MM Story Teller

Chapter 48

Viewers 3k

👾Chapter 48

ဟယ့်ယွင်ထင်၏တိုက်ခိုက်မှု

ထိုစဥ်က ချီကျားဇယ်မှာ ထူးဆန်းသော ပုံစံပေါ်နေခဲ့သော်လည်း ချီကျားမူ၏ စကားများကို နားလည်နေခဲ့ပြီး တစ်ဖက်လူကို ကိုကိုဟု ခေါ်ရန် ရုန်းကန်လှုပ်ရှားနေခဲ့သေးသည်။

ထိုသူ ဤနေရာတွင် အဘယ့်ကြောင့် ရှိနေရကြောင်း တွေးတောရန် နောက်ကျနေလေပြီး လင်းဟန်မှာ မျက်နှာတွင် သွေးများစွန်းထင်းလျက်က တပ်သားသစ်အုပ်စုအတွင်းမှ ပုံရိပ်တစ်ခုကို ရှာဖွေလိုက်သည်။

ချီကျားဇယ်မှာ အိုမီဂါတစ်ယောက် မဟုတ်တော့။ သို့တည်းမဟုတ် သာမန်လူသားတစ်ယောက်ပင် မဟုတ်တော့ပေ။ သူက ဟယ့်ယွင်ထင်အား ယခင်က လုပ်ကြံခဲ့ဖူးသူများနှင့် ဆင်တူသော်ငြား အလုံးစုံတူနေခြင်း မဟုတ်ပေ။ သူက နူးညံ့လှသော အိုမီဂါတစ်ယောက် မဟုတ်တော့ဘဲ လူတစ်ကိုယ်လုံးက လေ့ကျင့်ထားသော လက်နက်တစ်ခုအလားပင်။ သူက နာကျင်မှုကို မသိသလို မောပန်းရကောင်းမှန်းကိုလည်း မသိပေ။ သူ့ရှေမှ လူကိုသာ သတ်ချင်နေခြင်းပင်။

၎င်းက ဆက်သွားရမည့်လမ်း မဟုတ်သေးပေ။ စစ်သင်္ဘောရှေ့တွင် ဇာဂ့်များ ရှိနေဆဲ ဖြစ်ပြီး ပြင်ဆင်ထားပုံရသော လုပ်ကြံမှုကလည်း အချိန်ကိုက်ပေါ်လာသည်။

ဟယ့်ယွင်ထက်က M2742 ၏ အနီးသို့ ချဥ်းကပ်လာရင်း နောက်ပြန်လှမ်းပစ်လိုက်သည်။

"မစ္စတာလင်း နောက်ကလိုက်ခဲ့ပါ" လင်းဟန်ကို လှမ်းပြောလိုက်သည်။ "အပေါ်တက်ဖို့ အခွင့်အရေး ရှာရအောင်"

လင်းဟန်က ရှာဖွေနေခြင်းကို ရပ်လိုက်ပြီး သူ့နောက်မှ နီးနီးကပ်ကပ် လိုက်လာခဲ့သည်။

သို့သော်လည်း ချီကျားဇယ်မှာ အံ့သြဖွယ်ကောင်းစွာပင် သူမတူစွာဖြင့် ကိုင်တွယ်ရန် ခက်ခဲလှသည်။ ဟယ့်ယွင်ထင် သူ့အား မည်မျှပင် တိုက်ခိုက်ပါစေ သုံးကြိမ် သေနတ်ပစ်ခံထားရသည့်တိုင် ဟယ့်ယွင်ထင် သူ့ထံမှ ဒဏ်ရာရရှိသွားစေရန် နီးကပ်လာသည်အထိ ဆက်လိုက်လာသည်။

"အားဇယ်" ချီကျားမူ အံကြိတ်ကာ ဟယ့်ယွင်ထင်ထံ အပြေးရောက်လာပြီး သူ့နာမည်ကို ထပ်ကာထပ်ကာ ခေါ်ဆိုပြီးနောက် ညီဖြစ်သူကို လက်မောင်းကြားထဲတွင် ထိန်းထားရင်း ဟယ့်ယွင်ထင်အား ပြောလိုက်သည်။

"ဗိုလ်ချုပ်... သွားလိုက်ပါ... သူ့ကို ကျွန်တော် ထိန်းထားမယ်"

အေးစက်နေသော မျက်နှာထားဖြင့် ဟယ့်ယွင်ထင်မှာ ရုန်းကန်နေဆဲ ဖြစ်သည့် ချီကျားဇယ်အား သေနတ်ဖြင့် ပစ်လိုက်ချင်နေဆဲ ဖြစ်သော်ငြား အစ်ကိုဖြစ်သူထံမှ အတားခံလိုက်ရသည်။

"ကျေးဇူးပြုပြီး... ကျေးဇူးပြုပြီး မပစ်ပါနဲ့"

သာမန်ဖြစ်ပုံမရသော အိုမီဂါမှာ ချီကျားမူထံမှ ဖက်ခံထားရချိန်တွင် ဇဝေဇဝါဖြစ်သွားပုံရသည်။ ဟယ့်ယွင်ထင်ကလည်း တုံ့ဆိုင်းနေခြင်းမရှိဘဲ ထိုအချိန်ကိုပင် စောင့်နေရခြင်းဖြစ်ကာ ထပ်မပစ်တော့ဘဲ လင်းဟန်၏ ခါးကို ဖက်၍ မက်ခါပေါ်သို့ တတ်နိုင်သမျှ မြန်မြန်ဆန်ဆန် တက်သွားလေသည်။

ချီကျားဇယ်မှာ ဟယ့်ယွင်ထင်အား သတ်ရန် ကြိုးစားနေခြင်းကို လက်မလျှော့သေးသော်ငြား ချီကျားမူထံမှ တင်းတင်းကျပ်ကျပ် အဖက်ခံထားရသဖြင့် စိတ်မကျေမချမ်းဖြင့် လည်ချောင်းထဲမှ အသံများကိုသာ ထုတ်လာသော်ငြား စကားလုံးအပြည့်အစုံတစ်ခုမှ ထုတ်မပြောနိုင်ပေ။

M2742က တတ်နိုင်သမျှ မြန်မြန် စက်နိုးလာသည်။ ပိုအရေးကြီးသော ပစ်မှတ်က ရှေ့တွင် ရှိနေဆဲ ဖြစ်၍ ထိုကဲ့သို့ ချောင်ပိတ်မိနေ၍ မရပေ။

"မင်းလည်း သတိထားမိတဲ့ အရာတွေ ရှိမှာပဲ မစ္စတာလင်း" ဟယ့်ယွင်ထင်က အသက်ရှူသံကို တည်ငြိမ်စေပြီးနောက် မက်ခါအား စတင်ချီတက်စေလိုက်သည်။

အင်ဂျင်စက်သံက နားအူစေပြီး ၎င်းက အလွန်လျင်မြန်စွာ အသက်ဝင်လာသည်ကြောင့် ကူရှင်ပါနေသော်ငြား အလွန် ပြင်းထန်လှသည့် တွန်းအားကိုမူ ခံစားမိနေဆဲ ဖြစ်သည်။

"ကိုယ့်ရှေ့က ပိုးကောင်တွေကို ရှင်းနိုင်ခဲ့ရင် ကိုယ်မင်းကို သေသေချာချာပြောပြပါ့မယ်"

မက်ခါ မြင့်တက်လာပြီး မြေပေါ်မှ ရုန်းကြွလာသောအခါ လင်းဟန် အောက်သို့ ပြန်ကြည့်မိသည်။

အိုမီဂါက ဟယ့်ယွင်ထင်အား တိုက်ခိုက်ရန် ကျရှုံးသွားသဖြင့် အခြားသူများကို အရူးတစ်ယောက်နှယ် သဲသဲမဲမဲ တိုက်ခိုက်ရန် ကြိုးစားနေပြီး ချီကျားမူမှာ "အားဇယ်" "ကိုကို ဒီမှာရှိတယ်" ဟူ၍ သူ့နာမည်ကို အဆက်မပြတ်ခေါ်ပေးနေသည်။

လင်းဟန်မှာ သူယခင်က တွေ့ဖူးခဲ့သည့် အားနည်းလှသော ဆယ်ကျော်သက်လေးကို သတိရမိလိုက်သည်။

ထိုစဥ်က ထိုသူ၏ မျက်ဆံများက အနည်းငယ် သေးငယ်နေခဲ့ခြင်းသာ ဖြစ်ပါသော်လည်း ယခု ထပ်ပြီး ကြည့်လိုက်မိသည့်အခါ လင်းဟန် တွေ့လိုက်ရသည်မှာ...

လူငယ်လေး၏ မျက်လုံးများမှာ တနည်းတဖုံဖြင့် ဒေါင်လိုက် မျက်ဆံများအဖြစ် ပြောင်းလဲသွားခဲ့လေပြီ...

ဒေါင်လိုက်မျက်ဆံများပင်...

ယင်းက ဇာဂ့်များ၏ စံသတ်မှတ်ချက် ပုံစံဖြစ်သည်။ ဤအချိန်အတွင်း ချီကျားဇယ် မည်သည့်အရာများကို ဖြတ်ကျော်ခဲ့ရသနည်း.. သို့တည်းမဟုတ် သူ၏ အစ်ကိုဖြစ်သူပင် ထိုအကြောင်းအား သိနေသည်လား... အရေးအကြီးဆုံးအရာအဖြစ် အိုမီဂါတစ်ယောက်ကသင်္ဘောပေါ်သို့ မည်သို့သော နည်းလမ်းဖြင့် ရောက်လာခဲ့ရသနည်း... စသဖြင့် သူမတွေးတတ်တော့ပါပေ။

လင်းဟန်၏ ခန္ဓာကိုယ်ထက် အအေးဓါတ်များ ဖြတ်ပြေးသွားသော်လည်း အကြည့်မလွှဲမိစေရန် သူ့ကိုယ်သူ တွန်းအားပေးလိုက်ပြီး ထွက်ခွာနေသည့်အချိန်မှာပင် စစ်သင်္ဘောထက်မှ လှုပ်ရှားမှုတိုင်းကို ကြည့်နေခဲ့သည်။ ချီကျားဇယ်၏ လက်မောင်းများနှင့် ညာခြေထက်တွင် မတိုင်မီက ဟယ့်ယွင်ထင် ပစ်လိုက်သည့် သေနတ်ရာများ ရှိနေပြီး သွေးများထွက်နေဆဲ ဖြစ်ကြောင်း တွေ့နေရသည်။

မီးခိုးငွေ့အနံ့သည်ပင် ပျောက်မသွားသေးသော်လည်း ချီကျားဇယ်မှာ နာကျင်မှုကို မခံစားရသည့်အလား ဂရုမစိုက်ဘဲ ရုန်းကန်နေဆဲ ဖြစ်သည်။

ချီကျားမူမှာ ထိုသူ၏ အိမ်နာမည်ကို ခေါ်နေရင်းဖြင့် ချီကျားဇယ်၏ နဖူးတည့်တည့်တွင် သေနတ်ဖြင့် ချိန်ထားသည့် လုအန်းဟယ်တစ်ယောက် ခလုတ်မဖြုတ်ပါစေနှင့်ဟု ဆုတောင်းနေရလေသည်။

မက်ခါက စစ်သင်္ဘောမှ အသံများကို ကာကွယ်ပေးထားသဖြင့် လင်းဟန်မှာ ထိတ်လန့်မှုများ အပြည့်ဖြစ်နေသည့် ဝမ်ထျန်းယောင်၏ မျက်နှာအပြင် ရှီယွမ်၏ သိမ်မွေ့နက်နဲသော မျက်နှာအမူအရာကိုသာ တွေ့လိုက်ရသည်။

ချီကျားမူ၏ လက်မောင်းများက တင်းကျပ်စွာ ဆုပ်ကိုင်ထားပြီး လုအန်းဟယ်ကမူ တစ်စုံတစ်ခုကို ပြောနေသည့်အလား လေးနက်သော အမူအရာဖြင့် နှုတ်ခမ်းများ လှုပ်နေသည်ကိုလည်း တွေ့လိုက်ရသည်။

ဟယ့်ယွင်ထင်အား တိုက်ခိုက်ရန် ကြိုးစားခဲ့သည့် အိုမီဂါလေးမှာ အစ်ကိုဖြစ်သူ၏ ဖြောင်းဖျမှုအောက်မှာငြိမ်သက်သွားသော်လည်း တုန်ယင်နေဆဲ ဖြစ်ကာ တစ်စုံတစ်ခုကို အမောတကော ရေရွတ်နေသည်ကိုလည်း မြင်လိုက်ရသည်။

သိပ်မဝေးသော နေရာမှ ဇာဂ့်များမှာ စိတ်လှုပ်ရှားလာပုံရသည်။ ရှေ့တူရှုမှ သဲပိုးကောင်နှစ်ကောင်မှာ လက်တံများကို ဆန့်ထုတ်ကာ ခြေချောင်းများဖြင့် တွားသွားနေသည်ကို အရှိန်တင် လာခဲ့သည်။

သူတို့၏ နီးကပ်လာသော အရပ်အမြင့်များကို တွေ့လိုက်ရချိန်တွင် အဝါရောင်သဲများက မောင်းနှင်ခန်းကို ပွတ်တိုက်သွားပြီး ကောင်းကင်ကြီးက ကြက်သွေးရောင် ပြောင်းသွားခဲ့သည်။ ကြီးကျယ်ရက်စက်လှသော ရှေ့ပြေးပုံရိပ်တစ်ခုအလားပင်။

စစ်သင်္ဘောက မိုင်ကုန်တင်ကာ ဆုတ်ခွာသွားပြီး လင်းဟန်မှာ အထက်မှ လမ်းကြောင်းကိုပင် မမြင်ရလုနီးပါး ဖြစ်သွားသည်။ သူက ဟယ့်ယွင်ထင်၏ တည်ငြိမ်နေသော အသက်ရှူသံနှင့် ကျယ်ပြန့်လှသော နောက်ကျောပြင်ကိုသာ တွေ့မြင်နေသည်။ အကျပ်အတည်း ရောက်နေသော အချိန်ဖြစ်၍ ဟယ့်ယွင်ထင်မှာ ရုန်းထွက်ရန်သာ အချိန်ရခဲ့လေရာ သူတို့ နှစ်ဦးသားမှာ ပထမဆုံး မောင်းနှင်ခန်းမှာသာ ရှိနေသေးသည်။

လင်းဟန်က ဟယ့်ယွင်ထင်အား ဒေါင်လိုက်မျက်ဆံများအကြောင်း ပြောပြလိုက်ချင်ပါသော်လည်း ထိုသူအား မနှောက်ယှက်လိုပေ။ အဓိက အချက်မှာ သူက အကောင်းဆုံးသော မောင်းနှင်သူများကဲ့သို့ မက်ခါအား ပြီးပြည့်စုံစွာ မပျံသန်းနိုင်လေရာ ဝန်ပို ဖြစ်လာမည်ကိုလည်း စိုးရိမ်နေမိသည်။

ဟယ့်ယွင်ထင်က မက်ခါကို အမြင့်တစ်နေရာထိ ပျံတက်လိုက်ပြီးနောက် လုပ်ဆောင်မှုစနစ်များကို တစ်ခုပြီးတစ်ခု ဖွင့်လိုက်သည်။ မက်ခါ၏ AIစနစ်မှ စက်သံ ထွက်ပေါ်လာသည်။

“M2742က သင့်တော်တဲ့ အမြင့်တစ်နေရာစီသို့ ရောက်ရှိနေပါပြီ... ယာဥ်၏ လုပ်ဆောင်မှုအားလုံး စစ်ဆေးပြီးမြောက်ပါပြီ... မက်ခါပြင်ပက ပတ်ဝန်းကျင်က အဆင့်D ဖြစ်ပါတယ်... ကျေးဇူးပြုပြီး အကာအကွယ်တွေအတွက် ဂရုစိုက်ပေးပါ... မက်ခါရဲ့ ကိုယ်ထည်ကို ဖွင့်ဖို့ ရွေးချယ်ပါ"

"ပထမဆုံး မောင်းနှင်ခန်းကို ဖွင့်ပါမယ်"

"မစ္စတာလင်း မကြောက်နဲ့နော်... မင်းမောင်းဖို့ မလိုပါဘူး" ဟယ့်ယွင်ထင်က မောင်းနှင်နေရင်းဖြင့် ဘေးတိုက်လှည့်၍ လင်းဟန်ကို ပြောလိုက်သည်။

"ဒါပေမယ့် နောက်ပိုင်းကျရင် ခက်ခဲလိမ့်မယ်... တောင့်ခံထားနိုင်သေးလား"

အဆုံးတွင် အစစ်အမှန်တိုက်ပွဲများ၌ ပွတ်တိုက်မှုများ ပျံသန်းမှုများ ရှိလာမည် ဖြစ်၍ ပြောစရာ မလိုအောင်ပင် နေရာအနေအထား ပြောင်းလဲမှုများ ဆွဲအားကျဆင်းမှုများကို မလွဲမသွေ ကြုံတွေ့ရမည် ဖြစ်ပေသည်။

“ဗိုလ်ချုပ်... ကျွန်တော့်ကို စိတ်ထဲမထားပါနဲ့... အရင်တစ်ခေါက်ကလုပ်ခဲ့သလိုပဲ ကျွန်တော် လုပ်နိုင်ပါတယ်... ဒုတိယမောင်းနှင်ခန်းကို သွားလိုက်ပါ့မယ်" လင်းဟန်၏ အသံက တောင်းပန်သည့်လေသံ ပေါက်နေသည်။

"ဒါပေမယ့် အရင်တစ်ခေါက်တုန်းက ဗိုလ်ချုပ်က ကျွန်တော့်ကို ညွှန်ကြားပေးခဲ့တာဆိုတော့ ဒီတစ်ခေါက်တော့ ကောင်းကောင်း မောင်းနိုင်မှာ မဟုတ်တော့ဘူး"

"ကောင်းပြီလေ" ဟယ့်ယွင်ထင်က အလျင်အမြန် တုံ့ပြန်လာသည်။ "မစ္စတာလင်း မောင်းစရာ မလိုပါဘူး... ကိုယ့်ကိုယ်ကိုယ်ပဲ ကာကွယ်ထားပါ... ဒုတိယ မောင်းနှင်ထိုင်ခုံမှာ အထောက်အပံ့ ကိရိယာတွေပါတယ်... မစိုးရိမ်ပါနဲ့"

လင်းဟန်က ပြန်ဖြေကာ ဒုတိယထိုင်ခုံရှိရာသို့ သွားလိုက်ပြီး သူထွက်သွားတော့မည်အပြုတွင် ဟယ့်ယွင်ထင်တစ်ယောက် ကိုယ့်ကိုယ်ကိုယ် ပြောနေသည်လား မသိရသော်လည်း အသံတိုးတိုးဖြင့် ပြောနေသည်ကို ကြားလိုက်ရသည်။

"အဆုံးကျတော့ မင်းပါလာဖို့က ကိုယ့်ရဲ့ ကိုယ်ရေးကိုယ်တာ ဆန္ဒပဲလေ"

လင်းဟန်တစ်ခဏမျှ အေးခဲသွားပြီးနောက် ပြောချင်မိသွားသည်။

မဟုတ်ပါဘူး... ကျွန်တော် ကိုယ်တိုင်က စိတ်လိုလက်ရ လိုက်လာချင်ခဲ့တာပါ...

ဟယ့်ယွင်ထင် ထိုကဲ့သို့ ကြီးမားလှသော ရန်သူတော်ကြီးများအား တစ်ယောက်တည်း မည်သို့ ရင်ဆိုင်နေရမည်ကို သူမစဥ်းစားချင်ခဲ့။ ယင်းက သူ၏ ကိုယ်ပိုင် အတ္တတစ်ခုလည်း ဖြစ်နေသည်။ လင်းဟန် ပြန်မဖြေတော့ဘဲ ဒုတိယမောင်းနှင်ခုံထံ သွားကာ ယာဥ်မောင်းနေရာတွင် ဝင်ထိုင်လိုက်ပြီး ခေါင်းဆောင်းစွပ်လိုက်သည်။

တံခါးပေါက်က တဖြည်းဖြည်း ပိတ်သွားပြီး လင်းဟန်တစ်ယောက် ဟယ့်ယွင်ထင်၏ လက်များက လီဗာကို အောက်ဆုံးထိ ဖိဆွဲလိုက်သည်ကို တွေ့လိုက်ရပြီး မက်ခါကြီးက ရုတ်တရက် အရှိန်တင်ကာ သဲပျံများ ပြည့်နေသော ကောင်းကင်ထံ မြင့်တက်လာပြီး ကြောက်မက်ဖွယ်ကောင်းလှသော သတ္တဝါကြီးများထံ တဟုန်ထိုးပြေးသွားလေသည်။

လင်းဟန်က အရှိန်တင်လိုက်သည့် ဖြစ်စဥ်အတွင်း အစာအိမ်အတွင်း မသက်မသာ ခံစားလိုက်ရသော်ငြား အဆုံးတွင် ဟယ့်ယွင်ထင်အား နှောက်ယှက်မိမည်စိုးသဖြင့် အကူအညီမတောင်းလိုက်တော့ပေ။ သူ့လက်ကို လက်ကိုင်ထံတင်ကာ ပထမမောင်းနှင်ခုံနှင့် အဆက်အသွယ် ဖြတ်ချလိုက်သည်။ ထိုမှသာ ဟယ့်ယွင်ထင်ဘက်မှ သူ မသက်မသာ ဖြစ်နေသည့် အသံများကို ကြားရတော့မည် မဟုတ်ပေ။ သူက အပြင်းအထန် ပင့်သက်ရှိုက်လိုက်ပြီးနောက် အသက်ပြင်းပြင်းရှုကာ ရုပ်ပိုင်းဆိုင်ရာ မအီမသာ ဖြစ်မှုများ ပျောက်ကွယ်သွားစေရန် ကြိုးပမ်းလိုက်သည်။

ထို့နောက် ပထမမောင်းနှင်ခုံ၌ ထိုသူမှာ တိုက်ပွဲကို အမှန်တကယ် စတင်နေခဲ့လေပြီ။

သဲပိုးကောင်များ၏ ရည်ရွယ်ရင်းမှာ စစ်သင်္ဘောကြီးပင် ဖြစ်လေရာ စစ်သင်္ဘောကြီး ဆုတ်ခွာသွားသည်နှင့် ၎င်းတို့က အရှိန်တင်လာကြပြီး ထိုသူတို့၏ ပါးစပ်နေရာများက ဒက်ဆီဘယ်မြင့်မြင့် အေးစိမ့်စိမ့် ဆူညံသံများ ထုတ်လွှင့်လာသည်။

M2742က ကြီးမားလှသော သဲပိုးကောင်များနှင့် အရွယ်အစား အတူတူ နီးပါး ဖြစ်ပြီး ဟယ့်ယွင်ထင်က အခြားသူများနှင့် မတူကွဲပြားစွာ တိုက်ခိုက်တတ်သည်။ သူက ပထမဆုံး လေပေါ်မှ လွှဲယမ်းလာသော ပိုးကောင်ကြီး၏ ခြေတံကို ရှောင်ပြီးနောက် နေရာမှန်ကို ရွေးကာ ပိုးကောင်ကြီး၏ ညာဘက်မှ လက်တံကို လေဆာအမြောက်ဖြင့် လျှင်မြန်စွာတိုက်ခိုက်လေသည်။လေဆာရောင်ခြည်က လက်တံပေါ်တွင် အတိအကျ ပေါက်ကွဲသွားသည်။

ပေါက်ကွဲသံများကြောင့် များစွာသော အခြားပိုးကောင်များ၏ မျက်လုံးများက သဘာဝကျကျပင် အကြည့်ရောက်လာကြသည်။

ထိုကြီးမားသော သဲပိုးကောင်ကြီးများမှာ ယင်းတို့၏ ခြေတံများက ပို၍ ရှည်လျားအောင် ဆန့်ထုတ်နိုင်ပြီး ပို၍ မာကျောသဖြင့် သာမာန်ဇာဂ့်များထက် ပို၍ အင်အားကြီးသည်။ ထို့အပြင် ၎င်းတို့က မြေပေါ်တွင် လျှောတိုက်သွားစရာမလိုတော့သော်လည်း ဆန့်ထုတ်နိုင်သော ခြေတံလက်တံများဖြင့် တွားသွားရန် ရွေးချယ်နိုင်ပေသည်။

ထိုသဲပိုးကောင်ကြီးများကို ဆင့်ကဲပြောင်းလဲသည်ဟု သတ်မှတ်နိုင်သော်ငြား ၎င်းတို့၏ သွေးဆာရက်စက်လှသော သဘာဝမှာ မပြောင်းမလဲရှိနေသေးရာ ၎င်းတို့ကို ဆွရန်မှာ အတော်လေး လွယ်ကူသည်။ မကြာမီပင် ၎င်းတို့၏ ရည်ရွယ်ချက်မှာ တပ်ဆုတ်သွားသော စစ်သင်္ဘောကြီး ဖြစ်ကြောင်း မေ့သွားကြပြီး ကြီးမားသော ခေါင်းကြီးများ ခါယမ်းကာ သိပ်သည်းစွာဖွဲ့စည်းထားသော မျက်လုံးများက နီရဲရဲ လက်ဖြာ၍ M2742နောက်သို့ ပြေးလာခဲ့ကြသည်။

လင်းဟန်မှာ ဟယ့်ယွင်ထင်က ထိုကဲ့သို့ ခိုင်မာလွန်းလှသော တိုက်ခိုက်မှုမျိုးကို လုပ်ဆောင်ပေလိမ့်မည်ဟု တွေးထားပြီးသား ဖြစ်သော်လည်း နောက်တစ်စက္ကန့်တွင် ရုတ်တရက်ဆိုသလို အင်ဂျင်ကို မိုင်ကုန်ဆွဲကာ မက်ခါကိုယ်ထည်ကို ကျည်ဆန်အဖြစ် အသုံးပြု၍ တုံ့ဆိုင်းခြင်း အလျင်းမရှိဘဲ ဇာဂ့်များထဲမှ တစ်ကောင်ထံ တည့်တည့်ပြေးဝင်သွားမည်ဟု မထင်ထားခဲ့ပေ။

သူက မက်ခါကိုယ်ထည်ကို လက်နက်တစ်ခုလို သုံးဖို့ ကြိုးစားနေတာလား...

လင်းဟန်၏ နှလုံးသား ခုန်ပေါက်သွားသော်လည်း လှုပ်ရှားမှုများက တည်ငြိမ်နေဆဲ ဖြစ်သည်။ စနစ်၏ ညွှန်ကြားချက်များကို အကဲဖြတ်နေကာ စိတ်စွမ်းအားသည်ပင် အတက်အကျ များများစားစား ရှိမနေသည့် ဟယ့်ယွင်ထင်အပေါ် စူးစိုက်ကြည့်မိသည်။

ဝုန်း...

ကျယ်လောင်လှသော အသံနှင့်အတူ M2742 က ဇာဂ့်ကို မထိမီ အမြင့်ဆုံး ဒိုင်းကာ စနစ်ကို ဖွင့်လိုက်ပြီး ၎င်း၏ ဝမ်းဗိုက်တည့်တည့်ကို တိုက်ခိုက်လေတော့သည်။

နောက်တစ်စက္ကန့်တွင် မက်ခါက အင်အားပြန်စုစည်းလိုက်ပြီ လင်းဟန်မှာကား ပြင်းထန်လှသော ထိတ်လန့်ကြောက်ရွံ့မှုကို ခံစားလိုက်ရလေသည်။

ယင်းမှာ ဟယ့်ယွင်ထင်၏ စိတ်စွမ်းအားပင်။ သာမန်မောင်းနှင်သူများက မက်ခါကိုသာ ခန့်ခွဲနိုင်ကြပြီး အလယ်အလတ် မောင်းနှင်သူများက တိုက်ခိုက်ရေး စွမ်းရည်များကို လေ့ကျင့်ကြကာ ထိပ်တန်းအဆင့် မောင်းနှင်သူများအတွက်မူ စိတ်စွမ်းအားကသာ အရာအားလုံး ဖြစ်သည်။ စိတ်စွမ်းအားမြင့်လေလေ မက်ခါနှင့် ကိုက်ညီလေလေ ဖြစ်ကာ သူ့လက်ထဲမှ သံထည်များက သူတို့၏ သက်ဆိုင်ရာ ကဏ္ဍများကို အမှန်တကယ် လုပ်ဆောင်ပေးနိုင်ကြပေမည်။

လင်းဟန်မှာ ထိုသူ၏ မျက်နှာကို မတွေ့ရပါသော်လည်း အနိူင်ရရှိရန်အတွက် ဆန္ဒများ စိတ်ဆုံးဖြတ်ချက်များကို လေးနက်စွာ ခံစားခဲ့ရသည်။

သဲပိုးကောင်ကြီး တစ်ခဏမျှ နာကျင်နေချိန်အတွင်း M2742 ၏ ညာလက်က စွမ်းအင်ကို အောင်မြင်စွာ ပြန်လည်သိုလှောင်နိုင်ခဲ့သည်။ထို့နောက် တာဝေးပစ် လေဆာအမြောက်များလည်း မဟုတ်၊ မက်ခါ၏ နဖူးမှ ပစ်လွှင့်သည့် ဧရာမအမြောက်ကြီးလည်း မဟုတ်ဘဲ အလင်းရောင်ခြည်များမှ ဖြစ်ပေါ်လာသည့် ကြီးမားသော အလင်းဓါးရှည် တစ်ခုဖြစ်စေကာ အလယ်ဗဟိုတွင် စွမ်းအင်ကိုယ်ထည်တစ်ခု ဖြစ်နေစေသည်။

အယ်ဖာ၏ စိတ်စွမ်းအားများက အလွန်အမင်း ဖိနှိမ်တတ်သော်ငြား လင်းဟန်သည် M2742က ပိုးကောင်ကြီး၏ ဝမ်းဗိုက်အား အလင်းဓါးရှည်ဖြင် ထိုးနေသည်ကို ကြည့်နေရင်းဖြင့် မသက်မသာ ခံစားချက်တစ်ခုမှ မခံစားရပေ။

သဲပိုးကောင်ကြီးက မချိမဆန့် ခံစားနေရသည်။ ဟယ့်ယွင်ထင်၏ စိတ်စွမ်းအားကို မရုတ်သိမ်းရသေးသည့်အတွက် မက်ခါနှင့် စိတ်စွမ်းအား အောက်တွင် သဲပိုးကောင်ကြီး၏ မနှစ်မြို့ဖွယ်ကောင်းလှသော ဝမ်းဗိုက်ကြီးက ကွဲထွက်လာခဲ့သည်။ မဲညစ်နေသော သွေးများက နေရာအနှံ့ပန်းထွက်လာခဲ့သည်။

ဟယ့်ယွင်ထင် အံတင်းတင်းကြိတ်၍ ထိုးစိုက်နေခဲ့သည်။ သိုလှောင်ထားသော စွမ်းအင်မှာ ကြီးမားလွန်းသည့်အတွက် မက်ခါတစ်ခုလုံး၏ နောက်ပိုင်းခြေတစ်ဖက်သည်ပင် ခြေလှမ်းအနည်းငယ် ပြန်တွန်းကန်ပေးထားကာ ကြီးမားလှသော သဲပိုးကောင်ကြီးကို တည့်တည့် ထိုးခွဲနေခဲ့လေသည်။

👾

Prev Next