MM Story Teller

Chapter 69

Viewers 4k

🚩Chapter -69

Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 7 ]

_____

‘အဆုံးမရှိည’အုပ်စုစကားပြောခန်းသည် စုရွေ့၏ရုတ်တရက်ဆန်စွာရောက်ရှိလာမှုကြောင့် တစ်ခဏလောက်တိတ်ဆိတ်သွားပြီး စုရွေ့က စုချန်းဝမ်ယွဲ့၏အကြောင်းအား မေးမြန်းနေသောအခါ ‘ဝမ်းနည်းနေသောသိုးလေး’သည် ဖိုရမ်မှ သူမသိလာသမျှကိုပြောပြလိုက်သည်။ ထို့နောက် အုပ်စုထဲမှလူများက ဖော်ပြချက်တစ်ခုကိုတွေ့လိုက်ရ၏။

အုပ်စုခေါင်းဆောင် ယဲ့ယွီ လိုင်းဆင်းသွားပါပြီ။

‌ရေခဲတမျှအေးစက်နေသောလက်များ : ဘာတွေဖြစ်သွားတာလဲဆိုတာ တစ်ယောက်ယောက်ရှင်းပြကြပါဦး

မိန်းမလှလေး : ခေါင်းဆောင်ရော ခေါင်းဆောင်ဘာလို့လိုင်းဆင်းသွားတာလဲ သူ့ကိုတွေ့တောင် မတွေ့ရသေးဘူးလေ

တိမ်ကဗျာ : ...

ဝမ်းနည်းနေသောသိုးလေး : လျှို့ဝှက်ချက်တစ်ခုခုရှိနေသလိုခံစားနေရတယ်

အံ့ဖွယ်နတ်ဆိုး : သိုးလေး လျို့လန်ကိုလာခဲ့ ကိုယ်အဆင့်တင်ပေးမယ်

ဝမ်းနည်းနေသောသိုးလေး : ကောင်းပြီ

ရေခဲတမျှအေးစက်နေသောလက်များ : အုပ်စုထဲမှာ အဲ့လောက်ထိ ချစ်မပြကြစမ်းနဲ့...

...

စုရွေ့ဂိမ်းထဲမှထွက်လာလိုက်ကာ ချက်ချင်းပင် လင်ရှန်း၏တရားဝင်ဖိုရမ်အားဖွင့်ကြည့်လိုက်သည်။ ဟွာရှား၏စတုတ္ထမြောက်ပြည်နယ်ဖိုရမ်အားကြည့်လိုက်သောအခါ ၎င်းသည် ပို့စ်များ၏ထိပ်ဆုံးတွင်ရှိနေတာကိုတွေ့လိုက်ရသည်။ စုရွေ့မျက်လုံးများတောက်ပသွားကာ ပါဝင်သည့်အကြောင်းအရာများနှင့် ကောမန့်တို့ကိုဖတ်ပြီးနောက် သူ့မျက်နှာမှာမည်းမှောင်သွားတော့သည်။

“ဦးလေးလီ”

စုရွေ့ခေါ်လိုက်သည်နှင့် အိမ်တော်ထိန်းကချက်ချင်းရောက်လာကာ စုရွေ့၏ဘေးတွင်ရပ်လိုက်ပြီး “သခင်လေး ဘာခိုင်းချင်တာများရှိလို့ပါလဲ”

“လိကျန်းမြို့ကိုသွားဖို့ လက်မှတ်ဘိုကင်တင်ထားပေးပါ မြန်လေကောင်းလေပဲ ပြီး‌တော့ လုံခြုံရေးကုမ္ပဏီကိုလည်းဆက်သွယ်ထားပေးပါ လူတစ်ယောက်ရဲ့ Network IPကိုသိဖို့သူတို့ရဲ့အကူအညီလိုတယ်”

“ကောင်းပါပြီ သခင်လေး”

စုရွေ့၏ ညွှန်ကြားချက်များအား ဦးလေးလီသည် စိတ်ထဲတွင်စွဲမြဲစွာမှတ်ထားလိုက်ကာ ချက်ချင်းလုပ်ဆောင်ရန် ပြင်ဆင်တော့သည်။

ကွန်ပျူတာအားပိတ်လိုက်ပြီးနောက် စုရွေ့က သက်ပြင်းချ၍ မျှော်လင့်ချက်မဲ့စွာနှင့် ပြုံးလိုက်သည်။

သေချာပေါက် သူအကြာကြီးမစောင့်နိုင်တော့ပေ။

ဖိုရမ်ပေါ်သို့ပြန့်နှံ့သွားသောဗီဒီယိုသည် ကစားသူများအကြားရေပန်းစားလာသည်နှင့်အမျှ ဟွာရှားစတုတ္ထမြောက် ပြည်နယ်၏ အုပ်စုကြီးငယ်တို့က စုချန်းဝမ်ယွဲ့ပြန်လာပြီဖြစ်ကြောင်းသိနေကြသည်။

နယ်မြေရှင်းလင်းရန် အုပ်စုထဲမှလူများနှင့်ထွက်လာခဲ့သော တိရှစ်ထျန်းသည် မျက်နှာအမူအရာအေးစက်နေ၏။

“နံနက်လေပြေညင်း မင်းမှာငါ့ကိုပြောစရာမရှိဘူးလား”

ဘေးဘက်တွင် မကောင်းဆိုးဝါးငယ်လေးများအား တိုက်ခိုက်နေသော ‘နံနက်လေပြေညင်း’ကလျင်မြန်စွာ ပြန်ဖြေလာသည်။

“ခေါင်းဆောင် မင်းသူမကိုအကြိမ်ပေါင်းများစွာသတ်ခဲ့ပြီးပြီ သူမသေချာပေါက် မင်းနဲ့ယိရှောင်ကို ထပ်ရန်စရဲတော့မှာမဟုတ်ဘူးလို့ကျွန်တော်ယုံတယ် အုပ်စုထဲမှာအချိန်အကြာကြီးအတူရှိခဲ့တဲ့ အဖွဲ့သားသံယောဇဥ်ကိုထောက်ပြီး ဒီတစ်ခါတော့ သူမကိုလွှတ်ပေးလိုက်ပါ”

တိရှစ်ထျန်း၏အကြည့်များသည် လေးနက်သွားကာ သူ့အနောက်ရှိ ဟွေ့မော့ယိရှောင်အားကြည့်လိုက်သည်။ ဟွေ့မော့ယိရှောင်က အဆင့်၅၅ ပစ္စည်းကိရိယာအစုံလိုက်အားတပ်ဆင်ထားကာ ကျောက်စိမ်းရောင် နတ်ဆရာမဝတ်ရုံကလည်း သူမနှင့်လိုက်ဖက်နေပြီး ငယ်ရွယ်သည့်အငွေ့အသက်တို့ဖြင့်တက်ကြွလျက်ရှိသည်။

“ရှစ်ထျန်းကိုကို ဘာဖြစ်လို့လဲ”

တိရှစ်ထျန်း၏အကြည့်တို့ကိုခံစားမိနေသည့်အလား ဟွေ့မော့ယိရှောင်သည် အခြားသူများရှင်းလင်းထားသော လမ်းကြောင်းမှဖြတ်၍ တိရှစ်ထျန်းဘေးသို့လျှောက်လာသည်။

“စုချမ်းဝမ်ယွဲ့ပြန်ရောက်လာပြီ”

တိရှစ်ထျန်းက နောက်ဆက်တွဲစကားတို့ကိုတီးတိုးပြောလိုက်သည်။

“ယိရှောင် တကယ်လို့အဲ့ဒီကိစ္စကြောင့် ခုထိအဆင်မပြေသေးဘူးဆိုရင် ကိုယ့်လူတွေကိုသူမကိုသတ်ဖို့လွှတ်လိုက်မယ်”

“ရှစ်ထျန်းကိုကို ထားလိုက်ပါတော့ သူမကညီမကိုနှစ်ခါပဲသတ်ခဲ့တာပါ”

သူမကပြောနေစဥ်မှာပင် ထိုကိစ္စအကြောင်းအားတွေးတောနေသည့်အလား ဟွေ့မော့ယိ‌ရှောင်သည် မျက်လုံးများနီလာကာ တိရှစ်ထျန်းအား အားတင်း၍ပြုံးပြလိုက်ပြီး “ကိုကိုတိုနှစ်ယောက်က… သူငယ်ချင်းတွေဖြစ်ခဲ့ကြတာပဲလေ သူမနဲ့ဆက်ပြီးအချင်းမများသင့်တော့ဘူး”

“မင်းကအဲ့လိုပြောမှတော့ ကိုယ်သူမကိုလွှတ်ထားလိုက်တော့မယ်”

တိရှစ်ထျန်းကမျက်ခုံးပင့်လိုက်ကာ သူ၏မျက်နှာတွင် နူးညံ့မှုတို့ပြည့်နှက်နေသည်။

‘ငါတို့မိသားစုရဲ့ ယိ‌ရှောင်လေးက ကြက်နာတတ်ပြီး အပြစ်ကင်းဖြူစင်တယ်။ အဲ့အပြင်ကို ခွင့်လွှတ်သနားတတ်ပြီး သဘောထားကြီးတယ်။ အဲ့ဒီ ရိုင်းစိုင်းတဲ့ဗီလိန်နဲ့တစ်စက်လေးမှမတူဘူး’

ဘေးတွင်ရှိနေသော လေပြေညင်း၏စိတ်ထဲတွင်တော့ ‘ခေါင်းဆောင်ကြီးရေ ဘယ်တုန်းက ဝေဖန်ပိုင်းခြားတတ်တဲ့ဉာဏ်ကို စွန့်ပစ်လိုက်တာလဲ ဟွေ့မော့ယိရှောင်နဲ့တွေ့ပြီးကတည်းက ရှင့်ရဲ့အိုင်ကျူတွေအကုန်လုံး ဟိုးအောက်ခြေကို‌ရောက်ကုန်တာ ငြင်းမနေပါနဲ့

ပြီးတော့ ဟွေ့မော့ယိရှောင်က ဂိမ်းထဲမှာအသတ်ခံခဲ့ရတာပါ နှစ်ခါပဲအသတ်ခံလိုက်ရပြီး ဘာတွေကြီးကြီးမားမား ဆုံးရှုံးသွားလို့လဲ ပစ္စည်းကိရိယာတွေလည်းဆုံးရှုံးမသွားတဲ့အပြင် အတွေ့အကြုံအမှတ်နည်းနည်းလေးပဲရှိတဲ့သူမမှာ ငိုကြွေးမြည်တမ်းဖို့အရည်အချင်းမရှိဘူး

ဝမ်ယွဲ့ကတော့ ဆာဗာတစ်ခုလုံးရဲ့ အမဲလိုက်ခံရပြီး အဆင့်၆၀ကနေ အဆင့်နိမ့်ရွာကိုပြန်ရောက်သွားတဲ့အထိ အသတ်ခံခဲ့ရတာ ပြီးတော့ ငါးကြိမ်ဆက်တိုက်အသတ်ခံခဲ့ရပြီး အကုန်ဆုံးရှုံးလိုက်ရတယ် ဟွေ့မော့ယိရှောင်သာ သူမနေရာမှာဆိုရင် ငိုရလွန်းလို့မျက်ရည်တောင်ကျန်တော့မှာမဟုတ်ဘူး

ဟင်း အပြင်လူတစ်ယောက်အနေနဲ့ ဒေါသထွက်ရုံကလွဲပြီး ဘာလုပ်နိုင်မှာတဲ့လဲ’

…

လင်ရှန်း မသေမျိုးကျွန်း Millennium ဧရိယာဝင်ပေါက်တွင်…

ဝံပုလွေဖြူက ဝင်ပေါက်ကိုမျက်နှာမူကာထိုင်နေ၍ လူများဝင်ထွက်သွားလာနေသည်အားကြည့်နေဆဲပင်။ ယခုတွင် သူ၏စကားပြောခန်း၌ စာများနှင့်ပြည့်နေပြီဖြစ်သည်။ ခေါင်းဆောင်တုလန်ကပင် အသံမက်ဆေ့ချ်ပို့လာတော့သည်။

တုလန် : အခုထိ Millennium ဧရိယာဝင်ပေါက်မှာရှိနေတုန်းလား

တုလန်၏အသံသည်အနည်းငယ်အက်ရှနေ၏။ ထိုကဲ့သို့အက်ရှပြီး တည်ငြိမ်သည့်အသံက လူများအား အန္တရာယ်များသည့် ခံစားချက်ကိုပေးစွမ်းနေသည်။

ဝံပုလွေဖြူက ချက်ချင်းပင်ပြန်ပြောလိုက်သည်။

“စုချန်းဝမ်ယွဲ့ပြန်ထွက်လာတဲ့အထိစောင့်ပြီး သူမနဲ့ နောက်တစ်ကြိမ် ထပ်တိုက်မလို့”

နယ်မြေတစ်ခုလုံး၏အကြည့်အောက်တွင် ထိုကဲ့သို့မမျှတသောနည်းဖြင့် အနိုင်ယူခံလိုက်ရပြီးအလှောင်ခံခဲ့ရသည့်အတွက် ဝံပုလွေဖြူသည် နောက်တစ်ကြိမ်ထပ်တိုက်၍မှမနိုင်လျှင် ယောက်ျားမဟုတ်တော့ဟုခံစားမိနေသည်။

တစ်ဖက်တွင် တုလန်ကတိတ်ဆိတ်နေကာ နောက်ဆုံးတွင် အသံနိမ့်နိမ့်နှင့်ပြောလာသည်။

“ထားလိုက်တော့ ဝံပုလွေဖြူ အမျိုးသမီးတွေကိုအဲ့လိုရင်ဆိုင်တာ တကယ်ပဲအောက်တန်းကျတယ်”

ယခုရက်များတွင် တုလန်သည် ကိုယ့်လုပ်ရပ်များကိုပြန်တွေးနေမိ၏။ ပထမဆုံးတွင် စိတ်၏စေ့ဆော်မှုကြောင့် ထုတ်ပြန်လိုက်သော ဆုလာဘ်ကြီးမားသည့် သတ်ဖြတ်မိန့်သည် နောက်ဆုံးတွင်တော့ စုချန်းဝမ်ယွဲ့အပေါ်ရှိနေသည့် အငြှိုးများကြောင့်လား သို့မဟုတ် ဤနှစ်များအတွင်း စိတ်နှင့်ကိုယ်နှင့်မကပ်အောင် နေခဲ့၍လားဟု တွေးတောမိသည်။

သူမနှင့်တိရှစ်ထျန်းကွဲကွာသွားတာကိုကြည့်၍ အပျော်ဆုံးလူသားသည်သူဖြစ်သင့်သည်။ အထူးသဖြင့် ယခင်ရက်များအတွင်း သူမသည် အဆင့်နိမ့်ရွာသို့ပြန်ရောက်သည့်တိုင် ထပ်ခါထပ်ခါ သတ်ခြင်းခံခဲ့ရကြောင်း သိလိုက်ရသည့်အချိန်တွင် တုလန်၏နှလုံးသားတွင် စိတ်ကျေနပ်မှုအမျိုးမျိုးတို့ကို ခံစားခဲ့ရသည်။ သို့သော် စုချန်းဝမ်ယွဲ့ပျောက်သွားသည့်တစ်ပတ်တွင် တုလန်သည် တစ်ခုခုအားဆုံးရှုံးလိုက်ရသကဲ့သို့ ခံစားခဲ့ရ၏။

ထိုအမျိုးသမီးသည် အကောင့်နံပါတ်ကိုပင်ဖျက်ကာ ဆက်မဆော့နိုင်သည်အထိ အမှတ်များနည်းအောင် အကြိမ်ကြိမ်အသတ်ခံခဲ့ရသော်လည်း မည်သူကိုမှအလျှော့မပေးခဲ့ပေ။

ထိုစိတ်သဘောထားသည် တုလန်အား လွန်ခဲ့သောနှစ်အနည်းငယ်ကစုချန်းဝမ်ယွဲ့နှင့် ပထမဆုံးတွေ့ဆုံမှုကို ပြန်အမှတ်ရစေသည်။

အဲ့အချိန်က အနိုင်မခံအရှုံးမပေးတဲ့စိတ်ဓာတ်နှင့်သူမကိုပဲ ချစ်မိသွားခဲ့တာမလား။

၎င်းအား အချစ်မရှိလျှင် အမုန်းမရှိဟုခေါ်ကြသည်။

အခုအတိတ်ကစွဲလမ်းမှုတို့ကို လွှတ်ချလိုက်ခဲ့ပြီးပြီပဲ ဘာလို့ စုချန်းဝမ်ယွဲ့ကိုထပ်ပြီးဖိအားပေးနေဦးမှာလဲ။

အနာဂတ်မှာတစ်ယောက်နဲ့တစ်ယောက် သူစိမ်းတွေအဖြစ်ပဲနေထိုင်သွားကြတာကောင်းလိမ့်မယ်။

တုလန်၏အမိန့်ကိုကြားပြီးနောက် ဝံပုလွေဖြူက ခဏတာငြိမ်သက်နေမိ၏။

ဝံပုလွေဖြူ : ခေါင်းဆောင် မင်းမဟုတ်မှ အခုထိ...

တုလန် : ငါမေ့ပစ်ခဲ့ပြီးပြီ စုချန်းဝမ်ယွဲ့ကဘယ်လောက်ပဲ နယ်မြေထဲမှာ အင်အားကြီးနေပါစေဦး တိရှစ်ထျန်းရဲ့အကာအကွယ်မရှိဘဲ သူမလေနဲ့လှိုင်းတွေကို မတွန်းလှန်နိုင်ဘူး ဂုဏ်သိက္ခာအပြည့်နဲ့ အုပ်စုခေါင်းဆောင်ဖြစ်တဲ့ ငါ တုလန်က သူမလိုအမျိုးသမီးတစ်ယောက်ကိုတောင် သည်းမခံနိုင်တာ မဖြစ်သင့်ဘူးမလား။

သူမ၏ ဗီဒီယိုကြောင့် အပြင်ဘက်တွင် အုတ်အုတ်ကျက်ကျက်ဖြစ်နေချိန်၌ စုဝမ်သည် နယ်မြေအားတစ်ယောက်တည်း သုတ်သင်ရှင်းလင်းနေလေ၏။

ခမ်းနားလှသည့် ပင်လယ်ကြမ်းပြင်ချောက်နက်ထဲတွင် အပြာရောင်ရေခူများက တောက်ပစွာလွင့်မျောနေကြသည်။ ၎င်းက Millennium ဧရိယာ၏ချိတ်ပိတ်ထားသောနေရာပင်ဖြစ်သည်။

Millennium ဧရိယာ၏နောက်ခံဇာတ်လမ်းသည် အလွန်ဝမ်းနည်းဖွယ်ကောင်းပြီး လှပသော အချစ်ဇာတ်လမ်းလေးဖြစ်သည်။ ဒဏ္ဍာရီထဲတွင် ထိုပင်လယ်ထဲ၌ ထောင်စုနှစ်ပေါင်းကြာအောင် ပိတ်ပင်ထားသော ရဲတိုက်ကြီးတစ်ခုရှိခဲ့သည်။ ရဲတိုက်ထဲတွင် ပင်လယ်တစ်ခုလုံးရဲ့ အမြင့်မြတ်ဆုံးနှင့် အလှပဆုံး ရေသူမလေးနေထိုင်၏။

လွန်ခဲ့သော နှစ်ထောင်ပေါင်းများစွာက ရေသူမလေးသည် ယင်းချန်မြို့ရှိ ချယ်ရီပန်းပွဲတော်ကိုသွားချင်သောကြောင့် တားမြစ်ထားသော မှော်အတတ်တို့ကိုသုံး၍ လူအဖြစ်ပြောင်းလဲခဲ့သည်။ ယင်းချန်မြို့၏လရောင်အောက်တွင် သူမသည် မြို့တော်အကြီးအကဲ၏ ငယ်ရွယ်ချော‌မောသောသားနှင့်တွေ့ဆုံခဲ့သည်။ လူနှစ်ယောက်သည် လျင်မြန်စွာ ချစ်ကျွမ်းဝင်သွားကြကာ မှော်အတတ်က သူမ၏လူသားပုံစံအား အချိန်အကြာကြီး ထိန်းသိမ်းမပေးနိုင်သောကြောင့် ရေသူမလေးမှာ အစွမ်းမပြယ်ခင် ပင်လယ်ရဲတိုက်သို့ပြန်သွားရမည်ဖြစ်သည်။

သူချစ်ရသောမိန်းကလေးပြန်တော့မည်ဆိုသောအခါ မြို့တော်အကြီးအကဲ၏သားက ဝမ်းနည်းသွားခဲ့သည်။ ထို့ကြောင့်သူမ မပြန်အောင်နည်းအမျိုးမျိုးသုံးခဲ့သည်။ ထိုနှစ်က ယင်းချန်မြို့၏ချယ်ရီပန်းပွဲတော်သည်ပဲ လှပလွန်းသောကြောင့်လား သို့မဟုတ် ထိုနေ့ကယင်းချန်၏ လမင်းကြီးသည်ပဲ လှပလွန်း၍လားမသိ ရေသူမလေးမှာ သူမချစ်ရသူအပေါ် ခံစားချက်တို့မတွန်းလှန်နိုင်ခဲ့ပေ။ မှော်အစွမ်းပြယ်မည့်နောက်ဆုံးနေ့တိုင်အောင် သူမကပြန်သွားရန်စိတ်ကူးမရှိခဲ့ချေ။ အဆုံးတွင်တော့ နောက်တစ်နေ့ နံနက်ခင်းတွင် သူမကရေသူမအဖြစ်ပြောင်းလဲသွားခဲ့သည်။

ရေသူမအဖြစ်ပြောင်းလဲသွားသောသူမသည် သူမ၏ချစ်သူထံမှအချစ်တို့ကို ဆုံးရှုံးလိုက်ရ၏။ ထို့အပြင် သူမအား ယင်ကျိုးမြို့၏သံတမန်အား ဆက်သရန် ဖမ်းဆီးကာအကျဥ်းချထားခဲ့ကြသည်။

နှလုံးသားတစ်ခုလုံးခြေမွခံလိုက်ရသော ရေသူမလေးသည် ဒေါသတကြီးနှင့် ရေခဲမှော်အစွမ်းကိုသုံးကာ ယင်ကျိုးတစ်မြို့လုံးအား အေးခဲစေခဲ့ပြီး သူမအား သစ္စာဖောက်သွားသည့် ချစ်သူကိုဖမ်းဆီးကာ ပင်လယ်ရဲတိုက်တွင်အကျဥ်းချထားခဲ့သည်။

ထိုအဖြစ်အပျက်သည် ယင်ကျိုးမြို့တော်အကြီးအကဲအား ဒေါသထွက်စေခဲ့သည်။ သူက ယင်းချန်မြို့တော်အကြီးအကဲ၏ သားကိုကယ်ရန် ပင်လယ်ချောက်နက်ထဲသို့ လက်ရွေးစင်တပ်ဖွဲ့နှစ်ဖွဲ့အား စေလွှတ်ခဲ့၏။ မှော်တပ်ဖွဲ့သည် ပင်လယ်ရဲတိုက်၏အတားအဆီးတို့ကို ဖျက်ဆီးကာ အကြမ်းခံတပ်သားများက ရဲတိုက်တစ်ခုလုံးအား သုတ်သင်ရှင်းလင်းခဲ့သည်။ သူတို့ယင်းချန်မြို့တော်အကြီးအကဲ၏ သားကိုတွေ့သောအခါ သူကနောက်ဆုံးအခြေအနေသို့ရောက်နေပြီဖြစ်သည်။ ယင်းချန်းမြို့တော်အကြီးအကဲက အလွန်အမင်းဒေါသထွက်သွားကာ ရေသူမလေးအား မှော်ပညာသုံး၍ ချိတ်ပိတ်ခဲ့သည်။ ထိုအချိန်မှစ၍ သူမကထိုစွန့်ပစ်ရဲတိုက်ထဲတွင်သာနေရပြီး သူမ၏အဆုံးမရှိသည့်ဒေါသ၊ အာဃာတတို့ဖြင့် ထာဝရပိတ်မိနေတော့၏။

လင်ရှန်းကမ္ဘာတွင် ဤဧရိယာသို့ဝင်ရောက်လာခဲ့သည့်ကစားသူတိုင်းသည် တားမြစ်နယ်မြေသို့ရောက်ရှိရန် ရဲရင့်ကြသည့်သူများပင်ဖြစ်သည်။ သူတို့ကလမ်းတစ်လျှောက်အခက်အခဲမှန်သမျှကို ကျော်လွှားရမည်ဖြစ်ပြီး မကောင်းဆိုးဝါးတို့ကို တိုက်ခိုက်ကာ နယ်မြေ၏နောက်ဆုံးဘော့စ်ဖြစ်သည့် အာဃာတတို့ပြည့်နှက်နေသော ရေသူမအားရင်ဆိုင်ရမည်ဖြစ်သည်။

ရေသူမသည် စနစ်၏တရားဝင် ဘော့စ်ဖြစ်ပြီး လူသားရေခဲမှော်ပညာရှင်နှင့် အင်အားချင်းညီမျှသည်။ သူမ၏အကြမ်းတမ်းဆုံးအခြေအနေတွင်ရှိမနေလျှင်တောင်မှ တိုက်ခိုက်မှုများကပြင်းထန်သည်။ သို့သော် မှော်ပညာရှင်တိုင်းမှာ တိုက်ခိုက်ရန်အချိန်ယူရသည်။ သူမအားတစ်ယောက်တည်းတိုက်ခိုက်သည့်အခါ ကစားသူများသည် သူမ၏လှုပ်ရှားမှုများအပေါ်သတိကပ်နေသ၍ အေးအေးဆေးဆေးနှင့် အနိုင်ယူနိုင်၏။

စုဝမ်ကသူမ၏ထူးချွန်လှသည့်အာရုံခံနိုင်စွမ်းနှင့် အသက်ပြန်ဖြည့်သည့် နတ်ဆရာမစွမ်းရည်တို့ကို အသုံးချကာ ထိုနယ်မြေအားသုတ်သင်ရှင်းလင်းနေလိုက်သည်။

တစ်နာရီခွဲအတွင်းတွင် သူမသည် ထိုနယ်မြေရှိ မကောင်းဆိုးဝါးအားလုံးကို သတ်ဖြတ်နိုင်ခဲ့သည်။ ယခုတွင် စုဝမ်သည် ရဲတိုက်အိုကြီး၏ အပျက်အစီးများရှေ့တွင် ရပ်နေ၏။ ထိုအချိန်တွင်မီးအနီရောင်တို့လင်းလက်သွားကာ လှပကျော့ရှင်းသည့် ရေသူမပေါ်လာတော့သည်။

စုဝမ်က ပြင်းထန်လှသည့်အမုန်းတရားတို့က သူမ၏အရေပြားအားထိုးဖောက်နေတာကိုခံစားနေရသည်။ သူမက လင်ရှန်း၏ထုတ်လုပ်ရေးအဖွဲ့အား လေးစားမိသွားသည်။ စုဝမ်ကတွန့်ဆုတ်မနေဘဲ ရေသူမဆီသို့ အားနည်းစေသည့်စွမ်းရည်ကိုပစ်လွှတ်လိုက်သည်။

၂၅မိနစ်ကြာပြီးနောက် လှပစွာတည်ရှိနေသောရေသူမသည် ကြီးမားသောပေါက်ကွဲသံနှင့်အတူ မြေပေါ်သို့ကျသွားကာ ပစ္စည်းကိရိယာများ အဖြစ်ပြောင်းလဲသွားတော့သည်။ ၎င်းတို့အကြားတွင် Millennium ဧရိယာ၏ အထူးပစ္စည်း ရေသူမမျက်ရည်စက်လည်းပါရှိ၏။

🚩

Prev Next