MM Story Teller

Chapter 15

Viewers 1k

Chapters 187

🐯Chapter 15

တိတ်ဆိတ်ခြင်း၏ အံ့ဩစရာကောင်းသော ခံစားမှုကြောင့် ကုယွီမြန်မှာ အနည်းပင်ငိုက်မြည်းလာသည်။

လက်တစ်ဖက်တွင် နာရီသဏ္ဍာန်ကွန်ပျူတာအား ကိုင်ထားပြီး စဥ်းစားမိလိုက်သည်။

ရွှယ်ထွမ် ဘယ်ရောက်သွားလဲ… တိတ်တိတ်လေး ခိုးသောက်နေပြန်ပြီလား…

သူက အပေါ်ထပ်ဥယျာဥ်တံခါးအား ဖြေးညင်းစွာဖွင့်ပြီး တက်သွားခဲ့သည်။

သူ ဒုတိယထပ်တွင် လှည့်ပတ်ရှာခဲ့သော်လည်း နှင်းကျားသစ်လေးအား မတွေ့ခဲ့ပေ။

ဧည့်ခန်းထဲရှိ ဝိုင်အံဆွဲပွင့်နေသည်အားမြင်သောအခါ သံသယရှိစွာဖြင့် ကျယ်လောင်စွာခေါ်လိုက်သည်။

"ရွှယ်ထွမ်... မင်းဝရန်တာမှာလား..."

ရှို့ : "..."

ကုယွီမြန် ဝရန်တာသို့ သွားသောအခါ လေထုက တစ်စက္ကန့်မျှတိတ်ဆိတ်သွားသည်။

လှုပ်ရှားမှုတွေရှိနေခဲ့တယ်...

ပထမဦးစွာ လက်ရန်းပေါ်ရှိ ဖန်ခွက်အားတွေ့သည်။

ထို့နောက် ကုယွီမြန်က သူ၏ဘိုးဘေးလေးမှာ စားပွဲပေါ်တွင် မပြောင်းလဲသော တည်ကြည်သည့်မျက်နှာထားဖြင့် ထိုင်နေသည်အား မြင်လိုက်ရသည်။ ဖန်ခွက်ထဲတွင် ဘာမှမရှိပေ။

"ယစ်ထုတ်လေး..."

ကုယွီမြန်က နှင်းကျားသစ်လေး၏မျက်နှာလေးအား ဖျစ်ညှစ်လိုက်သည်။

"ကလေးတွေ ဝိုင်အများကြီးသောက်ရင် ရူးသွားလိမ့်မယ်... မင်းက ရူးသွားချင်လို့လား..."

နှင်းကျားသစ်လေးက သူ့အားအေးစက်သောအကြည့်တစ်ချက်ပေးလေသည်။

"အရမ်းကောင်းတယ်..."

ကုယွီမြန်က ဖန်ခွက်အခြေတွင်ကျန်နေသေးသော အရည်အား အနံ့ခံကြည့်လိုက်သည်။

"ဗော့ဒ်ကာလား... ကုရွှယ်ထွမ် မင်းရဲ့စည်းကမ်းတွေနဲ့ဘဝက တရားဝင်စတင်လိုက်ပြီပဲ... အခုကနေစပြီး ဝိုင်ထည့်ထားတဲ့ အံဆွဲတွေကို ငါသော့ခတ်ထားတော့မှာ..."

နှင်းကျားသစ်လေး : "..."

ကုယွီမြန်မှာ အရက်ခိုးသောက်သည့်နှင်းကျားသစ်လေးကြောင့် စိတ်ရှူပ်နေရသည်။ သူ စတင်၍ တရားချလာပြီး နှင်းကျားသစ်လေးသည်လည်း အေးစက်စွာဖြင့် နားထောင်နေခဲ့သည်။

ကုယွီမြန်က နှင်းကျားသစ်လေးမှာ တမင်သက်သက်လုပ်သည်ဟု ခံစားရသည်။ အဘယ်ကြောင့်ဆိုသော် သူပြောလေလေ နှင်းကျားသစ်လေး၏ ရှည်လျားသောအမြှီးလေးက ဝှေ့ယမ်း၍ သူ၏လက်ကောက်ဝတ်တွင် လာပတ်လေသည်။

ကုယွီမြန် စိုးရိမ်ပူပန်၍ ဆုံးမလေလေ နှင်းကျားသစ်လေးမှာ သူ့အား ပိုမိုသဘောကျလေလေပင်။

ကုယွီမြန်မှာ သူတစ်စုံတစ်ယောက်နှင့် ဖုန်းပြောနေခဲ့သည်အားသတိရရန် အချိန်အတော်ကြာသွားသည်။

နာရီသဏ္ဍာန်ကွန်ပျူတာအား ကြည့်လိုက်သောအခါ ရှို့နှင့်ဆက်သွယ်မှုအား မည်သည့်အချိန်တွင် ချလိုက်မှန်းမသိခဲ့ပေ။

-----

တူညီသောညနေခင်းတွင်…

ကုယွီမြန်အိပ်ပျော်သွားပြီးနောက် နှင်းကျားသစ်လေး၏ ဆက်သွယ်ရေးကိရိယာထံသို့ စာတစ်စောင်ဝင်လာခဲ့သည်။

[ဖန်းနစ်ခ် : အရှင်ဧကရာဇ်... ဒါကစုံစမ်းခိုင်းထားတဲ့ကိစ္စပါ အရှင် ခန့်မှန်းထားသလိုဘဲ ကုမိသားစုရဲ့ တကယ့်ဆက်ခံသူက သခင်လေးကုယွီမြန်ပါ... သူအသက်၁၈နှစ်မှာ သူ့အဖေကဆုံးသွားတယ်… အမွေရသင့်တဲ့ သခင်လေးကုက တာ့ခ်ကိုတစ်ယောက်တည်း နှင်ထုတ်ခံခဲ့ရတာပါ… သူ့ရဲ့တခြားမိသာစုတွေက ဆိုးဆိုးဝါးဝါးပြုမူပြီးတော့ သူတို့က...]

အာဏာရေဝဲအလယ်တွင် ရှိနေသော ဖန်းန်စ်ခ်အတွက်မူ ထိုမိသားစုဝင်များက မီးအိမ်ထဲမှ အသုံးဝင်သောလောင်စာ မဟုတ်ဘဲ "အလွန်အမင်း စက်ဆုပ်ဖွယ်ရာများ" ဟုသာ ဆိုရပေမည်။ နှင်းကျားသစ်လေး၏ ခဲပြာရောင်မျက်လုံးများထဲတွင် အလင်းမျက်နှာပြင်မှ စာလုံးများက အလင်းပြန်နေသည်။ သူက မျက်လုံးများအား ကျဥ်းမြောင်း၍ စကားလုံးတစ်လုံးချင်းဆီကို ကြည့်ခဲ့သည်။

-----

ရက်အနည်းငယ်ကြာ ကောင်းမွန်စွာအိပ်စက်ပြီးနောက် ကုယွီမြန်က တင်ဆက်သူအသစ် ထောက်ပံ့ပေးသည့်အစီအစဥ်အတွက် စာရင်းတွင်ပါဝင်ကြောင်း သတိပေးစာရခဲ့သည်။

တင်ဆက်သူအသစ်ထောက်ပံ့ပေးသည့် အစီအစဥ်တွင် တာ့ခ်က တစ်နေရာစာသာရှိပြီး စာရင်းထဲတွင် အခြားတင်ဆက်သူဆယ်ယောက် ပါဝင်သည်။ အဆုံးတွင် နောက်ရက်အနည်းငယ်အတွင်း တိုက်ရိုက်ထုတ်လွှင့်မှု၏ ကျော်ကြားမှုနှင့် ဂုဏ်သတင်းပေါ် မူတည်၍ တာ့ခ်၏နေရာတစ်နေရာအား ဆုံးဖြတ်ပေလိမ့်မည်။

[မင်းသာ နေရာအတွက် အနိုင်ရခဲ့မယ်ဆိုရင် ကြယ်ဒင်္ဂါး၂သိန်းကိုရရှိမှာဖြစ်ပြီး ထောက်ခံချက်အမျိုးမျိုး၊ အထူးအကြံပြုချက်နေရာနဲ့ တခြားအကျိုးကျေးဇူးတွေလည်း ရရှိဦးမှာပါ... ဒါ့အပြင် တင်ဆက်သူက ကြယ်တာရာမြို့တော်ကိုသွားပြီး စကြဝဠာတစ်ခုလုံးက အခြားတင်ဆက်သူတွေနဲ့ ဆက်သွယ်ကာ နောက်တစ်ဆင့်ကိုပြိုင်ရမှာဖြစ်ပါတယ်...]

(သွားလာရေးခရီးအတွက် ကုန်ကျစရိတ်တွေအကုန် အလကားပါ)

"ကြယ်တာရာမြို့တော်သို့သွားခြင်း" ဟူသည့် စကားနှင့်ပတ်သက်၍ ကုယွီမြန်မှာ မည်သည်ကိုမျှ မခံစားရသော်လည်း နှင်းကျားသစ်လေး၏နားရွက်များမှာ လှုပ်သွားသည်။

သူက အလွန်ပျင်းရိနေခဲ့၍ နိုးလာသောအခါ ပထမဆုံး ကုယွီမြန်၏ ပခုံးပေါ်ခုန်တက်၍ သူ၏လက်ဖဝါးလေးဖြင့် ခေါင်းအားတွန်းခဲ့သည်။

သူက ကုယွီမြန် ကြယ်တာရာမြို့တော်သို့သွားရန် မည်သို့လှည့်စားရမည်ကို အချိနိအတော်ကြာတွေးနေခဲ့သည်။ ယခုအခါ သူ့တွင်အကြောင်းပြချက်ရှိသွားပြီဖြစ်ကာ တစ်စုံတစ်ယောက်က အခွင့်အရေးအား ငွေလင်ပန်းနှင့် အဆင်သင့်လာပေးလေသည်။ ထိုနေရာတစ်နေရာအား သေချာပေါက်ရရပေမည်။

-----

ရက်အနည်းအကြာတွင် ကုယွီမြန်မှာ ကြယ်တာရာကွန်ရက်၏ အသုံးပြုပြီးသားပြန်ရောင်းသည့် စျေးတွင်ရတနာလေးအား ရှာတွေ့ခဲ့သည်။

၎င်းက ကြောင်ဆေးပင် အစေ့တစ်အိတ်ဖြစ်သည်။

ဤကြယ်တာရာခေတ်တွင် ကြောင်ဆေးပင်မရှိသောကြောင့် အသုံးပြုပြီးသား ပြန်ရောင်းသောစျေးတွင်သာ ရှိနေခဲ့သည်မှာ အချိန်အတော်ကြာပြီဖြစ်သည်။ ရောင်းချသူမှာ ၎င်းတို့အား "ရှေးဟောင်းကမ္ဘာမှ ပြန်လည်တူးဖော်ရရှိသည့်ဂျုံစေ့များ" ဟု အမည်ပေးထားသည်။

စျေးနှုန်းများကျဆင်းလာသည့်တိုင် ကုယွီမြန်မတိုင်ခင်ထိ မည်သူမျှမဝယ်ခဲ့ပေ။

အနက်ရောင်အခွံနဲ့ အဖြူရောင်ထိပ်ဖျား... ဒါကဘယ်လိုလုပ် ဂျုံစေ့ဖြစ်မှာလဲ... ကြောင်ဆေးပင် အစေ့ကွ...

ကမ္ဘာပေါ်မှကြောင်ပိုင်ရှင်တိုင်းက ဤကြောင်ဆေးပင်မှာ အသက်ရှည်စေကာ ကြောင်များအတွက်အလွန်ကောင်းကြောင်းသိကြပြီး ၎င်းအား အသုံးများသည်။

ကုယွီမြန်က အလွန်လျင်မြန်စွာလှုပ်ရှားခဲ့ပြီး ရောင်းသူအား စာပို့ခဲ့သည်။

[ဟဲလို ဒီအစေ့အိတ်က ရှိသေးလား...စျေးဘယ်လောက်ပါလဲ...]

ရောင်းသူသည်လည်း လျင်မြန်စွာစာပြန်ခဲ့သည်။

[ကြယ်ဒင်္ဂါး ၈၀၀ ပါ…]

ရောင်းချသူက ချင်ချီလာ(တောင်အမေရိကတိုက် ရှဥ့်တစ်မျိုး) ဖြစ်သည်။

သူဤအစေ့အိတ်အကြောင်းပြောသည့်အချိန်တိုင်း အသဲကွဲလုနီးပါးပင်။

ဤအစေ့များကို ရှေးဟောင်းကမ္ဘာသို့ စစ်တပ်နှင့်အတူလိုက်သွားခဲ့သည် စီးပွားရေးသမားတစ်ယောက်ထံမှ စျေးမြင့်မြင့်ဖြင့် ဝယ်ခဲ့ရသည်။ ထိုအချိန်တွင် ၎င်းကို ကြယ်ဒင်္ဂါး၈ထောင်နီးပါး ပေးခဲ့ရသည်။

ထိုအချိန်က စီးပွားရေးသမားမှာ ဤအစေ့များအား လေထဲသို့ မှုတ်ထုတ်လိုက်မည်ဆိုလျှင် တိရစ္ဆာန်များအား ဆွဲဆောင်နိုင်လိမ့်မည်ဟု ပြောခဲ့သည်။ ထို့ကြောင့် အစေ့အိတ်၏စျေးမှာ မတိုင်းတာနိုင်အောင် မြင့်တက်ခဲ့ခြင်းဖြစ်သည်။

သနားစရာ ရှဥ့်ကလေးမှာ အစေ့အိတ်ကိုဝယ်ပြီးနောက် ရုက္ခဗေဒပညာရှင်အမျိုးမျိုးထံသို့သွား၍ နည်းလမ်းမျိုးစုံဖြင့် စမ်းသပ်ခဲ့သည်။ သို့သော် ၎င်းတို့အား မစိုက်ပျိုးနိုင်ခဲ့ပေ။ နောက်ဆုံး ပြည်တွင်းသိပ္ပံပညာကျောင်းသို့ စစ်ဆေးရန် ယူသွားခဲ့သောအခါ ၎င်းက အရောင်ပြောင်းသွားသော ဂျုံစေ့ဖြစ်နိုင်ကြောင်း အဖြေထွက်ခဲ့သည်။ ၎င်းက နှလုံးသားမဲညစ်သော စီးပွားရေးသမားထံမှရခဲ့သော ထောင်ခြောက်ဖြစ်ခဲ့ပေသည်။။

ကြယ်ဒင်္ဂါး ၈၀၀ က အနည်းငယ်များနေသေးသော်လည်း ကုယွီမြန်က ဝယ်ခဲ့ပြီး ချက်ချင်းငွေပေးချေခဲ့သည်။

အစေ့ရလာသောအခါ ကုယွီမြန်က ကြီးထွားရန် အချိန်အလွန်ကြာမည်အား စိုးရိမ်ခဲ့သည်။ သူက မြင့်မားသောမြေဩဇာဓါတ်၊ အခံပစ္စည်းနှင့်မြေဆွေး၊ သဲနှင့်ရွှံ့စေးတို့အား လိုင်းပေါ်မှဝယ်ခဲ့သည်။ ဝေးကွာသောမှတ်ဥာဏ်များအရ အပင်စိုက်ရန် အိုးထဲတွင်ကျင်းတူးခဲ့ပြီး နေရောင်ထဲတွင် စိုက်ပျိုးခဲ့သည်။

ရလဒ်အနေဖြင့် ကြောင်ဆေးပင်က လျင်မြန်စွာကြီးထွားလာလိမ့်မည်ဟု သူ မမျှော်လင့်ခဲ့ပေ။

ယခင်လေးရက်အတွင်း ၎င်း၏အခိုင်များစွာက အိုးအပြင်ဘက်သို့ပင် ထွက်လာခဲ့သည်။ ကုယွီမြန်က အခိုင်အချို့အားညှပ်ပေးရသည်။

"ကြည့်ရတာ ကြယ်တာရာခေတ်က မြေကြီးမြေဩဇာက ကောင်းပုံရတယ်..."

ကုယွီမြန်က သာမန်လူသာဖြစ်၍ အံ့အားသင့်ဖွယ်ရလဒ်အား ရသောအခါ အံ့အားသင့်ပြီး စိတ်ကျေနပ်စွာဖြင့်ပြောခဲ့သည်။

အကယ်၍ မစ္စတာရှဥ့်လေးသာ သူပြောသည်ကိုကြားလျှင် သွေးအန်လိမ့်မည်။

အမှန်တွင် ကြောင်ဆေးပင်က ကြောင်များ၏ကျန်းမာရေးအပေါ် အထူးအကျိုးသက်ရောက်မှုမရှိပေ။ သက်ရောက်မှုက အချိန်အလွန်တိုတောင်းသော်လည်း ကြောင်လေးများအား အလွန်ပျော်ရွှင်စေလိမ့်မည်။

သို့သော် အရေအတွက်ကိုလည်း ထိန်းချုပ်ရန် လိုအပ်ပေသည်။

ယခုတွင်မူ ကြောင်ဆေးပင်များနှင့် ကုယွီမြန်မှာ နှင်းကျားသစ်လေး၏အသက်ကို တိုးတက်အောင်လုပ်ရန် စတင်တွေးတောနေခဲ့သည်။ ပထမဦးစွာ အသုံးပြုရမည့် နည်းလမ်းတစ်ခုအား ရှာသင့်သည်။ ကုယီမြန်က တစ်ခဏမျှတွေးတောပြီးနောက် စိတ်ကူးရသွားသည်။

"ထွမ်ထွမ် ဒီနေ့ရေတစ်ခါလောက်ထပ်ချိုးမလား..."

ကုယွီမြန်သည် နှင်းကျားသစ်လေးအားချော့ပြီး ပြောလိုက်သည်။

"ရေပူစမ်းဆိုရင်‌ရော..."

နှင်းကျားသစ်လေးက သူ့အားနားမလည်စွာ ကြည့်လေသည်။

ရေပူစမ်းတဲ့လား ဒီလူသားက ဘယ်လိုထူးဆန်းတဲ့အရာကို ပြောနေတာလဲ...

ယမန်နေ့မှ တင်ဆက်သူအသစ်ထောက်ပံ့မှု အစီအစဥ်၏ နေရာအကြောင်း ကြားပြီးနောက် နှင်းကျားသစ်လေးက ကုယွီမြန်ကို တိုက်ရိုက်ထုတ်လွှင့်မှုပြုလုပ်ပြီး ကျော်ကြားမှုကို တိုးမြှင့်ရန်အတွက် ဆွေးနွေးရန်ကြိုးစားနေခဲ့သော်လည်းဤလူက တစ်နေကုန်မြက်ခင်းပြင်တွင်ရှိနေခဲ့၍ နှင်းကျားသစ်လေးအား မကျေမနပ်ဖြစ်စေခဲ့သည်။

အဓိကအရာမှာ...

အဲဒီမြက်ရွက်က ဘာလဲ...

ငါ့ထက်ပိုကောင်းလို့လား...

သူက ဘာလို့ အရမ်း ဂရုစိုက်နေရတာလဲ...

ကုယွီမြန်က နှင်းကျားသစ်လေးမှာ ကြောင်ဆေးပင်အပေါ်တွင် ရှာလကာရည်တစ်အိုးလုံး သောက်နေခဲ့သည်ကို မသိခဲ့ပေ။ သူသိခဲ့လျှင် အချိန်အတော်ကြာသည်အထိ ဟာသလုပ်နေလိမ့်မည်။

ယခုအချိန်တွင်မူ ကုယွီမြန်၏စိတ်ထဲ နှင်းကျားသစ်လေးကို ရေချိုးပေးချင်စိတ်သာ ရှိနေသည်။

ကြောင်များမှာ မကြာခဏရေချိုးရန် မလိုအပ်ပေ။ နှင်းကျားသစ်လေး နောက်ဆုံးအကြိမ် ရေချိုးခဲ့သည်မှာ တစ်ပတ်ပင်ကျော်သွားပြီ။

ထို့ပြင် ကုယွီမြန်က နှင်းကျားသစ်လေးမှာ ရေအားမငြင်းပယ်ဘဲ သန့်ရှင်းရသည်ကိုကြိုက်ကြောင်း ရှာဖွေတွေ့ရှိခဲ့သည်။

ကုယွီမြန် ကြောင်ဆေးပင်ရေပူစမ်းအား ယခင်ကရောက်ခဲ့ဖူးသည်။ သူက ရှေးလူသားများ၏ ဥပမာနောက်လိုက်ရန် စီစဥ်ထားပြီး နှင်းကျားသစ်လေးအတွက် ကြောင်ဆေးပင် ရေပူစမ်းပြုလုပ်ခဲ့သည်။

ည ၇နာရီအချိန်တွင် ကုယွီမြန်က တိုက်ရိုက်ထုတ်လွှင့်မှုအား ဖွင့်ခဲ့သည်။

"ဟယ်လို ကျွန်တော်ကကုယွီမြန်ပါ...ဒါက ရွှယ်ထွမ်ပါ..."

ပုံမှန်အတိုင်း နှုတ်ဆက်ပြီးနောက် လျင်မြန်စွာတိုးလာသော ကြည့်ရှုသူအရေအတွက်နှင့် မှတ်ချက်များကြောင့် ကုယွီမြန်မှာ အလွန်ဝမ်းမြောက်နေလေသည်။

"ဒီနေ့ ကျွန်တော်တို့ရဲ့ ရွှယ်ထွမ်လေးအတွက် ရေပူစမ်းလုပ်မှာပါ... ပြီးတော့ ညစာအတွက် ရှို့ရှီဟော့ပေါ့စားပါမယ်..."

【ကြောင်လေးရဲ့အော်သံ : မြန်မြန်လာပြီကွ… နောက်ဆုံးတော့ တိုက်ရိုက်ထုတ်လွှင့်ပြီ…】

【တရုတ်ပြည်တောင်ဘက်ကကျားက ဘယ်တော့မှချိန်းမတွေ့ဘူး : ရေပူစမ်းဆိုတာဘာလဲ … ရှို့ရှီ ဟော့ပေါ့ကရော.. ကိစ္စမရှိပါဘူး အရင်ဆုံး ငါစမ်းကြည့်ချင်တယ်…】

【တိမ်လေးတစ်ခုရှိတယ် : တင်ဆက်သူက မကြာခင်ကမှ တင်ဆက်သူအသစ် ထောက်ပံ့ရေးအစီအစဥ်မှာ ပါဝင်ခဲ့တာမလား...ငါမင်းကို ပံ့ပိုးပေးမယ်... မြန်မြန် ငါ့နှလုံးသားက မင်းတစ်ယောက်ထဲအတွက်ပဲ... ပင်လယ်ကိုဖြတ်ကျော်ပြီး မင်းဆီကို လက်ပစ်ကူးလာခဲ့မယ်…】

【နက်ရှိုင်းတဲ့ပင်လယ်ထဲမှာအိပ်နေတယ် : သတင်းထောက်က ပြောခဲ့တယ်… တင်ဆက်သူရဲ့နောက်ဆုံး ဘာဘီကျူးကအရမ်းအရသာရှိတယ်တဲ့... ငါ ဗီဒီယိုကို အခါ၂၀လောက်ပြန်ကြည့်ခဲ့တယ်QAQ】

ကုယွီမြန်က မှတ်ချက်များအား တစ်ခဏမျှကြည့်ပြီးနောက် နှင်းကျားသစ်လေးအား ကောက်ချီလိုက်သည်။

နှင်းကျားသစ်လေးက တိုက်ရိုက်ထုတ်လွှင့်မှု၏ကြည့်ရှုသူအရေအတွက်အား တစ်ချက်ကြည့်လိုက်သည်။ သူက ကောက်ချီခံရပြီးနောက် ကုယွီမြန်၏ပခုံးပေါ်တွင် ထိုင်နေခဲ့သည်။

"စိတ်မပူပါနဲ့...ဒီနေ့စားစရာကလည်း အရသာရှိတယ်..."

ကုယွီမြန်သည် သူ့မျက်လုံးများကိုကွေးသည်အထိ ပြုံးပြလိုက်သည်။

"အခု စကြရအောင်..."

ပုံက မဲမှောင်သွားပြီး ပထမမြင်ကွင်းအား နှင်းကျားသစ်လေးထံရွှေ့လိုက်သည်။ ဂရုတစိုက်ရှိသော ကြည့်ရှုသူများမှာ ပတ်ဝန်းကျင်က ဘာဘီကျူူလုပ်သည့်အချိန်က နေရာနှင့် တူညီကြောင်း သတိပြုမိလိမ့်မည်။

နေရာက ကုယွီမြန်အိမ်၏ အပေါ်ထပ်ဥယျာဥ်တွင်ဖြစ်သည်။ ယခုအချိန်တွင် ကုယွီမြန်မှ ပတ်ဝန်းကျင်အား ရည်ရွယ်ချက်ရှိရှိ ရေပူစမ်းအငွေ့အသက်ရအောင် ပြင်ဆင်ထားသည်။

ရေကန်ကို စိမ်းလန်းစိုပြည်သော အိုးစိုက်ပင်များနှင့်ပတ်ထားပြီး၊ အလယ်တွင်ကျောက်စရစ်ခဲများထားကာ အပူဖြင့် အဖြူရောင်အခိုးအငွေ့များ ထွက်လာစေသည်။ ကုယွီမြန်၏ 'ရေပူစမ်း'က 'ရေချိုးခြင်း'နှင့် တူညီပေသည်။

ယခင်ကြည့်ရှုသူအဟောင်းများက စတင်၍ သိချင်စိတ်ပြင်းပြလာသည်။

【တိမ်လေးတစ်ခုရှိတယ် : အရင်တုန်းက တစ်ဆက်သူကငါတို့ကို ရေချိုးဖို့ မသင့်လျော်ဘူးလို့ ပြောခဲ့တာမလား…】

【တရုတ်ပြည်တောင်ဘက်ကကျားက ဘယ်တော့မှချိန်းမတွေ့ဘူး : ရိုးရိုးသားသားပြောရရင် ငါကြောက်တယ်... အဲဒီထဲမှာ ငါတို့ကို လှဲနေစေချင်တာလား…】

【ကြောင်းလေးရဲ့အော်သံ : စောင့်ကြည့်ကြရအောင်...မြန်မြန်မှာ သူ့အကြောင်းပြချက်နဲ့သူ ရှိမယ်လို့ ငါယုံကြည်တယ်…】

ကုယွီမြန်က နနှင်းကျားသစ်လေးအား ကိုင်အပင်များကြားမှ ဖြတ်လျှောက်လိုက်စေသည်။ ထိုအချိန်တွင် အတွင်းထဲမှမြင်ကွင်းအား မြင်နိုင်ပေသည်။

လေပူများက အငွေ့ပျံနေပြီး ကောင်းကင်တစ်ခုလုံးတွင် ကြယ်များဖြင့် တလက်လက်တောက်ပနေသည်။ ရေကန်ထဲတွင် ကျောက်တုံးများဖြင့်ခင်းထားပြီး ရေများရွေ့လျားနေစေသည်။ အပြာရောင်ရေနွေးများက ဝါးလုံးအတွင်းမှထွက်လာပြီး ရေကန်အားဖြည့်ပြီးနောက် အခြားပုံးတစ်ခုထဲသို့ စီးဆင်းသွားသည်။

ရေကန်ကို ကုယွီမြန်မှ အထူးဒီဇိုင်းဆွဲထားခြင်းဖြစ်သည်။၎င်းက နှင်းကျားသစ်လေးအတွက် မှန်ကန်သော အရွယ်အစားဖြစ်သည်။ ၎င်းက သူ၏နှာခေါင်းနှင့်ပါးစပ်များ နစ်မြုပ်သည်အထိ မနက်ပေ။

ထို့ပြင် အလွန်တောက်ပလှသည်။

"အရင်တစ်ခေါက်တုန်းက ကြောင်အများစုက ခဏခဏရေချိုးဖို့ မသင့်တော်ဘူးလို့ ကျွန်တော်ပြောခဲ့ပါတယ်..။"

ကုယွီမြန်က ပြင်ဆင်ထားသောရေချိုးဆားအား ရေကန်လေးထဲသို့လောင်းထဲရင်း ပြောခဲ့သည်။

"ဘာလို့လဲဆိုတော့ ကျဥ်းမြောင်းပြီးစိုစွတ်တဲ့နေရာတွေကသူတို့ကို အဆင်မပြေဖြစ်စေလို့ပါပဲ... ဒါ့အပြင် စီးဆင်းနေတဲ့ရေကပဲ သူတို့ကိုသန့်ရှင်းတယ်လို့ ခံစားရစေတာ.."

ရေချိုးဆားကို ကြောင်ဆေးပင်မှပြုလုပ်ထားပြီး အခြားပါဝင်ပစ္စည်းများဖြင့် ရောနှောထားသည်။ မကြာမီတွင် ဆားက ရေထဲပျော်ဝင်သွားကာ လေထဲတွင် ပူရှိန်းရှိန်းအနံ့များဖြင့် ပြည့်လာသည်။

ကုယွီမြန်က နှင်းကျားသစ်လေး အလွန်စိတ်လှုပ်ရှားမှုမဖြစ်စေရန် ကြောင်ဆေးပင်၏ပမာဏအား ထိန်းချုပ်ခဲ့သည်။ ၎င်းက သူ့အားသက်သောင့်သက်သာရှိစေပြီး ပျော်ရွှင်စေသောခံစားချက်အား ခံစားရအောင်လုပ်ပေးသည်။

"မင်းကြိုက်လား... မကြိုက်ဘူးလား... ဒီနေ့နည်းနည်းအေးလို့ ရေပူစမ်းစိမ်လိုက်ရင် သက်သောင့်သက်သာရှိလိမ့်မယ်..."

ကုယွီမြန်က နှင်းကျားသစ်လေးအားကိုင်၍ ရေကန်ထဲသို့ဖြေးညင်းစွာထားလိုက်ပြီး သူ၏့နားရွက်နောက်ကို ကုတ်ပေးခဲ့သည်။

"အဲဒါတွေထက် ဒီနေ့ကြယ်တွေက မလှဘူးလား..."

နှင်းကျားသစ်လေးက သူ့လက်ဖဝါးလေးအားဆန့်ထုတ်၍ ရေအားစမ်းသပ်ခဲ့သည်။

ထို့နောက် ကုယွီမြန် ဘာမှမလုပ်ရသေးမီမှာပင် သူကိုယ်တိုင် ရေထဲသို့ဆင်းသွားသည်။

🐯🐯🐯

Prev Next