Chapter 135

🚩Chapter -135

 Arc_7.နေရာလွဲမှားနေသောသမီး [ 1 ]

_

ကွက်မျက်သည့်အခန်းထဲ၌ စုဝမ်မျက်လုံးများပွင့်လာပြီးနောက် သူမကိုယ်ကို ကားဖြတ်တိုက်သွားသလို ခံစားချက်က နောက်ဆုံးတွင် ပျောက်ကွယ်သွားသည်။ 

စုဝမ်က မတ်တပ်ရပ်၍ ကိုယ်ကိုအနည်းငယ်လှုပ်ရှားလိုက်ကာ ပထမဆုံးအကြိမ်အဖြစ် သူမရဲ့ ခန္ဓာကိုယ်က အတော်လေး အခြေအနေကောင်းနေကြောင်း ခံစားလိုက်ရသည်။

“အဟမ်း အဟမ်း”

ဘေးတွင်ရပ်နေသော တစ်စုံတစ်ယောက်က အပြည့်အဝလျစ်လျူရှုခံနေရသောအခါ ရုတ်တရက် ချောင်းဟန့်လာ၏။ 

အာ…

ထိုအခါမှ စုဝမ်က အနားတွင်ရပ်နေပြီး သူမကိုစိုက်ကြည့်နေသော ယဲ့ရှင်းကို သတိထားမိတော့သည်။ 

“ကိစ္စတစ်ခုခုရှိလို့လား”

မျက်လုံးပင့်၍ ယဲ့ရှင်းကိုကြည့်ရင်း စုဝမ်က တည်ငြိမ်နေသည့်မျက်နှာထားဖြင့် မေးလိုက်သည်။ တာဝန်ကျကမ္ဘာတိုင်းတွင် သူမက လူအမျိုးအစားအစုံ ပုံစံမျိုးစုံ သရုပ်ဆောင်ပြုမူနိုင်သော်လည်း တကယ်တမ်းလက်တွေ့၌ စုဝမ်က တိတ်ဆိတ်ကာ တည်ငြိမ်သောလူမျိုးဖြစ်သည်။ စုရွေ့နှင့် မတွေ့ဆုံခင်က သူမသည် သူမကိုယ်ပိုင်ကမ္ဘာလေးထဲမှာပင် နေထိုင်ကာ သူငယ်ချင်းလည်းမရှိခဲ့ပေ။ သူငယ်ချင်းရှိရန်လည်း မလိုအပ်သည့် ပုံစံမျိုးဖြစ်နေခဲ့တာပင်။ 

တကယ် ဖာသိဖာသာနဲ့နေခဲ့တာပဲ….

ယဲ့ရှင်းက သူမနှလုံးသားထဲ၌သာ ဝေဖန်နေသော်လည်း မျက်နှာပေါ်တွင်တော့ တောက်ပနေသည့် အပြုံးလေးကို ဆင်မြန်းထားဆဲပင်။ 

“ဒီနှစ်ရဲ့ ဌာနပေါင်းစုံပြိုင်ပွဲအတွက် ငါ နင်နဲ့တင်းကျားကျားကို ဝင်ပြိုင်ဖို့ ခေါ်သွားမယ်”

တင်းကျားကျား…။

ထိုအမည်ကိုကြားသောအခါ စုဝမ်၏ မျက်ခုံးများက မသိမသာလေးတွန့်ချိုးသွားသည်။ ပျောက်ဆုံးနေသော အာကာသတွင် သူမ၌သူငယ်ချင်းမရှိသော်လည်း ဌာနထဲမှ သူမနှင့်အဆင့်တူသည်အချို့လူများအပေါ်တွင်တော့ အတွေးအမြင်ကောင်းတချို့ ရှိသည်။ 

တင်းကျားကျားတွင် ချစ်စဖွယ်ကောင်းသည့်ကလေးတစ်ယောက်၏မျက်နှာရှိသော်လည်း လူတိုင်း မနာလိုအားကျကြသည့် နတ်ဆိုးခန္ဓာကိုယ်ကို ပိုင်ဆိုင်ထားသည်။ ထိုလုပ်ဖော်ကိုင်ဖက်လေးက အမျိုးသားဇာတ်လိုက်များကို ချုပ်နှောင်ရာ၌ အနှစ်၁၀၀ကျော်အတွေ့အကြုံရှိသော ကျွမ်းကျင်အမျိုးသမီးဖြစ်သည်။ 

တကယ်တမ်းတွင် စုဝမ်က တင်းကျားကျား၏ ကျွမ်းကျင်မှုစွမ်းရည်က ကောင်းမွန်သည်ဟုထင်မိသည်။ သူမက ဒီအတိုင်း ချောမောသည့် ယောက်ျားတစ်ယောက်ကိုမြင်သည်နှင့် အချစ်နွံထဲနစ်နေသောအရူးတစ်ယောက်အဖြစ် ပြောင်းလဲသွားတတ်သည့် တင်းကျားကျား၏အကျင့်ကို မကြိုက်ရုံသာ။ 

ပျောက်ဆုံးနေသောအချိန်နှင့်အာကာသရှိ ဌာနခွဲတိုင်းမှလူတိုင်းတွင် သူတို့၏ပြိုင်ဘက်များနှင့်ပတ်သက်သည့် ကိုယ်ရေးအချက်အလက်များရှိတာကို သိထားရမည်။ တင်းကျားကျားကဲ့သို့ သိသာသည့် အားနည်းချက်ရှိနေသူဆိုလျှင် အကြိုပြိုင်ပွဲများ၌ပင် သူမကိုအနိုင်ယူလိုက်ရန်က အလွန့်အလွန်လွယ်ကူသည်။ 

စုဝမ်မျက်ခုံးများတွန့်ချိုးနေတာကိုတွေ့တဲ့ ယဲ့ရှင်းက သူမဘာကိုစိတ်ပူနေသလဲဆိုတာကို သဘောပေါက်သည်။ သူမက အရှေ့ကိုတိုး၍ စုဝမ်၏ပခုံးကို ပုတ်ပေးလိုက်ချင်သော်လည်း စုဝမ်၏ရှောင်ရှားခြင်းကိုခံလိုက်ရ၏။

ယဲ့ရှင်း : ……

ရုတ်တရက်ကြီး စိတ်ရှုပ်စရာကောင်းတယ်လို့ခံစားလိုက်ရတယ်… ဘယ်လိုလုပ်ရမလဲ...

“အဟမ်း”

လည်ချောင်းတစ်ချက်ရှင်းလိုက်ရင်း ယဲ့ရှင်းက မျက်နှာပေါ်၌အပြုံးလေးကိုဆက်ထိန်းထားကာ စုဝမ်ကိုကြည့်လိုက်သည်။ 

“ဒီတစ်ခါတော့ တင်းကျားကျားကို သူမရဲ့ပုံရိပ်ကိုပဲ သေချာအာရုံစိုက်ဖို့ပြောလိုက်ပါ့မယ်… အမ်… ငါတကယ်တမ်း ဒီကိုလာပြီးနင့်ကိုစောင့်နေတာက ရွှီချယ်နဲ့ ရင်ဆိုင်ရမယ့်နည်းလမ်းတွေကို မေးချင်လို့…ရွှီချယ်လည်း ဒီတစ်ခေါက် ချီမုနဲ့ ယွင်ရှန့်ကိုခေါ်ပြီး ပါလာနိုင်တယ်ပြောကြတယ်… ကျန်တဲ့နှစ်ယောက်က ရွှေလက်ချောင်းတွေကိုအသုံးမပြုနိုင်လို့ ပြဿနာမရှိပေမယ့် ရွှီချယ်ကပြဿနာအကြီးကြီးဖြစ်နိုင်တယ်…ဒါကိုနင်လည်းသိတာပဲ” 

ပျောက်ဆုံးနေသော အချိန်နှင့်အာကာသ၌ ရွှီချယ်က အလွန်ထူးခြားနေသည့်ဖြစ်တည်မှုပင်။

နှလုံးသားမြှုပ်နှံသည့်သေတ္တာကို အသုံးပြုပြီးနောက် ရွှီချယ်က ပြိုင်ပွဲကမ္ဘာထဲသို့ ဝင်သွားသည့်တိုင် နှလုံးသားမရှိတော့ပေ။

သူ့တွင် အလိုဆန္ဒမရှိ ၊ တောင်းဆိုမှုများမရှိ ၊ အားနည်းချက်ပင်မရှိချေ။

သူ့ကိုရင်ဆိုင်ဖို့နည်းလမ်းတွေလား……

အနည်းငယ်စိတ်ဓာတ်ကျနေသည့် ယဲ့ရှင်းအား စုဝမ်က လက်ဝှေ့ယမ်းပြလိုက်သည်။ 

“သူ့ကိုရင်ဆိုင်ရမယ့် နည်းလမ်းကိုသာသိရင် ငါဒီမှာရပ်နေမှာတောင်မဟုတ်ဘူး… ပြီးတော့ သူဒီနေ့အထိ… အသက်ရှင်နေမှာမဟုတ်ဘူး”

“ကောင်းပြီ…ကောင်းပြီ”

ဤကဲ့သို့ဖြစ်လိမ့်မည်ဟု သူမမျှော်မှန်းထားခဲ့သည့်တိုင် ယဲ့ရှင်းကအနည်းငယ်စိတ်ပျက်သွား၏။ သို့သော် သူမနှလုံးသားထဲ၌ မျှော်လင့်ချက်အချို့ရှိနေသေးသည်။

“ဒါဆို ငါနင့်ကိုဒုက္ခမပေးတော့ဘူး… အမ်… ပြီးတော့ တင်းကျားကျားက စက်နံပါတ်၃ ကိုသုံးဖို့စောင့်နေတယ်”

“ငါသိပြီ”

စုဝမ်က ခေါင်းညိတ်ပြပြီး ကွပ်မျက်ခန်းထဲမှ ထွက်လာလိုက်သည်။ သူမက စုရွေ့အား ပြီးခဲ့သည့်ကမ္ဘာတွင် ကွပ်မျက်ခန်းအမှတ်၂ကို ပြောင်းလဲမည့်အကြောင်း ပြောထားခဲ့သောကြောင့် စုဝမ်က ဤနေရာမှ ထွက်သွားရန် လုံးဝတုံ့ဆိုင်းမနေပေ။

နောက်ပိုင်းတွင် စုရွေ့နှင့်အတူ တာဝန်ကျကမ္ဘာတိုင်း၌ တာဝန်အတူဆောင်ရွက်နိုင်တော့မည့်အကြောင်း ၊ သူမ တစ်ယောက်တည်း မဟုတ်တော့သည့်အကြောင်းများကို တွေးနေရင်း စုဝမ်၏အသားကျနေသည့် အေးစက်တည်ငြိမ်နေသောမျက်နှာက ရှားရှားပါးပါး နူးညံ့နေသည့် မျက်နှာလေးအသွင်ပြောင်းလဲသွား၏။

တံခါးတွင်ရပ်နေသော တင်းကျားကျားက စုဝမ်၏နှုတ်ခမ်းများမသိမသာကော့တက်ကာ အပြုံးသေးသေးလေး ဖြစ်တည်နေသည်ကို သတိထားမိသွားသည်။ သူမက ခလုတ်တိုက်ပြီး လဲမလိုပင်ဖြစ်သွားရသည်။ 

နင့်အမေ... အခုလေးတင် ဒီက‌‌လေးလေးက ထင်ယောင်ထင်မှားဖြစ်သွားတာလား။ စုရှောင်ဝမ်က ဘယ်လိုပြုံးရမလဲသိသေးတယ်ပေါ့... မဖြစ်နိုင်ဘူး....ဒါလုံးဝမဖြစ်နိုင်ဘူး...

တင်းကျားကျားက ခေါင်းခါလိုက်ပြီး ဆက်သွယ်ရေးကိရိယာမှ တာဝန်အသစ်ကိုကြည့်ရန် လက်မြှောက်လိုက်သည်။ လတ်တလောတွင် သူမက အလွန်ပျင်းရိနေခဲ့၏။ တာဝန်ကျကမ္ဘာများထဲမှ ချောမောသည့် ယောက်ျားများက ဦးနှောက်မမဲ့ပါက အမူအကျင့်ပျက်ပြားနေသည့်သူများဖြစ်ကြသည်။

“ထိုနေရာ”တွင် ပြင်းထန်သည့် အသစ်ဝင်‌ရောက်လာသူရှိကြောင်း သတင်းပို့ချက်တင်ထားသည်။ နတ်ဆိုးဆန်ဆန် ချောမောကာ စိတ်လိုက်မာန်ပါနှင့် ခေါင်းမာတတ်သူဟုလည်းဆိုထားသေးသည်။ 

သူမ မလုပ်ချင်တာက မလုပ်ချင်တာပင်။ 

ဒီလောက်ကမ္ဘာတွေအများကြီးဝင်နေရတာ ဒီကလေး‌လေးကဘာလို့ သူမနဲ့တစ်ခါလေးတောင် ဝင်မတိုက်မိရတာလဲ။

နောက်တစ်ခါ သူမဝင်တဲ့နောက်ကိုလိုက်ဝင်ရမလား... လုပ်ရမလား မလုပ်ရဘူးလား...။

တင်းကျားကျားက အသစ်ကလေးအနောက်သို့ လိုက်သင့်မလိုက်သင့် အတွေးများရှုပ်ထွေးနေချိန်တွင် ပြန်လည်ထိန်းသိမ်းရေးဗဟိုဌာနချုပ်၌ စုရွေ့၏ အသစ်ဝယ်ယူထားသည့် နေရာပြကိရိယာက စတင်အချက်ပြလာကာ စုဝမ်က တာဝန်ကျကမ္ဘာထဲသို့ ဝင်ရောက်သွားကြောင်း အသိပေးလာသည်။

စုရွေ့ကအပြုံးလေးဖြင့် သူ့ကိုယ်ပိုင် ကွပ်မျက်သည့်အခန်းအမှတ်စဥ်၁၁သို့ တုံ့ဆိုင်းခြင်းမရှိဘဲ ဝင်သွားလိုက်သည်။ သူ့အဆင့်ကနေရာ၌ပင်ရပ်နေ၏။ အကြောင်းမှာ သူ့အတွက်အမှတ်များက အဓိပ္ပာယ်မဲ့သွား၍ဖြစ်သည်......။

ကွပ်မျက်သည့်အခန်းထဲ၌ စုရွေ့မျက်လုံးမှိတ်လိုက်သည်နှင့် ယွင်ရှန့်က ခါးသက်သက်လေးပြုံးမိသည်။ 

“ ခြေတစ်လှမ်းနောက်ကျသွားတာပဲ”

ပြောနေရင်းနှင့် သူကခေါင်းငုံ့၍ လက်ထဲရှိ ရွှီချယ်ထံမှကူးလာသည့် စာရွက်အထပ်လိုက်ကိုကြည့်လိုက်သည်။ ၎င်းက အခြားဌာနများမှ လက်ရွေးစင်များ၏ ခိုင်လုံသော အချက်အလက်များဖြစ်သည်။

ဘာကြောင့် အစ်ကိုချယ်က ဤအရာများကို စုရွေ့ထံပေးခိုင်းကြောင်း သူမသိသော်လည်း စုရွေ့က တာဝန်ဆောင်ရွက်သည့် အခန်းထဲသို့ဝင်သွားပြီဖြစ်ရာ ယွင်ရှန့်က ပြန်လှည့်ထွက်သွားရတော့သည်။ 

ပြန်လည်ထိန်းသိမ်းရေး ဌာနချုပ်တစ်ခုလုံးတွင် ရွှီချယ်ကဘာကြောင့် စုရွေ့အား ပထမဦးစားပေးအဖြစ် စည်းရုံးခဲ့သလဲဆိုတာကို မည်သူမှမသိကြပေ။ ယွင်ရှန့်သည်လည်း အခြားသူများကဲ့သို့ပင် စုရွေ့က ရွှေလက်ချောင်းဖြင့် မွေးဖွားလာတာကို မသိပေ....။ 

စုရွေ့၏ ဝိညာဥ်စွမ်းအားက အခြားသူများထက်ပိုကြောက်ဖို့ကောင်းပြီး သူရဲ့သိမြင်နိုင်စွမ်းများကလည်း အထင်ကြီးစရာကောင်းလွန်းသည်။ ၎င်းက သူမည်သည့်ကမ္ဘာထဲသို့ ဝင်သွားပါစေ ၊ ထိုလူရဲ့ ဝိညာဥ်လှိုင်းကို မှတ်မိနေသရွေ့ များပြားလှသည့်လူဦးရေများ၏ ဝိညာဥ်လှိုင်းများအတွင်း ထိုလူကိုအလွယ်တကူ ရှာဖွေတွေ့နိုင်သည်ဟု ဆိုလို၏။

ဤနည်းဖြင့် စစ်သူကြီးစုက အလိုလိုအခွင့်သာသည့်သူဖြစ်လာသည်။ ထို့ကြောင့်ပင် ရွှီချယ်က ဌာနပေါင်းစုံပြိုင်ပွဲ၌ စုရွေ့အား ဝှက်ဖဲတစ်ခုအဖြစ် အသုံးပြုရန် စီစဥ်နေတော့သည်။ 

တာဝန်ကျကမ္ဘာအတွင်း၌.....

ရုတ်တရက် စုဝမ်က တစ်စုံတစ်ယောက်၏ လှုပ်နှိုးခြင်းကိုခံလိုက်ရသည်။ 

“စုဝမ် အိမ်စာထပ်ဖို့...”

အနည်းငယ်ပျော့ပျောင်းနေသည့် မိန်းကလေးအသံထဲတွင် ရှက်ရွံ့နေသည့် အရိပ်အမြွက်အချို့ပါဝင်နေ၏။

အာ.....

စုဝမ်၏အသိစိတ်များက တဖြည်းဖြည်းရှင်းလင်းလာသည်။ 

အိမ်စာ ဟုတ်လား....သောက်ကျိုးနည်း ဘာလဲဟ...

စုဝမ်က လက်မြှောက်၍ မသက်သာဖြစ်နေသော ခေါင်းကို အနည်းငယ်နှိပ်နယ်လိုက်သည်။ ထိုလှုပ်ရှားမှုကြောင့် သူမမြင်ကွင်းထဲမှအရာအားလုံး တဖြည်းဖြည်း ကြည်လင်လာ၏။ ထိုအခါမှ စုဝမ်က သန့်ရှင်းသပ်ရပ်နေသည့် စာသင်ခန်းထဲတွင် ထိုင်နေကြောင်း သတိထားမိသွားသည်။ စာသင်ခန်းထဲတွင် ထိုင်ခုံအများအပြားရှိသော်လည်း အများစုမှာလွတ်နေသည်။ 

“စုဝမ်...”

သူမက ခုဏကောင်မလေးပင်....။ 

သို့သော် ယခုတစ်ခေါက်တွင် သူမအသံက ပို၍ ဂရုတစိုက်ရှိနေသည်။ 

“နေမကောင်းဘူးလား...ကျောင်းဆေးခန်းကိုလိုက်ပို့ပေးရမလား.... ဒါမှမဟုတ် ဆရာဝမ့်ကို သွားခေါ်ပေးရမလား”

“မလို....မလိုဘူး”

စုဝမ်ကခေါင်းခါပြီး သူမ အရှေ့မှ အပြာရောင်ကျောင်းယူနီဖောင်းကိုဝတ်ဆင်ထားပြီး ထူထဲလှသည့်မျက်မှန်ကြီးကို တပ်ထားသော ထိုမိန်းကလေးကို စေ့စေ့စပ်စပ်ကြည့်လိုက်မိ၏။

သူမက.... ရွှီနော့ဖြစ်ပြီး ဤအခန်း၏ အတန်းခေါင်း‌ဆောင်ဖြစ်သည်။

မူလပိုင်ရှင်ရဲ့ခေါင်းက မနေ့ညက အိပ်ရေးပျက်ထားသောကြောင့် ပရမ်းပတာဖြစ်နေသည်။ ကံကောင်းစွာနှင့် စုဝမ်က ဤကမ္ဘာထဲသို့ ဝင်မလာခင်၌ ဇာတ်ကြောင်းအကြမ်းဖျင်းကို ရရှိထားခဲ့သည်။ ဤတာဝန်ကျကမ္ဘာ၏ ဇာတ်ကြောင်းက အလွန်ရိုးရှင်းသည်။ ဇာတ်ကြောင်းက မြင့်မြင့်သောအထက်တန်းလွှာများသာတက်သည့် ကျောင်းတွင် ဖြစ်ပျက်ခဲ့တာပင်။ မူလပိုင်ရှင်စုဝမ်က

ကျောင်းပန်းကလေးအဖြစ် သတ်မှတ်ခြင်းခံခဲ့ရသည်။

ကျောင်းပန်းကလေးအဖြစ် စုဝမ်၌ အနားတွင်ရှိနေပေးပြီး သူမကိုကာကွယ်ပေးသည့် တစ်စုံတစ်ယောက်ရှိခဲ့သည်။ 

သူမ၏ရည်းစား....မဟုတ်.... အခုတော့ ရည်းစားဟောင်းဟု ခေါ်ရပေမည်။

စုဝမ်၏ရည်းစားဟောင်း လော့ယွီက ဤကမ္ဘာရဲ့ အမျိုးသားဇာတ်လိုက်ဖြစ်သည်။ သူက အရပ်ရှည်ပြီး ချမ်းသာသည့်ထိပ်တန်းကျောင်းသား တစ်ယောက်ဖြစ်သည်။ ထို့အပြင် မိမိုက်ပြီး ဗိုလ်ကျခြယ်လှယ်တတ်သည့်သူလည်းဖြစ်နေပြန်၏။ 

အစပိုင်းတွင် စုဝမ်နှင့်လော့ယွီအား စံပြအတွဲအဖြစ် လူတိုင်းက အသိအမှတ်ပြုခဲ့ကြသည်။ သူတို့တွင် ကောင်းမွန်သည့် မိသားစုနောက်ခံရှိပြီး နှစ်ယောက်စလုံးကလိုက်ဖက်ညီကြသည်။ သို့သော် ကျန်ခဲ့သည့် စာသင်နှစ်၌ ဤ”ဖုန်းဟန်အထက်တန်းလွှာကျောင်း”တွင် ရုတ်တရက် တစ်စုံတစ်ယောက်က ကျောင်းကို အထူးဝင်ခွင့်ဖြင့် ရောက်လာခဲ့သည်။

အထူးဝင်ခွင့်ဆိုသည်က “နွမ်းပါးသည့်ကလေး” “စာကြမ်းပိုး” စသည်နှင့် အဓိပ္ပာယ်တူသည်။ သူတို့က အထက်တန်းလွှာကျောင်းများတွင် အမုန်းခံရဆုံးဖြစ်တည်မှုများဖြစ်သည်။ သို့သော် ယခုတစ်ခေါက်၏ အထူးဝင်ခွင့်က အနည်းငယ်ထူးခြားသည်။ 

အထူးဝင်ခွင့်နှင့်ရောက်လာသည့် မိန်းက‌လေးကျောင်းသူ၏ အမည်က ကျန်းယိုဖြစ်သည်။ သူမက အသွင်အပြင် ကြည့်ကောင်းရုံသာမက သူမ၏ကိုယ်ခံပညာစွမ်းရည်ကလည်း အထင်ကြီးစရာကောင်းသေးသည်။ သူမက ကြယ်ပွင့်လေးတစ်ယောက်၏ ကိုယ်ခံပညာအစားထိုးသရုပ်ဆောင်အဖြစ် လုပ်ဆောင်ခဲ့သောကြောင့် ထိုကြယ်ပွင့်လေးက အထူးဝင်ခွင့်ကိုထောက်ခံပေးလိုက်ခြင်းဖြစ်သည်ဟု ပြောကြ၏။ သူမက ကျူရှင်ခနှင့် အဆောင်လခများအားလုံး ကင်းလွတ်ခွင့်ရသည်။

ကျန်းယိုရောက်ရှိလာမှုနှင့်အတူ တစ်ကျောင်းလုံးရဲ့ အသွင်အပြင်က ရုတ်ချည်းပြောင်းလဲသွားခဲ့၏။

ရန်ပွဲတစ်ခုဖြစ်လျှင် ကျန်းယိုပေါ်လာလိမ့်မည်။

တစ်စုံတစ်ယောက်က အားနည်းသူကို အနိုင်ကျင့်နေလျှင်လည်း ကျန်းယိုပေါ်လာလိမ့်မည်။ 

စွန့်ပစ်ထားသည့် ခွေးလေး၊ ကြောင်လေးများပေါ်လာလျှင်လည်း အပြုံးချိုပြီး ကြင်နာတတ်သည့် နှလုံးသားရှိသည့် အမျိုးသမီးဇာတ်လိုက်လေးက သေချာပေါက်ကယ်ဆယ်ပေးလိမ့်မည်။

အတိုချုပ်ပြောရလျှင် သူမကအလင်းရောင် ၊ သူမကလျှပ်စစ် ၊ သူမက ဖုန်းဟန်ကျောင်း၏ ရာဇဝင်တွင်သည့်သူဖြစ်လာသည်။

စာသင်နှစ်တစ်နှစ်အတွင်းမှာပင် ကျန်းယိုက သူမအမည်အား ကျောင်းတွင်နေရာတစ်ခုရနေစေခဲ့ပြီး ထူးချွန်သည့် ကောင်လေးအများအပြားကိုလည်း မျိုးသစ်ဆက်နတ်ဘုရားမအဖြစ်ကိုးကွယ်နိုင်စေခဲ့သည်။ 

သေချာပေါက် လော့ယွီကလည်း ကျန်းယိုကို စွဲလမ်းသွားလေသည်။ အလွန်စွဲလမ်းသောကြောင့် စုဝမ်နှင့် လမ်းခွဲပြီးနောက် လော့ယွီက ကျန်းယို၏ မြင့်မားသည့်ဖြစ်တည်မှုနောက်သို့ လိုက်တော့သည်။ 

သို့သော် ၎င်းက စုဝမ်နှင့် ကျန်းယိုကြားမှ သဘောထားကွဲလဲမှု၏ အရင်းခံမဟုတ်ခဲ့ပေ။

တကယ်တမ်းတွင် ဤကမ္ဘာ၏ ဇာတ်ကြောင်းက ယေဘုယျအားဖြင့် ကျောင်းတွင်သာဖြစ်ပျက်ခဲ့‌သော်လည်း အဓိကဇာတ်ကြောင်းက စုမိသားစုတွင် ဖြစ်ပျက်ခဲ့သည်။ 

Dမြို့တွင် စုမိသားစုအား နာမည်ကြီးမိသားစုအဖြစ်သတ်မှတ်နိုင်သည်။ စုဝမ်၏အဖေ စုဟိုင်ချန်းက ပင်လယ်စာစားသောက်ဆိုင်လေးနှင့် စတင်ခဲ့သည်။ ယခုတွင် စုမိသားစု၏ လုပ်ငန်းနယ်ပယ်၌ အစားအသောက် ရောင်းဝယ်ရေးသာမက ဌာနဆိုင်ရာစတိုးလုပ်ငန်းများနှင့် စူပါမားကတ်အခွဲများလည်းတည်ရှိနေပြီဖြစ်သည်။ 

စုဟိုင်ချန်း၏ဇနီး ဝမ်ရှူးကျယ်က Dမြို့၏ ချမ်းသာပြီးအင်အားကြီးသည့်မိသားစုမှဖြစ်သည်။ သူတို့နှစ်ယောက် ငယ်ရွယ်စဥ်က ဝေးလံခေါင်သီသည့် ကျေးလက်များတွင် သင်ကြားပို့ချပေးရသော စိတ်အားထက်သန်သည့် စေတနာ့ဝန်ထမ်းများဖြစ်ခဲ့ကြသည်။ ထို့နောက် နှစ်ယောက်တွေ့ဆုံကာ ချစ်ကျွမ်းဝင်ခဲ့ကြသည်။ 

နောက်ပိုင်းတွင် နှစ်ယောက်က ထိုကျေးလက်၌ပင် လက်ထပ်လိုက်ကြကာ လက်ထပ်ပြီးသိပ်မကြာခင်မှာပင် စုဝမ်ကို ရရှိခဲ့သည်။ ဝမ်ရှူးကျယ်၏ကျန်းမာရေးက အမြဲဆိုးဝါးနေသောကြောင့် စုဟိုင်ချန်းက သူ့ဇနီးနှင့်သမီးလေးကို သာ့ရှန်းမှခေါ်ထုတ်ပြီး သူ့ဇနီး၏ကျန်းမာရေးနှင့် သမီးလေးရဲ့အနာဂတ်အတွက် Dမြို့သို့ ပြန်လာရန်ဆုံးဖြတ်ခဲ့သည်။ သူ၏ နှစ်အများကြီးတိုင်အောင် မဆုတ်မနစ်ကြိုးစားခဲ့မှုများက နောက်ဆုံးတွင် သူ့ရဲ့လက်ရှိ ချမ်းသာကြွယ်ဝမှုများနှင့် ဂုဏ်ပုဒ်များကို ရရှိလာစေခဲ့သည်။

ဇနီးမောင်နှံတွင် စုဝမ်ဆိုသည့်သမီး‌လေးတစ်ယောက်သာရှိသည့်အတွက် ဆယ်နှစ်ကျော်သည်အထိ အလိုလိုက်ခဲ့ကြသည်။ ၎င်းက မူလပိုင်ရှင်အား နူးညံ့သော ၊ စိတ်ဆန္ဒပြင်းပြသော ၊ ဖျားနာလွယ်သောမင်းသမီးလေးအဖြစ် ချို့ယွင်းမှုများကို ဖြစ်စေခဲ့၏။

ဤချို့ယွင်းချက်များက ကြီးကြီးမားမားမဟုတ်သလို သေးသေးမွှားမွှားလေးလည်း မဟုတ်ပေ။ သို့သော် သူမက တစ်ချိန်လုံး အနားမှလူများ၏ အလိုလိုက်အကြိုက်‌ဆောင်ခြင်းခံခဲ့ရသောကြောင့် မူလပိုင်ရှင်က သူမတွင် အားနည်းချို့ယွင်းချက် ကြီးကြီးမားမားမရှိဟု တွေးထင်နေခဲ့သည်။

တစ်နေ့တွင် စစ်မှန်သည့်မင်းသမီးလေး ကျန်းယိုပေါ်ပေါက်လာခဲ့ပြီးနောက် စုဝမ်၏ဘဝတစ်ခုလုံးက လုံးဝပြောင်းလဲသွားတော့သည်။ 

ကျန်းယိုက သာ့ရှန်းရွာမှ လူဖြစ်ပြီး သူမမိဘများကိုရှာရန် Dမြို့သို့ ရောက်ရှိလာခဲ့သည်။

ဤကား ကျန်းယို၏ကြမ်းတမ်းလှသည့်ဘဝအစဖြစ်သည်။ သူမက မိဘတစ်ပါးတည်းသာရှိသော မိသားစုတွင် မွေးဖွားလာခဲ့ပြီး သူမ၏အလုပ်ကြိုးစားသည့်အမေရဲ့ လက်တစ်ဖက်တည်းထဲတွင်သာကြီးပြင်းလာခဲ့သည်။ ကျန်းယိုအသက်၈နှစ်တွင် စာသင်နိုင်ရန်အတွက် ကျန်းယိုအမေ ကျောင်းမေ့က သူမကိုမြို့ငယ်လေးတစ်ခုသို့ ခေါ်သွားခဲ့သည်။ သားအမိနှစ်ယောက်မှာ ရေယိုစိမ့်နိုင်သည့် တစ်ထပ်အိမ်လေးတွင် ငှားရမ်းနေနိုင်ခဲ့ကြသည်။ ကျောင်းမေ့က ကျန်းယို၏ကျောင်းစရိတ်များနှင့် သူတို့နှစ်ယောက်အတွက် နေထိုင်စားသောက်သည့် စရိတ်များကိုပေးနိုင်ရန် တစ်နေ့လုံး အရုဏ်တက်မှသည် မိုးချုပ်တဲ့အထိ အလုပ်ငါးခုလုပ်ခဲ့ရသည်။ 

ဤသို့နှင့် တစ်နှစ်ပြီးတစ်နှစ်ကုန်ဆုံးလာခဲ့ပြီး ကျောင်းမေ့၏ခန္ဓာကိုယ်ကနောက်ဆုံးတွင် ပြိုလဲလာတော့၏။

ထိုအချိန်တွင် ကျန်းယိုက ၁၇နှစ်သာရှိသေးသည်။ 

တကယ်တမ်း၌ မြို့ငယ်လေးထဲတွင် သူမနေခဲ့သည့် ကိုးနှစ်အတွင်း၌ ကျန်းယိုကနေ့တိုင်းခိုးထွက်၍ ပြန်ရောင်းရန် အမှိုက်လိုက်ကောက်ခဲ့သည်။ ထိုအချိန်တွင် ကျန်းယိုသည် ရှောင်းချီနှင့် ရှောင်းယွင်ယိဆိုသည့် ညီအစ်ကိုနှစ်ယောက်နှင့် သိကျွမ်းခဲ့သည်။ သူတို့အဖေက ဒေသခံလူဆိုးဂိုဏ်းခေါင်းဆောင်ဖြစ်သော်လည်း အုပ်စုဖွဲ တိုက်ခိုက်ရာတွင် တစ်ဖက်ရန်သူ၏လက်ချက်ဖြင့် အသက်သေဆုံးခဲ့သည်။ ထိုအချိန်မှစ၍ ရှောင်းချီနှင့် ရှောင်းယွင်ယိတို့ကို ကိုယ်ခံပညာဆရာတစ်ယောက်မှ မွေးစားခဲ့၏။ ငယ်ရွယ်စဥ်ကပင် သူက ကိုယ်ခံပညာဖြင့် မိသားစုကိုရှာကျွေးနေသူဖြစ်ရာ ကျန်းယိုက ရှောင်းချီနှင့်အတူ ပညာများစွာကို သင်ယူခဲ့သည်။ 

ကျောင်းမေ့ အိပ်ရာထဲလဲသွားသည့်အချိန်တွင် ဆေးရုံက ကျောင်းမေ့သည် ကျောက်ကပ်အစားထိုးခွဲစိတ်မှသာ ပြန်လည်သက်သာလာနိုင်ကြောင်း ပြောခဲ့သည်။ ထိုခွဲစိတ်မှုက တူညီသည့်ကျောက်ကပ်ကိုလိုအပ်သည်သာမက ကုသရေးစရိတ်လည်းအလွန်များလေသည်။ စိတ်ပျက်လက်ပျက်ဖြင့် ကျန်းယိုက ရှောင်းညီအစ်ကိုထံ အကူအညီ သွားတောင်းခဲ့သည်။ ရှောင်းချီက ကျန်းယိုကိုပိုက်ဆံချေးလိုက်ပြီး ကိုယ်ခံပညာအစားထိုးအလုပ်ကိုလည်း ကူရှာပေးခဲ့သည်။

____🚩