MM Story Teller

Chapter 145

Viewers 4k

🚩Chapter -145

Arc_7.နေရာလွဲမှားနေသောသမီး [ 11 ]

_____

လွန်ခဲ့သည့်ရက်များတွင် စုဟိုင်ချန်းသည် Dမြို့၏စီးပွားရေးလောက၌သာ ရုန်းကန်လှုပ်ရှားနေခဲ့သည်။ သူက ပြိုင်ဘက်များကြားတွင် လှည့်စားမှုနှင့်လောဘတို့ကို ကျင့်သားရနေပြီး ထူးခြားသည့် လုပ်ငန်းရှင်စိတ်ဓာတ်ကိုလည်း ကျင့်ကြံမွေးမြူနေခဲ့ပြီးဖြစ်သည်။ ယခု၌ စုဟိုင်ချန်းက ဆိုဖာပေါ်တွင် ထိုင်ရုံထိုင်နေသော်လည်း လေးစားစရာကောင်းပြီး တသီးတသန့်ဖြစ်နေသည့်ပုံပေါ်နေသည်။

စုဝမ်၏ခေါ်သံကိုကြားသောအခါ စုဟိုင်ချန်းက အေးစက်စွာ နှာခေါင်းရှုံ့လိုက်သည်။

“ဟမ့်… အဖေဆိုတာတော့ သိသေးတယ်ပေါ့”

စုဝမ်က အပြစ်ကင်းသည့်ပုံစံလေးဖြင့် နှုတ်ခမ်းကိုက်လိုက်သည်။ သူမဘေးတွင် ရပ်နေသော စုရွေ့က စုဟိုင်ချန်း၏ အေးစက်နေသည့် အသံကိုကြား‌သောအခါ မျက်လုံးများကျဥ်းမြောင်းသွားပြီး စုဟိုင်ချန်းကို အေးစက်စက် အကြည့်တစ်ချက်ပေးလိုက်သည်။

စစ်သူကြီးစု၏မျက်လုံးများက စူးရှလွန်းသောကြောင့်ဖြစ်နိုင်၏။ စုဟိုင်ချန်းက ချက်ချင်းသတိထားမိသွားသည်။

လူနှစ်ယောက်၏ မျက်လုံးများက တွေ့ဆုံသွားလေသည်။ စုဟိုင်ချန်းက စုရွေ့အား ခွန်အားတို့ကို ပြသချင်သော်လည်း စုရွေ့၏စူးရှလွန်းသည့် မျက်လုံးများအောက်တွင် တဖြည်းဖြည်းရှုံးနိမ့်သွား၏။

ဒီလူငယ်လေးက ဒေါသကြီးတာပဲ…

ပထမဆုံးအကြိမ်အဖြစ် စုဟိုင်ချန်းက သဘောမကျဖြစ်နေမှုတို့ကို အဝေးသို့ပို့လိုက်ကာ သူ့သမီးနောက်မှ လူငယ်လေးအား တိတ်တဆိတ် စူးစမ်းနေလိုက်သည်။ တံခါးဝတွင် သူကသင့်တင့်လျောက်ပတ်သည့် အဝတ်အစားများကို ဝတ်ဆင်ထားပြီး ဆံပင်တိုများက သန့်ရှင်းသပ်ရပ်ကာ ခန္တာကိုယ်ကဖြောင့်မတ်စွာရပ်နေသည်။

စုဟိုင်ချန်းကဲ့သို့ ဂုဏ်ပုဒ်များနှင့်လူတစ်ယောက်က လူများကို အသွင်အပြင်ပေါ်တွင်ကြည့်၍ မဆုံးဖြတ်ကြသော်လည်း အပြုအမူနှင့် စိတ်ဓာတ်ကိုတော့ကြည့်လေ့ရှိသည်။

ပထမဆုံးအကြိမ် သတိထား၍ စူးစမ်းလိုက်သည့်အချိန်မှာပင် စုဟိုင်ချန်း၏နှလုံးသား၌ အံ့ဩတုန်လှုပ်မိသွားသည်။ သူ့အရှေ့တွင်ရှိနေသည့် လူငယ်လေးမှ ပေးလာသော ခံစားချက်က အလွန်တုန်လှုပ်စရာကောင်းလေသည်။

စုဟိုင်ချန်းက သူ့ကိုယ်သူ လူဘယ်နှယောက်ကို လေ့လာစူးစမ်းခဲ့ဖူးသလဲဟု ပြန်မေးလိုက်သော်လည်း တကယ်တမ်းတွင် ထိုလူငယ်လေး၏အကြည့်တစ်ချက်နှင့်တင် သူကအနိုင်ယူခံလိုက်ရသည်။ လူငယ်လေး၏ ကိုယ်နေဟန်ထား တစ်ခုချင်းစီက မြင့်မြင်ကျော့ရှင်းသည့်လေထုကို ဆောင်ကျဥ်းနေသည်။ စုဟိုင်ချန်းသည် ထိုကဲ့သို့သော သူမျိုးကို အဝေးကနေ တစ်ခါသာမြင်ဖူးသည်။ ထိုအချိန်တွင် သူတွေ့ခဲ့သည့်သူက ၄၉ခုမြောက်မြို့တော်၏ အကြီးဆုံးသခင်လေးဖြစ်သည်။

ဒါက……

တစ်ခုခုမှားနေတာမဟုတ်ဘူးလား…ဒီရှောင်းချီလို့ခေါ်တဲ့ လူငယ်လေးက ဒီတိုင်းကိုယ်ခံပညာသင်တန်းက စတန့်သမားတစ်ယောက်လို့ ကျန်းယိုက သူ့ကိုသေချာ ပြောခဲ့တာ…

“မင်း…မင်းကရှောင်းချီလား”

တွန့်ဆုတ်နေရင်းနှင့်ပင် စုဟိုင်ချန်းက မျက်မှောင်ကြုတ်၍ မေးလိုက်သည်။

စုရွေ့က မျက်ခုံးပင့်လိုက်၍ အေးအေးလူလူပင်ခေါင်းညိတ်ပြသည်။

“ကျွန်တော်က ရှောင်းချီပါ ပထမဆုံးတွေ့ဆုံခြင်းဖြစ်ပါတယ် မင်္ဂလာပါ ဦးလေးစု”

“မင်္ဂလာပါ မင်္ဂလာပါ”

စုဟိုင်ချန်းက စုရွေ့စကားများကိုကြားသောအခါ သူ၏အားကောင်းသည့် အရှိန်အဝါများ၏ ဖိနှိပ်ခြင်းကိုခံရသောကြောင့် မသိစိတ်အရ ခေါင်းပြန်ညိတ်ပြလိုက်သည်။

ယခုတစ်ကြိမ်တွင် စုရွေ့အပေါ် စုဟိုင်ချန်း၏ အကောင်းမြင်သည့်စိတ်များက ပိုတိုးတက်သွားသည်။ အနည်းဆုံးတော့ ယခုတစ်ကြိမ်တွင် စစ်သူကြီးစု၏ စိတ်ဓာတ်က စုဟိုင်ချန်းစိတ်ကူးထားခဲ့သည့် ကျေးလက်တွင်သာကြီးပြင်းလာပြီး မြို့ပေါ်သို့ အလုပ်လုပ်ရန်ကြိုးစားတက်လာသည့်သူထက် အဆပေါင်းရာချီအောင် အားကောင်းလေသည်။ သို့သော်ငြားလည်း သူ့သမီးအား ထိုလူနှင့် ပတ်သက်ခွင့် မပေးနိုင်ပေ။

“မင်းကငါ့ကို ဦးလေးလို့ခေါ်မှတော့ ငါလည်းမင်းကို ရှောင်ရှောင်းလို့ခေါ်တာပေါ့… ရှောင်ရှောင်း ကျန်းယိုပြောတာတော့ မင်းကအခုမှ Dမြို့ကိုရောက်လာတာတဲ့… အလုပ်ရောရှာတွေ့ပြီလား”

မြေခွေးအိုကြီးက မြေခွေးအိုကြီးဟူ၍ခေါ်ရန် တကယ်ကို ထိုက်တန်လေသည်။ လူနှစ်ယောက်က တံခါးမှဝင်လာသောအခါ စုဟိုင်ချန်းက သိသိသာသာကိုပင် ပြင်းထန်စွာကဲ့ရဲ့ခြင်းကို စတင်လာ၏။

ယခုလေးတင် စစ်သူကြီးစုက သူ့အရှိန်အဝါများကြောင့် မတုန်လှုပ်သွားသည်ကို တွေ့သောကြောင့် စုဟိုင်ချန်းက ချက်ချင်း နည်းဗျူဟာကို ပြောင်းလဲလိုက်သည်။

စုရွေ့က စုဟိုင်ချန်း၏ မေးခွန်းကိုကြားသောအခါ မျက်နှာပေါ်မှ အေးစက်မှုများက အနည်းငယ် လျော့နည်းသွားသည်။

ယောက္ခမထံမှ အကဲဖြတ်ခံရသည့်ခံစားချက်က စုရွေ့ကို တစ်မျိုးတစ်ဖုံကောင်းမွန်တဲ့ခံစားချက်ကိုခံစားရစေသည်။

“ကျွန်တော်အလုပ်မရှာချင်ပါဘူး… ဒါပေမယ့် ကိုယ်ပိုင်လုပ်ငန်းတည်ထောင်ဖို့…စီစဥ်နေပါတယ်”

ကိုယ်ပိုင်လုပ်ငန်း တည်ထောင်မယ်...ဒီလူငယ်လေးရဲ့ လေသံကတော့ မသေးဘူးပဲ...

စုဟိုင်ချန်းကပြုံးလိုက်၍ မျက်လုံးများကို ကျုံ့လိုက်သည်။

“အခုခေတ် လူငယ်တော်တော်များများက စွမ်းအင်နဲ့ စိတ်ပြတ်သားမှုတွေ အတော်လေးရှိလာကြတာပဲ…ဒါပေမယ့် စစချင်းရင်းနှီးမြှုပ်နှံငွေ ယွမ်နှစ်သိန်းနဲ့ ဆိုရင်တောင်မှ Dမြို့မှာ နေရာတစ်ခုရဖို့ ခက်ခဲနေတုန်းပဲ”

၎င်းက စီးပွားရေးလုပ်ငန်းရှင်တစ်ယောက်၏ ဟောပြောချက်ပင်ဖြစ်သည်။ သူ့သမီးနှစ်ယောက်က စုရွေ့ကို ယွမ်တစ်သိန်းပေးပြီးမှန်း စုဟိုင်ချန်း သေချာလေးသတိထားမိသည်။ သူကတိုက်ရိုက်ဖွင့်မချလိုက်ဘဲ အလိမ္မာလေးနှင့် ကွေ့ဝိုက်ထောက်ပြလိုက်ခြင်းသာဖြစ်သည်။ ပထမတွင် စုရွေ့အား သူ့ကိုယ်ပိုင်လုပ်ငန်းစတင်ရန်အတွက် မိန်းမတစ်ယောက်အပေါ် မှီခိုနေရကြောင်းပြောရင်း ကဲ့ရဲ့လှောင်ပြောင်ပြီး ဒုတိယအနေနှင့် သူ့ကိုပို၍စူးစမ်းလေ့လာလိုက်ခြင်းသာ….။

ပိုက်ဆံလိုချင်ရင် အရေအတွက်ကိုသာပြောလိုက် ပိုက်ဆံနဲ့ဖြေရှင်းနိုင်တဲ့အရာဖြစ်နေသရွေ့ ပြဿနာမရှိဘူး…

“ဦးလေးစုက နောက်နေပြန်ပါပြီ”

စုဟိုင်ချန်း၏ စကားကိုကြားပြီးနောက် စုရွေ့လည်းပြုံးလာသည်။

“ယွမ်နှစ်သိန်းဆိုတာက ကျွန်တော့်ရှောင်ဝမ်အတွက် ဝတ်စုံတစ်စုံဝယ်ပေးဖို့တောင် မလောက်ပါဘူး”

ပြောနေရင်းနှင့် သူမအဖေကြည့်နေသည်ကိုပင်လျစ်လျူရှုကာ စုရွေ့၏လက်က စုဝမ်၏ပခုံးပေါ်သို့ ကျရောက်သွားသည်။ ထို့နောက် သူက စုဝမ်ဘက်သို့ ပြုံးပြုံးလေးနှင့်လှည့်လာ၏။

“ဇနီးလေး အဲ့ဒါ မှန်တယ်လို့ထင်လား”

စုဝမ်က စုရွေ့ကိုမျက်လုံးမှိတ်ပြလိုက်ပြီး စုဟိုင်ချန်းဒေါသမထွက်ခင် ဘဏ်ကတ်ကိုယူ၍ ပေးလိုက်သည်။

“အဖေ ဒီမှာ ယွမ်ခုနစ်သောင်း… ကျန်းယိုကိုပြန်ပေးလိုက်ပါ သမီးတို့ပိုက်ဆံမလိုပါဘူး… ရှောင်းချီမှာ သူ့ကိုယ်ပိုင်ပိုက်ဆံရှိပြီး သမီးတို့ စုမိသားစုက ပိုက်ဆံတွေကို သုံးမှာမဟုတ်ဘူး”

“ဟင်”

ယခုလေးတင်မှရောက်လာသည့် စုဟိုင်ချန်းက သူ့သမီးအ‌ပေါ် စုရွေ့၏ ပြောင်ချော်ချော်အပြုအမူကို တွေ့လိုက်သောအခါ စုဝမ်အား ဒေါသတို့ဖြင့်ကြည့်လိုက်သည်။

“ပိုက်ဆံရှိတယ် ဟုတ်လား သူကမင်းကို ဘယ်လောက်ပေးနိုင်လို့လဲ ရှောင်ဝမ် မင်းကငယ်သေးတယ် ဒီကမ္ဘာကြီးက လူတွေရဲ့စက်ဆုပ်ဖို့ကောင်းတဲ့ နှလုံးသားတွေကိုတောင် မင်းမသိသေးဘူး… ရှောင်းချီ မင်းကိုလည်း အရည်အချင်းရှိတဲ့လူတစ်ယောက်လို့ငါမြင်ပါတယ် ရှည်ရှည်ဝေးဝေးပြောမနေကြရအောင် မင်းငါ့သမီးကိုလက်လွှတ်ဖို့ ပိုက်ဆံဘယ်လောက်ပေးစေချင်လဲ သူမကအခုမှ ကျောင်းတက်နေတုန်းရှိသေးတာ ဘာမှမသိသေးတဲသူမို့ မင်းကို ပေါ့သေးသေးသဘောထားတွဲမှာ မဟုတ်ဘူး”

ယခုတွင် စုဟိုင်ချန်းကမြင့်မြတ်ချင်ယောင်မဆောင်နိုင်တော့ပေ။ ရင်နှင့်ရင်း၍ ပြုစုပျိုးထောင်ခဲ့ရသော သူ့သမီးလေးကို ထိုမျက်လုံးဖြူ ဝံပုလွေ လှည့်စားလာရန် ခွင့်ပြုမပေးနိုင်ချေ။

စုဟိုင်ချန်း၏ စကားလုံးများကိုကြားသောအခါ စုရွေ့အကြည့်များအေးစက်သွားသည်။ သူကအရှေ့သို့ အနည်းငယ်တိုးလာပြီး စုဟိုင်ချန်းမျက်နှာကို တည့်တည့်ကြည့်လိုက်ချိန်တွင် ဆွဲဆောင်မှုရှိသည့် နှုတ်ခမ်းပါးများက ထူးဆန်းစွာ ကွေးတက်သွားလေသည်။

“ဦးလေးစုရဲ့ စုအုပ်စုလုပ်ငန်းက စုစုပေါင်းဘယ်လောက်တန်လဲ ကျွန်တော်မသိဘူး”

စုရွေ့၏စကားကိုကြားသောအခါ စုဟိုင်ချန်းက ချက်ချင်းဆိုဖာပေါ်မှ ထလာ၏။

“လူငယ်လေး သိပ်ထောင်လွှားမနေနဲ့… စုမိသားစုရဲ့ ပိုင်ဆိုင်မှုအားလုံးက ယွမ်သန်းတစ်ရာရှိတယ် မင်းတစ်လုတ်တည်းနဲ့ ကုန်အောင်မစားနိုင်ဘူး”

“ဦးလေးစု ဒါဆို ဦးလေးက မီလီယံနာပဲ”

စုဟိုင်ချန်း၏ စကားကိုကြားသော စုရွေ့က အပြုံးမမည်သော အပြုံးတစ်ခုကို လှစ်ဟပြလိုက်သည်။

“ဦးလေးစုက ရှောင်ဝမ်ကို သိပ်ချစ်မှတော့ သူမရဲ့ပျော်ရွှင်မှုအတွက် အဲ့ဒီသန်းရာပေါင်းများစွာ ဆုံးရှုံးရမယ်ဆိုရင်ရော ဦးလေးဘာလုပ်မလဲ ဒါမှမဟုတ် သူမက ဦးလေးရဲ့ လုပ်ငန်းနဲ့ပိုက်ဆံတွေကို မယှဥ်နိုင်ဘူးလား”

ဘာကပိုအရေးကြီးလဲ ပိုက်ဆံလား ခံစားချက်လား…

စုရွေ့က စုဟိုင်ချန်းနှင့် နေရာလဲလိုက်သည်။ အစမှအဆုံးအထိ စုရွေ့ကသာ ဤစကားဝိုင်း၏စည်းချက်ကို ထိန်းချုပ်နေသည်ဟုဆိုရမည်။

ထိုအချိန်တွင် စုရွေ့၏မေးခွန်းကြောင့် စုဟိုင်ချန်း၏အကြည့်များရုတ်တရက် ပြောင်းလဲသွားလေသည်။ ထို့နောက် သူက ထိုလူငယ်လေး၏ စကားထောင်ချောက်ထဲသို့ သက်ဆင်းသွားမှန်းကို သတိထားမိသွားသည်။

အကယ်၍ သူက စုဝမ်သည်သာ စုအုပ်စုထက်ပိုအရေးကြီးသည်ဟု ဖြေလိုက်လျှင် ထိုလူငယ်လေးက မတန်တဆဈေးတင်ရန် အခွင့်ကောင်းယူလာလိမ့်မည်။

ထို့အပြင် သူက စုအုပ်စုက စုဝမ်ထက်ပိုအရေးကြီးသည်ဟုဖြေလိုက်လျှင် သူနှင့်သူ့သမီးကြားမှ ဆက်ဆံရေးကို ခလောက်ဆန်မည့် သူ့ရည်ရွယ်ချက်အောင်မြင်သွားလိမ့်မည်။

စီးပွားရေးလောကမှ ညှိနှိုင်းမှုအမျိုးမျိုးကို အတွေ့အကြုံရှိသော စုဟိုင်ချန်းက လျင်မြန်စွာ စိတ်တည်ငြိမ်အောင်လုပ်လိုက်ပြီး သူ့အရှေ့မှ လူငယ်လေးကို သတိထားကြည့်လိုက်သည်။ အဆုံးတွင်တော့ စုဟိုင်ချန်းက သူ့ကိုအထင်သေးနေဆဲပင်ဖြစ်သည်။

“ရှောင်းချီ မင်းရဲ့ သဘောထားကွဲလွဲအောင်လုပ်တာက အဓိပ္ပာယ်မရှိဘူး ရှောင်ဝမ်က ငါ့ရဲ့သမီးပဲ ပြီးတော့ ငါ့ရဲ့ပိုင်ဆိုင်မှုတွေက အနာဂတ်မှာ သူမအပိုင်ဖြစ်လာမှာ”

စုဟိုင်ချန်းကပြုံး၍ တစ်ဖက်လူ၏ မျက်နှာအစစ်အား တွေ့သွားသည်အထင်နှင့် ပေါ့ပေါ့ပါးပါးပင်ပြောလိုက်သည်။ စုဟိုင်ချန်းက စုရွေ့ နောက်ဆုံးဈေးအားပြောလာမည်ကိုစောင့်နေ၏။ သို့မှသာ သူညှိနှိုင်းနိုင်မှာဖြစ်သည်။

ကံမကောင်းစွာနှင့် စုရွေ့က စုဟိုင်ချန်း၏ စိတ်ကူးထဲကအတိုင်း ကတ်တို့ကို ကစားမလာချေ။

“ဦးလေးစု ကျန်းယိုကလည်း ဦးလေးသမီးလို့ကြားမိတယ် ဦးလေးရဲ့ပိုင်ဆိုင်မှုအားလုံးကို သမီးနှစ်ယောက်အတွက် ခွဲထားခဲ့မယ်ဆိုရင် ကျွန်တော့်ရဲ့ရှောင်ဝမ်က တစ်ဝက်ပဲရတော့မှာလေ...ဦးလေးက အဲ့လောက်ပဲပေးနိုင်ပေမယ့် ကျွန်တော်ကတော့.....”

စုရွေ့ကမျက်ခုံးပင့်လိုက်၏။ ပထမဆုံးအကြိမ်အဖြစ် စုရွေ့က သူ့အရှေ့ရှိ သက်လတ်ပိုင်းလူကြီးကို လေးလေးနက်နက်ကြည့်လိုက်သည်။

“တစ်နှစ်အတွင်း၊ ရှောင်ဝမ် အရွယ်ရောက်လာတဲ့အချိန်မှာ ကျွန်တော် သူမကိုလက်ထပ်မယ် ..အဲ့ဒီချိန်ကျရင် စုအုပ်စုရဲ့ ရာချီနေတဲ့လုပ်ငန်းတွေကိုကျော်ပြီးတော့ စုမိသားစုရဲ့ ပိုင်ဆိုင်မှုအားလုံးက ကျွန်တော့်နှလုံးသားထဲက ရှောင်ဝမ်ထက် တစ်ရာပုံပုံရင်တောင် နည်းနေဦးမယ်ဆိုတာကို Dမြို့မှာရှိတဲ့လူတိုင်း သိစေရမယ်”

စုအုပ်စုရဲ့ ရာချီနေတဲ့ လုပ်ငန်းတွေဆိုရင် မြို့တော်မှာ ဆယ်နဲ့ချီတဲ့ ဘီလီယံတွေလောက်ရှိလိမ့်မယ်....

စုရွေ့က ထိုကဲ့သို့ကြွေးကြော်လာသည့်အခါ စုဟိုင်ချန်းက ပင်ကိုအသိစိတ်အရ ပြန်လည်ချေပချင်သည်။ သို့သော် စုရွေ့၏မျက်လုံးများက ရုတ်တရက်မှုန်မှိုင်းလာပြီး စူးရှလာရာ ထိုမျက်ဝန်းတစ်စုံက စုဟိုင်ချန်းပြောချင်နေသည့် စကားလုံးများကို ပြန်မျိုချအောင်လုပ်နေလေသည်။

“ကောင်းတယ် ကောင်းတယ် ကောင်းတယ် မင်းကဒီလောက်တောင်ကြွေးကြော်ရဲတယ်ဆိုတော့ စောင့်ကြည့်ကြတာပေါ့”

အဆုံးတွင် စုဟိုင်ချန်းမှာ ရွေးချယ်စရာမရှိဘဲ ဒေါသတကြီးဖြင့်သာ လှည့်ထွက်သွားရတော့သည်။

ထွက်ခွာသွားသည့် သူ၏နောက်ကျောကိုကြည့်ရင်း စုဝမ်က ဘေးရှိ စုရွေ့ကိုကြည့်လိုက်သည်။

“စုရွေ့ ရှင်ဘဏ်ကို ဓားပြတိုက်တော့မှာလား”

“ဇနီးလေး အဲ့ဒါက တရားမဝင်ဘူးလေ”

စုရွေ့ကလက်မြှောက်၍ စုဝမ်၏ဆံပင်များကို ပွတ်သပ်လိုက်သည်။ သူ့ဇနီးလေး၏ဆံနွယ်များက ကိုင်လို့ကောင်းသည်။ ထို့အပြင် ထိုဆံနွယ်တို့ကို သူကိုယ်တိုင်လျှော်ပေးထားခြင်းဖြစ်သည်။ထို့ကြောင့် ယင်းက ကိုင်လို့ပိုကောင်းနေ၏။

ထိုအကြောင်းကိုတွေးရင်း စုရွေ့အကြည့်များက ရုတ်တရက်ပြောင်းသွားတော့သည်။

“ဇနီးလေး ယွင်ယိလည်း သွားပြီဆိုတော့ ဒီညရေကူချိုးပေးရဦးမလား”

“ရှင်ဘာတွေစီစဥ်နေလဲ ကျွန်မကိုမပြောရသေးဘူး စကားလမ်းကြောင်းလွှဲမနေနဲ့”

စုရွေ့က စုယွီ လူသတ်သမားအဖွဲ့အစည်းနှင့်ဆက်သွယ်နေကျ ဆက်သွယ်ရေးကိရိယာကို ထုတ်ပြလာသည်။ စုဝမ် ထိုအကြောင်းကိုသိ၏။

တစ်ချိန်တည်းမှာပင် စုရွေ့က သူ မလုပ်နိုင်သည့် စကားအပိုများအား ပြောမည်မဟုတ်သည်ကိုလည်း သူမ သိသည်။ ယခုတွင် သူက စုဟိုင်ချန်းရှေ့၌ ကြွေးကြော်ခဲ့သောကြောင့် သေချာပေါက် တစ်နှစ်အတွင်း ပိုက်ဆံစုဆောင်းလိမ့်မည်။ စုဝမ်စိုးရိမ်သည်မှာ စုရွေ့က ပြင်းထန်သည့်နည်းလမ်းများကို အသုံးပြုမည်ကိုပင်။ တာဝန်တစ်ခုဆိုသော်ငြား စုဝမ်က စုရွေ့ကို အတင်းမလုပ်စေချင်ပေ။

စုဝမ်၏ အတွေးများနေသည့်ပုံစံလေးကြောင့် ဗိုလ်ချုပ်ကြီးစုက ကူကယ်ရာမဲ့စွာပြုံးရုံသာတတ်နိုင်တော့သည်။

“ဇနီးလေး စိတ်ချပါ ကိုယ်ကအလုပ်လုပ်ရင် သေချာလုပ်တတ်တဲ့သူ...”

အခုခေတ်မှာ ဘယ်သူက ဘဏ်တွေကို ဓားပြတိုက်တော့လို့လဲ အဲ့ဒါကသနားစရာကောင်းတယ် ဟုတ်ပြီလား စစ်သူကြီးစုက ဘယ်တုန်းကမှ ပြဿနာတွေကို အကြမ်းနည်းနဲ့ဖြေရှင်းဖို့ မတွေးဖူးဘူး သူကအိုင်ကျူမြင့် ဦးနှောက်နဲ့ အလုပ်လုပ်တဲ့သူတစ်ယောက် ဟုတ်ပြီလား....

“ဇနီးလေး မင်းနှလုံးသားထဲမှာ ကိုယ်က အဲ့လောက်တောင် အကြမ်းဖက်တတ်တဲ့သူဖြစ်နေတာလား”

စုရွေ့က သနားစရာကောင်းသည့် အမူအရာပြောင်းလဲလိုက်ပြီး စုဝမ်ကို မကျေမနပ်နှင့်ကြည့်လာသည်။

“ဘာပဲဖြစ်ဖြစ် ကိုယ်က သုတေသနအဖွဲ့အစည်းကိုလည်းရောက်ဖူးသလို ဆရာဝန်လည်းလုပ်ဖူးတယ် ခေတ်ပညာတတ်ယောက်ျားတစ်ယောက်က ခဏခဏရန်ဖြစ်သတ်ဖြတ်တာမျိုးမလုပ်ဘူး လူကြီးလူကောင်းက လက်သီးကိုမသုံးဘူး ပါးစပ်ကိုပဲသုံးတာ”

ဘာကို ‘မသတ်ဖြတ်’တာလဲ....။

လူတို့၏အသက်ကို ယင်ကောင်တစ်ကောင်ကိုသတ်သကဲ့သို့ သတ်နိုင်သည့် စစ်သူကြီးစုက ထိုစကားတို့ကို ပြောလာ၏။ စုဝမ်မှာ မူးဝေသလိုခံစားနေရသော်လည်း စုရွေ့က အဖွဲ့အစည်းအကြောင်းပြောလာသောအခါ သူမမျက်လုံးများ လက်သွားသည်။

တာဝန်ကျကမ္ဘာများကို ဝင်ရောက်လေ တာဝန်ဆောင်ရွက်သူများက အရည်အချင်းများပိုမိုတတ်‌မြောက်လေ ဖြစ်သည်။

ဒါပေမယ့် ကမ္ဘာမြေကြီးကို ဖျက်ဆီးခဲ့တဲ့ ဇွန်ဘီဗိုင်းရပ်စ်အတွက် သုတေသနအဖွဲ့အစည်းက ဥပဒေနဲ့ ကိုက်ညီပါ့မလား.....။

“ရှင်.....”

စုဝမ်က တစ်ခုခုပြောချင်သော်လည်း စုရွေ့ကပြုံး၍ သူမနှုတ်ခမ်းကို လက်ညှိုးလေးနှင့် ပိတ်လိုက်သည်။

“ဇနီးလေး ကိုယ့်ကိုယုံလား....ဒီတိုင်းကိုယ့်ကိုယုံပြီး အကုန်လုံး ပုံအပ်ထားလိုက်နော်”

“ကောင်းပြီ”

စုဝမ်ခေါင်းညိတ်လိုက်၏။ သူမ စုရွေ့ကို ခြွင်းချက်မရှိယုံကြည်သည်။

ဤကမ္ဘာကြီးထဲတွင် သူမယုံကြည်ရပြီး တွန့်ဆုတ်ခြင်းမရှိဘဲ မှီခိုနိုင်သည့်တစ်ဦးတည်းသောသူက ထိုယောက်ျားသာဖြစ်သည်။

စုဝမ်ခေါင်းညိတ်သည်ကိုတွေ့သောအခါ စုရွေ့၏နှုတ်ခမ်းများက ထပ်မံကွေးတက်သွား၏။

ဒီကမ္ဘာမှာ လျော့နည်းနေတဲ့အရာကဘာလဲ ဒီကမ္ဘာမှာ လိုအပ်နေတဲ့အရာကဘာဖြစ်မလဲ...

အချိန်တိုလေးအတွင်း ချမ်းသာကြွယ်ဝမှုများ ပုံထပ်လာစေရန် နည်းအမျိုးမျိုးရှိသော်လည်း စုရွေ့၏စိတ်ထဲတွင် ဤကမ္ဘာနှင့် လိုက်ဖက်သည့် အဆင့်မြင့်နည်းပညာဆိုသည့်အချက်ပေါ်လာသည်။

အခြားကမ္ဘာတစ်ခု၌ TXကုမ္ပဏီသည် ကမ္ဘာ့ပထမဆုံး သုံးဖက်မြင်အွန်လိုင်းဂိမ်း “လင်ရှန်း”ကို ‌ဖန်တီးရန် ရာချီသော ဘီလီယံများကို သုံးခဲ့သည်။

ဤဂိမ်း၏ အဓိကနည်းပညာအချက်အလက်အားလုံးက စုရွေ့စိတ်ထဲတွင် ရှိနေပြီးသားဖြစ်သည်။

အနာဂတ်မှာစုရွေ့က စုရှောင်စူးကို ဘာလို့ ဖန်တီးခဲ့တာလဲ သူကဘာလို့ စုရှောင်စူးရဲ့ အချက်အလက်တွေကို ပျောက်ဆုံးနေတဲ့ အချိန်နဲ့အာကာသကိုဖြတ်ပြီး လင်ရှန်းရဲ့သုံးဖက်မြင်ကမ္ဘာနဲ့ ဆက်သွယ်ခဲ့တာလဲ....

နည်းပညာက ဘဝများကို ပြောင်းလဲစေသည်။

လင်ရှန်းကမ္ဘာနှင့် စုရှောင်စူး.......။ ၎င်းက အနာဂတ်၏သူကိုယ်တိုင်ဆီမှ လက်ရှိသူ့အတွက် ပေးခဲ့သည့် အကောင်းဆုံးလက်ဆောင်ဖြစ်သည်။

~~__

🚩

Prev Next