MM Story Teller

Chapter 49

Viewers 3k

👾Chapter 49

သဲပိုးကောင်၏ အဖော်များက ယင်းမှာ ခက်ခဲနေသည့်ပြသနာတစ်ခု ဖြစ်ကြောင်း စတင် သဘောပေါက်လာကြပြီးနောက် M2742ဆီ လှမ်းထိုးလာကြသည်။

သို့သော်ငြား ဟယ့်ယွင်ထင်မှာ ရပ်၍ မရပေ။ သူသာ ရပ်လိုက်ပါက ဦးနှောက်အထိ မတိုက်ခိုက်နိုင်လျှင် အလင်းဓါးရှည်ကြောင့် ဖြစ်ပေါ်လာသော ဒဏ်ရာက ဇာဂ့်အတွက် ခပ်မြန်မြန် ကုသနိုင်သွားပေလိမ့်မည်။

အဖော် သဲပိုးကောင်များက ယာဥ်ကို ၎င်းတို့၏ သန်မာလှသော လက်တံများဖြင့် ပွတ်တိုက်လာကြပြီး သတ္တုများကို ဆွဲခြစ်သံများက စူးရှကာ နားကွဲမတတ် ဆူညံလာစေသည်။

မက်ခါတစ်ခုလုံး အသံကျယ်ကျယ်ဖြင့် တုန်ခါလာပြီး သတ္တုထည်က အလွန် သန်မာနေသည့်တိုင် လင်းဟန်မှာ ပွင်ထွက်သွားပေတော့မည်ဟု ထင်ယောင်ထင်မှား ခံစားချက်တစ်ခု ရနေခဲ့သည်။ လင်းဟန်က ဟယ့်ယွင်ထင်၏ ပုခုံးများ စတင်တုန်ယင်လာပြီး ညာဘက်လက်က ထိန်းချုပ်လက်ကိုင်ကို ကိုင်ထားကာ ဘယ်လက်က အလင်းဓါးရှည်ကို ထိန်းချူပ်ထားရင်းဖြင့် တဖြည်းဖြည်း အပေါ်တွန်းတင်လိုက်သည်ကို တွေ့လိုက်ရသည်။

အလင်းဓါးရှည်က သဲပိုးကောင်၏ ဝမ်းဗိုက်မှ တက်လာကာ နှဖူးနှင့် လည်ပင်းကို ဖြတ်သွားပြီးနောက် အဆုံးတွင် တန်ဖိုးအရှိဆုံး ဖြစ်သော ဦးခေါင်းကို နှစ်ခြမ်းခွဲလိုက်လေသည်။

သဲပိုးကောင်ကြီးက သောကအပြည့်ဖြင့် အော်ဟစ်မြည်တမ်းလိုက်ချိန်တွင် ၎င်း၏ အဖော်များက မက်ခါ၏ အနောက်ခြမ်းကို ခြေတံများဖြင့် ခပ်ပြင်းပြင်း ရိုက်ခတ်လာကြလေသည်။ တတိယတစ်ကောင် ရောက်လာသောအခါ ရှေ့နှစ်ကောင်ထက် ပိုဥာဏ်ကောင်းပုံရပြီး ၎င်း၏ ခြေတံအားကို သုံးကာ M2742 ကို မတင်လိုက်ပြီးနောက် အရုပ်ကလေးတစ်ရုပ်နှယ် မြေပေါ်သို့ ပစ်ပေါက်လိုက်၏။

ဟယ့်ယွင်ထင်မှာ အလင်းဓါးရှည်ကို ပြန်သိမ်းနိုင်ခဲ့ပြီး လင်းဟန်သည်ကား ဆွဲအားမရှိသည့် ခံစားချက်ကို ခံစားလိုက်ရသည်။ ဇာဂ့်ကောင်ကြီးက မက်ခါ၏ တစ်ဖက်ကို မနိုင်လိမ့်မည်ဟု မထင်ထားခဲ့ပါပေ။

လင်းဟန် ဘေးနားတွင် ငြိမ်ထိုင်မနေနိုင်တော့ဘဲ ထိုတစ်ခဏလေးတွင် ရုတ်တရက်ဆိုသလို အတွေးနစ်သွားလေသည်။

အိုမီဂါတစ်ယောက်အတွက် စိတ်စွမ်းအားဆိုသည်မှာ အမှန်တကယ်တွင် တန်ဖိုးမြင့်ပစ္စည်းတစ်ခုသာ ဖြစ်သည်။ အဆုံးတွင် စိတ်စွမ်းအင်ဟူသည်က ဖယ်ရိုမုန်းများ ကိုယ်ကာယခံနိုင်ရည်များနှင့် ချိတ်ဆက်ထားခြင်းဖြစ်ပြီး နှစ်ခုလုံးသည်က အိုမီဂါတစ်ယောက်အနေဖြင့် ပိုင်ဆိုင်နိုင်ခြင်း မရှိသည့် အရာများပင်။ စိတ်စွမ်းအားများက သူတို့ကို ထူးခြားပြောင်မြောက် ရှုပ်ထွေးလှသည့် စိတ်ပိုင်းဆိုင်ရာအလုပ်များကို လုပ်ဆောင်နိုင်စေပါသော်လည်း တိုက်ပွဲတွင်မူ ၎င်းကို အသုံးမချနိုင်ပေ။

လင်းဟန်မှာ တစ်ချိန်က မက်ခါမောင်းချင်သည့် အိမ်မက် ရှိခဲ့ဖူးသည်။ အကြောင်းမှာ သူ၏ စိတ်စွမ်းအားက ကိုယ်ကာယပိုင်းဆိုင်ရာ ချို့တဲ့မှုများကို ဖုံးကာပေးထားမည် ဟူ၍ တွေးခဲ့ဖူးသောကြောင့်ပင်။ သို့သော်ငြား လက်တွေ့ဘဝတွင် သင်ခန်းစာ တစ်ခု ရလိုက်ရပေသည်။

အခြားသော သဲပိုးကောင်နှစ်ကောင်က နားအူစေသော အော်သံများ ထုတ်လွှင့်၍ ခြေတံလက်တံများ ဆန့်တန်း၍ အပြင်းအထန် တိုက်ခိုက်လာသည်ကို မြင်လိုက်ရသည့်အခါတွင်ကား...

မက်ခါတစ်ခုလုံး တုန်ယင်သွားပြီး ဟယ့်ယွင်ထင်က ခြေတံတစ်ခုကို မက်ခါလက်မောင်းဖြင့် ခိုင်ခိုင်မာမာ ဆွဲဖမ်းထားလိုက်သည်။ သန်မာသော သတ္တုထည်က မနှစ်မြို့ဖွယ်ကောင်းလှပြီး တုန်ခါနေသော ဖိကြိတ်သံဖြင့် ခြေတံလက်တံအဆစ်များအား ဆွဲဖြဲတော့မည် ပုံပေါ်နေသည်။

လင်းဟန်က မက်ခါနှင့် အကျွမ်းတဝင် ရှိလှသည်။ ဒုတိယမောင်းနှင်ခုံတွင်လည်း လုပ်ဆောင်မှု မျက်နှာပြင်တစ်ခု ရှိနေသည်။ ရှေ့ပိုင်းထိုင်ခုံနှင့် တူညီသော စက်ပစ္စည်းများ ရှိနေသည့်အပြင် စိတ်စွမ်းအား ချိတ်ဆက်သည့် စနစ်တစ်ခုပင် ရှိနေသေးသည်။ လင်းဟန်သည်လည်း နှစ်ဦးမောင်းမက်ခါကို တစ်ခါမှ မလေ့လာခဲ့ဖူးသည်လည်း မဟုတ်ခဲ့ပေ။

ထပ်ရှိသေးသည်မှာ သူကိုယ်တိုင်သည်လည်း တစ်ချိန်က အလွန်တိုတောင်းလှသောအချိန်လေးတွင် ဟယ့်ယွင်ထင်နှင့်အတူ မောင်းနှင်ခဲ့ဖူးသေးသည်။

အင်ပါယာက နှစ်ဦးမောင်းမက်ခါများကို ဆက်ပြီး မထုတ်လုပ်တော့သည်မှာ နှစ်ပေါင်းများစွာ ရှိနေရုံသာ။ ထို့အပြင် လူအများစုက အခြေအနေအရပ်ရပ်များက ကြမ်းတမ်း ပြင်းထန်လှပြီး ထိုကဲ့သို့သော အခြေအနေမျိုးတွင် နှစ်ဦးမောင်း မက်ခါများ တည်ဆောက်ခြင်းကို မလိုအပ်ဟု တွေးခဲ့ကြသည်။ အကယ်ဒမီနှင့် တည်ဆောက်ရေးအဖွဲ့နှစ်ခုလုံးက ထိုပရောဂျက်ကို တဖြည်းဖြည်း ရပ်တန့်လိုက်ကြလေသည်။

ဥပမာအားဖြင့် ပထမမောင်းနှင်သူက တိုက်ခိုက်ရေး အတွေ့အကြုံနှင့် လေ့ကျင့်ရေး ရလဒ်များစွာ ရှိနေလျှင်ပင် မောင်းနှင်သူနှင့် တွဲဖက်မောင်းနှင်သူက စိတ်စွမ်းအားအဆင့် မတူညီပါက အဆုံးသတ်ရလဒ်မှာ မလွဲမသွေ ကျရှုံးပေလိမ့်မည်။

နှစ်ဦးမောင်း မက်ခါများ၏ ပျမ်းမျှ မောင်းနှင်သူများမှာ အနည်းဆုံး Sအဆင့်ရှိ မောင်းနှင်သူများ ဖြစ်ရပေမည်။ ထို့ကြောင့် မက်ခါတစ်ခုအတွက် တော်လွန်း၊ထူးချွန်လွန်းသော မောင်းနှင်သူ နှစ်ယောက်ကို တဆက်တည်း ရှာဖွေရခြင်းက အလဟဿ ဖြုန်းတီးခြင်းသာ ဖြစ်ပြီး အခြေစိုက်စခန်းသို့ ဝင်ရောက်လာသည့် မည်သည့်ဆာဂျင်တစ်ယောက်က ကိုယ်ပိုင်မက်ခါတစ်ခု မရရှိလိုဘဲ နေကြမည်နည်း။ မည်သူမှ အခြားသူများနှင့် ပူးတွဲချင်ကြမည် မဟုတ်ပေ။

လင်းဟန်မှာ ပထမမောင်းနှင်ခုံ၌ အမျိုးမျိုးသော စနစ်အလင်းရောင်များ တဖျတ်ဖျတ် လက်လာသည်ကို တွေ့မြင်နေရပြီး AIကလည်း အပြစ်အနာအဆာများကို တင်ပြနေသည်။ သူက ဆွဲအားမရှိသည့် ခံစားချက်ကို တောင့်ခံနိုင်ရန် ကြိုးစားလိုက်ပြီး ဟယ့်ယွင်ထင်အား အသိပေးရန် လွန်စွာ နောက်ကျသွားပေပြီ။ ဟယ့်ယွင်ထင်၏ စိတ်စွမ်းအားက SSS အဆင့် ဖြစ်ကြောင်း သိနေခဲ့သည်။

သူ၏ ကာယစွမ်းအားက မက်ခါမောင်းနှင်သူ မဖြစ်နိုင်အောင် ကန့်သတ်ထားလျှင်...

လင်းဟန်က ဒုတိယမောင်းနှင်ခုံ၏ စနစ်ကို ကျွမ်းကျင်စွာ ဖွင့်လိုက်သည်။

မောင်းနှင်ခုံ၏ AIအသံ ထွက်လာသောအခါ သူ ပြုံး၍ ပြောလိုက်သည်။ "ပထမမောင်းနှင်ခုံနဲ့ စိတ်စွမ်းအား ပူးတွဲချိတ်ဆက်ဖို့ တောင်းဆိုပါတယ်"

ဟယ့်ယွင်ထင်၏ ရှေ့နဖူးထက်တွင် ဝဲကျနေသော ငွေရောင် ဆံနွယ်များက ချွေးများ စိုရွှဲနေသည်ကို တွေ့နေရပြီး အပြင်ဘက်မှ သားရဲကောင်ကြီးများ၏ ကြောက်မက်ဖွယ်ရာ သွင်ပြင်များကိုလည်း မျက်နှာပြင်ထက်၌ တွေ့မြင်နေရသည်။ သို့သော်လည်း မထင်မှတ်ထားစွာသော သူ၏ စိတ်နှလုံးက ခိုင်မာနေခဲ့သည်။

လင်းဟန်မှာ မက်ခါကို ဘယ်သောအခါမှ သီးခြားမောင်းနှင်နိုင်လိမ့်မည် မဟုတ်ဟု တွေးခဲ့ဖူးသည်။

သို့သော်ငြား အနည်းဆုံးတော့ သူ၏ စိတ်စွမ်းအားက ဟယ့်ယွင်ထင်နှင့်အတူ တိုက်ခိုက်ကာ သူ့အား ထပ်ပြီး ကူညီပေးနိုင်ပေလိမ့်မည်။

ဒုတိယမောင်းနှင်ခုံ၏ ဆက်သွယ်ရေးစက်က ပထမမောင်းနှင်ခုံမှ ယာဥ်မောင်းထံသို့ အချိန်နှင့်အမျှ ပျံ့လွင့်နေသည်။

ထိုအခိုက်တွင် M2742 က သဲပိုးကောင်ကြီးထံမှ ဆွဲယူခံနေရသည်။ ထိုစဥ် ဟယ့်ယွင်ထင်မှာ စက်လက်မောင်း၏ ထိန်းချုပ်မှုကို ခိုင်ခိုင်မာမာ ပြန်ဆွဲယူနေဆဲ ဖြစ်သည်။ ပထမတွင် စနစ်၏ အချက်ပေးမှုကို ကြားလိုက်ရသောအခါ တစ်ခဏမျှ စိတ်ပူပန်သွားပြီး "လင်းဟန်"ဟု အလိုအလျောက် ခေါ်မိသွားသည်။

သူက နာမည်ကိုသာ ခေါ်ရုံဖြစ်သော်လည်း လင်းဟန်မှာ စိတ်ဖတ်ခြင်း မပြုရသေးခင်မှာပင် သူပြောချင်သည့် အရာကို သိနေသည်။

"မင်းဝင်မောင်းဖို့ မလိုပါဘူး"

လင်းဟန် ရှင်းပြလိုက်သည်။ "ကျွန်တော်က ခင်ဗျားနဲ့ စိတ်စွမ်းအားအဆင့် အတူတူပဲ"

ဟယ့်ယွင်ထင်က အားကုန်သုံး၍ အလင်းဓါးရှည်၏ အူတိုင်မှ စွမ်းအင်ကိုယ်ထည်ကို သွေးမည်းများ ဖုံးလွှမ်း၍ တဖြည်းဖြည်း အေးစက်လာပြီ ဖြစ်သော သဲပိုးကောင်ကြီးထံမှ ဆွဲယူလိုက်သည်။

"ကိုယ့်ရဲ့ စိတ်စွမ်းအားက မြင့်လွန်းတယ်... မင်း ခံနိုင်မှာ မဟုတ်ဘူး"

မက်ခါကြီးက အပြင်းအထန် တုန်ယင်လာသည်။ ဟယ့်ယွင်ထင်မှာ အလင်းဓါးရှည်ကို ဆွဲနှုတ်ကာ အခြားတစ်ကောင်နှင့် ရင်ဆိုင်ရန် ပြင်လိုက်စဥ်တွင် ညာဘက်လက်မှာ ဒုတိယသဲပိုးကောင်ကြီးထံမှ ဆွဲယူခံထားရကြောင်း တွေ့လိုက်ရသည်။

သဲပိုးကောင်ကြီး၏ အရေပြားက ကြက်သွေးရောင်လွှမ်းနေပြီး မက်ခါကို အနီးကပ်ဆွဲယူထားသော ပါးစပ်ပိုင်းက ပူနွေးသော အငွေ့များ ထုတ်လွှင့်နေကာ ရွှံရှာဖွယ်ရာ အနံ့ရှိနေသော သားရည်များ တတောက်တောက် ကျဆင်းနေလေသည်။

ဥာဏ်ရည်နိမ့် သဲပိုးကောင်နှစ်ကောင်က သန်မာလှသော သတ္တုများနှင့် မည်သို့ ရင်ဆိုင်ရမည်ကို အဆုံးတွင် နားလည်သွားပုံရသည်။ နောက်ခြေထောက်ကို ဆွဲယူထားသော တတိယမြောက် လက်တံက မြင့်တက်လာကာ ညာဘက်လက်ကို ဆွဲထားသော အဖော်ဖြစ်သူအား အချက်ပြနေသည့်အလား ထိပ်ပိုင်းတွင် နိမိတ်မကောင်းသော အစိမ်းရောင်အရည်များ ထုတ်လွှတ်လာသည်။

လင်းဟန်မှာ ဤတစ်ကြိမ်တွင် နားထောင်မနေတော့ပေ။ သူက မက်ခါနှင့် အရင်းနှီးဆုံး ဖြစ်လေရာ မည်သည့် လုပ်ဆောင်ချက်ကိုမဆို ကြီးကြပ်မှု မလိုအပ်ဘဲ ချက်ချင်း ဆုံးဖြတ်ကာ အဆင့်မြင့်ညွှန်ကြားမှုများကို အလွယ်တကူ ဆွဲထုတ်လာနိုင်သည်။

"ညာဘက်လက်ကို အေးခဲစေမယ်"

သူက ညာဘက်လက်ကို လျင်မြန်လှသော အရှိန်ဖြင့် အအေးစက်ပေးနေပြီး သတ္တုများ ပတ်ရံထားသော မက်ခါ၏ ညာဘက်လက်၌ ရေခဲမှုန်အလွှာတစ်ခု တဖြည်းဖြည်း ဖြစ်ပေါ်လာသည်ကို ကြည့်နေခဲ့သည်။

နောက်တစ်စက္ကန့်တွင် ဆက်သွယ်ရေးစက်အတွင်းသို့ တည်ငြိမ်စွာ ပြောလိုက်သည်။

"ခင်ဗျားဘက်က ကျွန်တော့်ကို ယုံကြည်ပေးနေသ၍ ကျွန်တော် ခင်ဗျားနဲ့ အတူရှိနေမယ်"

ပထမမောင်းနှင်ခုံမှ အသံတစ်ခုမှ ထွက်မလာပေ။

ဟယ့်ယွင်ထင်မှာ အအေးစက်ဖွင့်ရသည့် ရည်ရွယ်ရင်းကို ချက်ချင်းနားလည်သွားသည်။မူလက မက်ခါ၏ လက်မောင်းကို ခိုင်ခိုင်မာမာ ဆွဲကိုင်ထားသည့် ကြက်သွေးရောင် သဲပိုးကောင်ကြီးမှာ ရုတ်တရက် အပူချိန် ပြောင်းလဲမှုကြောင့် တစ်ခုခုမှားနေကြောင်း ခံစားလိုက်ရသည့်အလား အသံနိမ့်နိမ့်ဖြင့် အော်ဟစ်လိုက်သော်လည်း လွှတ်ပေးရန် တွန့်ဆုတ်နေဆဲပင်။

ထို့ကြောင့် အအေးဓါတ်က အမြင့်ဆုံးအထိ ရောက်သွားသောအခါ ညာဘက်လက်က လျင်မြန်စွာ အေးခဲသွားပြီး မကောင်းဆိုးဝါးကောင်ကြီးက မက်ခါ၏ လက်မောင်းကို အမှတ်တမဲ့ လွှတ်ခါလိုက်ရန် ကြိုးပမ်းလိုက်သည်။ M2742က ထိုအခြေအနေကို အခွင့်ကောင်းယူကာ ချက်ချင်းဆိုသလို မုန်တိုင်းကဲ့သို့ ရုန်းထွက်ရန် ကြိုးစားလိုက်သည်။

ယင်း၏ နောက်ခြေထောက်မှာ အကိုင်ခံထားရသော်ငြား ပြန်လည်အားယူရန် ကြိုးပမ်းလိုက်ပြီး ညာလက်မောင်းက အနီးကပ်ဗုံးဖြင့် ဖောက်ခွဲလိုက်သည်။

ကျယ်လောင်လှသော အသံကြီးနှင့်အတူ ကြက်သွေးရောင် သဲပိုးကောင်ကြီးက ပြန်ဆုတ်ရန် အချိန်မရလိုက်ပေ။ ၎င်း၏ လက်တံများက ပေါက်ကွဲမှုကြောင့် လွင့်ထွက်သွားပြီး ၎င်း၏ ခြေနှစ်ဖက်ကို တိုက်ရိုက် ဆွဲဖြုတ်သွားစေကာ အနက်ရောင်သွေးများနှင့် တုန်ခါနေသော ခြေလက်အဆစ်ပိုင်းများက နေရာအနှံ့ ပြန့်ကျဲသွားလေသည်။

သဲပိုးကောင်ကြီးက နာကျင်မှုကြောင့် လည်ချောင်းကွဲမတတ် အော်ဟစ်ကာ ခြေလှမ်း အနည်းငယ် နောက်ဆုတ်လိုက်ပြီးနောက် တစ်ခဏလောက်ထိ အနားမကပ်ရဲတော့ပေ။

မက်ခါက အဆုံးတွင် တစ်ခဏတာမျှ အနားရသွားသည်။

ဟယ့်ယွင်ထင်က လင်းဟန်အား ရပ်ခိုင်းချင်နေသဖြင့် ဆက်သွယ်ရေးစက်တွင် "မစ္စတာလင်း"ဟု ခေါ်လိုက်ပါသော်လည်း တစ်ဖက်လူထံမှ နှောက်ယှက်ခံလိုက်ရသည်။

“ကျွန်တော် ကူညီပေးနိုင်တယ်" လင်းဟန်၏ အသံက သိပ်မကျယ်ပါသော်လည်း ဟယ့်ယွင်ထင်အား တစ်စုံတစ်ရာကို သတိပေးနေသည့်အလား ခိုင်မာနေသည်။

"ကျွန်တော် ပြောထားတာကို ဗိုလ်ချုပ် မေ့သွားပြီလား... ဗိုလ်ချုပ်က မလွှမ်းမိုးနိုင်တဲ့သူပဲလေ"

ဟယ့်ယွင်ထင်က စကားပြောရပ်သွားပြီး သူ့အား ထပ်ပြီး မတိုက်တွန်းတော့ပေ။

လင်းဟန်မှာ ထိုအခိုက်တွင် ဟယ့်ယွင်ထင် မြင်နိုင်သည်ကို သိနေသည့်တိုင် ခပ်ဖွဖွ ပြုံးပြလိုက်သည်။

"ကျွန်တော့်ကို အတူခေါ်သွားပါ... ဗိုလ်ချုပ်"

အမှန်မှာ ၎င်းက လင်းဟန်အတွက် အခြားသူများ၏ စိတ်စွမ်းအားနှင့် ပူးတွဲချိတ်ဆက်ခဲ့သည့် ပထမဆုံးအကြိမ် ဖြစ်သည်။ ထို့အတွက် နှစ်ဖက်လုံးက အချင်းချင်းအပေါ် ယုံကြည်မှု အလုံအလောက် ရှိဖို့လိုသည်ကိုလည်း သိနေပါ၏။ ထိုအဆိုကို အဆုံးထိတိုင် ပြန်မပြောခဲ့ပါသော်လည်း သူတို့ အောင်မြင်လိမ့်မည်ဟု မယုံနိုင်လောက်အောင် ယုံကြည်ချက် ရှိနေသည်။ သူ့မျက်လုံးများကို မှိတ်လိုက်ပြီး စက်မှ ထွက်လာသော အမျိုးသမီးသံမှ ရေတွက်သံကို နားထေင်နေခဲ့သည်။

“ပထမမောင်းနှင်ခုံက လက်ခံလိုက်ပါပြီ"

"စိတ်စွမ်းအား ပူးတွဲချိတ်ဆက်မှုအတွက် ပြင်ဆင်နေပါပြီ"

"သုံး... နှစ်... တစ်"

နောက်ပြန် ရေတွက်မှု ရှင်းလင်းသွားသောအခါ လင်းဟန်က ရုတ်တရက်ဆိုသလို တစ်ကိုယ်လုံးကို အားပြင်းပြီး သိမ်မွေ့သော စွမ်းအားတစ်ခု ရစ်ပတ်ထားသည်ကို ရုတ်တရက် ခံစားလိုက်ရသည်။

ထိုအခိုက်တွင် ဟယ့်ယွင်ထင်၏ စိတ်စွမ်းအားကို ခံစားနေရသည်။ ဇာဂ့်များကို ခုခံရာ၌ ခိုင်မာမှုက သူ၏ ဒိုင်းကာ ဖြစ်သကဲ့သို့ သိမ်မွေ့မှုမှာ သူ့နှလုံးသားထဲက အခြေခံအကျဆုံး အမှန်တရား ဖြစ်သည်။

မည်သည့်ကိစ္စတွင်မဆို ထာဝစဥ် ရိုးသားသည်မှာ နှလုံးသားတစ်ခုပင်။

သူကိုယ်တိုင် မမောင်းနှင်နိုင်ကြောင်း သိနေသည့်အတွက် လင်းဟန်က စတင် အာရုံစိုက်ထားလိုက်ပြီး သိမ်းဆည်းထားသည့် စွမ်းအားများ ပေါက်ကွဲထွက်လာသောအခါ စိတ်စွမ်းအား ပူးတွဲချိတ်ဆက်မှုကို လိုက်၍ ထည့်သွင်းထားသော ယုံကြည်မှုများ အားလုံးကို သယ်ဆောင်ကာ ကိုယ်ပိုင်စွမ်းအားများကို တစ်ဖက်သို့ ပို့လွှင့်ရန် အပြင်းအထန် ကြိုးစားလိုက်သည်။

နောက်တစ်စက္ကန့်တွင် မက်ခါကို စီမံခန့်ခွဲရမည့်အစား M2742 က ဖွက်ဖွက်ညက်ညက် ကြေသွားစေနိုင်သောအားကို သယ်ဆောင်ထားသော စွမ်းအားတစ်ခုဖြင့် ပြန်လည် ခြေကုပ်ယူနိုင်ခဲ့သည်။

ကြက်သွေးရောင် သဲပိုးကောင်ကြီးက တိုက်ခိုက်ရာ၌ တစ်ခဏတာ စွမ်းအား ဆုံးရှုံးသွားချိန်တွင် အစိမ်းရင့်ရောင် လက်တံများပါသည့် သဲပိုးကောင်ကြီးက မက်ခါ၏ ခြေထောက်ကို ဆွဲရန် ကြိုးပမ်းနေဆဲပင်။

လင်းဟန်မှာ မက်ခါ၏ ပြင်ပမှ စိတ်စွမ်းအားက ပို၍ သန့်စင်လာသည်ကို ခံစားမိနေပြီး သဲပိုးကောင်ကြီးကလည်း တရှုးတရှုး မြည်နေလေသည်။ ၎င်းက မက်ခါကြီး တစ်ပတ်လှည့်လိုက်ပြီးနောက် မက်ခါ၏ ခြေထောက်ကို ဆွဲကိုင်ထားသော သဲပိုးကောင်ကြီးအး တစ်ချက်တည်းနှင့် ဆွဲလွှင့်လိုက်သည်ကို တွေ့မြင်လိုက်ရသည်။

စိတ်စွမ်းအား ပူးတွဲချိတ်ဆက်မှု ပြီးနောက် တစ်ယောက်၏ စိတ်စွမ်းအား အတက်အကျက တွဲဖက်လူအပေါ်ကို သက်ရောက်နိုင်သည်။

ဟယ့်ယွင်ထင်ဘက်မှ သူ၏ စိတ်စွမ်းအားကို ရရှိပြီးနောက် လင်းဟန်မှာ ဟယ့်ယွင်ထင်နှင့်အတူ သွေးများ ဆူပွက်လာသည်ကိုသာ ခံစားမိနေရသည်။ ထိုသူ၏ တင်းမာနေသော အာရုံကြောများ၊နီရဲနေသော မျက်လုံးများကိုပင် ခံစားမိလုနီးပါး ဖြစ်နေပြီး လုံးဝ ယိမ်းယိုင်သွားခြင်းမရှိသည့် ဆောင့်တိုးနေသော သွေးများကိုရောပင်...

အလိုလိုသိလာရသော အရာတစ်ခုမှာ ဟယ့်ယွင်ထင် ပိုင်ဆိုင်သည့် မက်ခါက ရုတ်တရက်ဆိုသလို လုပ်ဆောင်မှုများ တိုးတက်လာခဲ့သည်။

အစိမ်းရောင် လက်တံများနှင့် သဲပိုးကောင်ကြီးကို ခါချပြီးနောက် လက်တံနှစ်ဖက် ပြတ်သွားသည့် ဇာဂ့်ကောင်ကြီးထံ တည့်တည့် ပြေးသွားပြီး မက်ခါ၏ နဖူးထက်တွင် စုစည်းလိုက်သော စွမ်းအား၏ အရှိန်သည်လည်း နှစ်ဆတက်သွားလေသည်။ မကြာမီ အဖြူရောင် အလင်းတန်းတစ်ခု ပေါက်ထွက်လာပြီး သံလိုက်လေပွေလမ်းကြောင်း သေနတ်က ၎င်း၏ ဦးနှောက်ကို ထုတ်ချင်းပေါက် ဖောက်သွားလေသည်။ ကြီးမားလှသော သတ္တဝါကြီးက ထိတ်လန့်တကြား အော်မြည်သွားပြီး ၎င်း၏ တန်ဖိုးအရှိဆုံးသော ခေါင်းလေးမှာ အစိတ်စိတ်အမွှာမွှာ ကွဲထွက်သွားလေပြီ။

ဇာဂ့်၏ လက်တံများလည်း ပျံ့လွင့်လာကာ မက်ခါကို ရင်တထိတ်ထိတ် ဖြစ်စေနိုင်သော ဆူညံသံများနှင့် တွန်းတိုက်သွားကြလေသည်။

လင်းဟန်က သူ၏ နောက်ကျောပြင်ကိုသာ ရှင်းရှင်းလင်း တွေ့မြင်နေရသော်လည်း ထိုအခိုက်တွင် ယခင်က မရှိခဲ့ဖူးသော ယုံကြည်ချက်များ ပြည့်နေလေသည်။ သူက မျက်နှာပြင်ထက်ကို မျက်စိမလွှဲစတမ်း ကြည့်နေခဲ့ပြီး ရုတ်တရက်ဆိုသလို ပြင်းထန်လှသော မူးဝေမှုတစ်ခု ရောက်ရှိလာလေသည်။

သို့သော်ငြား ဟယ့်ယွင်ထင်ကမူ သက်ရောက်သွားပုံမရသဖြင့် လင်းဟန်က အံတင်းတင်းကြိတ်ကာ သူ၏ နောက်ထပ်သော စိတ်စွမ်းအားများကို ပို့လွှတ်ပေးနေခဲ့သည်။

မြေပေါ်သို့ လဲကျသေဆုံးနေသော ဇာဂ့်နှစ်ကောင် ရှိနေပြီး လင်းဟန်မှာ သရဲနှင့်တူသော အစိမ်းကောင်ကြီးအပြင် နောက်ထပ် သဲပိုးကောင် နှစ်ကောင်က လက်တံများ လွှဲယမ်း၍ သူတို့ထံ လာနေကြကြောင်း တုံ့ခနဲ သဘောပေါက်သွားလေသည်။

နှစ်စက္ကန့်အကြာ ၎င်းတို့က အော်သံစူးစူးများ ထုတ်လာကြပြီး အစိမ်းကောင်ကြီးနှင်အတူ အင်အား ပူးပေါင်းလိုက်ကြကာ သုံးကောင်လုံးက M2742 ပြေးလာနေကြသည်ပင်။

👾

Prev Next