အပိုင်း ၇၉

၇၀ ခုနှစ်က မင်းခင်ပွန်းဆီ ကံကောင်းခြင်းတွေ ယူဆောင်သွားပါ

အပိုင်း ၇၉ - ငှားပေးလို့ ကျေးဇူးတင်ပါတယ် 

အပ်ချုပ်စက်ကို သယ်လာပေးသူတွေက တတိယထပ်အထိ တစ်ခါတည်းသယ်လာပေးကာ စုယွဲ့တို့အိမ်ရှေ့တွင် ချပေးခဲ့သည်။ ထို့ကြောင့် တတိယထပ်၌ လာကြည့်ကြသူများနှင့် ပြည့်နေတော့သည်။ ခေါင်းဆောင်ယွီကတော်ကိုယ်တိုင် ၀ယ်ပေးတာဖြစ်သောကြောင့် ယခင်တစ်ခေါက်ထပ် ပိုစည်းကားခဲ့သည်။ 

အများစုက အားကျနေကြကာ အပ်ချုပ်စက်ကိုကိုင်ကြည့်နေကြပြီး သူတို့အိမ်မှာလည်း ရှိရင်ကောင်းမှာပဲလို့ တွေးနေကြသည်။ အိမ်မှာ အပ်ချုပ်စက်ရှိရင် အဆင်ပြေလွယ်ကူတာကြောင့် အားကျနေကြသည်မှာ မထူးဆန်းပေ။ 

ယနေ့ တိုက်တိုက်ဆိုင်ဆိုင်ပင် ဖန်းရှောင်းလီ၏ နားရက်ဖြစ်နေခဲ့သည်။ ထို့ကြောင့် တတိယထပ်မှာ ရုတ်ရုတ်သဲသဲ ဖြစ်နေတာကို သူမလည်း ကြားသဖြင့် ထွက်ကြည့်သောအခါ စုယွဲ့တို့ အိမ်ရှေ့ရှိ အသစ်ချက်ချွတ် အပ်ချုပ်စက်တစ်လုံးကို မြင်လိုက်ရပြီး အံ့သြသွားခဲ့သည်။

လာစပ်စုသော ၀မ်လျန်ယင်းကလည်း ဖန်းရှောင်းလီထွက်လာတာကို မြင်တဲ့အခါ သူမဘေးကိုသွားပြီး ဘာတွေဖြစ်နေလဲဆိုတာကို ကပ်ပြောပြခဲ့သည်။ " ဒီအပ်ချုပ်စက်က ခေါင်းဆောင်ယွီရဲ့မိန်းမက စုယွဲ့ကိုပေးတာတဲ့။ သူတို့မိသားစုက်ို ကူညီပေးလို့ ကျေးဇူးတင်တဲ့အနေနဲ့ ပေးတာလို့ပြောတာပဲ။ တကယ်ပဲ ဘယ်လိုကူညီခဲ့တာမို့လို့ ဒီလိုလက်ဆောင်ကြီးကို ပေးရတာလဲဆိုတာ ကျွန်မတော့ နားမလည်နိုင်တော့ဘူး .... ဘာလို့ ဒီလောက် ကံကောင်းနေရတာလဲ။ ကျွန်မက်ိုကြ အဲ့လိုပေးမယ့်သူမရှိဘူး။ အဲ့ဒီ့ စုယွဲ့ဆိုတဲ့မိန်းမက သေကိုမသေနိုင်ဘူး။ "

၀မ်လျန်ယင်းရဲ့ စကားတွေက ချဥ်စူးနေကာ မျက်၀န်းထဲရှိ အားကျမနာလိုနေမှုများကလည်း ဖုံးကွယ်ထား၍ပင် မရနိုင်တော့ပေ။ သူမက တိုးတိုးလေးကပ်ကာ ထပ်ပြောပြန်သည်။ " ခေါင်းဆောင်ယွီရဲ့မိန်းမနဲ့ ဆက်ဆံရေးကောင်းတော့ ကောင်းလိုက်တာနော်။ အပ်ချုပ်စက်ကိုတောင် လက်ဆောင်ရတယ်။ ကျွန်မလည်း အဲ့လိုသာ ဆက်ဆံရေးကောင်းမယ်ဆိုရင် အဲ့ဒီ့အပ်ချုပ်စက်က ကျွန်မအပိုင်ဖြစ်နေမလား မသိဘူး။ "

ဖန်းရှောင်းလီ မျက်နှာပျက်သွားခဲ့သည်။ အပ်ချုပ်စက်အသစ်ကို ကြည့်နေသော မျက်လုံးများက မီး၀င်း၀င်းတောက်နေကာ လက်သီးကိုလည်း ကျစ်ကျစ်ပါအောင် ဆုပ်ထားခဲ့သည်။

ဒီတစ်လျှောက်လုံး ဖန်းရှောင်းလီက စုယွဲ့ဆီမှ အနိုင်ယူခံနေခဲ့ရသည်။ စုယွဲ့ ယောက်ျားဖြစ်သူကလည်း ရာထူးတိုးသွားကာ သူမတို့အတွက် ကိတ်မုန့်လုပ်ပေးဖို့ကိုလည်း တိုက်ရိုက်ငြင်းဆိုလိုက်သည့်အတွက် သားဖြစ်သူက နေ့တိုင်းဆိုသလို ငိုယိုနေပြီး မိသားစုကို စိတ်ဆင်းရဲနေရစေအောင် လုပ်ထားခဲ့သည်။ အဲ့ဒါတွေအားလုံးကို စုယွဲ့ တမင်လုပ်ထားတာလို့ ဖန်းရှောင်းလီက တွေးနေခဲ့တာဖြစ်သည်။ 

ဖန်းရှောင်းလီ အနိုင်ရတယ်လို့ ခံစားရသည့် တစ်ခုတည်းသော က်ိစ္စမှာ သူမ၏ ညွှန်ကြားမှုကြောင့် စုယွဲ့ အပ်ချုပ်စက်မ၀ယ်နိုင်ခဲ့ခြင်း ဖြစ်သည်။ ပိုက်ဆံနဲ့ လက်မှတ်ရှိနေလည်း သူမ မ၀ယ်နိုင်အောင် လုပ်လိုက်နိုင်သဖြင့် ဂုဏ်ယူနေခဲ့တာဖြစ်ပြီး သူမကိုဆန့်ကျင်ပါက ဘယ်လိုကြုံတွေ့ရမည်ကို သိအောင်လုပ်ပေးချင်ခဲ့တာပင်။ ပြေလည်မှုလိုချင်သူက ပထမဆုံး သူမကို စိတ်ကျေနပ်အောင်လုပ်ရန် လာတောင်းပန်ရမည်ဟု သိစေချင်ခဲ့တာဖြစ်သည်။ 

သို့သော်လည်း ယခုအခါ ခေါင်းဆောင်ယွီကတော်ရဲ့ ကြား၀င်မှုကြောင့် စုယွဲ့က ၀မ်ရှန့်ဌာနကို သွားစရာမလိုဘဲ အပ်ချုပ်စက်အသစ်ကို ရသွားခဲ့သည်။ ဖန်းရှောင်းလီ ဒေါသမထွက်ဘဲ နေနိုင်ပါ့မလား။

ဖန်းရှောင်းလီမှာ အဆုတ်တွေတောင် နာလာသလိုပင်။ တံခါးရှေ့က ထိုအပ်ချုပ်စက်ကို သွားဖျက်ဆီးပစ်လိုက်ချင်သော်လည်း ခေါင်းဆောင်ယွီကို စော်ကားမိသလိုဖြစ်သွားမည်စိုး၍ လုပ်လို့မဖြစ်နိုင်ချေ။ 

ဖန်းရှောင်းလီက ကြိတ်မနိုင်ခဲမရဖြစ်ကာ ၀မ်လျန်ယင်းကို လျစ်လျူရှု၍ အံကြိတ်ကာ အိမ်ထဲသို့လှည့်၀င်သွားတော့သည်။ တံခါးကိုလည်း ဒုန်းခနဲမြည်အောင့် ဆောင့်ပိတ်သွားသေးသည်။

သို့သော်လည်း လူအများအာရုံက အပ်ချုပ်စက်ပေါ်တွင်သာ ရှိနေကြသဖြင့် သူမကို အဖက်လုပ်သူတစ်ယောက်မှ မရှိပေ။ ရွှီးချန် တစ်ယောက်ကသာ ထိုသည်ကို သတိထားမိကာ ပြုံးသွားခဲ့သည်။ ထို့နောက် လာစပ်စုသူများလည်း ကြည့်လို့၀သွားကာ အိမ်ပြန်သွားကြသည်။ ထိုအခါမှသာ အပ်ချုပ်စက်ကို အိမ်ထဲသို့ရွှေ့စေလိုက်ကာ ရွှီးချန် စုယွဲ့ကို ပြုံးပြီးပြောလိုက်သည်။ " ခုနက ဖန်းရှောင်းလီရဲ့ မျက်နှာကိုတွေ့လိုက်လား၊ ဒေါသထွက်သွားတဲ့ပုံပဲ "

စုယွဲ့က အာရုံများနေသဖြင့် သတိမထားမိလိုက်ချေ။ ရွှီးချန်၏ စကားကိုကြားမှသာ အိမ်ရှေ့တွင် ခဏချခိုင်းလိုက်သည့် ရည်ရွယ်ချက်ကို စုယွဲ့ သဘောပေါက်သွားတော့သည်။ ဖန်းရှောင်းလီကို ဒေါသထွက်သွားရန် တမင်လုပ်လိုက်တာဖြစ်နိုင်သည်။ ယခင်လိုသာဆို စုယွဲ့လည်း ၀မ်းသာမိသော်လည်း ယခုတွင်တော့ ထိုသို့လုပ်ရန် စိတ်ကူးမရှိချေ။ အပ်ချုပ်စက်ကို လက်ညှိုးထိုးကာ စုယွဲ့ ရွှီးချန်ကို မေးခွန်းထုတ်လိုက်သည်။ " အစ်မရွှီးချန် ဘာတွေလုပ်နေတာလဲ "

" ဘာလုပ်ရမှာလဲ။ ညီမကို ပေးတာလေ " ထိုသို့ပြန်ဖြေကာ ရွှီးချန်က အပ်ချုပ်စက်ကို ပုတ်ပြခဲ့သည်။ " ဒီတစ်ခေါက် စုယွဲ့က အစ်မကို အကြီးကြီးကူညီပေးထားတာ။ လောင်ယွီနဲ့ အစ်မလည်း ကျေးဇူးတင်ချင်ပေမယ့် ဘယ်လိုကျေးဇူးတင်ရမလဲကို မသိတော့လို့ တိုင်ပင်နေကြရင်း ညီမ အပ်ချုပ်စက်လိုချင်ပေမယ့် ဖန်းရှောင်းလီ နှောင့်ယှက်လို့ ၀ယ်မရဘူးလို့ ပြောဖူးတာကို သတိရသွားလို့။ အဲ့ဒါနဲ့ အစ်မအမေကို ပြောပြီး၀ယ်ခိုင်းလိုက်တာ။ ညီမကို ကျေးဇူးတင်တဲ့အနေနဲ့ ပေးချင်လို့။ "

" အစ်မရွှီးချန် အဲ့လိုမလုပ်ပါနဲ့ ။ ညီမက ကျေးဇူးအတင်ခံချင်လို့ ကူညီပေးတာ မဟုတ်ပါဘူး။ ပြန်ယူသွားလိုက်ပါ။ စျေးကြီးလွန်းလို့ ညီမ လက်မခံနိုင်ဘူး "

ရွှီးချန်က သဘောမတူပေ။ " ဘယ်လောက် စျေးကြီးကြီး ညီမ အစ်မကို ကူညီပေးခဲ့တာလောက် အဖိုးတန်ပါ့မလား။ အစ်မဗိုက်ထဲက ကလေးလေးလောက် တန်ဖိုးရှိပါ့မလား။ ဒီကလေးက အစ်မတို့လင်မယားအတွက် တကယ် တန်ဖိုးရှိတာ။ အစ်မတို့ကတော့ အပ်ချုပ်စက်လေးတစ်လုံးနဲ့ပဲ ကျေးဇူးတင်ကြောင်း ပြန်ပြနိုင်တယ်။ တကယ်ဆို ဒါက စုယွဲ့ကူညီပေးတာနဲ့ ယှဥ်လိုက်ရင် မပြောပလောက်ဘူး။ ဒါကြောင့် အားနာမနေနဲ့။ ငြင်းမယ်ဆိုရင် အစ်မ စိတ်ဆိုးပြီး နောက်လည်း မိတ်ဆွေတွေ မလုပ်တော့ဘဲ နေလိုက်မှာ။ "

" အာ....ဒါက..." ဒါပေမယ့်လည်း အပ်ချုပ်စက်က စျေးကြီးလွန်းတယ်လို့ စုယွဲ့ ထင်နေတုန်းပင်။

" အာ မနေနဲ့တော့၊ အစ်မပြောတာကို နားထောင်လိုက် စိတ်ဖြောင့်ဖြောင့်နဲ့ လက်ခံလိုက်လို့ရတယ်။ ဒါပဲနော်။ စကားမပြောတော့ဘူး၊ အစ်မ ပြန်တော့မယ်။ " ရွှီးချန်က ပြောပြီးသည်နှင့် စုယွဲ့ အပ်ချုပ်စက်ကို ပြန်ပေးလိုက်မှာကို ကြောက်နေသည့်အလား အလျင်စလို ပြန်သွားတော့သည်။ 

စုယွဲ့ အပ်ချုပ်စက်ကိုကြည့်ကာ ရယ်ရမလား၊ ငိုရမလားကို မသိတော့ပေ။ လောလောဆယ်တော့ ဒီအတိုင်းပဲထားကာ ဟန်အိုက်ကောပြန်လာမှ လက်ခံသင့် လက်မခံသင့်ကို တိုင်ပင်ကြည့်တော့မယ်လို့ တွေးထားလိုက်တော့သည်။ 

အမေဟန်က ဘာတစ်ခွန်းမှ ၀င်မပြောခဲ့ဘဲ ရွှီးချန်ပြန်သွားမှသာ ဘာတွေဖြစ်နေတာလဲလို့ မေးခဲ့သည်။

စုယွဲ့ အကြမ်းဖျင်း ရှင်းပြလိုက်သည်။ အားဆေးရလာသည့်နေရာကိုတော့ သူမ မွေးရပ်မြေမှ ရလာတာလို့သာ ပြောလိုက်သည်။ အမေဟန်ကလည်း သံသယမ၀င်ချေ။ " ဒါကြောင့် ဒီလိုလက်ဆောင်ပေးတာပေါ့လေ။ ဒီလိုဆိုရင်တော့ ဟုတ်ပါတယ်လေ။ နှစ်တွေအကြာကြီး ကလေးမရတာကနေ ရုတ်တရက် ရသွားတာဆိုတော့ ကျေးဇူးတော်တော်လေးတင်သွားမှာပေါ့။ ဒါပေမယ့်လည်း ဒါကစျေးကြီးလွန်းတယ်မလား။ ယွမ်တစ်ရာကျော်လောက် ကျမယ်ထင်တယ်။ ယွဲ့ယွဲ့ လက်ခံမှာလား။ "

စုယွဲ့ - " အိုက်ကော ပြန်လာမှပဲ တိုင်ပင်ကြည့်မလို့ အခုတော့ ဒီအပ်ချုပ်စက်ကို အခန်းထဲကို အရင်ရွှေးထားကြရအောင် "

ချွေးမဖြစ်သူရဲ့ ဆုံးဖြတ်ချက်ကို အမေဟန်က ဘာမှတ်ချက်မှမပေးပေ။ စုယွဲ့ စကားကြောင့် အမေဟန်က အပ်ချုပ်စက်ကို စုယွဲ့တို့အခန်းထဲသို့ ၀ိုင်းရွှေ့ပေးခဲ့သည်။ စုယွဲ့က အမေဟန်ရဲ့ အခန်းထဲတွင် ထားစေချင်သော်လည်း အမေဟန်က ဒီလောက်စျေးကြီးတဲ့ဟာကြီးကို သားနှင့်ချွေးမအခန်းထဲမှာပဲ ထားသင့်တယ်လို့သာ ပြောနေခဲ့သည်။ အမေဟန်က ကောင်းသည့်အရာမှန်သမျှကို စုယွဲ့တို့အခန်းထဲ၌သာ ထားချင်တာဖြစ်သည်။ 

အမေဟန်ရဲ့ အတွေးကို စုယွဲ့ သဘောကျမိသော်လည်း သူမက ယောက္ခမဖြစ်သူအခန်းထဲတွင်သာ ထားချင်တာဖြစ်သည်။ 

သို့သော်လည်း ယောက္ခမဖြစ်သူကို နိုင်အောင်မပြောနိုင်သဖြင့် နောက်ဆုံး သူမတို့လင်မယားခန်းထဲ၌သာ ထားလိုက်ရတော့သည်။ 

ဟန်အိုက်ကောက ည ၉နာရီခွဲမှသာ ပြန်ရောက်လာကာ ရွှံ့ထဲလူးလာသည့်လူလိုပင် မျက်နှာထက်၌ ရွှံ့များပေကျံနေခဲ့သည်။ 

စုယွဲ့ သန့်ရှင်းရေးလုပ်ဖို့ ရေနွေးနွေးလေး ပြင်ဆင်ပေးပြီး မေးလိုက်သည်။ " ဒီနေ့ ဘယ်သွားခဲ့လို့ ဒီလိုတွေဖြစ်လာရတာလဲ။ ညစ်ပတ်နေတာပဲ။ " တပ်ရင်းမှုးအဖြစ် ရာထူးတိုးပြီးကတည်းက ဟန်အိုက်ကောက ယခင်နှင့်မတူတော့ချေ။ နေ့တိုင်းဆိုသလို အစောကြီးထွက်သွားရကာ ညဆိုလည်း နောက်ကျမှ ပြန်လာသည်။ ညသန်းခေါင်မှ ပြန်လာတာတွေလည်းရှိတက်သည်။ တောတောင်ထဲသို့သွား၍ လေ့ကျင့်ရေးဆင်းရကာ နှစ်ရက်သုံးရက်နေမှ အိမ်သို့ပြန်လာတက်သည့်အခါများလည်းရှိသည်ပင်။ 

ရေနွေးပြင်ပေးပြီးသွားသည့်အခါ ဟန်အိုက်ကောက အင်္ကျီ ချွတ်လိုက်ပြီး စုယွဲ့ရှေ့မှာတင် ရေချိုးဇလုံထဲ၀င်ပြီး ရေချိုးကာ ပြန်ဖြေပေးခဲ့သည်။ " ဒီည တပ်သားတွေကိုခေါ်ပြီး တောထဲမှာ လေ့ကျင့်ရေးဆင်းနေတာ။ မိုးရွာလာတော့ အကုန်ဗွက်တွေချည်း ဖြစ်ကုန်တာ။ "

စုယွဲ့ ကူကယ်ရာမဲ့စွာ ခေါင်းခါလိုက်မိသည်။ ထို့နောက် မီးဖိုခန်းထဲ၀င်ပြီး ပေါက်စီနှစ်လုံးနှင့် ဟန်အိုက်ကောအတွက် ချန်ထားတဲ့ညစာကို ပန်းကန်ထဲ ထည့်လိုက်ကာ ရေချိုးခန်းထဲသို့ယူသွားလိုက်ကာ ရေချိုးဇလုံဘေးရှိ ခုံလေးပေါ်တွင် ၀င်ထိုင်လိုက်ပြီး ပေါက်စီတစ်လုံးကိုယူလျက် ဟန်အိုက်ကောကို ခွံ့ကျွေးလိုက်သည်။ 

ဟန်အိုက်ကောက ရေချိုးနေရင်းနဲ့ ပါးစပ်ဟပေးကာ ပေါက်စီကိုစားလိုက်သည်။ ရေချိုးရင်း စားလိုက်တော့ အချိန်ခြွေတာရာရောက်သည်။ သူတို့ လင်မယားနှစ်ယောက်က ဤသို့ ခဏခဏလုပ်လေ့ရှိနေပြီ ဖြစ်သည်။ 

" ဖြည်းဖြည်းစားဦး၊ နင်နေဦးမယ် " စုယွဲ့က ရေခွက်ကိုတေ့ပေးကာ ဟန်အိုက်ကောကို သောက်စေခဲ့သည်။ ဟန်အိုက်ကောက အသည်းအသန်မျိုချနေသည်ကိုကြည့်ရင်း စုယွဲ့ စိတ်ပူမိလာသည်။ ဟန်အိုက်ကောက လေ့ကျင့်ရေးကြောင့် အသားများလည်း ညိုလာသလို ပိန်လည်းပိန်သွားသည်။ တပ်သားများနှင့်အတူ ပြင်းထန်သော လေ့ကျင့်ခန်းများကို လုပ်နေရသဖြင့် ဟန်အိုက်ကော မခံနိုင်ဘဲ လဲသွားမှာစိုးရိမ်တာကြောင့် စုယွဲ့က အစားအသောက်က်ို ဂရုတစ်ိုက် ကျွေးနေတာဖြစ်သည်။

တော်သေးတာတစ်ခုက စုယွဲ့က အခု ကိတ်မုန့်တွေကိုလည်းလုပ်နေသလို ဟန်အိုက်ကော လစာလည်းတိုးလာသဖြင့် မိသားစုအတွက် မခက်ခဲတော့ပေ။ 

ဟန်အိုက်ကောက ဖြည်းဖြည်းချင်းစားနေရင်းဖြင့် ချစ်ရည်ရွှန်းလဲ့နေသော မျက်၀န်းများဖြင့် စုယွဲ့ကိုကြည့်နေခဲ့သည်။ ကလေးတွေက နံဘေး၌မရှိဘဲ နှစ်ယောက်တည်းနေရတဲ့ အချိန်ကရှားသောကြောင့် ဟန်အိုက်ကောအတွက် နေ့တိုင်းဆိုသလို ရေချိုးသည့်အချိန်က အမျှော်လင့်မိဆုံးအချိန် ဖြစ်လို့နေသည်။ 

ထိုသည်ကို စုယွဲ့လည်း သဘောပေါက်သဖြင့် ဘယ်လောက်ပဲ နောက်ကျနေပါစေ ဟန်အိုက်ကော ပြန်လာမှာကို စောင့်နေတက်ကာ ရေချိုးဖို့ပြင်ဆင်ပေးပြီး ညစာပါတစ်ခါတည်း ကျွေးတာဖြစ်သည်။ ကလေးများကို ဂရုစိုက်ပေးဖို့ လိုအပ်သလို ခင်ပွန်းဖြစ်သူကိုလည်း ဂရုစိုက်ပေးရမည်ပင်။ သို့ဖြစ်၍ တစ်ဖက်ကိုမှ လျစ်လျူရှုထားခြင်းမဖြစ်ရအောင် စုယွဲ့ ကြိုးစားမိသည်။ 

သို့သော်လည်း နှစ်ယောက်တည်း အတူရှိချိန်များက ရွှေလိုရှားလှသည်။ နာရီ၀က်ခန့်ကြာသောအခါ ဟန်ရှောင်ပေါင်ရဲ့ အိပ်ခန်းထဲမှ အော်ငိုသံကို ကြားလိုက်ရသည်။ ကြည့်ရတာ အမေဟန်လည်း ထိန်းမနိုင်တော့ဘူး ထင်တယ်။ 

ယခုဆို ရှောင်ပေါင်က မားဟု ခေါ်တက်နေပြီဖြစ်၍ စုယွဲ့ကိုမြင်သည်နှင့် မား မား ဟု အော်နေတက်ကာ မကြားချင်ယောင်ဆောင်၍လည်း မရပါ။ 

ဟန်အိုက်ကောက ပြုံးကာ ပြောခဲ့သည်။" တော်ပြီ၊ ကိုယ် ဗိုက်၀နေပြီ ၊ ကလေးတွေကိုပဲ သွားကြည့်လိုက်တော့ " 

စုယွဲ့ ဟန်အိုက်ကောကို လဲဖို့အ၀တ်များပေးခဲ့ကာ အိပ်ခန်းထဲ ပြန်သွားလိုက်သည်။ သူမ ၀င်လာတာကိုမြင်သည်နှင့် ဟန်ရှောင်ပေါင်က လှမ်းအော်ခဲ့သည်။ " မား..."

စုယွဲ့ သားဖြစ်သူကိုချီကာ တင်ပါးလေးကို ရိုက်ပေးလိုက်သည် ။ "'မားမားလေ၊ မဟုတ်ဘူးလား ငတုံးကောင်လေးရဲ့ "

" မား~ " ရှောင်ပေါင်က တခစ်ခစ်ရယ်ကာ ပြန်ပြောပြီးနောက် ခြေထောက်လေးများကို ကန်ကာကစားနေခဲ့သည်။ 

ဟန်အိုက်ကော ဆံပင်ရေသုတ်ကာ ထွက်လာသည်ကိုမြင်သောအခါ ရှောင်ပေါင်က လက်ဆန့်ပေးကာ သူ့ကိုချီခိုင်းခဲ့သည်။ 

ရှောင်ပေါင်က မားဟုခေါ်တက်နေပြီဖြစ်သော်လည်း အဖေဖြစ်သူကိုတော့ မခေါ်တက်သေးဘဲ အာ အာ ဟူ၍သာ အသံပေးပြီး သူ့ကို ခေါ်ခိုင်းတက်သည်။

ဟန်အိုက်ကော ပြုံးလိုက်ပြီး ရှောင်ပေါင်ကို ချီလိုက်ကာ ပါးလေးကို နမ်းလိုက်ပြီး ယခင်နေ့များလိုပင် စကားပြောသင်ပေးခဲ့သည်။ " ရှောင်ပေါင်၊ ပါးပါးလို့ခေါ်။ ပါးပါး၊ ပါးပါး "

ရှောင်ပေါင်က လက်ခုပ်လေးတီးကာ " အာ အာ  -- " ဟုသာ ပြောခဲ့သည်။ 

ဟန်အိုက်ကော လက်လျှော့လိုက်ရတော့သည်။ 

အမေဟန်၏ လက်ထဲရှိ တာ့ပေါင်က အဖေဖြစ်သူ ညီငယ်လေးကို ချီထားသည်ကိုတွေ့သောအခါ မျက်နှာငယ်လေးဖြစ်နေခဲ့သည်။ လက်တုတ်တုတ်လေးများကို စုယွဲ့ထံ ဆန့်ကာ သူ့ကိုချီခိုင်းခဲ့သည်။ 

ငြိမ်တယ်ဆိုပြီး အထင်မသေးသင့်ပေ။ တာ့ပေါင်ကလည်း တကယ်ကို လူလည်ကောင်လေးပဲ ဖြစ်သည်။ အမေဖြစ်သူရဲ့ လက်အားပြီဆိုတာနဲ့ ချီခိုင်းတက်ကာ စုယွဲ့က ရှောင်ပေါင်ကိုချီထားလျှင်တော့ အမေဟန်၏ လက်ထဲတွင်သာ ငြိမ်ငြိမ်လေးနေတက်သည်။ 

စုယွဲ့ တာ့ပေါင်ကိုခေါ်လိုက်ကာ ပါးလေးကို နမ်းလိုက်မိသည်။ တာ့ပေါင်ကလည်း အမေဖြစ်သူ၏ ရင်ခွင်ထဲသို့ ပါးဖောင်းဖောင်းလေးများဖြင့် ပွတ်သပ်ကာ ချွဲနေသည်။ 

စုယွဲ့ သူမ သားကြီးရဲ့ ပါးလေးတွေကို ညှစ်လိုက်မိသည်။ " တာ့ပေါင်လည်း မားမားလို့ခေါ်လေ၊ ညီလေးတောင် ခေါ်တက်နေပြီ။ လာပါဦး ခေါ်ပါဦး မားမားလို့၊ မား မား၊ မား မား "

တာ့ပေါင်က စုယွဲ့ ရင်ခွင်ထဲမှနေကာ ဘာမှမပြောဘဲ အတော်ကြာ မော့ကြည့်နေခဲ့သည်။ စုယွဲ့ လက်လျှော့လိုက်တော့မယ့်အချိန်တွင် တာ့ပေါင်က " မားမား " ဟုခေါ်လိုက်သည်။ 

စုယွဲ့ အံ့သြသွားမိသည်။ တာ့ပေါင်က အရင်က ဘာမှမပြောခဲ့ဖူးပဲ သူမကိုသာ မားမားဟု ပထမဆုံးခေါ်လိုက်တာဖြစ်သည်။ စကားမပြောတက်လောက်သေးဘူးလို့ ထင်ခဲ့သော်လည်း တာ့ပေါင်က မားမားလို့ ခေါ်တက်နေကာ ရှောင်ပေါက်ထက်ပင် ပိုပီသသေးသည်။ 

စုယွဲ့ တာ့ပေါင်ရဲ့ နဖူးကို နမ်းကာ ချီးကျူးပေးလိုက်သည်။ " မားမားရဲ့ တာ့ပေါင်လေးက တော်လိုက်တာ "

အမေဟန်ကလည်း ပြုံးနေခဲ့သည်။ " တကယ်တမ်းကြ တာ့ပေါင်က အကုန်သိနေလောက်တယ်၊ ထုတ်မပြောတာဘဲ နေမှာ "

တာ့ပေါင်က မားမားလို့ ခေါ်လိုက်သဖြင့် ဟန်အိုက်ကောက တာ့ပေါင်ကိုလည်း သင်ပေးခဲ့သည်။ " တ့ပေါင် ပါးပါးကိုလည်း ခေါ်ပါဦး၊ ပါးပါးလို့လေ။ ပါး ပါး ~ "

သို့သော်လည်း တာ့ပေါင်က သမ်းဝေပြကာ စုယွဲ့ အင်္ကျီကြားထဲ မျက်နှာအပ်သွားပြီး အဖေဖြစ်သူကို လျစ်လျူရှုသွားခဲ့သည်။ 

ဟန်အိုက်ကော - " ...... ငဆိုးလေးနှစ်ကောင် "

စုယွဲ့နဲ့ အမေဟန်လည်း ရယ်လိုက်မိကြသည်။ ကလေးနှစ်ယောက်လုံးက ပါးပါးလို့ မခေါ်ကြတာကြောင့် ဟန်အိုက်ကောက မကျေမနပ်ဖြစ်ကာ နေ့တိုင်းသင်ပေးနေသော်လည်း ကလေးနှစ်ယောက်က မခေါ်တက်ကြသေးပေ။ 

ခဏဆော့ပြီးနောက်တွင် ကလေးနှစ်ယောက်က ပင်ပန်းသွားကာ အိပ်ပျော်သွားကြသည်။ အမေဟန်ကလည်း အိပ်ချင်နေတာကြောင့် ပြောခဲ့သည်။" ဒါဆိုလည်း အမေ အခန်းထဲသွားတော့မယ်နော်၊ ကလေးတွေကိုတော့ နှစ်ယောက်သားပဲ ကြည့်ထားလိုက်တော့ " 

စုယွဲ့ - " ရတယ်လေ၊ အမေ စောစောအိပ်လိုက်။ မနက်ကြရင်လည်း အစောကြီးမထနဲ့တော့၊ သမီးပဲ မနက်စာပြင်လိုက်မယ်။ "

" ဟုတ်ပြီ ဟုတ်ပြီ " အမေဟန်က ပြန်ဖြေကာ သူမတို့အခန်းထဲမှ ထွက်သွားပြီး တံခါးကိုပြန်ပိတ်ပေးသွားသည်။ 

ကလေးတွေက အိပ်သွားကြပြီဖြစ်ကာ အခန်းထဲ၌ အပ်ချုပ်စက်တစ်လုံး ရောက်နေသဖြင့် ဟန်အိုက်ကောက မေးခဲ့သည်။ 

စုယွဲ့ ရှင်းပြလိုက်ကာ တိုင်ပင်ကြည့်လိုက်သည်။ " ဒါကို လက်ခံလိုက်ရင် ရှင့်ကို မထိခိုက်ဘူးမလား "

စုယွဲ့ ဘာကို စိုးရိမ်နေလဲ ဟန်အိုက်ကောသိသည်။ " ခေါင်းဆောင်ယွီတို့က ပေးချင်နေမှတော့ လက်ခံထားလိုက်ပါ။ လက်မခံဘဲနေရင် သူတို့က ကျေးဇူးကြွေးတင်နေတယ်ထင်ပြီး အားနာနေလိမ့်မယ်၊ အဲ့တော့ လက်ခံထားလိုက်။ တစ်ခြားအရာတွေကတော့ ပူမနေနဲ့။ ဘာပဲဖြစ်ဖြစ် ကိုယ်တို့က သူများကို ပေးတာမှမဟုတ်တာ။ ဘယ်သူမှ ဘာမှမပြောကြလောက်ပါဘူး။ "

စုယွဲ့လည်း ခေါင်းညိတ်ပြလိုက်ကာ တွေးပူမနေတော့ပေ။ ဒါဆိုလည်း အပ်ချုပ်စက်ကို လက်ခံလိုက်တာပေါ့၊ အစ်မရွှီးချန်လည်း စိတ်သက်သာရာရသွားလိမ့်မယ်။

အပ်ချုပ်စက်လည်း ရပြီဖြစ်သဖြင့် စုယွဲ့ ချုပ်လုပ်မှုဆိုင်ရာလက်မှတ်ကို ထုတ်ပေးလိုက်ကာ ဟန်အိုက်ကော ချေးလာသည့် ရဲဘော်လေးဆီ ပြန်ပေးခိုင်းလိုက်သည်။ " အပ်ချုပ်စက်လည်း ရှိနေပြီဆိုတော့ ဒါကိုမလိုအပ်တော့ဘူး။ ရှင် ချေးလာတဲ့သူကို ပြန်ပေးလိုက်ပါ " 

ဟန်အိုက်ကော လက်မှတ်ကို ယူနီဖောင်းထဲ ထည့်ထားလိုက်သည်။ ညလည်း နက်နေပြီဖြစ်သောကြောင့် မီးများကိုပိတ်ကာ လင်မယားနှစ်ယောက် အိပ်ရာ၀င်လိုက်ကြသည်။ 

နောက်တစ်နေ့တွင် အပြင်ဘက်မှ အသံအကျယ်ကြီးကြောင့် စုယွဲ့လန့်နိုးလာမိသည်။ မျက်လုံးများကို ဖွင့်လိုက်မိကာ ခဏအကြာတွင် အပြင်ဘက်မှ စကားသံများကိုပါ ခပ်ရေးရေးကြားလိုက်ရသည်။ 

" အစ်မကြီး၊ အစ်မကြီးရဲ့ ချွေးမရော? သူမကို မတွေ့ပါလား "

အမေဟန် -" အိပ်နေတုန်းမို့လို့လေ၊ ခဏစောင့်လိုက်ပါဦး "

အပြင်မှလူက အံ့သြသွားခဲ့သည်။ " ရှစ်နာရီတောင်ကျော်နေပြီကို အိပ်တုန်းပဲလား။ နောက်ကျနေပြီလေ။ ကျွန်မချွေးမဆိုရင် ငါးနာရီလောက်ဆို ထပြီး အခင်းထဲသွားနေပြိီ "

အမေဟန် - " ကလေးနှစ်ယောက်က ညဘက်ဆို နို့စို့ကြတော့ ညဘက်တွေ မအိပ်ရလို့။ အဲ့ဒါကြောင့် မနက်ဘက်ကို ပိုအိပ်ခိုင်းထားတာ "

" ဪ၊ ကျွန်မတို့တုန်းကတော့ ဒီလိုပါပဲ။ မီးတွင်းမှာတောင် အလုပ်လုပ်နေခဲ့ရတာ။ ကလေးမွေးထားလည်း လုပ်စရာတွေ ပုံနေတော့ စောစောမထရင် ယောက္ခမက သေအောင် ဆူတော့တာပဲ "

အမေဟန် - " အဲ့ဒါတွေက အရင်ကလေ ၊ အခုတော့ အဲ့လိုလုပ်ဖို့မလိုပါဘူး။ ကလေးမွေးရတာလွယ်တာမှ မဟုတ်တာ၊ ယွဲ့ယွဲ့လို တစ်ခါတည်း နှစ်ယောက်သာဆို ပိုဆိုးတာပေါ့ " 

"အစ်မကြီးကို ယောက္ခမတော်ရတာ ချွေးမဖြစ်သူက တကယ်ကံကောင်းတာပဲ။ ဒါပေမယ့်လည်း အစ်မကြီး အဲ့လောက် အလိုလိုက်နေလို့ မဖြစ်ဘူး။ မဟုတ်ရင် ယောက္ခမကို မလေးစားဘဲ ခေါင်းပေါ်တက်ထိုင်လာလိမ့်မယ်။ အနာဂတ်ဆိုတာက ပြောမရဘူးလေ "

အမေဟန်က ဘာမှပြန်မပြောတော့ဘဲ အခြားအကြောင်းများကိုသာ စကားလမ်းကြောင်းလွှဲလိုက်တော့သည်။ 

ထိုအခါမှသာ အပြင်မှစကားပြောနေသူက မာချွေ့ယွင်၏ ယောက္ခမဖြစ်သည်ကို စုယွဲ့သိလိုက်သည်။ နှစ်ကူးပြန်ချိန်တုန်းက ဘာဖြစ်လာလို့လဲတော့မသိ၊ မာချွေ့ယွင်၏ ယောက္ခမပါ တပ်ထဲသို့ပါလာကာ သူမတို့မိသားစုနှင့် အတူလာနေခဲ့သည်။

အမေဟန် ဧည့်မခံနိုင်တော့မှာစိုး၍ စုယွဲ့အမြန်ထကာ အင်္ကျီလဲပြီး အပြင်ထွက်လိုက်သည်။ အဖွားစွန်းကို မြင်သောအခါ စုယွဲ့ပြုံးပြီး နှုတ်ဆက်လိုက်သည်။  " မင်္ဂလာပါ ဒေါ်လေးစွန်း "

အဖွားစွန်းက စုယွဲ့ကိုမြင်သောအခါ ခုနကပြောနေသလို နောက်ကျမှထတယ် ဘာညာပြောမနေတော့ဘဲ မေးခဲ့သည်။  " ရှောင်စု နိုးပြီးလား " 

စုယွဲ့ အဖွားစွန်းလက်ထဲရှိမှ အရာများကို တစ်ချက်ကြည့်လိုက်ကာ ပြန်မေးလိုက်သည်။ " ဒေါ်လေးစွန်း ဒီလောက်အစောကြီး ဘာကိစ္စရှိလို့လဲ "

အဖွားစွန်းက သူမလက်ထဲရှိ အ၀တ်များကို ပြကာပြန်ဖြေခဲ့သည်။ " မနေ့က အပ်ချုပ်စက်အသစ်၀ယ်လာတာကို တွေ့လိုက်လို့ ငှားသုံးချင်လို့လေ။ အိမ်က အင်္ကျီတွေက ပြဲနေတော့ ပြန်ချုပ်ဖို့လိုနေတာ။ စက်နဲ့ချုပ်တာက လက်နဲ့ချုပ်တာထက်တော့ ပိုကောင်းတယ် မဟုတ်ဘူးလား။ အဒေါ့်ချွေးမနဲ့လည်း ခင်နေတာဆိုတော့ စိတ်မရှိဘူးမလား "

ဒိီအဖွားကြီးကတော့ တကယ်ပါပဲ ....

စုယွဲ့ ပြုံးကာ ပြန်ဖြေလိုက်သည်။ " စိတ်မရှိပါဘူး ဒေါ်လေးစွန်းရယ်။ လာလေ အပ်ချုပ်စက်က အခန်းထဲမှာ။ "

အဖွားစွန်းက ပျော်သွားကာ စုယွဲ့နောက်သို့ လိုက်သွားခြသည်။ အခန်းထဲသို့ ၀င်လိုက်သည်နှင့် လှည့်ပတ်ကြည့်နေကာ အားကျနေဟန်ဖြင့် ပြောခဲ့သည်။ " ရှောင်စုတို့အခန်းက လှလှပပလေး ပြင်ဆင်ထားတာပဲ။ ဒေါ်လေးတို့ အိမ်ထက်တောင် ကောင်းသေးတယ်။ အဒေါ့်ချွေးမကိုလည်း ဘယ်လိုလုပ်ရမလဲ သင်ပေးလိုက်ပါဦးအေ "

စုယွဲ့ ပြုံးပြရုံသာ ပြုံးပြလိုက်ကာ ပြန်မဖြေပေးဖြစ်ချေ။ 

ထို့နောက်လည်း ပုခတ်ထဲတွင် အိပ်နေကြသည့် တာ့ပေါင်နှင့် ရှောင်ပေါင်ကို တွေ့သွားကာ မျက်နှာလေးများကို ကိုင်ကြည့်ပြန်သည်။ " ဪ ကံကောင်းလိုက်တာ၊ ၀၀တုတ်တုတ် ကောင်လေးနှစ်ယောက်တောင်ပဲ။ အဲ့လိုသာဆို အဒေါ်လည်း ပျော်နေရမှာ။ ခက်ချင်တော့ အဒေါ့်ချွေးမက သားလေးတွေ မွေးမပေးနိုင်ဘူး။"

ထိုသို့စကားများကို မကြားချင်တော့သဖြင့် စုယွဲ့မျက်မှောင်ကြုံ့လိုက်မိကာ အပ်ချုပ်စက်အဖုံးကို ဖွင့်ပေးလိုက်ပြီး ခုံလေးတစ်ခုံ ချပေးလျက် မေးခဲ့သည်။ " ဒေါ်လေးစွန်း အပ်ချုပ်စက်နဲ့ ချုပ်တက်တယ်မလား " 

ထိုစကားများကြောင့် အဖွားစွန်းလည်း အာရုံပြောင်းသွားကာ ခုံပေါ်၌ စိတ်အားထက်သန်စွာ ၀င်ထိုင်လိုက်သည်။ " ရွာမှာတုန်းကတော့ အပ်ချုပ်စက်၀ယ်လာတဲ့ မိသားစုတစ်စုရှိလို့ သင်ထားဖူးတယ်၊ ချုပ်တက်တယ် "

ပြောပြီးနောက်တွင် ခြေနင်းကိုနင်းပြသဖြင့် စက်နင်းသံအသံထွက်လာခဲ့သည်။ 

အသံက အတော်လေးကျယ်သောကြောင့် ကလေးများ နိုးသွားမည်စိုးသဖြင့် စုယွဲ့ ကလေးနှစ်ယောက်ကို အမေဟန်၏ အခန်းထဲသို့ ပြောင်းသိပ်လိုက်သည်။ 

အမေဟန်က ကလေးနှစ်ယောက်ကို စောင်ခြုံပေးကာ စုယွဲ့က်ို ကပ်ပြောခဲ့သည်။ " မနက်က ထထချင်းပဲရှိသေးတယ်၊ တံခါးလာခေါက်ပြီး အပ်ချုပ်စက်သုံးချင်လို့လို့ ပြောတာပဲ။ ဒီမှာ ဘယ်သူမှတောင် မသုံးရသေးဘူး။ သူက အရင်ဆုံးလာသုံးရတယ်လို့။ မာချွေ့ယွင်ရဲ့ ယောက္ခမကတော့ တကယ်ကိုပဲ ..."

အမေဟန်က ဘယ်လိုစကားလုံးသုံးကာ ဖော်ပြရမည်ကိုပင် မသိတော့ချေ။

စုယွဲ့လည်း ဖျောင်းဖြလိုက်သည်။ " အမေရယ် စိတ်ထဲထားမနေပါနဲ့၊ သုံးပါစေ "

အမေဟန်က ဘာမှထပ်မပြောတော့ပေ။

ခဏအကြာတွင် မာချွေ့ယွင်က အလောတကြီး ရောက်လာခဲ့သည်။ သူမက စုယွဲ့ကို မြင်တော့ မေးခဲ့သည်။" စုယွဲ့ အစ်မရဲ့ ယောက္ခမက ညီမတို့အိမ်မှာလား။ အစ်မက ဟင်းရွက်ခင်းထဲ သွားနေတာ၊ ပြန်လာတော့ ရှောင်ထောင်းဇီက အ၀တ်တွေကိုင်ပြီး ထွက်သွားတာတွေ့လိုက်တယ်ဆိုလို့။ ညီမတို့ အိမ်ရောက်နေတာလားလို့ "