘောထားမတူညီမှုကြောင့် ပြဿနာဖြစ်ကြကာ လမ်းမရွေးခင်မှာပင် တိုက်ခိုက်မိကြလိမ့်မည်ပင်။

ကျန်ရည်ရွယ်ချက်တစ်ခုမှာ ကစားသမားများ၏ သတိကိုလျှော့ချရန်ပင်။ ကစားသမား၃ဦးလုံးအတူသွားရန်ဆုံးဖြတ်ကြခြင်းမှာဖြစ်နိုင်ချေထဲမှ တစ်ခုမျှသာပင်။ ကျန်နည်းတစ်ခုမှာ အသင်းသားတစ်ဦးကို အနိုင်ကျင့်ကာ အရင်ဆုံးသွားစေခြင်းပင်။ အကယ်၍ ထန်မော့သာပို၍ ရက်စက်တတ်ခဲ့လျှင် ထိုအမျိုးသမီးကို အရင်သွားစေရန် တွန်းအားပေးလို့ရသည်ပင်။ လူရွယ်ကိုမသေချာလှသော်လည်း အမျိုးသမီးမှာတော့ သူ့လောက်မသန်မာသည်မှာ သေချာလေသည်။ သူသည်အမျိုးသမီးကို တွန်းအားပေးခဲ့လျှင် လူရွယ်မှာလည်း သူ့ကို တားဆီးမည်မဟုတ်ချေ။ အမျိုးသမီးမှာ ထောင်ချောက်ရှိသောလမ်းကိုရွေးချယ်ပြီးသည့်နောက် ထန်မော့မှာ ကျန်လမ်းကို အလွယ်တကူရွေးချယ်နိုင်လေသည်။

ထန်မော့က နှစ်လမ်းလုံးတွင် ထောင်ချောက်ရှိမည်ကို ခန့်မှန်းမိပြီးဖြစ်သည်။ သို့သော် အမျိုးသမီးက တစ်လမ်းကိုရွေးပေးသွားလျှင် ထန်မော့စိတ်ကိုလျှော့ချမိသွားမည်ဖြစ်သည်။

ရလဒ်အနေနှင့် ထန်မော့မှာ ထောင်ချောက်ကို အသက်သွင်းမိကာ အသက်ရှင်နိုင်ချေနည်းလိမ့်မည်။

လရောင်ပန်းမှာ ကစားသမားများသူ့ကိုယူမသွားစေရန် အသည်းအသန်ကြိုးစားနေဆဲပင်။

ထန်မော့ ဖန်ပေါင်းချောင်ကိုရဲတင်းစွာ ဆွဲဖွင့်လိုက်ပြီး လရောင်ပန်း၏ အကိုင်းကိုကိုင်လိုက်သည်။

လရောင်ပန်းမှာ ညှိုးလျော်စွာမြည်တမ်းလာခဲ့သည်။

"မထိနဲ့ ငါ့ကိုမယူသွားနဲ့ ငါမလိမ်ဘူး ငါ့ကိုခေါ်သွားရင် မင်းပြန်ပေးဆပ်ရဖို့ မတတ်နိုင်ဘူးနော် ယူမသွားနဲ့လို့"

လူရွယ်မှာ ထန်မော့အနီးသို့လျှောက်လာပြီး ပန်းပွင့်ကို ငုံ့ကြည့်လိုက်သည်။

"ဒါပေမယ့် မင်းကိုမယူရင်ငါတို့မစ်ရှင်မပြီးတော့ဘူးလေ ငါတို့ကလည်း မစ်ရှင်မပြီးသ၍ ဒီကနေထွက်မရဘူး မဟုတ်ရင်ငါတို့က မင်းရဲ့ အလိမ်အညာတွေကို နားထောင်ဖို့ ဒီကိုရောက်လာတယ်ထင်လို့လား ဟေး အဲဒါလည်း သိပ်မဆိုးဘူးပဲနော်"

"မယူနဲ့ ငါ့ကိုယူသွားရင်နောင်တရလိမ့်မယ်"

ခရက်...

ထန်မော့အမူအယာမဲ့စွာပင် ပန်းကိုချိုး၍ယူလိုက်သည်။

"တင်းတောင်~ အရံမစ်ရှင်ခွဲ 'လိမ်ရတာကြိုက်တဲ့ လရောင်ပန်းကိုရှာပါ' ပြီးမြောက်သွားပါပြီ"

ကျယ်လောင်သောကြေညာသံတစ်ခုက ကော်ရစ်တာတစ်လျှောက်ပဲ့တင်ထပ်သွားခဲ့သည်။

ထန်မော့ထံမှ ချိုးယူခံလိုက်ရသည်နှင့် ထိုပန်းမှာ စကားပြောနိုင်စွမ်းမရှိတော့ပုံပင်။ သူ၏ပန်းဖူးကို ငုံ့လျက် ထန်မော့လက်ထဲ နာနာခံခံပင် ငြိမ်နေခဲ့သည်။

ထန်မော့မှာ ထိုပန်းကိုစူးစမ်းရန်အချိန်မရှိလိုက်ခင်မှာပင် သူ၏ရှေ့မှ မိုးခြိမ်းသံနှယ် ကျယ်လောင်သောအသံများကို ကြားလိုက်ရလေသည်။

ထန်မော့နှင့် လူရွယ်မှာ အသံလာရာသို့ သတိအပြည့်ဖြင့်ကြည့်လိုက်မိလေသည်။

သူတို့၏ရှေ့မှ နံရံမှာ တဖြည်းဖြည်းမြောက်တက်သွားလျက် ၄င်း၏နောက်မှကမ္ဘာတစ်ခုကိုဖော်ပြလာခဲ့သည်။ ထန်မော့ ထီးကလေးကို တင်းတင်းဆုပ်လျက် နံရံနောက်မှ ကြိုမသိနိုင်သော အန္တရာယ်များအတွက် ပြင်ဆင်ထားလိုက်မိလေသည်။ ၁မိနစ်ကြာပြီးနောက် နံရံမှာလုံးဝပျောက်ကွယ်သွားပြီးနောက် ထန်မော့မှာ မျက်စ်ိရှေ့မှ မြင်ကွင်းအား အံ့အားသင့်စွာ ကြည့်လိုက်မိလေသည်။

လရောင်ပန်း၏နောက်တွင် အနားညီတြိဂံအခန်းတစ်ခုရှိနေခဲ့လေသည်။

အခန်း၏နံရံတစ်ဖက်မှာ မြင့်တက်သွားပြီး ထန်မော့နှင့် လူရွယ်တို့ရှိနေသော ကော်ရစ်တာကိုဖော်ပြလာသည်။ ထို့နောက်အခန်း၏ ကျန်နံရံ၂ဖက်မှာလည်း မြင့်တက်သွားပြီး ပုံစံတူ ကော်ရစ်တာ၂ခုကိုဖော်ပြလာခဲ့လေသည်။

ကော်ရစ်တာတစ်ခုတွင် ဖန်ပေါင်းချောင်အောက်ရှိ လက်တံများကို ပျင်းရိစွာဆန့်ထားသော ငွေရောင် လရောင်ပန်းတစ်ပွင့်ရှိနေခဲ့သည်။ ကျန်တစ်ဖက်မှာတော့ မူလတန်းကျောင်းသားအရွယ်ကလေးတစ်ဦးမှ လရောင်ပန်းတစ်ပွင့်ကို လက်ထဲတွင်ကိုင်လျက် ထန်မော့နှင့် ကလေးမျက်နှာနှင့်လူရွယ်ကို သတိအပြည့်ဖြင့် စိုက်ကြည့်နေခဲ့လေသည်။

ထိုတြိဂံအခန်း၏အပေါ်တွင်မူ ၀ိုင်းစက်ပြီး တောက်ပသော လမင်းကြီးရှိလေသည်။ လရောင်ဖျော့ဖျော့မှာ ဖန်အမိုးမှဖြတ်၍ တြိဂံအခန်းထဲသို့ဖြာကျနေခဲ့သည်။ ထန်မော့ရှေ့သို့တိုးလျက် ထိုလရောင်အား သူ၏ခြေထောက်ပေါ်သို့ တို့ထိစေလိုက်သည်။ ထို့နောက်သူရှာတွေ့သည်မှာ ထိုလရောင်နှင့် ထိတွေ့မိသောအရာမှန်သမျှ အလွန်လှပပြီး တဖိတ်ဖိတ်တောက်နေသော ကျောက်မျက်များအဖြစ်ပြောင်းလဲသွားသည်ကိုပင်။

သူ၏မှတ်ဥာဏ်တစ်ခုကရုတ်ချည်းပေါ်လာခဲ့ပြီး ရင်ထဲမှ တင်းကြပ်သွားမိလေသည်။

"တင်းတောင်~ အဓိကမစ်ရှင်' ရတနာကော်ရစ်တာထဲက ပုန်းတမ်းလိုက်တမ်း' အသက်၀င်လာပါပြီ"

"ဂိမ်းရဲ့ စည်းမျည်းတွေကတော့..."

"ပထမအချက် ရတနာကော်ရစ်တာထဲမှာ လမ်းခွဲမှတ်တိုင်၉၉၉ခုရှိပါတယ်"

"ဒုတိယအချက် မှတ်တိုင်တစ်ခုစီတိုင်း လမ်းတစ်ခုရှိပါတယ် အကယ်၍ လမ်းမှားကိုရွေးမိရင် အဆုံးသတ်ကိုရောက်သွားပါမယ်"

"တတိယအချက် အဆုံးသတ်တိုင်းမှာ အနီရောင်နှလုံးသားဘုရင်မရဲ့ အစောင့်၂ယောက်စီ ကင်းလှည့်နေပါလိမ့်မယ်"

"စတုတ္တအချက် လရောင်ပန်းကိုကိုင်ထားတဲ့သူကပဲ ရတနာကော်ရစ်တာကနေ ထွက်ခွာလို့ရမှာပါ"

"ပဥ္စမအချက် ကော်ရစ်တာရဲ့ အဆုံးတစ်ဖက်ဟာ အနီရောင်နှလုံးသားဘုရင်မရဲ့ အိပ်ခန်းဖြစ်ပါတယ် ဘုရင်မအိပ်ခန်းရဲ့ပန်းအိုးထဲကို လရောင်ပန်းကို ထိုးထည့်လိုက်ရင် ရတနာကော်ရစ်တာက တသက်လုံးပိတ်သွားတော့မှာဖြစ်ပါတယ်"

“ဆိုရိုးတစ်ခုရှိတာက ရတနာကော်ရစ်တာမှာ ၃နာရီထက်ပိုနေမိတဲ့လူသားတွေက ဒီမှော်ဆန်တဲ့နေရာကနေ ထွက်မသွားနိုင်တော့ဘူးတဲ့ သူတို့ဟာ ကော်ရစ်တာထဲမှာ ကျောက်ရုပ်ထုတွေအဖြစ်ပြောင်းသွားရရှာတယ်...အနီရောင်ဘုရင်မရဲ့ တိရိစ္ဆာန်ရုပ်ထုတစ်ခုဖြစ်လာပေးရတယ်ဆိုတာ မြေအောက်လူသားတွေအဖို့တော့ ဂုဏ်ယူစရာပါပဲ...ရတနာကော်ရစ်တာကလည်း အဲလိုထင်တယ်လေ"

စူးရှသော ကလေးသံက ထန်မော့ခေါင်းထဲတွင် ကျယ်လာင်နေခဲ့သည်။ ထိုအသံကိုကြားလိုက်သည်နှင့် ထန်မော့မှာ ဘေးမှ လူရွယ်ကိုလှည့်ကြည့်လိုက်မိလေသည်။ လူရွယ်မှာလည်း တစ်ခုခုကို ကြားလိုက်ရပုံဖြင့်ထန်မော့ကို လှည့်ကြည့်လာခဲ့သည်။ ထို့နောက် ကော်ရစ်တာတစ်ဖက်ခြမ်းမှ ကလေးကို ကြည့်လိုက်မိကြပြန်သည်။

၃ယောက်သားမှာ တစ်ဦးကိုတစ်ဦး အတော်ကြာစိုက်ကြည့်နေကြပြီးနောက် တြိဂံအခန်း၏ အလယ်သို့လျှောက်လာခဲ့ကြသည်။

ကောင်လေးမှာ သူ၏လက်ထဲတွင် လရောင်ပန်းကို ဆုပ်ကိုင်ထားခဲ့သည်။ သူကထန်မော့နှင့် လူရွယ်၏ခေါင်းပေါ်ကို ကြည့်လာခဲ့သည်။ ထန်မော့သည်လည်း ခေါင်းကိုငုံ့လျက် ထိုကောင်လေး၏ခေါင်းပေါ်ကို ကြည့်လိုက်သည်။

ထိုကလေးမှာ သူတို့အား သာမာန်ကာလျှံကာကြည့်လိုက်ပြီး သတိဖြင့်ဆိုလာခဲ့သည်။

"ခင်များတို့ကအစိမ်း ကျွန်တော်ကအနီ ကျွန်တော်တို့ကမတူဘူး"

ထန်မော့လည်း ထိုကလေး၏ခေါင်းထက်မှ ပုံကလေးမှာ အနီရောင်ဖြစ်နေသည်ကို တွေ့လိုက်ရသည်။ အမျိုးသမီးနှင့် ကလေးမျက်နှာနှင့် လူရွယ်ကိုတွေ့ခဲ့စဥ်က သူတို့၃ယောက်လုံး၏ခေါင်းပါ်တွင် တူညီသော အစိမ်းရောင်ပုံများရှိနေခဲ့သည်။ ယခုသူတို့၏ရှေ့မှ ကလေးတွင်လည်း ထိုသို့တူညီသော ရုပ်ပုံကလေးရှိနေပြီး အရောင်သာကွဲနေခြင်းဖြစ်သည်။

တစ်ဖက်မှ အရွယ်ရောက်လူကြီး၂ဦးဖြစ်ကာ တစ်ဖက်မှာမူ ကလေးငယ်တစ်ဦးတည်းဖြစ်သည်။

ဤသည်မှာ အန္တရာယ်များသော မျှော်စင်တိုက်ခိုက်ဂိမ်းဖြစ်သည်။ သူစိမ်းလူတစ်ဦး ရုတ်တရက်ပေါ်လာသည်မို့ ထန်မော့အနေနှင့် ၄င်းမှာ ထောင်ချောက်ဟုတ်မဟုတ် မသေချာချေ။ ယခုအချိန်တွင်သူက အရွယ်ရောက်လူကြီးတစ်ဦးအနေဖြင့် ထိုကလေးကို အနိုင်ကျင့်ရန်တွန့်ဆုတ်မနေခဲ့ချေ။ သူကအေးစက်စွာဆိုလိုက်သည်

"နံရံတက်မသွားခင်က မင်းဘာကြုံခဲ့တာလဲ အခုပြော"

ကလေးငယ်မှာ လရောင်ပန်းကို တင်းတင်းဆုပ်လျက် ထန်မော့အား မော့ကြည့်လာခဲ့သည်။

ကလေးငယ်မှာ သူကအရေးနိမ့်နေသည်ကို နားလည်သွားခဲ့ပုံပင်။ ထိုလူကြီး၂ယောက်မှာ ကော်ရစ်တာတစ်ဖက်မှ ရုတ်တရက်ပေါ်လာပြီး အသင်းဖော်များလည်းဖြစ်ကြပုံပင်။ ၄င်းမှာ လူကြီး၂ဦးဖြစ်ပြီး မိမိမှာ အရွယ်မရောက်သေးသော ကလေးတစ်ဦးသာဖြစ်သည်။ ထို့အပြင် သူသည် ခွန်အားအရ ဤလူကြီးနှစ်ဦးနှင့် လုံး၀မယှဥ်နိုင်ချေ။ ထို့အပြင်သူတို့ခေါင်းပေါ်မှ သင်္ကေတများလည်းမတူညီကြချေ။ သူကအနီရောင်ဖြစ်ပြီး ထိုလူကြီး၂ဦးမှာ အစိမ်းရောင်ဖြစ်သည်။ ပြိုင်ဘက်များဖြစ်ကြောင်း သိသာလွန်းနေသည်။

ကလေးငယ်က အလျင်အမြန်တွေးတောလိုက်ပြီး တည်ငြိမ်အောင်ကြိုးစားလိုက်သည်။

"ကျွန်တော်အရင်ခန့်မှန်းမယ်နော်...ခင်များတို့အသင်းက အရင်က ၃ယောက်မလား"

သူကမှန်းလိုက်တာလား...

ထန်မော့ ဖြေရမည့်အစားပြန်၍မေးလိုက်သည်။

"နံရံမတက်သွားခင်က မင်းဘာမြင်ခဲ့လဲ ဘာလုပ်ခဲ့လဲ"

🪩

Prev Next