MM Story Teller

Chapter 136

Viewers 11k

Chapters 379

🌍Chapter 136

ထန်မော့ မေးလိုက်သည်။

"ဒီသေနတ်ကခင်များရဲ့အရေးကြီးတဲ့ဟာလား "

သူကခတ္တမျှတန့်သွားပြီးမှ...

"ကျွန်တော်ဒီအောက်မှာ စာလုံးလေးတစ်ခုတွေ့လို့ ခင်များနာမည်လား"

အခြားတစ်ယောက်ယောက်၏ နာမည်လည်းဖြစ်နိုင်သည်ပင်။

ဖူ၀မ်သော်ဖုံးကွယ်မထားခဲ့ချေ။

"ကိုယ့်ရဲ့ ကုဒ်နာမည် Old Vလေ... ကိုယ်တို့အထူးတပ်ဖွဲ့မှာ တစ်ယောက်ကိုတစ်ယောက် နာမည်အစစ်တွေနဲ့မခေါ်ကြဘူး... ကုဒ်နာမည်ကိုပဲသုံးပြီး ကိုယ့်နောက်ခံကိုကိုယ်လျှို့၀ှက်ထားကြတာ ကိုယ့်ကုဒ်နာမည်က OldV"

ထန်မော့သည် မူလကတော့ ထိုစာလုံးမှာ victoryကိုရည်ညွှန်းသည်ဟု ထင်ခဲ့သည်။ အိုလံပစ် လေးသည်တော်များမှာ မိမိတို့၏လေးပေါ်တွင် Vဟုရေးထွင်းပြီး အနိုင်ရရှိရန် နမိတ်ကောင်းဟုသတ်မှတ်တတ်ကြသည်။ ဖူ၀မ်သော်၏ ကုဒ်အမည်ဟုတော့ မထင်ထားခဲ့ချေ။

သို့ဆိုပါက ဤသေနတ်မှာ ပို၍ အရေးကြီးသည်ဟု ဆိုလိုခြင်းမဟုတ်ပါလား။ ထန်မော့မေးလိုက်မိသည်။

"ကျွန်တော့်ကိုပေးလို့ ပြဿနာမရှိဘူးလား"

ဖူ၀မ်သော်မှာ ကားကို လက်တစ်ဖက်ဖြင့်သာ ထိန်း၍မောင်းနှင်နေခဲ့သည်။ ဤလမ်းမှာကျယ်ပြီး ကားသိပ်အများကြီးမရှိချေ။ သူကထန်မော့ကိုလှည့်ကြည့်လာခဲ့သည်။

"ကိုယ့်စွမ်းရည်နဲ့ဆို အဲဒါကိုမလိုတော့ဘူး ပြီးတော့ကိုယ့်မှာ အသုံး၀င်တဲ့အကူပစ္စည်းတွေအများကြီးရှိတယ်... ဒီသေနတ်က အခုတော့ ကိုယ့်အတွက် ဘာမှမဟုတ်တော့ပါဘူး"

သူဤသေနတ်ကိုလွှင့်မပစ်ခြင်းမှာ သူ၏အကျင့်ကြောင့်ရော အနည်းငယ်အမှတ်တရလည်းဖြစ်နေခြင်းကြောင့်ပင်။

"ဒါပေမယ့် မင်းကတော့ ဒီသေနတ်ကို ကိုယ့်ထက်ပိုလိုအပ်နေတာပဲလေ"

ထန်မော့ပြန်မဖြေခဲ့။ သူကခေါင်းကိုပြန်လှည့်သွားလျက် သေနတ်ကို ဆက်လက်စူးစမ်းနေလိုက်သည်။

ဖူ၀မ်သော်က ရယ်လိုက်ပြီး ကားမောင်းရာတွင် အာရုံပြန်စိုက်လိုက်သည်။

ထန်မော့မှာ ဤလူကဘာကိုရှာတွေ့သွားသည်ကို မသိသော်လည်း အားလုံးကခန့်မှန်းချက်သာဖြစ်လိမ့်မည်။ ထန်မော့၀န်မခံသ၍ ဖူ၀မ်သော်အတွက်အမှန်တရားကို သိရန်မလွယ်ကူချေ။ သူခန့်မှန်းမိလျှင်တောင် ထန်မော့အနေနှင့် ၀န်ခံလိမ့်မည်မဟုတ်။

နေလုံး တဖြည်းဖြည်း၀င်သွားလျက် အနက်ရောင်တိမ်လိပ်များ တရိပ်ရိပ်တက်လာခဲ့သည်။ မိုးရွာတော့မည်ဖြစ်၍ ဖူ၀မ်သော်ကားကို လမ်းဘေးတွင် စောစောလေးရပ်လိုက်သည်။ ထန်မော့လည်း သေနတ်ကိုကိုင်လျက် လမ်းပေါ်မှဆင်းလာခဲ့သည်။ ထို့နောက် ဘေးမှ လယ်ကွင်းများဆီလျှောက်လာခဲ့လေသည်။

သူသည်Checkmateစွမ်းရည်ကိုရရှိပြီးနောက် သေနတ်ပစ်ခြင်းနှင့်ပတ်သက်၍ အနည်းငယ်လေ့လာချင်ခဲ့သည်။ ထန်မော့ အသက်ရှူအောင့်လျက် ကလစ်ဟူသောအသံတစ်ခုကိုကြားလိုက်ရသည်။ ထို့နောက် လက်ကိုမြှောက်လျက် ၁၀မီတာအကွာမှ သစ်ပင်လေးကိုချိန်ရွယ်လိုက်ပြီး မျက်လုံးများကို မှေးကျဥ်းလျက် ခလုတ်ကိုဆွဲချလိုက်သည်။

ဘန်း...

ကြီးမားသော တန်ပြန်မှုက ထန်မော့၏ မျက်လုံးများကို ပြူးကျယ်သွားစေလျက် နောက်သို့ခြေလှမ်း၀က်ခန့်ဆုတ်လိုက်ရသည်။ သူ၏လက်ရှိသန်မာမှုနှင့်ပင် သေနတ်၏ပြန်ခါမှုမှာ လက်မောင်းတစ်ခုလုံးကို တုန်ခါသွားစေသည်အထိ ပြင်းထန်လိမ့်မည်ဟု မမျှော်လင့်ထားခဲ့ချေ။ သူသည်အပင်လေးကိုလှမ်းကြည့်လိုက်လျှင် အကိုင်းများလှုပ်ခါနေသည်ကိုတွေ့လိုက်ရသည်။ သစ်ရွက်များက မြေပြင်ပေါ်သ်ု့ကြွေကျလာကြသည်။

အပင်ပေါ်တွင် မည်သည့်ကျည်ဆံရာမျှမရှိချေ။

ယခုလေးတင် ထန်မော့မှာ ထိုအပင်၏ ပင်စည်ကိုချိန်ထားခဲ့ခြင်းဖြစ်သည်။ သို့သော်ကျည်ဆံမှာ ပင်စည်ကိုမထိပဲ အရွက်များကြားမှ ဖြတ်သွားသည်မှာ သိသာလှသည်။

ထန်မော့ အံကိုကြိတ်လိုက်သည်။ ဤတစ်ကြိမ်တွင် သူကသေနတ်ကိုလက်၂ဖက်ဖြင့် ဆုပ်ကိုင်လျက် ခလုတ်ကိုဆွဲလိုက်သည်။ ထန်မော့၏ အထူးအမြင်စွမ်းရည်မှာ ကျည်ဆံပြေးထွက်သွားသော ငွေရောင်လမ်းကြောင်းကိုပင် မြင်လိုက်ရလေသည်။ ဟိန်းသံတစ်ခုနှင့်အတူ ငွေရောင်ကျည်ဆံမှာ လေထုကိုဖြတ်လျက် ပင်စည်အနီးသို့ဖောက်၀င်သွားခဲ့သည်။ သို့သော် ၄င်းမှာ ထန်မော့ချိန်ရွယ်ထားသောနေရာနှင့် စင်တီမီတာ ၃၀ခန့်ဝေးနေဆဲပင်။

ထို ကြယ်တာရာများကိုယ်စားပြု တစားမျှတမှုရှာဖွေခြင်းစွမ်းရည်မှာ သူသေနတ်ကိုပစ်လိုက်ရုံဖြင့် ကျည်ဆံကို သူ၏စိတ်ဖြင့် ထိန်းချုပ်နိုင်သည်ဟူသော အဓိပ္ပါယ်ပင်။ သို့သော် ဤသည်မှာတော့သူ၏ ပင်ကိုယ်ပစ်ခတ်စွမ်းရည်ချည်းသက်သက်ပင်။ ကျည်ဆံမှာ ပစ်ခတ်လိုက်သည်နှင့် ထန်မော့ချိန်ရွယ်ထားသည့်နေရာမှ ချော်ထွက်သွားတတ်သည်။ ရန်သူ၏ခေါင်းကိုချိန်ပါသော်လည်း ပုခုံးမျှသာ မှန်နိုင်သည်။

၄င်းမှာပင် အတော်ကောင်းသေးသည်ဟု ဆိုနိုင်သည်။ အဆိုးဆုံးအခြေအနေမှာ သူကရန်သူကိုချိန်ရွယ်လိုက်သော်လည်း တစ်ယောက်ကိုမှ မထိခြင်းပင်။

ထန်မော့အမူအယာကပျက်ယွင်းသွားလျက် လက်ကိုတဖန်မြှောက်ကာ ထိုပင်စည်သို့ ၂ချက်မျှထပ်ပစ်လိုက်သည်။ တစ်ချက်မှာ ၂၀စင်တီမီတာခန့်ကွာပြီး ကျန်တချက်မှာတော့မမျှော်လင့်ထားစွာပင် ပစ်မှတ်ထံမှ ၁မီတာပင် ဝေးသွားခဲ့သည်။ ကျည်ဆံ၅ခုကျန်သေးသည်။ ထန်မော့နောက်တစ်ကြိမ်ပစ်ရန် သေနတ်ကိုမြှောက်လိုက်ချိန်တွင် သူ၏နောက်မှ လေသံနိမ့်နိမ့်ကိုကြားလိုက်ရသည်။

"မင်းသေနတ်တစ်ခါမှမပစ်ဖူးဘူးလား"

ထန်မော့လှည့်ကြည့်လိုက်သည်။

"ဟင့်အင်း"

"ဒီဘက်"

ဖူ၀မ်သော်မှာ ကားဘေးတွင်ရပ်လျက် ရေတငုံမျှသောက်လိုက်ပြီးနောက် ရေဘူးကို ကားထဲပြန်ပစ်ထည့်လိုက်သည်။ ထို့နောက် လမ်းပေါ်မှ လက်ထောက်လျက် ခုန်ဆင်းလာခဲ့လေသည်။ ဖူ၀မ်သော်က သူ့အနားကိုလျှောက်လာခဲ့လျှင် ထန်မော့ကဆိုလိုက်သည်။

"ကျွန်တော့်မှာ ခေါင်းမူးတတ်တဲ့ အကျင့်ရှိတယ် ကားစီးရင်တော့ဘာမှမဖြစ်ပေမယ့် သေနတ်ပစ်တဲ့ 3Dဂိမ်းတွေဆို မူးလာရော...အဲဒါကြောင့် တစ်ခါမှမဆော့ဖြစ်ဘူး"

ဖူ၀မ်သော် သူ့အား အံ့သြစွာကြည့်လာခဲ့သည်။

"ကိုယ်ကသေနတ်အဝေးပစ်ကိုပြောတာ သေနတ်ပစ်တဲ့ ဂိမ်းကိုပြောတာမဟုတ်ဘူး"

ထန်မော့နားလည်သွားခဲ့သည်။

"တစ်ခါမှမပစ်ဖူးဘူး"

လက်ရှိမော်ဒန်ခေတ်တွင် ကလပ်များဆီသွားပြီး အပစ်အခတ်လေ့ကျင့်သူများရှိလေသည်။ ထို့ကြောင့် ဖူ၀မ်သော်၏ မေးခွန်းကိုသူနားလည်သည်။ ထန်မော့က ရုတ်တရက်သေနတ်တစ်လက်ကို လိုချင်သည်ကိုကြားတော့ အတွေ့အကြုံရှိသည်ဟု ထင်ခဲ့မိလိမ့်မည်။ ထန်မော့မှာ တစ်ခါမှမပစ်ဖူးဘူးဟုတော့ ထင်ထားလိမ့်မည်မဟုတ်ချေ။

ဖူ၀မ်သော်မှာ ထန်မော့၏လက်ထဲမှ သေနတ်ကိုယူလိုက်ပြီး ၁၀မီတာအကွာမှ သစ်ပင်ကိုချိန်လိုက်သည်။

သူ၏မျက်လုံးများမှာ အသာမှေးကျဥ်းသွားလျက် ခလုတ်ကို လျင်မြန်စွာ ဆွဲလိုက်သည်။

ဘန်း...

ထိုလှုပ်ရှားမှုများမှာ လျှင်မြန်လွန်း၍ ထန်မော့ မတုန့်ပြန်နိုင်လိုက်ချေ။ စက္ကန့်ပိုင်းအတွင်း ထန်မော့၏နားထဲ ကျယ်လောင်သောအသံကိုကြားလိုက်ရသည်။ ထိုပြင်းထန်သော တွန်းကန်အားမှာ ဖူ၀မ်သော်အတွက် မတည်ရှိသကဲ့သို့ လက်ချောင်းလေးမျှပင် လှုပ်ခါမသွားခဲ့ချေ။ သေနတ်ပြောင်း၀မှ ပြေးထွက်သွားသော ကျည်ဆံမှာ တစ်ဖြောင့်တည်း ချောမွေ့စွာပင် ပင်စည်တွင် အပေါက်လေးတစ်ခုကို ချန်ထားရစ်သည်။

ထန်မော့၏အဆင့်မှာ လူသစ်များကြားတွင် အတော်ကောင်းသည်ဟု ဆိုနိုင်သည်။ အထူးသဖြင့်သူက မြင်နိုင်စွမ်းက စူးရှကာ ခွန်အားမှာလည်း မြင့်ပြီး ပင်စည်ကို ချိန်နိုင်သေးသည်။ ရက်အနည်းငယ်မျှနှင့် ရိုးရိုး အပျော်တမ်း ကျွမ်းကျင်သေနတ်သမားကိုပင် ယှဥ်နိုင်လောက်သည်။ သို့သော် ဖူ၀မ်သော်၏ ပစ်ခတ်မှုတစ်ချက်လောက်ကပင် သာမာန်ကျွမ်းကျင်သူနှင့် ပရော်ဖက်ရှင်နယ်ကြားမှ ကွာခြားမှုကို ရှင်းလင်းသွားစေသည်။

ဖူ၀မ်သော်မှာ ထိုပစ်မှတ်ကို ချိန်ရွယ်နေစရာမလိုခဲ့သလိုပင်။ သူကတစ်ချက်မျှသာကြည့်၍ ထန်မော့ချိန်ရွယ်နေခဲ့သောနေရာကို တိုက်ရိုက်ပစ်ချလိုက်ခြင်းပင်။ ထန်မော့မှာ မိမိပစ်မှတ်နေရာကို ဖူ၀မ်သော်အား မပြောပြထားချေ။ သူ့ဘာသာအချက်အနည်းငယ်မျှသာပစ်နေခဲ့ခြင်းဖြစ်ပြီး ဖူ၀မ်သော်မှာ ၄င်းကို လမ်းမပေါ်မှ လှမ်းကြည့်ရုံမျှနှင့် တစ်ချက်တည်း ပစ်ချနိုင်လေသည်။

ထန်မော့ကမေးလိုက်သည်။

" ကျွန်တော်ပစ်တာလွဲနေတဲ့ဟာကို အဲနေရာကိုချိန်နေမှန်းဘယ်လိုသိတာလဲ"

"မင်းပစ်ထားတာကလည်း အဲဒီနားပတ်ပတ်လည်ပဲလေ"

ဖူ၀မ်သော်က သဘာ၀ကျကျဆိုလာသည်။

"မင်းအဲဒီနားကိုပစ်ချင်တာမဟုတ်ဘူးလား"

ထန်မော့ဤတစ်ကြိမ်တော့ တကယ်ဆွံ့အသွားခဲ့သည်။

ကမ္ဘာကြီးအွန်လိုင်းပေါ်တက်လာပြီးနောက် လူတိုင်းကပိုပြီးသန်မာလာ၍သာတော်တော့သည်။ သို့မဟုတ်ပါက သူ၏ကိုယ်ပွားဆယ်ခုကပင် ဖူ၀မ်သော်ကို ယှဥ်နိုင်မည်မဟုတ်ချေ။

ဖူ၀မ်သော် သေနတ်ကို ထန်မော့အား ပြန်ကမ်းပေးလိုက်သည်။ ထန်မော့လည်း ဖူ၀မ်သော်၏ ကိုယ်ဟန်အနေအထားကို တွေးမိလျှင် လိုက်အတုခိုးလျက် သေနတ်ကိုတဖန်မြှောက်လိုက်သည်။ ထိုစဥ် ရုတ်တရက် နွေးထွေးသော လက်တစ်ဖက်က ထန်မော့ကိုအုပ်ကိုင်လာခဲ့လျှင် ထန်မော့ ထိတ်လန့်သွားမိရသည်။ သူခေါင်းကိုလှည့်ကြည့်လိုက်သော် ဖူ၀မ်သော်မှာသူ၏နောက်တွင်ရပ်နေသည်ကို တွေ့လိုက်ရလေသည်။

သူသည် တပ်သားအသစ်ကလေးများအား သင်ကြားပေးနေသော ခေါင်းဆောင်တစ်ဦးသဖွယ် ထန်မော့၏လက်ကို သဘာ၀ကျကျပင်ဆုပ်ကိုင်လျက် သေနတ်ကို ကိုင်ရန်ကူညီပေးလိုက်သည်။ ဖူ၀မ်သော်သည် ထန်မော့လက်ကို ယူလျက် ညာဘက်သို့အနည်းငယ်ရွေ့လိုက်သည်။ သူ၏လေသံမှာ ခပ်နိမ့်နိမ့်နိုင်သည်။

"မင်းသာဆိုရင် ၁၀မီတာကတစ်ခုခုကို ချိန်ဖို့ဆိုတာမခက်ဘူး... မမှန်ဘူးဆိုတာက ကျည်ဆံထွက်သွားတဲ့အချိန်မှာ မင်းလက်ကခါသွားလို့... ကိုယ့်သေနတ်က ပြန်ကန်တာကို အားနည်းအောင်ထိန်းပေးတဲ့ ပြောင်းကိုသုံးထားတာ...ဒါပေမယ့်ကျည်တွေကတော့ အထူးထုတ်ထားတာမို့ အရမ်းပြင်းပြီး ပြန်ကန်တာလည်းပြင်းတယ်... မင်းတစ်နေရာကိုချိန်တဲ့အခါ လက်ကိုငြိမ်အောင်ထားလို့မရရင် ကျည်ကချော်မှာပဲ တစ်ကြိမ်လောက် ထပ်ပစ်ကြည့်လိုက်"

ဖူ၀မ်သော်ထန်မော့အား ငုံ့ကြည့်လာသည်။

ထန်မော့ရင်များတဒုန်းဒုန်းခုန်လာသော်လည်း လျင်မြန်စွာ ပြန်ထိန်းချုပ်လိုက်ကာ ၁၀မီတာ အကွာမှ အပင်လေးကိုကြည့်လိုက်သည်။

ဖူ၀မ်သော်မှာ သူ၏လက်ကိုအုပ်ကိုင်ထားပြီး သူကတော့သေနတ်ကို ကိုင်ထားခဲ့သည်။ ထို့နောက် ထန်မော့ခလုတ်ကို ညင်သာစွာ ဆွဲလိုက်လေသည်။

ဘန်း...

ဤတစ်ကြိမ်တွင် ၅စင်တီမီတာမျှသာ ကွာလေသည်။ ထန်မော့၏ကျည်မှာ ဖူ၀မ်သော်ကျည်ပေါက်၏ ဘေးတွင်ဖြစ်သည်။

ဖူ၀မ်သော်ကဆိုသည်။

"အင်း နည်းနည်းလောက်ထပ်ပစ်ပြီးရင် မင်းသိသွားမှာပါ"

သူကပြောရင်းနှင့် ထန်မော့လက်ကို ဆုပ်ကိုင်ထိုင်ခြင်းကိုလည်း မလွှတ်လိုက်ချေ။

ထန်မော့"..."

ဤသည်မှာ အလွန်ထူးဆန်းသော ခံစားချက်ပင်။

သူ၏လက်ကို မိန်းကလေးတစ်ယောက်က ကိုင်ထားခြင်းဆိုလျှင် သူဘယ်လိုမှခံစားရမည်မဟုတ်။ ဖူ၀မ်သော်မှာ အဖြောင့်တစ်ယောက်ဖြစ်လောက်သော်လည်း ထန်မော့မှာ မိမိgayမှန်းသိနေခဲ့သည်။ ယောကျာ်းတစ်ယောက်က သူ့လက်ကိုကိုင်ထားခြငိးအား အနေခက်မိသော်လည်း ပစ်မှတ်ကိုသာအာရုံစိုက်ရန်ကြိုးစားလိုက်သည်။

ဤတစ်ချက်ပစ်ပြီးလျှင်တော့ ကိုယ့်ဘာသာပစ်တော့မည်ဟုလည်း တိတ်တဆိတ်တွေးလိုက်မိသည်။

ဖူ၀မ်သော်၏ လမ်းညွှန်မှုအောက်တွင် ထန်မော့နောက်တစ်ချက်ထပ်ပစ်လိုက်ပြီး ၅စင်တီမီတာခန့်တော့လွဲနေဆဲပင်။

ဖူ၀မ်သော်မှာ နောက်တစ်ချက်ပစ်ရန်အတွက်သူ့လက်ကို ကိုင်ထားဆဲဖြစ်သော်လည်း ထန်မော့ကအလျင်အမြန်ဆိုလိုက်သည်။

"ကိုယ့်ဘာကိုယ်ပစ်ကြည့်လိုက်မယ်"

ဖူ၀မ်သော်က သူ့ကို ငုံ့ကြည့်လာခဲ့သည်။

ထန်မော့ကတည်ငြိမ်စွာဖြင့် ဆိုသည်။

"ကျွန်တော်နည်းနည်း သိသွားပြီ ကိုယ့်ဘာကိုယ်ပစ်ကြည့်လို့ရမလား"

ထန်မော့ပြောရင်းနှင့်ပင် ဖူ၀မ်သော်၏ လက်ထဲမှ မိမိ၏လက်ကို အသာလေးရုန်းလိုက်သည်။ သို့သော် သူမဖြုတ်လိုက်နိုင်ခင်မှာပင် ဖူ၀မ်သော်၏မျက်လုံးများမှာ ဖြတ်ခနဲပြောင်းလဲသွားပြီး ထန်မော့၏လက်ကို ချက်ချင်းပြန်ဆုပ်ကိုင်လာခဲ့သည်။ ထန့်မော့ခတ္တမျှမျက်နှာ ပူသွားခဲ့သော်လည်း စက္ကန့်ပိုင်းအတွင်း သူ၏အမူအယာမှာလည်း ပြောင်းလဲသွားခဲ့သည်။ သူကဖူ၀မ်သော်နှင့်အတူ နောက်သို့လှည့်ကြည့်လိုက်လေသည်။

ဖူ၀မ်သော်မှာ ထန်မော့လက်ကို ဖမ်းဆုပ်လျက် ကျန်တစ်ဖက်ကတော့သူ၏ခါးတွင်ထိနိးထားလျက် သူ၏ကိုယ်အား ၁၈၀ဒီဂရီလှည့်လိုက်သည်။ ထိုသို့လှည့်လိုက်စဥ်မှာပင် သူကတိုးညှင်းစွာ ဆိုလာသည်။

"ပစ်"

ထန်မော့က မည်သည်ကို ချိန်ရွယ်ထားမှန်း မသိသည့်တိုင် ဖူ၀မ်သော်ကဆိုလိုက်သည်နှင့် သူခလုတ်ကို ဆွဲချလိုက်သည်။ သူသည်ထိုကျည်ဆံတစ်ချက်အား ယုံကြည်ချက်ရှိရှိဖြင့် ပစ်လိုက်ခြင်းပင်။ ကျည်ဆံမှာ ကျောက်တုံးကြီးတစ်ခုကိုသွားမှန်ပြီး လူသူမဲ့ကွင်းပြင်ကြီးတွင် ဘန်းခနဲ ပဲ့တင်ထပ်သွားလျက် ကျောက်တုံးကြီးတွင် အပေါက်လေးတစ်ခုကိုချန်ရစ်ခဲ့သည်။

ဖူ၀မ်သော် ထန်မော့၏လက်ကို မလွှတ်တမ်းဆုပ်ကိုင်ထားကာ ဒုတိယအကြိမ်မြောက်ဆိုလာသည်။

"ပစ်"

ဤတစ်ကြိမ်တွင်တော့ ကျောက်တုံးကြီးနောက်မှ အမျိုးသမီးအသံတစ်ခုထွက်လာခဲ့သည်။

"ဟင့်အင်း မပစ်ပါနဲ့...ကျွန်မတို့က ဒုက္ခမပေးပါဘူး ဒုက္ခပေးချင်လို့မဟုတ်ပါဘူး သေနတ်သံကြားလို့ လာထွက်ကြည့်ရုံပါ"

နောက်ထပ်အသံတစ်ခုလည်း ထပ်ထွက်လာခဲ့သည်။

"အထင်မလွဲပါနဲ့ မပစ်ပါနဲ့ဗျာ ကျွန်တော်တို့က ဖြတ်သွားရုံလေးပါ တကယ်ဖြတ်သွားရုံလေးပါဗျာ"

အနက်ရောင်တိမ်လိပ်များမှာ တဖြည်းဖြည်း ဖုံးအုပ်လာပြီး နေလုံးကြီးမှာလည်း အနောက်အရပ်သို့တဖြည်းဖြည်း ၀င်သွားခဲ့သည်။ လူ၂ယောက်မှာ လက်ကိုယ်စီမြှောက်လျက် ကျောက်တုံးကြီးနောက်မှ ထွက်လာခဲ့ကြလေသည်။

🪩

Prev Next