MM Story Teller

Chapter 47

Viewers 3k

👾Chapter 47

အားဇယ်

ဝမ်ထျန်းယောင်သည် စိတ်မတည်မငြိမ် ဖြစ်လာမိသည်။ ဒူးများက ပျော့ခွေလာပြီး တုံ့ပြန်မှု တစ်စုံတစ်ရာ မရှိပါဘဲ ခြေတစ်လှမ်း ဆုတ်လိုက်သော်ငြား သမာဓိ ထိန်းထားနိုင်သေးသည်။ ဝမ်ထျန်းယောင် အလျင်အမြန် ဆိုသလို ခြေခိုင်ခိုင် ထားလိုက်သည်။

"ဗိုလ်ချုပ်က ဒီနေရာမှာ ပြောင်မြောက်လှတဲ့ ကွပ်ကဲသူပဲလေ... တကယ်လို့သာ ထွက်သွားပြီး ပြန်မလာနိုင်ခဲ့ရင် ကျွန်တော်တို့ ဘာလုပ်ကြရတော့မှာလဲ"

“ဒိုင်းကာတွေကို အထူဆုံးထိ ဖွင့်ထားလိုက်... အဓိက လက်နက်ကိုလည်း စွမ်းအင်ချွေတာဖို့အတွက် လျှပ်စစ်သံလိုက်အမြောက်တွေဆီကနေ ကျည်ဖူးအမြောက်တွေဆီကို ပြောင်းလိုက်"

ဟယ့်ယွင်ထင်က ယဲ့လင်အား အမိန့်ပေးနေစဥ်မှာပင် ကော်လံအတွန့်အခေါက်လေးများကိုပင် ချောချောမွေ့မွေ့ ပြန်ဖြေလိုက်သေးသည်။

"အရှင်မင်းသားက ကျွန်တော်နဲ့အတူ ထွက်တိုက်ချင်လား... ဒါမှမဟုတ် အားလုံးကို ခုန်မှတ်နေရာမှာပဲ ပိတ်မိနေပြီးတော့ ဇာဂ်တွေအတွက် ကိုယ့်ကိုယ်ကိုယ် ပွဲတော်ဆက်ခွင့်ပြုလိုက်မှာလား"

ထိုသူ၏ မျက်နှာထက်ရှိ အမူအရာများကမပြောင်းလဲသော်ငြား ဟယ့်ယွင်ထင်အား သိနေကြသည့် ထိုနေရာတွင် ရှိနေကြသူများမှာ ထိုကဲ့သို့ ခံရခက်စေသော စကားများ ပြောထွက်လာခြင်းက ဝမ်ထျန်းယောင်အား အလွန်အမင်း ဒေါသထွက်နေလေပြီဟု ဆိုလိုကြောင်း သိနေကြသည်။

သိသိသာသာပင် ဝမ်ထျန်းယောင်ကလည်း တုံးအသူမဟုတ်သဖြင့် တစ်ခဏမျှ မပျော်မရွှင် ဖြစ်သွားသော်လည်း အမူအရာကို ထိန်းသိမ်းရန် ကောင်းကောင်းမွန်မွန် လုပ်ဆောင်နိုင်ခဲ့သေးသည်။

"ဒါဆို ကျွန်တော် ဘာကူညီပေးနိုင်မလဲ... တခြားဟာထားလိုက်ဦး... မစ္စတာလင်းလို အိုမီဂါတစ်ယောက်က မက်ခါ မမောင်းနိုင်ရင် စစ်သင်္ဘောထဲမှာပဲ နေခဲ့သင့်တာလေ"

“ကျွန်တော် သိရသလောက် အရှင်မင်းသားက သင်္ဘောတက်တဲ့အချိန်မှာ ကိုယ်ပိုင်အစောင့်အရှောက်တွေ ခေါ်လာတဲ့အပြင် မင်းသားရဲ့ ကိုယ်ပိုင်မက်ခါကိုလည်း သယ်လာခဲ့သေးတယ်မလား"

ဟယ့်ယွင်ထင် ပြောလိုက်သည်။ "အဲ့ဒီအချိန်ကျရင် မင်းသားကို ဘယ်သူကမှ ကာကွယ်ပေးနိုင်မှာ မဟုတ်လို့ အဲ့ဒီလူတွေကို အနားမှာ ကာကွယ်ပေးခိုင်းထားပြီး အရှင့်ရဲ့ မက်ခါထဲမှာပဲ ကောင်းကောင်း နေဖို့ အရှင်မင်းသားကို တောင်းဆိုချင်ပါတယ်"

ဝမ်ထျန်းယောင် အရွယ်ရောက်လာချိန်၌ ရရှိခဲ့သော ထိုမက်ခါမှာ ထိုအချိန်က ထိပ်တန်းစာရင်းတွင် ပါဝင်ခဲ့သည်။ အရှင်မင်းသား၏ မက်ခါမှာ ဘက်စုံသုံးမက်ခါတစ်ခု ဖြစ်သော်လည်း တိုက်ခိုက်ရေး၊ အကွာအဝေးနှင့် ခုခံရေးများတွင် အသေအချာ လုပ်ဆောင်ထားသော မက်ခါများနှင့် နှိုင်းယှဥ်ပါက နယ်ပယ်တိုင်း၌ ထူးချွန်သည်မဟုတ်ပေ။ သို့တည်းမဟုတ် အခြားနည်းလမ်းတစ်ခုလို အသုံးပြုလျှင် အသုံးမဝင်နိုင်ပေ။ သို့သော်ငြား တိုက်ပွဲဝင်ရန် မလိုအပ်သူများအတွက်မူ ၎င်းက လုံလောက်ပေသည်။

"ဒါပေမယ့်" ဝမ်ထျန်းယောင်က တစ်ခုခု ပြောချင်နေခဲ့သေးသည်။

"မစ္စတာလင်းက တိုင်းပြည်ရဲ့ အတော်ဆုံး မက်ခါ ပညာရှင်ပဲ" ဟယ့်ယွင်ထင်မှာ ထိုသူအား နောက်ထပ် အာရုံမစိုက်ချင်တော့သကဲ့သို့ အပြည့်တစ်ချက်သာ ပေးလိုက်ပြီး လင်းဟန်ကိုသာ ပြန်ကြည့်လိုက်သည်။

အခြားသူများက ဂရုစိုက်ရန် အချိန်မရှိသဖြင့် အကာအကွယ်အတွက် သူ့ကိုယ်သူသာ အားကိုးရပေတော့မည်။

သူက အဖြေအား စောင့်ဆိုင်းနေဆဲပင်။

စစ်သင်္ဘောကြီးက တဖြည်းဖြည်း မြင့်တက်လာနေသည်။ အကာအကွယ်ဒိုင်းကာများနှင့် အဓိကတိုက်ခိုက်ရေးလက်နက်ကို ဖွင့်လိုက်သဖြင့် သင်္ဘောကြီးတစ်ခုလုံး ယိမ်းခါသွားသည်။ အင်ဂျင်များကြောင့် အဝါရောင် သဲများ လွင်ခါလာကာ မြင်ကွင်း၏ တစ်ဝက်ကို ဖုံးလုနီးပါးပင်။

“ကျွန်တော် ခင်ဗျားနဲ့ လိုက်ခဲ့မယ်" လင်းဟန်မှာ ဟယ့်ယွင်ထင်အား အကြာကြီး မစောင်ဆိုင်းစေခဲ့။

"ဗိုလ်ချုပ်က ကျွန်တော့်ရဲ့ လုံခြုံရေးကို အထူးတလှယ် ကာကွယ်ပေးစရာ မလိုပါဘူး... ရန်သူကို ချေမှုန်းတဲ့နေရာမှာပဲ အာရုံစိုက်ထားပါ"

ဟယ့်ယွင်ထင်၏ စိတ်မရှည်မှုများ ပြေလျော့သွားပြီး မျက်ခုံးများက အမူအရာမဲ့ ရှိနေသော်လည်း အသံကမူ အနည်းငယ် ပြေလျော့သွားသည်။ သူက တစ်ခုခု လုပ်ချင်နေသည့်အလား လက်ကို မြှောက်လိုက်သော်ငြား အဆုံးတွင် လက်ပြန်ရုတ်ကာ ပြောလိုက်သည်။

"ကောင်းပြီ"

အမိန့်ရရှိပြီးနောက် စစ်သင်္ဘောကြီး၏ အနိမ့်ပိုင်းအဆင့်များက အရေးပေါ် လုပ်ဆောင်ချက်များကို စတင်အသက်သွင်းလိုက်ပြီး M2742သာမက မည်သည့် လုပ်ဆောင်ချက် မည်သည့် အဆင့်မဆို သင်္ဘောပေါ် ရှိနေဆဲ ဖြစ်သော မက်ခါများကို ပြင်ဆင်ဆောင်ရွက်လေသည်။ မည်သူကမှ သူတို့အား လေ့ကျင့်ရန် အချိန်မပေးတော့ဘဲ လက်တစ်ကမ်းအလို ရောက်လာပြီ ဖြစ်သော စစ်ပွဲက ကျင့်သားရအောင် တွန်းအားပေးနေတော့သည်။

ဟယ့်ယွင်ထင်က ယဲ့လင်နှင့် လုအန်းဟယ်တို့အား အမိန့်များ ပေးခဲ့သည်။ လုအန်းဟယ်က သူနှင့် အချိန်အကြာကြီး အတူရှိခဲ့သဖြင့် ရှင်းပြစရာမလိုဘဲ ကိစ္စတော်တော်များများကို နားလည်နေသဖြင့် စကားလုံးအမြောက်အများ ချွေတာနိုင်ပေသည်။

"အတိုချုပ် ပြောရင် ခုန်ကူးအမှတ်မှာ စွမ်းအင် ကုန်ဆုံးမှုကို အနိမ့်ဆုံးဖြစ်အောင် လုပ်ထား... P-1အဏုမြူ ရောင်ခြည်အမြောက်ကို လောင်စာဖြည့်ဖို့ စွမ်းအင် အလုံအလောက် ရှိအောင် လုပ်ထားပါ" ဟယ့်ယွင်ထင် အဆုံးတွင် အမိန့်ပေးလိုက်သည်။ "နောက်ဆုံးအနေနဲ့..."

"အင်ပါယာကို တပ်ကူလွှတ်ပေးဖို့ စာပို့ထားပြီးပြီ... ဒါပေမယ့် အရှိန်အပြည့်နဲ့ လာရင်တောင် ခုန်ကူးအမှတ်ကိုရောက်ဖို့ အချိန်က အရမ်း ကြာလိမ့်မယ်"

ဟယ့်ယွင်ထင်က မြင်ကွင်းထက်သို့ နီးကပ်လာနေဆဲ ဖြစ်သော ကြီးမားသော စက်တပ် သဲပိုးကောင်ငါးကောင်ကို မော့ကြည့်လိုက်ပြီး လုအန်းဟယ်အား ပြောနေရင်းဖြင့် အသံတိမ်ဝင်သွားသည်။

"လူတစ်ယောက်ကို တကယ် မကယ်နိုင်တော့ဘူးဆိုရင် သွားမကယ်နဲ့တော့... မှတ်ထား... ငါတို့ရဲ့ တစ်ခုတည်းသော ရည်မှန်းချက်က ငါတို့လူအများစု ခုန်ကူးအမှတ်ကို ဖြတ်ပြီး အိမ်ကို အတူပြန်နိုင်ဖို့ပဲ"

လုအန်းဟယ်မှာ နှုတ်ခမ်းကို တင်းတင်းစေ့ထားပြီး မည်သည့်စကားမှ မပြောတော့ပေ။ အမှန်မှာ ပြောရန်လည်း မလိုအပ်လှ။ ဗိုလ်ချုပ်၏ လက်ထောက်တစ်ယောက်က ဒုဗိုလ်မှုးသာ ဖြစ်နေရကြောင်း ဝေဖန်မှုများ ရှိခဲ့သော်လည်း အခြေစိုက်စခန်းတွင် အချိန်ကုန်ဆုံးဖူးကြသူများက ယင်းမှာ လုအန်းဟယ်၏ ကိုယ်ပိုင်ဆုံးဖြတ်ချက်သာ ဖြစ်ကြောင်း သိကြသည်။ အတူတကွ ရှင်သန်ခြင်း သေဆုံးခြင်းများကို ဖြတ်ကျော်ရပြီးနောက် မပြောဘဲ နားလည်နေသည့် နားလည်မှုတစ်ခု ရှိလာကြသည်။

"ငါမင်းရဲ့ အကဲဖြတ်ချက်ကို ယုံကြည်တယ်" ဟယ့်ယွင်ထင် အဆုံးတွင် ပြောလိုက်သည်။

မည်သည့်တွက်ဆမှုများ မည်သည့် ဆုံးဖြတ်ချက်များ ပြုလုပ်သည်ဖြစ်စေ ယုံကြည်ပေးမည် ဖြစ်ပေသည်။

ဟယ့်ယွင်ထင်က မည်သည့်အချိန်တွင် ပြန်လာမည်ဖြစ်ကြောင်း အလေးထား ပြောခြင်း မရှိ။

လုအန်းဟယ်က ခြေထောက်များကို စုရပ်ကာ အလေးပြုလိုက်သည်။ "ဟုတ်ကဲ့ပါ ဗိုလ်ချုပ်"

သူက ဟယ့်ယွင်ထင် ရင်ဆိုင်ရမည့် စွန့်စားမှုများကို သိနေသည့် အပြင် ဟယ့်ယွင်ထင်၏ အစီအစဥ်ကိုလည်း သိပေသည်။

အကြောင်းမှာ သူ၏ အစီအစဥ်က အချိန်မီ ခုန်ကူးနိုင်ရန် အတွေးမရှိထား။ သူက ကြီးမားသော ဇာဂ့်ကြီး ငါးကောင်အား လက်ဗလာဖြင့် ရင်ဆိုင်ရန် လိုအပ်ပြီး ရန်သူနှင့် ရင်ဆိုင်နေစဥ်တွင် စစ်သင်္ဘောကြီးက အရှိန်ပြည့်ဖြင့် ဆုတ်ခွာရပေမည်။

မက်ခါ၏ အရှိန်က အရှိန်ပြည့်တင်ထားသော စစ်သင်္ဘောကြီးအား လိုက်မမီနိုင်သည့်အပြင် ခုန်ကူးအမှတ်၌ ဇာဂ့်မည်မျှ ရှိကြောင်းလည်း မသိနိုင်ပေ။ အနည်းငယ်သာ ရှိနေပါက စစ်သင်္ဘောကြီးမှ ပြဿနာကို ခပ်မြန်မြန် ဖြေရှင်းကာ ဟယ့်ယွင်ထင်အား နေရာတွင် စောင့်စရာမလိုတော့ဘဲ ခုန်ကူးအမှတ်ကို တန်းဖွင့်နိုင်မည် ဖြစ်သည်။ ဇာဂ့်များစွာ ရှိလျှင် P-1အဏုမြူ ရောင်ခြည်အမြောက်တစ်ခုကို ပစ်လွှင့်ပြီးပါက ခုန်မှတ်လည်း ပျက်စီးသွားကာ ယင်းမှ ထွက်နိုင်ရန် ဖြစ်နိုင်တော့မည် မဟုတ်ပေ။

“တကယ်လို့... တကယ်လို့ ကျွန်တော်တို့ အဆက်အသွယ် ပြတ်သွားလို့ မဖြစ်ဘူးနော်" လုအန်းဟယ် ပြောလိုက်သည်။

"တပ်ကူအဖွဲ့က အရင်ဆုံး အဆက်အသွယ်ရပြီး တည်နေရာကို ရသွားမှာပါ... တောင့်ခံထားပေးပါ... အားလုံးအဆင်ပြေသွားမှာပါ"

လုအန်းဟယ် ခေါင်းငိုက်စိုက်ချကာ နောက်တစ်ဖန် ထပ်ပြောလိုက်သည်။ "အားလုံးအဆင်ပြေသွားမှာပါ"

သူထပ်ပြီး အခက်အခဲတွေ မကြုံတွေ့ချင်တော့ဘူး...

"အင်း" ဟယ့်ယွင်ထင်က ရိုးရိုးရှင်းရှင်းသာ ပြန်ဖြေလိုက်ပြီး ဆက်သွယ်ရေးစက်ကို ပြောလိုက်သည်။

"မက်ခါတွေ အားလုံး နေရာယူမယ်... ယာဥ်မောင်းတွအားလုံး ရှေတန်းကို တက်ကြမယ်"

နောက်တစ်စက္ကန့်တွင် ကပ္ပတိန်အခန်းကို ဖွင့်လိုက်သည်။

ဟယ့်ယွင်ထင်က တံခါးဝတွင် ရပ်လိုက်ပြီး သူ့အသံက ခပ်နိမ့်နိမ့်ဖြင့် တည်ငြိမ်နေကာ အကြောက်တရားများ ကင်းမဲ့နေပါသော်လည်း သူ့နောက်ဘက်တွင်မူ တရိပ်ရိပ်တက်နေသော အဝါရောင်သဲများ ဖုံးလွှမ်းနေသည့် ကောင်းကင်ကြီး ရှိပြီး မာန်ဖီနေသော ဇာဂ့်ကြီးများ ရှိသည်။ အလင်းရောင်ကို ဖြတ်၍ သူ့ကိုယ်သူ လှည်းကျင်းသွားနိုင်သည့် အန္တရာယ်များမှ ကာကွယ်လိုက်ကာ "မစ္စတာလင်း"ဟု ခေါ်၍ ပြောလိုက်သည်။

"တွေးကြည့်ပြီးပြီလား"

တစ်ခဏမျှ တိတ်ဆိတ်သွားပြီးနောက် လင်းဟန် ခပ်ယဲ့ယဲ့ ပြုံးလိုက်သည်။ ကြောက်စရာကောင်းလှသော ဇာဂ့်ကြီးများမှာ ထိုအခိုက်တွင် ချိန်းခြောက်မှု နည်းသွားသည်အလားပင်။

သူက ခြေနှစ်လှမ်း ရှေ့တိုးကာ တုံ့ဆိုင်းခြင်း မရှိဘဲ မက်ခါသော့အား တင်းကျပ်စွာ ဆုပ်ကိုင်ထားသည့် ဟယ့်ယွင်ထင်၏ လက်ကို ဆုပ်ကိုင်လိုက်သည်။ ယင်းမှာ ဟယ့်ယွင်ထင်တစ်ယောက် ယခုလေးတင်မှ လုပ်ဆောင်ချင်ခဲ့ပြီး မပြီးမြောက်ခဲ့သည့် အပြုအမူ တစ်ခုဖြစ်ပြီး ဇာဂ့်များ မပေါ်လာခင်က မေးခဲ့သည့် မေးခွန်းတစ်ခုလည်း ဖြစ်သည်။

သူက ဟယ့်ယွင်ထင်အား လက်ကိုင်ချင်လားဟု မေးခဲ့သည်။

လင်းဟန်၏ အသံက တည်ငြိမ်ကာ သိမ်မွေ့နေသည်။ "သွားရအောင်"

ထို့နောက် ဤအခိုက်လေးတွင် ပြောင်းလဲရန် အချိန်မရလိုက်သည့် ဟယ့်ယွင်ထင်၏ နှလုံးခုန်သံကို ကြားလိုက်ရသည်။

【မင်းဘာကိုပဲ ရွေးရွေး လုံခြုံဖို့ပဲ မျှော်လင့်တယ်】

ယာဥ်မောင်းများက သူတို့၏ မက်ခါများဘေးတွင် ရပ်နေကြကာ အဆုံးသတ် ပြင်ဆင်မှုများ လုပ်ဆောင်နေကြသည်။

ဟယ့်ယွင်ထင်က ကပ္ပတိန်အခန်းထဲမှ တစ်လှမ်းချင်း လှမ်းထွက်လာခဲ့သည်။

မည်သူကမှ အကြည့်လွှဲသွားကြခြင်း မရှိဘဲ စကားလည်း မဟကြပေ။

သူတို့မှာ အဘယ်ကြောင့်များ မစ္စတာလင်းတစ်ယောက် ဗိုလ်ချုပ်နှင်အတူ မက်ခါထဲသို့လိုက်ဝင်သွားကြောင်း တွေးတောချိန်မရပေ။ ဤအခိုက်အတန့်လေးတွင် လူတိုင်းကို ဘေးကင်းရန်သာ တောင်းဆုပြုနိုင်ကြပေသည်။

"ဘောစ့် ဂရုစိုက်ပါ" လုအန်းဟယ်က ဤအခိုက်တွင် ရာထူးအမည်ကို ခေါ်မည့်အစား သူအော်ခေါ်နေကျ နာမည်ကိုသာ ခေါ်လာခဲ့သည်။

ဟယ့်ယွင်ထင် အသာလေး ခေါင်းငြိမ့်ပြလိုက်သည်။

လုအန်းဟယ်က ခေါင်းကို ပြန်လှည့်ကာ လင်းဟန်အား ထူးဆန်းသော အကြည့်ဖြင့် ကြည့်လာသည်။ ဝမ်းနည်းကြေကွဲနေခြင်းမျိုးမဟုတ်ဘဲ ချောမွေ့ထုံလွှမ်းနေသော စိတ်သက်သာရာရမှုများ စိတ်အေးမှုများပင်။

"မစ္စတာလင်း ဂရုစိုက်ပါ"

လင်းဟန်မှာ လုအန်းဟယ်က အဘယ်ကြောင့် ထိုအမူအရာမျိုး ပြလာသည်ကို မသိပါသော်လည်း ထိုသူ စိတ်အေးသွားစေရန် ပြုံးပြလိုက်သည်။

ဟယ့်ယွင်ထင်က M2742 ၏ ခြေရင်းအနားသို့ လျှောက်လာပြီးနောက် ပြန်လှည့်ကာ အကြည့်များအားလုံးကို ရင်ဆိုင်လိုက်သည်။ သူက အရပ်ရှည်မြင့်မားကာ ဘယ်တော့မှ ပြုတ်ကျမလာနိုင်သည် အလံတစ်ခုအလား ကျောမတ်မတ် ရပ်နေခဲ့သည်။

လူအချို့က သူ့နောက်လိုက်ချင်နေကြကာ အချို့က သူ့အား တံတွေးထွေးချင်ကြပြီး လူတချို့ကမူ အကျပ်အတည်းအတွင်း အားကောင်းသည့်လက်နက်တစ်ခုအဖြစ် သူ့အား အရှုပ်အထွေးများကြား ဆွဲသွင်းလိုကြသည်။ သို့သော်လည်း အခြားသူများက မည်သို့ပင် တွေးတောနေကြပါစေ သူ၏ ကိုယ်ပိုင် ချွန်ထွက်နေမှုများ ဂုဏ်ကျက်သရေများဖြင့် ထိုနေရာတွင် ရပ်နေဆဲ ဖြစ်သည်။ ဟယ့်ယွင်ထင်၏ အမူအယာက အေးစက်နေဆဲ ဖြစ်သော်ငြား ပြာလဲ့လဲ့ မျက်လုံးများမှာ အဝေးတစ်နေရာမှ ရေခဲများ ဖုံးလွှမ်းနေသည် နက်ဗျူလာတစ်ခုအလားပင်။

သူ့လက်ကို မြှောက်ကာ စစ်သင်္ဘောကြီး၏ အရှိန်မြှင့်ခရီးစဥ်၏ မီးခိုးတန်းများ မီးပွားများ အလည်တွင် သူ့အား ကြည့်ရှုနေကြသူများအားလုံးကို ဂုဏ်ယူဝံ့ကြွားစွာဖြင့် အလေးပြုလိုက်သည်။

ဝမ်ထျန်းယောင်သည်လည်း ရုတ်တရက်ဆိုသလို တစ်ခဏမျှ ရှက်ရွံ့သွားလေသည်။

လူတိုင်းက ကိုယ်ကို ကိုင်းညွှတ်ကာ ခေါင်းများကို ငုံ့ကာဖြင့် ပြန်လည် အလေးပြုလာကြချိန်တွင် ထူးဆန်းသော အသံတစ်သံကို ရုတ်တရက် ကြားလိုက်ကြသည်။ ပုံရိပ်တစ်ခုက သာမန်မဟုတ်သော ကိုယ်ဟန် အရှိန်တို့ဖြင့် ဟယ့်ယွင်ထင်ထံ အပြင်းအထန် ပြေးလာနေပြီး လက်ထဲတွင် ချွန်ထက်နေသော လက်နက်တစ်ခုကို ကိုင်ဆိုင်ထားပြီး သို့တည်းမဟုတ် ထိုလက်များ ကိုယ်၌က လူသတ်လက်နက်များအလားပင်။

“သတိထား" လုအန်းဟယ်က ပထမဆုံး စကားပြောလာသူ ဖြစ်သည်။ ထိုသူကို ယခင်တစ်ခေါက်ကနှင့် တူညီနေသည့် နောက်ထပ် လူသတ်သမားတစ်ယောက်ဟု တွေးမိခဲ့သည်။ သို့သော်လည်း ယခင်က လုပ်ကြံသူများမှာ အနည်းဆုံး လက်နက်တစ်ခု ရှိနေသေးသည်။ ထိုသူမှာတော့ ဟယ့်ယွင်ထင်အား လက်ဗလာဖြင့် တိုက်ခိုက်ရန် ကြိုးစားနေပုံရလေသည်။

သို့သော်လည်း ဟယ့်ယွင်ထင်၏ လှုပ်ရှားမှုများက ပိုမြန်နေပြီး လျှပ်တပြက်အတွင်း ရှောင်တိမ်းကာ တစ်ဖက်လူကို ဆွဲရန် လက်မြှောက်လိုက်သည်။

တစ်ဖက်လူက လျင်မြန်ဖျတ်လတ်လှပြီး ဟယ့်ယွင်ထင်၏ တန်ပြန်တိုက်ကွက်ကို ခန့်မှန်းမိနေသည့်အလား ပို၍ မြန်သော အရှိန်ဖြင့် ရှေ့တက်လာကာ ဟယ့်ယွင်ထင်နှင့် တိုက်ခိုက်လာသည်။

သူက အဝတ်ပါးပါးလေးသာ ဝတ်ထားပြီး အားနည်းမှု အပြည့် ဖြစ်နေပုံရသော်လည်း အားနည်းနေခြင်း လုံးဝ မရှိပေ။ သူ့ကိုယ်၌က လက်နက်တစ်ခု ဖြစ်နေသည့်အလားပင်။

ဟယ့်ယွင်ထင်က စကားပြောရန် နောက်ကျသွားပြီး တစ်ဖက်လူ၏ မယုံနိုင်လောက်အောင် မြန်ဆန်နေသော တိုက်ခိုက်မှုကို ရှောင်တိမ်းနေရင်းဖြင့် အိတ်ဆောင်သေနတ်ကို ဆွဲယူကာ တုံ့ဆိုင်းခြင်း အလျင်းမရှိဘဲ တစ်ဖက်လူထံ ခလုတ်ဆွဲလိုက်သည်။ ဒိုင်း...

သေနတ်သံထွက်လာပြီးနောက် ပြောင်းဝမှ မီးခိုးများ ထွက်လာပြီး တစ်ဖက်လူ၏ ဘယ်လက်ကို ထိမှန်သွားကာ ထုတ်ချင်းပေါက်ထိသွားသည်။ အနီးကပ် ပစ်ချက် ဖြစ်လေရာ ထိမှန်သွားသရွေ့ မည်သူမဆို အပြင်းအထန် ဒဏ်ရာရသွားပြီး အနည်းဆုံး လှုပ်ရှားမှုများအပေါ် ကြီးကြီးမားမား သက်ရောက်သွားပေမည်။

ဟယ့်ယွင်ထင်က အရှိန်လျှော့လိုက်ပြီး လုပ်ကြံသူက မည်သူ ဖြစ်ပြီး အဘယ့်ကြောင့် ဤအချိန်တွင်မှ တိုက်ခိုက်ရန် ရွေးချယ်ခဲ့ကြောင်း သိချင်နေခဲ့သည်။

သူ့လက်ကို လှုပ်ရုံသာ လှုပ်လိုက်သည်။

အတိအကျထိမှန်သွားသော လူသတ်သမားသည်ကား စကားတစ်ခွန်းမှ မပြောဘဲ ထရပ်လာပြီး သွေးထွက်နေဆဲ ဖြစ်သော ဘယ်လက်ကို အုပ်ကိုင်ထားသည်။ ထို့အပြင် ထိုသူ့ထံ၌ ပြန်လည်ကောင်းမွန်လာနိုင်သည့် ကို့ယို့ကားယားနိုင်လှသော စွမ်းရည်တစ်ခု ရှိသည့်အလားပင်။ မထိခိုက်ထားသလိုမျိုး ဘယ်လက်မှ သွေးများကို ခါထုတ်လိုက်လေရာ လင်းဟန်၏ အဖြူရောင် ယူနီဖောင်းထက်တွင် စွန်းထင်းသွားစေခဲ့သည်။

ထို့အပြင် ယခင်ကလိုပင် ရှူးရှဲရှဲ လေသံတစ်ခုက လည်ချောင်းထက်မှ ထွက်ပေါ်လာကာ ဟယ့်ယွင်ထင်ထံ စားမတတ်ဝါးမတတ် လှမ်းလာပြန်သည်။

"ဒါက ဘယ်သူကြီးလဲ... သူ့ကို မြန်မြန် ဖမ်းကြပါဟ"

လုအန်းဟယ်က ကျယ်လောင်စွာ အော်ဟစ်လိုက်ပြီး ခါးထက်မှ သေနတ်ကို ဆွဲထုတ်လိုက်သည်။ လင်းဟန်တစ်ယောက် လုပ်ကြံသူ၏ မျက်နှာကို မမြင်လိုက်ရခင်အထိပင်။

တစ်ဖက်လူ၏ ပုံစံကို ပိန်ပါးသည်ဟု သတ်မှတ်နိုင်သည်။ ထိုသူ၏ မျက်နှာအမူအရာများက တောင်တင်းကာ အကျည်းတန်နေပြီး စကားတစ်ခွန်းမှ ဟမလာပေ။ ထို့အပြင် လည်ပင်းနောက်ရှိ ဂလင်းထက်၌ နက်ရှိုင်းလှသော အမာရွတ်ဟောင်းကြီးတစ်ခု ရှိနေသည်။

ထိုသူကို ယခင်က မြင်ဖူးခဲ့ပြီး ယင်းမှာ ချီကျားဇယ်ပါပင်။

👾

Prev Next