Chapter 68
Viewers 4k
Chapters 444

🚩Chapter -68

 Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 6 ]


_____


ဝံပုလွေဖြူရွေးချယ်လိုက်သော ပြိုင်ပွဲအခန်းသည် သာမန်ပြိုင်ကွင်းဖြစ်သည်။ ၎င်းကလေးထောင့်အခန်းဖြစ်ပြီး ပုန်းခိုစရာနေရာမရှိချေ။ ထိုကဲ့သို့အခန်းမျိုးသည် လုပ်ကြံသတ်ဖြတ်သူများအတွက် တိုက်ခိုက်ရန်အခွင့်မသာသော်လည်း ဝံပုလွေဖြူတွင်အဆင့်၁၅ လက်နက်ရှိကာ သူ၏ပစ္စည်းကိရိယာများသည် စုဝမ်ထက်ပိုကောင်းလေသည်။ ထို့ကြောင့် သူ၏မျက်လုံးထဲတွင် စုဝမ်က အသက်ပြန်ဖြည့်နိုင်သည့် နတ်ဆရာမဖြစ်နေလျှင်တောင်မှ သူ၏စွမ်းအားနှင့်သတ်ရန် အလွန်လွယ်ကူနေသေးသည်။ 


ရေတွက်မှုပြီးဆုံးသွားသည့်အခါ ဝံပုလွေဖြူကချက်ချင်းပင် ကိုယ်ရောင်ဖျောက်ရန်ပြင်လိုက်သော်လည်း သူမျှော်လင့်ထားသည်နှင့်ဆန့်ကျင်စွာ စုဝမ်က အလင်းပစ်ချက်စွမ်းရည်ကိုထုတ်လွှတ်လိုက်သည်။ နတ်ဆရာတစ်ယောက်၏အခြေခံတိုက်ခိုက်သည့်စွမ်းရည်သာဖြစ်သည်။ ၎င်းကစွမ်းအားမပြင်းသော်လည်း နောက်တစ်ကြိမ်အသုံးပြုရန်အချိန်မစောင့်ရကာ ထုတ်လွှတ်ရန်လည်း အမြန်ဆုံးဖြစ်သည်။ ထို့ကြောင့် ပြိုင်ပွဲစတင်ချိန်တွင် စုဝမ်ကနှင်တံကိုလှုပ်ရမ်းကာ အလင်းပစ်ချက်များဖြင့် ဝံပုလွေဖြူ၏ကိုယ်ရောင်ဖျောက်ခြင်းအား နှောင့်ယှက်လိုက်သည်။ 


တိုက်ပွဲအတွေ့အကြုံမြင့်သော ဝံပုလွေဖြူသည် ကိုယ်ရောင်ဖျောက်ခြင်းအားနှောင့်ယှက်ခံလိုက်ရသော်လည်း မတုန်လှုပ်သွားပေ။ နောက်တစ်စက္ကန့်တွင်အဆိပ်သုတ်လိမ်းထားသော သွေးသောက်ဓားသည် အစိမ်းရောင်အရိပ်ကိုဖြစ်စေကာ စုဝမ်ဆီသို့ တည့်တည့်ဝင်သွားတော့သည်။ 


၎င်းကလုပ်ကြံသတ်ဖြတ်သူ၏ အဆင့်မြင့်စွမ်းရည် အေးစက်သည့်ဓားသွားပင်ဖြစ်သည်။ တစ်ခါထိလိုက်ရုံနှင့် အခြေခံရုပ်ပိုင်းဆိုင်ရာထိခိုက်မှုအပြင် ပစ်မှတ်သည် နောက်ဆယ်စက္ကန့်အတွင်း အဆိပ်သင့်ကာ အသက်တို့တောက်လျှောက်လျော့နေမည်ဖြစ်သည်။ 


ဇာတ်ကောင်ငါးခုထဲတွင် လုပ်ကြံသတ်ဖြတ်သူ၏အာရုံခံနိုင်စွမ်းသည်အမြင့်ဆုံးဖြစ်ကာ ဝံပုလွေဖြူ၏ ရုပ်ပိုင်းဆိုင်ရာကြံ့ခိုင်မှုသည် သာမန်သူများထက်ပိုမြင့်လေသည်။ စုဝမ်က အစိမ်းရောင်အရိပ်အား ဖြတ်ခနဲသာမြင်လိုက်ရကာ နောက်တစ်စက္ကန့်တွင် ဝံပုလွေဖြူက သူမမျက်စိရှေ့၌ ရောက်နေပြီဖြစ်သည်။ 


စုဝမ်ကချက်ချင်းပင် အလင်းပစ်ချက်တို့ဖြင့်ပစ်လိုက်သည်။ အလင်းရောင်ကြောင့် ဝံပုလွေဖြူအနှောင့်အယှက်ဖြစ်သွားသည်ကို အခွင့်ကောင်းယူကာ လျင်မြန်သည့်အရှိန်ဖြင့် နောက်ဆုတ်လိုက်သည်။ ဆုတ်ခွာနေစဥ်တွင်း သူမသည်အရှိန်လျှော့စွမ်းရည်ကိုအသုံးပြုလိုက်သည်။ နောက်သုံးစက္ကန့်အကြာတွင် သူမစွမ်းရည်ထုတ်လွှတ်မှု မပြီးမြောက်သေးမှာပင် ဝံပုလွေဖြူကအမှီလိုက်လာခဲ့သည်။ ထိုအခိုက်တွင်ဝံပုလွေဖြူ၏ လှုပ်ရှားမှုများသည်ချက်ချင်းပင် နှေးကွေးသွားတော့၏။ စုဝမ်ကအခွင့်အရေးကိုအမိအရဆုပ်ကိုင်ကာ အားနည်းစေသည့်စွမ်းရည်အား ဝံပုလွေဖြူပေါ်သို့ကျရောက်စေလိုက်သည်။ အားနည်းစေသည့်စွမ်းရည်ကြောင့် ဝံပုလွေဖြူ စွမ်းအင်ကျဆင်းနေတာကိုအခွင့်ကောင်းယူကာ စုဝမ်က အလင်းပစ်ချက်တို့ကိုထပ်မံပစ်လွှတ်လိုက်၏။


-၂၀၀၊ -၂၀၀၊ -၂၀၀၊ -၂၀၀…


အဆင့်မြင့်လာလေလေ အလင်းပစ်ချက်များ၏သက်ရောက်မှုတို့သည်လည်းမြင့်လာလေလေပင်။


စက္ကန့်အနည်းကြာပြီးနောက် ဝံပုလွေဖြူမှာ အသက်၁၀၀၀နီးပါးလျော့သွားသည်အထိ ပစ်ခတ်ခံလိုက်ရသည်။ သို့သော်လည်း သူ၏ အသက်ပြဘားတွင် အသက်မှတ်၄၇၀၀ကျန်နေသေးသည်။ 


ထိုအချိန်တွင် ဝံပုလွေဖြူ၏မျက်နှာကဖြူဖျော့လာသည်။ လူတိုင်း၏အရှေ့တွင် သူမရဲ့အဆက်မပြတ်တိုက်ခိုက်မှုများကြောင့် အသက်၁၀၀၀ဆုံးရှုံးလိုက်ရခြင်းသည် သူ့အားအသေရေဖျက်နေခြင်းပင်။


ဒေါသတို့တဟုန်ထိုးတက်လာသောကြောင့် ဝံပုလွေဖြူက လုပ်ကြံသတ်ဖြတ်သူ၏အဓိက လျှို့ဝှက်စွမ်းရည်ကိုသုံးလိုက်သည်။ ဤအစွမ်းသည်တစ်ခါထိလိုက်ရုံနှင့် ခန္ဓာကိုယ်ကငါးစက္ကန့်ကြာအောင် အကြောသေသွားမည်ဖြစ်၏။


ယခုတစ်ခေါက် ဝံပုလွေဖြူ၏တိုက်ခိုက်မှုသည်မြန်ဆန်လွန်းသောကြောင့် စုဝမ်ကငုံ့မရှောင်နိုင်လိုက်ပေ။ ဝံပုလွေဖြူ၏တိုက်ခိုက်မှုက သူမမျက်စိအရှေ့သို့ရောက်လာချိန်တွင် စုဝမ်ကအချိန်မီ အလင်းဒိုင်းကာအား ထုတ်နိုင်လိုက်သည်။ ၎င်းကနတ်ဆရာ၏ အသက်ကယ်စွမ်းရည်ထဲမှတစ်ခုဖြစ်သည်။ အလင်းဒိုင်းကာသည် ကျရောက်လာသော ထိခိုက်မှုတို့၏ ပမာဏအချို့အားစုပ်ယူနိုင်ကာ ချက်ချင်းသေစေနိုင်သည့်ထိခိုက်မှုများအား ခုခံနိုင်စွမ်းရှိသည်။ 


ဝံပုလွေဖြူကတိုက်ခိုက်လိုက်ပြီးသည်နှင့် ချက်ချင်းစုဝမ်အနားကိုချဥ်းကပ်လာပြီး သူမမူးဝေနေတာကို တွေ့လိုက်ရသည့်အခါ နှုတ်ခမ်းထောင့်တို့မြင့်တက်သွားသည်။ နောက်ငါးစက္ကန့်တွင် သူက တိုက်ခိုက်မှုစွမ်းရည်အားလုံးအား သူမအပေါ်တွင်အသုံးပြုလိုက်၏။


-၇၂၀၊ -၆၈၀၊ -၉၀၀…


အဆင့်၄၅ နတ်ဆရာမတစ်ယောက်အနေနှင့် စုဝမ်၏အသက်ပြဘားတွင် အသတ်မှတ်၃၀၀၀သာရှိသည်။ ဝံပုလွေဖြူ၏ အဆက်မပြတ်တိုက်ခိုက်မှုများအား ငါးစက္ကန့်ကြာခံလိုက်ရပြီးနောက်တွင် အလင်းဒိုင်းကာ၏ ခုခံနိုင်စွမ်းဖြင့် နောက်ဆုံးတွင်အသက်မှတ်၂၇၀သာကျန်တော့သည်။ 


“ပွဲပြီးသွားပြီ”


ဝံပုလွေဖြူသည်စဥ်းလဲသောခြေလှမ်းများနှင့် စုဝမ်အရှေ့သို့အပြေးလာလိုက်သောကြောင့် သူတို့ခန္ဓာကိုယ်များသည် အလွန်နီးကပ်သွားသည်။ ယခုအချိန်တွင်ဝံပုလွေဖြူသည် တိုက်ခိုက်မှုစွမ်းရည်တို့အား အသုံးပြုနိုင်ရန်အချိန်မပြည့်သေးသော်လည်း သူ၏ရုပ်ပိုင်းဆိုင်ရာတိုက်ခိုက်မှုနှင့်တင် စုဝမ်အသတ်ကိုယူနိုင်ကြောင်းသေချာသိသည်။ သို့သော် ထိုအချိန်တွင် စုဝမ်က သူမ၏ခန္ဓာကိုယ်အားရှေ့သို့တိုးလိုက်ရာ ဝံပုလွေဖြူ၏လက်က စုဝမ်၏ရင်ဘတ်အား ပွတ်တိုက်သွားတော့သည်။ ထိုခဏလေးတွင် တစ်စုံတစ်ယောက်က အကြောသေစေသည့်စွမ်းရည် သုံးလိုက်သည့်အလား သူ့တစ်ကိုယ်လုံးသည်တောင့်ခဲသွား၏။ သူ၏လက်ထဲတွင်ကိုင်ထားသော သွေးသောက်ဓားသည် စုဝမ်၏ခန္ဓာကိုယ်နှင့် မီလီမီတာအနည်းငယ်မျှသာကွာတော့သည်။ 


ပြိုင်ကွင်းတစ်ခုလုံးပင့်သက်ရှိုက်သံတို့ဖြင့်ပြည့်နှက်သွားသည်။ လူအများစုက ဘာဖြစ်သွားတာကိုနားမလည်ကြသောကြောင့် လက်ရှိအခြေအနေအား စူးစိုက်ကြည့်နေကြတော့သည်။ 


အဲ့ဒီစုချန်းဝေယွဲ့က နတ်ဆရာမစွမ်းရည်အသစ်တွေထုတ်သုံးလိုက်တာလား...။ အဲ့လိုလည်းမဟုတ်သလိုဘဲ...။ 


ဒါက... အဟွတ် အဟွတ် ဒီလိုခံစားချက်မျိုးကို ယောက်ျားလေးကစားသူတွေသာ နားလည်နိုင်တယ်။


ယခုတွင် ဝံပုလွေဖြူ၏ခန္ဓာကိုယ်မှာတောင့်ခဲနေပြီး သူ့မျက်နှာမှာ မိုးကြိုးပစ်ခံလိုက်ရသကဲ့သို့ဖြစ်နေသည်။ သူ့စိတ်ထဲတွင် ရေခဲတမျှအေးစက်နေသော စက်ပိုင်းဆိုင်ရာစနစ်အသံသည်ထွက်ပေါ်လာ၏။ 


ကစားသူဝံပုလွေဖြူက အမျိုးသမီးကစားသူရဲ့ခန္ဓာကိုယ်ကိုထိတွေ့ခဲ့ပါတယ်... စနစ်မှ အဆင့်၃သတိပေးချက် ပေးပါတယ်...။ 


လင်ရှန်းသည် ကစားသူများ၏ပုံစံတို့ကို အတိအကျကူးယူထားသော ပုံရိပ်ယောင်သုံးဖက်မြင်ဂိမ်းဖြစ်သောကြောင့် အမျိုးသမီးကစားသူများအား အခွင့်အ‌ရေးယူခံရခြင်းမှကာကွယ်နိုင်ရန် “နှာဗူးများကိုသတိပြုပါ”ဆိုသည့်လျှို့ဝှက်စနစ်အား ဖြည့်သွင်းထားခဲ့သည်။ အမျိုးသားကစားသူသည် အမျိုးသမီးကစားသူ၏ လျှို့ဝှက်သောခန္ဓာကိုယ်အစိတ်အပိုင်းတို့အား ထိတွေ့လိုက်သည်နှင့် ချက်ချင်းပင် စနစ်၏သတိပေးခြင်းခံရလိမ့်မည်။ သူတို့ခန္ဓာကိုယ်မှာလည်း ငါးစက္ကန့်ကြာအောင် အကြောသေနေလိမ့်မည်ပင်။ 


၎င်းကအပေါ့ပါးဆုံးအပြစ်ဒဏ်ဖြစ်သည်။ ဒုတိယအကြိမ်ထပ်ဖြစ်ခဲ့ပါက ပြစ်ဒဏ်အားနှစ်ဆတိုးလိမ့်မည်။ တစ်စုံတစ်ယောက်က မကောင်းသည့်ရည်ရွယ်ချက်များဖြင့် အခြားသူများအား ကိုယ်ထိလက်ရောက်ကျုးလွန်ချင်ပါက စနစ်တွင် Blacklistအတင်ခံရမည်ဖြစ်သည်။ ဤဘဝတွင် သူတို့ လင်ရှန်းကမ္ဘာသို့ထပ်မံဝင်ရောက်ခွင့်မရနိုင်ကြတော့ပေ။ 


လူအများကဤလျှို့ဝှက်စနစ်ကိုမသိခဲ့ကြချေ။ ၎င်းအား တရားဝင်Websiteတွင် တင်ထားပြီးဖြစ်သော်လည်း ဂိမ်းထဲတွင် လူအရေအတွက်များပြားလာသည်နှင့်အတူ ထိုစနစ်က လျှို့ဝှက်ချက်တစ်ခုမဟုတ်တော့ပေ။ ထို့အပြင် အဆင့်မြှင့်တင်ပြီးနောက် စနစ်သည် ကစားသူများ၏ကိုယ်ရေးကိုယ်တာတို့ကို ပို၍ကာကွယ်ပေးလိမ့်မည်ပင်။ 


ဝံပုလွေဖြူအကြောသေနေသည့်အချိန်ကိုအခွင့်ကောင်းယူကာ စုဝမ်ကသူမကိုယ်သူမ အသက်ပြန်ဖြည့်လိုက်သည်။ ထို့နောက် ဝံပုလွေဖြူအားချိန်ကာ အလင်းပစ်ချက်တို့ကို ပစ်လွှတ်လိုက်သည်။ 


-၂၀၀၊ -၂၀၀၊ -၂၀၀၊ -၂၀၀...


စုဝမ်၏အသက်တစ်ဝက်ကျော်လောက်ပြန်ပြည့်သွားပြီး သူ့အသက်မှတ်၁၀၀၀ လျော့သွားတာကိုကြည့်၍ ဝံပုလွေဖြူမှာငိုချင်လာတော့သည်။ 


နတ်ဆရာဆိုတဲ့ဇာတ်ကောင်က တကယ်ကိုစိတ်ရှုပ်ဖို့ကောင်းတာပဲ အား...


ပြိုင်ကွင်းထဲတွင် ယှဥ်ပြိုင်သတ်ဖြတ်ရာ၌ အခြားဇာတ်ကောင်များသည် အသက်ပြန်မဖြည့်နိုင်သော်လည်း နတ်ဆရာများကတော့ အသက်ကယ်နိုင်သလို အသက်လည်းပြန်ဖြည့်နိုင်ကြသည်။ 


သူကတိုက်ခိုက်မှုစွမ်းရည်များ၏ အသုံးပြုနိုင်မည့်အချိန်ကိုစစ်ဆေးလိုက်ပြီး ခန္တာကိုယ်ကိုအသုံးပြု၍ရသည်နှင့်ချက်ချင်းပင် စုဝမ်ဆီသို့ တရှိန်ထိုးပြေးသွားကာ တိုက်ခိုက်လိုက်သည်။ 


လူနှစ်ယောက်မှာ မိနစ်ပေါင်းများစွာတိုက်ခိုက်နေခဲ့ကြသည်။ စုဝမ်ကအသက်ပြန်ဖြည့်ရန်အချိန်ရ၏။ ထို့ပြင် သူမ၏လှုပ်ရှားမှုများသည် လျင်မြန်တိကျကာ အာရုံခံနိုင်စွမ်းကလည်းစူးရှလျက်ရှိသောကြောင့် ဝံပုလွေဖြူ၏ လျှို့ဝှက်တိုက်ခိုက်ချက်များကို အကြိမ်များစွာ ရှောင်ရှားနိုင်ခဲ့သည်။ ပြိုင်ကွင်း၏နောက်ဆုံးငါးမိနစ်ကြာရေတွက်မှု ပြီးသွားသည့်အချိန်တွင် နှစ်ယောက်စလုံးက အသက်ရှင်နေသေး၏။ ရလဒ်အနေနှင့် စနစ်သည် ကျန်ရှိနေသည့်အသက်မှတ်ကိုအခြေခံ၍ စုချန်းဝမ်ယွဲ့အားအနိုင်ရရှိသူအဖြစ် အလိုအလျောက်သတ်မှတ်လိုက်သည်။ 


နှစ်ယောက်လုံး Millenniumဧရိယာဝင်ပေါက်သို့ ပြန်လည်ရောက်ရှိလာသောအခါ ဝံပုလွေဖြူသည် စုဝမ်အား ဒေါသတကြီးကြည့်၍ “မင်းလှည့်ကွက်တွေသုံးပြီးပြိုင်သွားတာ နောက်တစ်ခေါက်ထပ်တိုက်မယ်” 


“နင်သာယောက်ျားဆိုရင် အရှုံးကိုလက်ခံနိုင်ရမှာပေါ့ ဒါမှမဟုတ်တကယ်ပဲ ယောက်ျားမဟုတ်တာလား” 


စုဝမ်ကဝံပုလွေဖြူအားမျက်ခုံးပင့်ကြည့်လိုက်ကာ သူ့အရှေ့သို့တိုးသွား၍ ကိုယ်ကိုကိုင်းချလိုက်သည်။ ယခုတစ်ခေါက်တွင် ဝံပုလွေဖြူမှာ ကြောက်လန့်တကြားနှင့် ရှောင်ထွက်သွားတော့သည်။ ဝံပုလွေဖြူက သူမလမ်းအားထပ်မပိတ်တော့သည့်အခါ စုဝမ်က NPCဇာတ်ကောင်ထံသို့သွား၍ ဧရိယာအားဖွင့်ရန် လိုအပ်သည့် ပစ္စည်းအားယူလိုက်သည်။ သူမကချက်ချင်းပျောက်ကွယ်သွားကာ နောက်တစ်စက္ကန့်တွင် သူမရဲ့ခန္ဓာကိုယ်က ဧရိယာအတွင်းဘက်တွင်ပေါ်လာ၏။ 


“သေစမ်းကွာ”


အပြင်ဘက်တွင်ကျန်နေခဲ့သောဝံပုလွေဖြူက ဧရိယာဝင်ပေါက်ကိုကြည့်နေသည်။ နောက်ဆုံးတွင် သူကထိုင်စရာနေရာတစ်ခုရှာ၍ အမူအရာမဲ့စွာနှင့်ထိုင်ချလိုက်သည်။ သူကစောင့်နေချိန်အတွင်း စုချန်းဝမ်ယွဲ့သည် ဧရိယာထဲမှ ထွက်မလာဘဲ အချိန်ကြာကြီးနေနေသည်အား မယုံနိုင်ဖြစ်လာတော့၏။


ထိုအချိန်တွင် မည်သူတင်လိုက်မှန်းမသိရသောစုချန်းဝမ်ယွဲ့နှင့် ဝံပုလွေဖြူတို့၏ တိုက်ပွဲမှတ်တမ်းမှာ လင်ရှန်း၏ တရားဝင်ဖိုရမ်တွင် တက်လာတော့သည်။ 


အချိန်အကြာကြီးပျောက်နေခဲ့သည့် စုချန်းဝမ်ယွဲ့က စတုတ္ထမြောက်ပြည်နယ်ကိုပြန်ရောက်လာခဲ့ပြီး ဝံပုလွေဖြူနှင့် ယှဥ်ပြိုင်တိုက်ခိုက်ကာ အနိုင်ရရှိခဲ့။  


ခေါင်းစဥ်နှင့်ပင် အာရုံစိုက်မှုအများအပြားအား ဆွဲဆောင်လျက်ရှိပြီး ယှဥ်ပြိုင်သတ်ဖြတ်ပွဲအား သေချာကြည့်နေခဲ့ကြသော ကြည့်ရှုသူများကြားမှ တစ်ယောက်ယောက်သည် ဝံပုလွေဖြူ၏မူမမှန်သည့်အခိုက်အတန့်ကို တွေ့ရှိသွား၏။ ထို့နောက်တွင် ပြင်ပလူများအား “နှာဗူးများအား သတိပြုပါ” ဆိုသည့်စနစ်အကြောင်း ကစားသူအများအပြားသည် အမည်မဖော်ဘဲဝင်ရောက်ရှင်းပြခဲ့ကြသည်။ ကစားသူတစ်ယောက်က အမည်မဖော်ဘဲ သေချာရှင်းပြသွားပြီးနောက် ပို့စ်တစ်ခုလုံးက လားရာပြောင်းလဲသွားတော့သည်။ 


ကြည့်ရှုသူ A : ဝံပုလွေဖြူက တကယ်ပဲ နတ်ဘုရားမရဲ့ရင်ဘတ်ကိုထိရဲတယ်ပေါ့ နှာဗူးကောင်ပဲ ငါသူ့ကိုပြောချင်တဲ့စကားတစ်ခွန်းရှိတယ်... မင်းလက်ကိုဖယ်လိုက်စမ်း ငါထိကြည့်မယ်” 


ကြည့်ရှုသူ B : အပေါ်ထပ်ကို +၁


ကြည့်ရှုသူ C : အပေါ်ထပ်ကို +၁၀၀၈၆


ကြည့်ရှုသူ D : နှာဗူးတွေ စုချန်းဝမ်ယွဲ့ကဘာသုံးစားလို့ရလို့လဲ ကြီးမြတ်လှတဲ့ဝံပုလွေဖြူ ရှင့်အတွက်သားလေးမွေးပေးပါရစေ။ 


ကြည့်ရှုသူ E : …


လင်ရှန်း ဟွာရှား၏ ဆဌမမြောက်ပြည်နယ်တွင်...


ယခုရက်များတွင် ဧရိယာအသစ်များပွင့်လာသောကြောင့် ‘အဆုံးမရှိည’အုပ်စုမှ လက်ရွေးစင်များသည် ထိုနယ်မြေများကို ရှင်းလင်းနေရင်းအလုပ်ရှုပ်နေကြသည်။ သို့သော် စုရွေ့က အဆင့်၇၀ဧရိယာတွင် တစ်ယောက်တည်းလေ့ကျင့်နေလေသည်။ ယခုတွင် သူကရေခဲစွမ်းရည်တို့ကို လွယ်လွယ်ကူကူထုတ်လွှတ်နိုင်နေပြီဖြစ်သည်။ စုရွေ့က သူ၏စွမ်းရည်များနှင့် ပစ္စည်းကိရိယာများကို ပေါင်းစပ်အသုံးပြုနေပြီး ရလဒ်တို့က သိပ်မဆိုးပေ။ 


[ ယုံးယဲ့=အဆုံးမရှိည ]


မကောင်းဆိုးဝါးများကို တစ်ရက်ကြာတိုက်ခိုက်ပြီးနောက် ပြည့်ခါနီးဖြစ်နေသော အတွေ့အကြုံအမှတ်ပြဘားကို ကြည့်၍ စုရွေ့စိတ်ကျေနပ်သွားကာ ‘အဆုံးမရှိည’အုပ်စုသို့ပြန်ရန် စာလိပ်ကိုထုတ်လိုက်သည်။ 


“ခေါင်းဆောင်”


“ဘော့စ်”


အပြာရောင်မှော်ပညာရှင်ဝတ်ရုံကိုဝတ်ဆင်ထားသည့် စုရွေ့အားဂိတ်ပေါက်ကိုဖြတ်၍ ပြန်လာသည်ကိုတွေ့သောအခါ ကြီးမားလှသည့် “ပြည်နယ်နံပါတ်တစ်”ဟူသည့်ခေါင်းစဥ်သည် လူတိုင်းအား မျက်လုံးကျိန်းစေလိုက်၏။ 


အုပ်စု၏သိုလှောင်ရုံများအား ကြီးကြပ်ရသည့် ‘ရေခဲတမျှအေးစက်သောလက်များ’က စုရွေ့အားရယ်ပြကာနှုတ်ဆက်၏။ စုရွေ့၏မျက်နှာက အမူအရာမဲ့နေသည်ကိုမြင်နေရသည့်တိုင် သူကဒေါသထွက်မသွား‌သလို ချက်ချင်းပင် အုပ်စုစကားပြောခန်းထဲတွင် အတင်းတုတ်လိုက်သည်။ 


ရေခဲတမျှအေးစက်သောလက်များ : ခေါင်းဆောင်ပြန်ရောက်လာပြီ ရေခဲတုံးကြီးကအမြဲတမ်းလေအေးတွေပဲ တိုက်နေတာ အဲ့ဒါက အခုလိုနွေရာသီမှာ လူတွေကိုအရမ်းအေးမြစေတာပဲ အား


တိမ်ကဗျာ : ‘အေးစက်သောလက်များ’ရေ ရှင်ကယောက်ျားလေးပါနော် နည်းနည်းပါးပါးထိန်းပါဦး


မိန်းမလှလေး : ကျွန်မက ဖူဂျိုရှီဆိုပေမယ့်လည်း ရှင်ခေါင်းဆောင်ကိုတိတ်တိတ်လေးသဘောကျနေတာကို အားမပေးနေဘူးနော် ခေါင်းဆောင်ကအရမ်းအနေအေးတာ ယုတ်ညံ့တဲ့သေမျိုးတွေကအိပ်မက်မက်မနေစမ်းနဲ့


ရေခဲတမျှအေးစက်သောလက်များ : အိုက်ယား ငါမှားသွားပါတယ် ငါ့အပြစ်ပါ ငါကခေါင်းဆောင်လိုမျိုးဖြစ်ချင်ရုံလေးပါပဲ 


မိန်းမလှလေး : ဒီဘဝမှာတော့မျှော်လင့်ချက်မရှိဘူး နောက်ဘဝအတွက်‌တော့ဆုတောင်းနေပေါ့


ရေခဲတမျှအေးစက်သောလက်များ : မိန်းမလှလေး ငါတို့နှစ်ယောက်ကြားမှာ ထောင်ချီတဲ့တောင်တွေမြစ်တွေရှိနေရင်တောင်မှ မင်းဆီက မလိုတမာစိတ်ကိုတွေကို ခံစားလို့ရနေတုန်းပဲသိရဲ့လား


မိန်းမလှလေး : ‘အေးစက်သောလက်များ’ရေ ကောင်းကောင်းနေလိုက်ဦးနော် အစ်မကြီးကအခုလေးတင် အုပ်စုထဲကိုပြန်ရောက်လာပြီ သိပ်မကြာခင်မှာခေါင်း‌ဆောင်နဲ့သွားတွေ့တော့မှာ ဟားဟားဟား


အံ့ဖွယ်နတ်ဆိုး : မင်းတို့ကဆူညံနေတာပဲကွာ တိတ်တိတ်နေကြစမ်းပါ


ဝမ်းနည်းနေသောသိုးလေး : အစ်ကိုအံ့ဖွယ်နတ်ဆိုး ပြိုင်ကွင်းထဲကထွက်လာပြီပဲ အခုလေးတင်တက်လာတဲ့ ဖိုရမ်ပေါ်ကပို့စ်ကိုကြည့်ပြီးပြီလား


အံ့ဖွယ်နတ်ဆိုး : ??


ဝမ်းနည်းနေသောသိုးလေး : စုချန်းဝမ်ယွဲ့ပြန်ရောက်လာပြီ အခုလေးတင်စတုတ္ထမြောက်ပြည်နယ်ပြိုင်ကွင်းမှာ သူမ ဝံပုလွေဖြူနဲ့ တိုက်ခဲ့တယ်


အံ့ဖွယ်နတ်ဆိုး : တကယ်လား


ယဲ့ယွီ : တကယ်လား 


မိန်းမလှလေး : ??


ဝမ်းနည်းနေသောသိုးလေး : ??


ထိုအချိန်တွင် စာရိုက်နေသော ‌’ရေခဲတမျှအေးစက်နေသောလက်များ’၏ လက်တို့မှာနှေးကွေးသွားရသည်။ 


မင်းမေ... အုပ်စုစကားပြောခန်းထဲမှာဘယ်တုန်းမှဝင်မပြောတဲ့ ခေါင်း‌ဆောင်ကဒီနေ့တော့ ပေါ်လာပြီပဲ။


တကယ်ပဲလား... ငါအသက်ရှင်နေသေးရဲ့လား။


မိန်းမလှလေးနှင့် ဝမ်းနည်းနေသောသိုးလေးတို့က အရေးမစိုက်ကြသော်လည်း 'ရေခဲတမျှအေးစက်နေသောလက်များ'သည် စုရွေ့အားလှည့်ကြည့်လိုက်သည်။ စုရွေ့က ကူးပြောင်းသွားလာရေးဂိတ်ပေါက်ဘေးတွင်ထိုင်နေကာ အာရုံစိုက်၍စာရိုက်နေတာကိုတွေ့ရ၏။ ထိုအချိန်တွင် အုပ်စုချန်နယ်တွင် စာအသစ်တစ်စောင်ဝင်လာခဲ့သည်။ 


ယဲ့ယွီ : စုချန်းဝမ်ယွဲ့ဘာဖြစ်သွားသေးလဲ


အမှန်တကယ်တွင် မူလစစ်ထူယဲ့သည် တသီးတခြားနေတတ်သည့်သူဖြစ်ပြီး စကားပြောခန်းထဲတွင် ဝင်ရောက်ပြောလေ့မရှိသလို စုရွေ့ကလည်းတက်ကြွဖျတ်လက်ရတဲ့ ပုံမျိုးကိုမကြိုက်ပေ။ စစ်ထူယဲ့ဖြစ်လာသည့်နောက်တွင် သူ့အမူအကျင့်တို့ကိုဆက်လက်ထိန်းသိမ်းထားလိုက်သည်။ သူကစကားပြောခန်းထဲတွင် စုချန်းဝမ်ယွဲ့ဆိုသည့် စကားလုံးလေးလုံးကိုသာ အမှတ်အသားပြုထားခဲ့၏။ တစ်ယောက်ယောက်က စုချန်းဝမ်ယွဲ့အကြောင်းပြောလာသည်နှင့် စကားပြောခန်းမျက်နှာပြင်သည် ချက်ချင်းပေါ်လာလိမ့်မည်ပင်။


_____


🚩

Prev Next