အခန်း(၉၃)

အခန်း(၉၃) စမ်းကြည့်ရအောင်

ရှစ်ချင်းလျို့ ထိုစကားကိုပြောပြီးတာနဲ့ ထိုနေရာတွင် ရှိနေသော ရွာသားအားလုံး မှင်သက်သွားကြသည်။

သို့သော်လည်း အများစုက ခပ်မြန်မြန်ပဲ သဘောပေါက် နားလည်သွားကြပါသည်။

"အဘွားရှောင်နဲ့ ခင်ဗျားတို့ ဆက်ဆံရေး ဘာလို့ ရုတ်တရက်ကြီး ပိုကောင်းလာတာလဲလို့ စဥ်းစားနေတာ။ လက်စသတ်တော့ ကုန်းတိုက်ဖို့ကိုး။”

"ရှင်တို့လုပ်ခဲ့တာတွေက ရက်စက်လွန်းတယ်။ တာ့လန်ရဲ့ မိန်းမက ကျွန်မတို့ရွာကပဲလေ။ ဒါတောင် ရှင်တို့တွေက ကုန်းတိုက်ကြသေးတယ်။"

"ဝူမိသားစုက အရမ်းကို ဆိုးရွားတာ။ ရှင်တို့တွေက သူတို့အတွက် ဆိုးရွားတာတွေ လုပ်ပေးနေကြတာပဲ။ ရှင်တို့တွေက ဒီလိုလူမျိုးတွေ ဖြစ်နေလိမ့်မယ်လို့ တကယ်ထင်မထားဘူး။"

"အဲ့တာကြောင့်လည်း တာ့လန်မိန်းမက ရှင်တို့မိသားစုကို မလိုချင်တာ။ သူ့နေရာမှာ ကျွန်မသာဆိုရင်လည်း လိုချင်မှာ မဟုတ်ဘူး။"

"ဟုတ်တယ်။ အချိန်တန်လို့ ရှင်တို့တွေ အကုန်လုံး ခြင်ဆေးတိုင်လုပ်နည်းတွေကို တတ်မြောက်သွားပြီး ဝူမိသားစုကို ခိုးပြောလိုက်ရင် ဘယ်လိုလုပ်မလဲ။"

"ဝူမိသားစုက တခြားသူတွေရဲ့ လျှို့ဝှက်နည်းပညာတွေကို လုယူရတာကို ကြိုက်ကြတယ်လေ။ ရှင်တို့မိသားစုက နည်းပညာခိုးဖို့အတွက် စာရင်းလာသွင်းတာလား။"

သူတို့အားလုံးက တစ်ရွာတည်းသားချင်း ဖြစ်ကြသည်။ ထို့ကြောင့် အချင်းချင်း ပဋိပက္ခဖြစ်တတ်တာ ပုံမှန်ပဲ ဖြစ်ပါသည်။

သို့သော်လည်း အပြင်လူတွေနဲ့ ပူးပေါင်းပြီး ရွာထဲကလူအချင်းချင်း ပြန်လည်ဒုက္ခပေးတာမျိုးက ရွာသားတွေ လက်ခံမည့်ကိစ္စမျိုး မဟုတ်ပေ။

ရှစ်ချင်းလျို့က ဒီအကြောင်းတွေကို သိနေလိမ့်မည်ဟု ထိုအဘွားအိုက ထင်မထားခဲ့ပါ။

သို့သော်လည်း သူမ ဝန်မခံသေးပါ။ "အဲ့အကြောင်းကို ဘယ်ကကြားလာတာလဲ။ ငါ အဲ့လိုကိစ္စမျိုး မလုပ်ဖူးပါဘူး။"

ဘယ်လိုပဲဖြစ်ဖြစ် ရှောင်မိသားစုဝင်တွေက မြို့တော်ကို ပြောင်းသွားကြပြီဖြစ်သည်။ ထို့ကြောင့် သူတို့ လူထုရှေ့မှာ အချင်းချင်း စွပ်စွဲလို့ မရပါ။

မဟုတ်ပါက ဒီကိစ္စသာ ပေါ်လာလျှင် သူတို့မိသားစုရွာထဲမှာ ဘယ်လိုရှင်သန်နိုင်မည်နည်း။ သူတို့ သူများတံတွေးခွက်ထဲ ပက်လက်မြောပြီး သေသွားနိုင်ပါသည်။

သူတို့ ရှစ်ချောင်းလျို့ကိုလည်း ဒေါသထွက်ခဲ့ကြသည်။

ဒီလိုအသေးအဖွဲကိစ္စလေးတစ်ခုကို ပြန်ပြောနေဖို့ လိုအပ်လို့လား။

ရှစ်ချင်းလျို့ကလည်း ဒါကို ပြင်ဆင်ထားပြီးသား ဖြစ်သည်။ သူမ အင်္ကျီလက်ထဲမှ စာရွက်တစ်ရွက်ကို ထုတ်ပြီး ရွာသူကြီးကို ပေးလိုက်ပါသည်။ 

"ရွာသူကြီး ကျွန်မရဲ့ အရင်အဘွားဖြစ်သူရဲ့ မိသားစုက ရွာထဲမှာ ကျန်ခဲ့ပါတယ်။ သူ့မိသားစုဝင်တွေက ကျွန်မဆီကို ဒီစာ ရေးပေးလိုက်တာပါ။”

"ဒီပေါ်က စကားလုံးတွေအကုန်လုံးက ဒီအဘွားအို ရေးထားတာဖြစ်ပြီး အဲ့ဒီအချိန်တုန်းက ဘယ်လို ကုန်းတိုက်ခဲ့သလဲဆိုတာကို ပြသနေပါတယ်။"

"ကျွန်မ အရင်အဘွားဖြစ်သူရဲ့ လက်ဗွေရာလည်း ပါပါတယ်။"

သူမ ရှောင်မိသားစုအိမ်သို့သွားခဲ့တုန်းက ရှောင်မိသားစု အကြီးဆုံးမြေးကို ဒီစာထည့်ပေးခိုင်းပြီး အဘွားရှောင်ကိုလည်း လက်ဗွေရာ နှိပ်ခိုင်းလိုက်ပါသည်။

ရှောင်မိသားစုက ဒီလိုလုပ်လို့ အရှုံးမရှိသဖြင့် သူတို့ကို ပြောထားသည့်အတိုင်း လုပ်ခဲ့ကြပါသည်။

ရွာသူကြီးက ယူကြည့်လိုက်၏။ အဘွားအိုကို စိတ်မသက်သာစွာဖြင့် ကြည့်လိုက်၏။ "ဒီမှာ သက်သေက ရှိနေပြီ။ ခင်ဗျား ဆက်ငြင်းလို့ရဦးမယ်ထင်နေလား။"

အဘွားရှောင် ဒီလောက် ရက်စက်ပြီး ရှစ်ချင်းလျို့ကို ဒီကိစ္စတွေအကြောင်းပြောကာ ရေးတောင် ရေးချထားလိမ့်မည်ဟု ထိုအဘွားအို မထင်ခဲ့ပေ။

ထိုအချိန်တွင် သူမ ရွေးစရာမရှိတော့ဘဲ ဝန်ခံလိုက်ရပါတော့သည်။

သူမ ရှက်ရွံ့စွာဖြင့်သာ ပြုံးနိုင်၏။ "ကျွန်မ စကားနည်းနည်းပဲ သတိမထားဘဲပြောခဲ့မိတာပါ။ ကုန်းတိုက်တာ မဟုတ်ရပါဘူး။"

"ကျွန်မတို့မိသားစုက ငွေရှာဖို့ ဒီအလုပ်မှာ စာရင်းလာသွင်းတာပါ။ ဝူမိသားစုနဲ့ ဘာမှ မဆိုင်ပါဘူး။"

မကြာသေးခင်ကမှ ဝူမိသားစု၏ ဂုဏ်သတင်းက ကောင်တီမြို့ထဲတွင် တိမ်ကောသွားခဲ့လေပြီ။ ရွာထဲမှာဆို ပိုလို့တောင် ဆိုးရွားပါသေးသည်။

အခုတော့ သူတို့သေချာပေါက် ဝူမိသားစုနဲ့ ပတ်သတ်လို့မရတော့ပါ။

ရှစ်ချင်းလျို့က မျက်ခုံးပင့်ကာ အဓိပ္ပာယ်ရှိစွာဖြင့် ပြောလိုက်သည်။ "ဟုတ်လား။ ဒါဆို ရှင်ခြင်ဆေးတိုင် လုပ်တတ်သွားတဲ့အခါကျရင် ဝူမိသားစုဆီ မပေါက်ကြားစေရဘူးလို့ အာမခံနိုင်လား။"

"ကျွန်မအိမ်မှာလုပ်တာက ရှင့်ကို တစ်လ ငွေပြား ၁၀၀ လောက်ပဲ ပေးနိုင်မှာ။ ဒါပေမယ့် ရှင်က ဒီနည်းပညာကို ဝူမိသားစုဆီ ရောင်းချလိုက်မယ် ဆိုရင်တော့ အနည်းဆုံး ငွေတုံးတွေ ဒါဇင်နဲ့ချီပြီးရမှာပဲ။ ငွေတုံး ၁၀၀ တောင် ကျော်နိုင်သေးတယ်။"

"အရင်တုန်းက ရှင့်မိသားစုဝင်တွေက ဝူမိသားစု စားသောက်ဆိုင်မှာ စားပွဲထိုးအဖြစ် အလုပ်လုပ်ခဲ့တာကြောင့် ကျွန်မတို့နောက်ကျောကို ရှင်ဓားနဲ့ထိုးခဲ့တာ။ အခု ဒီလို ကမ်းလှမ်းမှု ကြီးကြီးမားမား ရှိလာခဲ့ရင် ရှင် ဘယ်လိုလုပ်ပြီး တောင့်ခံနိုင်မှာလဲ။”

ထိုစကားလုံးများက အားလုံးအတွက် အဓိပ္ပာယ်ရှိပါသည်။

ငွေပြား ၁၀၀ ကို ငွေတုံး ဆယ်ချီ သို့မဟုတ် ရာနဲ့ချီပြီးတောင် ယှဥ်လိုက်ပါက သူတို့ ဘယ်အရာကို ရွေးချယ်ကြမည်နည်း။

အရင်တုန်းက သူတို့မိသားစု၏ လုပ်ရပ်ကို ကြည့်ခြင်းအားဖြင့် သူတို့ အနောက်က ရွေးချယ်ခွင့်ကိုပဲ ရွေးချယ်ကြမှာ ဖြစ်နိုင်ခြေ ပိုများပါသည်။

ပြောစရာမလိုအောင် အကျိုးကျေးဇူးကို မက်မောသွားသည့် လူတချို့ ဒီမှာ ရှိနေပါသည်။

ရှစ်ချင်းလျို့က အနားတဝိုက်ကို မျက်လုံးဖြင့် ဝေ့ကြည့်လိုက်ပြီး စိတ်ထဲတွင် နားလည်သွားပါသည်။

ဒီနေ့ မျောက်တွေကို သတိပေးဖို့ ကြက်သတ်ပြလိုက်ရုံတင်မကဘဲ နည်းပညာထိန်းသိမ်းခြင်းကိုလည်း သူမ၏ ထိပ်တန်းဦးစားပေးအဖြစ် သတ်မှတ်ခဲ့သည်။

အပြည့်အဝ စိတ်မချရသည့် စည်းမျဥ်းစည်းကမ်းများကိုပဲ အားကိုးနေလို့ မရပါ။ အဓိကအချက်က အားလုံး၏ အသိစိတ်နဲ့ အချင်းချင်း ကြီးကြပ်နိုင်မှုများအပေါ် အားကိုးဖို့ ဖြစ်ပါသည်။

ထို့ကြောင့် ထိုအဘွားအို ထပ်ပြီး ရှင်းမပြနိုင်ခင် သူမ ထပ်ပြောလိုက်ပါသည်။

"ဝူမိသားစုသာ အဲ့တာကို သင်ယူနိုင်သွားမယ်ဆို ကျွန်မတို့မိသားစု စီးပွားရေး လုယူခံရလိမ့်မယ်။ အဲ့အချိန်ကျရင် အလုပ်တွေလုပ်ဖို့အတွက် အလုပ်သမားတွေလည်း ငှားလို့ ရမှာ မဟုတ်တော့ဘူး။ ရှင်တို့မိသားစုက သူများ မိသားစုတွေ အဆင်ပြေနေတာကို မြင်ရတာ အသားမကျလို့လား။"

"တစ်ယောက်ယောက်ရဲ့ ဝင်ငွေကို ဖြတ်တောက်လိုက်တာက သူတို့မိဘတွေကို သတ်လိုက်တာနဲ့ အတူတူပဲဆိုတဲ့ ဆိုရိုးစကား ရှိတယ်။ ရှင်က တစ်ရွာလုံးကို အငြှိုးထားနေတာလား။"

ထိုစကားလုံးများကြောင့် အဘွားအို တုန်လှုပ်သွားပါသည်။ "မဟုတ်ရပါဘူး။"

တကယ်တော့ အရင်တုန်းက သူမမှာ ထိုကဲ့သို့ အတွေးများ ရှိခဲ့ဖူးပါသည်။

ငွေပြား ၁၀၀ ဆိုသည့် လစာက မနည်းပါ။ သို့သော် သူတို့ နည်းပညာကို အရယူပြီး ခိုးရောင်းဖို့က အလုပ်ရုံထဲ သူတို့ဝင်ရခြင်း၏ ရည်ရွယ်ချက် ဖြစ်ပါလိမ့်မည်။

အရင်တုန်းက သူမသားက သူမကို ရှောင်မိသားစုကို စောင့်ကြည့်ခိုင်းထားသည်။

သူမမှာ အသုံးဝင်သည့် သတင်းအချက်အလက်တချို့ ရှိလာပါက ဝူမိသားစုထံမှ ဆုလာဘ်များစွာ ရလိမ့်မည်။

ရှစ်ချင်းလျို့ဘက်က အရင်ဆုံး ထုတ်ဖော်လိုက်လိမ့်မည်ဟု ဘယ်သူမှ ထင်မထားခဲ့ကြပါ။

ထို့အပြင် သူမ တစ်ရွာလုံးကို အကာအရံအဖြစ် အသုံးချလိုက်သည်။

ချက်ချင်းပဲ အဘွားအို နောင်တရသွားသည်။ ဘာဖြစ်လို့ သူမ ခုနက ထွက်မေးလိုက်မိတာပါလိမ့်။

ထိုအချိန်တွင် တစ်ရွာလုံး၏ မျက်လုံးများက အမျက်ဒေါသများ သံသယများဖြင့် ပြည့်နှက်နေကာ သူမကို ရင်တုန်လာစေသည်။

သူမ ချက်ချင်းပဲ ပြန်ချေပလိုက်ပါသည်။ "အပြစ်မရှိတဲ့လူတွေကို နင်စွပ်စွဲလို့မရဘူး။ ငါတို့ အဲ့လိုမျိုး လုံးဝ မတွေးဖူးဘူး။"

ရှစ်ချင်းလျို့က ရွာသူကြီးလက်ထဲက စာရွက်ကို ညွှန်ပြလိုက်သည်။ "ရှင်က အဘွားရှောင်ကို ကုန်းသွားမတိုက်ခဲ့ဘူးလို့လည်း ပြောခဲ့တယ်နော်။ ဒါပေမယ့် နောက်ဆုံး သက်သေ ထွက်လာတဲ့အခါကျမှ ရှင်ဝန်ခံတယ်။"

"အဲ့တော့ ရှင့်စကားလုံးတွေက ယုံကြည်စရာ ဘာမှ မရှိဘူး။"

ရွာသားတွေလည်း တစ်ယောက်ပြီး တစ်ယောက် ဝင်ပြောကုန်ကြပါသည်။

"ဟုတ်တယ်။ ခင်ဗျား ဘာတွေတွေးနေမလဲဆိုတာ ဘယ်သူက ပြောနိုင်မှာလဲ။"

"ခင်ဗျားသာ ဝူမိသားစုကို နည်းပညာပေးလိုက်ရင် သူက သူခိုးလို့ ဘယ်သူမှ ဝန်ခံမှာ မဟုတ်တော့ဘူး။"

"ဝူမိသားစုကို သွားပေးလိုက်ရင် တခြားသူတွေရဲ့ ဝင်ငွေအရင်းအမြစ်ကို ဖျက်ဆီးပစ်တာနဲ့ အတူတူပဲ။ ခင်ဗျားက စိတ်ပုတ်လိုက်တာဗျာ။"

ဒါက အားလုံးနဲ့ သက်ဆိုင်နေသည့်ကိစ္စဖြစ်သဖြင့် အားလုံး၏ ရင်ထဲတွင် ဖြစ်သင့်သော နာကျည်းမှုများဖြင့် ပြည့်နှက်လာခဲ့၏။

အဘွားအိုက လိပ်ပြာမလုံ ဖြစ်နေသော်လည်း ဝန်မခံသေးပေ။ "မဟုတ်ဘူး။ ငါတို့ မလုပ်ခဲ့ပါဘူးဆို။"

"အဆိုးတကာ့ အဆိုးတွေ ဖြစ်လာရင် ငါတို့ ခြင်ဆေးတိုင်တွေလည်း မလုပ်တော့ဘူး။"

ဘာပဲဖြစ်ဖြစ် သူမက ရွာထဲမှာ အဘွားအိုတစ်ယောက်သာ ဖြစ်သည်။ ရှစ်ချင်းလျို့၏ လူထုရှေ့ ရန်စမှုက သူမ၏ လုပ်ရပ်များကို ပေါ်လွင်သွားစေခဲ့ပါသည်။

"ရှင်က အခု အပြစ်ရှိတဲ့ပုံပေါက်နေပြီမလား" ရှစ်ချင်းလျို့က သူမ၏ အရှိန်ကို ဆက်ပြီး ထိန်းထားသည်။

ရွာသားတွေ သူ့ကို ပိုပြီး ကြည့်ကြလေလေ အပြစ်ရှိသူနဲ့ ပိုတူလာလေလေ ဖြစ်သည်။

ထို့ကြောင့် သူတို့ အဘွားအိုနဲ့ သူမ မိသားစုကို အပြစ်တင်ခဲ့ကြသည်။

ထို့ကြောင့် အဘွားအိုနဲ့ သူမ မိသားစုတို့ ဆက်နေဖို့ ရှက်ရွံ့လာကြသည်။ သူတို့ မပါတော့ဘူးဟုသာ ပြောကာ ထွက်သွားကြပါသည်။

ဒါက သူတို့အပြစ်ရှိနေကြောင်းကို ပိုပြီး ပြသလိုက်သလိုတောင် ဖြစ်နေပါသည်။

သူတို့ထွက်သွားတာတောင် ရွာသားတွေက ဆူငေါက်နေကြဆဲ ဖြစ်၏။။

ရွာသူကြီးက ဉာဏ်ကောင်းပြီး ထက်မြက်သည့် လူတစ်ယောက် ဖြစ်သည်။

ပုံစံကိုကြည့်ရသလောက်တော့ ရှစ်ချင်းလျို့၏ ရည်ရွယ်ချက်နဲ့ သူမ၏ ကြိုတင် ကာကွယ်သော အစီအစဥ်များကို အနည်းနဲ့ အများဆိုသလို ခန့်မှန်းမိပါသည်။

ရှစ်ချင်းလျို့ကို အပြစ်လည်း မတင်ချင်သလို မကန့်လည်း မကန့်ကွက်ချင်သည့်အပြင် သူကပါ မှန်ကန်သည်ဟု ခံစားမိနေပါသည်။

နောက်ဆုံးတော့ ရွာသားတွေ စမှတ်ကောင်းကောင်း ရလာခဲ့ပြီဖြစ်သဖြင့် ကြွက်ချေးတချို့ကို လမ်းမှာ လာရှုပ်ခွင့်ပေးလို့ မဖြစ်ပါ။

ထို့ကြောင့် လက်မြောက်ကာ ပြောလိုက်သည်။ "အားလုံးပဲ ခဏလောက် တိတ်ကြပြီး ကျုပ်ပြောတာ နားထောင်ပေးကြပါ။"

ရွာသူကြီးက ရွာထဲမှာ ဂုဏ်သိက္ခာ မြင့်မားသဖြင့် အားလုံး အမြန် တိတ်ဆိတ်သွားကြပါသည်။

"ဒီကိစ္စက ကျုပ်တို့ကိုလည်း အသိပေးလိုက်သလိုပဲ။ ကျုပ် ဒီမှာ သတင်းတစ်ခုပါးပါရစေ။"

"အနာဂတ်မှာ ရှောင်မိသားစုရဲ့ အလုပ်ရုံတွေမှာပဲ ဖြစ်ဖြစ် တခြားဘယ်နေရာမှာပဲဖြစ်ဖြစ် အလုပ်လုပ်တဲ့အခါ နည်းပညာတွေ ရောင်းစားခွင့်၊ လျှို့ဝှက်ချက်တွေ ရောင်းစားခွင့် မရှိဘူးနော်။"

"မဟုတ်ရင် တစ်ရွာလုံးကို ပုန်ကန်လိုက်သလိုမျိုးပဲ။ ပြင်းပြင်းထန်ထန် အပြစ်ပေးခံရမယ်။"

"ကြီးမားတဲ့ကိစ္စတစ်ခုဆိုရင် ရွာထဲက ချက်ချင်း မောင်းထုတ်ခံရမယ်။"

စည်းမျဥ်းစည်းကမ်းတွေကို မတင်းကြပ်ထားပါက စည်းကျော်ပြီး ကိုယ်ပိုင် အကျိုးခံစားခွင့်များအတွက် လဲလှယ်တတ်ကြသည့် လူတွေ အမြဲတမ်း ရှိနေလိမ့်မည်။

ရွာသူကြီး၏ စကားကြောင့် လူအားလုံး ကြက်သေ သေသွားကြပါသည်။

သို့သော်လည်း ဒါက အဓိပ္ပာယ်တော့ ရှိသည်။ တစ်ယောက်ယောက်သာ နည်းပညာကို ခိုးယူပြီး ရောင်းစားလိုက်ပါက ရှောင်မိသားစု၏ လုပ်ငန်းကို အနှောင့်အယှက်ဖြစ်စေရုံသာမကဘဲ လူအားလုံးကိုပါ ထိခိုက်စေပါလိမ့်မည်။

အရေးအကြီးဆုံးက ရွာ၏ နာမည်ကိုပါ ပျက်စေလိမ့်မည်။

"ဟုတ်တယ်။ နောက်ပိုင်းကျရင် ရွာနာမည်ပျက်စေမယ့် ဒီလိုကိစ္စမျိုး ဘယ်သူမှ မလုပ်ရဘူး။ မဟုတ်ရင် တစ်ရွာလုံးကို ပုန်ကန်တာနဲ့ ညီမျှတယ်။"

"အမိန့် မနာခံတဲ့လူရှိရင် ရွာထဲက မောင်းထုတ်ပစ်မယ်။"

ရွာသားအားလုံး တညီတညွတ်တည်း သဘောတူလိုက်ကြပါသည်။

ရှောင်မျိုးနွယ်၏ ရွာသူကြီးက ဉာဏ်ကောင်းရုံတင်မကဘဲ ဗျူဟာလည်း အလွန်ကြီးသူဖြစ်ကြောင်း ရှစ်ချင်းလျို့ သိလိုက်ရပါသည်။

သူမကို အသုံးမဝင်သည့် အဖွဲ့တစ်ဖွဲ့ ပေးလိုက်မှာ စိတ်ပူနေခဲ့သည်။ သို့သော် အခုတော့ သူမကို စိတ်မပျက်စေခဲ့ပါ။

သူမပြုံးလိုက်ပြီး ထပ်ပြောလိုက်ပါသည်။ "ကျွန်မတို့ ရွာသူကြီးပြောတာ အမှန်ပဲ။ ကျွန်မရဲ့ စံနှုန်းတွေက မမြင့်ပါဘူး။ နောက်ပိုင်း ကျွန်မတို့ မိသားစုအတွက် အလုပ်လုပ်တဲ့ အခါကျရင် ဒီစည်းကမ်းကို လိုက်နာဖို့ပဲ လိုအပ်တယ်။"

အားလုံး၏ အကျိုးစီးပွားကို စုပေါင်းချည်နှောင်လိုက်ခြင်းက စည်းမျဥ်းကို ချိုးဖောက်ချင်သည့် လူတွေကို တားဆီးရာရောက်ပါသည်။

မျိုးနွယ်စုများက အလွန်အရေးပါသော ဒီလိုရှေးခေတ်တွင် ရွာထဲက မောင်းထုတ်ခံရခြင်းက အလွန်ပြင်းထန်သည့် ကိစ္စတစ်ခု ဖြစ်သည်။

ထို့အပြင် လူထုကို စော်ကားပြီး ရွာထဲမှာ ကိုယ့်မိသားစု တစ်စုတည်း ကောင်းကောင်းမွန်မွန် နေထိုင်နိုင်မည်ထင်ရင် စမ်းကြည့်နိုင်ပါသည်။