အပိုင်း ၇၇

၇၀ ခုနှစ်က မင်းခင်ပွန်းဆီ ကံကောင်းခြင်းတွေ ယူဆောင်သွားပါ

အပိုင်း ၇၇ - နှစ်သစ်ကူး၌ ၀င်ငွေရှာခြင်း၊ အိမ်ပြန်လာပြီ

မျက်စိတစ်မှတ်အတွင်း ဖေဖော်၀ါရီလသို့ရောက်လာကာ တရုတ်နှစ်သစ်ကူး ရောက်တော့မည်ဖြစ်သည်။ ဒီနှစ်တွင် ဟန်အိုက်ကောက အားလပ်ရက်မရသလို ကလေးတွေလည်း ငယ်သေးတာကြောင့် အမေဟန်နှင့် တိုင်ပင်ကြည့်ပြီးနောက်တွင် ရွာမပြန်တော့ဘဲ တပ်ထဲမှာသာ နေဖို့ ဆုံးဖြတ်လိုက်တော့သည်။ အချိန်ကြရင် စာပို့ပြီး စတုတ္ထလေးကိုပဲ နှစ်သစ်ကူးအတွက် ဒီကိုခေါ်လိုက်တော့မယ်။

စုယွဲ့ ချက်ချင်းဆိုသလို ဟန်အိုက်မင်ရဲ့ ကျောင်းကိုစာပို့လိုက်သည်။ ဒါမှ ချက်ချင်းလာလို့ရမှာဖြစ်သည်။ 

နှစ်သစ်ကူးကို မိသားစုကြီးတစ်ခုအနေနှင့် ဖြတ်သန်းကြရမှာဖြစ်တာကြောင့် ပြင်ဆင်စရာများစွာ ရှိသည်။ စုယွဲ့က ရှိသမျှလက်မှတ်များကိုယူကာ ထောက်ပံ့ရေးနှင့် စျေးကွက်ရှာဖွေရေးဌာနကိုသွားပြီး အသားများ၀ယ်ကာ အသားခြောက်များလုပ်ဖို့ တွေးထားသည်။ ရွာသားတွေဆီမှလည်း ကြက်သားတွေကို စျေးကြီးပေး ၀ယ်လာသေးသည်။ တစ်ခုကို နှစ်သစ်ကူးမှ ချက်ပြုတ်စားဖို့ သိမ်းထားကာ အခြားအသားများကို ဆားနယ်ပြီး သိမ်းထားမည်ဆိုပါက နှစ်ကူးအချိန်ကြလျှင် ပြတ်လပ်မည် မဟုတ်တော့ချေ။

ထိုသည်များအပြင် စုယွဲ့က သကြားလုံးများနှင့် နေကြာစေ့များကိုပါ လုပ်ထားသေးသည်။ ထိုနှစ်ခုက တရုတ်နှစ်သစ်ကူးအတွက် မရှိမဖြစ်လိုအပ်သည်။ ထိုအရာများက ၀မ်ရှန့်မှာ၀ယ်လျှင် အလွန်စျေးကြီးကာ အရသာကလည်း သိပ်မကောင်းသည့်အပြင် ကန့်သတ်ချက်ရှိသဖြင့် တစ်ယောက်လျှင် အနည်းကျဥ်းသာ ၀ယ်ယူနိုင်သည်။ အဲ့လိုဆိုမှတော့ သူမကိုယ်တိုင်ပဲ လုပ်တော့မှာပေါ့။

စုယွဲ့ သကြားလုံး သုံးမျိုးလုပ်လိုက်သည်။ အဖြူရောင်တော်ဖီနှင့်ဆင်တူတဲ့ နို့အရသာ၊ ပြောင်းဖူးအရသာနှင့် မာ့ရှ်မယ်လိုအရသာတို့ပင် ဖြစ်သည်။ အပြင်ဘက်က ပျော့အိအိဖြင့် ဖယောင်းလိုခံစားချက်ကိုပေးကာ အထဲတွင်တော့ အချိုရည်လေးထည့်ထားသဖြင့် အလွန်စားလို့ကောင်းသည်။ ဒါက သူမ အသစ်စဥ်းစားထားသည့် အကြံပင်ဖြစ်သည်။ လုပ်ပြီးနောက်တွင် အမေဟန်ကလည်း စားကြည့်ပြီး မှတ်ချက်ပေးခဲ့သည်။ " ဒါတွေက ၀မ်ရှန့်မှာ ရောင်းတာတွေထက် စားလို့ကောင်းတယ်။ ယွဲ့ယွဲ့သာ ဒါတွေကိုရောင်းမယ်ဆိုရင် တော်တော်လေး ရောင်းကောင်းလောက်တယ်။ ကျိန်းသေပေါက် ၀ယ်စားကြမှာပဲ။"

အမေဟန်ရဲ့ စကားကြောင့် စုယွဲ့ အကြံရသွားခဲ့သည်။ ဒါတွေကို ၀မ်ရှန့် စျေးကွက်ရှာဖွေရေးမှာ မရောင်းနိုင်ရင်တောင် နှစ်ကိုယ်ကြားရောင်းလို့ရသေးတယ်လေ။ အဲ့လိုဆို ထောပတ်ကိတ်လိုပဲ ရောင်းလို့ရလောက်ကာ နှစ်သစ်ကူးမှာ ၀င်ငွေပိုရနိုင်တယ်။

ထိုကိစ္စအတွက် ရွှီးချန်ကို အကူအညီတောင်းကြည့်ရမည်။ ရွှီးချန်က မိတ်ဆွေအပေါင်းအသင်းများကာ သူမနှင့်ရင်းနှီးသူတွေကလည်း ပိုက်ဆံတက်နိုင်ကြသူတွေဖြစ်သည်။ သကြားလုံးတွေနဲ့ နေကြာစေ့တွေက အရသာရှိတယ်ဆိုတာကို သိသွားကြတာနဲ့ ၀ယ်မယ့်သူတွေ ရှိလာမှာပဲလေ။

ထိုသို့တွေးပြီး စုယွဲ့ နေကြာစေ့များကို အိုးထဲထည့်၍ လှော်လ်ိုက်ကာ အရသာမှုန့်များထည့်ပြီး ပြင်ဆင်လိုက်သည်။ နေကြာစေ့များကို ထောပတ်အရသာနှင့် အစပ်အရသာဟူ၍ နှစ်မျိုးလုပ်ထားကာ ၀မ်ရှန့်တွင် ရောင်းသည့်အရာများထက် ပို၍လည်းစားကောင်းသဖြင့် တစ်ခါစားလျှင် အစေ့တစ်ရာလောက် တစ်ထိုင်တည်း စားနိုင်လောက်သည်။ 

ထို့အပြင် နှစ်ကူးအတွက် မြေပဲကြော်များကိုလည်း ရောင်းနိုင်မယ်ထင်၍ စုယွဲ့ ရှောင်း၀မ်ရွာသို့သွားကာ ရွာသားများထံမှ မြေပဲများကို ၀ယ်လာလိုက်သည်။ အိမ်ပြန်ရောက်သောအခါ ငရုပ်သီးမှုန့်ထည့်ကြော်လိုက်ပြီး မြေပဲအစပ်ကြော်များ လုပ်လိုက်သည်။ အတော်လေးမွှေးကာ အရသာလည်းရှိလှပြီး သောက်စရာတစ်ခုခုနှင့် တွဲဖက်စားဖို့ သင့်တော်သည်။ နှစ်သစ်ကူးလာလည်ကြတဲ့ ဆွေမျိုးတွေကို ၀ိုင်တစ်ခွက်နဲ့ မြေပဲအစပ်ကြော်သာ တွဲဖက်ချထားပေးလိုက်ပါက လုံး၀ပြီးပြည့်စုံသွားမှာပင်။ 

သကြားလုံး၊ နေကြာစေ့နှင့် မြေပဲကြော်များကို ပြင်ဆင်ပြီးသောအခါ နည်းနည်းစီထုပ်ပိုးလိုက်ပြီး ညနေခင်းတွင် စုယွဲ့က ရွှီးချန်တို့အိမ်ကို ယူသွားလိုက်သည်။ 

စုယွဲ့က လက်ထဲ အထုပ်တွေကိုင်ပြီး ရောက်လာသည်ကို မြင်သောအခါ ရွှီးချန်က ပြုံးပြီးမေးခဲ့သည်။ " အရသာရှိတာလေးတွေ လာပို့ပြန်တာလား " တစ်ခုခုလုပ်ပြီးတိုင်း စုယွဲ့က လာပို့တက်သည်။ အရင်ကတော့ အားနာခဲ့သော်လည်း ယခုတော့ ကျင့်သားရသွားပြီဖြစ်သည်။ နီနီလေးက အခုဆို စုယွဲ့ကို ပိုတောင် ခင်တွယ်နေပြီပင်။

ယခုတွင်လည်း နီနီလေးက စုယွဲ့ကိုမြင်သည်နှင့် လက်ထဲမှ အရုပ်များကို ပစ်ချထားခဲ့ကာ ပြေးဖက်ခဲ့သည်။ " ဒေါ်လေးယွဲ့ ရောက်လာတာပဲ "

ရွှီးချန်က ခေါင်းတစ်ခါခါဖြင့် ပြုံးကာပြောသည်။ " အစ်မသမီးက အမေထက် စုယွဲ့ကိုတွေ့ရတာကို ပိုပျော်နေတာ။ မသိတဲ့သူဆို ညီမကို အမေလို့ထင်ကုန်ကြမှာပဲ"

စုယွဲ့လည်း တခစ်ခစ်ရယ်ကာ လက်ထဲမှ မုန့်ထုပ်လေးတွေကို မြှောက်ပြပြီး ပြန်စခဲ့သည်။ " နီနီလေးက ညီမ ဘာကိုင်လာလဲကိုတောင် စိတ်မ၀င်စားတော့ဘူး။ ကြည့်ရတာ ကလေးတွေက ညီမရဲ့ ညှို့ဓာတ်အောက်မှာ ကျရှုံးကုန်ကြတာထင်တယ် "

စုယွဲ့ စကားကြောင့် ရွှီးချန်သာမကဘဲ ပုံမှန်အားဖြင့်  ရယ်လေ့ရယ်ထမရှိသော ခေါင်းဆောင်ယွီသည်ပင် လိုက်ရယ်ခဲ့သည်။

လက်ထဲကအထုပ်တွေကို ရွှီးချန်ဆီ ပေးလိုက်သည်။ " နှစ်သစ်ကူးရောက်တော့မှာမို့လို့ အစ်မတို့ စားကြည့်ရအောင် လုပ်ထားတဲ့ သကြားလုံးတွေ၊ နေကြာစေ့တွေနဲ့ မြေပဲကြော် နည်းနည်းလောက် ထည့်လာတာ။ "

" အားလုံးကို ကိုယ့်ဘာသာလုပ်ထားတာလား? အစ်မက ထောက်ပံ့ရေးဌာနကနေ သွား၀ယ်မလ်ို့ စဥ်းစားထာတာ။ အခုတော့ အလုပ်ရှုပ်သက်သာသွားတာပေါ့။ " ရွှီးချန်က စုယွဲ့ လက်ရာကို ယုံကြည်သည်။ စုယွဲ့ လုပ်သမျှက စားလို့ကောင်းသည်ကိုသိ၍ ချက်ချင်းပင် စက္ကူထုပ်ကိုဖြည်ကာ သကြားလုံးတစ်လုံးကိုယူလိုက်ပြီး မျက်လုံးတောက်တောက်လေးများဖြင့် ကြည့်နေသော နီနီလေးကို ပေးလိုက်သည်။ သူမကိုယ်တိုင်လည်း တစ်ခုယူကာ စားကြည့်ခဲ့သည်။ " ဒါက ဘယ်လိုသကြားလုံးမျိုးလဲ။ အရင်က တစ်ခါမှ မစားဖူးဘူး။ စားလို့ကောင်းလိုက်တာ။ "

နီနီလေးကလည်း ပြောခဲ့သည်။ " အမေ ဒီသကြားလုံးက အရမ်းစားလို့ကောင်းတယ် သမီးကို ထပ်ပေးပါလား"

ရွှီးချန်က နောက်တစ်လုံးပေးလိုက်ကာ ပြောခဲ့သည်။" အိပ်ရာ၀င်ခါနီးပြီမို့လို့ ထပ်မရတော့ဘူးနော်၊ မနက်ဖြန်မှ စားတော့။ " 

နီနီလေးက စိတ်ပျက်သွားသည့်ဟန်ပြုကာ သကြားလုံးတွေကိုသာ စိုက်ကြည့်နေခဲ့သည်။

သမီးဖြစ်သူ၏ စားချင်သေးတယ်ဟူသော အကြည့်များကို လျစ်လျုရှုလိုက်ကာ နေကြာစေ့နှင့် မြေပဲများပါသော စက္ကူထုပ်ကို ဖွင့်ပြီး မြည်းကြည့်ခဲ့သည်။ ဘေးတွင် ထိုင်နေသော ခေါင်းဆောင်ယွီကိုလည်း လက်တစ်ဆုပ်စာ ထည့်ပေးကာ ပြောခဲ့သည်။ " ရှင်လည်း မြည်းကြည့်လေ " 

ခေါင်းဆောင်ယွီက သရေစာများကိုမကြိုက်သော်လည်း ဖရဲစေနှင့် မြေပဲများကိုတော့ စားသဖြင့် ယူကာ မြည်းကြည့်ခဲ့သည်။ မြည်းကြည့်ပြီးနောက် စုယွဲ့ကို အံ့သြတကြီး ကြည့်လိုက်မိသည်။ ဒီလောက် စားကောင်းမယ်လို့ သူ ထင်မထားခဲ့ဘူး။ 

ရွှီးချန်က ပျော်နေသည့်ဟန်ဖြင့် မေးခဲ့သည်။  " ဘယ်လိုလဲ။ စားလို့ကောင်းတယ်မလား " 

ခေါင်းဆောင်ယွီ ခေါင်းညိတ်ပြလိုက်သည်။ တကယ် အရသာရှိတယ်၊ ပြီးတော့ ရပ်တောင် မရပ်ချင်ဘူး။ ထို့ကြောင့် ခဏအကြာ သူ့လက်ထဲမှ လက်တစ်ဆုပ်စာက စားကုန်သွားပြိီဖြစ်သည်။ မြေပဲကြော်ဆိုလျှင် သောက်တက်တဲ့သူဆိုပါက အမြည်းအနေနှင့် ကောင်းလောက်သော သရေစာပင်ဖြစ်သည်။ 

ခေါင်းဆောင်ယွီရဲ့ အမူအရာကိုကြည့်ကာ သူလည်းကြိုက်သည်ကို ရွှီးချန် သဘောပေါက်လိုက်သည်။ ခေါင်းဆောင်ယွီက ထိုသို့သဘောကျသည်မှာ ရှားသဖြင့် ရွှီးချန်လည်း စိတ်ဆုံးဖြတ်ကာ စုယွဲ့ကို မေးလိုက်မိသည်။ " ဒါတွေက စားလို့တော်တော်ကောင်းလို့ အစ်မတို့မိသားစုအတွက် ၀ယ်ချင်လို့။ ပြီးတော့ ယောက္ခမအိမ်၊ မိဘအိမ်နဲ့ အဘိုးအတွက်ရောပဲ။ အဲ့လိုဆို အစ်မလည်း ထောက်ပံ့ရေးဌာနမှာ သွား၀ယ်စရာမလိုတော့ဘူး။ သူတို့ရောင်းတာတွေက ညီမလုပ်တာတွေလောက် စားမကောင်းဘူး။ အဲ့ဒါကြောင့် အစ်မဖို့ လုပ်ပေးမလား။ အစ်မ လက်မှတ်တွေနဲ့ ကုန်ကျစရိတ်ကို ပြန်ပေးမယ်လေ။ "

စုယွဲ့ရယ်လိုက်မိသည်။ သူမတောင် စမပြောရသေးဘူး၊ တစ်ဖက်က စကားစလာခဲ့သည်။ 

" ညီမလည်း အဲ့တာပဲပြောမလို့။ အစ်မရဲ့ အမျိုးတွေရော ဒီလိုမျိုးဟာလေးတွေ လိုချင်သေးလား မေးချင်လို့၊ လိုချင်ရင် ညီမ လုပ်ပေးမလို့လေ။ "

ရွှီးချန်က ချက်ချင်း လက်ခံလိုက်သည်။ " စုယွဲ့လုပ်တာတွေက စားလို့ကောင်းတော့ အစ်မရဲ့အမျိုးတွေလည်း စားကြည့်ပြီးရင် သေချာပေါက်၀ယ်ကြမှာ။ အဲ့လိုဆိုမှတော့ အစ်မလည်း ညီမဆီကနေ ယူပြီး အမေ့ဆီမှာ ထားထားလိုက်မယ်လေ။ အမေ့ဆီကနေ အခြားအမျိုးတွေကို ပြန်၀ယ်ခိုင်းလိုက်ပြီး အမေ့ကိုပဲ ပိုက်ဆံနဲ့ လက်မှတ်တွေကို လက်ခံခိုင်းလိုက်မယ်။ မဟုတ်ရင်တောင် အမေက အိမ်မှာပျင်းနေတာ။ "

စုယွဲ့လည်း အားမနာဘဲ သဘောတူလိုက်သည်။ " အဲ့လိုလည်း ရတာပဲ။ ပြန်ရောက်ရင် ညီမ ပြင်ထားလိုက်မယ်။ ဘယ်လောက်လောက် လိုလဲ။ "

ရွှီးချန်က တွက်ချက်ပြခဲ့သည်။ " သကြားလုံးနဲ့ နေကြာစေ့တွေက တစ်မိသာစုကို အနည်းဆုံး နှစ်ပေါင်၊ သုံးပေါင်လောက် ၀ယ်လောက်တယ်၊ မြေပဲတွေက တစ်မိသားစုကို နှစ်ပေါင်လောက်ဆိုတော့ အစ်မရဲ့ အမျိုးတွေ မိသားစုအရေအတွက်နဲ့ဆိုရင် ...အင်း သကြားလုံးက ပေါင်သုံးဆယ်လောက်၊ နေကြာစေ့က ပေါင်ငါးဆယ်လောက်နဲ့ မြေပဲတွေက ပေါင်သုံးဆယ်လောက် ပြင်ထားရလောက်တယ်။ "

" အဲ့လောက် အများကြီး? " စုယွဲ့က ပမာဏကြောင့် စိုးရိမ်သွားမိသည်။ " အဲ့လောက်များတာ မကုန်ရင် အစ်မအမေရဲ့လက်ထဲ သောင်တင်နေတော့မှာပေါ့၊ ဒီလိုလုပ်ပါလား ဒေါ်လေးက ဘယ်လောက်နဲ့ရောင်းမှာလဲ ဘယ်လောက်လိုချင်တာလဲပြောပြီး ပိုက်ဆံနဲ့ လက်မှတ်တွေ အရင်ပေးခိုင်းလိုက်လေ။ ပြီးမှ ညီမက လိုအပ်သလောက် လုပ်ပေးမယ်။ "

ရွှီးချန်က လက်ခါကာ ငြင်းခဲ့သည်။ " ရတယ် ရတယ်၊ အစ်မမှာက အမျိုးတွေများတယ်၊ လောက်တောင် မလောက်လောက်ဘူး။ အစ်မကိုသာယုံလိုက်။ စုယွဲ့လုပ်တာတွေက အရသာရှိတော့ သူတို့လည်း အများကြီး လိုချင်ကြမှာပဲ၊ မကုန်ရင်လည်း ဘာဖြစ်လဲ၊ အစ်မတို့ပဲ စားမှာပေါ့။ အလဟသမဖြစ်ဘူး။ အဲ့တာကြောင့် ဘယ်လောက်ကုန်ကျမလဲကိုသာ တွက်လိုက်။ "

ထိုအချိန်တွင် သတင်းစာဖတ်နေသည့် ခေါင်းဆောင်ယွီကလည်း ၀င်ပြောခဲ့သည်။ " နည်းနည်းလောက် ပိုလုပ်လိုက်ပါ၊ ဒီမှာလည်း မိတ်ဆွေတွေ  ရှိသေးတယ်လေ။ "

စုယွဲ့ အံ့အားသင့်သွားမိသည်။ ခေါင်းဆောင်ယွီလိုလူမျိုးက မိန်းမတွေရဲ့ စကား၀ိုင်းထဲ၀င်ပြောလာမည်ဟု မထင်ထားခဲ့မိ၍ပင်။ ပြောရရင် ယခုအလုပ်က မိတ်ဆွေတွေအတွက် ချက်ပြုတ်ပေးတာလို့ အမည်ခံထားသော်ငြား တကယ့်တကယ်တွင် စီးပွားရေးလုပ်နေတာ ဖြစ်သည်။ 

စုယွဲ့သာမကဘဲ ယောက်ျားဖြစ်သူ ၀င်ပြောလာမှုကို ရွှီးချန်ကပါ အံ့သြနေကာ မယုံနိုင်သလို ပြန်ကြည့်ခဲ့သည်။ 

ထိုသို့အကြည့်ခံနေရသဖြင့် ခေါင်းဆောင်ယွီက ရှက်သွားသည်။ " သကြားလုံးနဲ့ နေကြာစေ့တွေက စားလို့ကောင်းတယ်လေ၊ နှစ်ကူးအတွက် ၀ယ်ရမှာခြင်းအတူတူ အရသာရှိတာတွေကို ပို၀ယ်ထားသင့်တယ်မဟုတ်ဘူးလား။ "

ထိုသည်က အမှန်ဖြစ်သည်။ ထို့အပြင် ၀မ်ရှန့်ထောက်ပံ့ရေးနှင့် စျေးကွက်ရှာဖွေရေးဌာနမှာ ရောင်းတာတွေက ကန့်သတ်ချက်ရှိသောကြောင့် မိသားစုတစ်စုကို နည်းနည်းသာ ၀ယ်နိင်သည်။ စုယွဲ့ဆီကနေ များများ၀ယ်လို့ရနေမှတော့ ပို၀ယ်ထားတော့မှာပေါ့။ 

ရွှီးချန်ကလည်း သဘောတူသည်။ " အဲ့တာဆို သကြားလုံးနဲ့ မြေပဲက ပေါင်သုံးဆယ်စီ၊ နေကြာစေ့က ပေါင်ငါးဆယ်လောက်ဆို ရပြီလား။  "

ခေါင်းဆောင်ယွီက ခေါင်းညိတ်ပြသည်။ 

ရွှီးချန်က စုယွဲ့ကိုကြည့်ကာ ပြန်ပြောခဲ့သည်။ " စုယွဲ့ အဲ့ဒါဆိုရင် သကြားလုံးနဲ့ မြေပဲက ပေါင်ခြောက်ဆယ်၊ နေကြာစေ့က ပေါင်တစ်ရာယူမယ်၊ စျေးလေး မြန်မြန်တွက်လိုက်။ အစ်မ ပိုက်ဆံပေးရအောင်လို့။ "

သူမ စီးပွားရေးက အတော်လေးအဆင်ချောတာပဲဟု စုယွဲ့တွေးမိသည်။ လင်မယားနှစ်ယောက်လုံးက သူမကို ကူညီပေးခဲ့သည်။ အထူးသဖြင့် ခေါင်းဆောင်ယွီကို စုယွဲ့ အံ့သြနေမိသည်။ သူ့လို ရိုးသားသည့် စစ်သားတစ်ယောက်က သူမ လုပ်နေသည့်အလုပ်ကို မတားသည့်အပြင် ကူပါကူညီပေးနေသဖြင့် ဘယ်လိုကျေးဇူးတင်ရမည်ကို စုယွဲ့ မတွေးတက်တော့ပေ။ 

စုယွဲ့ ပေါက်စျေးအတိုင်းတွက်ချက်ကြည့်ကာ ပြောလိုက်သည်။ " စျေးက တစ်ပေါင်ချင်းစီအရ တွက်လိုက်မယ်နော်။ သကြားလုံးတစ်ပေါင်ကို လက်မှတ်တစ်ခုနဲ့ တစ်ယွမ်၊ နေကြာစေ့နဲ့ မြေပဲကတော့ လက်မှတ်မလိုဘူး၊ တစ်ပေါင်ကို တစ်ယွမ်ပဲ။ " 

စျေးများက ၀မ်ရှန့်ဌာနထက် စျေးမနည်းသော်လည်း ရွှီးချန်က တန်တယ်လို့ ထင်သည်။ ချက်ချင်း ပိုက်ဆံကိုတွက်ပြီး ပြောခဲ့သည်။" အစ်မ ပိုက်ဆံအရင်ပေးထားမယ်နော်။ လက်မှတ်ကတော့ အိမ်မှာ မရှိသေးလို့၊ မနက်ဖြန် အမေ့ဆီမှာ သွားယူလိုက်မယ်။ နောက်နှစ်ရက်နေရင် အစ်မလာပေးမယ်။ " 

" ရပါတယ် " 

စုယွဲ့ ပိုက်ဆံယူပြီး အိမ်သို့ပြန်လိုက်သည်။ နောက်တစ်နေ့တွင် ရှောင်း၀မ်ရွာကိုသွားကာ နေကြာစေ့နဲ့ မြေပဲကို ၀ယ်လိုက်သည်။ ရှောင်း၀မ်ရွာ၌ နေကြာပန်းများစိုက်ပျိုးသောကြောင့် နေကြာစေ့များစွာ ရှိသည်။ ထို့အပြင် အိမ်တိုင်းလိုလိုတွင်လည်း ဆောင်းရာသီမြေပဲများ ရိတ်သိမ်းပြီးကြပြီဖြစ်၍ နှစ်မျိုးလုံးကို အမြောက်အမြား၀ယ်လို့ရသည်။ စုယွဲ့ပေးသည့် စျေးကလည်းကောင်းသဖြင့် ရွာသားတွေကလည်း ရောင်းလိုကြသည်။ ဘယ်လိုပဲဖြစ်ဖြစ် ရောင်းရလေလေ ပိုက်ဆံရလေလေဖြစ်သောကြောင့် နှစ်သစ်ကူးအတွက် အသားများ၀ယ်နိုင်ကြမည်ဖြစ်၍ သဘောကျကြသည်။

နေကြာစေ့နှင့် မြေပဲများ ၀ယ်ပြီးသောအခါ စုယွဲ့ အလုပ်များနေတော့သည်။ နှစ်ကူးက မကြာခင်ရောက်တော့မည်ဖြစ်၍ အချိန်ကပ်နေသောကြောင့်ဖြစ်သည်။

စုယွဲ့က အလုပ်ရှုပ်နေသောကြောင့် ကလေးနှစ်ယောက်ကို အမေဟန်က ထိန်းပေးခဲ့သည်။ နို့တိုက်ချိန်ကျလျှင် စုယွဲ့က နို့တိုက်ပြီး ထို့နောကိ အမေဟန်က ပြန်ထိန်းပေးခဲ့သည်။ 

ပုံမှန်ဆိုလျှင် ကလေးနှစ်ယောက်က စုယွဲ့ ရင်ခွင်ထဲ၌နေကာ ဆော့နေကြဖြစ်ပြီး ယခုအခါတွင်မူ အမေဖြစ်သူက သူတို့နှင့်အတူ မဆော့ပေးတော့ပဲ မျက်လုံးဖွင့်ကြည့်လျှင်လည်း သူတို့အမေကို မတွေ့ရဘဲ နို့တိုက်ပြီးသည်နှင့် သူတို့ကို ပစ်ထားသောကြောင့် ကလေးနှစ်ယောက်မှာ သနားစရာလေးတွေ ဖြစ်နေကြသည်။ 

ရှောင်ပေါင်က အဆိုးဆုံးဖြစ်သည်။ နို့ဆာလျှင် အော်ငိုကာ စုယွဲ့ ချီပြီးချော့ရသည်။ နို့စို့ပြီးလျှင်လည်း စုယွဲ့ကို မခွဲချင်သဖြင့် အမေဟန်ကခေါ်လျှင်တောင် စုယွဲ့ အင်္ကျီစကို ဆွဲထားတက်သည်။ အမေဟန်က ခေါ်မည်လုပ်သည်နှင့် အော်ငိုကာ အမေဖြစ်သူကိုသာ ကပ်နေခဲ့သည်။ 

စုယွဲ့မှာ လုပ်စရာများစွာရှိနေပြီး သားငယ်လေးက သူမကိုသာ ကပ်နေသောကြောင့် ရိုက်ပစ်လိုက်ချင်သော်လည်း သနားစဖွယ် မျက်လုံးလေးများကြောင့် မရိုက်ရက်ချေ။ သို့ဖြစ်၍ အိပ်ပျော်သည်အထိ ချော့ပြီးမှသာ လက်ထဲက ချရသည်။ 

တာ့ပေါင်က ရှောင်ပေါင်လိုမငိုသော်လည်း နို့စို့ပြီးလျှင် ရှောင်ပေါင်လို စုယွဲ့ အင်္ကျီစကိုဆွဲထားသည်။ နို့စို့ပြီးလျှင်လည်း အမေဖြစ်သူကို မျက်လုံး၀ိုင်းကြီးများဖြင့် ကြည့်နေတက်သည်။ တာ့ပေါင်က လိမ္မာသဖြင့် စုယွဲ့ မရက်စက်ရက်ဘဲ ရှောင်ပေါင်ကဲ့သို့ပင် ချော့မော့ကာ ပွေ့ဖက်နမ်းလျက် ဆော့ပေးပြီး ကလေးအိပ်ပျော်သွားမှသာ အမေဟန်ဆီ လွှဲပေးလိုက်သည်။ 

အမေဟန်က ပြုံးကာပြောခဲ့သည်။ " တာ့ပေါင်က တီတီတာတာမရှိဘဲ လူလည်း သိပ်မကပ်ပေမယ့် ယွဲ့ယွဲ့ကိုတော့ တော်တော်လေးကပ်တယ်။ နိုးတာနဲ့ မငိုပေမယ့် မျက်လုံးဝေ့ပြီး သမိိိီးကို အရင်ရှာတာ၊ သမီးကိုတွေ့ရင် ရှောင်ပေါင်လိုမဟုတ်ပေမယ့် လိုက်ကြည့်နေတော့တာပဲ။ "

စုယွဲ့ ပြုံးးလိုက်မိသည်။ သူမလည်း တာ့ပေါင်က ရှောင်ပေါင်လောက်နီးနီး သူမကိုကပ်သည်ကိုသိသည်။ ထိုကလေးက ငိုလည်းမငို ဆိုးလည်းမဆိုးသော်လည်း အမေဖြစ်သည့်စုယွဲ့က မျက်နှာအမူအရ ပျော်နေလား ၀မ်းနည်းနေလားကို သိသည်။ ဥပမာအားဖြင့် နို့တိုက်ပြီးလို့ အမေဟန်ထံ ပြန်ပေးလိုက်သည့်အခါမျိုးဆို ထိုကလေးက မကျေမနပ်ဖြင့် မျက်မှောင်ကြုံ့သွားတက်ပြီး စုယွဲ့ နမ်းပေးတာ၊ ဖက်လိုက်တာမျိုးဆိုရင်တော့ နှုတ်ခမ်းလေးကော့ကာ ပြုံးသွားတက်သည်။ 

ကလေးနှစ်ယောက် ငိုနေမည်စိုး၍ သူတို့နိုးနေပါက စုယွဲ့ ကလေးနှစ်ယောက်နှင့်ဆော့ပေးနေရကာ သူတို့အိပ်မှသာ အလုပ်လုပ်ရသဖြင့် ညနက်သည်အထိ အလုပ်လုပ်နေရတက်သည်။ 

ကံကောင်းသည်က နှစ်ရက်ကြာပြီးနောက်တွင် ဟန်အိုက်မင် ရောက်လာပြီး တာ့ပေါင်နဲ့ ရှောင်းပေါင်ကို အတော်လေးချစ်ခင်ကာ ထိန်းပေးခဲ့သည်။ ရယ်စရာမျက်နှာလုပ်ပြကာ ရှောင်ပေါင်ကို ရယ်အောင်လုပ်နေ၍ ကလေးလေးက အရယ်မရပ်တော့ဘဲ သွားဖုံးလေးများပေါ်သည်အထိ ရယ်နေတက်သည်။ တာ့ပေါင်က ရှောင်ပေါင်လောက် မရယ်သော်လည်း ဦးလေးဖြစ်သူကို မျက်စိမလွတ်တမ်း လိုက်ကြည့်နေတက်သည်။ သူလည်း ရှောင်ပေါင်လို ဦးလေးဖြစ်သူလုပ်ပြသည်များကို ကြည့်ရတာ သဘောကျသည်မှာ သိသာလှသည်။

ဟန်အိုက်မင်က တူနှစ်ယောက်ကို ထိန်းပေးနေသဖြင့် စုယွဲ့အတွက် အလုပ်လုပ်ရလွယ်ကူသွားခဲ့သည်။ သကြားလုံးများ၊ နေကြာစေ့နှင့် မြေပဲများကို အမြန်လုပ်လိုက်နိုင်ကာ ရွှီးချန်ဆီ သွားပို့ပေးလိုက်သည့်အခါ ရွှီးချန်က မိဘအိမ်နှစ်အိမ်လုံးသို့ ပြန်ပို့ပေးလိုက်ကာ အမျိုးတွေဆီ ခွဲဝေခိုင်းလိုက်သည်။ 

သို့ဖြစ်၍ နောက်နှစ်ရက်ကြာသောအခါ ရွှီးချန်က သူမ၏ ဆွေမျိုးများထံ အားလုံးခွဲဝေပေးပြီးသွားပြီဖြစ်ကြောင်းနှင့် ထပ်လိုချင်သေးသူများရှိသောကြောင့် ထပ်လုပ်ပေးနိုင်ဦးမလားလို့ စုယွဲ့ကို မေးခဲ့သည်။ 

စုယွဲ့လည်း ရွာသားများထံမှ နေကြာစေ့များနှင့် မြေပဲများကို ပို၀ယ်ထားခဲ့သောကြောင့် လုပ်ပေးနိုင်သွားခဲ့သည်။ နောက်တစ်ဖန် ထပ်လုပ်ပြန်ကာ နှစ်ကူးမတိုင်ခင်တွင် ရွှီးချန်ဆီ ထပ်ပို့ပေးလိုက်သည်။ 

လ၀က်လောက် အလုပ်ရှုပ်နေပြီးနောက် စုယွဲ့ စီးပွားရေးလည်း ပြီးဆုံးသွားခဲ့သည်။ ပင်ပန်းသော်လည်း ပိုက်ဆံရသောကြောင့် စုယွဲ့ပျော်နေမိသည်။ 

ညရောက်သောအခါ စုယွဲ့ တင်ပလ္လင်ခွေထိုင်လိုက်ကာ စောင်နှင့် ခေါင်းအုံးကိုခွေလိုက်ပြီး တာ့ပေါင်နှင့် ရှောင်ပေါင်ကို နေရာချပေးလိုက်သည်။ ထို့ကြောင့် သားမိသုံးယောက်မှာ ၀ိုင်းဖွဲ့ထိုင်နေကြသလို ဖြစ်နေသည်။ 

နှစ်ကူးရက်များအတွင်း ရသမျှ ပိုက်ဆံအားလုံးကို စုဘူးထဲတွင် ထည့်ထားခဲ့ကာ ထိုစုဘူးကို အလယ်တွင် သွန်ချလိုက်ပြီး သူမလုပ်နေသည်များကို စိတ်၀င်တစားလိုက်ကြည့်နေသော တာ့ပေါင်နှင့် ရှောင်ပေါင်ကို စုယွဲ့ စကားပြောလိုက်သည်။ " ကြည့်ပါဦး၊ မားမားရဲ့ အချစ်လေးတွေ ။ ဒါတွေက မားမားရှာထားတဲ့ ပိုက်ဆံတွေပဲ၊ မားမား ရေပြမယ်နော်။ "

တာ့ပေါင်နှင့် ရှောင်ပေါင်က ပိုက်ဆံများကို စိတ်၀င်စားနေကာ ရှောင်ပေါင်က လှမ်းယူဖို့ကြံသော်လည်း ငယ်သေးသောကြောင့် လှုပ်လိုက်သည်နှင့် စောင်ပုံကြားမှ ထွက်ကျသွားကာ ပြန်မထနိုင်ဖြစ်သွားခဲ့သည်။ ပက်လက်လန်နေသော လိပ်လေးသဖွယ် ယက်ကန်ယက်ကန်ဖြစ်နေသည်။ 

လှုပ်နေလည်း မထနိုင်သဖြင့် ပင်ပန်းသွားပုံရသည့် ရှောင်ပေါင်သည် မျက်လုံး၀ိုင်းကြီးများဖြင့် စုယွဲ့ကို လှမ်းကြည့်ခဲ့သည်- ' မားမား ကူပါဦး '

သားငယ်၏ပုံစံကြောင့် စုယွဲ့လည်း ရယ်ချင်မိသွားသည်။ ခဏကြည့်နေပြီးမှသာ ကောက်ချီလိုက်ပြီး နဖူးလေးကို ဖွဖွခေါက်ကာ ဆူဟန်ဆောင်လိုက်သည်။ " ထပ်မလှုပ်နဲ့တော့နော်။ နောက်တစ်ခေါက်ဆို မားမားက မကူပေးတော့ဘူးနော်။ မင်းအစ်ကိုလို ငြိမ်ငြိမ်လေးနေပါဦး သိရဲ့လား။ " 

ရှောင်ပေါင်က ထပ်မလှုပ်ရဲတော့ဘဲ အစ်ကိုဖြစ်သူနှင့် အတူထိုင်နေကာ အမေဖြစ်သူ ပိုက်ဆံရေနေသည်ကို ထိုင်ကြည့်နေခဲ့သည်။ 

စုယွဲ့ ပိုက်ဆံတွေကို တူရာစုပြီး ရေတွက်လိုက်သည်။ အရွက်တန်ဆို အရွက်၊ နှစ်ပြားတန်ဆို နှစ်ပြား၊ ငါးပြားတန်ဆို ငါးပြား အစရှိသဖြင့်ပင်။ နောက်ဆုံး၌ ရေလို့ပြီးသွားပြီး ပေါင်းကြည့်လိုက်သည့်အခါ လ၀က်အတွင်း ရခဲ့သည်က ယွမ်နှစ်ရာ့ရှစ်ဆယ်နှင့် လက်မှတ်တစ်ရာဖြစ်ကာ ဟန်အိုက်ကော၏ လေးလစာ လစာနှင့်ညီမျှသည်။ 

ပိုက်ဆံရှာရတာက အလွန်ကောင်းသည်။ ပိုက်ဆံတွေကို လက်ထဲတွင်စုကိုင်လိုက်ပြီး ယပ်ခတ်သည့်ဟန်လုပ်ပြလိုက်သည့်အခါ ကလေးနှစ်ယောက်က မျက်လုံး၀ိုင်း၀ိုင်းလေးများဖြင့် လိုက်ကြည့်နေခဲ့သည်။ 

" ကြည့်၊ ဒါတွေက မားမားရှာထားတဲ့ ပိုက်ဆံတွေလေ၊ မားမားက အံ့သြဖို့မကောင်းဘူးလား။ "

တာ့ပေါင်က ဒီအတိုင်းသာ လိုက်ကြည့်နေကာ ရှောင်ပေါင်က စိတ်လှုပ်ရှားနေပြီး ပိုက်ဆံကို လှမ်းယူချင်နေခဲ့သည်။ သူ့ မားမားက သူကစားဖို့ ပေးမလားဟု မျှော်လင့်နေပုံပင်။ 

စုယွဲ့က ရယ်ကာ စနောက်လိုက်သည်။ " မင်းတို့နှစ်ယောက်၊ မားမားလို့ ခေါ်လိုက်တာနဲ့ မားမားက မုန့်ဖိုးပေးမှာ။ ဘယ်သူ အရင်ခေါ်မှာလဲ။ "

တာ့ပေါင်က အမေဖြစ်သူကိုကြည့်လိုက် ပိုက်ဆံများကိုကြည့်လိုက် လုပ်နေခဲ့သည်။  

ရှောင်ပေါင်ကတော့ ပိုက်ဆံများက်ို လိုက်ကြည့်နေကာ လက်လေးဆန့်ထုတ်ပြီး ဆွဲယူချင်နေခဲ့သည်။

" ဟက် " ခနဲ ရယ်သံကို စုယွဲ့ ကြားလိုက်ရပြီး ချက်ချင်းလှည့်ကြည့်လိုက်မိသည်။ ဘယ်သူလဲဆိုသည်ကို တွေ့သည့်အခါ ပိုက်ဆံများကို ချထားခဲ့ပြီး ထိုလူ့ထံ အပြေးသွားလိုက်မိသည်။ " ယောက်ျား၊ ပြန်မလာလောက်သေးဘူးထင်နေတာ။ အလုပ်က ပြီးသွားပြီလား။ "

ဟန်အိုက်ကောက စုယွဲ့ကိုဖက်လိုက်ကာ သူမ နှုတ်ခမ်းကို နမ်းပြီးမှ ပြန်ဖြေခဲ့သည်။ " အခုပဲပြန်ရောက်တာ။ တရုတ်နှစ်သစ်ကူးက မနက်ဖြန်လေ။ မင်းနဲ့အတူ ဆင်နွှဲဖို့ ပြန်လာရမှာပေါ့။ "

ကလေးနှစ်ယောက်က ငယ်သေးသောကြောင့် အဖေဖြစ်သူကို မမှတ်မိကြချေ။ အမေဖြစ်သူကို ဖက်ထားသူအား စိတ်၀င်တစားကြည့်နေကြကာ ရှောင်ပေါင်က ၀ူး၀ါး၀ူး၀ါးအော်ပြီး အသံပေးနေခဲ့သည်။ 

ကလေးတွေက စိတ်၀င်စားစရာကိုမြင်ပါက အသံပေးတက်ကြသည်။ 

ဟန်အိုက်ကော စုယွဲ့ကို လွှတ်ပေးလိုက်ကာ ဖြူဖွေးဖွေး ဖက်ထုပ်လေးနှစ်လုံးကို ကြည့်လိုက်မိသည်။ လွမ်းနေခဲ့သော သားနှစ်ယောက်အား တစ်ဖက်စီမှ ကောက်ချီလိုက်ပြိး ပါးလေးများကို မွှေးမွှေးပေးလိုက်သည်။ " တာ့ပေါင်၊ ရှောင်ပေါင် ပါးပါးပြန်လာပြီ။ "

တာ့ပေါင်က ဟန်အိုက်ကောကို စိတ်၀င်တစားကြည့်နေကာ ဒီလူကဘယ်သူလဲဟု တွေးနေဟန်ရှိသည်။ ရှောင်ပေါင်က လက်လေးများကို ဆန့်ထုတ်ကာ ဟန်အိုက်ကော မျက်နှာကို လိုက်ထိကြည့်နေပြီး နှာခေါင်းကို ကိုင်ကြည့်ပြီးသောအခါ ရယ်စရာကောင်းသည်ကို တွေ့သွားသည့်အလား သွားဖုံးလေးများပေါ်အောင် ရယ်နေခဲ့သည်။ 

သားအဖကြားမှ ဆက်နွယ်မှုကြောင့် ဖြစ်လောက်ကာ ဟန်အိုက်ကောကို မသိကြသော်လည်း ငြင်းဆန်ခြင်းတော့မပြုကြပေ။ ခဏကြာသောအခါ သားအဖတစ်တွေ ရင်းနှီးသွားကြပြီး ရှောင်ပေါင်က ဟန်အိုက်ကော၏ လက်ထဲမှ မဆင်းလိုတော့ပေ။ 

သို့ဖြစ်၍ ဟန်အိုက်ကောကိုယ်တိုင် သားနှစ်ယောက်ကို သိပ်ရတော့သည်။ 

ကလေးများကို သိပ်ပြီးမှသာ ဇနီးဖြစ်သူနဲ့ နေဖို့ အချိန်ရသည်။ ဟန်အိုက်ကောက စုယွဲ့ကိုဖက်ကာ သူမ လည်ပင်းကြားတွင် ခေါင်းနှစ်ထားလိုက်မိသည်။ " ကိုယ် မင်းကို အရမ်းလွမ်းနေခဲ့တာ၊ ယွဲ့အာ။ "

စုယွဲ့လည်း လွမ်းနေခဲ့တာဖြစ်ကာ ဘာမှပြန်မပြောတော့ဘဲ ဦးဆောင်ပြီး နမ်းလိုက်သည်။

သူ့ဇနီးက ထိုသို့စတင်သည်မှာ ရှားသဖြင့် ဟန်အိုက်ကောလည်း ထိန်းချုပ်နေခြင်းမပြုတော့ချေ။ ဒီညတွင် သူတို့နှစ်ယောက်က အနေဝေးနေကြတဲ့ လင်မယားတွေရဲ့ စိတ်ခံစားချက်ကို နားလည်သွားကြပြီဖြစ်သည်။