Welcome To MM Storyteller
LOGIN
🚩Chapter -75
Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 13 ]
_____
အဆုံးတွင် စုဝမ်သည် ‘ရေခဲတမျှအေးစက်သောခြေထောက်များ’နှင့် ‘ကမ္ဘာမြေအဆုံး’တို့အား အုပ်စုထဲသို့ ထည့်လိုက်သည်။ ထိုနှစ်ယောက်အုပ်စုထဲသို့ရောက်လာတာကိုသတိထားမိသောအခါ ဝူဖုန်းနှင့်သူမ စကားပြောခဲ့ရသည်။ နောက်တွင် စုဝမ်သည် သူတို့နှစ်ယောက်အားသိကြောင်းနှင့် ယုံကြည်၍ရသောသူများဖြစ်ကြောင်း ပြောသောအခါတွင်မှ ဝူဖုန်းကဘာမှထပ်မပြောတော့ပေ။
ယခု အုပ်စုထဲတွင် အဖွဲ့ဝင်ခြောက်ယောက်ရှိပြီဖြစ်သည်။ စုဝမ် အုပ်စုထဲသို့ရောက်လာသည်ကိုကြည့်ရင်း ဝူပေါင်ပေ့က အပျော်ဆုံးဖြစ်နေတော့သည်။ ပထမတွင်သူမသည် အဆင့်တင်ရန်စိတ်မပါဘဲ အဖွဲ့မှထွက်ကာ အဓိကမြို့တော်သို့ပြန်ရန်စိတ်ကူးထားသော်လည်း ယခုတွင် စပီကာများကိုသုံး၍ ကမ္ဘာ့ချန်နယ်တွင် အဖွဲ့ဝင်စုဆောင်းနေလေသည်။
ကျန်ရှိနေသည့်လူငါးယောက်သည် အသင်းငယ်လေးတစ်ခုအဖြစ်လုံလောက်နေပြီဖြစ်သည်။ အသင်း၏ဇာတ်ကောင်များမှာ မှော်ပညာရှင်နှစ်ယောက်၊ နတ်ဆရာနှစ်ယောက်နှင့် စစ်သည်တော်တစ်ယောက်ဖြစ်၏။ ၎င်းသည်နယ်မြေရှင်းလင်းသုတ်သင်ရန်အတွက် အကောင်းဆုံးဖွဲ့စည်းမှုဖြစ်သည်။ ပင်းဟွေ့ရှင်ကျဲ့မှလွဲ၍ အခြားလေးယောက်သည် ဝါရင့်နေသောကစားသူများဖြစ်ပြီး အသင်းနှင့်မည်သို့ပူပေါင်းဆောင်ရွက်ရမည်ကိုသိကြသည်။ မီးမှော်ပညာရှင်ဖြစ်သည့်’ရေခဲတမျှအေးစက်သောခြေထောက်များ’နှင့် ရေခဲမှော်ပညာရှင်ဖြစ်သည့် ပင်းဟွေ့ရှင်ကျဲ့တို့သည် လမ်းကြောင်းနှစ်ကြောင်းခွဲကာ အကန့်အသတ်မရှိသောမကောင်းဆိုးဝါးများကို စတင်တိုက်ခိုက်ကြသည်။ ဝူဖုန်းက အကြမ်းခံတပ်သားအဖြစ်ထမ်းဆောင်ရင်း မကောင်းဆိုးဝါးတို့ကိုတိုက်ခိုက်ရန်နှင့် သူတို့၏အမုန်းတရားတို့ကိုဆွဲဆောင်ရန်တာဝန်ယူလေသည်။ နတ်ဆရာနှစ်ယောက်ဖြစ်သော စုဝမ်နှင့် ‘ကမ္ဘာမြေအဆုံး’တို့သည် ဝူဖုန်းအားအသက်ပြန်ဖြည့်ပေးရန် တာဝန်ယူရ၏။ လူငါးယောက်သည် ဖြေးညင်းစွာတိုက်ခိုက်နေကြပြီး သူတို့၏ပူးပေါင်းဆောင်ရွက်မှုတို့သည် ဖြေးဖြေးချင်း သွက်လက်လာတော့သည်။ တစ်နာရီကြာရှင်းလင်းသုတ်သင်ခဲ့ကြပြီးနောက် သူတို့၏အဆင့်များသည် အတော်လေးမြင့်သွားကြပြီး မြေအောက်နန်းတော်၏ဒုတိယထပ်အားတက်ရန် အဆင့်သင့်ဖြစ်နေကြပြီဖြစ်သောကြောင့် မြေအောက်နန်းတော် ပထမထပ်မှထွက်လာလိုက်ကြသည်။
ထိုအချိန်တွင် ‘ကောင်းကင်ဘုံကိုးထပ်ရှိဖီးနစ်’အုပ်စု၏ချန်နယ်သည် သက်ဝင်လှုပ်ရှားလျက်ရှိသည်။ ကမ္ဘာ့ချန်နယ်ရှိလူများအားစုဆောင်းရန် ရွှေဒင်္ဂါးတို့ကိုအဆက်မပြတ်သုံးနေသော ဝူပေါင်ပေ့၏ “ကြီးမားလှသည့်စီမံကိန်း”ကြောင့် သူမကအမှန်တကယ်ပင် လေလွင့်ကစားသူအချို့ကိုရှာတွေ့ခဲ့သည်။
ထိုကစားသူသုံးယောက်သည် အုပ်စုထဲသို့ရောက်လာပြီး ဝူဖုန်းကအုပ်စုခေါင်းဆောင်ဖြစ်ကြောင်း သိသွားသောအခါ ကြောင်အမ်းသွားကြသည်။ ဝူဖုန်းသည် လေလွင့်ကစားသူများကြားတွင် နာမည်ကြီးပြီး ယခုတွင် သူ့ကိုယ်ပိုင်အုပ်စုတည်ထောင်လိုက်ပြီဖြစ်ရာ လူတိုင်းကဤအုပ်စု၏အလားအလာတို့ကို မျှော်လင့်နေလျက်ရှိသည်။ ထို့နောက် သိပ်မကြာလိုက်ခင်မှာပင် အမြင်စူးရှသောသူများသည် စုချန်းဝမ်ယွဲ့ကအုပ်စု၏ ဒုခေါင်းဆောင်ဖြစ်သည်ကိုတွေ့လိုက်သောအခါ လူတိုင်းကချက်ချင်းပင် လှုပ်လှုပ်ရှားရှားဖြစ်လာကြတော့၏။
စုချန်းဝမ်ယွဲ့ကဘယ်သူမို့လို့လဲ။
သူမကရှစ်ထျန်းအုပ်စုရဲ့ ဒုခေါင်းဆောင်အဟောင်းဖြစ်ပြီး လူထောင်ပေါင်းများစွာ၏ထိပ်တွင်ရှိနေခဲ့သောသူပင်။
သူမကျဆုံးသွားခဲ့တာကိုပဲကြည့်မနေကြနဲ့။ အခုသူမကအဆင့်၅၅ထိကိုရောက်လာခဲ့ပြီ။ ပြီးတော့ ရှစ်ထျန်းမှာ နယ်မြေရှင်းလင်းခဲ့တုန်းက ရှိခဲ့တဲ့ သူမရဲ့အဆင့်မြင့်နတ်ဆရာမစွမ်းရည်တွေကလည်း ခုထိအစွမ်းထက်နေသေးတာကို လူတိုင်းသိကြတယ်။
ခဏလေးအတွင်းမှာပင် အုပ်စုဝင်အသစ်များထံမှသတင်းတို့က လျင်မြန်စွာပျံ့နှံ့သွားကာ ဝူဖုန်းကအုပ်စုတစ်စုတည်ထောင်လိုက်ကာ စုချန်းဝမ်ယွဲ့ကထိုအုပ်စု၏ ဒုခေါင်းဆောင်ဖြစ်ကြောင်း ဟွာရှားစတုတ္ထပြည်နယ်တစ်ခုလုံးသိသွားကြတော့သည်။
ဝံပုလွေအစွယ်နှင့်ရှစ်ထျန်းတို့သည် ဤကိစ္စအပေါ်မည်သည့်ထင်မြင်ချက်တို့ကိုမှဖော်ပြမလာခဲ့ပေ။ ဝံပုလွေအစွယ်နှင့်ရှစ်ထျန်းတို့ ဝင်ရောက်စွက်ဖက်မည့် ရည်ရွယ်ချက်မရှိသည်ကို တွေ့ရသောအခါ အခြားအုပ်စုခေါင်းဆောင်များက နောင်တရလာကြ၏။ စုချန်းဝမ်ယွဲ့သည် အနားယူပြီးရာမှ ပြန်လည်ရောက်ရှိနေကြောင်းစောစောသိခဲ့လျှင် သူတို့အရင်လက်ဦးမှုရရန်ကြိုးစားမည်ဖြစ်သည်။
ရလဒ်အနေနှင့် စုဝမ်၏စကားပြောခန်းသည် စာများပြည့်လျှံနေကာ နယ်မြေရှင်းလင်းရင်းအလုပ်ရှုပ်နေသော စုဝမ်က ကြည့်ရန်အချိန်မရှိသဖြင့် အကုန်လုံးကို ဘလော့လိုက်သည်။
အုပ်စုဘက်တွင်လည်း အကြီးအကဲဖြစ်လာသောဝူပေါင်ပေ့သည် သူမလက်များပျော့အိမသွားခင်အထိ လူများအား လက်ခံနေလေ၏။ ပထမအဆင့်အုပ်စုသည် အများဆုံးလူအယောက်တစ်ရာသာရှိနိုင်ရာ အုပ်စုထဲတွင် လျင်မြန်စွာနှင့် နေရာလွတ်များမရှိတော့ပေ။
သူမကအုပ်စုထဲရှိလူများအားလုံးကို မစ်ရှင်အတူတကွထမ်းဆောင်ရန် ပျော်ရွှင်စွာနှင့် စီမံခန့်ခွဲပေးနေသည်။ ၎င်းသည် အုပ်စုအားအရှိန်မြန်စွာအဆင့်နှစ်သို့ရောက်စေပြီး လူအရေအတွက်ကိုလည်း တစ်ရာမှသုံးရာအထိ တိုးစေနိုင်၏။
အသစ်စက်စက်တည်ထောင်ထားသောအုပ်စုသည် ယခုလေးတင်ဖန်တီးလိုက်သော စကားပြောခန်းများနှင့်အတူ သက်ဝင်တက်ကြွနေလျက်ရှိသည်။ စုဝမ်နှင့်ဝူဖုန်းတို့သည် နယ်မြေရှင်းလင်းနေ၍ စကားပြောရန်အချိန်မရှိကြောင်းသိကြသော်လည်း အုပ်စုထဲသို့အသစ်ဝင်ရောက်လာသူများက အုပ်စုစကားပြောခန်းထဲတွင် ပျော်ရွှင်စွာနှင့် စကားပြောနေကြ၏။
အပျော်အပါးတို့ကိုနှစ်သက်သော’ရေခဲတမျှအေးစက်သောခြေထောက်များ’သည် အုပ်စုစကားပြောခန်းအား ခိုးကြည့်ရန် မကောင်းဆိုးဝါးအုပ်အား သုတ်သင်လိုက်ပြီးနောက် အကွာအဝေးတစ်ခုခွာနေလိုက်သည်။ ရလဒ်အနေနှင့် လူတိုင်းက စုချန်းဝမ်ယွဲ့နှင့် ဝူဖုန်းတို့၏ဆက်ဆံရေးအကြောင်းအား ပျော်ရွှင်စွာဆွေးနွေးနေကြောင်းတွေ့လိုက်ရ၏။ ခန့်မှန်းချက်အမျိုးမျိုး၊ ဟာသအမျိုးမျိုးနှင့် “အတူတကွ”ဆိုသည့် ဖော်ပြချက်များသည် ‘ရေခဲတမျှအေးစက်သောခြေထောက်များ’အားခြေချော်စေကာ တစ်ကိုယ်လုံးမြေပေါ်လဲကျသွားစေတော့မတတ်ပင်။
ဒီသေမျိုးအုပ်စုကတော့ ကိုယ့်သဘောနဲ့ကိုယ်လျှောက်မှန်းဆရဲနေတယ်ပေါ့လေ...။
အသက်ရှင်ရတာငြီးငွေ့နေကြတဲ့ပုံပဲ။
သူနှင့် ကံကြမ္မာကြောင့်တစ်ကြိမ်တွေ့ဆုံခဲ့သော အဆုံးမရှိညအုပ်စု၏ခေါင်းဆောင်အားတွေးမိပြီးနောက် ခေါင်းလှည့်ကာ ဝူဖုန်းအားလျှို့ဝှက်စွာကြည့်လိုက်သည်။ ဝူဖုန်းသည် ထူးချွန်ထက်မြက်သော်လည်း နောက်ဆုံးတွင် သူကကျောင်းသားတစ်ယောက်သာရှိသေးသည်။ သူ့တွင်အရှိန်အဟုန်တို့မရှိသေးကာ ယဲ့ယွီနှင့်အတူထား၍ယှဥ်ကြည့်ပါက လွှမ်းမိုးခံရမည်မှာသေချာပေါက်ပင်။ ထို့အပြင် မနေ့ညက သူ့အစ်ကိုက သူတို့၏ခေါင်းဆောင်က ပို၍ပြင်းထန်ကြမ်းတမ်းလာကြောင်း ပြောခဲ့သည်။ ဤလူများ၏အတွေးများအား ယဲ့ယွီသိသွားလျှင် သူတော့ သေချာပေါက် ဆိုးဝါးစွာ၊ အလွန့်ကို ဆိုးဝါးစွာ အသတ်ခံရလိမ့်မည်ဟု သူခံစားနေရသည်။
လူငါးယောက်အဖွဲ့သည် မြေအောက်နန်းတော်ဒုတိယထပ်အား ဆက်လက်ရှင်းလင်းနေကြကာ ညရောက်သည့်အခါမှလိုင်းဆင်းလိုက်ကြသည်။ ယခုတွင် စုဝမ်သည် အဆင့်၅၇၊ ပင်းဟွေ့ရှင်ကျဲ့က အဆင့်၅၆၊ ‘ကမ္ဘာမြေအဆုံး’နှင့် ‘ရေခဲတမျှအေးစက်သောခြေထောက်များ’က အဆင့်၆၀သို့ရောက်ရှိနေပြီး ဝူဖုန်းသည်အဆင့်၅၉တွင်ရှိနေကာ အဆင့်၆၀သို့ရောက်ရန် အတွေ့အကြုံအမှတ်များစွာလိုနေသေးသည်။ လူငါးယောက်သည် မနက်ဖြန်လိုင်းတက်ကြမည့်အချိန်ကိုချိန်းလိုက်ကာ အတူတကွလိုင်းဆင်းလိုက်ကြ၏။
ယနေ့တစ်နေ့တာလုံး နယ်မြေရှင်းလင်းခြင်း၏ရလဒ်အနေနှင့် စုဝမ်သည် ဂိမ်းဆက်သွယ်ရေးစက်ထဲမှ အားအင်ကုန်ဆုံး၍ထွက်လာခဲ့သည်။ သူမမျက်နှာက အနည်းငယ်ဖြူဖျော့နေ၏။
ယခုလိုမျိုး အွန်လိုင်းပေါ်၌ အဆက်မပြတ်အားအင်အပြည့်နှင့်ရှိနေခြင်းက သာမန်မိန်းကလေးများလုပ်နိုင်သည့်အရာ မဟုတ်ပေ။
သူမအရမ်းပင်ပန်းနေသောကြောင့် စုဝမ်ကရေချိုးဇလုံထဲသို့ ရေပူများဖြည့်လိုက်ကာ သူမ၏နွမ်းနယ်မှုတို့ကို ပြေပျောက်စေရန် စိမ်နေလိုက်မည်ဟုစိတ်ကူးလိုက်သော်လည်း နောက်ဆုံးတွင် သူမသည်ရေစိမ်နေရင်းနှင့် အိပ်ပျော်သွားတော့သည်။
စုဝမ်နိုးလာသောအခါ သူမသည်အိပ်ခန်းကုတင်ပေါ်သို့ရောက်နေပြီး ညအိပ်ဝတ်စုံတို့လည်း လဲထားကြောင်းသတိထားမိသွားသည်။ သူမဘေးတွင်တော့ စုရွေ့က ဝင်လှဲနေကာ သူမ၏လက်များအား တင်းကြပ်စွာဆုပ်ကိုင်ထား၏။
စုဝမ်ကသူမလက်တို့ကို ဆွဲမထုတ်လိုက်ပေ။ သူမကမျက်နှာကိုဖြည်းဖြည်းချင်းလှည့်ကာ ကုတင်ဘေးရှိ မီးအိမ်၏ မှိန်ဖျော့နေသောအလင်းရောင်ကိုအမှီပြု၍ စုရွေ့၏အိပ်ပျော်နေသည့်ပုံလေးအား တိတ်ဆိတ်စွာကြည့်နေမိသည်။
သူအိပ်ပျော်နေစဥ် သူ့ရဲ့အေးစက်ငြိမ်သက်နေသည့်ကိုယ်နေဟန်ထားက အပြစ်ကင်းစင်သည့်သူ တစ်ယောက်ကဲ့သို့ပင်။ သူကအမြဲသတ်ဖြတ်လိုစိတ်ပြင်းထန်သည့် အရူးတစ်ယောက်ပုံစံသာဖြစ်နေသောကြောင့် ယခုပုံစံမှာ စိတ်ကူးကြည့်ရန်ပင်ခက်ခဲလွန်းလှသည်။
သို့မဟုတ် စုရွေ့၏ကမ္ဘာတွင် အမှားနှင့်အမှန်၊ အကောင်းနှင့်အဆိုးတို့က ရိုးရှင်းစွာတည်ရှိနေခြင်းကြောင့်ဖြစ်နိုင်သည်။ သူကမြတ်နိုးသည့်အရာများအား ကာကွယ်ကာ မုန်းသည့်အရာများကိုတော့ မြင်ကွင်းထဲမှပျောက်သွားအောင် ဖျက်ဆီးရင်းပင်ပန်းနေလိမ့်မည်ပင်။
စုရွေ့ ရှင်သာဒီလိုပုံစံအတိုင်းလေးရှိနေနိုင်ရင် ဘယ်လောက်တောင်ကောင်းလိုက်မလဲ။
ကျွန်မကိုမရွေးခဲ့သင့်ဘူး ကျွန်မကရှင့်အချစ်တွေနဲ့မတန်ဘူး။
စုဝမ်ကသူမသည် စုရွေ့၏ အချစ်များနှင့်မထိုက်တန်ဟုတွေးလိုက်သည်။ သူမကဖြူစင်သည့်သူတစ်ယောက် မဟုတ်ပေ။ သူမသည် သူမရဲ့အသိစိတ်တို့ကိုဆန့်ကျင်၍ ဆိုးဝါးသောအရာများကိုလုပ်ခဲ့ပြီး ထိုအရာများကို လုပ်သည့်အခါ စုရွေ့ကဲ့သို့ ရိုးရှင်းပြီး တဲ့တိုးမဆန်ခဲ့ပေ။ သူမ၏နှလုံးသားက ဟိုးအရင်ကပင် အနက်ရောင်တို့ဖြင့်ဆိုးခြယ်ထားခဲ့ပြီးဖြစ်ကာ မည်မျှစင်ကြယ်သွားအောင်တိုက်ချွတ်ပါစေ၊ ပြန်လည်ဖြူစင်မလာနိုင်တော့ပေ။
ကျွန်မ မပျော်ရင် တခြားသူတွေကိုလည်းမပျော်စေချင်ဘူး။
ဒါက ကျွန်မ… စုဝမ်ပဲ။
စုဝမ်ကသက်ပြင်းဖွဖွချလိုက်သော်လည်း ထိုသက်ပြင်းဖွဖွလေးက စုရွေ့၏ အာရုံခံနိုင်စွမ်းမြင့်သည့်အကြားအာရုံမှ မလွတ်မြောက်နိုင်ချေ။ သူကဖြေးညင်းစွာနိုးလာပြီး သူ့ရဲ့ ရီဝေနေသော မျက်လုံးများဖြင့် စုဝမ်ကိုကြည့်လာသည်။
“နိုးနေပြီလား”
စုရွေ့ကပြောနေရင်း သူ့လက်ကိုမြှောက်လိုက်သည်။ ကြီးမားကျစ်လျစ်ကာ အားသန်သော လက်က စုဝမ်၏ဆံပင်များကို ထိုးဖွလာ၏။
ဤကမ္ဘာတွင် စုဝမ်၏ဆံပင်များက မည်းနက်ဖြောင့်စင်းနေကာ ထိတွေ့ရန်နူးညံ့လွန်းလှသည်။
“ကျေးဇူးတင်ပါတယ်”
စုဝမ်က စုရွေ့၏လက်ကိုမရှောင်ပေ။ ထို့အပြင် သူမက အသံနိမ့်နိမ့်နှင့် သူ့အားကျေးဇူးတင်ကြောင်း ပြောလိုက်သည်။
“မင်းအရမ်းပင်ပန်းနေတာ အနားယူဖို့လိုတယ်”
စုရွေ့သည် စုဝမ်ထံမှ ကျေးဇူးတင်စကားကြားရတာကိုမကြိုက်ပေ။
သူ့အကြည့်များကစူးရှသွားကာ အထူးသဖြင့် သူ့လေသံက လေးနက်သွား၏။
“မင်းမှာအရည်အချင်းတွေရှိတယ်ဆိုတာ ကိုယ်သိပါတယ်။ ဒါပေမယ့် အွန်လိုင်းကမ္ဘာမှာ မင်းရဲ့စွမ်းရည်တွေနဲ့လုပ်နိုင်စွမ်းတွေက အခြေအနေအမျိုးမျိုးပေါ်မှာမူတည်နေသေးတယ်။ အခုချိန်က မင်းကိုယ်တိုင်ထုတ်ဖော်ပြရမယ့်အချိန်မဟုတ်သေးဘူး မင်းမှာကိုယ်ရှိသေးတာပဲ ကိုယ့်အပေါ်ကိုမှီခိုလို့ရပါတယ်”
“ကျွန်မ ဘယ်သူ့အပေါ်ကိုမှ မမှီခိုတော့ဘူး”
စုရွေ့ကိုကြည့်နေသည့် စုဝမ်၏အကြည့်တို့ကအေးစက်သွားကာ သူမရဲ့အသံသည်ပင် အေးစက်လာတော့သည်။
“ဒါပေမယ့် ဘယ်သူ့ကိုမဆိုအသုံးချနိုင်တယ်”
ဤကမ္ဘာတွင် သူမကိုယ်တိုင်မှလွဲ၍ အခြားမည်သူကိုမှမမှီခိုနိုင်တော့ပေ။ လူတစ်ယောက်အပေါ်မှီခိုလိုက်ခြင်းက ဖျောက်ဖျက်မရသည့်အကျင့်တစ်ခုဖြစ်လာခဲ့လျှင် ထိုလူသည် မိမိ၏ဘဝတစ်ခုလုံးဖြစ်လာလိမ့်မည်ပင်။
သူပျော်သည့်အချိန်ကိုယ်လည်းပျော်ပြီး သူဝမ်းနည်းလျှင်ကိုယ်လည်းဝမ်းနည်းလိမ့်မည်။
အဲ့လိုနဲ့တစ်နေ့ သူကနောက်လှည့်မကြည့်ဘဲထွက်သွားတဲ့အချိန်ကျရင် ဘယ်သူ့ကိုမှီခိုရတော့မှာလဲ။
ထိုကဲ့သို့ မျှော်လင့်ချက်ကုန်ဆုံးသွားသည့်အဖြစ်အပျက်မျိုးအား စုဝမ်ယခင်ကခံစားခဲ့ရဖူးပြီးဖြစ်ကာ ထိုအတွေ့အကြုံက သူမ၏အရိုးများနှင့် နှလုံးသားထဲတွင် စွဲထင်ကျန်ရစ်နေခဲ့သည်။
သူမကသတ္တိမရှိသောသူဖြစ်ကြောင်း ဝန်ခံသည်။ သူမသည် ယခင်က ပြင်းထန်စွာနာကျင်ခံစားခဲ့ရသောကြောင့် ယခုတွင် မည်သည့်ခံစားချက်မျိုးကိုမှ မယုံရဲသလို သူမရဲ့စိတ်ရင်းအစစ်အမှန်အနည်းငယ်ကိုပင် ဖော်ပြရန် ဆန္ဒမရှိတော့ပေ။
သူမ ကြောက်ရွံ့နေမိ၏။
စုဝမ်၏အလိုမကျစွာစိုက်ကြည့်ခံရတာကို စုရွေ့က ဂရုမစိုက်ဟန်ဖြင့် ပြုံးလိုက်ကာ “ကိုယ့်ကိုမမှီခိုချင်လည်းအဆင်ပြေပါတယ် ဒါပေမယ့် ကိုယ့်ကိုဘယ်အချိန်အဖြစ်ဖြစ်အသုံးချလို့ရတယ် မင်းသာအလိုရှိရင် ကိုယ့်ကိုတစ်ဘဝလုံး အသုံးချသွားလည်းဖြစ်တယ်”
သူမကမည်သို့ပင် လျစ်လျူရှုကာ လူမဆန်ချင်ယောင်ဆန်နေပါစေ၊ အမြဲတမ်းသဘာဝကိုလွန်ဆန်ကာ ကြောက်မက်ဖွယ်ကောင်းသည့်ခံယူချက်ရှိသော စုရွေ့သည် ထိုစက္ကန့်ပိုင်းလေးအတွင်းမှာပင် စုဝမ်၏ထိတ်လန့်ကြောက်ရွံ့မှုများကို သူမြင်တွေ့နိုင်သည်။
သူမကသူ၏ချဥ်းကပ်မှုနှင့်ထိုခံစားချက်တို့ကို ကြောက်ရွံ့နေသည်။
၎င်းက စုရွေ့အား စိတ်ဓာတ်ကျအောင် တစ်မျိုးတစ်ဖုံလုပ်ဆောင်နေ၏။
တစ်ခါတရံ၌ မှားယွင်းသောလူအား အချိန်မှန်တွင်တွေ့ရတတ်သည်။
ပြီးနောက် မှားယွင်းသောအချိန်တွင် ကံကြမ္မာ၏ကြိုးကိုင်မှုဖြင့် မှန်ကန်သောသူနှင့်တွေ့ဆုံလိမ့်မည်။
ထိုအချိန်တွင် ရဲဝံ့စွာနောက်တစ်ကြိမ်ထပ်ချစ်နိုင်ရန် ခွန်အား၊ သတ္တိတို့ရှိနေနိုင်ဦးမှာတဲ့လား။
‘ပိုးဖလံမျိုးမီးကိုတိုး’တဲ့….။
တကယ်လို့ အဲ့ဒီပိုးဖလံလေးသာ ပြန်မွေးဖွားလာဖို့အခွင့်အရေးရခဲ့မယ်ဆိုရင် တုံ့ဆိုင်းမှုမရှိဘဲ မီးတောထဲကို ထပ်တိုးဦးမှာတဲ့လား။
___
🚩
Welcome To MM Storyteller
LOGIN
Welcome To MM Storyteller
REGISTER