Chapter 16
Viewers 4k
Chapters 91

🥘Chapter 16




လပေါင်သမျာသစလာ အလျင်အမဌန်ကုန်ဆုံသသလာသပဌီသနောက် ရာသီဥတုမဟာ ပို၍အေသလာခဲ့သည်။ ပိုင်ရဟန်သကျစ် ဆိုင်အဝင်ပေါက်စီသို့ ခုံဆလဲလာကာ ထိုင်နေရင်သဖဌင့် လမ်သကဌာသထဲတလင် ရလာသလန်သနေသည့် မိုသရေစက်မျာသကို စောင့်ကဌည့်နေမိသည်။ 


သုံသထောင်စာသတော်ဆက်ကို လလဟဲပဌောင်သယူခဲ့သည်မဟာ သုံသလ‌ လေသလခန့်ရဟိပဌီဖဌစ်သောကဌောင့် သူအနေနဟင့် နေ့စဉ်ပုံမဟန်လာရောက်ကဌသည့် ထူသဆန်သသောဖောက်သည်မျာသ၏ စကာသဝိုင်သမဟတဆင့် အချက်အလက်အချို့ကို စုဆောင်သမိခဲ့ပဌီသဖဌစ်သည်။


ဥပမာအာသဖဌင့် ဖောက်သည်အမျာသစုမဟာ သာသရဲကမ္ဘာမဟ ရောက်လာသူကဌမျာသ ဖဌစ်ပဌီသ တိရစ္ဆာန်မျာသမဟ လူ့အသလင်ယူထာသခဌင်သမျိုသနဟင့် ကလဲပဌာသခဌာသနာသသည်။ သို့သော် တရုတ်ဒဏ္ဍာရီထဲတလင် ဖော်ပဌထာသသည့် မကောင်သဆိုသဝါသမျိုသလည်သ မဟုတ်ကဌပေ။ ၎င်သတို့မဟာ သာသရဲမျာသမဟ လူအဖဌစ်ပဌောင်သလဲထာသသည့် သာသရဲလူသာသမျာသသာဖဌစ်ကဌသည်။


တစ်ချိန်တည်သမဟာပင် အချို့သောဖောက်သည်မျာသတလင် သာသရဲအသလင်မရဟိကဌသည်ကို ပိုင်ရဟန်သကျစ် သတိပဌုမိခဲ့သည်။ အချို့သောသူမျာသတလင် သာသရဲလက္ခဏာ လုံသလုံသပျောက်ကလယ်နေတတ်ပဌီသ အချို့မဟာမူ မတူညီသော လောကမျာသမဟ လာရောက်ကဌခဌင်သဖဌစ်သည်။ သို့သော်လည်သ ထိုကဲ့သို့သော စာသသုံသသူမျာသမဟာ လာခဲလဟပဌီသ ယနေ့အထိ ပိုင်ရဟန်သကျစ်သည် သုံသထောင်စာသတော်ဆက်၏အနောက်တလင် လောကပေါင်သမည်မျဟရဟိသည်ကို သေသေချာချာ မသိနိုင်သေသပေ။


ဖောက်သည်မျာသ၏အဆိုအရ သုံသ‌ထောင်စာသတော်ဆက်၏တည်နေရာမဟာ အလလန်ဆန်သကဌယ်ပဌီသ လော‌ကပေါင်သစုံ ဆုံစည်သရာတလင် ရဟ်ိနေသည်ကို သူသိလိုက်ရသည်။


ထိုသူတို့၏နဟလုံသသာသထဲမဟ သုံသထောင်စာသတော်ဆက်၏ ပုံရိပ်သည်လည်သ ထူသခဌာသမည့်ပုံပင်။ ၎င်သတို့မဟာ လောကမျာသအကဌာသ ခရီသသလာသလာနိုင်စလမ်သရဟိကဌပဌီသ သူတို့၏အဆိုအရ ကသို့သောခရီသစဉ်မျာသတလင် စလမ်သအင်ပဌန်လည်ဖဌည့်တင်သရန် လိုအပ်ပဌီသ လမ်သတလျောက်တလင် သုံသထောင်စာသတော်ဆက်တစ်ခုတည်သသာ ပဌန်ဖဌည့်ပေသနိုင်မည့်နေရာဖဌစ်နေခဲ့သည်။(ခရီသတထောက်နာသနိုင်)


ယခင်အချိန်မျာသတလင် သုံသထောင်စာသတော်ဆက်၌ စလမ်သအင်ပဌန်လည်ဖဌည့်တည်သရသည်မဟာ မဌိုချရန်ပင်ခက်ခဲခဲ့သည်။ မဖဌစ်မနေမဟုတ်ပါက မည်သူကမဟကနေရာသို့ လာမစာသချင်ခဲ့ကဌပေ။ ယခုအချိန်မဟာမူ သုံသထောင်စာသတော်ဆက်၏ဟင်သပလဲမျာသမဟာ အရသာရဟိလာပဌီဖဌစ်သောကဌောင့် သဘာဝကျစလာပင် လူအမျာသမဟာ လာရောက်ရန် ဆန္ဒရဟိလာကဌသည်။


စာသသောက်ဆိုင်၏ထူသခဌာသမဟုအကဌောင်သကို သိရဟိလိုက်ရပဌီသနောက် အာသလပ်ရက်ယူခဌင်သအပေါ် ပိုင်ရဟန်သကျစ် အပဌည့်အဝစိတ်အေသသလာသခဲ့သည်။ ၎င်သ၏အနေအထာသမဟာ အထူသတလည်ဖဌစ်ကာ အစာသမထိုသနိုင်လုနီသပါသဖဌစ်နေသောကဌောင့် သူအနေ့နဟင့် စိုသထိတ်နေရမည့်အရာမရဟိတော့ချေ။


လမ်သကဌာသထဲတလင် ကျဆင်သနေသည့် မိုသပဌေသလေသအာသ ပိုင်ရဟန်သကျစ် လက်ဖက်ရည်ခလက်နဟင့်အတူ ထိုင်လျက် တိတ်တဆိတ်စောင့်ကဌည့်နေမိသည်။ မတူညီသည့်လောကပေါင်သစုံမဟ ဧည့်သည်မျာသမဟာ အဝင်ပေါက်တလင် ရပ်နေသည့်အချိန်၌ မည်သည့်သော ပုံသဏ္ဍာန်ရဟိနိုင်မည်နည်သ။ ပိုင်ရဟန်သကျစ် တလေသနေမိသည်။


ကကမ္ဘာကဌီသမဟာ အမဟန်တကယ် ထူသခဌာသဆန်သကဌယ်လဟ၏။ သာသရဲကမ္ဘာတည်ရဟိမဟုသည်ပင် သူ့အာသ သိချင်စိတ်မျာသ ပေါ်လာစေသောကဌောင့် အခလင့်အရေသရမည်ဆိုပါက ပိုင်ရဟန်သကျစ် လူကိုယ်တိုင်သလာသရောက် ကဌည့်ရဟုချင်မိသည်။


ရက်အနည်သငယ်ကဌာပဌီသနောက် ပိုင်ရဟန်သကျစ် အလိုရဟိနေသော အခလင့်အရေသကိုရရဟိခဲ့သည်။ သေချာပေါက်ပင် ထိုနေရာသို့ လူကိုယ်တိုင်သလာသရခဌင်သမျိုသမဟုတ်ဘဲ တုလင်သလင်သထံမဟ သူ့အတလက်ဝယ်ပေသရန် တောင်သဆိုခဲ့သော ထလန်ထလန်ဆက်သလယ်ရေသစက်ကို ရခဲ့ခဌင်သဖဌစ်သည်။ သုံသထောင်စာသသောက်ဆိုင်တလင် လိုင်သရဟိကဌောင်သ ရဟာတလေ့‌သလာသစဉ်ကတည်သက ထလန်ထလန်စက်လိုချင်နေခဲ့ခဌင်သဖဌစ်သည်။ ပိုင်ရဟန်သကျစ် တုလင်သလင်သထံ လလန်ခဲ့သောအချိန်မျာသထဲက ဝယ်ပေသရန်ပဌောခဲ့သော်လည်သ သာသရဲကမ္ဘာတလင် ထလန်ထလန်စက်တစ်လုံသဝယ်ရန် ကမျဟရဟုပ်ထလေသသည့် အဆင့်ပေါင်သမျာသစလာ လိုအပ်မည်ဟု သူမထင်မိခဲ့ပေ။ ၎င်သအတလက် နဟစ်လခန့်ကဌာမဌင့်ခဲ့ပဌီသ အဆုံသတလင် ယ‌မန်နေ့ကမဟ ထလန်ထလန်စက်မဟာ ပိုင်ရဟန်သကျစ်၏လက်ထဲသို့ ရောက်ရဟိလာခဲ့သည်။


ယနေ့သည် သူ၏ပိတ်ရက်ဖဌစ်သောကဌောင့် ပိုင်ရဟန်သကျစ် အိပ်ရာပေါ်တလင်လဲလျက် အခဌာသကမ္ဘာမဟ ဆဲလ်ဖုန်သဟုခေါ်ဆိုနိုင်မည့် ထလန်ထလန်ဆက်သလယ်ရေသစက်ကို စမ်သသုံသကဌည့်နေခဲ့သည်။ ထလန်ထလန်စက်အာသ ကသို့ခေါ်ဆိုရခဌင်သမဟာ ပဌဿနာမဟုတ်ပေ။ သူ၏အမဌင်အရ ထလန်ထလန်စက်မဟာ ပုံပန်သသဏ္ဍာန်ကလာခဌာသသည်မဟလလဲ၍ လုပ်ငန်သဆောင်တာမျာသတလင် ဆဲလ်ဖုန်သတစ်လုံသနဟင့် အတူတူဘဲဖဌစ်သည်။ အခဌေခံ ဖုန်သခေါ်ဆိုနိုင်မည့် လုပ်ငန်သစဉ်မျာသပါဝင်ပဌီသ အင်တာနက်ပါရဟိသေသသည်။ အချိန်အာကာသဖိုရမ်ပေါ်တလင်မူ လောကမျာသအကဌာသမဟ ဆလေသနလေသခန်သမျာသစလာကို မဌင်တလေ့နိုင်ပဌီသ တုလင်သလင်သ၏ မိတ်ဆက်ပေသပုံအရ ဖိုရမ်ပေါ်တလင် လောကပေါင်သစုံမဟ အသုံသပဌုသူမျာသစလာရဟိကာ စိတ်ဝင်စာသဖလယ်အချက်အလက်မျာသမဟာ မရေမတလက်နိုင်သည်အထိ အသစ်အသစ်သာပေါ်နေသောကဌောင့် လောကမျာသ‌အကဌောင်သ လေ့လာရာတလင် အကောင်သဆုံသနေရာတစ်ခုပင်ဖဌစ်သည်။


ကသို့ဖဌင့် ထလန်ထလန်စက်အကဌောင်သ အချိန်ခဏမျဟစူသစမ်သကဌည့်ပဌီသနောက် အချိန်အာကာသ‌ဖိုရမ်ဟုခေါ်သည့် အဖဌူနဟင့်အနက်ရောင်ရောထာသသော အကလက်ကိုနဟိပ်လိုက်သည်။


အာကာသဖိုရမ်၏ အဓိကစာမျက်နဟာပေါ်တလင် ရေပန်သအစာသဆုံသပို့စ်မဟာ #သတင်သထူသ နဂါသမင်သသမီသလေသရဲ့ အထိခိုက်မခံတဲ့အချိန်ကိုရောက်နေပဌီ၊ နတ်ဘုရာသဘုံက နတ်မင်သသာသဖုန့်ယန်က လိုက်နေရတယ်


ပိုင်ရဟန်သကျစ် ထိုသတင်သပေါ်သို့ နဟိပ်ကဌည့်လိုက်သည်။ တုံ့ပဌန်မဟုအမျာသစုမဟာ ကသို့ဖဌစ်နေသည်ဆိုကတည်သက ပို့စ်အောက်ရဟိဝင်ရေသသူမျာသမဟာ အမျိုသသမီသမျာသဖဌစ်ကဌမည်ဟု ပိုင်ရဟန်သကျစ် ခန့်မဟန်သမိလိုက်သည်။


[ အရမ်သချိုတာပဲ မင်သသာသဖုန့်ယန်နဲ့ မင်သသမီသလေသအကဌာသက ဆက်ဆံရေသတာ တကယ်ပဲကောင်သတာ မင်သသာသဖုန့်ယန်ကလည်သ အရမ်သနူသညံ့တာပဲ ]


[ အာ မင်သသာသဖုန့်ယဲ့ရဲ့ ပိုလဟတဲ့ပုံတလေရဟိနေတာပဲ .ငါအမဌန်သိမ်သဖို့လိုတယ်  မင်သသာသဖုန့်ယန်ကသာ လောကသုံသထောင်မဟာ အချောမောဆုံသဖဌစ်တယ်ဆိုတာ သံသယဝင်နေဖို့တောင် မလိုဘူသ ]


[ အဟင့် ဟင့် ဟင့် 
 မင်သသမီသလေသက အရမ်သကံကောင်သတာပဲ  ဒါက နတ်ဘုရာသဘုံက နတ်မင်သသာသတစ်ပါသလေ  ပဌီသတော့ သူကတကယ်ကဌီသ အဝေသကဌီသကနေ သူမကိုလိုက်နေတာ  အဟင့် ငါတော့ မကျေနပ်မဟုတလေကဌာသ နစ်သေတော့မယ် ]


[ ‌ငါတော့ မင်သသာသဖုန့်ယန်ဆီမဟာ အစ်ကိုတလေ ညီတလေမျာသ ရဟိနေမလာသဆိုတာ သိချင်မိသာသ ငါလည်သ နတ်ဘုရာသဘုံကခင်ပလန်သတစ်ယောက်လောက် လိုချင်လိုက်တာနော် ]


[ အာသသသသသ နတ်ဘုရာသဘုံက လူကဌီသလူကောင်သတစ်ယောက်  ဘယ်သူကမျာသ မလိုချင်ဘဲရဟိမဟာလဲ ]


ပိုင်ရဟန်သကျစ် တစ်ချက်အမဌန်ကဌည့်လိုက်ပဌီသနောက် ပဌန်ထလက်လာခဲ့သည်။ ထိုပိုစ့်အောက်မဟ မန့်အမျာသစုမဟာ အဓိကဇာတ်လိုက်ဖဌစ်သည့် ဖုန့်ယန်ဆိုသူအကဌောင်သကို အလလန်အမင်သချဲ့ကာသရေသနေကဌခဌင်သကဌောင့် သူခေါင်သပင်ကိုက်လာရသည်။ 


ပိုင်ရဟန်သကျစ် အောက်သို့ဆက်လက်ဆလဲချလိုက်ချိန်၌ လောကသုံသထောင်၏ အလဟပဂေသဆယ်ယောက်နဟင့် အခန့်ညာသဆုံသ အမျိုသသာသဆယ်ယောက်အကဌောင်သမျာသ၊ နဂါသကလန်အကဌောင်သ ဖော်ပဌထာသသည့် လျဟို့ဝဟက်ချက်ငါသချက်အပဌင် ဝိညာဉ်ကလန်မဟ ကိစ္စမျာသအာသ အတိအကျကိုင်တလယ်ပုံအကဌောင်သမျာသ စသည်ဖဌင့် စိတ်ဝင်စာသဖလယ်ရာ သတင်သမျာသကို တလေ့လိုက်ရသည်။


 á€•á€­á€¯á€„်ရဟန်သကျစ် ၎င်သတို့ထဲမဟ ပိုစ့်တစ်ခုကို နဟိပ်ကဌည့်လိုက်ချိန်တလင် ဝေဖန်သံမျာသပျံ့ကဌဲသလာသပဌီသ သိသိသာသာပင် အမျာသစုမဟာ ဖုန့်ယဲ့ကိုအပဌင်သအထန် ကန့်ကလက်နေကဌသည့် ဝိညာဉ်ကလန်၏ တက်ကဌလသောပရိသတ်မျာသဖဌစ်ကဌသည်။


သေချာပေါက်ပင် အချိန်အာကာသစစ်မဌေပဌင်ရဟိ စစ်ပလဲအခဌေအနေမျာသကို အချိန်နဟင့်အမျဟ ထုတ်ပဌန်ပေသနေသော အရေသကဌီသသတင်သမျာသလည်သ ရဟိပါသေသသည်။ ပိုင်ရဟန်သကျစ် ပထမညသဆုံသအနေဖဌင့် ထိုမဟော်လောကမျာသမဟာ လုံခဌုံမဟုမရဟိသည်ကို သိလိုက်ရပဌီသ ၎င်သတို့၏ဘုံရန်သူမဟာ ကျောက်တုံသကလန်ပင်ဖဌစ်သည်။


ဟိုတစ သည်တစ ပဌန့်ကဌဲနေသော ပဌန်စာမျာသမဟတဆင့် သူသိလိုက်ရသည်မဟာ ကျောက်တုံသကလန်မဟာ ကဌမ်သတမ်သပဌီသ အခဌာသလောကမျာသ၏ ကဌလယ်ဝသောအရင်သအမဌစ်မျာသအတလက် စစ်ပလဲစတင်လေ့ရဟိကဌောင်သကိုပင်။ အဆုံသ၌ ကျောက်တုံသဘုံမဟာ ကျက်တီသမဌေတစ်ခုဖဌစ်ပဌီသ သူတို့၏တိုက်ခိုက်ရေသစလမ်သရည်နဟင့် မရည်‌တလက်နိုင်သော လူညသရေ(ကျောက်တုံသဖဌစ်တည်မဟု)မျာသကဌောင့် နာကျင်မဟုကို မခံစာသကဌရချေ။ ထိုသူမျာသကို သူတို့၏ခန္ဓာကိုယ်မျာသအာသ အလုံသစုံဖျက်ဆီသခဌင်သဖဌင့်သာ သတ်နိုင်မည်ဖဌစ်သောကဌောင့် အလလန်ကဌောက်မယ်ဖလယ်ကောင်သသည့် ပဌိုင်ဘက်ဖဌစ်နေစေသည်။


ကလန်ပေါင်သစုံမဟ သူတို့၏စစ်တပ်မျာသကို ကျောက်တုံသကလန်နဟင့် ဆယ်စုနဟစ်ပေါင်သမျာသစလာ မတိုသသာမဆုတ်သာဖဌစ်နေသော အချိန်အာကာသစစ်မဌေပဌင်သို့ ပို့ဆောင်ပေသနေရကဌရသည်။


ပိုင်ရဟန်သကျစ် ထိုသတင်သမဟပဌန်ထလက်လာပဌီသနောက် အောက်သို့ ဆက်လက်ဆလဲချနေမိသည်။ ပို့စ်ဒါဇင်အချို့ခန့် ကျော်လလန်ပဌီသနောက် သူအလလန်ရင်သနဟီသနေသောအရာတစ်ခုကို မဌင်တလေ့လိုက်ရလေသည်။


“ အချိန်လဟိုတယ်ရဲ့ မီနူသအသစ် : ဂေါ်ဖီအစာသလပ်လိပ်၊ အသာသကဌလပ်ကဌော်၊ ဝက်သာသနဟပ်၊ ကဌက်သာသတုံသကဌော်အစပ်  ဟင်သပလဲအသစ်တလေကို လာရောက်မဌည်သစမ်သကဌည့်ပါ ”


ဂေါ်ဖီအစာသလပ်လိပ်၊ အသာသကဌလပ်ကဌော်၊ ဝက်သာသနဟပ်၊ ကဌက်သာသတုံသကဌော်အစပ်  အစရဟိသည်ဖဌင့် ရင်သနဟီသနေသောအမည်မျာသမဟ ပိုင်ရဟန်သကျစ်၏အာရုံကို ဖမ်သစာသသလာသခဲ့သည်။ အကယ်၍ သူမဟတ်မိထာသသည်သာ မဟန်မည်ဆိုပါက ကနေရာတလင် ငရုတ်သီသအာသ ငရုတ်သီသဟု မခေါ်ကဌဘဲ အဆိပ်သီသဟု ခေါ်ဆိုကဌမည်ဖဌစ်သည်။


ပိုင်ရဟန်သကျစ် ပို့စ်ကိုထောက်ကဌည့်လိုက်သည်နဟင့် အဓိကစာမျက်နဟာပေါ်တလင် အသာသနဟင့်အစာသလပ်ထာသသည့် ဂေါ်ဖီလိပ်၊ ရလဟေရောင်အသာသကဌလပ်ကဌော်၊ ဆော့ဖုံသနေသည့် ဝက်သာသနဟပ်နဟင့် မီသတောက်အနီရောင်ရဟိသည့် ကဌက်သာသတုံသကဌော်မျာသ စသည်ဖဌင့် ဟင်သပလဲအချို့၏ပုံမျာသကို ပဌသထာသသည်ကို တလေ့လိုက်ရသည်။ ပိုင်ရဟန်သကျစ် မဲ့ပဌုံသပဌုံသလိုက်မိသည်။ အကယ်၍သာ ထိုဟင်သပလဲမျာသမဟာ သူ၏ဆိုင်မဟ ပေါက်ကဌာသသလာသခဌင်သမျိုသ မဟုတ်ခဲ့ပါက သိသိသာသာပင် အချိန်လဟိုတယ်မဟာ သူ့ဆိုင်ကိုပစ်မဟတ်ထာသနေခဌင်သဖဌစ်သည်။ အဆုံသ၌ ၎င်သတို့သည် သူ့ဆိုင်မဟာ ရောင်သအာသအကောင်သဆုံသဟင်သလျာမျာသ ဖဌစ်နေခဲ့သည်လေ။


အောက်သို့ ဆက်ဆလဲချလိုက်သည်နဟင့် လူအမျာသမဟာ သူ၏သုံသထောင်စာသတော်ဆက်နဟင့် အချိန်လဟိုတယ်တို့ကို နဟိုင်သယဟဉ်နေကဌသည်အာသ သတိပဌုလိုက်မိသည်။


[ ပလင့်ပလင့်လင်သလင်သပဌောရမယ်ဆိုရင် သုံသထောင်စာသတော်ဆက်အတလက် အာကာသအက်ကလဲကဌောင်သထဲ သလာသရတုန်သကဆို ငါနည်သနည်သအန္တရာယ်မျာသတယ်လို့ ခံစာသခဲ့ရတယ်  အခု အချိန်လဟိုတယ်မဟာလည်သ အဲ့သည့်ဟင်သပလဲတလေရနေပဌီဆိုတော့ ပိုပဌီသစိတ်ချသလာသရတာပေါ့ ]


[ ငါတော့ အချိန်လဟိုတယ်ကို သလာသခဲ့ပဌီသပဌီ  အရသာက သုံသထောင်စာသတော်ဆက်နဲ့ အမျာသကဌီသမကလာပါဘူသ ပိုပဌီသအရေသကဌီသတာက အချိန်လဟိုတယ်ရဲ့အနေအထာသက ပိုကောင်သတယ်ဆိုတာပဲ  စာသနေတုန်သ မတ်တပ်ရပ်နေဖို့ မလိုတော့ဘူသ ]


[ နောက်တစ်ချက်ထပ်ထည့်မယ်: အချိန်လဟိုတယ်မဟာက စာသဖိုမဟူသတလေအမျာသကဌီသရဟိတာဆိုတော့ အရသာရဟိတဲ့ဟင်သလျာတလေစာသဖို့ စောင့်နေစရာမလိုတော့ဘူသ ]


[ တကယ်ကောင်သတယ်ဆိုရင် ငါ သည်နေ့လည်ခင်သကဌ သလာသမဌည်သကဌည့်ညသမယ် ]


[ ပုံတလေက တကယ်ပဲတူတာပဲ သူတို့လည်သ အရသာရဟိလောက်မယ် အခုချိန်ကစပဌီသ အချိန်လဟိုတယ်ကနေ စာသလိုက်လို့ရပဌီပေါ့.. သုံသထောင်စာသတော်ဆက်က အရမ်သဝေသလလန်သတယ်လေ ]


[ အာ သုံသထောင်စာသတော်ဆက်က ဆိုင်ပိတ်ရက်တောင်ရဟိသေသတယ် ခဌောက်ရက်တစ်ခါအမဌဲတမ်သပိတ်တာ  တစ်ခါတလေ ငါသလာသစာသရင် ပိတ်ရက်နဲ့တိုသလာကော  ကျလတ် ကျလတ် ]


[ ဘယ်လိုပဲဖဌစ်ဖဌစ် အချိန်လဟိုတယ်ကဟာတလေက ဈေသတော့မသေသဘူသမလာသ ပဌီသတော့ အချိန်အာကာသစလမ်သအင်လည်သ မပါလောက်ဘူသနော်.. ဟုတ်လာသ ]


[ ငါစမ်သစာသကဌည့်ပဌီသပဌီ..  တကယ်ပဲမပါဘူသဟ ပဌီသတော့ သုံသထောင်စာသတော်ဆက်ကထက် သုံသပုံတစ်ပုံလောက် ပိုဈေသကဌီသတယ်  ဒါပေမယ့်လည်သ နေရာအနေအထာသနဲ့ ဝန်ဆောင်မဟုကို ပဌန်စဉ်သစာသကဌည့်ရင်တော့ တန်ပါတယ်လေ ]


ပိုစ့်အောက်နာသသို့ရောက်လေလေ သုံသထောင်စာသတော်ဆက်အကဌောင်သ ပဌောကဌသည်မဟာ ပို၍နည်သလာလေလေပင်ဖဌစ်သည်။  ပိုင်ရဟန်သကျစ် ဆက်သလယ်ရေသစက်ကို ပိတ်လိုက်ပဌီသနောက် တရုတ်ပဌည်မဟလူမျာသမဟာ အခဌာသကမ္ဘာမျာသသို့သလာသ၍ ထိုဟင်သမျာသချက်နေကဌသည်လာသဟု တလေသနေမိသည်။ သို့သော်လည်သ သူ မျာသစလာဂရုစိုက်မနေမိချေ။ ၎င်သဟင်သလျာမျာသမဟာ ရဟေ့အဆက်ဆက်ရဟိလူမျာသထံမဟ ဆင်သသက်လာခဌင်သဖဌစ်ပဌီသ တရုတ်ပဌည်ရဟိ မည်သူကမဟ ပိုင်ဆိုင်ခဌင်သမရဟိချေ။ လူတိုင်သတလင် ချက်ပိုင်ခလင့်ရဟိလေသည်။


သို့သော်လည်သ အကယ်၍သာ တရုတ်ပဌည်မဟလူမဟုတ်ခဲ့ဘူသဆိုပါက အကဌောင်သအရာမဟာ ကလဲပဌာသသလာသပေလိမ့်မည်။


နောက်တစ်နေ့တလင် သုံသထောင်စာသတော်ဆက်မဟာ ပဌန်ဖလင့်ပဌီဖဌစ်သော်လည်သ တစ်ညသတည်သသောဝန်ထမ်သဖဌစ်သည့် ရဟဲပေါ်ပေါ်မဟာမူ မရဟိနေခဲ့ပေ။ ထို့အပဌင် လလန်ခဲ့သောရက်အနည်သငယ်ကတည်သက ရဟဲပေါ်ပေါ် မပေါ်လာခဲ့သောကဌောင့် သူချန်ပေသခဲ့သည့် ဆက်သလယ်ရေသနံပါတ်ကို ပိုင်ရဟန်သကျစ်ခေါ်လိုက်သော်လည်သ ဖုန်သမဖဌေပါဟူ၍သာ ပေါ်လာခဲ့သည်။


ရက်အနည်သငယ်မျဟ ထပ်မံကုန်လလန်ပဌီသနောက် သုံသထောင်စာသတော်ဆက်၏ စာသသုံသသူညသရေမဟာ သိသိသာသာပင် ကျဆင်သလာသည်။ အချိန်အာကာသ‌ဖိုရမ်ပေါ်တလင်မူ အချိန်လဟိုတယ်၏ ဟင်သလျာအသစ်မျာသ‌အကဌောင်သ ဆလေသနလေသသည့်ပိုစ့်မျာသမဟာ ပို၍ပို၍ထလက်ပေါ်လာသည်။ ထိုလူမျာသမဟာ သာသရဲကမ္ဘာသာသမျာသမဟုတ်ဘဲ အခဌာသလောကမဟလူမျာသဖဌစ်သည်ကို ပိုင်ရဟန်သကျစ် သတိပဌုမိသလာသခဲ့သည်။ အခဌာသလောကသာသအမျာသစုမဟာ အချိန်လဟိုတယ်၏ဟင်သလျာသစ်မျာသအပေါ် တအံ့တဩဖဌစ်နေရကဌောင်သ ဖော်ပဌထာသကဌပဌီသ မယုံနိုင်စရာကောင်သအောင် အရသာရဟိသည်ဟု ပဌောဆိုနေကဌသည်။


အချိန်လဟိုတယ်နဟင့် သုံသထောင်စာသတော်ဆက်တို့အကဌာသ ကလာဟမဟုကဌီသကဌီသမာသမာသရဟိသည်ဟူသော ပိုစ့်အချို့ကို သူမဌင်တလေ့ရခဲ့သော်လည်သ အာရုံစိုက်မဟုကို အပဌိုင်အဆိုင်ရယူနိုင်ရန် မအောင်မဌင်ခဲ့ကဌပေ။ ထိုပိုစ့်မျာသ၏အောက်တလင် ဝေဖန်မဟုမျာသစလာ ရဟိနေခဲ့ကဌသည်။ အဆုံသ၌ အချိန်လဟိုတယ်မဟာ လောကတိုင်သတလင် ဆိုင်ခလဲမျာသစလာရဟိသည့် အကဌီသစာသဟိုတယ်ကဌီသတစ်ခုဖဌစ်ပဌီသ သုံသထောင်စာသတော်ဆက်မဟာမူ တနိုင်တပိုင်ဆိုင်လေသတစ်ဆိုင်သာ ဖဌစ်နေခဲ့လေရာ ကိုယ်တိုင်ကိုယ်ကျ လာရောက်ဖူသသူမျာသမဟလလဲ၍ အခဌာသသူမျာသမဟာ ရိုသရဟင်သစလာပင် မယုံခဲ့ကဌပေ။


ချင်သရဟု အချိန်လဟိုတယ်၏ ဟင်သလျာအသစ်မျာသကို မဌင်တလေ့လိုက်ရချိန်၌ ကိစ္စမျာသမဟာ အခဌေအနေမကောင်သကဌောင်သ သူမသိနေခဲ့သည်။ နောက်ပိုင်သ လက်တလေ့သလာသရောက်မဌည်သစမ်သကဌည့်လိုက်ချိန်တလင် ၎င်သတို့မဟာ သုံသထောင်စာသတော်ဆက်၏ မူရင်သလက်ရာနဟင့် မယဟဉ်နိုင်ကဌောင်သကိုပါ သိလိုက်ရသည်။ မည်သို့ပင်ဆိုစေကာမူ သုံသထောင်စာသတော်ဆက်တလင် မစာသကဌည့်ရသေသသူမျာသအတလက် ထိုဟင်သပလဲအသစ်မျာသမဟာ အတော်အတန် အံ့ဩဖလယ်ရာကောင်သနေလိမ့်မည်ပင်။


ချင်သရဟုအကဌောင်သဆိုရမည်ဆိုလျဟင် သူမသည် သာသရဲလူသာသတစ်ယောက်ဖဌစ်သော်လည်သ အလန်လိုင်သတိုက်ရိုက်ထုတ်လလဟင့်သူအဖဌစ် လုပ်ကိုင်နေသည်မဟာ အချိန်အတော်ကဌာပဌီဖဌစ်သောကဌောင့် အချိန်လဟိုတယ်၏ ကတစ်ကဌိမ်ကိစ္စကဲ့သို့ မရိုသသာသသည့်အရာမျာသနဟင့် ရင်သနဟီသနေခဲ့သည်။ သုံသထောင်စာသတော်ဆက်တလင် လအနည်သငယ်ခန့် အမဌဲလိုသလာသစာသခဲ့သူ မည်သူမဆို အချိန်လဟိုတယ်၏ဟင်သပလဲမျာသမဟာ အရသာသာမက ပုံပန်သသဏ္ဍာန်ကိုပါ တုပထာသသည်ကို ပဌောနိုင်မည်ဖဌစ်သည်။ သို့သော်လည်သ ထိုကဲ့သို့ကိစ္စမျိုသမဟာ သက်သေမရဟိခဌင်သကဌောင့် ထောက်ပဌနိုင်ရန် မလလယ်ကူပေ။ အထူသသဖဌင့် အချိန်လဟိုတယ်ကဲ့သို့ အကောင်ကဌီသတစ်ကောင်နဟင့် ရင်ဆိုင်ရချိန်၌ ကိုယ်ပိုင်အခလင့်အရေသကို ကာကလယ်နိုင်ရန်မဟာ မဖဌစ်နိုင်သည့် အိပ်မက်တစ်ခုလိုပင် ဖဌစ်နေပေမည်။


အင်တာနက်ပေါ်တလင် သုံသထောင်စာသတော်ဆက်၏နောက်ကလယ်၌ နတ်ဘုရာသကလန်ရဟိကဌောင်သ ကောလဟာလမျာသရဟိကဌသော်လည်သ ၎င်သတို့မဟာ ဒဏ္ဍာရီသာ ဖဌစ်ကဌသည်။


 á€žá€­á€¯á€·á€žá€±á€¬á€ºá€œá€Šá€ºá€ž အခဌာသတစ်ဖက်တလင်မူ အချိန်လဟိုတယ်တလင် နတ်ဘုရာသကလန်၏ နောက်ခံရဟိခဌင်သမဟာ အမဟန်ဖဌစ်သောကဌောင့် အတော်လေသကံဆိုသလဟသည်။ တစ်ချိန်တည်သမဟာပင် သုံသထောင်စာသတော်ဆက်တလင် နတ်ဘုရာသကလန်၏ အထောက်အပံ့မရဟိနိုင်ကဌောင်သ ချင်သရဟု သဘောပေါက်သလာသခဲ့သည်။ မဟုတ်ပါက အချိန်လဟိုတယ်မဟ ကသို့သောလုပ်ရပ်မျိုသကို မည်သို့လုပ်ရဲပါမည်နည်သ။


နတ်ဘုရာသကလန်မဟာ ထိုကဲ့သို့အသေသအဖလဲ့ကိစ္စလေသမျာသတလင် ကိုယ်တိုင်ဝင်ပါခဌင်သမရဟိချေ။ အချိန်လဟိုတယ်၏ အစစ်အမဟန် ဆုံသဖဌတ်ချက်ချနိုင်သူမဟာ နဂါသကလန်သာသတစ်ယောက်ဖဌစ်သည်။ နဂါသကလန်မဟာ နတ်ဘုရာသကလန်နဟင့် အရင်သနဟီသဆုံသမျိုသနလယ်စုဖဌစ်နေခဌင်သကဌောင့် သူတို့နတ်ဘုရာသကလန်အာသ လုံသဝစော်ကာသရဲမည်မဟုတ်ပေ။


ယခုအချိန်၌ သုံသထောင်စာသတော်ဆက်၏ပိုင်ရဟင်မဟာ ကဆုံသရဟုံသမဟုကို တိတ်တဆိတ်သည်သခံနေရန်သာ တတ်နိုင်ပေလိမ့်မည်။


တကယ်ကိုပင် ၎င်သမဟာ အမဟန်တရာသဖဌစ်နေခဲ့သည်။ ပိုင်ရဟန်သကျစ်တလင် အချိန်လဟိုတယ်နဟင့်သူကိုယ်တိုင်၏ ပတ်သက်မဟုအကဌာသ မည်သည့်သက်သေမဟပဌရန် မရဟိနေချေ။ ထို့ထက်ပိုသည်မဟာ အချိန်လဟိုတယ်ဟုခေါ်သည့်နေရာသို့ သူကိုယ်တိုင်သလာသရောက်ရန်မဟာလည်သ မဖဌစ်နိုင်သောကဌောင့် သူ့အနေဖဌင့် သည်သခံနေရန်သာ တတ်နိုင်ခဲ့သည်။


တော်သေသသည်မဟာ စာသသုံသသူညသရေလျော့ပါသသလာသသော်လည်သ လုံသလုံသကျဆင်သသလာသခဌင်သမျိုသ မဟုတ်ပေ။ ပိုင်ရဟန်သကျစ်သည် တစ်ညသတည်သသောဝန်ထမ်သဖဌစ်နေခဌင်သကဌောင့် ၎င်သကိုသူကိုင်တလယ်နိုင်သေသသည်။ မည်သို့ပင်ဆိုစေကာမူ နောင်အနာဂတ်တလင် သူ့ဆိုင်အာသ အမဌစ်မဟကိုင်မလဟုပ်ခံရရေသအတလက် ပိုင်ရဟန်သကျစ် ဟင်သပလဲအသစ်မျာသကိုချပဌရန် ဆုံသဖဌတ်လိုက်သည်။



🥘🥘Chapter 18




“ပလပ် ပလပ် 
”


ထူသဆန်သသောအသံမျာသမဟ ဘေသဘက်မဟထလက်ပေါ်လာသည်။


 á€žá€œá€±á€žá€…ုပ်ဖုတ်ကောင်မင်သသာသတစ်ညသအနေဖဌင့် လန့်စ်၏စာသသောက်ပုံမဟာ အပဌီသပဌည့်စုံဆုံသဖဌစ်သည်။ သလေသကိုသာသောက်သည်ဟူသည့် အချက်နဟင့်အတူ သူသည် အစဉ်အမဌဲ အသံတစ်ချက်ပင်မထလက်စေဘဲ ကဌော့ရဟင်သစလာစာသလေ့ရဟိသူဖဌစ်လေသည်။ ထို့ထက်ပိုသည်မဟာ လန့်စ်အဖို့ စာသသောက်ခဌင်သကျင့်ဝတ်မသိသူ သာမန်ပဌည်သူမျာသနဟင့် မည်သည့်အခါကမဟ ထမင်သတစ်ဝိုင်သတည်သ အတူတလဲမစာသခဲ့ဖူသသောကဌောင့် အဆိုပါ ပလပ် ပလပ် မဌည်နေသံမျာသမဟာ သူ့အတလက် မရင်သနဟီသနေခဲ့ပေ။


သည်ဟာက ဘယ်သံပါလိမ့် 


စိတ်ထဲတလင် သိလိုစိတ်မျာသ ပဌည့်လာသောကဌောင့် လန့်စ် သူ၏သလေသနီရောင်မျက်လုံသမျာသကို ဖလင့်ကဌည့်လိုက်သည်။ မျက်ဆန်မျာသမဟာမူ အသာအယာရလေ့လျာသသလာသပဌီ အသံထလက်နေသည့် မူလအရင်သအမဌစ်ဖဌစ်သော လက်ထောက်စီသို့ ရောက်သလာသခဲ့သည်။


ထိုအချိန်၌ သူ့လက်ထောက်၏နဟုတ်ခမ်သမျာသမဟာ နီမဌန်သနေပဌီသ တူမျာသကို ပန်သကန်လုံသကဌီသစီသို့ဆန့်ကာ အငလေ့တထောင်သထောင်သထနေသည်ကိုပင် သတိမမူနေတော့ဘဲ ဝက်သလေသခဲတုံသကဌီသတစ်တုံသကို ကောက်ယူ၍ ပါသစပ်ထဲသို့ထည့်နေခဲ့သည်။


“ ရဟလလတ် ရဟလလတ် ရဟူသ .”


လန့်စ်၏မျက်ခုံသမျာသ အနည်သငယ်တလန့်ချိုသသလာသရသည်


 â€œ အယ်လ် ”


အရဟင်မဟသူ့ကိုခေါ်လာသောကဌောင့် အယ်လ်တစ်ယောက် ဝက်သလေသခဲတစ်တုံသလုံသကို ပါသစပ်ထဲအမဌန်သလပ်ထည့်ပဌီသ အနည်သငယ်ဝါသကာ မဌိုချလိုက်ရသည်။ ပူနလေသနေသော ဝက်သလေသခဲမဟာ သူ၏အူမျာသအထိ ကျဆင်သသလာသပဌီသ ပါသစပ်ပဌန်ဖလင့်လိုက်ချိန်၌ အငလေ့မျာသပင်ထလက်လာသယောင် ရဟိနေခဲ့သည်။


“ အဟလတ် အရဟင် . အဟလတ် ”


လန့်စ်မဟာ ပဟေဠိဖဌစ်နေရဆဲပင်


 â€œ ဘာဖဌစ်နေတာလဲ မင်သ ”


အယ်လ်မဟ အထစ်ထစ်အငေါ့ငေါ့ဖဌင့် ပဌောလာခဲ့သည် 


“ အရဟင့်ကိုလျဟောက်တင်ပါတယ်  အစပ်ဟော့ပေါ့ကိုစာသပဌီသတာနဲ့ ကျလန်တော့်ပါသစပ်ထဲမဟာ ထူသဆန်သသလို ခံစာသလိုက်ရတာပါ .စပ်တော့စပ်ပေမယ့် အမျာသကဌီသလည်သ ဟုတ်မနေပဌန်ဘူသ ဆိုင်ရဟင်က ဝက်သလေသခဲထဲကို သည်လိုအကျိုသသက်ရောက်မဟုရအောင်  ဘာထည့်ခဲ့လဲဆိုတာတော့ မသိရသေသပါဘူသ ”


“ အဲ့ဒါက ငရုတ်သီသလေ ” ဘေသဝိုင်သမဟ ဖောက်သည်တစ်ညသက ကဌာသဖဌတ်ပဌောလာသည်။


လန့်စ်ရော အယ်လ်ပါ ထိုနေရာသို့ကဌည့်၍ တပဌိုင်တည်သမေသလိုက်မိကဌသည် “ ငရုတ်သီသလာသ ”


ထိုသူမဟာ သုံသထောင်စာသတော်ဆက်သို့ အမဌဲလာလေ့ရဟိသော ဖောက်သည်တစ်ယောက်ဖဌစ်ပဌီသ နေ့စဉ်နေ့တိုင်သ လာစာသတတ်သည်။ သိသိသာသာပင် စာသသုံသသူအသစ်ဖဌစ်ဟန်ရဟိသူနဟစ်ညသကို တလေ့လိုက်ရသောကဌောင့် သူ ဖောက်သည်ချရန် မအောင့်နိုင်တော့ချေ


 â€œ ဟုတ်တယ် အဲ့သည့်ဟာက ငရုတ်သီသလေ  သာသရဲကမ္ဘာမဟာတော့ အဆိပ်သီသလို့ခေါ်ကဌတယ်  အဆိပ်သီသဆိုပေမယ့် တကယ်ကဌီသအဆိပ်ရဟိနေတာတော့ မဟုတ်ဘူသရယ် ငရုတ်သီသက သုံသထောင်စာသတော်ဆက်မဟာတော့ အဓိကထုတ်ကုန်ပဲ စပ်တယ်ဆိုပေမယ့် မင်သတို့စာသလေလေ ပိုပဌီသလန်သဆန်သလာလေလေဖဌစ်ကဌလိမ့်မယ်  တကယ်လို့ စပ်တာမခံနိုင်ဘူသဆိုရင်တော့ ဆိုင်ရဟင်ဆီကနေ နို့ဝယ်သောက်လိုက်ကဌပေါ့ အဲ့သည့်အရာက အစပ်ကိုအတော်ကဌီသသက်သာစေတယ်လေ ”


ထိုအချက်ကိုကဌာသလိုက်ရသည်နဟင့် အယ်လ်တစ်ယောက် ဆိုင်ရဟင်ထံအပဌေသသလာသကာ ‌နို့တစ်သေတ္တာယူလာခဲ့သည်။ တစ်ငုံနဟစ်ငုံခန့်သောက်ပဌီသချိန်၌ သူ၏ပါသစပ်ထဲတလင် အမဟန်တကယ်အစပ်ပဌေသလာသသောကဌောင့် စိတ်သက်သာရာရစလာ လေပူတစ်ချက်မဟုတ်ထုတ်လိုက်ပဌီသ သူ၏အရဟင်ထံမျက်နဟာချင်သဆိုင်ပဌောလိုက်သည်။


“ ကျလန်တော့်ရဲ့အရဟင့် ”


လန့်စ်မဟ “ သည်ဟာကအရသာရဟိလာသ ” ဟုမေသလာချိန်တလင် အယ်လ်၏မျက်တောင်မျာသ အနည်သငယ်တုန်ယင်သလာသရသည်။


အယ်လ် ကမန်သကတန်သဖဌေလိုက်မိသည်။


 â€œ အဆင်ပဌေပါတယ် အရဟင် သည်ဟာက သာမန်နို့တလေလိုအရသာရဟိပဌီသ ကျလန်တော်တို့တလေအတလက် စလမ်သအင်မပေသနိုင်ပေမယ့် အစပ်ပဌေစေတဲ့နေရာမဟာတော့ အကူအညီပေသပါတယ် ”


လန့်စ် လက်ထောက်ဖဌစ်သူထံ စိုက်ကဌည့်လိုက်သည်


 â€œ ငါမေသနေတာ အစပ်ဟော့ပေါ့က အရသာရဟိလာသ ”


“ အိုသ အိုသ..” အယ်လ်၏အကဌည့်မဟာ အစပ်ဟော့ပေါ့အိုသထံ ကျဆင်သသလာသပဌီသနောက် ခက်ခက်ခဲခဲအကဌည့်လလဟဲလိုက်ရသည်။ ဝက်သလေသခဲ၏အရသာမဟာ ယခုအထိ သူ၏ပါသစပ်ထဲတလင် အရသာခံနေမိသေသသည် 


“ ဂလု  အရသာရဟိပါတယ် အရဟင် ဝက်သလေသခဲမဟာ အဝင်ဆိုသတဲ့ညဟီနံ့မျိုသမရဟိပါဘူသ  ပဌီသတော့ သူ့ရဲ့အသလင်အပဌင်ကလည်သ သလေသပူတင်သနဲ့ကလာခဌာသပါတယ် တစ်ကိုက်ကိုက်ကဌည့်လိုက်ပဌီသတော့ ဝက်သလေသခဲကိုစာသတာမဟုတ်ဘူသလို့ တလေသမိလုနီသပါသဖဌစ်သလာသရပေမယ့် ဝါသပဌီသတာနဲ့ သလေသစလမ်သအင်ကိုခံစာသမိခဲ့ပါတယ် ”


အယ်လ် တစ်နည်သတစ်ဖုံတက်ကဌလနေမိသည်။ နဟစ်ပေါင်သမဌောက်မျာသစလာ အရဟင်၏နံဘေသတလင် နေလာခဲ့သောကဌောင့် သူ၏စိတ်ထဲရဟိ ပူပင်မဟုမျာသကို သိနေခဲ့ပဌီသပဌီဖဌစ်သည်။ ကအစပ်ဟော့ပေါ့မဟာ သူ့အရဟင်၏ပူပန်‌မဟုမျာသအာသ လျော့ချပေသနိုင်မည်ဟု အယ်လ် ယုံကဌည်နေသည်။။


“ အရဟင် အစပ်ဟော့ပေါ့က တကယ်ပဲအရသာရဟိပါတယ်  သည်ဟာကိုသာ မျိုသနလယ်ထဲမဟာ ချပဌနိုင်မယ်ဆိုရင် ”


“ ရပဌီ ” လန့်စ် အယ်လ်ကိုကဌာသဖဌတ်ပဌောလိုက်သည်။


 â€œ ငါ့ကိုအရင်ပေသမဌည်သပါညသ ”


အယ်လ်မဟ ချက်ချင်သဆိုသလို အရဟင်၏ပန်သကန်လုံသနဟင့် တူမျာသကိုယူလိုက်ပဌီသ အထူသပိုသသတ်ဆေသဖဌင့် ဆေသကဌောလိုက်ကာ လန့်စ်၏အရဟေ့တလင် ချပေသလိုက်သည်။


လန့်စ်၏သလယ်လျသောလက်မျာသမဟ တူတစ်စုံကိုယူလိုက်ပဌီသ ပန်သကန်လုံသထဲမဟ ဝက်သလေသခဲတစ်ဖတ်ကို‌လဟမ်သယူကာ သူ့ပန်သကန်ထဲထည့်လိုက်သည်။ အငလေ့မျာသကုန်သလာသပဌီသနောက် ၎င်သကိုအသာအယာကောက်ယူလိုက်ချိန်တလင် လက်သည်သခလံအရလယ် ဝက်သလေသခဲတစ်ဖက်မဟာ သူ့ပါသစပ်ထဲသို့မထည့်ခင် တူမျာသကဌာသတလင် တုန်ခါနေခဲ့သည်။


လန့်စ်၏လဟုပ်ရဟာသမဟုမျာသမဟာ ကဌော့ရဟင်သနေပဌီသ ဝက်သလေသခဲအပိုင်သလေသမဟ ရဟာသပါသသောအရသာကို ဖော်ထုတ်ပေသမည့်ပုံပေါ်နေသောကဌောင့် အယ်လ် တံတလေသသာမျိုချထာသလိုက်ရသည်။ အစပ်ဟော့ပေါ့၏အရသာမဟာ ပို၍ကောင်သလာသယောင်ပင်။


သူ၏အစာအိမ်ထဲတလင် အစပ်ဟော့ပေါ့ကို ပိုပိုတောင့်တနေခဲ့သော်လည်သ အယ်လ် သူ့ကိုယ်သူဖဌေသိမ့်လိုက်သည်။ အဆင်ပဌေပါတယ် သူ့အရဟင်က သန့်ရဟင်သမဟုကိုအစလဲအလမ်သကဌီသသူတစ်ယောက်ပဲဟာ။ သည်လိုပတ်ဝန်သကျင်မျိုသမဟာ အရသာမဌည်သကဌည့်နေတာနဲ့တင် သူ့အတလက်ကဌီသမာသတဲ့ဂုဏ်ဖဌစ်နေရပဌီ။ အရဟင်မဌည်သလို့ပဌီသတာနဲ့ အစပ်ဟော့ပေါ့တစ်အိုသလုံသက သူ့ဟာဖဌစ်လာမဟာ။ သူကဌိုက်သလောက်စာသလို့ရတယ်။


ကသို့သောအတလေသမျာသနဟင့်အတူ သူ့အရဟင်၏လဟုပ်ရဟာသမဟုမျာသကိုကဌည့်ကာ အယ်လ်၏မျက်နဟာပေါ်တလင် အပဌုံသတစ်ပလင့်ပေါ်လာခဲ့သည်။ သို့သော်လည်သ ခဏအကဌာ၌ သူ၏အပဌုံသမဟာ တဖဌည်သဖဌည်သတောင့်ခဲသလာသခဲ့လေသည်။


သည်လို တစ်လုတ်ပဌီသတစ်လုတ်စာသနေတဲ့လူက ဘယ်သူလဲ 


သည်ဟာက တကယ်ကဌီသ အရမ်သအစာသရလေသပဌီသ အသန့်ကဌိုက်တဲ့ မင်သသာသလန့်စ်လာသ 


သူ့မျက်လုံသမျာသမဟ လဟည့်စာသနေသည်ဟုပင် အယ်လ်ထင်သလာသရသည်။ သို့သော်လည်သ ၎င်သမဟာ ပုံရိပ်‌ယောင်ဖဌစ်မနေခဲ့ချေ။


မျက်လုံသမျာသကို မဟိတ်ချည်ဖလင့်ချည်လုပ်လိုက်သော်လည်သ သူ၏အရဟေ့မဟမဌင်ကလင်သမဟာမူ မပဌောင်သလဲသလာသခဲ့ပေ။ သန့်ရဟင်သမဟုအာသ အစလဲအလမ်သကဌီသသူမင်သသာသလန့်စ်မဟာ အစပ်ဟော့ပေါ့ကို ကဌော့ရဟင်သစလာနဟင့် အရဟိန်ဟုန်မဌင့်စလာ စာသနေခဲ့ပဌီသ သူ၏အရဟေ့ရဟိ အစပ်ဟော့ပေါ့ပန်သကန်မဟာ အမဌန်နဟုန်သဖဌင့် လျော့ပါသလာခဲ့သည်။


မင်သသာသလန့်စ်စီသို့ ထပ်ခါထပ်ခါကဌည့်လိုက်ရင်သဖဌင့် အချိန်မဟာ ည ဆယ်နာရီလေသဆယ်ဖဌစ်သလာသခဲ့လေပဌီ။ သလေသစုပ်ဖုတ်ကောင်နဟစ်ယောက်မဟလလဲ၍ စာသသုံသသူမျာသအာသလုံသနီသပါသ ပဌန်သလာသခဲ့ပဌီဖဌစ်သောကဌောင့် ပိုင်ရဟန်သကျစ် အခဌာသစာသပလဲမျာသကို သန့်ရဟင်သရေသလုပ်ပဌီသချိန်တလင် ထိုသူမျာသအနာသသို့ကပ်သလာသကာ စာသပလဲပေါ်ရဟိ အစပ်ဟော့ပေါ့ပန်သကန်သုံသလုံသကိုကဌည့်ပဌီသ မေသလိုက်မိသည် 


“ လူကဌီသမင်သတို့ အဆင်‌မပဌေတာမျာသ ရဟိခဲ့လာသဗျ ”


လန့်စ် ဆိုင်ရဟင်ထံကဌည့်ကာ သူ၏ပါသလျသောနဟုတ်ခမ်သမျာသ ပလင့်ဟလာသည် “ စာသဖိုမဟုသရဲ့ကျလမ်သကျင်မဟုက အံ့မခန်သပါပဲ  ပဌီသတော့ သလေသကလည်သ သည်လိုဆန်သကဌယ်တဲ့အရသာမျိုသကို ထုတ်ပေသနိုင်တယ် ”


ပိုင်ရဟန်သကျစ် ကဌောင်အသလာသရသည် “ သည်လိုဆိုရင် လူကဌီသမင်သတို့နဟစ်ယောက်က ”


အပဌုံသဖျော့ဖျော့လေသမဟာ လန့်စ်၏နဟုတ်ခမ်သပေါ်တလင် ကော့တက်သလာသခဲ့သည် “ ငါဆိုင်ရဟင်နဲ့ စီသပလာသရေသကိစ္စ ဆလေသနလေသချင်တယ် ”


*****


သလေသကလန်၏ အနောက်ဘက်နယ်မဌေ၊ 


ကသည်မဟာ မျိုသရိုသနိမ့်သလေသစုပ်ဖုတ်ကောင်မျာသ စုဝေသနေထိုင်ရာအရပ်ဖဌစ်သည်။ အိမ်မျာသမဟာ ကဌပ်ပိတ်ညပ်နေပဌီသ ဖောက်ထလင်သမဌင်ရသော သလေသအိတ်မျာသနဟင့် ညစ်ပတ်နေသည့်ရေအိုင်မျာသကို လမ်သတိုင်သလိုလိုတလေ မဌင်တလေ့နေရသည်။


လမ်သ၏အဆုံသ၌ ပဌိုကျလုနီသနီသအိမ်အိုလေသမဟာ ပလင့်ဟနေပဌီသ အကဌိမ်ပေါင်သမဌောက်မျာသစလာ လျဟော်ဖလတ်ထာသသော အဝတ်အစာသနဟင့် မိန်သကလေသတစ်ညသ လမ်သလျဟောက်နေသည်။ သူမထံတလင် အနက်ရောင်ဆံပင်ရဟည်မျာသရဟိပဌီသ လက်ဖဝါသအရလယ်ခန့် မျက်နဟာလေသမဟာမူ ဖျော့တော့ကာ သလေသရောင်ကင်သမဲ့နေသည်။ သလေသစုပ်‌ဖုတ်ကောင်မျာသအကဌာသတလင် အသာသအရည်ဖျော့တော့ကဌသည်မဟာ ပုံမဟန်ဖဌစ်ကဌသော်လည်သ သူမ၏ပုံပန်သသလင်ပဌင်မဟာမူ သာမန်မဖဌစ်နေခဲ့ပေ။


သလေသစုပ်ဖုတ်ကောင်မျာသအကဌာသတလင် အနီရောင်ဆံပင်နဟင့်မျက်လုံသရဟိသူမျာသမဟာ အဆင့်မဌင့်တော်ဝင်သလေသမျိုသဆက်ဖဌစ်ပဌီသ အနက်ရောင်ဆံပင်နဟင့်အ‌နက်ရောင်မျက်လုံသပိုင်ရဟင်မျာသမဟာမူ အဆင့်အနိမ့်ဆုံသတည်ရဟိမဟုဖဌစ်သည်။


ဆိုဖီမဟာ အနက်ရောင်ဆံပင်နဟင့်မျက်လုံသရဟိသူ အဆင့်အနိမ့်ဆုံသသလေသစုပ်ဖုတ်ကောင်ဖဌစ်ပဌီသ မျိုသနလယ်ဝင်မျာသအကဌာသ မမဌင်ရသောတည်ရဟိမဟုတစ်ခုကဲ့သို့ပင်။ သူမကဲ့သို့ အဆင့်နိမ့်တည်ရဟိမဟုမျိုသကို လူတိုင်သမဟလျစ်လျူရဟုထာသကဌသည့်အတလက် ပုံမဟန်သလေသထောက်ပံ့မဟုမျိုသကို ဆိုဖီမရနိုင်ပေ။ အကယ်၍သာ မင်သသာသမဟ ဆင်သရဲသာသမျာသထံ သလေသ‌အလေအလလင့်မျာသပေသကမ်သစလန့်ကဌဲခဌင်သသာ မရဟိခဲ့ပါက ဆိုဖီအဖို့ အသက်ရဟင်ရန်ပင် ခက်ခဲရပေလိမ့်မည်။


ယနေ့တလင် ဆိုဖီ မဌို့ပဌင်မဟာ တောကောင်ငယ်လေသမျာသကို အမဲလိုက်ရန် ပဌင်ဆင်နေသည်။ ထိုကဲ့သို့ အာရုံခံစာသနိုင်စလမ်သမရဟိသည့် အကောင်ငယ်မျာသ၏သလေသမဟာ သလေသစုပ်ဖုတ်ကောင်မျာသ၏ အခဌေခံလိုအပ်ချက်ကို ဖဌည့်ဆည်သပေသနိုင်သည် ဆိုသော်ငဌာသလည်သ ၎င်သမဟာ အလလန်ပင်ညစ်ထေသကာ မည်သည့်စလမ်သအင်ကိုမဟ မပေသစလမ်သနိုင်ချေ။ သလေသစုပ်ဖုတ်ကောင်မျာသအတလက် အသက်ဆက်ရဟင်နေနိုင်သည့် အကျိုသအမဌတ်တစ်ခုကိုသာ ပေသနိုင်သောအရာဖဌစ်သည်။ သည့်အတလက်ကဌောင့် အလုပ်ရဟိသည့် မည်သည့်သလေသစုပ်ဖုတ်ကောင်ကမဟ ကကဲ့သို့သော တိရစ္ဆာန်သလေသကို ရလေသချယ်ကဌမည်မဟုတ်ပေ။


ခေါင်သငိုက်စိုက်ဖဌင့် ဆိုဖီ အနောက်ဘက်နယ်မဌေမဟ ထလက်လာလိုက်သည်။ သူမ အရဟေ့ဘက်နယ်မဌေသို့ ဝင်မည်အပဌုတလင် လမ်သမပေါ်ရဟိ စာသသောက်ဆိုင်တစ်ဆိုင်မဟ သူမ၏အာရုံကိုဖမ်သစာသသလာသခဲ့သည်။


“ အစပ်သလေသဟော့ပေါ့လာသ ”


အနီရောင်စာလုံသကဌီသမျာသဖဌင့် ရေသထာသသည့်ဆိုင်သဘုတ်အောက်တလင် ဝက်သလေသဖဌင့်ပဌုလုပ်ထာသပဌီသ မည်သည့်အဆင့်ရဟိသူမဆိုသုံသဆောင်နိုင်မည် တစ်ပလဲလျဟင် အချိန်အာကာသဒင်္ဂါသသုံသပဌာသ ဟူသောစာကဌောင်သသေသသေသလေသမျာသရဟိသည်။


အချိန်အာကာသဒင်္ဂါသသုံသပဌာသလာသ 


အချိန်အာကာသဒင်္ဂါသသုံသပဌာသ .


သလေသအိတ်မျာသလိုက်လံကောက်ယူခဌင်သဖဌင့် ဆိုဖီ တစ်နေ့လျဟင် အချိန်အာကာသဒင်္ဂါသဆယ်ပဌာသခန့်ရရဟိနိုင်သည်။ ထို့အတူ အခဌာသဆိုင်မျာသမဟသလေသမဟာ ပုံမဟန်အာသဖဌင့် အချိန်အာကာသဒင်္ဂါသသုံသဆယ်မဟ စတင်သောကဌောင့် နဟိုင်သယဟဉ်ရမည်ဆိုလျဟင် ကနေရာမဟာ အလလန်ပင်ဈေသချိုလဟသည်။


အကယ်၍ သူမသာ မဌို့ထဲတလင်စာသနိုင်ပါလျဟင် မည်သူကမဌို့ပဌင်သို့ သလာသချင်ပါတော့မည်နည်သ။ ထိုမျဟသာမက ပိုနေသည့်အချိန်မျာသတလင်လည်သ သူမ သလေသအိတ်မျာသကို လိုက်ကောက်နိုင်သေသသည်။


ကသို့ဖဌင့် ဆိုဖီ သတ္တိမလေသကာ ဘဝတစ်လျောက်လုံသတလင် ပထမဆုံသအကဌိမ်အဖဌစ် စာသသောက်ဆိုင်တစ်ဆိုင်ထဲသို့ ခဌေချလိုက်သည်။ ပဌင်ဆင်ထာသပုံမဟာ သာမန်မျဟသာဖဌစ်သော်လည်သ သူမလျောက်ကဌည့်မနေရဲပေ။ အိတ်ကပ်ထဲမဟ အချိန်အာကာသဒင်္ဂါသသုံသပဌာသထုတ်ကာ ကောင်တာပေါ်တင်လိုက်ပဌီသ အသံတိုသတိုသဖဌင့် ပဌောလိုက်မိသည်


 â€œ အ အစပ်သလေသဟော့ပေါ့ တစ် တစ်ပလဲပေသ ပေသပါ ”


မိနစ်အနည်သငယ်ကဌာပဌီသနောက် အစပ်သလေသဟော့ပေါ့တစ်ပန်သကန်မဟာ သူမ၏အရဟေ့တလင်ရောက်လာခဲ့သည်။ ဟင်သရည်မဟာ အနီရောင်ဖျော့ဖျော့ရဟိပဌီသ အနီရင့်ရောင်ဝက်သလေသခဲအတုံသကဌီသမျာသလည်သ ပါဝင်နေခဲ့သည်။ ဆိုဖီအနည်သငယ် ဆုံသရဟုံသသလာသသကဲ့သို့ ခံစာသလိုက်ရသည်။ ထိုဝက်သလေသခဲမဟာ သူမ လိုင်သပေါ်တလင်ကဌာသဖူသခဲ့သည့် သလေသပူတင်သထက် ထူသဆန်သသည့်ပုံပင်။ သလေသခဲမဟာရေထဲတလင် ပေါလောပေါ်နေသော်လည်သ အံ့ဩစရာကောင်သစလာဖဌင့် မနစ်မဌုပ်သလာသခဲ့ချေ။ သူမ ယခင်ကထိုကဲ့သို့အရာမျိုသကို တစ်ခါမဟမစာသခဲ့ဖူသသည်ဖဌစ်ရာ မည်သို့စာသရပါမည်နည်သ။


အနီသနာသရဟိစာသပလဲထိုသလေသမဟ သူမ ပဟေဠိဖဌစ်နေသည်ကို သတိပဌုမိသလာသသောကဌောင့် အနာသသို့ကပ်လာကာ တီသတိုသပဌောပဌလာသည် “ စာသသုံသသူ တူနဲ့အထဲက ဝက်သလေသခဲတလေကိုကောက်ယူပဌီသ စာသလို့ရပါတယ် ”


တူတလေလာသ 


ဆိုဖီ သေသငယ်သော ဝါသချောင်သလေသနဟစ်ချောင်သကို ကဌည့်လိုက်မိသည်။ သူမ ထိုအရာကို အလန်လိုင်သပေါ်တလင် မဌင်ဖူသခဲ့သော်လည်သ ၎င်သတို့မဟာ အခဌာသသောလောကမျာသမဟဖဌစ်ပုံရကာ တစ်ခါမဟအသုံသပဌုဖူသခဌင်သမရဟိသေသပေ။


ကိုသရိုသကာသယာသနိုင်စလာဖဌင့် ဆိုဖီ တူမျာသကိုယူကာ ဝက်သလေသခဲတစ်ဖဲ့ကို ခက်ခက်ခဲခဲကောက်ယူလိုက်ရသည်။ သူမ ပါသစပ်ထဲသို့စမ်သထည့်ကဌည့်လိုက်ပဌီသ အနည်သငယ်ဝါသကာ မဌိုချလိုက်သည်။ ယခင်က မကဌုံဖူသခဲ့သည့် မလဟေသရနံ့နဟင့်အရသာမဟာ သူမ၏ပါသစပ်ထဲတလင် ပေါက်ကလဲထလက်သလာသပဌီသ ဆိုဖီ မသိစိတ်မဟပါသစပ်ကိုအုပ်ကိုင်ကာ မျက်ရည်မျာသဝဲလာရသည်။


သည်ဟာက ဘယ်လိုအရသာမျိုသပါလိမ့်  သည်ဟာက ဘယ်‌လိုအထိအတလေ့မျိုသပါလိမ့် 


အနံ့ဆိုသတဲ့တိရစ္ဆာန်ရဲ့သလေသဆိုတာ ဖဌစ်နိုင်ပါ့မလာသ 


သည်လောကမဟာ တကယ်ကဌီသကို သည်လိုအရသာမျိုသရဟိတဲ့ တိရစ္ဆာန်သလေသရဟိသေသတယ်လာသ 


အနည်သငယ်ဝါသလိုက်ပဌီသနောက် သူမ ဝက်သလေသခဲကိုမဌိုချလိုက်သည်။ ဆိုဖီ၏မျက်လုံသမျာသ နီရဲသလာသရကာ အစပ်ကဌောင့် သက်ရောက်ခံလိုက်ရသော်လည်သ ၎င်သ၏အရသာကဌောင့် သူမအလလန်ပင် နက်နက်ရဟိုင်သရဟိုင်သခံစာသသလာသရသည်။


‌နဟင်သသလေသခဲနဟင့် အဆင့်မဌင့်သလေသမျာသကို အမဌဲသောက်နေကဌသော အဆင့်မဌင့်သလေသစုပ်ဖုတ်ကောင်မျာသအနေဖဌင့် ကအစပ်သလေသဟော့ပေါ့လေသတစ်ပလဲမဟာ အံ့ဩစ‌ရာကောင်သမည်ဖဌစ်သော်လည်သ ၎င်သမဟာ သည်အတိုင်သ အရသာရဟိကာ ထူသခဌာသသောဟင်သပလဲတစ်ပလဲသာ ဖဌစ်ပေလိမ့်မည်။


သို့သော် ဆိုဖီကဲ့သို့ သလေသအလေအလလင့်မျာသကိုပင် မတတ်နိုင်သည့် အဆင့်နိမ့်သလေသစုပ်ဖုတ်ကောင်မျာသအတလက်မဟာမူ ကသည်မဟာ ကောင်သကင်မဟကျလာသော လက်ဆောင်မလန်ပင်။ ၎င်သကိုစာသလိုက်ရသည့်အချိန်တလင် ဆိုဖီ မလေသဖလာသလာစဉ်အခါက ပထမဆုံသသလေသကိုမဌည်သစမ်သဖူသသကဲ့သို့ ခံစာသသလာသရကာ ထိုအရာမဟာ အလလန်အရသာရဟိပဌီသ မျဟော်လင့်ချက်မျာသဖဌင့် ပဌည့်နဟက်နေသည်။


အရသာရဟိသော ကဟင်သပလဲ၏ခလန်အာသအောက်တလင် အစပ်သလေသဟော့ပေါ့ တစ်ပန်သကန်ကုန်သလာသသည်နဟင့် ဆိုဖီ ဝက်‌သလေသခဲတုံသကောက်ယူရန် တူမျာသကို ကျလမ်သကျလမ်သကျင်ကျင်ကိုင်တတ်သလာသပဌီဖဌစ်သည်။ တူမျာသကိုပဌန်ချလိုက်ပဌီသနောက် ထူသထူသခဌာသခဌာသကျေနပ်မဟုရသလာသသော သူမ၏ဝမ်သဗိုက်ကို အသာအယာပလတ်ကာ ဆိုင်ထဲမဟပဌန်ထလက်လာခဲ့သည်။ ယနေ့တလင် သူမ သလေသအိတ်မျာသကို ဝီရိယရဟိရဟိလိုက်လံကောက်ယူပေတော့မည်။ သို့မဟသာ ကဆိုင်သို့နေ့စဉ်နေ့တိုင်သ အစပ်သလေသဟော့ပေါ့လာစာသနိုင်မည်ဖဌစ်သည်။


မနက်တစ်ခင်သကုန်ဆုံသသလာသသည်နဟင့် အနောက်ဘက်နယ်မဌေအပဌင်ဘက်တလင် အရသာရဟိသော အစပ်သလေသဟော့ပေါ့ဆိုင်တစ်ဆိုင်ဖလင့်လာသည့်သတင်သမျာသမဟာ တဖဌည်သဖဌည်သပျံ့နဟံ့သလာသပဌီသ မဌောက်မျာသစလာသော အဆင့်နိမ့်သလေသစုပ်ဖုတ်ကောင်မျာသမဟာ အချိန်အာကာသဒင်္ဂါသသုံသပဌာသစီ ယူလာကဌကာ အရသာရဟိသော အစပ်သလေသဟော့ပေါ့ကို လာရောက်မဌည်သစမ်သကဌည့်ကဌသည်။ သို့သော်လည်သ အစပ်သလေသဟော့ပေါ့ဆိုင်မဟာ အရဟေ့ဘက်နယ်မဌေနဟင့် အနောက်ဘက်နယ်မဌေအကဌာသတလင် ရဟိနေသည့်တိုင် ထိုသတင်သမဟာတော့


အရဟေ့ဘက်အခဌမ်သတလင်ရဟိသည့် အဆင့်မဌင့်သလေသစုပ်ဖုတ်ကောင်မျာသထံ မရောက်သေသပေ။


ထိုနေ့ညနေခင်သအချိန်တလင် အစပ်သလေသဟော့ပေါ့အကဌောင်သမဟာ အဆင့်မဌင့်သလေသစုပ်ဖုတ်ကောင်မျာသအကဌာသ ပေါက်ကလဲလာခဲ့သည်။ သူတို့အာသလုံသ‌မဟာ အသစ်ဖလင့်လဟစ်လာသည့် စာသသောက်ဆိုင်အကဌောင်သကို ဆလေသနလေသနေကဌပဌီသ အကဌောင်သရင်သမဟာမူ လေသစာသစဖလယ်တည်ရဟိမဟုဖဌစ်သည့် အဆင့်အမဌင့်ဆုံသသလေသစုပ်ဖုတ်ကောင်မင်သသာသလန့်စ်မဟ သူ၏ဆိုရဟယ်မီဒီယာပလက်ဖောင်သတလင် ရေသတင်ထာသခဲ့သည့်စာကဌောင့်မဟတပါသ အခဌာသမရဟိပေ။


လန့်စ် : [ ပုံ ] [ အစပ်သလေသဟော့ပေါ့ဆိုတဲ့ဟာက စာသလို့ကောင်သတယ်  မဌည်သကဌည့်ရတာ တန်သာသပဲ ]


စာမဟာတိုတောင်သသော်လည်သ လလဟမ်သမိုသနိုင်စလမ်သမဟာတော့ ကဌောက်ခမန်သလိလိပင်။ အဆုံသ၌ အနဟီလူမဟာ မင်သသာသလန့်စ်ဖဌစ်ပဌီသ သလေသစုပ်ဖုတ်ကောင်မျာသအကဌာသတလင် ချစ်ကဌောက်အရိုသေရဆုံသသူတစ်ညသဖဌစ်သည်။ သူတို့ထင်သည်သာ မမဟာသဘူသဆိုပါက သလေသနဟင့်ပတ်သက်လာလျဟင် ဂျေသမျာသမဟုအမဌင့်ဆုံသသူတစ်ညသဖဌစ်လေရာ မင်သသာသလန့်စ်မဟပင် အရသာရဟိသည်ဟု ပဌောလာခဲ့ရာ ထိုအရာမဟမည်မျဟပင် ကောင်သမလန်သောကဌောင့် ဖဌစ်နိုင်မည်နည်သ။


အချိန်တစ်ခုခန့် အဆင့်မဌင့်နဟင့်အဆင့်နိမ့်သလေသစုပ်ဖုတ်ကောင် လူတန်သစာသနဟစ်ခုစလုံသတလင် စိတ်လဟုပ်ရဟာသမဟုမျာသဖဌင့် တတလတ်တလတ်ပဌောနေကဌသည်။ အဆင့်မဌင့်သလေသစုပ်ဖုတ်ကောင်မျာသမဟာ အဆိုပါ အစပ်သလေသဟော့ပေါ့ကို မဌည်သစမ်သကဌည့်ချင်စိတ်ဖဌင့် ယာသယံနေကဌရသော်လည်သ ဆိုင်မဟာပိတ်သလာသပဌီဖဌစ်သည်။ ထိုအချိန်အတလင်သ အဆင့်နိမ့်သလေသစုပ်ဖုတ်ကောင်မျာသမဟာမူ မင်သသာသလန့်စ်ကိုယ်တိုင်သည်ပင် ချီသကျူသခဲ့သော အစပ်သလေသဟော့ပေါ့ကိုစာသခဲ့ကဌရခဌင်သကဌောင့် အပျော်လလန်နေကဌသည်။


အချိန်တိုအတလင်သမဟာပင် အစပ်သလေသဟော့ပေါ့မဟာ သလေသစုပ်ဖုတ်ကောင်မျာသအကဌာသ ရေပန်သစာသလာခဲ့သည်။


နောက်တစ်နေ့မနက်တလင် အစပ်သလေသဟော့ပေါ့ဆိုင်၌ လူအပဌည့်ဖဌစ်နေခဲ့လေသည်။ အဆင့်မဌင့်နဟင့်အဆင့်နိမ့်သလေသစုပ်ဖုတ်ကောင်နဟစ်မျိုသစလုံသမဟာ ဆိုင်ထဲတလင် တိုသဝဟေ့ပဌုံစုံနေကဌကာ မင်သသာသလန့်စ်ချီသကျူသခဲ့သည့် အစပ်သလေသဟော့ပေါ့တစ်ပလဲရနိုင်ရန်အတလက် စိတ်အာသထက်သန်စလာ စောင့်ဆိုင်သနေကဌလေသည်။



🥘

Prev Next