Chapter 74
Viewers 4k
Chapters 444

🚩Chapter -74

 Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 12 ]


_____



‘အဆုံးမရှိည’အုပ်စုလက်ရွေးစင်တစ်ယောက်အနေနှင့် ‘ရေခဲတမျှအေးစက်သောလက်များ’၏ သူငယ်ချင်းစာရင်းတွင် စုရွေ့ရှိသော်လည်း ဆာဗာဖွင့်ပြီးသည်မှာလေးလရှိပြီဖြစ်ပြီးထိုအတောအတွင်းတွင် သီးသန့်စကားပြောခန်း၌ စုရွေ့ထံမှ စာမရရှိဖူးပေ။ ယနေ့တွင် ခေါင်းဆောင်ထံမှ သီးသန့်စကားပြောခန်း၌ ပထမဆုံး စာလက်ခံရဖူးခြင်းဖြစ်သည်။ 


ယဲ့ယွီ : စုချန်းဝမ်ယွဲ့နဲ့ဘယ်တုန်းကတွေ့ခဲ့တာလဲ


‘ရေခဲတမျှအေးစက်သောလက်များ’သည် ထိုစာအား နေ့တဝက်ကြာအောင် စိုက်ကြည့်နေခဲ့ပြီး သူ့လက်များက အမှန်တကယ်အေးခဲသွားသကဲ့သို့ခံစားလိုက်ရ၏။ 


ဘယ်လိုစာပြန်ရမလဲ... တကယ်လို့အမှန်ကိုပြောလိုက်ရင် ခေါင်းဆောင်နှုတ်ပိတ်တာခံရနိုင်လား။


ဒီတိုင်းဇာတ်လမ်းထွင်ပြောလိုက်ရမလား။ နောက်ပိုင်း ခေါင်းဆောင်အမှန်ကိုသိသွားတဲ့အခါကျရင် ဒေါသထွက်သွားလောက်လား။ 


စက္ကန့်အနည်းငယ်ကြာအောင် စိတ်ပိုင်းဆိုင်ရာကြိုးစားရုန်းကန်ပြီးနောက် ‘ရေခဲတမျှအေးစက်သောလက်များ’သည် စုရွေ့အား စာပြန်ရန်ဆင်ခြေတို့ကိုမြန်မြန်လေးစဥ်းစားလိုက်သည်။ 


ရေခဲတမျှအေးစက်သောလက်များ : ကျွန်တော့်မိသားစုက လိကျန်းမြို့ကပဲလေ အရင်ရက်က စျေးဝယ်ထွက်ရင်းနဲ့ မထင်မှတ်ဘဲတွေ့ခဲ့တာ။ 


ယဲ့ယွီ : သူမနဲ့ရင်းနှီးလား။ 


စုရွေ့ကလျင်မြန်စွာစာပြန်လာ၏။ စုချန်းဝမ်ယွဲ့သည် ဟွာရှားပြည်နယ်တစ်ခုလုံးတွင် နာမည်ကြီးဟု ဆိုနိုင်သော်လည်း သူမကိုမြင်ဖူးကြသည့် စတုတ္ထပြည်နယ်ရှိလူများမှလွဲ၍ အခြားပြည်နယ်မှသူများက သူမကို မမှတ်မိကြချေ။ ‘အေးစက်နေသောလက်များ’က လိကျန်းမြို့သားဟုပြောလာ‌သည်ကို စုရွေ့ယုံပြီးသားဖြစ်သည်။ သို့သော် စုရွေ့မှတ်မိသော ဇာတ်ကြောင်းတွင် “ရေခဲတမျှအေးစက်သောလက်များ’နှင့် မူလစုဝမ်တို့ရင်းနှီးကြသည့်အကြောင်းမပါရှိပေ။ 


ဒါဆိုဘယ်လိုဖြစ်ပြီးတော့လဲ။ 


စုရွေ့၏စာကိုကြည့်ကာ ‘ရေခဲတမျှအေးစက်သောလက်များ’သည် ခေတ္တတုံ့ဆိုင်းနေပြီးနောက် စာပြန်လိုက်၏။ 


ရေခဲတမျှအေးစက်သောလက်များ : ကျွန်တော်နဲ့မသိပါဘူး ဒါပေမယ့်ကျွန်တော့်ညီလေးက စတုတ္ထမြောက်ပြည်နယ်က ဝံပုလွေအစွယ်အုပ်စုဝင်လေ သူက စုချန်းဝမ်ယွဲ့ကိုသိတယ်။ 


ယဲ့ယွီ : ဝံပုလွေအစွယ်ကလူလား သူကရောစုချန်းဝမ်ယွဲ့ကိုလိုက်သတ်တဲ့အထဲမှာပါခဲ့သေးလား။


ရေခဲတမျှအေးစက်သောလက်များ : မဟုတ်ဘူး မဟုတ်ဘူး သေချာပေါက်မပါခဲ့ပါဘူး။ 


သူကယခုအချိန်တွင်ခေါင်းဆောင်၏မျက်နှာထားအား မမြင်နိုင်သော်လည်း ကုန်တိုက်တွင်တွေ့ခဲ့သည့်နေ့မှ ခေါင်းဆောင်၏ အေးစက်စူးရှသောအကြည့်အားသတိရမိသွားချိန်၌ ‘ရေခဲတမျှအေးစက်သောလက်များ’သည် သူ့နှလုံးသားအား ထိုလေအေးများက ဖြတ်တိုက်သွားသကဲ့သို့ခံစားလိုက်ရ၏။ ထို့ကြောင့် စုရွေ့၏မေးခွန်းများအား ချက်ချင်းငြင်းလိုက်ကာ ခဏကြာစဥ်းစားပြီးနောက် ‘ရေခဲတမျှအေးစက်သောလက်များ’က စုရွေ့ထံစာတစ်စောင်ပို့လိုက်သည်။ 


ရေခဲတမျှအေးစက်သောလက်များ : ကျွန်တော်ရော ကျွန်တော့်ညီလေးရောက ငြိမ်းငြိမ်းချမ်းချမ်းဆော့ရတာကို သဘောကျတဲ့သူတွေပါ သူက ဘယ်သူ့ကိုမှမသတ်ဖူးဘူး။ 


ယဲ့ယွီ : အိုး


ယဲ့ယွီ : သူ့ကိုဝံပုလွေအစွယ်အုပ်စုကထွက်ခိုင်းလိုက်တော့။ 


ထိုစာကြောင်းအားနောက်ဆုံးပို့ပြီးနောက် စုရွေ့လိုင်းဆင်းသွားပြန်သည်။ 


ရေခဲတမျှအေးစက်သောလက်များ : ......


ခေါင်းဆောင် ခေါင်း‌ဆောင်ရေ နောက်ဆုံးစာကြောင်းကဘာကိုဆိုလိုတာလဲဗျ။ 


မဟုတ်မှ ခေါင်းဆောင်က.....


‘ရေခဲတမျှအေးစက်သောလက်များ’သည် ဘာကြောင့်မှန်းမသိရုတ်တရက် ကြက်သီးထသွား၏။ သူ့အကြည့်များက တောက်ပသွားကာ ချက်ချင်းပင် လိုင်းဆင်းလိုက်သည်။ 


မြေအောက်နန်းတော်တွင် တစ်ရက်ကြာအောင် ရှင်းလင်းခြင်းမှရရှိလာသောအတွေ့အကြုံမှတ်များဖြင့် စုဝမ်လိုင်းဆင်းလိုက်သည့်အချိန်၌ ဂိမ်းထဲရှိသူမဇာတ်ကောင်သည် အဆင့်၅၃သို့ရောက်ရှိနေပြီဖြစ်သည်။


ဂိမ်းဆက်သွယ်ရေးစက်ထဲမှထွက်လာပြီးနောက် စုဝမ်ကတောင့်ခဲနေသောခြေလက်တို့ကိုလှုပ်ရှားလိုက်ပြီး သူမအိပ်ခန်းထဲသို့သွားချိန်တွင် မီးဖိုခန်းထဲ၌ စုရွေ့၏ အလုပ်ရှုပ်နေသည့်ပုံရိပ်ကိုတွေ့လိုက်ရ၏။ 


သူကလွန်ခဲ့သည့်ရက်များတွင် မချက်ပြုတ်ခဲ့‌သော်လည်း ‘စစ်ထူယဲ့’သည် မိသားစုအင်အားကိုသုံးကာ လိကျန်းမြို့၏အကြီးမားဆုံးဟိုတယ်မှ စားဖိုမှူးတစ်ယောက်အား ခေါ်ယူခဲ့သည်။ 


တစ်နည်းအားဖြင့် ကြယ်ငါးလုံးစာဖိုမှုးချက်ပြုတ်နေချိန်တွင် မိသားစု၏သခင်လေးက ကူညီပေးသည့် တာဝန်အားပျော်ပျော်ကြီးထမ်းဆောင်လျက်ရှိသည်။ 


အေပရွန်အားဝတ်ထားကာ မီးဖိုခန်းထဲတွင်အလုပ်ရှုပ်နေသော စုရွေ့၏ပုံရိပ်အားကြည့်၍ စုဝမ်မပြုံးဘဲမနေနိုင်ချေ။ 


စုရွေ့နှင့်တစ်ကမ္ဘာတည်းရှိနေသည့်ခံစားချက်က သိပ်မဆိုးလှကြောင်း သူမပထမဆုံးခံစားလိုက်ရသည်။ သူမရမှတ်များ၏ တချို့တဝက်အား သူ့အားခွဲဝေပေးရမည်ဆိုလျှင်တောင်မှ ၎င်းကအခြားကိစ္စတစ်ခုဖြစ်နေဆဲပင်။ 


လူနှစ်ယောက်၏ညစာသည် ဟင်းလျာလေးမျိုးနှင့် စွပ်ပြုတ်တစ်ခွက်ပါကာ အာဟာရပြည့်ဝပြီး သာမန်ထက်ပို၍အရသာရှိလှသည်။


စားသောက်ပြီးသွားသောအခါ သူတို့နှစ်ယောက်က ဆိုဖာပေါ်တွင် သက်တောင့်သက်သာဖြစ်စေမည့် အနေအထားကိုရှာရင်း အနားယူနေကြသည်။ စုရွေ့က ကြည့်ချင်သည့် တီဗီဒရာမာအားရှာနေချိန်တွင် စုဝမ်က Tabletကိုထုတ်ကာ သူမ၏စတော့အကောင့်အား အေးအေးလူလူစစ်ဆေးနေ၏။ ခဏတာစစ်ဆေးပြီးနောက် စုဝမ်၏အကောင့်ထဲ၌ အမြတ်သည်သန်းအနည်းငယ်ရှိနေပြီဖြစ်ရာ သူမက TXကုမ္ပဏီတွင်အရင်းအနှီးပို၍ထည့်လိုက်သည်။


လင်ရှန်းတွင်ဒေသဖြတ်လမ်းကြောင်းပွင့်လာသောအခါ TXကုမ္ပဏီ၏စတော့များက တဟုတ်ထိုးတက်သွားလိမ့်မည်။ ထိုအချိန်တွင်သူတို့သည် အကန့်အသတ်မရှိသော စီးပွားရေးအခွင့်အလမ်းများ၏ ကြီးမားသောအလားအလာကိုမြင်သောကြောင့် ကော်ပိုရေးရှင်းသည် သူတို့ရဲ့ စတော့များရောင်းချခြင်းကို ရပ်တန့်လိမ့်မည်ဖြစ်ပြီး စျေးကွက်ထက် ၃၀%ပိုများသော ရင်းနှီးမြှပ်နှံသူများ၏ လက်ထဲတွင်ပြန့်ကျဲနေသည့် စတော့များကိုပြန်လည်ရယူလိမ့်မည်ပင်။ 


ထိုအချိန်မတိုင်ခင်ထိတော့ စတော့များကအမှန်တကယ်တန်ဖိုးမရှိပေ။ 


နောက်တစ်နေ့တွင် စုဝမ်က မြေအောက်နန်းတော်ပထမထပ်တွင် မကောင်းဆိုးဝါးများအား တိုက်ခိုက်နေဆဲဖြစ်သည်။ ယနေ့တွင်သူမသည် ဝူဖုန်းတို့သုံးယောက်နှင့်ဆုံလေသည်။ သူတို့ကတစ်ယောက်နှင့်တစ်ယောက်နှုတ်ဆက်လိုက်ကာ မနေ့ကလိုပင် မကောင်းဆိုးဝါးများကို တိုက်ခိုက်ရန် အခြားနေရာသို့သွားလိမ့်မည်ဟု စုဝမ်ထင်ခဲ့၏။ သို့သော် နှုတ်ဆက်ပြီးပြီးချင်းပင် ဝူဖုန်းက စုဝမ်အနားသို့ မပြောမဆိုနှင့်ရောက်လာခဲ့သည်။ ဘေးဘက်ရှိမကောင်းဆိုးဝါးများကိုတိုက်ခိုက်နေရင်း ဝူဖုန်းက စုဝမ်သို့ ဖိတ်ခေါ်ချက်ပို့လိုက်၏။ 


‘ကောင်းကင်ဘုံကိုးထပ်ရှိဖီးနစ်’အုပ်စုခေါင်းဆောင် ဝူဖုန်းသည် အုပ်စုသို့ပူးပေါင်းရန်ဖိတ်ခေါ်လာပါသည် ပူးပေါင်းပါမည်လား။ ပူးပေါင်းမည်/မပူးပေါင်းပါ။"


ထိုမှသာ စုဝမ်သည် ဝူဖုန်း၏ခေါင်းအထက်၌အသစ်စက်စက် အုပ်စုနာမည်ပေါ်နေကြောင်း သတိထားမိသွား၏။ 


“ကိုယ်ပိုင်အုပ်စုထောင်လိုက်တာလား” စုဝမ်ကထိုအုပ်စုအမည်အား မကြားဖူးသောကြောင့် ၎င်းသည် သူတို့ကိုယ်တိုင်ထောင်လိုက်သော အုပ်စုအသစ်ဖြစ်လိမ့်မည်ဟုခန့်မှန်းလိုက်သည်။ 


“အင်း ဝူပေါင်ပေ့က အုပ်စုအသစ်လိုချင်တယ်ဆိုလို့”


ဝူဖုန်းသည် စုဝမ်၏အမေးအား တိုတိုတုတ်တုတ်သာပြန်ဖြေလိုက်သည်။ 


ဖြစ်နိုင်သည်က ၎င်းက လိပ်ပြာတန်ပြန်သက်ရောက်မှုဖြစ်လောက်သည်။ 


မူလဇာတ်ကြောင်းတွင် ဝူပေါင်ပေ့ လင်ရှန်းသို့ရောက်လာသောအခါ မူလစုဝမ်သည် အကောင့်ဖျက်ကာ ဂိမ်းမှထွက်ခဲ့ပြီးဖြစ်သည်။ သူမ၏အိုင်ဒေါ ဂိမ်းမှထွက်သွားတာကိုသိသွားပြီးနောက် ဝူပေါင်ပေ့သည် မကစားချင်တော့သဖြင့် ရက်အနည်းငယ်ကြာသည့်အခါ ဂိမ်းမှထွက်ခဲ့၏။ ဝူပေါင်ပေ့နှင့်အတူကစားလေ့ရှိသော ပင်းဟွေ့ရှင်ကျဲ့သည်လည်း သူမနှင့်အတူလိုက်၍အခြားဂိမ်းကိုသာကစားခဲ့သည်။ သုံးယောက်ထဲတွင် ဝူဖုန်းသာကျန်နေခဲ့ပြီး တစ်ယောက်တည်းဆက်ဆော့နေခဲ့သည်။ သူကဆက်လက်တိုက်ခိုက်နေခဲ့ပြီး သူ၏ပင်ကိုယ်သဘာဝအရ မည်သည့်အုပ်စုနှင့်မှပူးပေါင်းခဲ့ခြင်းမျိုးမရှိပေ။


သို့သော်ယခုတွင် စုဝမ်ကဂိမ်းဆက်လက်ကစားနေဆဲဖြစ်ပြီး ဝူပေါင်ပေ့နှင့်သူတို့သည်လည်း ဆက်လက်ရှိနေကာ ဝူပေါင်ပေ့၏ပူဆာမှုအောက်တွင် ဝူဖုန်းက ကိုယ်ပိုင်အုပ်စုကိုတည်ထောင်လိုက်သည်။ 


ကောင်းကင်ဘုံကိုးထပ်ရှိဖီးနစ်....


အုပ်စုအမည်၏အရှိန်အဝါကြီးမားမှုအောက်တွင် သူတို့သည်အသစ်အဆန်းဖြစ်နေကာ သေးငယ်ပြီးအားအင်နည်းနေသော်လည်း လူတိုင်းမသိကြသည်က ဤအုပ်စုသည် လာမည့်အနာဂတ်တွင် ဆာဗာတစ်ခုလုံး၏လက်ရွေးစင်များဖြစ်လာကြလိမ့်မည်ဆိုသည်ပင်။ 


“အုပ်စုကိုပူးပေါင်းဖို့ဆန္ဒရှိတယ်ဆိုရင် မင်းကို အုပ်စုခေါင်းဆောင်နေရာလွှဲပေးနိုင်တယ်” 


ဝူဖုန်းကစုဝမ်ဘေးတွင်ရပ်ရင်း ထပ်ပြောလိုက်သည်။ အမှန်တကယ်တွင်အုပ်စုအမည်သည် အမျိုးသမီးခေါင်းဆောင်နှင့်သာလိုက်ဖက်သောကြောင့် သူကသူ့ညီမလေးအား အုပ်စုခေါင်းဆောင်ထားပေးရန် စီစဥ်ထားခဲ့သည်။ သို့သော်လည်း ဝူပေါင်ပေ့က စိတ်မဝင်စားပေ။ ထို့ပြင် သူမ၏အဆင့်ကနိမ့်နေသေးကာ ထင်ရှားသောဂုဏ်သတင်းလည်းမရှိသည့် ကျောင်းသူတစ်ယောက်သာရှိသေးသည်။ သူမအုပ်စုခေါင်းဆောင်ဖြစ်လာလျှင် အုပ်စုအတွက် တပ်သားစုဆောင်းရန်အခက်အခဲရှိမည်ကို သူစိုးရိမ်မိသည်။ ထို့ကြောင့် ဝူဖုန်းသည်မတတ်သာဘဲ သူကိုယ်တိုင်အုပ်စုခေါင်းဆောင်လုပ်လိုက်ရသည်။


ယခုတော့သူ့တွင် ပိုကောင်းသည့်ရွေးချယ်မှုရှိလာသည်။ 


ဝူဖုန်းမျက်လုံးထဲတွင် စုချန်းဝမ်ယွဲ့သည် အုပ်စုခေါင်း‌ဆောင်လုပ်ရန်အလွန်သင့်တော်လှသည်။ သူမက အုပ်စုထဲတွင်နှစ်အကြာကြီးစီမံခန့်ခွဲခဲ့သည့် အတွေ့အကြုံတို့ရှိကာ စတုတ္ထမြောက်ပြည်နယ်တွင်လည်းနာမည်ကြီးလေသည်။ ထို့အပြင် ယခုသူမ၏အဆင့်သည်လည်း မနိမ့်တော့သောကြောင့် သူမသာတပ်သားစုဆောင်းလိုက်သည်နှင့် အုပ်စုမရှိ၍ပြန့်ကျဲနေသောကစားသူများက သေချာပေါက် ပူး‌ပေါင်းကြလိမ့်မည်ဟု သူယုံကြည်သည်။ 


“ငါပူးပေါင်းနိုင်ပါတယ် ဒါပေမယ့်ခေါင်း‌ဆောင်တော့မလုပ်နိုင်ဘူး ငါ့ကိုအရမ်းတွေအထင်ကြီးနေပြီ ဒုခေါင်းဆောင်လုပ်ခိုင်းတာကမှပိုကောင်းသေးတယ်” 


စုဝမ်ကပြောရင်း ဝူဖုန်း၏ဖိတ်ခေါ်မှုအားလက်ခံလိုက်၏။ လက်ရှိတွင်သူမသည်အုပ်စုတစ်ခုနှင့် ယုံကြည်၍ရနိုင်သည့်လူအချို့လိုအပ်နေသည်။ ဝူဖုန်း၏ဖိတ်ခေါ်မှုက အချိန်ကိုက်ရောက်လာခြင်းပင်။ 


“ဟိုဟာ...”


ထိုအချိန်၌ပင် သူတို့နှစ်ယောက်အနောက်မှ တိုးလျသောယောက်ျားလေးအသံထွက်လာ၏။


စုဝမ်လှည့်ကြည့်လိုက်သောအခါ ‘ရေခဲတမျှအေးစက်သောခြေထောက်များ’နှင့် ‘ကမ္ဘာမြေအဆုံး’တို့ကို တွေ့လိုက်ရသည်။ 


“မင်းတို့ အုပ်စုထဲကိုဝင်လို့ရမလား”


‘ရေခဲတမျှအေးစက်သောခြေထောက်များ’အသံက ယုံကြည်ချက်ပျောက်ဆုံးနေသကဲ့သို့ဖြစ်နေ၏။ 


စုဝမ်ကသူတို့ကိုမမှတ်မိသော်လည်း ဝူဖုန်းကထိုနှစ်ယောက်ကိုမှတ်မိသည်။ သူမှတ်မိတာမှန်လျှင် ထိုနှစ်ယောက်သည် မနေ့ကတွေ့ခဲ့သည့် ‘ဝံပုလွေအစွယ်’အုပ်စုမှလူများဖြစ်သည်။ သူတို့က ‘ဝံပုလွေအစွယ်’အုပ်စုမှထွက်လာခဲ့ပြီဆိုလျှင်တောင်မှ ဝူဖုန်းအတွက် ‘ဝံပုလွေအစွယ်’မှလူများအား သူ့အုပ်စုထဲသို့ဝင်ခွင့်ပေးရန်မဖြစ်နိုင်ပေ။ 


သူဤအုပ်စုအားစတင်တည်ထောင်သည့်အချိန်တွင် သူ့ညီမလေးသည် အုပ်စုအဆင့်၃သို့ရောက်သည့်အချိန်၌ ‘ဝံပုလွေအစွယ်’နှင့် ရှစ်ထျန်းအုပ်စုကြီးနှစ်ခုအား ‘ကောင်းကင်ဘုံကိုးထပ်ရှိဖီးနစ်’အုပ်စု၏ရန်သူများအဖြစ်ကြေညာရန် တောင်းဆိုခဲ့သည်။


ဝူဖုန်းကသူတို့ကိုတစ်ချက်ပင်မကြည့် တိတ်ဆိတ်စွာထွက်သွားသည်ကိုတွေ့သောအခါ ‘ရေခဲတမျှအေးစက်သောခြေထောက်များ’က စုဝမ်အား တောက်ပနေသောမျက်လုံးတို့ဖြင့်ကြည့်ကာ “စုချန်းဝမ်ယွဲ့ ကျွန်တော်တို့ကိုလက်ခံပေးပါနော် ကျွန်တော့်အစ်ကိုက အစ်မတို့ဆီမှာ အဖွဲ့ဝင်ဖို့ပြောလိုက်လို့” 


“မင်းရဲ့အစ်ကိုကဘယ်သူလဲ” 


စုဝမ်ကမကောင်းဆိုးဝါးကိုသတ်နေရင်းမေးလိုက်သည်။ စုဝမ်ကသူ့အစ်ကိုအကြောင်းမေးနေတာကို ကြားသောအခါ သူကချက်ချင်းဖြေလိုက်၏။ 


“ကျွန်‌တော့်အစ်ကိုက ရေခဲတမျှအေးစက်သောလက်များလို့ခေါ်ပါတယ် သူက ဆဌမမြောက်ပြည်နယ် အဆုံးမရှိညအုပ်စုဝင်ဖြစ်ပြီး ခေါင်းဆောင်ယဲ့ယွီရဲ့ သူငယ်ချင်း‌ကောင်းတစ်ယောက်ပါ။ သူက ကျွန်တော်တို့ကို ဒီမှာအဖွဲ့ဝင်ဖို့ပြောလိုက်လို့ပါ။ ကျေးဇူးပြုပြီး လက်ခံပေးပါနော်။” 


‘ရေခဲတမျှအေးစက်သောလက်များ’ လား။


စုရွေ့အုပ်စုထဲတွင် ထိုလူရှိကြောင်းစုဝမ်သိသည်။ ဤကောင်လေးက သေချာပေါက် အမှန်ကိုပြောနေသည်ပင်။ 


ယခုလက်ရှိကမ္ဘာတွင် သူမနှင့်စုရွေ့၏ဆက်ဆံရေးကိုသာမက စုရွေ့အားသိသောသူလည်း စင်စစ်တစ်ယောက်မှမရှိချေ။ 


ဒါပေမယ့်.... စုရွေ့ရဲ့သူငယ်ချင်းကောင်းတဲ့လား။ 


စုဝမ်သိချင်စိတ်တို့ပေါ်ပေါက်လာခဲ့သည်။ 


စုရွေ့ ဒီလူက တစ်စုံတစ်ယောက်နဲ့သူငယ်ချင်း‌ကောင်းတွေဖြစ်နိုင်တယ်တဲ့လား။ အဲ့ဒီလူရဲ့ စွမ်းရည်တွေက အဲ့လောက်တောင်အားပြင်းလွန်းတယ်လား...။


__


🚩

Prev Next