MM Story Teller

Chapter 35

Viewers 3k

👾Chapter 35

ဂလင်းပျက်စီးနေတဲ့ အိုမီဂါ

တတိယအကျော့ စစ်ဆေးမှုက အတော်လေး ကြာရှည်ပြီး လဆုံးပိုင်းတွင် ရွေးချယ်ပွဲ၌ ပါဝင်ကြသော တပ်သားများအားလုံးက အားလပ်ရက် နေ့တစ်ဝက် ရကြသည်။

ပုံမှန်အားဖြင့် အားလပ်ချိန်များ၌ လူတိုင်းက အနားယူကြလေ့ရှိပြီး အချို့သော တပ်သားများ၏ ဆွေမျိုးများကမူ ဤအချိန်လေးတွင် သူတို့၏ ဂုဏ်ယူရသော မိသားစုဝင်များထံ လာရောက်လည်ပတ်ကြလေသည်။

အဆုံးတွင် နေ့တစ်ဝက်မျှသာ ဖြစ်ပြီး တပ်စခန်းအား လာလည်နိုင်ရန်အတွက် စာတင်ရသေးသည်။ ခွင့်ပြုချက်က အတော်လေး နှေးကွေးလှပြီး လုပ်ငန်းစဥ်ကလည်း ဒုက္ခများလှသဖြင့် အမှန်တကယ်တွင် လာလည်သူ သိပ်မများလှပေ။

ထိုနေ့တွင် လင်းဟန်တစ်ယောက် ချီကျားဇယ်ကို တွေ့လိုက်ရသည်။ ထိုသူက အလွန်ပိန်ပါးလှသော အိုမီဂါလေး ဖြစ်သည်။ ဆံပင်များကို သပ်သပ်ရပ်ရပ် ညှပ်ထားကာ သိပ်ပြီး အရပ်မရှည်လှဘဲ လက်ချောင်းသွယ်သွယ်လေးများက ဖြူဖျော့နေ၏။ သူ့မျက်နှာထက်တွင် အမူအရာတစ်ခုမှ ရှိမနေပေ။ တစ်စုံတစ်ခုကို တွေးတောနေသည့်အလား ခြေလှမ်းတိုင်းကို နှေးနှေးကွေးကွေး လျှောက်လာနေသော်ငြား မည်သည်ကိုမှ တွေးတောမနေပုံလည်း ရသည်။

လင်းဟန်က နောက်တစ်နေ့အတွက် မက်ခါအား အဆုံးသတ်ပြင်ဆင်မှု ပြုလုပ်နေရင်း တစ်စုံတစ်ယောက်က လေ့ကျင့်ကွင်း၏ အပြင်ဘက်မှ လူတစ်ယောက်ကို အော်ခေါ်နေသည်အား ရုတ်တရက် ကြားလိုက်ရသည်။

"အားဇယ်"

ချီကျားမူက အိုမီဂါလေးကို မြင်လိုက်ရသောအခါ လူအုပ်ကိုဖြတ်၍ အိမ်နာမည်လေးကို ခေါ်လိုက်ပြီး မျက်နှာကို မော့၍ ပြုံးပြကာ သူ့ဆီသို့ ရောက်လာရန် လက်ဟန်ခြေဟန် ပြနေသည်။

"ကိုကို ဒီမှာ"

ဤရက်များအတွင်း ချီကျားမူက သူနှင့် အချိန်နှင့်အမျှ စကားပြောနေခဲ့သည်ကြောင့် ဖြစ်မည်။ လင်းဟန်က ထိုသူ၏ အသံနှင့် တစ်နည်းတစ်ဖုံ ရင်းနှီးနေသဖြင့် မျက်လုံးပင့်ကြည့်လိုက်သည်။

လာလည်သူ အိုမီဂါလေးက အသံကြားသောအခါ လျှပ်စစ်ဓါတ်နှင့် တို့လိုက်သကဲ့သို့ တစ်ကိုယ်လုံး တောင့်တင်းသွားပြီးနောက် မိန်းမောနေသော အမူအရာဖြင့် ခေါင်းမော့လာပြီး အသံလာရာကို ရှာဖွေနေသည်။

"ကိုကို.." သူ့နှုတ်ခမ်းများ လှုပ်ရှားသွားကာ အသံတိုးတိုးဖြင့် ရေရွတ်လိုက်ပြီးနောက် ချီကျားမူ လက်ယမ်းပြနေသည်ကို တွေ့သွားလေသည်။

"အားဇယ် ဒီမှာ"

မူလက တည်ငြိမ်နေသော ချီကျားဇယ်၏ မျက်လုံးလေးများက ဝင်းလက်လာခဲ့ပြီး နှုတ်ခမ်းထောင့်လေးများ တဖြည်းဖြည်း ကော့တက်လာသည်။သူက အသက်ပြန်ဝင်လာသူ အတိုင်းပင် ခြေလှမ်းကို အရှိန်တင်ကာ အသံလာရာနေရာထံ လျှောက်လာနေခဲ့သည်။ အလျင်စလို ခြေလှမ်းများဖြင့် မပြေးရုံတမယ် ရောက်လာသဖြင့် အစ်ကိုဖြစ်သူ ရှေ့တင် လဲကျလုနီးပါး ဖြစ်သွားပြီး ချီကျားမူက လှမ်းထိန်းပေးလိုက်ရသည်။

လင်းဟန်မှာ မူလတွင် မည်သည်ကိုမှ မတွေးမိဘဲ ထိုညီငယ်လေးက ထိုင်းမှိုင်းလွန်းလှသည်ဟုသာ ခံစားလိုက်ရသဖြင့် အကြည့်လွှဲကာ မက်ခါထဲတွင် အလုပ်ဆက်လုပ်နေခဲ့သည်။

သို့သော်လည်း ပြန်လှည့်ကြည့်လိုက်သောအခါ အိုမီဂါငယ်လေး၏ ပိန်ပိန်ပါးပါး နောက်ကျောလေးကိုသာ တွေ့လိုက်ရသည်။ အစပိုင်းတွင် မူမမှန်သော အရာများကို မတွေ့ခဲ့ရသော်လည်း ပင်ကိုယ်အသိစိတ်မှ ထိုသူနှင့် ပတ်သက်ပြီး တစ်ခုခုမှားနေကြာင်း ပြောနေခဲ့သည်

ထို့အပြင် ချီကျားဇယ်က အစ်ကိုဖြစ်သူအား တစ်ခုခု ပြောပြနေသကဲ့သို့ နှုတ်ခမ်းလေးများကို ခပ်ဖြည်းဖြည်း လှုပ်ရှားနေခဲ့သည်။

လင်းဟန်က အာရုံစိုက်မှုများအား မဆွဲဆောင်မိရန်အတွက် စက်ခန်းထဲသို့ သွားကာ အဖုံးပိတ်ထားလိုက်သည်။ တစ်ချိန်လုံး နီးပါး လေ့ကျင့်ကွင်းမှာသာ အလုပ်များနေရသဖြင့် မည်သူကမှ သူ့အား သံသယ မဝင်ကြပေ။ လူတိုင်းက လင်းဟန်မှာ အလုပ်တွင် အင်မတန် တော်လှကြောင်း သိထားပြီး သူ့ထံသို့ ရောက်လာသော ပြသနာမှန်သမျှ အလွယ်တကူပင် ဖြေရှင်းနိုင်ခဲ့သည်ပင်။

လင်းဟန်က ခေါင်းဆောင်းကို ဆောင်းကာ မက်ခါကို အသက်သွင်းလိုက်ပြီးနောက် မြင်ကွင်းကို ချိန်ညှိလိုက်သည်။ သူက ညီအစ်ကိုနှစ်ယောက်အကြား ချစ်ခင်တွယ်တာဖွယ် တွေ့ဆုံမှုအား ချောင်းကြည့်ရန် ရည်ရွယ်ချက် မရှိပါသော်လည်း မြင်ကွင်းအား ချီကျားဇယ်နှင့် အနီးကပ်ဆုံး နေရာသို့ ရွှေ့လိုက်သည်။

သူ မရှင်းပြနိုင်ပါသော်လည်း ထိုသူထံမှ ထွက်လာသည့် စိတ်မသက်မသာ ခံစားချက်တစ်ခု ရရှိနေသည်။

လင်းဟန်က စိတ်ထဲတွင် ညီဖြစ်သူကို ထိုသို့ စစ်ဆေးမိနေသည့်အတွက် ချီကျားမူအား တောင်းပန်စကားဆိုလိုက်ပြီးနောက် မြင်ကွင်းထဲ၌ ချီကျားဇယ်၏ လှုပ်ရှားမှုတိုင်းကို တွေ့နိူင်ရန်အတွက် မြင်ကွင်းချဲ့သည့် လုပ်ဆောင်မှုကို ဖွင့်လိုက်၏။

ချီကျားဇယ်က အသက်နှစ်ဆယ်ထက် ကြီးပုံ မပေါ်ဘဲ ဆံစဖျားလေးများက အနည်းငယ် အရောင်လွင့်နေကာ ၎င်းက အနက်ရောင် ဆံပင်များသာ ဖြစ်သော်ငြား ချူချာလှသည့် အရိပ်အယောင်များ ပေါ်လွင်နေသည်။

လင်းဟန်မှာ ညီအစ်ကို နှစ်ယောက် ပြောနေသည့် စကားကို မကြားရပါသော်ကြား ထိုနှစ်ယောက်အကြား စကားဝိုင်းက တစ်စုံတစ်ရာ ထူးဆန်းနေကြောင်း ခံစားမိနေသည်။

ချီကျားဇယ်က စကားစပြောလေ့ မရှိဘဲ အကြိမ်တိုင်းတွင် တစ်ဖက်လူက စကားအရှည်ကြီး ပြောပြီးမှသာ ခေါင်းငြိမ့်ခေါင်းခါ လုပ်ပြီးနောက် စကားပြောတတ်သည်။

မည်သည့် ထူးဆန်းမှုမှ ရှာမတွေ့သည့် လင်းဟန်က တစ်ပါးသူအား သံသယလွန်ကဲမိနေလေပြီဟု တွေးမိသဖြင့် မြင်ကွင်းကို ပြန်လှည့်တော့မည် အပြုတွင်...

ချီကျားဇယ်က သတိပေးခြင်းအလျင်းမရှိဘဲ ရုတ်တရက် လှည့်လာပြီး လင်းဟန်၏ မက်ခါရှိရာသို့ တည့်တည့်စိုက်ကြည့်လာလေသည်။

စိုက်ကြည့်ခံလိုက်ရသည် ခံစားချက်က လင်းဟန်၏ နှလုံးသားကို တုန်လှုပ်သွားစေခဲ့သည်။

သူက ခေါင်းဆောင်း ဆောင်းထားသည့်အပြင် မက်ခါထဲတွင် ရှိနေပြီး မြင်ကွင်းမျက်နှာပြင်နှင့် ကာထားသဖြင့် ချီကျားဇယ် သူ့အား မြင်တွေရန် မဖြစ်နိုင်ပေ။ အများဆုံး မက်ခါ၏ တစ်ဖက်ကို တွေ့နိုင်ရုံသာ...

ချီကျားဇယ်၏ မျက်လုံးများက မှုန်မှိုင်းနေပြီး မျက်ဆံများက သာမန်လူထက် သေးငယ်နေသဖြင့် သူ့အား ကြည့်မိသူတိုင်းကို မသက်မသာ ဖြစ်သွားစေနိုင်သည်။

သို့သော်လည်း လင်းဟန်၏ မက်ခါကို နှစ်စက္ကန့်မျှသာ စိုက်ကြည့်လိုက်ပြီးနောက် ပြန်လှည့်သွားပြီး ချီကျားမူနှင့် စကားပြော၍ ပြီးသွားသည့်အလား တပ်စခန်းထဲမှ တစ်လှမ်းချင်း လှမ်းထွက်သွားလေသည်။

လင်းဟန်၏ နှလုံးသားက တုန်ခါနေပြီး အကြောင်းအရင်းမရှိ စိတ်လှုပ်ရှားနေပါသော်လည်း ထွက်သွားပြီ ဖြစ်သော ချီကျားဇယ်၏ နောက်ကျောကို စိုက်ကြည့်နေမိပြန်သည်။

ထိုသူက တူညီသော ခြေလှမ်း အကွာအဝေးဖြင့် နှေးကွေးစွာ လျှောက်လှမ်းနေပြီး လက်များကိုတူညီသော ပုံစံအတိုင်း လွှဲယမ်းနေလေရာ... ညွှန်ကြားချက်များဖြင့် ပရိုဂရမ်ရေးခံထားရသော စက်တစ်ခုအလားပင်...

ချီကျားဇယ် လေ့ကျင့်ကွင်းထဲမှ ထွက်သွားသောအခါ လင်းဟန်တစ်ယောက် ထူးဆန်းနေရသည့် ရင်းမြစ်နေရာကို ရှာတွေ့သွားခဲ့သည်။

ထိုသူ၏ ဆံပင်များက အနည်းငယ် ရှည်နေပြီး သေသေချာချာ ပြင်ဆင်ထားခြင်း မရှိသော်လည်း လင်းဟန်ကမူ ထိုသူ၏ ဂုတ်ပိုးကို တွေ့လိုက်ရသည်။

ယင်းမှာ ထိုသူ၏ ဂလင်းနေရာ ဖြစ်ပုံရသည့် နက်ရှိုင်းလှသော အမာရွတ်ဟောင်းကြီးပါပင်...

လင်းဟန် အခန်း ပြန်ရောက်သည်အထိ ထိုကောင်လေးအား မမေ့နိုင်ခဲ့ပေ။ ဂလင်းထက်မှ အမာရွတ်သည်သာမက ကျုံ့ဝင်နေသော မျက်ဆံများ၊ တောင့်တင်းနေသော အမူအရာ၊ အများနှင့်မတူသော လမ်းလျှောက်ဟန်တို့အားလုံးက လင်းဟန်အား သံသယ ဝင်လာစေခဲ့သည်။

ဒီအိုမီဂါလေးက ပြန်မကောင်းနိုင်လောက်တဲ့အထိ ဂလင်းထိခိုက်သွားလို့ ခွဲစိတ်မှု ခံယူထားရတာလား...

သို့သော်လည်း လင်းဟန် အမာရွတ်အား ရှင်းရှင်းလင်းလင်း တွေ့လိုက်ရသဖြင့် လတ်တလောတွင် ထိခိုက်ထားသည့် ဒဏ်ရာလည်း မဟုတ်ခဲ့ပါပေ။ ယင်းက ပိုင်ရှင်နှင့် နှစ်ပေါင်းများစွာတိုင် အတူရှိခဲ့သည့် ပုံပေါ်နေကာ ဒဏ်ရာကလည်း ဖယ်ရှားလိုက်ရန်အတွက် နက်လွန်းနေသည်။

အိုမီဂါလေးက ပိန်ပါး၍ ကျိုးပဲ့လွယ်နေကာ လုံးဝ ချိန်းခြောက်နိုင်သည့်ပုံ မပေါ်ပေ။

လင်းဟန်မှာ ပထမဆုံးအကြိမ် ဟယ့်ယွင်ထင်နှင့် တွေ့ဆုံခဲ့ရစဥ်က ထိခိုက်ဒဏ်ရာ ရနေသည့် ညာဘက်လက်မောင်းကို တမင်တကာ ပြင်းပြင်းထန်ထန် ဝင်တိုက်သွားခဲ့သည့် စားပွဲထိုးကို အမှတ်ရမိသွားသည်။ ထိုသူကလည်း ရန်မူလိုသည့်ပုံမပေါ်ဘဲ သာမန်လူထက်ပင် ပိန်ပါးနေသေးသည်။

ဝမ်ထျန်းယောင်၏ ညစာစားပွဲတွင်လည်း ဟယ့်ယွင်ထင် ကာပေးထားခဲ့သဖြင့် အခင်းဖြစ်ရာနေရာကို မတွေ့ခဲ့ရပေ။ သူ၏ သံသယများ နက်ရှိုင်းလာပြီး ဟယ့်ယွင်ထင် လုပ်ကြံခံရသည့်နေ့က သတင်းများကို ရှာကြည့်မိသွားသည်။

သို့သော်လည်း စုပုံနေသော ဆောင်းပါးများအကြား အခင်းဖြစ်ရာမြင်ကွင်းဓါတ်ပုံတစ်ပုံတလေမှ မတင်ထားပေ။ မီဒီယာ သတင်းတိုက်တစ်ခုစ နှစ်ခုစက ပြစ်မှုကျူးလွန်သူက ဗြုန်းစားကြီး ပေါ်လာသည့်အကြောင်းကိုသာ ရေးသားထားသည်ကို တွေ့လိုက်ရသဖြင့် အံ့သြသွားခဲ့ရသည်။

လင်းဟန်က အလင်းမျက်နှာပြင်ထက်မှ ဆောင်းပါးကို ကြည့်လိုက်မိသည်။ လုပ်ကြံသူမှာ အိုမီဂါတစ်ယောက် ဖြစ်ပြီး ပိန်ပါးသွယ်လျကာ သန်ရှင်းသပ်ရပ်သူပင်...

လည်ဂုတ်ပေါ်မှ ဒဏ်ရာအကြောင်းသည်ကား.... လင်းဟန် သိနိုင်မည့် နည်းလမ်း မရှိပေ။

လင်းဟန်မှာ ယခုလက်ရှိတွင် ဖြစ်ပေါ်နေသည့် မသက်မသာ ခံစားချက်ကြီးအား မည်သို့ ရှင်းပြရမည်ကို မသိတော့ပေ။ ထူးဆန်းသော ခံစားချက်ကြီးကိုသာ ခံစားနေရသည်။

*****

ထိုနေ့ပြီးနောက် ပထမနေရာ ရနေပြီးသား ဖြစ်သော ချီကျားမူမှာ ပို၍ ရမ်းကားကြမ်းတမ်းလာပုံ ရသည်။

အချို့လူများက ပြောကြသည်မှာ ချီကျားမူက နေ့တိုင်းတွင် အာရုံမတက်မီအချိန်၌ လေ့ကျင့်ကွင်းသို့ တစ်ဦးတည်း ရောက်လာတတ်သည်။ မနက်ပိုင်း လေ့ကျင့်ရေးအချိန်များမှာ လူတိုင်းထက် ပိုကြာရှည်ကာ စစ်ဆေးမှုလုပ်သည့် တစ်နေ့လုံးတွင်လည်း မည်သည်ကိုမှ လွဲချော်သွားခြင်း မရှိဟု ဆိုကြသည်။ တိုင်းတာမှုတိုင်းက ထိုသူ၏ ပြီးပြည့်စုံမှုများကို ပြသနေကာ လေ့ကျင့်ရေးပြီးဆုံးသည့်အချိန်တွင်လည်း နောက်ဆုံးထိ ကျန်နေသူ ဖြစ်သည်။

အချို့သူများကမူ ဇဝေဇဝါ ဖြစ်နေကြသည်။ ရွေးချယ်မှုအတွင်း ပထမရနေပြီးသည့်တိုင် မည်သည့်အတွက်ကြောင့် ဟယ့်ယွင်ထင်၏ လက်ရွေးစင်အဖွဲ့အား ဝင်နိုင်ရန်အတွက် ထိုမျှလောက် အားသွန်ခွန်စိုက် ကြိုးစားနေရသနည်း ဟူ၍ပင်။ ထိုသို့ဆိုလျှင်တောင် မနာလိုကြသူများက သူ၏ မက်ခါအား အမျိုးမျိုး နှောက်ယှက်ကြသော်လည်း ချီကျားမူကမူ စကားတစ်ခွန်းမှ မပြောဘဲ အားလုံးကို သည်းခံနေပြီး စစ်ဆေးမှုတိုင်းကို ကျော်ဖြတ်ရန် အပြင်းအထန် ကြိုးစားနေခဲ့သည်။

တတိယနေ့တွင် တစ်စုံတစ်ယောက်က ချီကျားမူ၏ မက်ခါမှ အသံဖြင့် အမိန့်ပေးသည့် ပရိုဂရမ်အား ဖျက်ဆီးမိလိုက်သဖြင့် လင်းဟန်သည်လည်း ထိုသူ၏ မက်ခါအား ပြင်ပေးရန် အခွင့်အရေး ရလာခဲ့သည်။

"မစ္စတာလင်း... ကျေးဇူးပြုပြီး"

ချီကျားမူက သူစက်ခန်းသို့ ရောက်လာသည်ကို မြင်သောအခါ တယဥ်တကျေး ဆိုလိုက်ပြီးနောက် ထရပ်လာသည်။ ချီကျားမူက စက်ခန်းမှ ထွက်ကာ လင်းဟန်အား နေရာပေးတော့မည်အပြုတွင် ပြန်ခေါ်ခံလိုက်ရသည်။

လင်းဟန် ပြောလိုက်သည်။

"ပြသနာသေးသေးလေးပါ... ထွက်သွားစရာ မလိုဘူး... မိနစ်နည်းနည်းလောက်ဆို ပြီးပြီ"

ချီကျားမူ ပြုံးကာ လက်များကို တစ်နေရာတည်းတွင် ထား၍ နာနာခံခံ ထရပ်လိုက်ပြီးနောက် လင်းဟန် ပြုပြင်နေသည်ကို စောင့်နေခဲ့သည်၊

"ကောင်းပါပြီ"

လင်းဟန်၏ မျက်ခုံးများ စုကြုံ့သွားပြီး အကြောင်းအရင်းမရှိဘဲ စိတ်လှုပ်ရှားလာခဲ့သည်။

သူက ပြသနာကို လျင်မြန်စွာ ဖြေရှင်းနေပြီး ချီကျားမူကလည်း တလျှောက်လုံးတွင် စကားတစ်ခွန်းမှ ဝင်မပြောခဲ့ပေ။ သို့သော်လည်း အနည်းဆုံးတော့ လင်းဟန်က ဤရက်များအတွင်း ထိုသူနှင့် မကြာခဏ အဆက်အဆံ ရှိလေရာ ပြသနာကို အလျင်အမြန် ဖြေရှင်းလိုက်ပြီးနောက် မက်ခါ၏ ကိုယ်တိုင်စမ်းသပ်စနစ်ကို ဖွင့်ကာ နူးညံ့စွာ ပြောလိုက်သည်။

"လွန်ခဲ့တဲ့ နှစ်ရက်က ကောင်လေးက... မင်းရဲ့ ညီလေးလား"

လင်းဟန်က ချီကျားမူ၏ လက်များ တင်းတင်းဆုပ်သွားသည်ကို အသေအချာ လေ့လာနေပြီး တစ်ခဏအကြာမှသာ သူ့အသံက ချုပ်ထိန်းထားသော လေသံဖြင့် ထွက်ပေါ်လာသည်။

"ဟုတ်... တစ်ခုခု ဖြစ်လို့လား... မစ္စတာလင်း" သူက စိတ်ကသိကအောက် ဖြစ်ဟန်ဖြင့် မေးလိုက်သည်။

"ဘာမှ မဟုတ်ပါဘူး" လင်းဟန်က စကားစမြည် ပြောနေသည့်အလား သာမန်ကာလျှံကာ ပြောလိုက်သည်။ "ကြည့်ရတာ မင်းရဲ့ ညီလေးက နေသိပ်မကောင်းသလိုပဲ"

ချီကျားမူ၏ အသံများ တင်းကြပ်သွားလေသည်။ "သူက ကလေးဘဝကတည်းက နေမကောင်းဖြစ်နေတာ... သူ့ကို မတွေ့ရတာ တော်တော်ကြာနေပြီ... ဗဟိုကြယ်ကို ကျောင်းလာတက်ကတည်းကပဲ"

"သြော်" လင်းဟန်က လက်တန်းပင် ပြောလိုက်သည်။ "ဆေးကုသမှု မခံယူဘူးလား"

"ဟုတ်" ချီကျားမူ အလျင်အမြန် ပြောလိုက်သည်။

"ကျွန်တော်တို့ ဆေးကုပါတယ်... မစ္စတာလင်း"

လင်းဟန်က မက်ခါအား ပြန်ပြင်ပေးလိုက်ပြီးနောက် တစ်ဖက်လူက ဖြေချင်စိတ် မရှိကြောင်း နားလည်နေသည့်အတွက် ထရပ်လိုက်သည်။

"ကောင်းတာပေါ့... မင်းရဲ့ ညီလေး အမြန်ဆုံး နေပြန်ကောင်းပါစေ"

ယင်းက ရိုးရှင်းသော စကားလေးတစ်ခွန်းသာ ဖြစ်သော်လည်း လင်းဟန် ထိုသို့ ပြောသည်ကို ကြားလိုက်ရသောအခါ ချီကျားမူက စိတ်ခံစားချက်များကို ထိန်းချုပ်နေရသည့်အလားမျက်လုံးများကို ပြင်းပြင်းထန်ထန် စုကျုံ့သွားလိုက်ပြီး အသက်ပြင်းပြင်းရှူလိုက်သည်။

လင်းဟန်အား စကားပြောရန်အတွက် ထပ်မံမော့ကြည့်လာသောအခါ မျက်လုံးထောင့်များ၌ ဖိနှိပ်ထားသော အနီစွေးစွေး အရောင်များ ထင်ဟပ်လာနေသည်။

"ကျေးဇူးပါ မစ္စတာလင်း"

လင်းဟန်၏ လက်များက တစ်ဝက်တပျက်တွင် ရပ်တန့်သွားပြီးနောက် တဖြည်းဖြည်း ပြန်ရုတ်လိုက်သည်။

"ရပါတယ်"

သူက သူ၏ စွမ်းရည်ကို သုံးကာ ညီအစ်ကိုနှစ်ယောက် ပြောခဲ့သော စကားများကို နားထောင်ရန် ကြိုးစားခဲ့မိသည်။

သို့သော်လည်း ချီကျားမူ၏ မျက်လုံးများက လွန်စွာ ရိုးသားပုံပေါ်နေပြီး ထိုနေ့က သူ၏ အမူအရာမှာ လွန်စွာ ဝမ်းနည်းရိပ်သန်းနေခဲ့သည်ကြောင့် ဖြစ်မည်။

လင်းဟန်တစ်ယောက် အပြစ်ရှိစိတ်လေး ဝင်လာခဲ့ရသည်။ အခြားသူတစ်ယောက်၏ နာကျင်မှု ဖြစ်နေသည့်တိုင် ခွင့်ပြုချက်မရှိဘဲ ဝင်မစွက်ဖက်သင့်ပေ။

လေ့ကျင့်ရေးပြီးနောက် လင်းဟန်တစ်ယောက် ဟယ့်ယွင်ထင်အား သွားရှာလိုက်သည်။

ဤရက်များအတွင်း သူက ညွှန်ကြားရေးအခန်းနှင့် ဟယ့်ယွင်ထင်၏ အခန်းထဲသို့ မကြာခဏ သွားလေ့ရှိသည်။ တပ်စခန်းမှ လူများစွာက မစ္စတာလင်းမှာ ဗိုလ်ချုပ်ကိုယ်တိုင် ခေါ်ယူထားသည့် ပညာရှစ်ယောက် ဖြစ်၍ ကွဲပြားစွာ ဆက်ဆံပေးခြင်း ဖြစ်ကြောင်း ဆွေးနွေးနေကြသည်။

လင်းဟန်မှာ ထိုမှတ်ချက်များကို အမှုမထားဘဲ ဟယ့်ယွင်ထင်ရှေ့တွင် ရပ်ကာ လွန်ခဲ့သည့် နှစ်ရက်အတွင်း သူ့အား အနှောက်အယှက် ပေးနေခဲ့သည့် မေးခွန်းကို မေးလိုက်သည်။

"ကျွန်တော့်မှာ မေးစရာ ရှိပါတယ် ဗိုလ်ချုပ်"

လုအန်းဟယ်က အပြင်ထွက်၍ အစားသွားစားသဖြင့် အခန်းထဲတွင် ဟယ့်ယွင်ထင်တစ်ယောက်သာ ကျန်ရှိနေပြီး အပေါ်ဝတ်ကုတ်အင်္ကျီကို ပြန်ချလိုက်ပြီးနောက် လှည့်ဖြေလိုက်သည်။

"ဘာမေးချင်တာလဲ"

လင်းဟန်မှာ သူမေးလိုသည်ကို တန်းမေးချင်နေပါသော်လည်း ပါးစပ်ဖျားမှ စကားများ ထွက်ကျလာသောအခါ "ဗိုလ်ချုပ်ရဲ့ ပုခုံးဒဏ်ရာ... ဘယ်လိုနေသေးလဲ"ဟု အဆုံးသတ်သွားရသည်။

ဟယ့်ယွင်ထင်မှာ လင်းဟန်၏ အမေးစကားများက ထိုသို့ ဖြစ်နေမည်ဟု ထင်မှတ်မထားသည်ထင်။ တစ်ခဏမျှ တုံ့ဆိုင်းသွားလေ၏။

"ပျောက်လုနီးပါး ဖြစ်ပါပြီ"

နှစ်စက္ကန့်အကြာ တစ်စုံတစ်ခုအား တွေးမိသွားပုံဖြင့် တောင့်တင်းစွာပင် ထပ်ပေါင်းပြောလိုက်သည်။

"စိတ်ပူပေးလို့ ကျေးဇူးပါ မစ္စတာလင်း"

မည်သိုပင် ဆိုစေကာမူ အဖြေက အတော်လေး ကောင်းသဖြင့် လင်းဟန်တစ်ယောက် စိတ်သက်သာရာရစွာဖြင့် သက်ပြင်းချလိုက်သည်။

"ဒါဆိုရင် အရင်တစ်ခေါက်က ဗိုလ်ချုပ်ကို လုပ်ကြံဖို့ ကြိုးစားခဲ့တဲ့သူကလေ... အချက်အလက်တွေ သိရပြီလား... သူကလေ... လည်ပင်းနောက်မှာ ဂလင်းဖျက်ဆီးခံထားရတဲ့ပုံ ရှိလား"

ဟယ့်ယွင်ထင် တစ်ခဏမျှ မျက်လုံးပင့်ကြည့်လိုက်ပြီးနောက် အေးစက်နေသည့်ပုံစံသို့ အလျင်အမြန် ပြောင်းလဲသွားလေသည်။

"ဟုတ်တယ်.. မစ္စတာလင်းက ဘယ်လိုသိတာလဲ"

လင်းဟန်တစ်ခဏမျှ တုံ့ဆိုင်းနေသေးသော်လည်း ဟယ့်ယွင်ထင်အား ယနေ့ သူမြင်ခဲ့ရသည်ကို အကြမ်းဖျဥ်း ပြောပြလိုက်သည်။

"ကျွန်တော်လည်း ထူးဆန်းနေတယ်ထင်လို့ အရင်တစ်ခေါက်တုန်းက ဗိုလ်ချုပ်မှာ ဖြစ်သွားခဲ့တာတွေကို တွေးမိသွားလို့လေ...ဒါကြောင့် ကျွန်တော် လာပြောတာ" လင်းဟန် ပြောလိုက်သည်။

'"ဗိုလ်ချုပ်ကရော အဲ့ဒီလိုပုံစံနဲ့ အိုမီဂါအကြောင်းကို သိလား"

ဤတစ်ကြိမ်၌ ဟယ့်ယွင်ထင်တစ်ယောက် အကြာကြီး တိတ်ဆိတ်သွားလေသည်။

လင်းဟန်မှာ ဟယ့်ယွင်ထင်တစ်ယောက် ပြန်စဥ်းစားနေခြင်း ဖြစ်မည်ဟု တွေးမိသွားပြီး မနှောက်ယှက်လိုက်သော်လည်း အချိန်အတော်ကြာ တိတ်ဆိတ်သွားပြီးမှ ဟယ့်ယွင်ထင် ပြန်ဖြေလာခဲ့သည်။

"ကိုယ် သိတယ်... ဒါပေမယ့် နောက်ထပ် စစ်ဆေးဖို့ နည်းလမ်း မရှိဘူး"

လင်းဟန်မှာ ဟယ့်ယွင်ထင်ဘက်မှ ခိုင်မာသော အဖြေတစ်ခု ပေးလာမည်ဟု မထင်ထားခဲ့ပေ။

"ဘာလို့ ဖြစ်ရတာလဲ"

ဒီလို ပျက်စီးနေတဲ့ ဂလင်းတွေနဲ့ အိုမီဂါတွေ ဘယ်လောက်တောင် ရှိနေသေးတာလဲ... သူတို့ဘာတွေ ကြုံတွေ့ခဲ့ရတာလဲ...

ဟယ့်ယွင်ထင်၏ အမူအရာက မပြောင်းလဲသော်လည်း အသံအနေအထားကမူ ပို၍ပင် အေးစက်လာလာခဲ့သည်။

"စစ်ဘက်ဆိုင်ရာ လျှို့ဝှက်ချက်တွေမို့ ပြောပြလို့မရဘူး မစ္စတာလင်း... တောင်းပန်ပါတယ်"

👾

Prev Next