Chapter 72
Viewers 4k
Chapters 444

🚩Chapter -72

Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 10 ]


_____



ငယ်ရွယ်သောစာပေနှင့်အနုပညာကျောင်းသားတစ်ယောက်အဖြစ် ယန်ဖန်သည် အွန်လိုင်းဂိမ်းကစားခြင်းကို မနှစ်သက်ခဲ့ပေ။ သို့သော် လင်ရှန်းသို့ သူ့ညီလေး၏အတင်းအကြပ်အခေါ်ခံရပြီးနောက် အွန်လိုင်းဂိမ်းများက ပျော်ဖို့ကောင်းကြောင်း ယန်ဖန်ခံစားလိုက်ရ၏။  သို့သော် လင်ရှန်းတွင် အိုင်ဒီပြောင်းလို့ရလျှင် ပိုကောင်းလိမ့်မည်။ 


‘ရေခဲတမျှအေးစက်သောလက်များ’ဆိုသည်က မည်သို့နာမည်မျိုးနည်း။ စကစားရာ၌ တုံးအခဲ့သော သူ့ကိုယ်သူသာအပြစ်တင်မိသည်။ သူကဂိမ်းအိုင်ဒီမည်သို့ပြုလုပ်ရမည်ကိုမသိခဲ့ချေ။ 


နောက်ဆုံးတွင်တော့ သူ့ညီလေး၏ အရူးလုပ်ခြင်းခံလိုက်ရ၏။ ညီအစ်ကိုနှစ်ယောက်တွင် တစ်ယောက်သည် ‘ရေခဲတမျှအေးစက်သောလက်များ’ဖြစ်ပြီး ကျန်တစ်ယောက်မှာ ‘ရေခဲတမျှအေးစက်သောခြေထောက်များ’ ဖြစ်သည်။ ပထမတွင် သူ့ညီလေး ယန်လျန့်သည် မကောင်းဆိုးဝါးများကိုမည်သို့တိုက်ခိုက်ရန်နှင့် အဆင့်တင်ရန်သင်ပေးမည်ဟုပြောသော်လည်း အမှန်တကယ်ကစားသောအခါ သူ့လက်များတုန်နေခဲ့ပြီး နောက်ဆုံးတွင် လူနှစ်ယောက်က မတူညီသောဒေသများကိုရွေးချယ်မိခဲ့ကြ၏။


ဖြစ်ခဲ့တာတွေကဖြစ်ပြီးသွားပြီ အခုလည်းပျော်ပျော်ရွှင်ရွှင်ကစားနေနိုင်တာပဲမလား။ 


ဟွာရှားစတုတ္ထမြောက်ပြည်နယ်နဲ့ ဆဌမမြောက်ပြည်နယ်တို့က သိပ်မဝေးပါဘူး ဟုတ်တယ်မလား။ 


“ကိုကြီး စိတ်တွေလွင့်နေပြန်ပြီ”


ယန်လျန့်၏အသံက ယန်ဖန်၏အတွေးများကို နှောင့်ယှက်လိုက်သည်။ ယန်ဖန်သည် မျက်မှန်ကိုတွန်းတင်၍ ကြည့်လိုက်ရာ သူကအမျိုးသမီးလစဥ်သုံးပစ္စည်းများစင်အရှေ့တွင်ရပ်နေကြောင်းသိလိုက်ရသည်။ 


အာ…


သူကအတင်းတည်ငြိမ်ချင်ယောင်ဆောင်၍ လှည့်လာလိုက်သည်။ ယန်ဖန်သည်မျက်နှာသေဖြင့် ဈေးဝယ်တွန်းလှည်းကိုတွန်းကာ တွေးတောနေရင်း ရုတ်တရက်နေရာတွင် တောင့်ခဲသွားတော့သည်။ 


အိုး… အိုး ဘုရားသခင်


ငါ့မျက်လုံးတွေတကယ်မကောင်းတော့တာလား ပုံရိပ်ယောင်တွေမြင်နေရတယ်။ 


“ကိုကြီး ဘာဖြစ်နေပြန်တာလဲ” 


ဘေးတွင်ရှိနေသော ယန်လျန့်သည် သူ့မိသားစုမှအစ်ကိုကြီးနောက်တစ်ကြိမ်ရပ်သွားတာကိုကြည့်ရင်း မနေနိုင်ဘဲ အရှေ့သို့တိုးကာ သူ့အစ်ကိုအရှေ့တွင် လက်တို့ဝှေ့ယမ်း၍ “သရဲတွေ့လိုက်လို့လား” 


“မဟုတ်… သရဲမဟုတ်ဘူး ခေါင်းဆောင်...”


လင်ရှန်းရဲ့နည်းပညာများသည် ခေတ်ရှေ့ပြေးနေသောကြောင့် လူတိုင်း၏ဇာတ်ကောင်များသည် သူတို့၏တကယ့်ပုံစံများနှင့်အတူတူပင်ဖြစ်သည်။ အချို့နာမည်ကြီးသောမျက်နှာများက လူအုပ်ကြားထဲတွင် မထင်ပေါ်သော်လည်း အချို့မျက်နှာများကတော့ လူအုပ်ကြားထဲတွင် ထင်ပေါ်ပြီးလွယ်လွယ်ကူကူမှတ်မိနိုင်သည်။ 


စုရွေ့သည် သိသိသာသာကို တစ်ခါမြင်လိုက်ရုံနှင့် မေ့ပျောက်မရနိုင်သည့်ပုံစံပင်။ 


ယနေ့တွင် စုရွေ့သည် ကာကီရောင်သိုးမွေးဆွယ်တာကိုဝတ်ထားကာ အနက်ရောင်သိုးမွေးကုတ်အရှည်အား လက်မောင်းတွင်ချိတ်ထားပြီး နူးညံ့သည့်သစ်အယ်သီးရောင်ဆံနွယ်များက သေချာထိန်းသိမ်းထားကြောင်း သိနိုင်သည်။ ယခုတွင် စုဝမ်၏ဘေးတွင်လျှောက်လာရင်း ပြုံးရယ်နေ၏။ လမ်းလျှောက်နေစဥ် သူကတစ်ခုခုကိုပြောနေပြီး သူရဲ့ချောမောလှသောမျက်နှာလေးက ညင်သာနူးညံ့သောအမူအရာတို့ဖြင့် ပြည့်နှက်နေသည်။ 


ယန်ဖန်သည် ထိုနူးညံ့ညင်သာသည့် စုရွေ့၏ပုံစံကိုမမြင်ဖူးပေ။ သူ့အမြင်တွင် အတိတ်၌ခေါင်းဆောင်သည် တသီးတခြားနေတတ်ကာ စကားလည်းသိပ်မပြောပေ။ ယခုတွင်သူ့မျက်နှာက ရေခဲထုကြီးအရည်ပျော်သလိုပင်ဖြစ်နေ၏။


ဒီနေ့ကုန်တိုက်ထဲကိုလာလိုက်တာ အမှားကြီးမှားသွားပြီလား။ 


ယန်ဖန်ကြက်သေသေနေသည့်အချိန်တွင် ဘေးတွင်ရပ်နေသောယန်လျန့်က သူ၏အကြည့်များနောက်ကို လိုက်ကြည့်လိုက်ရင်း “သေစမ်း ခြေတံအရှည်ကြီးနဲ့အိုပါး အား အဲ့ဒါ ကိုကြီးရဲ့ခေါင်းဆောင်လား အနုပညာရှင်နဲ့တောင်တူသေးတယ် အိုက်ယိုး ပြုံးနေလိုက်တာ ဒီလူကတော်တော်ကောင်းတဲ့သူဖြစ်ရမယ် ဟုတ်တယ်မလား သူ့ဘေးကသူက သေချာပေါက် သူ့ကောင်မလေးဖြစ်လိမ့်မယ် ကျစ်..ကျစ် သူမလည်းတော်တော်လေး လှတာပဲ ဒါပေမယ့်နည်းနည်း… ရင်းနှီးနေသလို… ဘုရားသခင် အဲ့ဒါစုချန်းဝမ်ယွဲ့မလား။” 


စုချန်းဝမ်ယွဲ့တဲ့လား...။


ယန်ဖန် : ကြည့်ရတာ လျှို့ဝှက်ချက်အကြီးကြီးကိုတွေ့လိုက်ရတာပဲ ခေါင်းဆောင်က သူ့လျှို့ဝှက်ချက်အဖော်ခံရမှာကိုကာကွယ်ဖို့ သက်သေအထောက်အထားတွေဖျောက်တဲ့အနေနဲ့ ငါ့ကိုသတ်မှာတော့မဟုတ်ပါဘူးနော်။ 


ယန်ဖန် အများကြီးတွေးတောနေမိသည်။


ယခုတွင် စုရွေ့နှင့်စုဝမ်တို့သည် ယန်ညီအစ်ကိုနှစ်ယောက်အရှေ့သို့ရောက်လာပြီး ရပ်တန့်ခြင်းမရှိ ဘေးမှဖြတ်လျှောက်သွားသည်။ 


ယန်ဖန် : ဝူးဝူးဝူး ခေါင်းဆောင်ကငါ့ကိုလျစ်လျူရှုသွားတယ်။ 


စုဝမ်မှလွဲ၍ အခြားသူများနှင့်ပတ်သက်ပြီး စုရွေ့သည် သူ၏လျစ်လျူရှုနိုင်စွမ်းနှင့်ခုခံနိုင်စွမ်းတို့ကို အမြဲထုတ်လွှတ်ထားတတ်သည်။ နောက်ဆုံးတွင်နှစ်ယောက်က အမျိုးသမီးလစဥ်သုံးပစ္စည်းစင်အရှေ့တွင် ရပ်လိုက်ကြသည်။ 


စုဝမ်က လစဥ်သုံးပစ္စည်းတစ်ထုပ်ကိုယူလိုက်သော်လည်း စုရွေ့ကပြန်လုယူလိုက်ကာ “ဒီတံဆိပ်ကအတုများတယ်လို့ WeChatမှာပြောထားတယ် ရှောင်ဝမ် ဒါကိုမသုံးနဲ့”


သူကပြောလိုက်ရင်း စင်၏ထိပ်ဆုံးမှအထုပ်ကိုယူလိုက်သည်။ ၎င်းက နိုင်ငံခြားတံဆိပ်ဖြစ်ပြီး သေချာလေးတင်ပို့ထားကာ ဈေးနှုန်းကလည်း လူတိုင်း၏မျက်စိကျိန်းမတတ်ကို ကြီးလေသည်။


“ဒါလေးကောင်းတယ် ပါးပါးလေးနဲ့ ယိုစိမ့်မှုမရှိ၊ နူးညံ့ပြီး အေးမြတယ်တဲ့”


စုဝမ် : “ရှင်တကယ်ပဲ ထူးဆန်းတဲ့တစ်ခုခုပူးကပ်မနေဘူးဆိုတာသေချာရဲ့လား” 


စုရွေ့ : ……


ယခုလေးတင်ပင် အနားတွင်ရှိနေသော ယန်ညီအစ်ကိုနှစ်ယောက်ကလည်း ထိတ်လန့်သွားကြသည်။ 


ယန်ဖန် : ငါမှားတာ ငါအမြင်မှားတာနေမှာပါ ဒီလူက ခေါင်းဆောင်ရဲ့အမြွှာညီအစ်ကိုဖြစ်လိမ့်မယ် သေချာပေါက်ပဲ။ 


ယန်လျန့် : သေစမ်း အဲ့ဒါကအရမ်းဈေးကြီးတာ အမျိုးသမီးတွေက လတိုင်းအဲ့ဒါတွေအသုံးပြုရတယ်လို့ပြောကြတယ် အဲ့ဒါဆို အနာဂတ်မှာငါလက်ထပ်လိုက်ရင် လတိုင်း ပိုက်ဆံအများကြီးသုံးရမယ်ဆိုတဲ့သဘောလား။ 


စုဝမ်နှင့်စုရွေ့တို့သည် သူတို့နှစ်ယောက်၏ အတွေးများကိုသတိမထားမိသော်လည်း အကြည့်နှစ်စုံက သူနှင့်စုဝမ်အပေါ်သို့ ရည်ရွယ်ချက်ရှိရှိသော်လည်းကောင်း၊ မရှိ၍သော်လည်းကောင်း ကျရောက်နေတာကိုခံစားနေရသည်။ ၎င်းက စုရွေ့အားဒေါသထွက်စေ၏။ 


သူကညင်သာစွာလှည့်လိုက်ကာ မျက်လုံးထောင့်မှ ယန်ဖန်နှင့်ယန်လျန့်တို့ရပ်နေသော နေရာကိုတစ်ချက်ကြည့်လိုက်သည်။ ညီအစ်ကိုနှစ်ယောက်သည် အေးစက်ချွန်မြသည့်အကြည့်တစ်စုံက လေထုကိုဖြတ်လျက်ရောက်လာကြောင်းခံစားလိုက်ရပြီး နှလုံးသားထဲတွင် တုန်လှုပ်သွားကြ၏။ ထို့နောက် ညီအစ်ကိုနှစ်ယောက်မှာ စိတ်တူကိုယ်တူပင် တွန်းလှည်းအားတွန်း၍ ထွက်ပြေးသွားကြတော့သည်။ 


“ဘာဖြစ်လို့လဲ” 


ယခုတစ်ခေါက်တွင် စုဝမ်သည် စုရွေ့မူမမှန်တာကိုခံစားမိသည်။ သူမက ခေါင်းကိုလှည့်၍ သူ့ကိုကြည့်လိုက်သည်။ 


“ဘာမှမဟုတ်ဘူး” 


စုရွေ့ကအေးစက်နေသည့်အကြည့်များကိုရုတ်သိမ်းကာ စုဝမ်အားအပြုံးလေးဖြင့်ကြည့်လိုက်ပြီး“ဒီရက်တွေမှာ မင်းနေမကောင်းဘူးဆိုရင် လိုင်းပေါ်မတက်နဲ့ ရက်နည်းနည်းလောက်ကောင်းကောင်းအနားယူလိုက် အသီးအရွက်နဲ့အသားတချို့ဝယ်ရအောင် ကိုယ်ချက်ပေးမယ်” 


ဟင်းချက်မယ်တဲ့လား။


စစ်သူကြီးစု၏ ဟင်းချက်စွမ်းရည်ကိုတွေးကာ စုဝမ်မူးဝေသွား၏။ 


“ပြဿနာမရှာစမ်းပါနဲ့ အပြင်ကနေပဲမှာစားရအောင်” 


စုဝမ်ကမပွင့်တပွင့်ပြောလိုက်သော်လည်း သူ၏ဟင်းချက်စွမ်းရည်အား သဘောမကျတာကို စုရွေ့သဘောပေါက်လိုက်သည်။ 


ဘယ်လိုလုပ်ဖြစ်နိုင်မှာလဲ။


ဝတ္ထုထဲရှိယုံကြည်မှုလွန်ကဲနေသော CEOများက ခန်းမများနှင့်မီးဖိုခန်းများတွင် လက်စွမ်းထက်ကြပြီး နိုင်ငံတကာ အသိအမှတ်ပြု စားဖိုမှူးများလည်းဖြစ်ကြသေးသည်။ နောက်တစ်ကြိမ် တာဝန်ကျကမ္ဘာရွေးလျှင် ဟင်းချက်ရသည့်ကမ္ဘာကိုရွေးကာ သူ၏ဟင်းချက်စွမ်းရည်တို့ကိုပြသရမည်ဟု စိတ်ကူးလိုက်သည်။ 


သုံးရက်ဆက်တိုက် စုဝမ်သည်လိုင်းမတက်ဘဲနေကာ အရှင်ဧကရာဇ်ကလည်း သူမကိုမဆက်သွယ်ခဲ့ပေ။ သုံးရက်မြောက်ည၌ စုဝမ်သည် အရှင်ဧကရာဇ်ထံမှ ငွေတို့ပြန်လည်လက်ခံရရှိလိုက်သောအခါတွင်မှ စုရွေ့က ဟာရီကိန်းစတူဒီယိုအား ရှာဖွေတွေ့ရှိသွားကာ သူမနှင့်ဟာရီကိန်းစတူဒီယို၏ လက်တွဲမှုကို ဖျက်သိမ်းလိုက်ကြောင်း စုဝမ်သဘောပေါက်သွား၏။ 


ထိုကိစ္စအား စုဝမ်ကရေးကြီးခွင်ကျယ်လုပ်မနေတော့ပေ။ ယခုတွင် သူမသည် အခြားသူများ၏အမဲလိုက်မခံရတော့သဖြင့် အဆင့်တင်ရန်လည်း အခြားသူများ၏အကူအညီမလိုတော့ပေ။ ယခုတွင် စုဝမ်၏ဦးစားပေးမှာ အဆင့်၆၀သို့အမြန်ဆုံးရောက်ရန်ဖြစ်သည်။ စနစ်၏အသစ်ဖွင့်လိုက်သော နယ်မြေအသစ်က အဆင့်၆၀ရောက်မှသာ ဝင်ရောက်နိုင်သည်။ ယခုတွင် ထိုနယ်မြေအား အောင်မြင်စွာရှင်းလင်းနိုင်သော အုပ်စုမရှိသေးချေ။ စုဝမ်သိထားသည့် ဇာတ်ကြောင်းအရ မူလကမ္ဘာတွင် ဒေသဖြတ်လမ်းကြောင်းမဖွင့်သေးခင်ပင် ထိုအဆင့်၆၀နယ်မြေအား ရှစ်ထျန်းအုပ်စု၏လက်ရွေးစင်များက ရှင်းလင်းသုတ်သင်ပြီးဖြစ်သည်။ အရာအားလုံးသည် ဟွေ့မော့ယိရှောင်၏ သဘာဝအားဆန့်ကျင်နေသည့်ကံကောင်းမှုပေါ်တွင် မူတည်နေသည်။ သူမ၏လုပ်ဆောင်ချက်များက မကောင်းသော်လည်း အမျိုးသမီးဇာတ်လိုက်၏ကံသည် ယှဥ်ပြိုင်၍မရပေ။ ထိုအဆင့်၆၀နယ်မြေက ဝင်္ကပါဖြစ်သည်။ အချိုးအဆစ်၊ အကွေ့အချိုးများ များပြားပြီး လမ်းကြောင်းမှားရွေးလိုက်သည်နှင့် သေခြင်းတရားဆီသို့ ရောက်ရှိသွားနိုင်သည်။ ထို့နောက်တွင် နဂါးမကောင်းဆိုးဝါးအုပ်စုကြီး၏ သုတ်သင်ခြင်းခံရနိုင်သည်။ 


တိရှစ်ထျန်းသည် ဟွေ့မော့ယိရှောင်၏အလိုလိုသိစိတ်အား အခြေခံ၍ အုပ်စုရှိလက်ရွေးစင်များအား အဆင့်မြင့်ပစ္စည်းကိရိယာများတပ်ဆင်ပေးပြီး အဆင့်တင်ပေးထားသောကြောင့် ဒေသဖြတ်လမ်းကြောင်းပွင့်လာပြီးနောက်တွင် ထိုနယ်မြေတွင် သူတို့ကအင်အားအလုံးအရင်းနှင့် ပထမဆုံးသတ်ဖြတ်နိုင်ခဲ့သည်။ ထိုနယ်မြေ၏ ပထမဆုံးသတ်ဖြတ်မှုဆုလာဘ်သည် အထူးစွမ်းရည်စာအုပ်ဖြစ်၏။


အဆင့်မြင့် ပြန်လည်ရှင်သန်ခြင်း...


အဆင့်၆၀နတ်ဆရာစွမ်းရည်ဖြစ်ပြီး စွမ်းရည်ထုတ်လွှတ်လိုက်သောအခါ ပစ်မှတ်သည် ပြန်လည်ရှင်သန်လာ၍ သူတို့ရဲ့မူလ HP နှင့် MPတို့၏ ၂၀%အား ပြန်လည်ရရှိလိမ့်မည်။ (HP=Hit point, MP=Mana point)


ထိုစွမ်းရည်စာအုပ်အား မူလဇာတ်ကြောင်းတွင် တိရှစ်ထျန်းနှင့်ဟွေ့မော့ယိရှောင်တို့ရရှိသွားသော်လည်း ယခုတစ်ခေါက်တွင် စုဝမ်အမိအရ ရအောင်ယူရမည်။


ဟွေ့မော့ယိရှောင်အတွက်တော့ ထိုစွမ်းရည်သည် တိရှစ်ထျန်းရန်သူများနှင့်ရင်ဆိုင်နေချိန်တွင် အသုံးပြုရန်သာဖြစ်သည်။ သူမက ဘေးဘက်မှကူညီ‌ထောက်ပံ့ပေးသည့်နေရာတွင်ရှိနေပါက ထိုစွမ်းရည်အား အသုံးပြုနိုင်သည်။ 


စုဝမ်အတွက်တော့ ဤစွမ်းရည်သည် သူမကဲ့သို့ ကြမ်းတမ်းသည့်နတ်ဆရာမတစ်ယောက်အတွက် မရှိမဖြစ်လိုအပ်သည့်အရာဖြစ်၏။



__🚩

Prev Next