Chapter 144

🚩Chapter -144

 Arc_7.နေရာလွဲမှားနေသောသမီး [ 10 ]

_____

စုယွီ၏သေဆုံးမှုကို ဂတ်စ်ပေါက်ကွဲမှုကြောင့်ဟု တရားဝင်သတ်မှတ်လိုက်ကြသည်။ စုဟိုင်ချန်းက စုယွီဟု ခွဲခြမ်းစိတ်ဖြာ၍မရသည့် ပြာမှုန့်များကိုသာ လက်ခံရရှိလိုက်သည်။ စုယွီသေဆုံးခြင်းဖြစ်ရပ်အတွက် သူက မေးခွန်းမထုတ်ခဲ့ချေ။ နောက်ဆုံးတွင်လည်း စုယွီက သူ့ကိုယ်သူ သေချာဖုံးကွယ်နေနိုင်ခဲ့သည်။ ထို့အပြင် စုဟိုင်ချန်းကလည်း သူ့တူကို ကျွမ်းကျင်လှသည့် ဆေးပညာအရည်အချင်းများနှင့် ဆရာဝန်တစ်ယောက်ဟုသာ ထင်မှတ်နေခဲ့သည်။ 

စုဟိုင်ချန်းလက်လှမ်းမမီသည့်နေရာများတွင် နိုင်ငံတကာရဲဌာနချုပ်မှ “Scorpion” ကုတ်အမည်ရှိ လူသတ်သမား၏ ဝရမ်းပြေးဆုငွေကြေညာချက်က ညတွင်းချင်းရုတ်သိမ်းသွားပြီး ထိုနေ့မှာပင် ဆုကြေးငွေက ဟွာရှား၏ လျှို့ဝှက်အကောင့်တစ်ခုထဲသို့ ဝင်ရောက်သွားသည်။ 

ထိုဆုငွေများက စစ်သူကြီးစု ဤကမ္ဘာတွင် ပထမဆုံး ရရှိသော ပိုက်ဆံများဖြစ်ပြီး စုစုပေါင်း ဒေါ်လာတစ်သန်းရှိသည်။ 

ဒီတော့ စုယွီရဲ့အသက်က ပိုက်ဆံဒီလောက်တန်တယ်ပေါ့...

သို့သော် စစ်သူကြီးစုက ထိုကိစ္စနှင့်ပတ်သက်၍ မကျေမနပ်ဖြစ်နေသည်။ 

စုယွီ၏အိမ်မှရလာသော ကုတ်ဝှက်ထားသည့် ဆက်သွယ်ရေးကိရိယာကိုကစားနေရင်း စုရွေ့မျက်လုံးများက လက်သွားသည်။ 

လုပ်ကြံသတ်ဖြတ်သူအဖွဲ့အစည်းတစ်ခုလုံးကို သတ်လိုက်ရင်ရော သူဆုကြေးငွေ ဘယ်လောက်ရနိုင်မလဲ...ဒါမှမဟုတ် စုယွီနေရာကိုဝင်ယူပြီး အဖွဲ့အစည်းအတွင်းမှာပဲ မစ်ရှင်တွေဆက်လုပ်ရင်း ပိုက်ဆံရှာရမလား။

ရွေးချယ်ရခက်လိုက်တာ...

စစ်သူကြီးစု အခက်တွေ့နေတာနှင့်ပတ်သက်၍ စုဝမ်က တစ်ခုပြောလာသည်။ 

“ဆုကြေးငွေအားလုံး အသိမ်းခံရမယ်... ဇနီးကိုပိုက်ဆံမအပ်တဲ့ ယောက်ျားက ယောက်ျားကောင်းတစ်ယောက်မဟုတ်ဘူးနော်”

“သေချာတာပေါ့ မိသားစုရဲ့‌ငွေကြေးဆိုင်ရာစွမ်းအားတွေကို ဇနီးကိုသာအပ်နှံသင့်တာပေါ့”

သဘာဝကျစွာပင် စုရွေ့က ဆုကြေးငွေအားလုံးကို အပ်နှံရန် တုံ့ဆိုင်းမနေပေ။ သို့သော် သူ့အစ်ကိုကြီးနှင့် မရီးတို့ တနေ့လုံး ဆိုဖာပေါ်တွင်ထိုင်၍ ချစ်ကြည်နူးနေကြသည်ကို တွေ့နေရသော ရှောင်းယွင်ယိက နောက်ဆုံးတွင် မနေနိုင်တော့ဘဲ အားလျော့စွာနှင့် လက်ထောင်လာသည်။ 

“အစ်ကိုကြီး ကျွန်တော်တစ်ခုလောက်ပြောလို့ရမလား” 

လျစ်လျူရှုခံရသည့်သူများက ထိုနည်းနှင့်သာ သူတို့တည်ရှိနေပါတယ်ဆိုသည့်ခံစားချက်ကို ရှာဖွေဖော်ပြနိုင်သည်။

“ဟင်”

ရှောင်းယွင်ယိ၏ အသံကိုကြားသောအခါ စုရွေ့ကချက်ချင်း သူ့ကိုကြည့်လာသည်။ 

“ယွင်ယိ...မင်းလဲပိုက်ဆံလိုချင်လို့လား”

စုရွေ့က သူ၏ဤအမည်ခံညီလေးကို မရွံမုန်း‌ပေ။ သူသာတကယ်ပိုက်ဆံလိုချင်ပါက စုရွေ့ငြင်းလိမ့်မည်မဟုတ်။

“မ....မဟုတ်ဘူး”

သူ့အစ်ကိုစကားကိုကြားသောအခါ ရှောင်းယွင်ယိက အသည်းအသန် လက်တို့ကိုရမ်းခါပြသည်။ ထို့နောက် သူ့ဖုန်းကို စုရွေ့အရှေတွင်ထောင်ပြ၍ လှုပ်ပြလိုက်သည်။ ရှားပါးတဲ့လေးနက်နေသည့် အမူအရာက သူ၏ဝိုင်းဝိုင်းပြည့်ပြည့်မျက်နှာပေါ်တွင် ရှိနေ၏။ 

“အစ်ကိုကြီး...ဒါရိုက်တာချီက ဖုန်းတွေဆက်တိုက်ခေါ်နေတယ် ကစားတာရပ်ပြီး မြန်မြန်လေးပြန်လာဖို့ပြောနေတယ် မဟုတ်ရင် ကျွန်တော်တို့ ဒဏ်ငွေခတ်ခံရလိမ့်မယ်တဲ့”

အာ....

ထိုအခါမှ စုရွေ့က သူရိုက်ကူးရေးအဖွဲ့မှ ထွက်လာကြောင်း သတိရသွားသည်။ ဤရိုက်ကူးရေးအဖွဲ့က ဒေါ်လာဘီလီယံချီတန်သည့် ထုတ်လုပ်ရေးတစ်ခုဖြစ်ပုံရပြီး ဒဏ်ငွေကလည်း သေးလိမ့်မည်မဟုတ်ပေ။ 

ထိုအကြောင်းကိုတွေးရင်း စုရွေ့ကညည်းညူလိုက်ပြီး မျက်လွှာချ၍ စုဝမ်၏ဆံနွယ်များကို လိမ်ကောက်ရင်း ကစားနေလိုက်သည်။

 “ဇနီးလေး ဘယ်လိုထင်လဲ”

အမြဲတမ်း မင်းမိန်းမရဲ့ စီစဥ်တာတွေကိုသာ လိုက်နာနေ...စစ်သူကြီးစု မင်းက တကယ်ကို မင်းမိန်းမရဲ့ ကျွန်ပဲ.....

“ယွင်ယိ နင်သွားလိုက်”

စုရွေ့၏ပေါင်ပေါ်တွင် လှဲနေသည့်စုဝမ်က မျက်လုံးများကိုတောင်မဖွင့်ဘဲ တုံ့ဆိုင်းခြင်းမရှိ ပြန်ဖြေလိုက်၏။

ရှောင်းယွင်ယိ : ဝူးဝူးဝူး ဒီချစ်ဖို့ကောင်းတဲ့ကောင်လေးကို မရီးကတကယ်သဘောမကျတဲ့ပုံပဲ.... သေချာပေါက် သဘောမကျဘူး ဟုတ်တယ်မလား....သေချာတယ် မီးသီးလုံးဖြစ်ရတာ ရှက်ဖို့ကောင်းလိုက်တာ...

စုဝမ်၏စကားကိုကြားပြီးနောက် ရှောင်းယွင်ယိက ဝမ်းနည်းသွားတော့သည်။ သို့သော် ဆိုဖာပေါ်တွင်ထိုင်နေသည့် စုရွေ့၏မျက်လုံးများက လက်သွားသည်။ လွန်ခဲ့သည့်ရက်များတွင် သူ့စိတ်ထဲ၌ သူ့ဇနီး‌လေးဖြင့်သာ ပြည့်နေပြီး ကမ္ဘာပေါ်မှ ကျန်ရှိနေသည့်အကြောင်းများကို မေ့နေခဲ့သည်။

စုရွေ့သိသည့် တာဝန်ကျ ဇာတ်ကြောင်းအရ ရှောင်းညီအစ်ကိုနှစ်ယောက်က အနုပညာလောကတွင် လှုပ်ရှားနေကြပြီး ယခုရိုက်နေသည့် ရုပ်ရှင်ကပဲ ရှောင်းယွင်ယိကို ညတွင်းချင်း နာမည်ကြီးသွားစေလိမ့်သည်။ မူလဇာတ်ကြောင်းတွင် ထိုရုပ်ရှင်ရိုက်ကူနေရင်း အမျိုးသားနံပါတ်၃အဖြစ်သရုပ်ဆောင်သည့် သရုပ်‌ဆောင်က ရိုက်ကူးနေသည့်အချိန်အတွင်း ပြင်းထန်သည့်ကားမတော်တဆမှုဖြစ်ခဲ့ရာ ရိုက်ကူးရေးအပြီးမသတ်နိုင်လိုက်ချေ။

 ထို့နောက် ဒါရိုက်တာချီက သင့်တော်သည့် သရုပ်ဆောင်ကို ရှာမတွေ့ခဲ့ပေ။ ထိုအခိုက်အခန့်တွင် ရှောင်းယွင်ယိက အမျိုးသားနံပါတ်၃၏ ကိုယ်ခံပညာအစားအဖြစ် လုပ်ဆောင်နေသောကြောင့် ရှောင်းချီက သူ့ညီလေးကို အကြုံပြုခဲ့သည်။ နာမည်ကြီးလူသိများသည့် ဒါရိုက်တာချီက ထိုကဲ့သို့မထင်မရှားဖြစ်ပြီး ကင်မရာရှေ့တွင် နောက်ကျောကိုသာပြရသည့် ကိုယ်ခံပညာအစားထိုးတစ်ယောက်ကို သတိမထားမိခဲ့ပေ။ 

ယခုတစ်ကြိမ်တွင် သူက ရွေးချယ်စရာမရှိဘဲ ရှောင်းယွင်ယိကို ရိုက်ချက်အနည်းငယ်စမ်းရိုက်ပေးရန် ကတိပေးခဲ့သည်။ ရှောင်းယွင်ရိ အဝတ်အစားတို့ဝတ်ဆင်ပြီး အဝတ်လဲခန်းထဲမှ ထွက်လာသောအခါ စတူဒီယိုဝန်ထမ်းအားလုံး မှင်သက်သွားကြသည်။ 

ဒီကလေးမျက်နှာလေးက အမျိုးသားနံပါတ်၃အတွက် အထူးပြုလုပ်ထားသလိုပဲ ဟုတ်တယ်မလား 

ဒါက နတ်ဘုရားရဲ့ တည်ဆောက်ပုံမျိုးပဲဟ...

ဒါရိုက်တာချီက နေရာ၌ပင် နောက်ဆုံးဆုံးဖြတ်ချက်ချလိုက်ကာ ထိုနေရာတွင် ရှောင်းယွင်ယိကို အစားထိုးလိုက်၏။ နှစ်ပေါင်းများစွာကြာအောင် ကိုယ်ခံပညာအစားထိုးအဖြစ်လုပ်ဆောင်နေခဲ့သော ရှောင်းယွင်ယိကလည်း ကင်မရာအရှေ့တွင် ကြောက်လန့်မနေချေ။ နှစ်ဦးနှစ်ဖက်က ပထမဆုံးအကြိမ်အဖြစ် ပျော်ရွှင်စွာ ပူးပေါင်းဖြစ်သွားကြသည်။ ထိုရုပ်ရှင်အား နှစ်ကုန်တွင်ရုံတင်သည့်အခါ ပရိသတ်အတော်များများက ရုပ်ရှင်ဧကရာဇ်ထျန်းဟော် အမျိုးသားဇာတ်လိုက်နေရာတွင် ပါဝင်သရုပ်ဆောင်ထားသည့် နာမည်ကြီးဒါရိုက်တာ၏ ရိုက်ကူးတင်ဆက်မှုကို လာကြည့်ခဲ့ကြသည်။ ရုပ်ရှင်အမည်က “ဧကရာဇ်မြို့တော်၏ အရှုပ်အရှင်းများ” ဖြစ်သည်။ အတိုချုပ်ပြောရလျှင် ၎င်းကဧကရာဇ်နန်းတော်အတွင်း သစ္စာဖောက်မှုများနှင့် အပြောင်းအလဲများအကြောင်းဖြစ်သည်။ အမျိုးသားနံပါတ်၁က အိမ်ရှေ့စံမင်းသားဖြစ်ပြီး တိုင်းပြည်ကို လမ်းမှန်ပေါ်သို့ ဆွဲတင်ရန် စီစဥ်ကြိုးစားနေသူတစ်‌ယောက်ဖြစ်သည်။ အမျိုးသားနံပါတ်၂က အိမ်ရှေ့စံမင်းသားကိုအမြဲရှုံးနိမ့်နေသော ဒုတိယမင်းသားဖြစ်ပြီး ရက်စက်ကြမ်းကြုတ်ကာ ဉာဏ်နီဉာဏ်နက်များသူဟု ဖော်ပြနိုင်သည်။ သို့သော် အဆုံးတွင်တော့ ပရိသတ်များအား အံ့အားသင့်သွားစေသူက အခန်းသိပ်မပါသည့် ဆဌမမင်းသားဖြစ်နေသည်။ 

ပထမဆုံး ပေါ်လာသည့်အချိန်တွင် သူက နှင်းကဲ့သို့ဖြူဖွေးနေသည့် မြေခွေးအမွေးဝတ်ရုံဖြင့် တစ်ကိုယ်လုံးကို လွှမ်းခြုံထားသည်။ အပြစ်ကင်းသည့် ကလေးမျက်နှာလေးနှင့် တွဲစပ်လိုက်သောအခါ ပထမဆုံးအမြင်မှာပင် လူတိုင်းကို သနားမိသွားစေ၏။

သူက နန်းတော်အစေခံတစ်ယောက်၏သားဖြစ်ပြီး မြို့တော်ထဲတွင် အမြဲ အနိုင်ကျင့်ခံ၊ ပြက်ရယ်ပြုခံရသော်လည်း နေ့တိုင်း တောက်ပသည့်အပြုံးလေးကို ချိတ်ဆွဲထားမြဲဖြစ်သည်။ 

အိမ်ရှေ့စံမင်းသား၏အနားတွင် အမြဲရှိနေတတ်ပြီး “အိမ်ရှေ့စံအစ်ကိုတော်”ဟု ခေါ်လေ့ရှိသည့် ထိုရိုးအ၍ ချစ်စဖွယ်ကလေးငယ်လေးက သိပ်မကြာခင်မှာပင် အမျိုးသမီးပရိသတ်များ၏ နှလုံးသားကို လှုပ်ကိုင်နိုင်လိုက်သည်။

သို့သော်လည်း နောက်ဇာတ်ကြောင်းတစ်ခုက ရုတ်ခြည်းပြောင်းလဲသွား၏။ အရှေ့ဘက်နန်းတော်က ညဘက်ညဉ့်နက်ချိန်တွင် မီးလောင်ကာ နန်းတော်ထဲတွင် အိမ်ရှေ့စံမင်းသားက လုပ်ကြံသတ်ဖြတ်သူ၏ အတိုက်ခိုက်ခံရသည်။ 

အမျိုးသမီးဇာတ်လိုက်က ဖမ်းဆီးရန်ရောက်လာပြီး ဓားကိုသုံး၍ လုပ်ကြံသတ်ဖြတ်သူ၏ မျက်နှာမှ အဝတ်စကို ဖယ်လိုက်‌သောအခါ လူတိုင်းက မှင်သက်သွားကြသည်။

တစ်ကိုယ်လုံး အနက်ရောင်တို့ကိုဝတ်ဆင်ထားသော ဆဌမမင်းသားတွင် ကလေးမျက်နှာလေးရှိနေဆဲပင်။ သို့သော် ယခုတစ်ခေါက်တွင် သူ့မျက်လုံးများက လူသားမဆန်စွာ အေးစက်နေသည်။ 

“အိမ်ရှေ့စံအစ်ကိုတော် နာသွားလား”

ထိုစကားလုံးများက နူးညံ့သည့်စကားလုံးများဖြစ်သော်လည်း သူ့ပါးစပ်မှ ထွက်လာသောအခါ ရေခဲတမျှ အေးစက်ပြီး ကြောက်မက်ဖွယ်ကောင်းနေလေသည်။ 

မိသားစုများကြားတွင် ပြဿနာများပေါ်ပေါက်လာခြင်း၊ ညီအစ်ကိုအချင်းချင်း သွေးအေးစွာသတ်ဖြတ်ခြင်း စသည်တို့က ဧကရာဇ်မိသားစုအတွက် ဝမ်းနည်းစရာကိစ္စများဖြစ်လာသည်။ 

လူများစွာက ထိုဇာတ်ကောင်အား သနားကရုဏာသက်နေမိချိန်၌ ရုပ်ရှင်အဆုံးသတ်နားသို့ ရောက်လာသောအခါ ဆဌမမင်းသားက လူတိုင်းကို နောက်ထပ် အံ့ဩစရာတစ်ခုပေးလာပြန်သည်။

ယခုတစ်ကြိမ်တွင် ဒုတိယမင်းသား၏ ပုန်ကန်သည့်တပ်များက မြို့တွင်းသို့ရောက်ရှိနေပြီဖြစ်ပြီး သူက အိမ်ရှေ့စံမင်းသား၏ တပ်အချို့ကိုပင် ထိန်းချုပ်ထားလေသည်။ သူက ယခုတစ်ကြိမ်တွင် ဧကရာဇ်မြို့တော်အတွင်းသို့ တစ်ကြိမ်တည်းနှင့် ထိုးဖောက်ဝင်ရောက်နိုင်လိမ့်မည်ဟု တွေးထားသော်လည်း ညအချိန်တွင် ကြီးမားသည့်မီးတောက်ကြီးက‌‌ လောင်ကျွမ်းကာ ဧကရာဇ်၏တပ်များက ရုတ်တရက် အင်အားအလုံးအရင်းနှင့် လမ်းကြောင်းအမျိုးမျိုးမှ ရောက်ရှိလာခဲ့သည်။

ဤတပ်စုများအား ဦးဆောင်လာခဲ့သူမှာ အခြားသူမဟုတ်ဘဲ အိမ်ရှေ့စံမင်းသား၏ အကျဥ်းချခြင်းခံနေရမည့် ဆဌမမင်းသား ဖြစ်နေသည်။

သူ့နောက်မှ ကြီးမားသည့်မီးတောက်ကြီးနှင့်အတူ ဆယ်ကျော်သက်လေး၏ မျက်နှာတွင် ပထမဆုံးအကြိမ်အဖြစ် လေးနက်နေသည့် မျက်နှာထားပေါ်လာပြီး သူကပြောလိုက်သည်။

“ဒုတိယအစ်ကိုတော်မင်းသား လက်လျှော့လိုက်ပါတော့…”

“အစကနေအဆုံးအထိ မင်းရှုံးခဲ့တယ်…ဘာလို့ဆို မင်းမှာ ဧကရာဇ်တစ်ယောက်ရဲ့ နှလုံးသားမရှိလို့ဘဲ”

ဧကရာဇ်နန်းတော်အတွင်းတွင် မထင်မှတ်ထားသည့်အပြောင်းအလဲများနှင့် ဇာတ်ရှိန်အမြင့်ဆုံးအပိုင်းများ ပြီးသွားပြီးနောက် အိမ်ရှေ့စံမင်းသားက အောင်မြင်စွာနှင့် ပလ္လင်ကိုဆက်ဆံကာ အမျိုးသမီးဇာတ်လိုက်နှင့်ထိမ်းမြား၍ ကောင်းမွန်သည့်အဆုံးသတ်ဖြစ်ခဲ့သည်။ သို့သော် ရုပ်ရှင်ရုံထဲမှ ထွက်လာကြသည့် အမျိုးသမီးပရိသတ်အများစုမှာ သူတို့၏မျက်လုံးများနီရဲသည်အထိ ငိုခဲ့ကြသည်။

သနားဖို့ကောင်းလိုက်တဲ့ ဆဌမမင်းသားလေး…

ဒါရိုက်တာနဲ့ဇာတ်ညွှန်းရေးဆရာတွေ ငါတို့ရဲ့ ဆဌမမင်းသားလေးကို ပြန်ပေး…

ရုပ်ရှင်အဆုံး၌ ဒုတိယမင်းသားက အိမ်ရှေ့စံမင်းသားကိုခြိမ်းခြောက်ရန် စိတ်ဓာတ်ပျက်ပြားကာ အမျိုးသမီးဇာတ်လိုက်ကိုဖမ်းခဲ့သည်။ ထိုအရေးကြီးနေသည့်အချိန်တွင် ဆဌမမင်းသားက ရဲရင့်စွာနှင့် ရှေ့တိုးခဲ့သည်။ နောက်ဆုံး၌ အမျိုးသမီးဇာတ်လိုက်ကို အောင်မြင်စွာ ကယ်နိုင်ခဲ့သော်လည်း ဆဌမမင်းသားက ဒုတိယမင်းသား၏ ဓားချက်အောက်တွင် ကြေကွဲဖွယ်သေဆုံးခဲ့လေသည်။ 

ထိုအခန်းတွင် သူ၏ဖြူစင်ပြီး အပြစ်ကင်းသည့်မျက်နှာလေး၌ သွေးများစွန်းထင်းသွား၏။

ဆယ်ကျော်သက်လေးက သူ့ဘေးရှိလူကို နှစ်နှစ်ကာကာကြည့်၍ ပြုံးကာ လက်မြှောက်လိုက်သည်။

ကလေးအရွယ်တည်းက သူကအေးစက်နေသည့်နန်းတော်ထဲမှ ဘယ်သူမှမချစ်သည့် မင်းသားတစ်ပါးဖြစ်ခဲ့သည်။ သူမွေးဖွားလာခြင်းက အမှားတစ်ခုသာဖြစ်သည်။ 

သူကနေ့တိုင်းပြုံးနေသော်လည်း ၎င်းကသန်မာချင်ယောင်ဆောင်နေခဲ့ခြင်းသာဖြစ်သည်။ တကယ်တမ်းတွင် သူ့နှလုံးသားတံခါးက ပိတ်နေခဲ့ပြီး အထီးကျန်နေခဲ့၏။

ထိုနှစ်များတွင် လူတစ်ဦးတည်းကသာ မိသားစု၏ နွေးထွေးမှုအစစ်အမှန်ကိုပေးခဲ့ပြီး မိသားစု၏ အဓိပ္ပာယ်အမှန်ကိုလည်း သိစေခဲ့သည်။

ထိုလူက သူ၏ အိမ်ရှေ့စံအစ်ကိုတော်ဖြစ်သည်။

နောက်ဆုံး သူ့ဘဝအပြီးသတ်ချိန်၌ သူ့အစ်ကို၏လက်ထဲတွင် အပြုံးလေးနှင့် မျက်လုံးမှိတ်သွားခဲ့သည်။ 

“နောက်ဘဝကျရင်လည်း ညီအစ်ကိုတွေလုပ်ကြရအောင် ဟုတ်ပြီလား”

ဤကမ္ဘာလောကကြီးတွင် အချစ်က လူများအား သေချင်၊ရှင်ချင်အောင် ပြုလုပ်နိုင်သည့် တစ်ခုတည်းသော အရာမဟုတ်ပေ။ 

“ဧကရာဇ်မြို့တော်၏ အရှုပ်အရှင်းများ”က ဆဌမမင်းသားဇာတ်ကောင်ကို ညတွင်းချင်းနာမည်ကြီးစေခဲ့သည်။ 

ထိုဗီဒီယိုကိုကြည့်ပြီးကြသည့် အမျိုးသမီးကြည့်ရှုသူအများစုက သူတို့၏ဘလော့များနှင့် Moments များတွင် ကြိမ်းမောင်းကြတော့သည်။ 

[ T/N Moments- WeChat Functionတစ်ခု ]

အမျိုးသမီးဇာတ်လိုက်က စိတ်ရှုပ်ဖို့ကောင်းလိုက်တာ…

နင်က လက်နက်တွေကို အကြောက်အလန့်ကင်းပြီး အမျိုးသမီးစောင့်ရှောက်သူနဲ့ တူနေရမှာလေ အရေးကြီးနေတဲ့အချိန်မှာ ဘာလို့ ကြက်လေးတစ်ကောင်ကိုတောင် တိုက်ခိုက်ဖို့ အားမရှိတဲ့ ကြာပန်းဖြူလေး ဖြစ်သွားရတာလဲ ဒါပေါ့ အဖမ်းခံလိုက်ရတာကတော့ နင့်အပြစ်မဟုတ်ဘူး ဒါပေမယ့် ငါတို့ ဆဌမမင်းသားလေး သေသွားရတာကတော့ နင့်အပြစ်ပဲ…

အမျိုးသမီးပရိသတ်များ၏တိုက်ခိုက်မှုများက ကြောက်မက်ဖွယ်ကောင်းပြီး သူတို့၏အင်အားက အကန့်အသတ်မရှိပေ။ ရှောင်းယွင်ရိက ညတွင်းချင်း နာမည်ကြီးသွားခဲ့သည်။ သိပ်မကြာခင်မှာပင် ညတွင်းချင်းအောင်မြင်သည့် အနုပညာရှင်လေးမှသည် အနုပညာလောက၏ရပ်တန့်၍မရနိုင်သည့် ကြယ်ပွင့်လေး တစ်ယောက်အဖြစ်သို့ ရောက်ရှိသွားတော့သည်။

တကယ်တမ်းတွင် စုရွေ့က ‘သရုပ်ဆောင်စွမ်းရည်’ဟုခေါ်သည့် အရာအပေါ် ရှင်းရှင်းလင်းလင်းသိသည်။

သူ့အမည်ခံညီလေးမှာ အဲ့ဒီသရုပ်ဆောင်စွမ်းရည် တကယ်ရှိလာလိမ့်မယ်လို့ မျှော်လင့်နေမိတာလား

သူက ထိုဇာတ်ကောင်အား ပထမဆုံးရုပ်ရှင်မှာတင် ကြုံတွေ့ခဲ့တာဖြစ်သည်။ တကယ်တမ်း၌ အသက်ငယ်ရွယ်စဥ်ကပင် သူ့အစ်ကို၏အချစ်ခံခဲ့ရသည့် ရှောင်းယွင်ယိက မိမိတို့တွင် ရှိနေသည့် မွေးရာပါ အရည်အချင်းများကို အမြဲတမ်းပြသနေရမည်ဟုဆိုခဲ့သေးသည်။ 

“အစ်ကိုကြီး” 

ယခုတွင် ရှောင်းယွင်ယိသည် သူ့အစ်ကိုကြီးက တိတ်ဆိတ်နေသည်ကို တွေ့လိုက်ရ၏။ သူ့မျက်နှာပေါ်မှ အမူအရာက ထူးဆန်းလှသည်။ သူကစိတ်ပူလာသောကြောင့် ဆက်ပြောလိုက်သည်။ 

“တကယ်တော့ ကျွန်တော် ပြန်သွားနိုင်ပါတယ်…တစ်ယောက်တည်းလည်းလုပ်နိုင်ပါတယ်”

တကယ်တမ်းတွင် သူက ထိုသို့ပြောရန်ကြောက်ရွံ့နေသော်လည်း ဟွာရှား၏ လိမ္မာသည့် ညီငယ်တစ်ယောက်အနေနှင့် သူ့အစ်ကိုကြီးကို အရှက်ရအောင် မလုပ်သင့်ပေ။

ရုတ်တရက် ရှောင်းယွင်ယိက သူ့ကိုယ်သူ အမြော်အမြင်ကြီးသလိုခံစားလိုက်ရသည်။ 

စုရွေ့ : ……..

ကျေးဇူးပြုပြီး ဘာအဓိပ္ပာယ်မရှိတာတွေ စိတ်ကူးယဥ်နေပြန်တာလဲ…

“ယွင်ယိ ဒါဆိုလဲ အဲ့လိုလုပ်တာပေါ့ ငါဒါရိုက်တာချီကို ဖုန်းဆက်လိုက်မယ် ပြီးတော့… ထားလိုက်တော့ နောက်မှပဲပြောတော့မယ်”

မူလတွင် စုရွေ့က ရှောင်းယွင်ရိအား ရိုက်ကူးရေးအဖွဲ့တွင် ကိစ္စတစ်စုံတစ်ရာရှိလာပါက သူ့ကိုအရင်ဆုံးအကြောင်းကြားရန် သတိပေးမလို့ဖြစ်သည်။ ဥပမာအနေနှင့် အမျိုးသားနံပါတ်၃၏ ကားမတော်တဆမှုကဲ့သို့အဖြစ်မျိုး.....။ သို့သော် စုရွေ့က ထိုအကြောင်းကိုစဥ်းစားလိုက်သော်လည်း မပြောဘဲ နေလိုက်သည်။

ယခုတစ်ကြိမ်တွင် ရှောင်းယွင်ယိက ရှောင်းချီ၏အကူအညီမပါဘဲ အနုပညာလောကထဲသို့ ဝင်ရောက်နိုင်သွားပါက သူ၏ကံကြမ္မာသာဖြစ်သည်။

အကယ်၍ သူအခွင့်အရေးကိုဆုံးရှုံးသွားလျှင်တောင်မှ ကိစ္စမရှိပေ။ ရုပ်ရှင်ရိုက်ကူးပြီးသွားလျှင် စုရွေ့က သူ့ကို အသင့်ပြင်အနေအထားဖြင့် စောင့်နေစေတော့မည်မဟုတ်ချေ။ ယခု သူတို့ပိုက်ဆံပြတ်မနေတော့ပေ။ သူ့ညီငယ်လေးကို သူကိုယ်တိုင် မြေတောင်မြှောက်ပေးနိုင်သည်။

အဆုံး၌ ရှောင်းယွင်ယိက နာနာခံခံနှင့်ပဲ အထုပ်အပိုးပြင်၍ ထွက်သွားတော့သည်။ လေဆိပ်တွင် ခွဲခွာရသည့်အချိန်၌ ထိုအစားသရဲလေးမှာ လေယာဥ်ပေါ်တွင် ကြက်ခြေထောက်များရှိပြီး ထိုကြက်ခြေထောက်များက အလွန်အရသာရှိကြောင်း တွေးနေရင်းတောင်မှ သူ့မျက်လုံးများကနီရဲနေဆဲပင်။

ကလေးအရွယ်တည်းက သူကသူ့အစ်ကိုကြီးနှင့် မခွဲဖူးပေ။ 

သူ့အစ်ကိုကြီးက သူနှင့် အနီးကပ်ဆုံးသူဖြစ်သည်။ ရှောင်းယွင်ယိက ငယ်ရွယ်စဥ်ကပင် မိဘများကို ဆုံးရှုံးလိုက်ရ၏။ ထို့ကြောင့် သူ့အစ်ကိုကြီးက အစ်ကိုကြီးတစ်ယောက်သာမဟုတ်ချေ။ သူ့မျက်လုံးထဲတွင် သူ့အစ်ကိုကြီးက အဖေနှင့်အမေနေရာပါ ဝင်ယူကာ သူ့ကိုကျွေးမွေးစောင့်ရှောက်ခဲ့သည်။ နောက်ပိုင်းတွင် သူတို့က မွေးစားအဖေနှင့်တွေ့ဆုံပြီး သူတို့၏ဘဝများတိုးတက်လာခဲ့သည်။ သို့သော်လည်း ရှောင်းယွင်ရိ၏နှလုံးသားထဲတွင်တော့ သူ့အစ်ကိုကြီး၏နေရာတွင် မည်သူ့ကိုမှအစားမထိုးနိုင်ချေ။ 

လေဆိပ်မှထွက်လာရင်း ပျံသန်းသွားသည့်လေယာဥ်ကိုကြည့်၍ စုဝမ်က စုရွေ့၏ ကြီးမားသည့်လက်ကို ဆုပ်ကိုင်လိုက်သည်။ 

“စိတ်လျှော့...သူအဆင်ပြေမှာပါ သူလည်း သူ့ကိုယ်ပိုင်လမ်းကြောင်းရှိသင့်တယ် ကျွန်မတို့က သူနဲ့အတူ တစ်သက်လုံးနေသွားလို့မရဘူးလေ”

တာဝန်ကျကမ္ဘာများထဲသို့ ဝင်ရောက်လာပြီး အခြားသူများ၏ဘဝတွင် ဝင်ရောက်နေရာယူခြင်းက မစ်ရှင်လုပ်ဆောင်သူ တစ်ဦးချင်းစီတိုင်းအပေါ် မူလပိုင်ရှင်၏ ခံစားချက်တို့ အနည်းနှင့်အများ သက်ရောက်မှုရှိသည်။

ရှောင်းညီအစ်ကိုများက တစ်ယောက်ကိုတစ်ယောက် အမှီသဟဲပြုနေခဲ့ကြသည်။ ထိုညီအစ်ကိုကြားက နက်ရှိုင်းသည့် ခံစားချက်များက စုရွေ့ကိုမနာလိုဖြစ်စေသည်။

“အင်း ပြီးတော့ ဒီကလေးက..... အနာဂတ်မှာ ပျော်ရွှင်ရမှာပါ”

စုရွေ့ကပြုံး၍ စုဝမ်၏လက်ကို ပြန်ဆုပ်ကိုင်လိုက်၏။

“ပြန်ကြရအောင်”

သူတို့နှစ်ယောက်က တက်စီငှား၍ ငှားရမ်းထားသည့်တိုက်ခန်းသို့ ပြန်လာကြသည်။ တိုက်ခန်း၏တံခါးဆီသို့ မရောက်သေးခင်မှာပင် စုရွေ့မျက်နှာအမူအရာက ပြောင်းလဲသွားသည်။

တိုက်ခန်းတံခါးကပွင့်နေပြီး အခန်းထဲတွင် တစ်ယောက်ယောက်ရှိနေသည်။

စုဝမ်က ပုံမှန်မဟုတ်တာကို သိသိသာသာခံစားလိုက်ရသည်။ သူမ”အိမ်”၏ တံခါးဝသို့လာလိုက်ချိန်တွင် တံခါးကိုမဖွင့်မီ အနည်းငယ်တွန့်ဆုတ်နေမိသည်။ တံခါးပေါက်နှင့် မျက်နှာချင်းဆိုင်ရှိနေသော ဆိုဖာတွင် ဂုဏ်သိက္ခာကြီးမားသည့် ပုံရိပ်တစ်ခုက ထိုင်နေသည်။ 

စုဝမ်၏မျက်နှာကိုမြင်သောအခါ ထိုလူ၏ အကြည့်များကစူးရှသွားပြီး မျက်နှာထက်တွင် ရှုပ်ထွေးနေသည့် အမူအရာအချို့ဖြတ်ပြေးသွားသည်။ 

“အဖေ ရောက်နေတာပဲ”

စုဝမ်က အခန်းထဲသို့မဝင်သေးခင် တီးတိုးဆိုလိုက်သည်။

အခန်းထဲတွင် ရှိနေသူက သူစိမ်းမဟုတ်ဘဲ စုဝမ်၏အဖေ စုဟိုင်ချန်းသာဖြစ်လေသည်။

_~~~~_

🚩