Chapter 70
Viewers 4k
Chapters 444

🚩Chapter -70

 Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 8 ]


_____



ရေသူမမျက်ရည်စက်သည် အမှန်တကယ်တွင် အပြာရောင်အသည်းပုံ ပုံစံသလင်းကျောက်ဖြစ်သည်။ ဤအထူးပစ္စည်းသည် အလွန်စျေးကြီးပြီး သိုလှောင်ခန်းများတွင် ငွေဒင်္ဂါးအမြောက်အများနှင့်လဲလှယ်နိုင်သည်။ သေချာ‌ပေါက် ထိုကဲ့သို့သော ထူးခြားပစ္စည်းများအားစုဆောင်းကာ အမှတ်တရအဖြစ်သိမ်းထားကြသော ကစားသူများလည်းရှိသည်။ 


စုဝမ်က တိုက်ပွဲမှရရှိလာသော ဆုလာဘ်များကိုသိမ်းလိုက်သည်။ အတွေ့အကြုံအမှတ်ပြဘားတန်းတွင် 40%တိုးလာတာကိုကြည့်ရင်း ကျေနပ်မိကာ ရေသူမမျက်ရည်စက်အား လက်ထဲသို့ထည့်လိုက်သည်။ 


တောက်ပနေသည့်အပြာရောင် ရောင်ခြည်တန်းလေးက ပူဆွေးမှုအနည်းငယ်ကို ပေးစွမ်းနေ၏။ 


“တော်တော်လေးခံစားခဲ့ရမှာပဲ” 


စုဝမ်က လက်ထဲရှိ သလင်းကျောက်ကိုကြည့်ကာသက်ပြင်းချလိုက်သည်။ 


“လူသားတွေက တစ်ကိုယ်ကောင်းဆန်ကြတယ်...ယောက်ျားတွေကပိုလို့တောင်ဆိုးသေးတယ် အသစ်ကနေပြန်စတင်ဖို့ အခွင့်အရေးရခဲ့မယ်ဆိုရင် အဲ့ဒီလူသားကိုပဲချစ်နေဦးမှာလား”


“ဟင်း...” 


သက်ပြင်းရှည်ကြီးက စုဝမ်အနောက်မှ ရုတ်တရက်ထွက်ပေါ်လာခဲ့သည်။ စုဝမ်လှည့်ကြည့်လိုက်ရာ ရေသူမလေး၏ ပြာဖျော့ဖျော့ဝိဉာဥ်သည် လေပေါ်တွင်မျောနေတာကိုတွေ့လိုက်ရ၏။ 


“ထောင်စုနှစ်ချီအောင်စောင့်နေခဲ့ပြီးနောက်ဆုံးတော့သင့်ကိုတွေ့ခဲ့ရပြီ” 


ရေသူမလေး၏အသံမှာ သဘာဝ၏အသံကဲ့သို့ပင် နားဝင်ချိုလှသည်။ 


စုဝမ်ကသလင်းကျောက်ကို ဆုပ်ကိုင်လိုက်ကာ သူမရဲ့မျက်နှာအမူအရာကမူ တည်ငြိမ်နေသည်။ သူမ၏စိတ်ထဲတွင်တော့ အနည်းငယ် အံ့ဩနေမိ၏။ သူမထင်တာမမှားဘူးဆိုလျှင် သူမသည် Millenniumဧရိယာ၏ လျှို့ဝှက်တာဝန်အား မတော်တဆဖွင့်မိသွားတာဖြစ်နိုင်သည်။ 


“အချိန်တွေပြန်လှည့်လို့ရမယ်ဆိုရင်တောင် လူသားတစ်ယောက်နဲ့ထပ်ပြီးချစ်ကျွမ်းဝင်တော့မှာမဟုတ်ဘူး”


ရေသူမလေးသည်သူမကိုယ်သူစကားပြောနေခဲ့ပြီး သူမ၏အသံမှာ စိတ်ဓာတ်ကျသည့်ပုံပေါ်နေသည်။ 


“ထောင်စုနှစ်ချီအောင် ချိတ်ပိတ်ခံထားရပြီး အခုတော့ ကျွန်မရဲ့ဝိဉာဥ် ငြိမ်းချမ်းတော့မယ် ကျွန်မဝိဉာဥ်ကြွေလွင့်မသွားခင် ဆန္ဒမပြည့်ဝသေးတာရှိတယ်” 


“တိုင်းတစ်ပါးမှစစ်သည်တော် ကျွန်မရဲ့နောက်ဆုံးဆန္ဒကို ဖြည့်ဆည်းပေးနိုင်မလား” 


ရေသူမလေး၏စကားဆုံးသွားပြီးနောက် ဖောက်ထွင်းမြင်ရသော မျက်နှာပြင်က စုဝမ်အရှေ့တွင် ချက်ချင်းပေါ်လာ၏။ 


ကစားသူ စုချန်းဝမ်ယွဲ့အား {ရေသူမလေး၏ဆန္ဒ}(ရှားပါး) လျှို့ဝှက်တာဝန်ကိုအောင်မြင်စွာ ဖွင့်နိုင်ခဲ့တဲ့အတွက် ဂုဏ်ပြုပါတယ်...ကစားသူ တာဝန်ကိုလက်ခံပါမည်လား။ 


အောက်တွင် လက်ခံသည်နှင့် လက်မခံပါ ဆိုသည့်ရွေးချယ်မှုတို့ရှိပြီး မျက်နှာပြင်၏အောက်ဆုံးတွင်တော့ တာဝန်၏ဆုလာဘ်များအား အမေးသက်ေတဖြင့်ဖော်ပြထားသည်။ 


စုဝမ်က မူလဇာတ်ကြောင်းကိုပြန်တွေးလိုက်သည်။ လင်ရှန်းတွင် လျှို့ဝှက်တာဝန်များ အများအပြားရှိပြီး ရှားပါးတာဝန်များကတော့ နည်းပါးသည်။ 


မူလဇာတ်ကြောင်းတွင် မေရီဆူးအရောင်အဝါတို့နှင့် ကံအလွန်ကောင်းသော ဟွေ့မော့ယိရှောင်သည် ရှားပါးတာဝန်နှစ်ခုကို အောင်မြင်ခဲ့သည်။ ထိုတာဝန်နှစ်ခုသည် အလွန်ခက်ခဲကာ လိုက်လံပိုးပန်းကြသူများ၏ အကူအညီဖြင့် သူမကတာဝန်တို့ကို အခက်အခဲမရှိလုပ်ဆောင်နိုင်ခဲ့သည်။ ထို့အပြင် ဆုလာဘ်အဖြစ် ဆာဗာတွင် တစ်ခုတည်းသော အုပ်ချုပ်သူနတ်ဆရာမနှင်တံနှင့် ယူနီကွန်းဝိဉာဥ်တို့ကိုရရှိခဲ့သည်။


စုဝမ်သိသလောက် မူလဇာတ်ကြောင်းထဲတွင် မည်သူမှ ဤရေသူမလေး၏ဆန္ဒ လျှို့ဝှက်တာဝန်အား မတွေ့ရှိခဲ့ကြပေ။ သူမ၏ခံစားချက်များဖြင့်ပြောလိုက်သော စကားများက တာဝန်ကိုပွင့်သွားစေခဲ့ပုံပေါ်သည်။ 


“ရှင့်ကိုကူညီဖို့ဆန္ဒရှိပါတယ်” 


နောက်ဆုံးတွင် စုဝမ်က လက်ခံသည်ကိုနှိပ်လိုက်၏။ ရေသူမလေး၏ဝိဉာဥ်သည် ဖျော့ဖျော့လေးပြုံးလိုက်ကာ စုဝမ်၏အရှေ့တွင်ရှိနေ‌‌သော မျက်နှာပြင်က ပြောင်းလဲသွားတော့၏။


လျှို့ဝှက်တာဝန် : ရေသူမလေး၏ဆန္ဒ (ရှားပါး) , တာဝန်ပြီးမြောက်မှု 0%


ထမ်းဆောင်ရမည့်တာဝန် : ထောင်စုနှစ်ချီအောင်ပိတ်လှောင်ခံထားရသောရေသူမလေးသည် သူမ၏အခြားမျိုးနွယ်စုများကိုတွေ့လိုပြီး အသူရာငါးနတ်ဆိုးအားရှာဖွေရန်နှင့် ခရမ်းရောင်ပယင်းသလင်းကျောက် ၁၀၀အားစုဆောင်းရန် ရေသူမနယ်မြေသို့ ကစားသူကိုဖိတ်ခေါ်ပါသည်။ 


စုဝမ် : …


ဒီတာဝန်ကပုံမှန်မဟုတ်သလိုဘဲ...အား...


ရေသူမနယ်မြေကရောဘာလဲ အဲ့ဒါက ၆လအတွင်းမှာ အဆင့်တစ်ခုမတင်နိုင်မချင်းပေါ်လာမှာမဟုတ်တဲ့ မြေပုံအသစ်ကြီး ဟုတ်ပြီလား။


စုဝမ်၏ ပျော်ရွှင်မှုတို့က မျက်စိတစ်မှိတ်လေးအတွင်းမှာပင် ပျောက်ကွယ်သွား၏။ စုဝမ်က သူမ၏ ကိုယ်ပေါ်ရှိပျက်စီးနေသော ပစ္စည်းကိရိယာတို့ကိုကြည့်၍ သက်ဆိုးရှည်ဝံပုလွေဖြူအားသတိရသွားသည်။ ယခုအထိသူမအား ဝင်ပေါက်တွင် စောင့်နေဆဲလားမသိချေ။ နောက်ဆုံးတွင်တော့ စုဝမ်သည် ထိုနယ်မြေထဲ၌ပင် လိုင်းဆင်းလိုက်တော့သည်။ ဂိမ်းထဲတွင် သန်းခေါင်ကျော်သွားသည်နှင့် ဤနယ်မြေက အသစ်အတိုင်းပြန်ဖြစ်နေလိမ့်မည်။ ထိုအခါ သူမက Millennium ဧရိယာအား နောက်တစ်ဖန်ရှင်းလင်းနိုင်လိမ့်မည်။ 


ယခုတစ်ခေါက်တွင် စုဝမ်က စောစောလေး လိုင်းဆင်းလိုက်၏။ သူမက အရှင်ဧကရာဇ်အား စာတစ်စောင်ပို့လိုက်ပြီး ကုတ်အင်္ကျီဝတ်လိုက်ကာ မုန့်ဝယ်ရန်ထွက်လာလိုက်သည်။


ယခုနှစ် လိကျန်းမြို့တွင် ဆောင်းအဝင်စော၏။ ယခုတွင်ပင် လမ်းပေါ်၌လူများသည် သိုးမွေးအပေါ်ထပ်များ၊ ကုတ်အရှည်များကို ဝတ်ဆင်ထားကြပြီဖြစ်သည်။ 


စုဝမ်သည် သာမန်လူများထက် ပို၍ အအေးဒဏ်ခံနိုင်သည့်လူဖြစ်ပြီး အနီရောင်သိုးမွေးကုတ်ကို ဝတ်ဆင်ထားကာ လည်ပင်းတွင်သိုးမွေးမာဖလာအား ပတ်ထားသည်။ သူမကတက်စီငှား၍ အနီးဆုံး ကုန်တိုက်ဆီသို့သွားလိုက်သည်။ နောက်ရက်အနည်းငယ်တွင် ဂိမ်းထဲ၌ အဆက်မပြတ်ရုန်းကန်ရမည်ကို စဥ်းစားလိုက်ကာ စုဝမ်က အသင့်စားအစားအစာများ၊ ချောကလက်၊ နို့မှုန့်နှင့် အခြားအာဟာရနှင့်ကယ်လိုရီပြည့်ဝသော အစားအစာတို့ကို ဝယ်ယူလိုက်သည်။ 


ကုန်တိုက်တွင်ပိုက်ဆံရှင်းပြီးသောအခါ စုဝမ်သည် ကုန်တိုက်ဘေးရှိ စားသောက်ဆိုင်တွင် ပီဇာဝင်စားသည်။ ဗိုက်ပြည့်သည်အထိ စားသောက်ပြီးနောက် တက်စီငှားကာ သူမနေရာသို့ပြန်လာလိုက်၏။


ညခုနစ်နာရီခွဲရှိနေပြီဖြစ်ပြီး လမ်းပေါ်တွင်မီးများထိန်ထိန်လင်းနေကာ စုဝမ်ကတက်စီပေါ်မှဆင်း၍ အထုပ်တို့အား ဆွဲ၍ လျှောက်လမ်းတစ်လျှောက် ဖြည်းဖြည်းချင်းဝင်လာသည်။ တိုက်ခန်းပုံစံအဆောက်အဦးသစ်၏ လျှောက်လမ်းမှ မီးများသည် မှိန်ပျပျလိမ္မော်ရောင်မီးရောင်တို့ဖြစ်နေဆဲပင်။


စုဝမ်ကငါးလွှာတွင်နေပြီး သူမနေရာ၏တံခါးဆီသို့လျှောက်လာချိန်တွင် ပစ္စည်းများကိုသယ်ရင်း ပင်ပန်းနေပြီဖြစ်သည်။ ထိုစဥ် ရုတ်တရက် တံခါးအားမှီကာ ရပ်နေသော အနက်ရောင်ပုံသဏ္ဌာန်တစ်ခုအားတွေ့လိုက်ရသည်။ 


စုဝမ်ရဲ့ခြေသံကိုကြားသောအခါ ထိုအနက်ရောင်ပုံရိပ်က မော့ကြည့်လာသည်။ 


မှိန်ပျပျအလင်းရောင်အောက်၌ မည်းနက်အုံ့မှိုင်းနေသည့်မျက်လုံးထဲတွင် အလင်းတချို့တောက်ပသွား၏။ 


“မင်းပြန်လာပြီပဲ”


စုရွေ့ရဲ့အသံက အနည်းငယ်အက်ရှကာ ပင်ပန်းနေပုံပေါ်သော်လည်း လေသံထဲတွင် ဖုံးကွယ်မရနိုင်သော ပျော်ရွှင်မှုအချို့လည်းပါဝင်နေသည်။


စုဝမ်၏မျက်ခုံးတို့တွန့်ချိုးသွားကာ အကြည့်များက စုရွေ့၏ ကုတ်အပါးလေးပေါ်သို့ကျရောက်သွားသည်။ 


သူမက သက်ပြင်းချလိုက်ကာ တံခါးဖွင့်၍ စုရွေ့အား မိန်းမစီးဖိနပ်တစ်ရံအားထုတ်ပေးလိုက်ရင်း “ဒါကိုပဲသည်းခံဝတ်ထားလိုက် အိမ်မှာယောက်ျားလေးစီးမရှိဘူး” 


စုရွေ့က ခြေလက်တို့ကိုလှုပ်ရှားလိုက်ကာ စုဝမ်အနောက်မှလိုက်ဝင်သည်။ အနီရင့်ရောင် မိန်းမစီးဖိနပ်သည် စုရွေ့ခြေထောက်တွင် အနည်းငယ်ရယ်ချင်စရာကောင်းနေသော်လည်း သူကဘာမှမခံစားရသကဲ့သို့ အခန်းအပြင်အဆင်ကိုသာ ကြည့်နေသည်။ စုဝမ်၏တိုက်ခန်းတွင် အခန်းနှစ်ခန်းနှင့် ဧည့်ခန်းတစ်ခန်းရှိတာကို တွေ့လိုက်ရသောအခါ စုယွေ့နှုတ်ခမ်းတို့က ချက်ချင်းကွေးတက်သွား၏။ 


ကြည့်ရတာ အနီးနားမှာ အိမ်ငှားဖို့မလိုတော့တဲ့ပုံဘဲ အတူတူနေတာကအကောင်းဆုံးပဲ


စုဝမ်သည် ကုန်တိုက်မှဝယ်လာခဲ့သော ပစ္စည်းများကို အမျိုးအစားခွဲကာ နေရာတကျထားလိုက်၏။ သူမဧည့်ခန်းဆီသို့ ပြန်လာသောအခါ စုရွေ့၏မျက်ခုံးများကတွန့်ချိုးနေကာ သူမဖုန်းကိုကြည့်နေကြောင်းတွေ့လိုက်ရသည်။ 


စုဝမ်ကိုမြင်သောအခါ စုရွေ့ကဖုန်းကိုပြရင်း “စာရောက်နေလို့ မင်းအစားကိုယ်စာပြန်ပေးလိုက်တယ်”


ထိုပုံမှန်ဖြစ်လွန်းနေသည့်လေသံက စုဝမ်မျက်နှာတွင် အနက်ရောင်လိုင်းများအားဖြစ်သွားစေသည်။


“ကောင်းပြီ အလုပ်အကြောင်းအရင်ပြောရအောင်” 


စုဝမ်ကဆိုဖာထောင့်တွင်ဝင်ထိုင်လိုက်ရင်း စုရွေ့ကိုကြည့်ကာ “ဘာလို့ရောက်လာတာလဲ တိုက်ဆိုင်မှုလို့တော့ ထပ်မပြောနဲ့နော်” 


အရင်တာဝန်ကျကမ္ဘာကတွေ့ဆုံမှုကတော့ တိုက်ဆိုင်မှုလို့ပြောလို့ရပေမယ့် အခုတစ်ခေါက်ကရော။


တိုက်ဆိုင်မှုအများကြီးဆိုတာဘယ်မှာရှိလို့လဲ။


ထိုကံကြမ္မာဆိုသည့်အရာအား စုဝမ်ဘယ်သောအခါမှ မယုံခဲ့ပေ။


“ကိုယ် တည်နေရာအချက်ပြဝယ်ထားတယ်” 


စုရွေ့အကြည့်တို့တောက်ပလာကာ စုဝမ်ကိုကြည့်၍ “အနာဂတ်မှာ ကိုယ်တို့တာဝန်တွေအတူတူလုပ်လို့ရပြီလေ မင်းပျော်ရဲ့လား”


ပျော်ရမှာလား ဒီလူဆိုးကောင်ရဲ့…


စုဝမ်မျက်နှာသည် မပျော်မရွှင်ဖြစ်နေကာ “ကျွန်မထင်တာမမှားဘူးဆိုရင် ရှင်က ‘အရံအမျိုးသား’လမ်းကြောင်းကို လျှောက်နေရမှာမဟုတ်ဘူးလား ကျွန်မတို့တာဝန်တွေမတူဘူးလေ မသိဘူးလား”


စုရွေ့ : …


အဲ့လိုမျိုးရှိတယ်လား ဒီစစ်သူကြီးစုကတကယ်ကိုမသိခဲ့တာပါနော် ဟုတ်ပြီလား။


စုရွေ့တွေဝေနေသည့်ပုံစံကိုတွေ့သောအခါ စုဝမ်၏နှလုံးသားထဲတွင် ရုတ်တရက် ပင်ပန်းသလိုခံစားလိုက်ရ၏။


“ဒီအကြောင်းကိုထားလိုက်ဦး ရှင့်ရဲ့ ဇာတ်ကောင်ကိုအရင်ပြော” 


စုဝမ်၏အတွေ့အကြုံအရ ကမ္ဘာတိုင်းတွင် အရံအမျိုးသားသည် အဆုံးသတ်မကောင်းပေ။ သူတို့သည် အမြှောက်စာဇာတ်ကောင်များကို နှိမ့်ချဆက်ဆံကာ အမျိုးသမီးဇာတ်လိုက်၏ အနားတွင်အမြဲရှိတတ်ကြသည်။ ရံဖန်ရံခါအားဖြင့် အဆုံးသတ်မကောင်းကြပေ။ 


ဤတာဝန်ကျကမ္ဘာတွင် အမျိုးသမီးဇာတ်လိုက် ဟွေ့မော့ယိရှောင်သည် သူမ၏ကိုယ်ပိုင် အရောင်အဝါဖြင့် လူအများရဲ့ချစ်ခင်ခြင်းခံရကာ ဆာဗာထဲရှိ အမျိုးသမီးကစားသူအားလုံး၏အမုန်းကို အလိုအလျောက်ဆွဲဆောင်နေလိမ့်မည်။ အမျိုးသားအုပ်စုခေါင်းဆောင်တိုင်းအတွက်တော့ ဟွေ့မော့ယိရှောင်ကိုတွေ့လိုက်သည်နှင့် မြင်မြင်ချင်းချစ်မိသွားကြမည်ဖြစ်ပြီး ဒုတိယတစ်ခေါက်တွေ့ချိန်တွင် စွဲလမ်းသွားမည်ဖြစ်ကာ လက်ထပ်ရန်တိုက်တွန်းကြမည်ဖြစ်ပြီး သူတို့၏မသေဆုံးသည့်အချစ်တို့ကို သက်သေပြကြလိမ့်မည်ပင်။ 


ဤကမ္ဘာရှိအရံဇာတ်ကောင်များသည် အလွန်များပြားလွန်းသောကြောင့် စုဝမ်သည် စုရွေ့၏ ဇာတ်ကောင်အား မသေချာဖြစ်နေသည်။


အနည်းဆုံးတော့ အုပ်စုခေါင်းဆောင်တော့ဖြစ်သင့်တာမလား။ 


စုဝမ်ကသူ၏ဇာတ်ကောင်အားမေးနေတာကိုကြားသောအခါ စုရွေ့သည်မျက်ခုံးပင့်ကာ စုဝမ်အားပြုံးပြ၍ “မင်းရဲ့ နိမ့်ကျတဲ့အစေခံ စစ်ထူယဲ့ ဂိမ်းအိုင်ဒီ ယုံးယဲ့”


ယုံးယဲ့၊ စစ်ထူယဲ့


ဟိုင်ချန်မြို့၏ အအောင်မြင်ဆုံးမိသားစု။ ဟွာရှားပြည်နယ်၏အဆင့်တစ်၊ ဟွာရှားဆဌမမြောက်ပြည်နယ်၏ နံပါတ်တစ်အုပ်စုဖြစ်သည့် အဆုံးမရှိညအုပ်စုခေါင်းဆောင်။ 


ဤကမ္ဘာတွင် စစ်ထူယဲ့၏ဂုဏ်ပုဒ်များသည် များပြားသော်လည်း ထိုတည်ရှိမှုများက အမျိုးသမီးဇာတ်လိုက်၏အကျိုးအတွက်သာဖြစ်သည်။ အမျိုးသမီးဇာတ်လိုက်နှင့် အမျိုးသားဇာတ်လိုက်တို့၏ ပျော်ရွှင်ဖွယ်ဘဝအတွက် သူ့ကိုယ်သူစတေးခံကာ ခါးသက်စွာနှင့်အတင်းအကြပ်ဒုတိယလူအဖြစ်ခံခဲ့ရသည်။ 


ဟုတ်သည်။ ခန္ဓာကိုယ်ချည့်နဲ့မှုကြောင့် အားနည်းနေသောသခင်လေးစစ်ထူယဲ့သည် ဤသက်တမ်းဘဝကန့်သတ်ချက်​ဖြင့် အလိုအလျောက်ပင် ဒုတိယနေရာသို့ ရောက်ရှိသွားခဲ့ရ၏။



___🚩

Prev Next