MM Story Teller

Chapter 134 Arc_6 . တိသမီးပြန်လာခြင်း [ 26] END

Viewers 4k

🚩Chapter -134

Arc_6 . တိသမီးပြန်လာခြင်း [ 26] END

____

ချန်ယွီရှု ထွက်သွားပြီးနောက် ချန်ချင်းယောင်လည်း လိုက်ထွက်သွားတော့သည်။ ယခုအခါ ချန်ချင်းကျင်းသည် အပြစ်ကင်းစင်ပြီး ရိုးသာသော ယခင်က အကြီးဆုံး သခင်မလေး မဟုတ်တော့ပေ။

မုန်းတီးမှုများ ဖုံးလွှမ်းနေပြီး လက်တုံ့ပြန်လိုသည့် အကြံအစည်များနှင့် ပြည့်နှက်နေသူဖြစ်၍ သူမ၏ မနာလို ငြူစူခြင်းနှင့် မထိုက်တန်တော့ချေ။

ချန်ချင်းကျင်း အသိစိတ်ပြန်ဝင်လာသည့်အခါ၊ ချင်ယွဲ့သာ သူမ ရှေ့မှာရှိနေလေသည်။

"ဘာလို့ မသွားသေးတာလဲ၊အရှင့်သားကလည်း ကျွန်မကို လှောင်ရယ်တော့မှာလား”

ချန်ချင်းကျင်းသည် အရှေ့မှ ထိုလူကို အေးစက်သည့်အကြည့်များဖြင့် ကြည့်လိုက်သည်။

ချင်ယွဲ့က စကားမပြောဘဲ မျက်ရည်များ စီးကျနေသည့် သူမကို စူးစိုက်ကြည့်ရင်း “မင်းဘာလို့ ဒီလိုမျိုး လုပ်ချင်တာလဲဆိုတာ ကိုယ် နားမလည်နိုင်ဘူး၊ ချန်အိမ်တော်မှာ မင်းမပျော်ရင် ကိုယ် မင်းကိုလက်ထပ်မယ်"

ကိုယ် မင်းကို လက်ထပ်မယ်!

ဤစကားသုံးလုံးသည် ချန်ချင်းကျင်း၏ နားထဲတွင် မိုးခြိမ်းသံကဲ့သို့ ထွက်ပေါ်လာသည်။

သူမ အရှေ့ကလူကို မယုံနိုင်စွာကြည့်နေမိကာ အချိန်အတော်ကြာပြီးနောက်မှ အားတင်းပြီး တုန်တုန်ယင်ယင်ဖြင့် “ဘာလို့လဲ”

ချင်ယွဲ့သည် အနည်းငယ် မှင်တက်သွားကာ စက္ကန့်ပိုင်းအတွင်း သူ့နှလုံးသားက အလွန်အမင်းခုန်ပေါက်သွားရသည်။သူမက ယခုလို စက်ဆုပ်ဖွယ်ကောင်းသည့် လုပ်ရပ်ကိုလုပ်ခဲ့မှန်း သူ သိနေတာတောင် သူမကို ခွင့်လွှတ်ဖို့ ဆန္ဒရှိနေဆဲပင်။အကြောင်းရင်းက သူမသည် သူ ပထမဆုံးချစ်မိသွားသော မိန်းမတစ်ယောက်ဖြစ်နေတာကြောင့်ပင်။

*****

နွေဦးလေညှင်းက အေးစိမ့်စိမ့်ဖြစ်နေသည်။ လူတိုင်း ထွက်သွားပြီးသည်နှင့် အနီးနားက တောအုပ်ထဲမှ ကျားဖြူကြီးတစ်ကောင် အေးအေးဆေးဆေး ထွက်လာသည်။

ကျားဘုရင်ခမျာ ကျင်းချင်ဝမ်အိမ်တော်ထဲမှ ထွက်လာရန် အလွန်ခက်ခဲခဲ့ပြီး နောက်ဆုံး ယခုလို ထွက်လာပြန်သော်လည်း တောအုပ်ထဲတွင်သာ အဓိပ္ပါယ်မဲ့ ပုန်းအောင်းနေရသည်။ဤသည်က သူ့ဆန္ဒကြောင့်မဟုတ်၊ လူသားများက ကြံကြံဖန်ဖန်ခိုင်းစေသောကြောင့်သာဖြစ်သည်။

တကယ်ကို အကျင့်ပျက်နေတဲ့ လူသားတွေပဲ..

ထိုအချိန်တွင် ကျားဖြူ၏ တစ်ဖက်မှ လူသားနှစ်ယောက် ထွက်လာ၏။ထိုလူနှစ်ယောက်မှာ အင်္ကျီအထူကြီးဝတ်ထားသည်။ယနေ့ပြဇာတ်ကို ချန်ချင်းကျင်း ကိုယ်တိုင်ရေးပြီး စိတ်ဓာတ်ကျနေသည့် အမျိုးသမီး ဇာတ်ဆောင်အဖြစ် ခံစားချက်များစွာဖြင့် ပါဝင်သရုပ်ဆောင်ထားသော်လည်း ဤအစီအစဉ်၏ တကယ့်ဒါရိုက်တာများမှာ စုဝမ်နှင့် စုရွေ့ ဖြစ်သည်။

ဤကဲ့သို့ အဖြစ်အပျက်မျိုး ယနေ့ ပေါ်ပေါက်လာသောကြောင့် ချန်ချင်းကျင်းသည် ချင်းချွမ်မြို့စားမင်းအိမ်တော်တွင် ဆက်လက်နေနိုင်တော့မည် မဟုတ်ပေ။ယခုအချိန်တွင်၊ ချင်ယွဲ့သည်သာ ချန်ချင်းကျင်း၏တစ်ခုတည်းသောမျှော်လင့်ချက်ဖြစ်သည်။

လေးနက်သော ခံစားချက်များရှိသည့် ထိုယောက်ျားသည် သူမ၏ အခက်ခဲဆုံး၊ အဆိုးရွားဆုံး အခြေအနေ၌ လက်ကိုကမ်းပေးလာသည်။

သူ့လက်ကို လှမ်းကိုင်ဖို့အနည်းငယ် မဝံ့ရဲသော်လည်း...

အကယ်၍ ချင်ယွဲ့ သည် သူချစ်သော "ချန်ချင်းကျင်း" က ချန်ချင်းကျင်း အစစ်အမှန်မဟုတ်ကြောင်း တစ်နေ့တွင် နားလည်လာပါက၊ သူ ဘယ်လိုခံစားရမည်ကို ဘယ်သူမှ မသိနိုင်ချေ။

လူတစ်ယောက်၏ ခံစားချက်သည် နုနယ်ပြီးကျိုးပဲ့လွယ်သည်။တစ်ချိန်တည်းမှာပင် ခိုင်မာ တောင့်တင်းပြီး ကွဲထွက်မသွားနိုင်ပေ။

ငါ မင်းကိုချစ်တယ်၊ ဘာလို့လည်းဆိုတော့ မင်း ဖြစ်နေလို့ပဲ...ငါမင်းကိုချစ်တယ် သူများတွေကိုတော့ မချစ်ဘူး၊ ဘာဖြစ်လို့လဲ ဆိုတော့ အဲဒီ့အချိန် ၊ အဲ့ဒီနေရာမှာ ငါ့ဆီပြေးလာပြီး ကူညီတဲ့လူက မင်းပဲလေ... တခြားသူ မဟုတ်ဘူး...

စုဝမ်နှင့် စုရွေ့ကဲ့သို့ပင် ကံကြမ္မာတိုင်း၏အစသည် မတော်တဆဖြစ်သော်လည်း ဘယ်လိုမှ ရှောင်လွှဲ၍မရပေ။

ရင်ခုန်စရာ ကောင်းသော လူကောင်းလူရည်မွန်လေး ချင်ယွဲ့သည်လည်း အချိန်တိုအတွင်း လေးနက်သည့် ခံစားချက်များကို ရှင်သန်စေသလိုမျိုး၊သူ့နှလုံးသားကလည်း တစ်သက်တွင် တစ်ကြိမ်သာ လှုပ်ရှားသွားသူဖြစ်သည်။

......................

ချန်ချင်းယောင် နှင့် ချင်ရှန်းတို့၏ မင်္ဂလာပွဲကို မူလက စတုတ္ထလကုန်တွင် သတ်မှတ်ထားသော်လည်း ဒုတိယ မင်းသားက ချန်အိမ်တော်မှ သမီးဖြစ်သူနှင့် ရုတ်တရက် လက်ထပ်ရန် ခွင့်ပန်လာသဖြင့် ချန်အိမ်တော်၏ နဂိုမူလအစီအစဉ်များ ပျက်သွားခဲ့သည်။ထို့ကြောင့် ချန်ချင်းယောင်တို့၏ မင်္ဂလာပွဲကို ရွှေ့ဆိုင်းခဲ့ရသည်။

ချန်အိမ်တော်၏ သမီးနှစ်ယောက်သည် တော်ဝင်မိသားစုဝင်များအား လက်ထပ်ရခြင်းမှာ ကြည်နူးစရာတစ်ခုပင်။ဤသည်က ဂုဏ်ပြုထိုက်သော်လည်း၊ ချင်းချွမ်မြို့စားမင်းအိမ်တော်သည် ယခုနှစ်အတွင်းမှာ ဂုဏ်သတင်းကျဆင်းဖို့ ဖြစ်လာရလေတော့၏။

ချန်ချင်းကျင်း လက်ထပ်သည့်နေ့မှာ ချန်ယွီရှုက သူ့တပ်ဖွဲ့ကို နယ်စပ်သို့ ခေါ်ဆောင်သွားပြီဖြစ်သည်။သူ့ညီမ ကြောင့်နှင့် သူ့နှလုံးသားက မြို့တော်ကိုပါ ပစ်ခွာနိုင်သွား၏။

မင်္ဂလာဆောင်သည့်ညတွင် ချန်ချင်းကျင်း သည် ပထမဆုံးလက်ထပ်ခဲ့စဥ်ကလို ခင်ပွန်းဖြစ်သူကို စိတ်လှုပ်ရှားစွာ စောင့်ဆိုင်းခဲ့သော်လည်း ချင်ယွဲ့ သည် တစ်ညလုံး သတို့သမီးအခန်းထဲသို့ ခြေတစ်လှမ်းမျှပင် မဝင်လာပေ။

နောက်တစ်နေ့တွင် မနေ့ညက မင်းသား၏အိမ်တော်ထဲသို့ လုပ်ကြံသတ်ဖြတ်သူ တစ်ယောက် ဖောက်ထွင်းဝင်လာကြောင်းနှင့်၊ ချင်ယွဲ့သည် အတိုက်ခိုက်ခံရလုနီးပါးဖြစ်ပြီး အသက်အန္တရာယ် ကြုံလာရချိန်တွင် အနက်ရောင်ဝတ် အမျိုးသမီးတစ်ဦး ပေါ်လာပြီး ချင်ယွဲ့ ကို ကယ်တင်ခဲ့သည့်ကိစ္စအား ချန်ချင်းကျင်း ကြားသိရသည်။ ထိုအမျိုးသမီးသည်လည်း ပြင်းထန်သောဒဏ်ရာကြောင့် သတိမေ့မြောသွားသဖြင့်၊ ချင်ယွဲ့ က သူမ၏ အိပ်ရာဘေးတွင် တစ်ညလုံး စောင့်ကြည့်နေခဲ့လေသည်။

*****

၃ နှစ်အကြာ --

ခန္ဓာကိုယ်အမြဲကြံ့ခိုင်သော လက်ရှိဧကရာဇ် ချင်မူဖုန်းသည် ပြင်းထန်သော ဖျားနာမှုတစ်ခုကြောင့် ရုတ်တရက်ကွယ်လွန်သွားခဲ့ပြီး အိမ်ရှေ့စံ ချင်ယွီ သည် သူ၏အလိုတော်အတိုင်း ဧကရာဇ်မင်းအဖြစ် နန်းတက်ခဲ့သည်။

ဧကရာဇ်အသစ် နန်းတက်သည်နှင့် တစ်ပြိုင်နက် တရားရုံးနှင့် ဌာနများတွင် ရုန်းရင်းဆန်ခတ်ဖြစ်ကြသည်။တစ်ချိန်က ဂုဏ်သတင်းကျဆင်းနေသော ချင်းချွမ်မြို့စားမင်းအိမ်တော် ကို ဧကရာဇ်က ရုတ်တရက် အရေးပါသော နေရာတွင် ထားခဲ့သည်။အတွင်းဇာတ်လမ်းကို လူတော်တော်များများ မသိကြသော်လည်း တော်ဝင်ဆွေမျိုးများကတော့ သိကြသည်၊

လွန်ခဲ့သည့် 3 နှစ်က ဒုတိယမင်းသားနှင့် လက်ထပ်ခဲ့သော ချန်အိမ်တော်၏ အကြီးဆုံး သခင်မလေးချန်ချင်းကျင်း သည် ဒုတိယမင်းသား၏ အိမ်တော်တွင် မျက်နှာသာ ပေးခြင်းမခံရဟု ဆိုသည်။ ဒုတိယမင်းသားသည် သူမနှင့် ထိမ်းမြားလက်ထပ်ထား သော်ငြား ပေါင်းဖက်ခြင်းမပြုခဲ့ပေ။ သို့သော် ချန်ချင်းကျင်းသည် လွန်ခဲ့သော တစ်နှစ်ခန့်က ရုတ်တရက် ကိုယ်ဝန်ရှိခဲ့သည်။

ဤကလေး ကိုယ်ဝန်ရှိခြင်းကိစ္စသည် တော်ဝင်မိသားစုကို စော်ကားခြင်းဖြစ်သည်။ ဧကရာဇ်မိသားစု၏ စည်းမျဉ်းများအရ၊ ချန်ချင်းကျင်း နှင့် သူမ၏ ကလေးတို့သည် သေဒဏ်သင့်မည်ဖြစ်သော်လည်း နောက်ဆုံးတွင် ဧကရာဇ်မင်းမြတ်သည် ဒုတိယမင်းသားနှင့် အိမ်ရှေ့စံကို နန်းတော်ထဲသို့ အခစားဝင်စေခဲ့သည်။သားအဖသုံးယောက် တစ်ညလုံးဆွေးနွေးပြီးနောက် ချန်ချင်းကျင်း နှင့် သူမ၏ဗိုက်ထဲက ကလေးအသက်ကို ကယ်တင်ရန် ဆုံးဖြတ်ခဲ့ကြ၏။

လောကီရေးရာများသည် အလွန်ဆန်းကြယ်လှသည်။စုဝမ်နှင့် စုရွေ့ တို့၏ အကြံအစည်ကြောင့် ချင်ယွဲ့သည် ကျွေးရွှယ်ကို ချစ်မိသွားခဲ့သည်။ ထိုအချိန်မှစ၍ အမျိုးသား ဇာတ်ဆောင်သည် အမျိုးသမီး ဇာတ်ဆောင်အပေါ် စိတ်ဝင်စားမှုမရှိတော့ဘဲ နှစ်ယောက်သား ဇာတ်လမ်းက နိဂုံးချုပ်သွားပုံရသည်။သို့သော် ၎င်းသည် အမျိုးသမီးဇာတ်ဆောင်၏ ကံကြမ္မာကို တားဆီး၍မရ။ နောက်ဆုံးတွင် တစ်ယောက်တည်း မသေချင်သော ချန်ချင်းကျင်းသည် ဇာတ်ပို့များထဲမှ တစ်ယောက်ဖြစ်သော အိမ်ရှေ့စံနှင့် ဖောက်ပြန်ခဲ့လေသည်။

အရင်ဘဝ၊ ဒီဘဝကရော ဘာလဲ.. အရာအားလုံးဟာ ဟာသတစ်ခုလိုပဲ။

ချန်ချင်းကျင်းသည် ယခင်ဘဝက “အိမ်ထောင်ရေးဖောက်ပြန်ခြင်း” ဖြင့် စွပ်စွဲခံရခြင်းကြောင့် ရာထူးမှ နုတ်ထွက်ခဲ့ရပြီး သူမ၏ဗိုက်ထဲက ကလေးအား “လူယုတ်မာ” ဟု ခေါ်ခြင်းခံရခဲ့၏။ သို့သော်လည်း ယခင်ဘဝက မလွှဲမရှောင်သာဖြစ်ကာ ယခုဘဝက ဇာတ်ကြောင်းကို သူမကိုယ်တိုင် ရွေးချယ်လိုက်ခြင်းပင်။

သူမကိုယ်သူမ လိပ်ပြာလည်း သန့်သည်။သူမနှင့် အိမ်ရှေ့စံတို့သည် အမှန်တကယ် ချစ်မြတ်နိုးကြပြီး၊ သူမနှင့် ချင်ယွဲ့တို့ကတော့ အမှန်တစ်ကယ် အကြင်လင်မယား မဖြစ်ခဲ့ကြပေ။သူမ၏လုပ်ရပ်အတွက် အကြောင်းပြချက်များစွာရှိသော်ငြား၊ သာမာန်လူများအမြင်တွင် သူမသည် သစ္စာမရှိ၊အိမ်ထောင်ရေး ဖောက်ပြား၍ အရှက်မရှိသော အမျိုးသမီးဖြစ်နေတော့သည်။

အိမ်ရှေ့စံ နန်းတက်ပြီးနောက်၊ လွတ်ငြိမ်းချမ်းသာခွင့်အောက်တွင် အခြားသော မင်းသားအနည်းငယ်တို့သည် မြို့တော်မှ ထွက်သွားရန် အစီအစဉ်များ ပြုလုပ်ထားပြီးဖြစ်သည်။သို့သော် ထိုအချိန်တွင် မြို့တော်၏ တံတိုင်းအပြင်ဘက်တွင် လျှို့ဝှက်ဆန်းကြယ်သောစစ်တပ်တစ်ခု ရုတ်တရက်ပေါ်လာသည်။ဤစစ်တပ်ကို ဦးဆောင်နေသူမှာ ချင်ဟောင်ပင်။

ဤ ၃ နှစ်အတွင်း ချင်ဟောင်သည် စုရွေ့၏အကူအညီဖြင့် သူ့ကိုယ်သူ ကြိုးစားလေ့ကျင့်ခဲ့ပြီး သူ့ကိုယ်ပိုင်စစ်တပ်ကို ထိန်းချုပ်နိုင်ခဲ့သည်။ယခုတစ်ကြိမ်တွင် သူ၏ဖခင်ပိုင်သင့်သည့် လှပသောမြစ်များနှင့် တောင်တန်းများအား ပြန်လည်သိမ်းပိုက်ရန်ကြိုးစားခြင်းပင် ဖြစ်သည်။

မြို့တော်၏ အမြင့်ဆုံး စောင့်ကြည့်မျှော်စင်မှတစ်ဆင့် မြို့ရိုးအပြင်ဘက်ရှိ စစ်သားများကို မြင်လိုက်ရသဖြင့် စုဝမ် သည် စုရွေ့၏လက်ကို တင်းတင်းကျပ်ကျပ် ဆုပ်ကိုင်ထားရင်း “ချင်ဟောင် မြို့တံတိုင်းကို ဖောက်ဖျက်တဲ့နေ့ကျရင်၊ ကျွန်မတို့ ထွက်သွားကြရအောင်”

တော်ဝင်မိသားစု၏ မျိုးဆက်တွင် ချင်ဟောင်ကို ယှဉ်နိုင်သူမှာ ချင်ယွဲ့ဖြစ်သည်။ ကျွေးရွှယ်နှင့် သူ၏ဆက်ဆံရေးကြောင့် ချင်ယွဲ့သည် စုရွေ့ နှင့် အချိန်အတော်ကြာကတည်းက မဟာမိတ်ဖွဲ့ခဲ့ပြီး ဖြစ်ကာ ချင်ဟောင် နှင့်လည်း တိတ်တဆိတ် သဘောတူညီမှုရရှိခဲ့ကြ၏။

_~_

ထို့ကြောင့် ချင်ဟောင်၏စစ်တပ်သည် မြို့တော်အတွင်းသို့ ဝင်ရောက်လာသောအခါတွင် ဧကရာဇ်အသစ် နန်းတက်မည့်နေ့ကလည်း လက်တစ်ကမ်းအကွာမှာပင်။

ဧကရာဇ်အသစ် ကွယ်လွန်သွားသည်နှင့် တပြိုင်နက် ချန်ချင်းကျင်း တစ်ယောက် ခက်ခက်ခဲခဲရရှိထားသော နောက်ထပ် အချစ်စစ် တစ်ခုအား ထပ်မံဆုံးရှုံးမည်ဖြစ်သည်။ထို့ကြောင့် စုဝမ် ၏ ယခုအကြိမ် မစ်ရှင်ကလည်း ပြီးပြည့်စုံလှ၏။

စုဝမ် စကားကို ကြားလျှင် စုရွေ့ က သူမလက်ကို ဆုတ်ကိုင်ထားလိုက်၏။ထို့နောက် စုဝမ် ၏နားနားကိုကပ်၍ တိုးတိုးလေးဆိုသည်။

“အဲဒါကလေ…… မကြာသေးခင်က ကိုယ် စာအုပ်တွေ အများကြီးဖတ်နေတာမို့ မထွက်သွားခင် ကိုယ်တို့ ရေအတူချိုးရင် ဘယ်လိုလဲ၊ဒီတစ်ခါ ကိုယ် မင်းကို နာကျင်စေမှာ မဟုတ်တာသေချာတယ်"

စုဝမ် : "ဒီလိုအချိန်မှာ ဒါမျိုးပြောရသလား၊လျှောက်ပြောမနေနဲ့"

ရလဒ်အနေနှင့် ရက်များစွာကြာပြီးနောက် မြို့တော်သည် သွေးချောင်းစီးနေတော့သည်။သို့သော် အပြင်ဘက်ကမ္ဘာသည် ငြိမ်းချမ်းနေသကဲ့သို့ အစောင့်အကြပ်များ ချထားသော ကျင်းချင်ဝမ်အိမ်တော်ရှိ ဝင်းအတွင်း၌ အကန့်အသတ်မရှိသော နွေဦးရှုခင်းတစ်ခုက သာယာလျက်ရှိပေသည်။

"မရပ်တော့ဘူးလား၊ကျွန်မ သေတော့မယ်"

ရှင့်အရည်အချင်းတွေ တိုးတက်လာတယ်လို့ ပြောခဲ့တာ မလား၊ကျွန်မကိုလည်း မနာကျင်စေရဘူးလို့ ပြောခဲ့တယ်မလား..

ထူထပ်သော မြူခိုးများထဲတွင် စုရွေ့ ၏ အကြည့်များက စုးရှပြင်းထန်လာပြီး စုဝမ်၏ အသံကတော့ ဆူညံကျယ်လောင်လျက်ပင်။

ဒီလိုဖြစ်မယ်ဆိုတာ သူမ သိပြီးသားပဲ၊ ဒါပေမယ့်....

သူက အကြာကြီး သည်းခံထားသူဖြစ်၍၊သူမ နာကျင်ရသော်လည်း ယခုတစ်ခါတော့ သူ့ကို ချက်ချင်း မငြင်းနိုင်တော့ပေ။

ညအမှောင်တွင် စုရွေ့သည် စုဝမ်၏နှုတ်ခမ်းများကို နမ်းရင်း ကျေနပ်သွားသောအခါ၊ စုဝမ်သည် သူ့ကို ကျေကျေနပ်နပ်ပြုံးပြလိုက်ပြီး မစ်ရှင်လောကမှ နှုတ်ထွက်ရန် ရုံးချုပ်ကို ဆက်သွယ်ဖို့ စိတ်ထဲက ပြင်လိုက်လေတော့သည်။

နောက်ကမ္ဘာမှာ ထပ်ဆုံမယ် ကျွန်မရဲ့ချစ်သူလေးရေ...

_____

🚩Arc_6 . တိသမီးပြန်လာခြင်း END

ချန်ချင်းကျင်းရဲ့ ဘဝကလည်း မတရားလိုက်တာ

ဘာမှမလုပ် အပြစ်ကင်းတဲ့ ပထမဘဝတုန်းကကျ ပေါင်းကြံခံရတယ်

လက်စားချေမဲ့ဘဝကျတော့ အပြစ်ဒဏ်ခံရတယ်

တကယ်မကောင်းတဲ့ သူ့ညီမကကျ ဘာမှမဖြစ်ဘူး

Prev Next