MM Story Teller

Chapter 165

Viewers 32k

🌍Chapter 165

ညမှာ မှောင်မိုက်လှသည်။ အနောက်အရပ်မှ ထူထဲသော တိမ်များမှာ ရွေ့လျားလျက် လမင်းကိုကွယ်ထားကြ၏။ ရွက်ကြွေများမှာ လမ်းဘေးတွင်စုပုံနေပြီး ကားပျက်များမှာ လမ်းမပေါ်တွင် ပိတ်ဆို့နေခဲ့သည်။ အနက်ရောင်အရိပ်တစ်ခုမှာ လမ်းအလယ်မှ ဖြတ်ခနဲဖြတ်ပြေးသွားခဲ့သည်။ ၄င်းမှာ အနီရောင်မျက်လုံးများရှိသော အဖြူရောင်ယုန်ခေါင်းတစ်ခုပင်။ ထိုယုန်ခေါင်းက သူ၏သွားကြားတွင် လူသားတစ်ဖတ်နှင့်အတူ လျင်မြန်စွာပြေးသွားခဲ့သည်။

ယုန်ခေါင်းမှာ အဆောက်အဦး၂ခုကြားသို့ခုန်လိုက်ကာ လမ်းကြားတစ်ခုသို့ပြုတ်ကျသွားခဲ့၏။

ဘန်း...

၄င်း၏နောက်မှ သေနတ်သံတစ်ခုထွက်လာခဲ့ပြီး ယုန်ခေါင်းမှာ ဘေးသို့ရုတ်ချည်းရှောင်လိုက်ကာ သူ၏နားရွက်တွင် အပေါက်တစ်ပေါက်ကို ချန်ရစ်ခဲ့သည်။ ၄င်းမှာ သူ၏နောက်မှ ပြေးလိုက်နေသောလူအား ဒေါသတကြီးဟိန်းဟောက်လိုက်ကာ အပင်တစ်ပင်ကိုဆွဲနှုတ်လျက် ထိုလူထံ ပစ်ပေါက်လိုက်သည်။ ဖူ၀မ်သော် ဘေးသို့ရှောင်လိုက်ကာ အနက်ရောင်လက်နက်ဖြင့် ထိုယုန်ခေါင်းလူကို ထိုးစိုက်လိုက်သည်။

ယုန်ခေါင်းလူမှာ ထိုခုတ်ချက်ကိုအမြန်ရှောင်လိုက်သည်။ ဖူ၀မ်သော်၏ ညာလက်မှာ နံရံကိုထိုးစိုက်မိကာ အက်ကွဲကြောင်းရှည်ကြီးတစ်ခုကိုပေါ်လာစေကာ သူ၏လက်မှာ နံရံတွင် စိုက်သွားခဲ့သည်။ ယုန်ခေါင်းက ထိုအခွင့်အရေးကိုယူလျက် အမြန်ထွက်ပြေးလိုက်သည်။ သို့သော် သူခေါင်းကိုလှည့်လိုက်ချိန်တွင် အရပ်မြင့်မြင့်ပိန်သွယ်သွယ်လူတစ်ယောက်မှာ လမ်းအဆုံးတစ်ဖက်တွင် ရပ်နေသည်ကိုတွေ့လိုက်ရလေသည်။

ထန်မော့မှာ သူ၏လက်၂ဖက်ကိုနောက်ပစ်လိုက်ကာ ထိုယုန်ခေါင်းလူကိုကြည့်လျက် ရေရွတ်လိုက်သည်။

"ငါ့အဘိုးပြန်ပေး"

အလျှံတညီးညီးမီးတောက်များမှာ တမဟုတ်ချင်း ပန်းထွက်လာခဲ့သည်။ ယုန်ခေါင်းမှာ ထိတ်လန့်စွာအော်ဟစ်လျက် သတိလက်လွတ်နောက်ဆုတ်ပြေးရန်ပြင်လိုက်လေသည်။ သို့သော် ဖူ၀မ်သော်က သူ၏နောက်တွင်ရှိနေခဲ့သည်။ သူ၏ပါးစပ်မှာမဲ့ပြုံးတစ်ခုနှင့်အတူ ကျောက်နံရံတစ်ခုကိုရှေ့သို့ကာလိုက်လေသည်။ ၄င်းမှာ ဖူ၀မ်သော်ယခုလေးတင် လက်ညပ်နေခဲ့သော နံရံပင်ဖြစ်လေသည်။

ယုန်ခေါင်းလူသည် ဖူ၀မ်သော်က လက်ညပ်သွားသော ထိုနံရံအပိုင်းကို အမှန်တကယ်သယ်လာလိမ့်မည်ဟု မျှော်လင့်မထားခဲ့ချေ။ ထိုကြီးမားသော ကျောက်နံရံကြီးမှာ ယုန်ခေါင်းနှင့် ဖူ၀မ်သော်ကြားတွင်ခြားလျက် ယုန်ခေါင်းလူ၏ပြေးပေါက်ကိုပိတ်ထားကာ မီးတောက်များက သူ့ကိုလောင်ကျွမ်းသွားခဲ့သည်။ ယုန်ခေါင်းမှာ ထွက်ပြေးရန်ကြိုးစားသော်လည်း ၄င်းမှာ လောင်ကျွမ်းနေခဲ့ပြီးဖြစ်သည်။

"ကျစ်ကျစ်"

နာနာကျင်ကျင်အော်မြည်သံများက လမ်းကြားထဲတွင်ပဲ့တင်ထပ်သွားခဲ့သည်။

မီးတောက်များငြိမ်းသွားသည်နှင့် ဖူ၀မ်သော် ကျောက်တုံးနံရံကိုဘေးသို့ဖယ်ထုတ်လိုက်သည်။ သူသည်ထိုင်ချလျက် ယုန်ခေါင်းလူ၏ မီးကျွမ်းနေသော အလောင်းကို စူးစမ်းလိုက်သည်။ ထိုအလောင်းမှာ မကြာခင်မှာပင် သစ်သားတံဆိပ်ပြားတစ်ခုအဖြစ်ပြောင်းသွားခဲ့လေသည်။ ထန်မော့၄င်းကိုကောက်ယူလိုက်ကာ ၄င်းပေါ်မှ စာလုံးကိုမြင်သော် မျက်မှောင်ကျုံ့လိုက်လေသည်။

"ထပ်ပြီး Sပဲ"

ဖူ၀မ်သော်ထရပ်လိုက်သည်။

ဤရှုပ်ထွေးသောညတွင် တိုက်ခိုက်သံများနှင့် ပေါက်ကွဲသံများကို နေရာအနှံ့တွင်ကြားနေခဲ့ရလေသည်။ သေနတ်ပစ်သံများနှင့် အဆောက်အဦးပြိုကျသံများမှာ မည်သည့်အခါမျှ ရပ်တန့်မသွားခဲ့သည်။

ထန်မော့တံဆိပ်ပြားကို အိတ်ကပ်ထဲသို့ထည့်လိုက်လေသည်။

"အခုကျွန်တော်တို့မှာ တံဆိပ်ပြား ၁၅ခုရပြီ...၁၀နာရီ၄၀လည်းရှိနေပြီ...လေးသုတ်မြောက်ကယုန်ခေါင်းလူတွေလည်း အသတ်ခံလိုက်ရပြီဆိုတော့ နည်းနည်းပဲကျန်တော့တယ်..."

ထန်မော့ခတ္တမျှတန့်သွားခဲ့သည်။

"အခြေအနေသိပ်မကောင်းဘူး"

"ကိုယ်တို့မှာ Sခုနှစ်ခု R၅ခု Uတစ်ခု Pတစ်ခုနဲ့ Eတစ်ခုရှိပြီ"

ဖူ၀မ်သော်၏ ညာလက်မှာ မူလပုံစံသို့ပြန်ပြောင်းသွားခဲ့သည်။ သူကတည်ငြိမ်စွာဆိုသည်။

" I ကလွဲလို့ ကျန်တာအကုန်ရှိတယ် အခြေအနေကဒီအတိုင်းပဲဆိုရင် မနက်ဖြန်၆နာရီမှာ ကိုယ်တို့အခြားစာလုံးတွေကို စုမိလိမ့်မယ်"

ထန်မော့တုန့်ပြန်လိုက်သည်။

"ဒါပေမယ့် ယုန်ခေါင်းလူတွေရဲ့အရေအတွက်က နည်းနည်းလာတယ်...ပြီးတော့ Sနဲ့ Rတွေကလည်း အရမ်းများနေတယ်"

လေးနာရီတွင် တံဆိပ်ပြား ၁၅ခုစုမိခြင်း။ ၄င်းမှာ ထန်မော့နှင့် ဖူ၀မ်သော်သည် ဂိမ်းကိုမကြာခင်ရှင်းနိုင်တော့မည်လိုထင်ရသည်။ ထန်မော့ ဒုတိယEကိုရရှိစဥ်က သူသည်ထိုယုန်ခေါင်းလူများကိုသတ်ခြင်းက 'surprise'ကိုပေါင်းနိုင်မည့် မတူညီသော စာလုံးများကို ရရှိစေမည်ဖြစ်သည်ဟုယူဆခဲ့သည်။ သူခန့်မှန်းခဲ့သလိုပင် ထိုတံဆိပ်ပြားများပေါ်မှစာလုံးများမှာ 'surprise'နှင့် သက်ဆိုင်နေခဲ့သည်။ သို့ဆိုလျှင်တောင် ထိုတံဆိပ်ပြား၁၅ခုထဲတွင် တူညီသော တံဆိပ်ပြားများကသာ များနေခဲ့လေသည်။

Surpriseတွင် စာလူံး ၈လုံးပါရှိသည်။ Sနှင့် Rတို့ကို ၂ကြိမ်၃ရန်လိုအပ်သော်လည်း ကျန်စာလုံးများမှာတော့ တစ်လုံးစီသာဖြစ်သည်။

ထန်မော့နှင့် ဖူ၀မ်သော်၂ယောက်လုံး Surpriseကိုပေါင်းနိုင်ရန်အတွက် Sလေးလုံး Rလေးလုံးနှင့် ကျန်စာလုံးများကို ၂လုံးစီလိုအပ်လေသည်။ သူတို့၂ဦး၏ ခွန်အားမှာ အလွန်မြင့်လှသည်။ ဤသန့်ရှင်းရေးဂိမ်းမှာ အနက်ရောင်မျှော်စင်မှ အောက်ဆုံးအဆင့်တွင် အနည်ထိုင်နေသော လူများကိုရှင်းထုတ်ပစ်ရန် ရည်ရွယ်ခြင်းဖြစ်လေသည်။ ဤဂိမ်းမှာ သူတို့နှင့်သက်ဆိုင်ခြင်းမရှိပဲ မတော်တဆ၀င်ပါမိခဲ့ခြင်းဖြစ်သည်။ သူတို့၏သန်မာမှုနှင့်ဆိုပါက ယုန်ခေါင်းလူတစ်ဦးကိုတွေ့သ၍ သစ်သားတံဆိပ်တစ်ခုကိုကျိန်းသေရနိုင်လေသည်။ သို့သော် သူတို့သည်တူညီသော တံဆိပ်ပြားများကိုသာ ထပ်ခါထပ်ခါရရှိနေခဲ့သည်။

"ကျွန်တော်တို့ ယုန်ခေါင်းတွေကိုရှာဖို့ တမင်အတူတူလာကြတာတော့မဟုတ်ဘူး...၄နာရီထဲမှာ ကျင်းနင်တို့ ရှီရှားတို့လို နန်ကျင်းရဲ့အဓိကနေရာတွေကိုလည်း ဖြတ်လာပြီးပြီ"

သူတို့နေရာစုံကိုသွားခဲ့ရသည်မှာလည်း ယုန်ခေါင်းလူများမှာ နည်းလွန်းကာ ကစားသမားအရေအတွက်ကများလွန်းနေ၍ပင်ဖြစ်လေသည်။ အသတ်မခံရသေးသော ယုန်ခေါင်းလူကိုရှာတွေ့ရန်မှာ အလွန်ခက်ခဲလှသည်။ ထန်မော့ကဆိုသည်။

"တစ်နေရာထဲကယုန်ခေါင်းတွေက တူညီတဲ့တံဆိပ်တွေပဲပေးတယ်ဆိုတဲ့ဖြစ်နိုင်ချေကိုလည်း ဖယ်ထုတ်ထားလို့မရဘူး"

ဖူ၀မ်သော်က ဆိုသည်။

"ယုန်ခေါင်းတွေကကျပန်းနေရာတွေမှာပေါ်လာတာပြီးတော့ ၁နာရီကိုတစ်ခါ.."

၂ဦးသားမှာ ရှီရှားနှင့် ပူခူးကြားမှ အစပ်သို့ လျှောက်သွားလိုက်လေသည်။ ဖူ၀မ်သော်မှာ လမ်းပေါ်မှ ယာဥ်ကြောအမှတ်အသားကိုကြည့်လိုက်ကာဆိုလိုက်သည်။

"ပူခူးကိုသွားရအောင်"

ထန်မော့ခေါင်းညိတ်လိုက်သည်။

လူ၂ယောက်မှာ မကြာခင်မှာပင် ပူခူးသို့၀င်လာခဲ့လေသည်။

နန်ကျင်းတွင် နယ်မြေ ၁၁ခုရှိလေသည်။ လူချင်းမခွဲမီက ရှောင်ကျီထုံးမှာ ထန်မော့နှင့် ဖူ၀မ်သော်ကိုဆိုခဲ့သည်။

"မင်းတို့မသိလောက်ဘူးထင်လို့ နန်ကျင်းမှာ နယ်မြေ ၁၁ခုရှိတယ်...အနက်ရောင်မျှော်စင်ကပြောခဲ့တယ်မလား နန်ကျင်းမှာ အမှိုက်ရှင်းလင်းရေးဌာန ၁၁ခုရှိတယ်...သုန်ရင်မှာ ၆ခုရှိတယ်...လို့လေ... ကျန်နေရာတွေမှာဘယ်နှစ်ခုရှိသလဲတော့မသိပေမယ့် နန်ကျင်းမှာတော့ ၁၁ခုရှိတယ်...အခုကျွန်တော်တို့ ရှင်းဟွေ့မှာ ပထမအမှိုက်ရှင်းလင်းရေးဌာနတစ်ခုကိုတွေ့ထားပြီ..ဒီတော့ကျန်တဲ့ဌာန ၁၀ခုက အဲဒီနယ်မြေ၁၀ခုမှာရှိလောက်တယ် နန်ကျင်းအဖွဲ့ကလူတွေကတော့ အခြေအနေကိုသွားကြည့်ကြမှာ ..နောက်ဆုံးနာရီပိုင်းကျရင်တော့ဒီမှာဆုံကြမှာ..ထန်မော့ မစ္စတာဖူ ခင်များတို့ ကျွန်တော်တို့ကိုရှာချင်ရင် ဒီကိုပြန်လာလို့ရပါတယ်"

ယုန်ခေါင်းများပေါ်လာသည့်နေရာမှာ ကျပန်းသာဖြစ်သော်လည်း အမှိုက်ရှင်းလင်းရေးဌာများမှာတော့အတည်တကျဖြစ်လေသည်။

မိနစ်၃၀ကြာပြီးနောက် ထန်မော့နှင့် ဖူ၀မ်သော်မှာ ပူခူးမြို့လယ်ခေါင်သို့ရောက်လာခဲ့လေသည်။ သူတို့သည် ထူးဆန်းသောအရောင်အသွေးနှင့် အဆောက်အဦးတစ်ခုကိုအဝေးမှလှမ်းမြင်လိုက်ရသည်။ ထန်မော့အနီးသို့လျှောက်သွားလိုက်ကာ ၄င်းပေါ်မှ စာလုံးများကိုကြည့်လိုက်သည်။

ထန်မော့ကဆိုသည်။

"ဒါက ၇ခုမြောက် အမှိုက်ရှင်းလင်းရေးဌာနပဲ...ရှောင်ကျီထုံးပြောခဲ့သလိုပဲ အမှိုက်ရှင်းလင်းရေးဌာနတွေက မြို့တစ်မြို့ရဲ့ အထင်ကရနေရာမှာရှိတာပဲ"

ထန်မော့၏ဦးနှောက်မှာလျင်မြန်စွာတွေးတောလိုက်သည်။

ဘာလို့ဒီနေရာမှာလဲ...

ယုန်ခေါင်းလူများ၏ တည်နေရာမှာ ကျပန်းဖြစ်သည်။ အမှိုက်ရှင်းလင်းရေးဌာနများကတော့ မြို့တစ်မြို့စီ၏ အချက်အခြာကျသော နေရာတွင်တည်ရှိလေသည်။ နန်ကျင်းကဲ့သို့ပင် ကျန်မြို့၁၀ခု၏ အမှိုက်ရှင်းလင်းရေးဌာန၁၀ခုမှာလည်း ထိုသို့ထင်ရှားသောနေရာများတွင်တည်ရှိလိမ့်မည်။ အနက်ရောင်မျှော်စင်မှာ ခရိုင်တစ်ခုတွင်ရှိသော မြို့အရေအတွက်အလိုက် အမှိုက်ရှင်းလင်းရေးဌာနများကိုချပေးထားသည်။

ဖူ၀မ်သော်ကဆိုသည်။

"အမှိုက်ရှင်းလင်းရေးဌနတွေက သူတို့နေရာတွေနဲ့ပတ်သက်ပြီး တူညီတာတစ်ခုခုရှိလိမ့်မယ်"

ထန်မော့ကတွေးလိုက်သည်။

"မြို့တိုင်းရဲ့ အထင်ကရနေရာတွေမှာ ရှိနေကြတာပဲ"

"အဲဒီလိုအထင်ကရနေရာတွေမှာလည်း လူတွေအတော်များများရှိမှာလေ"

ဖူ၀မ်သော်၏ မျက်လုံးတို့မှေးကျဥ်းသွားလျက် ခတ္တမျှတွေးလိုက်သည်။

"လူဦးရေထူထပ်တာ...အမှိုက်ရှင်းလင်းရေးဌာနအရေအတွက်ကမြို့နယ်စုစုပေါင်းအပေါ်မူတည်ပြီး ချပေးထားတာ...အထင်ကရအဖြစ်ဆုံးနဲ့ လူဦးရေအထူထပ်ဆုံးနေရာ.."

ထန်မော့မှာ ၄င်းကိုကြားလျှင် ရုတ်ချည်း အံ့အားသင့်သွားခဲ့သည်။

"နာမည်အကြီးဆုံးနေရာတွေ"

ဖူ၀မ်သော်မှာ ထန်မော့၏ ဆိုလိုရင်းကိုနားလည်သွားလျှင် မျက်မှောင်ကျုံ့လျက် ကြည့်လိုက်လေသည်။

ထန်မော့ကဆိုသည်။

"ကစားသမားတွေက ဂိမ်းကိုရှင်းဖို့ အမှိုက်ရှင်းလင်းရေးဌာနမှာ 'surprise'ကိုထည့်ဖို့လိုတာ...အမှိုက်ရှင်းလင်းရေးဌာနတွေကို အဲဒီလိုလူဦးရေထူထပ်တဲ့နေရာတွေမှာ ထားလိုက်တော့လူတိုင်းအလွယ်တကူရှာတွေ့မှာလေ...ကစားသမားတိုင်းက အဲဒီနေရာကိုတစ်ခါမှမရောက်ဖူးရင်တောင် မြို့ရဲ့အဓိကနေရာကိုရှာပြီးလာရင် ဒါကိုတွေ့မှာပဲ"

ဖူ၀မ်သော် ဆက်၍တွေးလိုက်သည်။

"ဒီလိုဆိုတော့ ကစားသမားတိုင်းက အမှိုက်ရှင်းလင်းရေးဌာနတွေရဲ့တည်နေရာကို သိကြမှာ"

ထန်မော့ကဆိုသည်။

"ဂိမ်းစပြီးလို့ နာရီပိုင်းလောက်မှာပဲ တချို့ကစားသမားတွေက အနီးဆုံးက အမှိုက်ရှင်းလင်းရေးဌာနတွေကိုတွေ့ပြီးလောက်ပြီ"

ထန်မော့၏ အသံမှာ ရပ်သွားခဲ့သည်။

အဝေးမှ အေးစက်သော လေပြည်မှာ တိုးဝှေ့လာပြီး ထန်မော့၏ ကိုယ်ပေါ်မှ ကြက်သီးမွှေးညှင်းများထသွားခဲ့ရသည်။ သူသည် ဘေးပတ်၀န်းကျင်ကို ကြည့်လိုက်လေသည်။

လက်ရှိတွင် ထန်မော့နှင့် ဖူ၀မ်သော်မှာ လမ်းဆုံတစ်ခုတွင်ရပ်နေခဲ့သည်။ ရောင်စုံအမှိုက်ရှင်းလင်းရေးဌာနမှာ ထိုလမ်းဆုံတွင်တည်ရှိနေခဲ့သည်။ လမ်းမကြီးတစ်ခုလုံးမှာ တိတ်ဆိတ်လျက် လေတိုးသံမှအပဘာကိုမျှမကြားနိုင်ချေ။

ဤနေရာတွင် မည်သူမျှရှိမနေခဲ့ချေ။ ထန်မော့နှင့်ဖူ၀မ်သော်သာလျှင် ရပ်လျက် ဘေးဘီကိုကြည့်နေသည်နှင့် တူလေသည်။

ထန်မော့မှာ နှုတ်ခမ်းကိုသပ်လိုက်ရင်း အကြည့်တို့မှာ အနီးဆုံးမှ အဆောက်အဦးနှင့် စတိုးဆိုင်များဆီဖြတ်ပြေးသွားခဲ့သည်။ ခတ္တမျှအကြာတွင် သူသည်ဖူ၀မ်သော်ကိုလှည့်ကြည့်လိုက်ကာ ၂ဦးသားမှာ တိတ်တဆိတ်သဘောတူလျက် အမှိုက်ရှင်းလင်းရေးဌာနမှထွက်ခွာသွားကြတော့သည်။ သူတို့ထွက်ခွာလာသည့်တိုင် ပတ်၀န်းကျင်တွင် လှုပ်ရှားမှု ကင်းမဲ့နေဆဲဖြစ်ကာ အမှန်တကယ်မည်သူမျှရှိမနေသလိုပင်။

ထိုစဥ် နန်ကျင်း ကူလူးတွင်...

စတိုးဆိုင်၏အလယ်တွင် ညစ်ပတ်ပေရေနေသော လူလတ်ပိုင်းကြီးမှာ လက်ထဲတွင်သစ်သားတံဆိပ်တစ်ခုကိုကျစ်ကျစ်ပါအောင်ဆုပ်လျက် ပြေးလွှားနေခဲ့လေသည်။ သူသည်ပြေးနိုင်သမျှမြန်မြန်ပြေးနေခဲ့သည်။ သူသည်မီတာ၁၀၀ခန့်ပြေးပြီးနောက်တွင် လူရွယ်၂ဦးမှာ ထောင့်ချိုးကိုကွေ့လျက် ဒေါသတကြီးအော်ဟစ်လာခဲ့သည်။

"ငါတို့တံဆိပ်ကိုပြန်ပေး..မပြေးနဲ့...တံဆိပ်ကိုပြန်ပေးလို့"

ထိုလူလတ်ပိုင်းကြီးမှာ မရပ်လိုခဲ့ချေ။ သူသည်ဆက်တိုက် လျင်မြန်စွာပြေးလွှားနေခဲ့ပြီး သူ၏နယ်မြေကျွမ်းကျင်မှုကြောင့် လမ်းကြားတစ်ခုကိုချိူးကာ ထိုလူ၂ဦးကိုချန်ထားရစ်ခဲ့လေသည်။ သို့သော် ထိုလူရွယ်၂ဦး၏ ဖြတ်လတ်မှုက ပိုသန်မာနေဆဲပင်။ သူကိုဖမ်းမိရန် ထိုထက်များများမကြာနိုင်တော့ချေ။

လူ၃ယောက်မှာ ဧရိယာတစ်ခုသို့ဖြတ်၍ပြေးလာခဲ့ကြသည်။

အချိန်များကုန်လွန်သွားပြီးနောက် လူလတ်ပိုင်းကြီးမှာ တဖြည်းဖြည်းမောပန်းလာခဲ့လေသည်။ လူ၃ဦး၏ကြားမှ အကွာအဝေးမှာ တဖြည်းဖြည်းတိုတေင်းလာခဲ့သည်။ ရုတ်ချည်းလက်တစ်ဖက်မှာ ထိုလူကြီး၏ အ၀တ်စကိုဖမ်းဆုပ်ကာ နောက်သို့အညှာအတာမဲ့စွာဆောင့်ဆွဲလိုက်လေသည်။ လူလတ်ပိုင်းကြီးမှာ နာကျင်စွာ ညည်းညူလိုက်သည်။ သူပြန်လည်းမတုန့်ပြန်နိုင်ခင်မှာပင် လက်သီးတစ်ချက်က သူ၏မျက်နှာသို့ပြေး၀င်လာခဲ့လေသည်။

"ပြေးချင်သေးတာလား...ပြေးနိုင်သေးလား ကြည့်ရတာပေါ့"

လူရွယ်မှာ ဒေါသတကြီးကျိန်ဆဲလျက် ထိုလူကြီးကိုဆက်၍ထိုးနေသော လက်သီးချက်များမှာလည်း အညှာအတာကင်းမဲ့လျက်။ သူ၏အဖော်မှာ ထိုလူကြီး၏ လက်ထဲမှ တံဆိပ်ပြားကိုဆွဲလုလိုက်ကာ ၄င်းပေါ်မှ Sကိုတွေ့လိုက်ရသည်။

ထိုလူရွယ်၂ဦးမှာ တရား၀င်ကစားသမားများဖြစ်ကြသည်။ သူတို့၏ စွမ်းရည်မှာ အမှိုက်ဆန်ကာ အလွန်မသန်မာလှသော်လည်း သာမာန် အရံကစားသမားဆစ်ဦးထက်တော့သန်မာနေဆဲပင်။ မတိုင်ခင်တွင် သူတို့သည် ပတ်၀န်းကျင်တွင် ကစားသမားများမရှိခင် ယုန်ခေါင်းတစ်ဦးနှင့်တိုးခဲ့လေသည်။ ထိုယုန်ခေါင်းကိုသတ်ရန် သူတို့၂ဦး အတော်အားထုတ်ခဲ့ရသည်။ သို့သော် သူတို့၏ တံဆိပ်ပြားမှာ ဤသက်လတ်ပိုင်းလူကြီးထံမှ ခိုးယူခံလိုက်ရလေသည်။

ခက်ခက်ခဲခဲရရှိထားသောထိုတံဆိပ်ပြားကို ထိုကစားသမား၂ဦးမှာ လက်လွှတ်နိုင်စရာအကြောင်းမရှိခဲ့ချေ။ ထိုလူလတ်ပိုင်းကြီးမှာ ထိုးကြိတ်ခံရမှုကြောင့် ဖူးယောင်လာတော့မှ တံတွေးဖြင့်ထွေးကာ ထထွက်သွားလိုက်ကြသည်။ သို့သော် သူတို့ထွက်သွားနီးမှာပင် ထိုလူကြီး၏ သွေးများရွှဲနေသော မျက်နှာပေါ်တွင် အကြင်နာကင်းမဲ့သော အရိပ်အယောင်တစ်ခုဖြတ်ပြေးသွားခဲ့သည်။ သူသည်အိတ်ထဲမှ ဓါးတစ်ချောင်းကို ရုတ်ချည်းဆွဲထုတ်လျက် အနီးဆုံးရှိလူရွယ်ကို ထိုးစိုက်လိုက်လေသည်။

"မင်းကိုသတ်မယ်"

လူရွယ်မှာ ထိတ်လန့်သွားလျက် အလျင်အမြန်ရှောင်လိုက်ပါသော်လည်း နောက်ကျသွားခဲ့လေပြီ။ သူ့ထံသို့ရောက်လာမည့်သေခြင်းတရားကို အကူအညီမဲ့စွာစောင့်ဆိုင်းနေရစဥ် သူ၏အဖော်က ရုတ်ချည်းထိုဓါးကိုလှမ်း၍ဆွဲလိုက်သည်။ ထို့နောက်သူ၏လက်တစ်ဖက်တွင်မူဓါးကိုဆုပ်ကိုင်လျက် ထိုလူကြီး၏ ရင်ဘတ်ကိုထိုးစိုက်ချလိုက်လေသည်။

လူလတ်ပိုင်းကြီးမှာ မသေခင်အထိသူတို့ကိုစိုက်ကြည့်နေခဲ့လေသည်။

လူရွယ်၂ဦးမှာ ထိုမြင်ကွင်းကိုကြည့်လျက် တုန်ရီနေခဲ့သည်။

"အစ်ကို...မင်း...မင်းလက်"

ထိုလူကြီးကိုသတ်လိုက်သော လူရွယ်မှာ တုန်ရီနေသော အသံဖြင့်ဆိုလာခဲ့သည်။

"ဘာမှမဖြစ်ဘူး...ငါ သူ့ကိုသတ်ချင်လို့မှမဟုတ်တာ သူကမင်းကိုသတ်မလို့လုပ်ခဲ့တာ"

ဤသည်မှာ သူပထမဆုံးအကြိမ်တစ်ယောက်ယောက်ကို သတ်ဖူးခြင်းပင်။

အခြားနေရာများတွင် လူသတ်ခြင်းကပုံမှန်သာဖြစ်သော်လည်း နန်ကျင်းတွင်မူ ခိုး၀င်သူများပင်လျှင် လူသတ်ခဲလှကာ အရံကစားသမားနှင့် တရား၀င်ကစားသမားများဆိုလျှင် ထည့်ပြောနေစရာပင်မလိုချေ။ ညီအစ်ကို၂ဦးမှာ တစ်ဦးကိုတစ်ဦးကြည့်လျက် တဖြည်းဖြည်းတည်ငြိမ်သွားခဲ့သည်။ သူတို့ထွက်သွားရန်ပြင်လိုက်စဥ်မှာပင် လူသတ်လိုက်သော အစ်ကိုဖြစ်သူက အံ့အားသင့်စွာရေရွတ်လာသည်။

"အဲဒါကဘာလဲ"

ညီဖြစ်သူမှာလည်း အာမေဋိတ်သံနှင့်အတူ ထိုသစ်သားတံဆိပ်ပြားကိုကောက်ယူလိုက်သည်။ သူသည် စာလုံးကိုကြည့်လျက် ရေရွတ်လာခဲ့သည်။

"ဒါလည်းတံဆိပ်ပြားတစ်ခုလား"

"ဒီတံဆိပ်ပြားကဘယ်ကရောက်လာတာလဲ မင်းတွေ့လိုက်လား"

"မတွေ့လိုက်ဘူး..ဒီတံဆိပ်ပြားက အစတည်းက ဒီနေရာမှာ ရှိမနေစရာအကြောင်းမရှိဘူးလေ...ရုတ်တရက်ကြီးပေါ်လာတာပဲ"

အစ်ကိုဖြစ်သူမှာ တန့်သွားခဲ့လေသည်။

"တံဆိပ်ပြားတစ်ခုကရုတ်တရက်ဘယ်လိုပေါ်လာမှာလဲ"

ထို့နောက်သူသည်တောင့်တင်းသွားလျက် လူလတ်ပိုင်းကြီး၏ အလောင်းကိုကြည့်လိုက်သည်။ သူကဆိုသည်။

"ကျန်တဲ့ခရိုင်၁၀ခုကကစားသမားတွေက အမှိုက်တွေလို့ပြောခဲ့တယ်လေ...ဂိမ်းကလည်း နောက်ဆုံးကျန်ရစ်သူအမှိုက်ရှင်းလင်းရေးဂိမ်း...ဒါကအမှိုက်ရှင်းလင်းရေးဂိမ်းပဲ...ကစားသမားတွေကိုသတ်ရင်လည်း တံဆိပ်ပြားတွေကိုရတယ်..ငါတို့တံဆိပ်ပြားတွေကိုရတော့မယ်"

🪩

Prev Next