MM Story Teller

Chapter 144

Viewers 11k

🌍Chapter 144

"ခင်များကခေါင်းဆောင်လား"

တစ်ဖက်လူပ ထန်မော့နှင့် ဖူ၀မ်သော်အား ဂရုတစိုက်အကဲခတ်နေခဲ့လေသည်။ ထို့နောက် သူကဖူ၀မ်သော်ကို ကြည့်ချိန်တွင် သတိထားနေမှုတစ်ခုမျက်လုံးတွင် ဖြတ်ပြေးသွားခဲ့သည်။ သူကမေးခွန်းကိုမဖြေခဲ့ပေ။ ထိုအစား သူတို့ကိုပြန်မေးလာခဲ့သည်။

"မင်းတို့ကနန်ကျင်းကမဟုတ်ဘူးမလား"

ဖူ၀မ်သော်က ထန်မော့၏ဘေးမှ ပြန်ဖြေလာခဲ့သည်။

"အင်း"

ထိုလူကခေါင်းညိတ်လိုက်သည်။

"ဒီကိုရောက်လာတာ မထူးဆန်းတော့ပါဘူး...မင်းတို့က ပိတ်ထားတဲ့နေရာတွေကို မသိလို့ဘဲ...အစကတော့ လူပြည့်မယ်မထင်ထားတာ အခုတော့၇ယောက်ပြည့်သွားတာပဲ... ဒီလိုဆိုမှတော့ ဂိမ်းကိုစမှရတော့မယ်.. ဂိမ်းကိုရှင်းပြီးမှပဲ ထွက်လို့ရတော့မှာ"

သူပြောပြီးနှင့် ကြက်ဆင်ကြီး၏ရုတ်တရက်အော်သံက ရေခဲသေတ္တာနောက်မှ ထွက်လာခဲ့သည်။

"ကတော် မေမေပိုးတစ်ကောင်ကိုဖမ်းမိပြီ... ကလေးလေးတွေ အကြိုက်ဆုံးပိုးကောင်"

ကြက်ဆင်ကြီးက ရေခဲသေတ္တာနောက်မှ ကစားသမား၇ယောက်ထံ ပျံသန်းလာခဲ့သည်။ ၄င်း၏ပါးစပ်တွင် အစိမ်းရောင်ပိုးတစ်ကောင်ကိုကိုက်ချီထားပြီး ၄င်းမှာ လွတ်မြောက်ရန်ကြိုးစားနေသည့်နှယ် တွန့်လိမ်လျက်။

ကြက်ဆင်ကြီးမှာ ထိုပိုးကောင်ကို ကြမ်းပြင်သို့ ပစ်ချလိုက်ပြီး သူမ၏ခေါင်းကိုပျော်ရွှင်စွာမော့လိုက်သည်။ ထို့နောက်အတောင်ပံ၂ဖက်ဖြင့် လက်ခုပ်တီးလိုက်သည်။

"ကတော် ကလေးတွေ တန်းစီလိုက်တော့"

[["တင်းတောင်~ အဓိကမစ်ရှင် 'လိမ္မာတဲ့ကလေးတွေက ပိုးကောင်စားရမယ်' အသက်၀င်လာပါပြီ"

"ဂိမ်းရဲ့စည်းမျဥ်းတွေကတော့"

"ပထမအချက် ကစားသမားတွေက မှန်ကန်တဲ့အစဥ်လိုက် တန်းစီရမှာဖြစ်ပြီး အလှည့်ကျော်လို့မရပါဘူး"

“ဒုတိယအချက် အစဥ်လိုက်မှားစီမိရင် 'စိတ်ဆိုးတဲ့ ကြက်ဆင်မေမေကြီး'သက်ရောက်မှုကို အသက်သွင်းမိပြီးတော့၊ ကြက်ဆင်ကြီးရဲ့ စိတ်၂ခွဝေဒနာဖြစ်တဲ့ သိမ်းငှက်ဆိုးကြီးအသက်၀င်လာပြီး အရံဂိမ်းတစ်ခုဖြစ်တဲ့'သိမ်းငှက်ကြီးက ကြက်ပေါက်လေးတွေကို လိုက်ဖမ်းခြင်း' ပွင့်လာမှာဖြစ်ပါတယ်"

"တတိယအချက် စီတန်းခြင်းက ၁နာရီဖြစ်ပြီး 'သိမ်းငှက်ကြီးက ကြက်ပေါက်လေးတွေကို လိုက်ဖမ်းခြင်း'ကလည်း ၁နာရီဖြစ်ပါတယ်"

“စတုတ္ထအချက် မစီခင်မှာ ကစားသမားတွေက ကြက်ဆင်ကြီးကို မေးခွန်း၂ခုမေးနိုင်ပါတယ်။ ကြက်ဆင်ကြီးဟာအနည်းဆုံးမေးခွန်းတစ်ခုကိုတော့မှန်ကန်စွာဖြေရမှာပါ"

“ပဥ္စမအချက် ကြက်ပေါက်လေးတစ်ကောင်သေသွားတာနဲ့ ကြက်ဆင်မေမေကြီး အသဲကွဲခြင်း သက်ရောက်မှုကြောင့် ကြက်ဆင်ကြီးမှာ စိတ်နှစ်ခွဝေဒနာမှ ယာယီသက်သာသွားမှာပါ"

“ဆဌမအချက် သိမ်းငှက်ကြီးအဖြစ် စိတ်နှစ်ခွဖြစ်နေချိန်ကလွဲရင် ကြက်ဆင်မေမေကြီးက သူ့ရဲ့သားပေါက်လေးတွေကို လုံး၀မသတ်ပါဘူး"

“ချစ်စရာကြက်ဆင်၀မ်းကွဲကြီးက အစတုန်းကတော့ ကမ္ဘာပေါ်ကိုလာပြီး ဥမ၀ပ်ချင်ခဲ့ဘူးလေ... ဒါပေမယ့် သူ့၀မ်းကွဲက တစ်ယောက်ယောက်ဆီက ရိုက်သတ်ခံရလိမ့်မယ်လို့ ဘယ်သူကထင်ထားမှာလဲ... အခုတော့သူ့ခမျာ ကျည်ဆံကိုကိုက်ပြီး ထွက်လာရုံပဲတတ်နိုင်တော့တာပေါ့... မွန်းစတားကမ္ဘာကသူတိုင်းကတော့ သူက သူ့၀မ်းကွဲလောက် စိတ်မရှည်ဘူးဆိုတာ ကောင်းကောင်းသိကြတယ်လေ"]]

အနက်ရောင်မျှော်စင်မှ ကြေညာမှုပြီးဆုံးသွားသည်နှင့် ကစားသမား၇ဦးမှာ အစိမ်းရောင်ပိုးကောင်ရှေ့တွင်ရပ်လျက် ကြက်ဆင်ကြီးကို မော်ကြည့်လိုက်ကြသည်။

ကြက်ဆင်ကြီးက အနက်ရောင်မျှော်စင်၏ကြေညာမှုကို ကြားလိုက်ရသည့်နှယ် အလွန် မကျေမနပ်ဖြစ်နေခဲ့လေသည်။ သူမကအော်ဟစ်လျက်ခြေကိုဆောင့်လိုက်သည်။

"ဒီအနက်ရောင်မျှော်စင်ကတော့... ငါကငါ့ကလေးတွေကို ထိခိုက်အောင်လုပ်မယ်လို့ပြောရဲတယ်ပေါ့... မဖြစ်နိုင်တာပဲ...ကလေးလေးတို့ မင်းတို့အားလုံးက အမေ့ရဲ့ အသည်းညှာလေးတွေပဲ... အမေက ကလေးလေးတို့ကို ဘာလို့ ထိခိုက်အောင်လုပ်ရမှာလဲ"

ကြက်ဆင်ကြီးမှာ သူမ၏မျက်လုံးနက်လေးများဖြင့် ကစားသမား၇ဦးမှာ စိတ်အားထက်သန်စွာကြည့်လိုက်သည်။ သူမ၏အမူအယာမှ လိမ်နေပုံမရသော်လည်း သူမ၏ရှေ့မှာ ကစားသမား၇ဦးကိုကြည့်ရင်း မျက်လုံးထဲမှ မီးပွားများတောက်လောင်လာသည့်နှယ်။

"ဘာလို့ အစဥ်လိုက်မရပ်သေးတာလဲ"

ကြက်ဆင်ကြီးမှာ ဒေါသတကြီးဟိန်းဟောက်လိုက်ပြီး ကြွေပြားကိုဆောင့်နင်းလိုက်သည်။

"လူတိုင်းက ပိုးကောင်ကိုစားချင်နေတာပြီဆိုတာသိပါတယ်...ဒါပေမယ့် အစဥ်လိုက်ရပ်မှပေါ့..ဘာလို့စကားနားမထောင်ရတာလဲ...အမေကမင်းတို့ကို အစဥ်လိုက်ရပ်ဖို့ပြောနေတယ်လေ...ဘာတွေလုပ်နေကြတာလဲ"

ထန်မော့မျက်မှောင်ကျုံ့မိလျက် ပါးစပ်ကိုဟလိုက်စဥ်မှာပင် နံဘေးမှ အမျိုးသား၏အသံက ဦးဆုံးထွက်လာခဲ့သည်။

"အမေ ကျွန်တော်တို့ အမြန်စီလိုက်ပါ့မယ်...ဒါပေမယ့် အမေကကျွန်တော်တို့မေးခွန်းကို အရင်မဖြေတော့ဘူးလား"

ထိုသူမှာ မသိလျှင် ကြက်ဆင်ကြီး၏တကယ့် သားသမီးနှယ် အမေဟူသော အခေါ်အဝေါ်ကို အလွန်ပီပြင်နေခဲ့သည်။

ထန်မော့လှည့်ကြည့်လိုက်မိသည်။ အရပ်ရှည်ရှည်နှင့်ပိန်ပါးသော လူရွယ်မှာ ၄င်း၏ အမေဖြစ်သူကို လေးနက်စွာကြည့်နေခဲ့သည်။ ကြက်ဆင်ကြီးမှာ လိမ္မာသော ကလေးကြောင့် အနည်းငယ်စိတ်ပြေသွားဟန်ပင်။

"ကတော် မေမေ့ကလေးလေးက အခုမှမွေးလာတာဆိုတော့ ကမ္ဘာကြီးအကြောင်းကို သိချင်နေပြီပေါ့လေ"

ထိုလူရွယ်၏ မျက်နှာအရောင်မှာ တစ်ချက်မှ ပြောင်းလဲမသွားခဲ့ချေ။

"ဟုတ်ကဲ့ အမေ့ကိုမေးစရာရှိပါတယ်"

ကြက်ဆင်ကြီးမှာ ကြမ်းပြင်ပေါ်မှ ပိုးကောင်ကို ကြည့်လိုက်ပြီး ခေါင်းကိုပြန်မော်လျက် ဆိုလာခဲ့သည်။

"အမြန်မေးမှရမယ်နော် အမေကဒီနံစော်နေတဲ့ ပိုးကောင်ကို သတ်ရဦးမယ်.... ဒီကောင်က ဒီလောက်နံနေတာ မေမေ့ကလေးလေးတွေက ဘယ်စားချင်ပါ့မလဲ"

ထိုလူကရယ်လိုက်သည်။

"ဒါဆို မေးပြီနော်"

လူရွယ်မှာ ကြက်ဆင်ကြီးကို စိုက်ကြည့်လိုက်ကာ။

"ဂိမ်းကိုရှင်းရမယ့်နည်းလမ်းကဘာလဲ"

ထို့နောက် လေထုမှာ ချက်ချင်အေးခဲသွားခဲ့သည်။

ကြက်ဆင်ကြီးမှာ ပိုးကောင်အား ပိုနူးညံ့ပြီး အရသာရှိလာစေရန် သူမ၏အတောင်နှင့် တဖြတ်ဖြတ် ရိုက်နေခဲ့သည်။ ထိုမေးခွန်းကိုကြားလျှင် သူမ၏အတောင်တို့ကိုချလိုက်ပြီး ထိုလူရွယ်အား အကြံအစည်များပြည့်နေသော အပြုံးကြီးဖြင့်ကြည့်လာခဲ့သည်။ သူမ၏အပြုံးမှာ အရင်ကနှင့် အလွန်ကွာခြားလွန်းနေခဲ့သည်မှာ ကြက်သီးထစရာပင်။ သူမကဆိုလိုက်သည်။

"ကလေးလေး နောက်မေးခွန်းတစ်ခုကရော"

လူရွယ်မှာ တန့်သွားလျက် ကြက်ဆင်ကြီးအား ကြည့်နေသော မျက်လုံးများမှာ မှေးကျဥ်းသွားခဲ့သည်။ ကြက်ဆင်ကြီးမှာ မူ သူ့အားဆိုးရွားသော အပြုံးကြီးဖြင့် ပြုံးပြနေတုန်းပင်။

အမေနှင့်သားကြားမှာ လိုက်လျောညီထွေဖြစ်နေသောလေထုမှာ ချက်ချင်း တင်းကြပ်လာခဲ့လေသည်။

လူရွယ်ကပြုံးလိုက်သည်။

"မေးခွန်း၂ခုမေးရမှာလား"

ကြက်ဆင်ကြီးမှာ မျက်တောင်ခတ်လိုက်ပြီး

"ကတော် ဒီဟာကဒုတိယမေးခွန်း..."

"အစဥ်လိုက်အမှန်ကဘာလဲ"

လူရွယ်၏နောက်မှ အသံတစ်ခုထွက်လာခဲ့သည်။ လူရွယ်မှာလှည့်ကြည့်လိုက်ပြီး ထန်မော့ကိုမြင်လိုက်ရသည်။ ထန်မော့မှာ တည်ငြိမ်စွာပင်ဆိုလိုက်သည်။

"ဒါကဒုတိယမေးခွန်းပဲ"

ကြက်ဆင်ကြီး၏အကြည့်မှာ ထန်မော့နှင့် လူရွယ်ကြား တဖြတ်ဖြတ် ကူးလူးသွားခဲ့သည်။ ထို့နောက်ကြမ်းပြင်ပေါ်မှ ပိုးကောင်အား သူမ၏ကျောပေါ်သို့ ပစ်တင်လိုက်သည်။

"ဒီဂိမ်းကိုရှင်းဖို့နည်းလမ်းကို အခုလေးတင်ပဲ အနက်ရောင်မျှော်စင်က မပြောလိုက်ဘူးလား...ကလေးလေးတို့ ပိုးကောင်စားဖို့ သေချာစီကြ...အမေ့ကို အရှက်ရအောင် မလုပ်နဲ့... အဲဒါကဂိမ်းကိုရှင်းတဲ့နည်းလမ်းပဲ...ဒုတိယမေးခွန်းအတွက်ကတော့"

ကြက်ဆင်ကြီးမှာ ထန်မော့အားကြည့်လိုက်ပြီး ထန်မော့မှာလည်း ကြက်ဆင်ကြီးကို တည်ငြိမ်စွာပြန်ကြည့်လိုက်လေသည်။

ကြက်ဆင်ကြီးက ထန်မော့မျက်နှာပေါ်မှ မည်သည့်အမူအယာကိုမှ မမြင်ရချေ။ သူကစိတ်လည်းလှုပ်ရှားမနေသလို စိတ်လည်း ပူမနေခဲ့။ ၄င်းမှာ အနည်းငယ် စိတ်ပျက်စရာကောင်းလှသော်လည်း အမေတစ်ယောက်အနေနှင့် မိမိ၏ကလေးကို အားပေးရမည်သာ။

"ကလေးလေး မင်းကဥာဏ်ကောင်းတာပဲ...အမေက မင်းတို့ကို အစဥ်လိုက်အမှန်ကို အစတည်းကပြောပြီးသားပဲလေ မင်းတို့မှာ အစ်ကိုကြီးတွေ အစ်မကြီးတွေ ညီငယ်လေးတွေ မရှိလို့လား"

အမျိုးသမီးအသံတစ်ခုက ၀င်ပြောလာခဲ့သည်။

"ကျွန်မတို့ဂိမ်းထဲ၀င်လာတဲ့ အစဥ်လိုက်ကအမှန်လို့ပြောနေတာလား"

ကြက်ဆင်ကြီးက အသံပိုင်ရှင်မိန်းကလေးကို လှည့်ကြည့်လိုက်သည်။ ၄င်းက မိန်းကလေး၂ဦးထဲမှ တစ်ဦးပင်။ သူမကအလွန်စိတ်လှုပ်ရှားမိသွားသည်ကို သတိထားမိလျှင် ပါးစပ်ကို အမြန်ကာလိုက်လျက် သူ၏အဖော်လက်ကို ဆွဲကိုင်လိုက်မိသည်။ ကြက်ဆင်ကြီးမှာ သူမ၏ကျောပေါ်မှ ပိုးကောင်ကို အနေအထားပြောင်းလိုက်သည်။

"ကလေး မင်းက သိပ်လောဘကြီးတာပဲ... မင်းတို့က မေးခွန်း၂ခုပဲမေးလို့ရမယ်လေ...ဒါပေမယ့် အမေမင်းတို့ကို အပြစ်မတင်ပါဘူး... မင်းတို့အစဥ်လိုက် ကောင်းကောင်းစီရင်ရပြီ"

ကြက်ဆင်ကြီးကပြုံးလိုက်ပြီး နူးညံ့သော အသားစများအပေါ်ဖိနင်းလိုက်လျှင် ထိုမိန်းကလေးမှာ ကြောက်ရွံ့စွာ ခေါင်းညိတ်လာခဲ့သည်။

သွေးများနှင့် အသားစများပြန့်ကျဲနေသော နေရာတွင် ရပ်လျက် ကြက်ဆင်ကြီးမှာ သူမ၏ ကလေး၇ယောက်ကို ကြည့်လိုက်သည်။ သူမက ကြင်နာစွာပြုံးလိုက်သည်။

"အမေကဒီပိုးကောင်ကြီးကိုရှင်းရဦးမယ် ကတော် ကလေးတို့ ၁နာရီအတွင်း စီထားနော်"

ဘယ်သူမှဘာမှမဆိုကြချေ။

သေးငယ်သော အနက်ရောင်မျက်လုံးများထဲ အလင်းရောင်တစ်ခုဖြတ်ပြေးသွားပြီးနောက် သူမမှာ သီချင်းကိုပျော်ရွှင်စွာ ညည်းရင်းနောက်လှည့်ကာ ထွက်သွားခဲ့လေသည်။

"ချစ်စရာကြက်ပေါက်ကလေး၇ကောင်ရယ် ဆိုးရွားတဲ့ ပိုးစိမ်းကောင်ရယ် ကလေးလေးတွေက ပိုးစိမ်းကောင်ကို စားချင်တယ် အမေက..."

ရုတ်တရက်သူမမှာ အခုလေးတင် စကားပြောလိုက်သော မိန်းကလေးကိုလှည့်ကြည့်လိုက်ကာ..

"အမေကတော့ ကြက်ပေါက်ကလေးကို စားမယ်"

မိန်းကလေးမှာ ကြောက်ရွံ့မှုကြောင့်တုန်ယင်သွားခဲ့သည်။

ကြက်ဆင်ကြီးမှာ ထိုမိန်းကလေးကို ထူးဆန်းသောအပြုံးကြီးဖြင့်ပြုံးပြလိုက်သည်။ ထို့နောက်ထူးဆန်းသော သီချင်းကိုညည်းလျက် အသားတန်းမှ ထွက်သွားတော့သည်။

ကြက်ဆင်ကြီးထွက်သွားသည်နှင့် မိန်းကလေး၂ဦးသား ၁ဦးကို၁ဦး ကြောက်ရွံ့စွာ တိုးဖက်ထားကြတော့သည်။ ထန်မော့နှင့် ဖူ၀မ်သော်မှာမူ တစ်ဦးကိုတစ်ဦးကိုကြည့်ရင်း တွက်ဆမှုတချို့ရင်ထဲမှ ကြီးထွားလာကြသည်။ ထိုစဥ် သူတို့ရှေ့မှ လူ၏အသံကိုကြားလိုက်ရလေသည်။

"ကြည့်ရတာ ငါတို့လူစီဖို့အချိန်၁နာရီရတယ်ထင်တယ် ဒီအချိန်ကိုသုံးပြီး အချင်းချင်းမိတ်ဆက်ကြတာပေါ့ မင်းတို့ကို ဘယ်လိုခေါ်ရမလဲ"

ထန်မော့ထိုလူကိုလှည့်ကြည့်လိုက်မိသည်။

လူရွယ်မှာ အလွန်တည်ငြိမ်လျက်။ ကြက်ဆင်ကြီးကသူ့ကို ထေ့ငေါ့စဥ်ကတောင် အမူအယာတစ်ချက်မှ ပျက်ယွင်းမသွားခဲ့ချေ။ သူ၏မျက်လုံးများက ထန်မော့နှင့် ဖူ၀မ်သော်ထံတွင် စွဲမြဲနေခဲ့သည်။ သို့သော် ထိုမျက်လုံးများထဲ ဆိုးရွားသောရည်ရွယ်ချက်မျိုး မပါရှိချေ။

ထန်မော့ကပေါ့ပါးစွာဆိုလိုက်သည်။

"ကျွန်တော့်နာမည်က ဗစ်တာ သူကထန်ချီ"

ထိုအမည်လွှဲကိုကြားလျှင် ဖူ၀မ်သော်မှာ ထန်မော့ကို အဓိပ္ပါယ်ပါပါတစ်ချက်ကြည့်လိုက်သော်လည်း ဘာမှမဆိုချေ။

လူရွယ်မှာလည်း စိတ်ဆိုးပုံမရပဲ ရယ်လိုက်သည်။

"ငါက နန်ကျင်းဗျူဟာအဖွဲ့က ရှောင်ကျီထုံးပါ...သူတို့၂ယောက်က ငါ့အသင်းဖော် ရှောင်ရှောင်းနဲ့ နင်းနင်း"

သူကရွှေ၀ါရောင်ဆံပင်နှင့် ကောင်လေးနှင့် ဆံပင်ရှည်ရှည်နှင့်အမျိုးသမီးကို ညွှန်ပြလာသည်။ လူ၂ဦးက ခေါင်းညိတ်ပြလာပြီးနောက် ရှောင်ကျီထုံးကဆိုလိုက်သည်။

"ဒီကလေးမ၂ယောက်ကတော့ အခြေအနေကို သတိမထားမိလိုက်တာာလေ သူတို့က တားမြစ်နယ်မြေကို သတိမထားမိပဲ ၀င်လာကြတာ"

သူက ကျန်မိန်းကလေး၂ဦးကို ရည်ညွှန်းနေခြင်းဖြစ်သည်။

ထိုမိန်းကလေး၂ဦး၏ စိတ်ပိုင်းဆိုင်ရာအရည်အသွေးမှာ ရှောင်ကျီထုံးတို့ ၃ဦးနှင့် ထန်မော့နှင့်ဖူ၀မ်သော်တို့ထက် နိမ့်ပါးလှကြောင်း ပြောနေစရာပင် မလိုချေ။ သူတို့မှာ ကြောက်ရွံ့မှုတို့ဖြင့် ဖြူလျော်နေခဲ့ပြီး ဆံပင်တိုတိုနှင့် မိန်းကလေးက အရင်ဆုံးဆိုလာခဲ့သည်။

"အာ..ကျွန်မကရှောင်ယွမ်..သူကယွမ်ယွမ်ပါ...ကျွန်မတို့လွန်ခဲ့တဲ့၂ပါတ်ကမှ ဂိမ်းထဲဆွဲသွင်းခံရပြီး မနေ့ကမှပြန်ထွက်လာတာ...တားမြစ်နယ်မြေအသစ်အကြောင်း မသိလိုက်ဘူး"

ရှောင်ကျီထုံးကဆိုလိုက်သည်။

"မထူးဆန်းတော့ပါဘူး"

ဖူ၀မ်သော်မှာ လေးနက်သောအသံဖြင့်မေးလိုက်သည်။

"တားမြစ်နယ်မြေကဘာလဲ"

ရှောင်ကျီထုံးကရှင်းပြလာခဲ့သည်။

"မင်းတို့နန်ကျင်းကိုရောက်လာတော့ တစ်ခြားနေရာတွေနဲ့ ကွဲပြားမှန်း သတိထားမိမှာပေါ့... မင်းတို့ရဲ့ စကားသံအရ ကျင်းစုဘက်ကဖြစ်မယ်ထင်တယ်"

သူကထန်မော့နှင့် ဖူ၀မ်သော်ကို ကြည့်လိုက်ကာ

"ပေကျင်းကလား...ပေကျင်းမှာတော့ အခြေအနေဘယ်လိုလဲမသိဘူး ဒီနန်ကျင်းမှာတော့ တစ်ယောက်ယောက်က အဖွဲ့အစည်းတစ်ခုထောင်ပြီး မြို့ထဲမှ စည်းမျည်းတွေထုတ်ဖို့ဆုံးဖြတ်လိုက်တယ်လေ"

"အဲဒီလူကခင်များလား"

ထန်မော့ကမေးလိုက်သည်။

ရှောင်ကျီထုံးကပြုံးသည်။

"သေချာပေါက်မဟုတ်ဘူးပေါ့... ငါကအဲဒီအဖွဲ့အစည်းကမဟုတ်ဘူး... သူတို့မှာလုပ်စရာတွေ တအားများတယ်...နန်ကျင်းမှာရှိသမျှ ဂိမ်းတွေကိုရှာရတာရော... အနက်ရောင်မျှော်စင်အကြောင်းတွေကို စုံစမ်းရတာရော.. ဂိမ်းကိုရှင်းဖို့ဗျူဟာတွေကိုရှာပြီး လူတိုင်းကိုမျှဝေပေးပြီးတော့ အနက်ရောင်မျှော်စင်ဂိမ်းတွေကို အတူတူဖြတ်ကျော်နိုင်အောင်ဆိုပြီး ဘာမှသိပ်မတတ်တဲ့အရံကစားသမားတွေကို ကူညီနေတာ"

ထို့နောက်သူကတန့်သွားပြီး နောက်မှ မိန်းကလေး၂ဦးကိုလှည့်ကြည့်လိုက်သည်။

"မင်းတို့ကအရံကစားသမားတွေလား...အထင်မလွဲပါနဲ့ ငါလည်း အရံကစားသမားပါပဲ"

ဆံပင်တိုမိန်းကလေးမှာ ခေါင်းကို အလျင်အမြန်ခါယမ်းလျက်

"ခေါင်းဆောင် ရှောင်း အထင်လွဲစရာမရှိပါဘူး"

'ခေါင်းဆောင်ရှောင်း'ဟုခေါ်သံကိုကြားလျှင် ထန်မော့မျက်ခုံးပင့်လိုက်မိလေသည်။ ဖူ၀မ်သော်သည်လည်း ထိုလူရွယ်အား စိတ်၀င်စားနေပုံပင်။

ရှောင်ကျီထုံးကဆိုလိုက်သည်။

"နန်ကျင်းကကိစ္စတွေကိုနားလည်ဖို့ဆို အချိန်အတော်ယူရမှာ...ဂိမ်းကိုပဲ အာရုံပြန်စိုက်ကြတာပေါ့"

ရှောင်ကျီထုံး၏ အသင်းသား၂ဦးမှာ အလွန်နာခံတတ်လေသည်။ ရွှေရောင်ဆံပင်နှင့်ကောင်လေးနှင့် ဆံပင်ရှည်မိန်းကလေးမှာ သူ၏ဘေးတွင် ရပ်လျက် သူစီစဥ်သမျှကို ယုံကြည်မှုအပြည့်နှင့်စောင့်နေခဲ့သည်။ သို့တိုင်အောင် ကျန်မိန်းကလေး၂ဦးကပင် ထိုလူရွယ်အား အလွန်အားကိုးနေသည့်အလား။ ထိုမိန်းကလေး၂ဦးမှာ ရှောင်ကျီထုံးအား ဂိမ်းထဲ၀င်လာပြီးမှ သိခြင်းဖြစ်သည့်တိုင် အဘယ်ကြောင့်ဤမျှ ယုံကြည်နေရပါသနည်း။

၄င်းကထန်မော့ကို အလွန်စိတ်၀င်စားစေသည်။

ရှောင်ကျိထုံးကဆိုလိုက်သည်။

"အရင်ဆုံး ဂိမ်းအကြောင်းပြောရအောင်...ကြက်ဆင်ကြီးကအဲလောက်ထိရိုးရှင်းမနေသလို ငါတို့ကိုလည်း သူ့ကလေးလို့ တကယ်မှတ်ယူထားတာမဟုတ်ဘူး...ဒီဟာကအနက်ရောင်မျှော်စင်ဂိမ်းပဲ သူလည်း ငါတို့ကို စားချင်နေလိမ့်မယ်... ဒီပေါ်က အသားစတွေလိုပေါ့"

အသားစများမှာ မွစာကြဲလျက် တစ်ခုနှင့်တစ်ခုရောနှောနေပြီ ဘယ်ဟာက ဘယ်သူ၏အသားစဆိုသည်ကိုတောင်ပြောဖို့ခက်ခဲလှသည်။

ကြက်ဆင်ကြီးမှာ ရှောင်ကျီထုံးမှ သူမကိုမေးခွန်းမေးလာစဥ်က အကြံဆိုးများနှင့် ပြည့်နှက်နေခဲ့သည်။ ဤသည်မှာ ဂိမ်းတစ်ခုဖြစ်ကာ ကြက်ဆင်ကြီးမှာလည်း ဂိမ်း၏ ဘော့စ်သာဖြစ်လေသည်။ အကယ်၍ သူမသာ ကစားသမားများအား အမှန်တကယ် သူ၏ကလေးဟု သတ်မှတ်ပါက ဤအသားစများတောင်ရှိနေမည်မဟုတ်ချေ။

ရှောင်ကျီထုံး ၏အတွေးများမှာ ထန်မော့နှင့်တိုက်ဆိုင်နေသည်ဖြစ်၍ သူထုတ်မပြောလိုက်တော့ချေ။ သူကတစ်ဖက်လူဆက်ပြောလာသည်ကိုသာနားထောင်နေခဲ့သည်။

"ငါတို့မှာ တန်းစီဖို့ ၁နာရီအချိန်ရှိတယ်...ငါတို့မေးခွန်းကိုအရင်မေးပြီးရင် တန်းစီရမယ်...တန်းစီတာမှားရင် သိမ်းငှက်ကြီးက ကြက်ပေါက်လေးတွေကို ဖမ်းတဲ့ဂိမ်းပွင့်လာပြီး အဲဒါလည်း ၁နာရီကြာမှာပဲ"

ဆံပင်တိုမိန်းကလေးကတွေးလိုက်သည်။

"ခေါင်းဆောင်ရှောင်း ဆိုလိုတာက ကျွန်မတို့က အဲဒီသိမ်းငှက်ကြီးဖမ်းတာကို ၁နာရီတိတိရှင်သန်နိုင်ရင်ရပြီလို့လား"

သူမကခတ္တတန့်သွားလျက် ထပ်မံစဥ်းစားလိုက်သည်။

"ကျွန်မတို့က အလှည့်တိုင်း မေးခွန်း၂ခုမေးရမယ် အခုလေးတင် ခေါင်းဆောင်ရှောင်းက သူ့ကို ဂိမ်းကိုရှင်းရမယ့်နည်းလမ်းကိုမေးလိုက်ပေမယ့် သူကမဖြေချင်လို့ ဒုတိယမေးခွန်းကိုတောင်းတာပဲ... ဒီတော့ သူကမေးခွန်း၂ခုမှာ သူဖြေချင်တဲ့ တစ်ခုကိုရွေးလို့ရတယ်ပေါ့ "

သူမ၏အဖော်ကဆိုလာသည်။

"မဟုတ်ဘူးရှောင်ယွမ်...အဲလိုဆိုမှတော့ သူကမေးခွန်း၂ခုလုံးကို ဘာလို့ဖြေလိုက်မှာလဲ"

ရှောင်ကျီထုံးကရယ်လိုက်သည်။

"သူတွေးတာမှန်ပါတယ်... လေးခုမြောက်စည်းမျဥ်းအရ ကြက်ဆင်ကြီးက အနည်းဆုံး မေးခွန်းတစ်ခုကို အမှန်အတိုင်းဖြေရမယ်...လိမ်လို့မရဘူး"

ထိုမိန်းကလေးကမ၀ံ့ရဲစွာနှင့်ဆိုလာသည်။

"သူက၂ခုလုံးဖြေလိုက်တာမဟုတ်ဘူးလား"

"အနက်ရောင်မျှော်စင်ကသူ့ကို တစ်ခုကိုပဲ အမှန်အတိုင်းဖြေဖို့ပြောထားတာ...သူက၂ခုလုံးကိုဖြေပြီး တစ်ခုကိုလိမ်ထားရင်လည်း စည်းမျည်းကို ချိုးဖောက်တာမဟုတ်ဘူးလေ"

လူတိုင်းကထန်မော့ကိုကြည့်လိုက်ကြသည်။

ထန်မော့နှင့် ဖူ၀မ်သော်မှာ လူပိုများနှင့်တူကာ ၀င်ပြောသည်ကရှားသည်။ သူတို့မှာ လူသစ်များလည်းဖြစ်ကာ တစ်ဦးနှင့်တစ်ဦး သိသည်မှာ ၁နာရီပင်မပြည့်သေးချေ။ ထိုမိန်းကလေး၂ဦးကသူတို့ကို လျစ်လျူရှူထားခဲ့သည်။ ဆံပင်တိုမိန်းကလေးမှာ သူ၏စကားကိုကြားလျှင် တွေးတောနေသောအမူအယာမျိုးပြုလုပ်လာခဲ့သည်။ ရှောင်ကျီထုံးကမူ ရယ်မောလိုက်သည်။

"ဟုတ်တယ်...သူပေးတဲ့အဖြေ၂ခုထဲမှ တစ်ခုကအမှန်တစ်ခုကအမှားဖြစ်နိုင်တယ်။"

လူတိုင်းက အတွေးများသွားကြရသည်။ ထန်မော့ဆိုလိုက်သည်။

"ခုနားကကြက်ဆင်ကြီးကို ဗုံးနဲ့ခွဲတာရော ဓါးနဲ့ထိုးတာရော ခင်များအကြံလား"

တစ်ခါမှစကား၀င်မပြောသော ဆံပင်ရှည်မိန်းကလေးမှာ ရွှေရောင်ဆံပင်နှင့် ကောင်လေးကို ထိုးပြလာသည်။

"ရှောင်ရှောင်းလုပ်တာ"

ထိုကောင်လေးမှာ ဂုဏ်ယူစွာဆိုလာခဲ့သည်။

"ခေါင်းဆောင်ကသေချာပြင်ဆင်ထားပြီးတော့ အကူပစ္စည်းတွေအများကြီးယူလာတယ်လေ... ဒီဂိမ်းက စွမ်းရည်သုံးခွင့်ပိတ်ထားမယ်လို့တော့ ထင်မထားဘူး...သောက်ကြက်ဆင်ကြီး မုန်းလိုက်တာ"

ထိုကောင်လေးမှာ အလွန်ဒေါသထွက်နေပုံပင်။

ရှောင်ကျီထုံးကရှင်းပြလာခဲ့သည်။

"ငါတို့ဒီမနက်ကမှ ဂိမ်းထဲ၀င်လာတာ... ပြီးတော့မှ စွမ်းရည်တွေသုံးမရတာကို သိသွားတာလေ...ကံကောင်းချင်တော့ အကူပစ္စည်းတွေတော့ အများကြီးယူလာခဲ့တယ်...ငါတို့၃ယောက် စူပါမားကတ်ထဲ မ၀င်ခင်ကတည်းက ကြင်ဆင်ကြီးကိုသတ်ဖို့ကြိုးစားကြည့်နေတာ... ရလဒ်ကတော့ မြင်တဲ့အတိုင်းပဲ...သူကိုသတ်ဖို့ကြိုးစားတယ်လို့ ယူဆတာနဲ့ မိုးကြိုးပစ်ချခံရတာပဲ... ကြက်ဆင်ကြီး မင်းတို့၂ယောက်ကိုသွားခေါ်နေတုန်းက အဲဒီထောင်ချောက်တွေကို ဆင်ထားတာ...အကူပစ္စည်းတွေကိုပဲ ချထားတာဆိုတော့ သူ့ကိုသတ်ဖို့ကြိုးစားတာမျိုး မဖြစ်တော့ဘူးလားလို့ပေါ့ အနည်းဆုံးတော့ သူ့ကို အနာတရဖြစ်သွားမလားလို့ လုပ်ကြည့်ခဲ့တာ"

ထန်မော့ပြန်တွေးလိုက်သည်။

"တကယ်တော့ဒဏ်ရာကတော့ရလောက်ပါတယ်

ဒါပေမယ့်ထောင်ချောက်အသက်၀င်တာနဲ့ 'မိဘကျေးဇူးကန်းသူ'သက်ရောက်မှုလည်း ပွင့်လာတာပဲ"

ကြက်ဆင်ကြီးဗုံးခွဲခံရစဥ်က အနက်ရောင်မျှော်စင်က ဘာမှမတုန့်ပြန်ခဲ့။ သို့သော် ဓါးမှာ သူမ၏ရင်ဘတ်ကို ထိုးဖောက်ခါနီးတွင် အနက်ရောင်မျှော်စင်မှာ ထိုကောင်လေးအား အမေကိုပြန်သတ်မှုကြောင့် အပြစ်ပေးခဲ့လေသည်။

🪩

Prev Next