MM Story Teller

Chapter 34

Viewers 3k

👾Chapter 34

“ဒါဆိုရင် စစ်သင်္ဘောပေါ် တက်ကြတဲ့အခါ မစ္စတာလင်းက ကိုယ့်နောက်ကို လိုက်ခဲ့ရမယ်”

တတိယအဆင့် ရွေးချယ်မှုကို ဆက်လက်ပြုလုပ်နေကြသည်။

လင်းဟန်သည်လည်း နေ့တိုင်း၏ ကြားအချိန်များအတွင်း အာဟာရထုပ်များ သောက်ရင်း အေးအေးချမ်းချမ်း အလုပ်လုပ်နေသည်။ အားလပ်ချိန်များတွင် သုတေသနအဖွဲ့အစည်း၏ မက်ခါအသစ်များကို ဆက်လက်လုပ်ကိုင်နေရရင်း စစ်စခန်းတွင် နေရသောဘဝကိုတဖြည်းဖြည်း ကျင့်သားရလာပြီး နေ့စဥ်လုပ်ငန်းဆောင်တာများနှင့် အသားကျလာ၏။

တတိယအကျော့၏ မစ်ရှင်များမှာ လင်းဟန်ဘက်မှ လေ့ကျင့်ကွင်းအား မျက်စိဒေါက်ထောက် ကြည့်ရန် လိုအပ်သဖြင့် သူသည်ပင် စစ်သားများနှင့် အလုပ်မှလွဲ၍ အခြားသော အကြောင်းအရာများ မပြောဖြစ်ကြသည့်တိုင် ထိုသူများနှင့် အတော်လေး ရင်းနှီးလာသည်။

လင်းဟန်က လေ့ကျင့်ကွင်းထဲမှ မက်ခါများအား စိုက်ကြည့်နေမိသည်။

ဟယ့်ယွင်ထင်၏ အစောပိုင်းနေ့ရက်များကလည်း ထိုသို့ဖြစ်ကြောင်း တစွန်းတစ ကြားခဲ့ရသည်။ ထိုစဥ်က သူ၏ လုပ်ဆောင်မှုများကို ယနေ့အထိ မည်သူမှ မကျော်လွှားနိုင်သေးပေ။ ထိုစဥ်က လေ့ကျင့်မှုများမှာ ယနေ့အချိန်ထက် ပို၍ ရက်စက်ကြမ်းတမ်းသော်ငြား ဟယ့်ယွင်ထင်သည် ပထမဆုံးအနေဖြင့် အပတ်တကုတ် အားထုတ်ကြိုးပမ်းခဲ့ပြီး အဆုံးတွင် လက်ရွေးစင်အသင်းသို့ တန်း၍ ဝင်သွားခဲ့သည်။ လက်ရှိ ရာထူးအထိ မည်သို့ တက်လှမ်းနိုင်ခဲ့သည်မှာကား နောက်ထပ် ဇာတ်ကြောင်းတစ်ခုပင်။

အဲ့ဒီအချိန်တုန်းက ဘယ်လိုလူမျိုး ဖြစ်ခဲ့တာလဲ... အခုလိုပဲလား... ဒါမှမဟုတ်... အရမ်းကွာခြားနေတဲ့ ပုံစံနဲ့လား...

နေ့တိုင်းလိုလို လူများ ထုတ်ပယ်ခံနေရပြီး မက်ခါများကလည်း နေ့စဥ်ရက်ဆက် အပျက်အစီးများ ရှိလာကာ တပ်သားများထံမှ အမျိုးမျိုးသော အကြောင်းအရင်းများဖြင် အမှတ်များ နှုတ်ခံနေရသည်။

တစ်ခါတရံတွင် လင်းဟန်က တပ်သားများ လေ့ကျင့်ရေးဆင်းနေသည်ကို ကြည့်ရင်း စနစ်က အတော်လေး ပြင်းထန်လှသည်ဟု ခံစားရသည်။ ပြောစရာမလိုအောင်ပင် တတိယအကျော့ပြီးနောက် သေချာမှုမရှိဆုံးနှင့် အရက်စက်ဆုံးဟု ဆိုရမည့် စတုတ္ထအကျော့ ရှိနေသေးသည်ပင်။

စတုတ္ထအကျော့က လက်တွေ့လေ့ကျင့်မှု ဖြစ်သော်လည်း အရက်စက်ဆုံးအရာမှာ နေရာအနေအထားက စစ်စခန်း၌သာ ကန့်သတ်ထားမည် မဟုတ်ဟု လင်းဟန် ကြားထားခဲ့ရသည်။ သူတို့က တတိယအကျော့ အောင်မြင်သူများအား နောက်ဆုံးစစ်ဆေးမှုအတွက် ကျယ်ပြောလှေသာ ကြယ်စုတန်းများ အကြား အာကာသဟင်းလင်းပြင်နေရာများထံ တန်း၍ ပစ်ချလိုက်မည် ဖြစ်သည်။

စစ်စခန်းဘက်မှ သူတို့၏ လုံခြုံရေးကို အာမခံပေးထားသော်လည်း မည်သူကမှ မည်သည့်အရာများ ဖြစ်ပျက်လာမည်ဟု မခန့်မှန်းနိုင်ပေ။

ကြယ်တာရာဓါးပြများ... ဇာဂ့်များ... ထူးဆန်းလှသော ဗီဇပြောင်း သတ္တဝါကြီးများ စသည်ဖြင့်.... ဤကြယ်တာရာကမ္ဘာကြီးတွင် အရင်းအမြစ်များက အကြီးမားဆုံး သဘောထားကွဲ့လွဲမှုများ ဖြစ်ပေါ်စေနိုင်သည်။ ဂြိုလ်များအကြား ကွာဟချက်နေရာများအတွင်း အမျိုးအစား မခွဲနိုင်သော ထိုမီးခိုးရောင်ဒေသများက ရံဖန်ရံခါ မခန့်မှန်းနိုင်သော အန္တရာယ်များ ပေါက်ဖွားလာစေတတ်သည်။

များသောအားဖြင့် တတိယအကျော့တွင် ဝေးလံခေါင်ဖျားသော နေရာများ၌ ဖြစ်ပွားတတ်သော ယိမ်းယိုင်မှုများအတွက် လုံခြုံရေးကို သေချာစေရန် အထူးကျွမ်းကျင်သူများက တိုက်ပွဲနေရာ၌ ဖြစ်စေ ကွပ်ကဲစင်တာများ၌ ဖြစ်စေ ရှိနေပေးကြမည် ဖြစ်သည်။

မက်ခါဖြန့်ဝေရေးဘက်မှ လက်တွေ့လေ့ကျင့်မှု စတုတ္ထအဆင့်တွင် ပါဝင်မည်မဟုတ်ကြောင်း တိုက်ရိုက်လျှောက်ထားခဲ့သည်ကို အဆုံးတွင် အတည်ပြုပေးခဲ့သည်မှာ တစ်နှစ်ကြာခဲ့လေပြီ။

သို့သော်လည်း တတိယအကျော့မှာသာ ရှိနေသေးသဖြင့် လင်းဟန်သည်လည်း အချိန်တစ်ခုလောက်ထိ ကြိုမတွေးနိုင်သေးပေ။

ထို့အပြင် လေ့ကျင့်ခန်းတစ်ခုသာ ဖြစ်နေသေးရာ အန္တရာယ်များသော်လည်း နှစ်များတလျှောက် ကြီးမားသော မတော်တဆမှုများ ဖြစ်မလာခဲ့ပါပေ။

ထိုအခိုက် စက်သွယ်ရေးစက်မှ အသံမြည်လာခဲ့သည်။

လင်းဟန် ယနေ့ အလုပ်သိမ်းပြီး လေ့ကျင့်ကွင်းမှ ထွက်လာသောအခါ စစ်ဆေးမှု၏ ပထမနေရာတွင် ဗိုလ်စွဲနေခဲ့သည့် ချီကျားမူနှင့် တွေ့လိုက်ရသည်။

“ဟယ်လို မစ္စတာလင်း"

ချီကျားမူက လင်းဟန်ကို ပြုံးပြလိုက်သည်။

"ဒီနေ့လည်း မစ္စတာလင်းအတွက် ခက်ခဲတဲ့နေ့ ဖြစ်ခဲ့ရပြီ"

ထိုသူ၏ မျက်နှာအစိတ်အပိုင်းများက ထက်မြမနေသော်လည်း ယခုက ညစာစားချိန်ဖြစ်ပြီး လေ့ကျင့်ရေးအချိန်များက ပြီးဆုံးသွားသဖြင့် လူတိုင်းက အားပြန်ပြည့်လာကြလေပြီ။

ချီကျားမူ၏ မျက်နှာ အမူအရာများက စိတ်အေးလက်အေး ဖြစ်နေသည့်အခါ တောက်ပနေသည့် ဆယ်ကျော်သစ်ကလေးတစ်ယောက်၏ အသွင်အပြင်များ ရှိနေသည်။ သူက လင်းဟန်အား တလေးတစား နှုတ်ဆက်လိုက်သည်။ အဆုံးတွင် ဤတတိယအကျော့၌ လတ်တလောအချိန်အတွင်း လင်းဟန်အား ဒုက္ခအပေးဆုံးသူမှာ သူဖြစ်နေသည်ပင်။

လင်းဟန် ထိုသူ၏ မျက်နှာနုနုလေးကို ကြည့်လိုက်မိသည်။

လွန်ခဲ့သည့် ရက်အနည်းငယ်အတွင်း ချီကျားမူ၏ မက်ခါက အမြဲတမ်း တစ်ခုခု ဖြစ်နေတတ်ပြီး အတွင်းပိုင်း ပရိုဂရမ်များက ပြသနာရှိနေသည်ကြောင့် မဟုတ်လျှင် ပုံမှန်မဟုတ်သော စိတ်စွမ်းအင် ချိတ်ဆက်မှုများ ရှိနေတတ်သည်။ ထို့ကြောင့်ပင် လင်းဟန်၏ အလုပ်ချိန်တစ်ဝက်လောက်အား ချီကျားမူ၏ မက်ခါအား ပြုပြင်ရာ၌ အသုံးပြုခဲ့ရသည်ဟုပင် ဆိုရပေမည်။

အမှန်မှာ သူ၏ လေ့ကျင့်ရေးလုပ်ဆောင်မှုများက အမှားအယွင်း အနည်းငယ်သာ ရှိပြီး အလွန် ကောင်းမွန်ခဲ့သည်။ သို့သော်လည်း သူက အတော်ဆုံး ဖြစ်နေသည်ကြောင့် ဖြစ်နိုင်သည်။ အတွင်းပိုင်းတွင် များစွာသော တပ်သားသစ်များ၏ စိတ်မကျေချမ်းမှုများ စုပုံရာနေရာလည်း ဖြစ်လာသည်။ နေရာတိုင်းတွင် အံတကြိတ်ကြိတ် လက်သီးတပြင်ပြင် ဖြစ်နေကြကာ အလွန် ထူးချွန်ကြသူများက လက်တစ်ဆုပ်စာ လူများထံမှသာ ထောက်ခံခံရခြင်းမျိုးလည်း ဖြစ်နိုင်သကဲ့သို့ ပစ်မှတ်ထား အနိုင်ကျင့်ခံရသည်လည်း ရှိလာနိုင်ပေသည်။

စစ်ဆေးမှု၌ ချီကျားမူက အလွန် အထင်ကြီးဖွယ်ကောင်းနေရသည့်အချက်မှာ သူကိုယ်၌က ဟယ့်ယွင်ထင်ကဲ့သို့ ချဥ်းကပ်ရမလွယ်ကူခြင်းပင်။ ထိုသူအား အလွယ်တကူ ဝင်ရော၍ မရနိုင်ပေ။ သူက စကားများများ မပြောတတ်သလို စကားပြောသည့် လူတိုင်းနှင့်လည်း အမြဲတမ်းလိုလို တူညီသော မျက်နှာထားကိုသာ ထားသဖြင့် သူငယ်ချင်းများလည်း မရှိဘဲ အမြဲတစေ တစ်ယောက်တည်းသာ ဖြစ်နေတတ်သည်။

တဖြည်းဖြည်းနှင့် အုပ်စုသေးလေးတစ်ခုက အခြားသော အကြံအစည်များ ရှိလာခဲ့သည်၊

သို့သော်လည်း တပ်စခန်း၏ စည်းမျဥ်းများနှင့် ရွေးချယ်ရေး ထုတ်ပယ်ရေး စနစ်များကြောင့် သူ့အား ပွင့်ပွင့်လင်းလင်း မဖိနှိပ်ရဲကြပေ။ သို့သော်လည်း မည်သည့်အရာမှ မလုပ်ရဘဲ ငြိမ်ငြိမ်လေးထိုင်နေရန်လည်း မဖြစ်နိုင်ပေ။

ထို့ကြောင့် စစ်ဆေးမှုတတိယအကျော့ ရောက်သောအခါ နောက်ဆုံးတွင် အခွင့်အရေး ရှာတွေ့သွားကြသည်။

သူတို့က အမျိုးမျိုးသော အကြောင်းပြချက်များ သုံး၍ ချီကျားမူ၏ မက်ခါအား 'လာရောက်ကြည့်ရှု'ကြပြီးနောက် အချို့သော အစိတ်အပိုင်းများကို ဖြုတ်တပ်ထားခဲ့ကြသည်။ ထို့ကြောင့် ချီကျားမူ ကိုယ်တိုင် ခက်ခဲရသည်သာမက ပြန်လည်ပြုပြင်ရန်အတွက်လည်း မက်ခါပညာရှင်အား အကူအညီတောင်းရသည်။

ဗိုလ်ချုပ်က မစ္စတာလင်းအား ပိုပိုသာသာ ဂရုစိုက်တတ်သည်ကို စစ်စခန်းမှ လူတိုင်း သိထားကြပြီး ယခင်က မစ္စတာလင်းအား တိတ်တဆိတ် ချောင်းကြည့်မိကြသူများကလည်း အမှတ်များ နှုတ်ခံခဲ့ကြသည်။ သို့သော်လည်း ချီကျားမူ၏ မက်ခါက အမြဲတစေ ပြသနာတက်နေသဖြင့် လင်းဟန်သည်လည်း သူနှင့် မကြာခဏ အဆက်အဆံ ရှိလာရသည်။

များစွာသော တပ်သားများမှာ ဗိုလ်ချုပ်မှ အမှတ်များ နှုတ်ယူပေတော့မည်ဟု တွေးကာကျိတ်ရယ်နေကြသည်။

လင်းဟန်သည်လည်း တုံးအသူ မဟုတ်လေရာ ၎င်းအား ခန့်မှန်းနိုင်ခဲ့ပါ၏။

ချီကျားမူဘက်မှ အဘယ်ကြောင့် စကားဟမလာရသည်ကို မသိပါသော်လည်း တိုက်ရိုက် ထောက်ပြ၍ မရသဖြင့် သွယ်ဝိုက်၍သာ အရိပ်အမြွက် ပြောပြလိုက်သည်။

"မင်းမှပြသနာရှိနေရင် ပြောပြလို့ရတယ်နော်... မင်း သတိထားသင့်နေပြီ"

ချီကျားမူက မျက်လွှာချပြီးနောက် တီးတိုးရေရွတ်လိုက်သည်။ "ကျေးဇူးပါ မစ္စတာလင်း"

ချီကျားမူအား နှုတ်ဆက်စကားပြောပြီးနောက် အခန်းပြန်ရန် ပြင်နေသည့် လင်းဟန်တစ်ယောက် အကြံတစ်ခုရသွားပြီး အခြားနေရာတစ်ခုသို့ လျှောက်လာခဲ့လေသည်။ ဟယ့်ယွင်ထင်၏ အခန်းသို့ ရောက်သောအခါ ထိုသူက လေ့ကျင့်ရေး ယူနီဖောင်းကိုသာ ဝတ်ဆင်ထားဆဲ ဖြစ်ပြီး လဲလှယ်ရန် အချိန်မရလိုက်ပုံပင်။

လွန်ခဲ့သည့် ရက်အနည်းငယ်အတွင်း အချင်းချင်း မတွေ့ဖြစ်ခဲ့ကြသဖြင့် သူရောက်လာသည်ကို မြင်သောအခါ ဟယ့်ယွင်ထင်က စကားတစ်ခွန်းမှ မပြောသော်လည်း မျက်လုံးထဲတွင်မူ မသင်္ကာဖြစ်နေသည့် အရိပ်အယောင်တစ်ခု ပြသလာသည်။

"ဗိုလ်ချုပ်" လင်းဟန်က ဝေ့လည်ကြောင်ပတ် လုပ်မနေတော့ဘဲ လာရင်းကိစ္စကိုသာ တန်းပြောလိုက်သည်။

"ကျွန်တော် ပြောစရာတစ်ခု ရှိလို့"

သရေစာများ တမြုံ့မြုံ့ဝါးနေသော လုအန်းဟယ်က လင်းဟန်ထိုသို့ ပြောသည်ကို ကြားသောအခါ မျက်လုံးများ ပြူးကျယ်သွားပြီး ဟမ်းစတားလေးတစ်ကောင်ကဲ့သို့ ပါးလေးများ ဖောင်းကားလာလေသည်။ သူ ထွက်သွားရမည်လား ဆက်နေရမည်လားကိုပင် မသိတော့ပေ။

ဘာကြီး... မစ္စတာလင်းက နောက်ဆုံးတော့ အသိတရားရလာပြီး ဘောစ့်ကို ကူညီပေးဖို့ ကြံထားတယ်ပေါ့လေ...

ဟယ့်ယွင်ထင်က ထိုအခိုက်တွင် မျက်လုံးထဲ၌ ခံစားချက်မျိုးစုံ ပြသနေသည့် လုအန်းဟယ်အား အကြည့်တစ်ချက် ပေးလိုက်သည်။

ဆက်စားနေ... ထွက်သွားစရာမလိုဘူး...

ဟယ့်ယွင်ထင်၏ ဆိုလိုရင်းကို ခပ်မြန်မြန် နာလည်သွားသူက သနားစရာ မျက်နှာထားလေး ပြသလာပြီး အမှန်တကယ် ထွက်သွားချင်နေကြောင်း ပြသလာသည်။

သူက ပါးစပ်ထဲမှ အစာများကို မျိုချကာ ရေတစ်ငုံသောက်လိုက်ပြီးနောက် ပြောလိုက်သည်။

"မစ္စတာလင်း... ပြောစရာ ရှိတာပြောပါ... ကျွန်တော့်ကို စိတ်ထဲမထားပါနဲ့"

လင်းဟန် ခေါင်းငြိမ့်ပြလိုက်သည်။ "ဒီနေ့ အရှင်မင်းသားဆီက ဆက်သွယ်လာတယ်"

လုအန်းဟယ် ထိုအကြောင်းကို ကြားသောအခါ အပူအပင်မရှိသည့် ပုံစံကို ချက်ချင်း လွှင့်ပစ်လိုက်လေသည်။

"ပြောကာမှပဲ... ဒီနှစ်ရက်အတွင်းမှာ မစ္စတာလင်းကို ပြောပြဖို့ အချိန်မရခဲ့ဘူး"

ထို့နောက် လုအန်းဟယ်က လင်းဟန်အား ဝမ်ထျန်းယောင်အကြောင်း စုံစမ်းစစ်ဆေးမှုရလဒ်များ ပြောပြလိုက်သည်။

"အကျဥ်းချုပ် ပြောရရင် ဝမ်ထျန်းယောင်အကြောင်း မင်းပြောပြခဲ့တာတွေက အမှန်ဖြစ်တဲ့ အကြောင်း အတည်ပြုပြီးသွားပြီ... သူက တကယ်တော့ နှစ်ဖက်လုံးမှာ မပါတဲ့သူ မဟုတ်ဘူး.. ဒီအချက်အလက်မျိုးက အတည်ပြုဖို့ လိုအပ်လို့ပါ... မစ္စတာလင်း ခွင့်လွှတ်ပေးစေချင်ပါတယ်"

"အဆင်ပြေပါတယ်"

လင်းဟန် ခေါင်းငြိမ့်ပြလိုက်သည်။ အဆုံးတွင် ဟယ့်ယွင်ထင်က လက်ရှိ၌ စိတ်ဖတ်စွမ်းရည် ရှိနေသည်ကို ယုံကြည်သေးပုံမရသဖြင့် တော်ဝင်မင်းသားနှင့် ပတ်သက်သည့် စကားများကိုမူ စစ်ဆေးရမည်သာ ဖြစ်သည်။

လင်းဟန် ပြောလိုက်သည်။

"ဒီနေ့... သူ ကျွန်တော့်ကို လေ့ကျင့်ရေးစတုတ္ထအကျော့အကြောင်း ပြောခဲ့တယ်"

လက်တွေ့စစ်ဆေးမှု စတုတ္ထအကျော့မှာ အရေးအကြီးဆုံး အပိုင်းဟု ဆိုရမည် ဖြစ်ပြီး အကောင်းဆုံးသော မောင်းနှင်သူများအား ရွေးချယ်နိုင်မှုက ဤအဆင့်တွင် မူတည်နေလေသည်။ ယေဘုယျအားဖြင့် တပ်စခန်းဘက်မှ တိုက်သင်္ဘောတစ်ခု စေလွှတ်ကာ မောင်းနှင်သူ အသစ်များအား နယ်နိမိတ်ဒေသများထံ ပို့ဆောင်ပေလိမ့်မည်။ ထို့နောက် မောင်းနှင်သူတစ်ယောက်ချင်း၏ အခြေအနေကို အချိန်နှင့်တပြေးညီ လေ့လာကာ ထိုသူများထဲမှ အကောင်းဆုံးဟု ဆိုရမည့် လူအနည်းငယ်ကိုသာ ရွေးချယ်မည် ဖြစ်သည်။

လုအန်းဟယ်တစ်ယောက် "ဟား"ဟု အာမေဋိတ်သံ ပြုလိုက်သည်။

လင်းဟန် ဆက်ပြောလိုက်သည်။

"ဒါပေမယ့် အရှင်မင်းသားက သူပါလိုက်ချင်တယ်လို့ ပြောခဲ့တာ... ဒီအကြောင်းကို ကျွန်တော်ကတဆင့် ဗိုလ်ချုပ်ဆီ တဆင့်ပြောပေးစေချင်နေတယ်"

ဟယ့်ယွင်ထင်၏ မျက်ခုံးများ စုကြုံ့သွားပြီး စိတ်ကသိကအောက် ဖြစ်သွားပုံရသည်။

"သူ့ဆီကနေ ကြားရသလောက်"

လင်းဟန် ခဏရပ်ပြီးမှ ဆက်ပြောလိုက်သည်။

"ကြည့်ရတာ သူက စစ်သင်္ဘောပေါ်မှာ ဗိုလ်ချုပ်အပေါ်ကို သဘောကောင်းတဲ့ပုံစံတွေ လုပ်ပြချင်နေတာ ဖြစ်မယ်"

ဝမ်ထျန်းယောင်၏ ရှုထောင့်အရ လင်းဟန်မှာ ကြိုးကိုင်ရလွယ်ကူသည့် အိုမီဂါတစ်ယောက်ဖြစ်ပြီး ဟယ့်ယွင်ထင်ကလည်း လွန်စွာအရေးပေးသူလည်း ဖြစ်သည်။

အပြင်လူများ၏ အမြင်တွင် အင်ပါယာမင်းသားမှ ဗိုလ်ချုပ်နှင့် မကြာခဏ မိတ်ဖွဲ့နေခြင်းမှာ မည်သည့်ဘက်မှ မလိုက်သည့် လူနှစ်ယောက်အကြား ပေါင်းသင်းဆက်ဆံရေးပြုလုပ်သည်ဟူသော သဘောထားထက် မပိုနိုင်ပေ။ မည်သူကမှ ဝမ်ထျန်းယောင်သည် ဟယ့်ယွင်ထင်၏ လက်ထဲမှ စစ်တပ်အာဏာနှင့် အင်ပါယာရှိ အတော်ဆုံးသော မက်ခါမောင်းနှင်သူများဖြင့် ဖွဲ့စည်းထားသည့် မက်ခါတပ်ဖွဲ့တစ်ခုအား တွက်ချက်အကြံထုတ်နေကြောင်း သိမမည်မဟုတ်ပေ။

"ကိုယ်သိပြီ" ဟယ့်ယွင်ထင် ပါးစပ်ဟလာသည်။ "ကျေးဇူးပါ... မစ္စတာလင်း"

လင်းဟန် ခေါင်းငြိမ့်ပြပြီးနောက် "ရပါတယ်"ဟုဆိုလိုက်သည်။ သူ ပြောချင်သည့် စကားများအားလုံး ပြောပြီးသွားပြီ ဖြစ်၍ ပြန်တော့မည် အပြုတွင် ဟယ့်ယွင်ထင် လှမ်းခေါ်လိုက်သည်ကို ကြားရပြန်သည်။

"လင်းဟန်" ဟယ့်ယွင်ထင် မျက်လုံးပင့်၍ ကြည့်လာပြီး ခပ်မှိုင်းမှိုင်းလေသံဖြင့် ပြောလာခဲ့သည်။

"မင်း စတုတ္ထအဆင့် လက်တွေ့လေ့ကျင့်မှုကို မလိုက်ချင်ရင် အဖွဲ့အစည်းကို စောစောပြန်လို့ရတယ်"

အဆုံးတွင် ထိုကဲ့သို့ အစဥ်အလာများ မရှိပါပေ။ လုအန်းဟယ် ထပ်ပေါင်းပြောလိုက်သည်။

"မစ္စတာလင်း စိတ်ပူစရာ မလိုပါဘူး... လက်တွေ့လေ့ကျင့်မှု စတုတ္ထအကျော့က အစွန်အဖျားဘက်မှာ လုပ်မှာ... ဒါပေမယ့် အဝေးက အကူအညီအတွက် စစ်သင်္ဘောပေါ်မှာ နေရုံပါပဲ"

လင်းဟန် ပြုံးလိုက်သည်။ "ကျွန်တော်ကို အခြေစိုက်စခန်းကနေ အထူးခေါ်ယူထားတာဆိုတော့ အလုပ်မပြီးဘဲ ပြန်စရာ အကြောင်း မရှိဘူးလေ... စိတ်မပူပါနဲ့... ကျွန်တော်က အဲ့ဒီလောက်ထိ မနုနယ်ပါဘူး"

ဟယ့်ယွင်ထင်က သူ့အား မျက်ဆံနက်နက်များဖြင့် လှမ်းကြည့်လာခဲ့သည်။

လင်းဟန်မှာ အကြောင်းအရင်းအချို့ကြောင့် ထိုအကြည့်ကို တွေ့သောအခါ အနည်းငယ် သတိချပ်မိသွားပြီး မတ်တပ်ရပ်ကာ နှုတ်ဆက်စကားပြောလိုက်သည်။

"ပြီးတော့ ဒုဗိုလ်မှုးလုပြောသလိုပဲ စစ်သင်္ဘောပေါ်မှာနေရင် လုံခြုံမှာပါ.. ဒါပေမယ့် ကျွန်တော် မသွားရင် အချို့မက်ခါတွေ ပြသနာပေါ်လာရင် ခင်ဗျားတို့ မဖြေရှင်းနိုင်တာမျိုးတွေ ရှိလာနိုင်တယ်"

သေချာပေါက်ပင် ဝမ်ထျန်းယောင်သည်လည်း ထိုနေရာတွင် ရှိနေမည် ဖြစ်ရာ အခွင့်အရေးကို အသုံးချ၍ ထိုအချိန်အတောအတွင်း သူ အမှန်တကယ် ကြံစည်ထားသည်များကို နားထောင်ရန် စီစဥ်ထားသည်။

သို့သော်လည်း လင်းဟန်က ထိုအကြောင်းအား ထည့်မပြောလိုက်ပါပေ။

"အင်း"တစ်ခဏအကြာ ဟယ့်ယွင်ထင် ပြောလာသည်။

"ဒါဆို စစ်သင်္ဘောပေါ် တက်တဲ့အခါ မစ္စတာလင်း ကိုယ့်နောက်ကို လိုက်ခဲ့သင့်တယ်... ကိုယ့်ရဲ့ မြင်ကွင်းကနေ ပျောက်မသွားစေနဲ့"

ဟယ့်ယွင်ထင် နောက်ဆုံးစာသားအား ပြောလိုက်သောအခါ လင်းဟန်တစ်ယောက် အမိန့်ပေးသည့် အရိပ်အယောင်တစ်ခုကို ကြားလိုက်ရသည်။

ယင်းက လူအများနှင့် စကားပြောဆိုသည့်အခါ သုံးလေ့ရှိသည့် အသံအနေအထား ဖြစ်ပြီး မတိုင်မီက လင်းဟန်၏ နားစည်အတွင်းသို့ ရောက်ရှိလာသည် အတွေးစကားများအားလုံးနှင့် လုံးဝ ကွဲပြားနေသည့် လူတစ်ယောက်အလားပါပင်။

သို့သော်လည်း လင်းဟန်က စိတ်မသက်မသာ ဖြစ်ခြင်းမျိုးမရှိပေ။ အဓိကအကြောင်းအရင်းမှာ ဟယ့်ယွင်ထင်၏ အခြားသောအသံများကို ကြားထားခြင်းကြောင့်ဖြစ်သည့်အပြင် သူ၏ အကြောင်းအရင်းကိုလည်း နားလည်နေခြင်းကြောင့် ဖြစ်သည်။ ထိုသူက သူ့အား မည်သည့် မတော်တဆမှုမျိုးကိုမှ မဖြစ်ပွားစေချင်၍သာပင်။ သူ ခေါင်းငြိမ့်ပြလိုက်သည်။

"ကောင်းပါပြီ"

အဆုံးတွင် လုအန်းဟယ်သည်လည်း ထိုနေရာတွင် ရှိနေဆဲဖြစ်ပြီး နောက်ဆုံးတစ်ခေါက်က ထိုသူတို့ လက်ကိုင်ထားကြသည့် မြင်ကွင်းမှာ ယခုထက်ထိ လတ်ဆတ်နေဆဲပင်။ ထို့ကြောင့် လင်းဟန် ဆက်မပြောတော့ဘဲ ဟယ့်ယွင်ထင်ကိုသာ နှုတ်ဆက်စကား ပြောလိုက်သည်။

ဘယ်လိုပဲဆိုဆို ဟယ့်ယွင်ထင် တွေးနေမဲ့အရာကို အကြမ်းဖျဥ်း ခန့်မှန်းနိုင်တာပဲလေ...

👾

ငါတို့ မခန့်မှန်းနိုင်ဘူးလေ 🥹🥹

Prev Next