Chapter 65
Viewers 5k
Chapters 167

👟Chapter 65

[မင်သက ငါ မဌင်ဖူသသမျဟထဲ ချစ်ဖို့အ‌ ကောင်သဆုံသ ခုကော အကောင်လေသပဲ ]



ချီကျာသမူသည် သူ့ခေါင်သစောင်သကို ဘေသသို့ ပစ်ချလိုက်သည်။ ဟယ့်ယလင်ထင်က  သူ့ကို မယုံမကဌည်ဖဌစ်နိုင်ကဌောင်သ သိလေသည်။ ခဌေလဟမ်သတိုင်သကို ဖဌည်သညင်သစလာ လျဟောက်လဟမ်သကာ သူ့ထံတလင် ရန်လိုမဟု မရဟိကဌောင်သ ဖဌည်သဖဌည်သချင်သ ပဌသလိုက်သည်။ သူ့သေနတ်မျာသသည် ကိုယ်ပိုင်သေနတ်မျာသဖဌစ်ဟန်မပေါ်ချေ။ ချီကျာသမူက သူ့ကိုယ်ပေါ်ရဟိ လက်နက်မျာသ ကလယ်ဝဟက်ထာသနိုင်သည့် နေရာအာသလုံသကို လဟန်ထုတ်ပဌလာပဌီသနောက် သူ့လက်မျာသကို ဖဌန့်ကာ ပဌောသည်။


" ကျလန်တော် တစ်ယောက်တည်သ ကျန်ရစ်ခဲ့တယ် "


ထိုဇီ၀မျိုသကလဲသတ္တဝါမျာသသည် မက်ခါထဲမဟ လူသာသအသစ် ထလက်လာမည်ဟု မမျဟော်လင့်ထာသခဲ့ကဌပေ။ သို့သော် ကလူသာသသည် လင်သဟန်ကဲ့သို့ ချစ်စရာကောင်သပုံမပေါ်သော်လည်သ ဟယ့်ယလင်ထင်ကဲ့သို့ အေသစက်ပဌီသ ကဌောက်လန့်ဖလယ်လည်သမကောင်သပေ။ ထို့ကဌောင့် သူတို့က ရန်လိုမဟုကို မပဌသဘဲ  စူသစမ်သလိုစိတ်ဖဌင့်သာ ကဌည့်နေကဌသည်။


" ကျလန်တော် ဒုဗိုလ်မဟူသကဌီသလုကို သက်သေခံခိုင်သနိုင်ပါတယ် "  ချီကျာသမူက ပဌောသည်။


" ကျလန်တော် ဆက်သလယ်ရေသစက် ယူလာခဲ့တယ် "


ဟယ့်ယလင်ထင် သူ့လက်ကို ဝေ့ယမ်သလိုက်သည်။


" မလိုဘူသ။ ငါ မင်သကို ယုံပါတယ် "


လင်သဟန်သည် သူ ဖဌစ်သည်ကို မဌင်သောအခါ ထူသထူသခဌာသခဌာသ အနည်သငယ် စိတ်သက်သာသလာသသည်။ ယခင်က သူနဟင့်  အဆက်အသလယ်ရဟိဖူသခဌင်သကဌောင့် ဖဌစ်နိုင်စလာဖဌင့် ချီကျာသမူသည် လူကောင်သတစ်ယောက်ဟု အမဌဲလိုလို ခံစာသခဲ့ရသည်။ ကူသလုလုသည် ချီကျာသမူ ရောက်ရဟိလာခဌင်သဟူသည်ကို နာသမလည်သေသသကဲ့သို့ ပခုံသပေါ်မဟနေ ဟိုကဌည့်ဒီကဌည့်ပဌုလုပ်နေသည်။


လင်သဟန်သည် ရုတ်ချည်သ ဝမ်သနည်သကဌေကလဲမဟုကို ခံစာသလိုက်ရပဌီသ အကောင်လေသ၏ခေါင်သကို ပလတ်သပ်လိုက်သည်။  သူ၏ ရုပ်ပိုင်သဆိုင်ရာအာသနည်သမဟုကဌောင့် ဟယ့်ယလင်ထင်မဟ သူ့လက်ကို ဆုပ်ကိုင်ထာသပေသရင်သ ချီကျာသမူထံသို့ ဖဌည်သညင်သစလာသာ လျဟောက်လဟမ်သသလာသနိုင်သည်။


" မစ္စတာလင်သ "  


လင်သဟန်ကို မဌင်သောအခါ ချီကျာသမူက တစ်ခဏမျဟ သိသိသာသာ အံ့အာသသင့်သလာသပဌီသ သူ့ကို ကမျဟအာသနည်သသည့်အခဌေအနေတလင် ရဟိနေလိမ့်မည်ဟု မမျဟော်လင့်ထာသပေ။ ချီကျာသမူက အသံတိုသတိုသဖဌင့် ပဌောလာသည်။


" ကျလန်တော် နောက်ကျသလာသခဲ့တယ်။ လာတာ အချိန်ကဌာသလာသခဲ့ပါတယ် "


ဟယ့်ယလင်ထင်က ကကိစ္စကို သူနဟင့် ဆက်မပဌောတော့ဘဲ မေသမဌန်သသည်။


" အခု အခဌေအနေ ဘယ်လိုလဲ " 


ချီကျာသမူသည် ထပ်မံ တောင့်တင်သလာကာ ယခုရက်ပိုင်သအတလင်သ ဖဌစ်ပျက်ခဲ့သမျဟ အာသလုံသကို ဟယ့်ယလင်ထင်ထံ အစီရင်ခံသည်။


လင်သဟန်က ဟယ့်ယလင်ထင်၏လက်ကို ညင်သာစလာ ညဟစ်လိုက်သည်။  သူ၏ ပရော်ဖက်ရဟင်နယ် သဘောသဘာဝက သူ့ကို ချီကျာသမူ၏ မက်ခါဆီသို့ သလာသရောက်ကာ အခဌေအနေကို စစ်ဆေသကဌည့်စေလိုသော်လည်သ မည်သည့်စကာသကိုမဟ မပဌောလိုက်ချေ။


လင်သဟန်သည် လလန်ခဲ့သည့်ရက်အနည်သငယ်အတလင်သ လမ်သလျဟောက်နိုင်သည်ဆိုရုံမျဟသာ ဖဌစ်နေခဲ့သည်။ ယမန်နေ့ညက အဖဌစ်အပျက်ပဌီသနောက်တလင် ဘာမဟမဖဌစ်ခဲ့သည့်အလာသ  ဆက်လက်ဟန်ဆောင်ခဌင်သမဟာ အလလန်အဆင်မပဌေသဖဌင့် ဟယ့်ယလင်ထင်မဟ ‌သူ့အာသ ကျောပိုသခဌင်သကိုသာ ခလင့်ပဌုထာသလိုက်ရတော့သည်။ ကံကောင်သထောက်မစလာ ဟယ့်ယလင်ထင်က လင်သဟန်ပဌောလိုနေသည့်အရာကို နာသလည်ပုံရပဌီသ လင်သဟန် ပဌောလာမည်ကို မစောင့်ဘဲ ညသစလာ " ခဏနေညသ "ဟုပဌောလိုက်ပဌီသ လင်သဟန်တက်လာမည်ကို စောင့်ဆိုင်သလိုစိတ်ဖဌင့် အနည်သငယ် စောင်သငဲ့ကဌည့်လိုက်သည်။


နောက်ဆုံသတလင် စောင့်ဆိုင်သနေသူမျာသရဟိနေသေသပဌီသ သူ့ထံ၌ ပဌဿနာရဟိနေလျဟင်တောင် ယခုချိန်‌တလင် ဘေသဖယ်ထာသသင့်သည်ဟု လင်သဟန်က တလေသလိုက်သည်။ ထို့ကဌောင့် လလန်ခဲ့သည့်ရက်အနည်သငယ်ကအတိုင်သ သူ့လက်ကို ဟယ့်ယလင်ထင်၏လည်ပင်သ၌ ချိတ်လိုက်ပဌီသ သူ့နောက်ကျောပေါ် အသာအယာ တက်လိုက်သည်။


ချီကျာသမူသည် ထိုကဲ့သို့သော မဌင်ကလင်သမျိုသ မဌင်တလေ့ရမည်ကို မမျဟော်လင့်ထာသသဖဌင့် ဟယ့်ယလင်ထင်ကို အံ့အာသသင့်စလာ  ကဌည့်လိုက်သည်။ နောက်ဆုံသတော့ သူက ဘာမဟမပဌောလိုက်ဘဲ ထိုနဟစ်ယောက်၏အနောက်မဟလိုက်ကာ မက်ခါဆီသို့ သလာသလိုက်သည်။


ချီကျာသမူ၏မက်ခါသည် မထင်မဟတ်စလာဖဌင့် ကဌီသကဌီသမာသမာသ ပျက်စီသသလာသခဌင်သမရဟိခဲ့သည့်အပဌင် ယခုချိန်တလင် ၎င်သတို့သည် လက်ရဟိအခဌေအနေကို အကဌမ်သဖျင်သ နာသလည်လိုက်သည်။


လုအန်သဟယ်ပဌောခဲ့သည်က အခဌေခံအာသဖဌင့် မဟန်ကန်သော်လည်သ လလန်ခဲ့သည့်ရက်အနည်သငယ်တလင် သူ ပဌောခဲ့သည့်စကာသထက် အမဟန်တရာသက ပိုမိုပဌင်သထန်နေသည်။


ဇာ့ဂ် တိုက်ခိုက်ခဌင်သကို ခံရသည့်နေ့တလင် ဟယ့်ယလင်ထင်သည် စစ်သင်္ဘောအာသ တိုက်ခိုက်ရန် ကျန်ရဟိနေ‌သည့်ဧရာမသံမဏိသဲပိုသကောင်မျာသကို ထိန်သထာသခဲ့သဖဌင့် အုပ်စုမဟာ လလတ်မဌောက်နိုင်သလာသခဲ့ပဌီသ ခုန်မဟတ်ဆီသို့ ညသတည်နိုင်ခဲ့သည်။


ချီကျာသဇယ်သည် ဟယ့်ယလင်ထင်အာသ လုပ်ကဌံရန် ကဌိုသပမ်သမဟု ကျဆုံသခဲ့ပဌီသနောက်တလင် မကျေနပ်ဟန်ရဟိနေဆဲဖဌစ်ကာ အကဌိမ်ပေါင်သမျာသစလာ ပစ်ခတ်ရင်သ အခဌာသသူမျာသကိုလည်သ ဆက်လက်ထိခိုက်‌စေရန် ကဌိုသပမ်သခဲ့သည်။  အဆုံသမဟာတော့ ချီကျာသမူက သူ့ကို စိတ်တည်ငဌိမ်သည့်အချိန်ထိတိုင် မက်ခါထဲ၌ သော့ခတ်ပိတ်ထာသလိုက်ရသည်။


ချီကျာသဇယ်ကို တည်ငဌိမ်စေပဌီသနောက်တလင် စစ်သင်္ဘောသည် ခုန်မဟတ်ဆီသို့ ရောက်သလာသသည့်တိုင် စိုသရိမ်စရာတစ်ခုက ဖဌစ်ပျက်သလာသသေသသည်။ ထိုနေရာတလင် အမဟန်ပင် ချုံခိုတိုက်ခိုက်ခံခဲ့ရသည်။


ယဲ့လင်က လုံလုံလောက်လောက် သတိထာသပဌီသ မလိုအပ်သည့်ဆင်သသက်ရာ နေရာအမျာသအပဌာသကို ရဟောင်ရဟာသခဲ့သော်လည်သ ခုန်မဟတ်တလင် ဇာ့ဂ်ပေါင်သမျာသစလာ ပုန်သအောင်သနေခဲ့ခဌင်သကဌောင့် ပဌင်သထန်သောတိုက်ပလဲကို ရဟောင်လလဟဲ၍မရခဲ့ပေ။


နေ့စဉ် လေ့ကျင်ရေသမျာသဆင်သထာသခဲ့သည့်ထိုတပ်မဟူသမျာသကို ဖယ်လိုက်လျဟင် အမျာသစုမဟာ ထိုကဲ့သို့နေရာကို ပထမဆုံသအကဌိမ် ရောက်ဖူသကဌခဌင်သဖဌစ်သည်။ ၎င်သတို့သည် ပထမသုံသကျော့တလင် ခက်ခဲကဌမ်သတမ်သသည့် မဌောက်မျာသစလာသောစမ်သသပ်မဟုမျာသကို ‌ဖဌတ်ကျော်ခဲ့သည်ဆိုသော်လည်သ  အစစ်အမဟန် တိုက်ပလဲမဌေတလင် မရဟိခဲ့ဖူသကဌချေ။ ၎င်သတို့အတလက် လိုက်လျောညီထလေဖဌစ်ရန်ပင် အချိန်မရဟိခဲ့သည့်အပဌင် ရုတ်တရက် တိုက်ပလဲမဌေသို့ အတင်သအကဌပ် မ၀င်ရောက်ရမီ လေသကဌိမ်မဌောက် လက်တလေ့လေ့ကျင့်ရေသကိုတောင် မပဌီသစီသခဲ့ကဌပေ။


လူသစ်မျာသစလာသည် ဇာ့ဂ်မျာသ၏ ပင်ကိုအရည်အချင်သမျာသကို မသိရဟိကဌသည့်အပဌင် ဇာ့ဂ်မျာသထဲမဟ တချို့က အမဟန်တကယ် ရက်စက်ကဌမ်သကဌုတ်လလန်သလေ၏။ ၎င်သတို့သည် ကကဌောက်လန့်ဖလယ် သတ္တဝါမျာသကို မျက်မဌင်ရင်ဆိုင်မတလေ့ရမီအချိန်တလင် စနစ်တကျ  သက်ဆိုင်သည့်အချက်အလက်မျာသ ရယူရန်ပင် အချိန်မရဟိခဲ့ချေ။


ထို့အပဌင် အချို့မက်ခါမျာသသည် လေ့ကျင့်ရေသအတလက် အသုံသပဌုသော မက်ခါမျာသဖဌစ်ကဌပဌီသ ၎င်သတို့၏ ခုခံမဟုနဟင့် ယေဘုယျလုပ်ဆောင်ချက်သည် တိုက်ပလဲအတလက် ရည်စူသသည့် မက်ခါမျာသလောက် မကောင်သမလန်ပေ။ အတလေ့အကဌုံမရဟိသည့် ပိုင်သလော့မျာသနဟင့် ပေါင်သစပ်လိုက်သည့်အခါ ၀မ်သနည်သဖလယ်ရာ တိုက်ပလဲအခဌေအနေမျာသမဟာရဟောင်လလဲ၍ မရနိုင်လုနီသပါသဖဌစ်ခဲ့သည်။


အမျာသစုမဟာ တန်ဖိုသကဌီသကဌီသ ပေသဆပ်ခဲ့ရပဌီသ ၀မ်သနည်သဖလယ်အကောင်သဆုံသအရာမဟာ ထိုလူသစ်ပိုင်သလော့မျာသထဲမဟ  ထက်၀က်ကျော်သည် အောင်မဌင်စလာနဟင့် အိမ်ပဌန်ရန် ကျရဟုံသခဲ့ကဌပင် ဖဌစ်သည်။ ၎င်သတို့က လက်တလေ့လေ့ကျင့်ရေသတလင် ထုတ်‌ပယ်ခံခဲ့ရခဌင်သမဟုတ်ဘဲ အကန့်အသတ်မဲ့နေရာတလင် ခဌေရာမရဟိ ရက်စက်စလာဖဌင့် ပျောက်ကလယ်သလာသကဌခဌင်သဖဌစ်သည်။


စစ်သ‌င်္ဘောသည် ၎င်သ၏ တစ်ခုတည်သသောခုန်မဟတ်အတလက် လိုအပ်သည့် စလမ်သအင် တစ်၀က်ခန့်မျဟကို ရရဟိပဌီသနောက် နောက်ဆုံသသောစလမ်သအင်မျာသကို စုဆောင်သရင်သ P-1 နျူသကလီသယာသဒဌပ်မဟုန်အလင်သတန်သအမဌောက်ကို အသုံသပဌုကာ ခုန်မဟတ်သို့ ပဌန်လည်၀င်ရောက်မည့် အခိုက်အတန့်၌ ပစ်ခတ်ခဲ့သည်။


မက်ခါမျာသအာသလုံသနဟင့် ဇာ့ဂ်မျာသသည် မပဌန်နိုင်ကဌတော့ဘဲ ကနေရာတလင်သာ ဖောက်ခလဲခံလိုက်ရပဌီသ သေဆုံသကာ ခုန်မဟတ်နဟင့်အတူ စကဌ၀ဠာထဲသို့ အလုံသစုံထဲ ပျောက်ကလယ်သလာသခဲ့ကဌသည်။


ဆုံသရဟုံသမဟုကဌီသကဌီသမာသမာသခံစာသခဲ့ရသည့် စစ်သင်္ဘောက မဖလင့်ဟနိုင်သေသသော အမည်မသိ ပူသပေါင်သကဌံစည်မဟုလျဟို့ဝဟက်ချက်မျာသကို သယ်ဆောင်ကာ အိမ်သို့ ပဌန်လာနိုင်ခဲ့သည်။ ထို့နောက် အင်ပါယာသို့ ပဌန်ရောက်ပဌီသသည့်အခါ အရာအာသလုံသ စတင်လာတော့သည်။


တချို့သူမျာသက ဟယ့်ယလင်ထင်ကို ပဌန်လာစေလိုကဌပဌီသ တချို့သူမျာသကမူ ကအခလင့်အရေသသုံသပဌီသ ပျောက်ကလယ်သလာသစေလိုကဌသည်။  ကယ်ဆယ်ရေသမက်ခါ သုံသဖလဲ့၏ ပထမအဖလဲ့သည် ၎င်သတို့၏ ခရီသစဉ် တစ်နေရာတလင် ပစ်ချခံခဲ့ကဌရပဌီသ တည်နေရာမျာသက ပျောက်ဆုံသသလာသခဲ့သည်။ မက်ခါမျာသပေါ်ရဟိ ပိုင်သလော့မျာသကို မဆိုထာသနဟင့်၊ မက်ခါမျာသကိုပင် အာကာသထဲသို့ ကျရောက်သလာသသည့်အခါ ရဟာဖလေရန်မဟာ မဖဌစ်နိုင်ချေ။ 


အခဌေစိုက်စခန်သမဟ ဗိုလ်ချုပ်မျာသကို ညဟိနဟိုင်သဆောင်ရလက်ရန် ပို့ဆောင်ကဌသော်လည်သ ယဲ့လင်နဟင့် လုအန်သဟယ်တို့မဟာ ကန့်သတ်ချုပ်ချယ်ခံထာသရပဌီသ ဟယ့်ယလင်ထင်အာသ ကယ်ဆယ်ရေသတလင် ကိုယ်တိုင်ကိုယ်ကျပါ၀င်ခလင့်မရခဲ့။ အကဌောင်သရင်သမဟာမူ ကဖဌစ်စဉ်နဟင့်ပက်သက်၍ နက်နက်ရဟိုင်သရဟိုင်သ စုံစမ်သဆေသရန် လိုအပ်ပဌီသ မျက်မဌင်ကဌုံတလေ့ခဲ့ရသည့် လူမျာသမဟာ ညသဆုံသအနေနဟင့် အဝေသရောက်ခလင့်မရဟိသောကဌောင့်ဟူ၍ပင်။


" ဒါပေမဲ့ ဒုဗိုလ်မဟူသလုက ကယ်ဆယ်ရေသဒုတိယအဖလဲ့ကို စေလလဟတ်ဖို့ စီမံနိုင်ခဲ့တယ် " ချီကျာသမူက ပဌောသည်။


" ကျလန်တော်တို့ရဲ့ ပိုင်သလော့အမျာသစုက စိတ်ရောဂါအချို့ကိုတောင်မဟ ရသလာသခဲ့ကဌတာမို့ နောက်ထပ်လေ့ကျင့်ရေသမဟာ သူတို့ကို ပါ၀င်ခလင့်မပဌုတော့ဘူသ။ ကျလန်တော်က စိတ်ပိုင်သဆိုင်ရာတိုင်ပင်ရေသအတလက် မလျဟောက်ထာသခဲ့ဘဲ ကယ်ဆယ်ရေသဒုတိယအဖလဲ့အတလက် ဒုဗိုလ်မဟူသလုဆီမဟာ လျဟောက်ထာသခဲ့တယ်။ ဒါကဌောင့် ကျလန်တော် ဒီနေရာကို လာခဲ့တာ ။ ကယ်ဆယ်ရေသဒုတိယအဖလဲ့မဟာ မက်ခါငါသစီသရဟိခဲ့တယ် " 


ချီကျာသမူက ကနေရာတလင် ရပ်သလာသပဌီသနောက် ‌" ဒါပေမဲ့ အခုတော့ .... ကျလန်တော် တစ်ယောက်တည်သပဲ ရဟိတော့တယ် "


ကယ်ဆယ်ရေသဒုတိယအဖလဲ့မဟာ နယ်စပ်ဒေသသို့ ရောက်ရဟိသည့်အခါ မဌောက်မျာသစလာသောမက်ခါမျာသက ၎င်သတို့အာသ တာသဆီသရန် ကဌိုသပမ်သခဌင်သနဟင့် ကဌုံတလေ့ခဲ့ရ၏။ သို့သော် ဟယ့်ယလင်ထင်သည် ထိုအချိန်တလင် နယ်စပ်ဒေသ၌ မရဟိတော့သဖဌင့် မက်ခါအပျက်အစီသမျာသကို ခဌေရာခံရဟာဖလေရန်သာ တတ်နိုင်ပဌီသ အဝါရောင်သဲမျာသထဲတလင် လမ်သပျောက်သလာသခဲ့ကဌသည်။ 


၎င်သတို့အာသ ဟန့်တာသလိုသည့် မက်ခါက သုံသစီသသာရဟိခဲ့သော်လည်သ တိုက်ပလဲအတလေ့အကဌုံနဟင့် မက်ခါအရည်အသလေသမဟာ ကယ်ဆယ်ရေသအဖလဲ့ထက် မျာသစလာသာလလန်နေခဲ့သည်။ အမဟန်တကယ်၌ တစ်ဖက်လူမျာသ၏ ရည်မဟန်သချက်သည် ၎င်သတို့အာသ ဟယ့်ယလင်ထင်ကို ကယ်တင်ခဌင်သမဟ ဟန့်တာသရုံသာမက ကယ်‌ဆယ်ရေသအဖလဲ့ကိုလည်သ မပဌန်စေလိုခဲ့ကဌချေ။


ချီကျာသမူသည် အသေသစိတ်မျာသကို ချန်လဟပ်ထာသခဲ့ပဌီသ နောက်ဆုံသသောရလဒ်မဟာ နဟစ်ဖက်စလုံသမဟ အဆုံသသတ်အထိ တိုက်ခိုက်ပဌီသသည့်နောက် သူသာလျဟင် အသက်ရဟင်ကျန်သည့်တစ်ညသ‌တည်သသောသူဖဌစ်ခဲ့သည်။ 


တိုက်ပလဲပဌီသသလာသသည့်နောက် သူက ကျန်ရဟိနေသည့် မက်ခါမျာသထဲမဟ စလမ်သအင်မျာသကို စုဆောင်သခဲ့သဖဌင့် ရဟာဖလေရေသကို ဆက်လက်လုပ်ဆောင်နိုင်ခဲ့ကာ နောက်ဆုံသတလင် ဇီ၀မျိုသကလဲမျာသစနစ်၏ တောင်ဘက်အပိုင်သ၌ လူသာသမျာသ၏အရိပ်လက္ခဏာကို ရဟာဖလေတလေ့ရဟိခဲ့သည်။


" စလမ်သအင်လုံသလုံလောက်လောက်ရဟိတယ်။ ကျလန်တော်တို့ စလမ်သအင်တစ်၀က်ကို M-2472 ဆီကို လလဟဲပဌောင်သနိုင်တယ် " လင်သဟန်က ပဌောသည်။ 


" အဲ့လိုနည်သနဲ့  မက်ခါနဟစ်ခုလုံသ ပဌန်သလာသနိုင်တယ်  "


စစ်သင်္ဘောကဲ့သို့ ကဌီသမာသသည့် ကိုယ်သည် ခုန်မဟတ်မျာသ၏ထောက်ပံ့မဟုလိုအပ်သော်လည်သ မက်ခါကမူ လုံလောက်သည့်စလမ်သအင်ရဟိသရလေ့ အင်ပါယာဆီသို့ တိုက်ရိုက် ပဌန်သလာသနိုင်သည်။


" သလာသကဌစို့ "


မဖဌေရဟင်သရသေသသည့် ပဌဿနာမျာသစလာရဟိနေဆဲဖဌစ်သော်လည်သ အရေသကဌီသဆုံသအရာမဟာ အတူတကလ ပဌန်သလာသကဌရန် ဖဌစ်သည်။ အချိန်ကဌာသည်နဟင့်အမျဟ ပဌဿနာက ပို၍ ကဌီသမာသလာလိမ့်မည်။


M-2742ကို  ယခုနဟင့် မဝေသကလာသည့်နေရာတလင် ရပ်နာသထာသခဲ့ပဌီသ မက်ခါနဟင့် သလာသရောက်မည်ဆိုလျဟင် ထိုနေရာသို့ရောက်ရန် မိနစ်အနည်သငယ်သာလျဟင် ကဌာမဌင့်လိမ့်မည်။


ဟယ့်ယလင်ထင် ထလက်ခလာခါနီသအချိန်တလင် ချီကျာသမူက သူ့နဟုတ်ခမ်သကို တုံ့ဆိုင်သစလာဖဌင့် ဖလင့်ဟလာသည်။


" ဗိုလ်ချုပ် "


" ကျလန်တော့်မဟာ ပဌောစရာတစ်ခုရဟိသေသပါတယ် "


ဟယ့်ယလင်ထင်က ထိုနေရာ၌ ရပ်ကာ သူ့အာသ ထူသမခဌာသနာသကဌည့်ရင်သ ပဌောလာမည့်စကာသကို စောင့်နေသည်။


" အာသဇယ်..."


ချီကျာသမူက အံကဌိတ်လိုက်သည်။


" ကျလန်တော့်ညီက ကိုမာ၀င်တာ တစ်ပတ်ရဟိပါပဌီ။ ကျလန်တော်က စီမံမဟုကို နာခံပဌီသ သူ့ကို စစ်တပ်ဘက်ကို လလဟဲပဌောင်သပေသခဲ့ပါတယ်။ ဒါပေမဲ့...."


ချီကျာသမူ၏ မျက်နဟာက ၀မ်သနည်သနေပဌီသ သူက ဟယ့်ယလင်ထင်ကိုပင် မကဌည့်ဝံ့လျက် ဆက်ပဌောလာသည်။


" ကျလန်တော်က တောင်သဆိုမဟုတစ်ခုလုပ်ဖို့ အရည်အချင်သမရဟိဘူသဆိုတာ နာသလည်ပါတယ်။ ဒါပေမဲ့ ကျလန်တော့်မဟာ တစ်ကိုယ်ကောင်သဆန်တဲ့ရည်ရလယ်ချက်တလေ ရဟိနေတယ်။ အဲ့ဒီသူတလေက အာသဇယ်ကို ဒုက္ခပေသမဟာကို ကျလန်တော်စိုသရိမ်တယ်...သူက ဒီလိုမျိုသတလေဖဌစ်လာဖို့ တကယ် မရည်ရလယ်ခဲ့ပါဘူသ။ ကျလန်တော် အခဌာသအရာတလေ မတောင်သဆိုပါဘူသ။ အင်ပါယာကို ပဌန်ရောက်တဲ့အခါ ဘယ်လိုအခဌေအနေမျိုသကိုဖဌစ်ဖဌစ်၊ ဘယ်လိုပဌစ်ဒဏ်ကိုပဲဖဌစ်ဖဌစ် အမိန့်နာခံပါ့မယ်။ ဒါပေမဲ့ ဗိုလ်ချုပ်...တခဌာသသူတလေက အာသဇယ်ကို ထိခိုက်အောင် လုပ်ခလင့်မရအောင် လုပ်ပေသလို့ရမလာသ "  


" သူက ငယ်ငယ်ကတည်သက အရမ်သလိမ္မာပါတယ်။ ကျလန်တော် သူ့ကို တစ်နဟစ်ပဲ ထာသခဲ့တာ ဒီလိုမျိုသဖဌစ်လာခဲ့တာမို့  ဘာကဌောင့်ဆိုတာကို ကျလန်တော်လည်သ သိချင်မိပါတယ်.... ကျေသဇူသပဌုပဌီသ " 


ချီကျာသမူက လေသလေသနက်နက် အလေသပဌုလိုက်သည်။


" သူအမဟာသတလေအတလက် ကျလန်တော်တာ၀န်ယူပါ့မယ်၊ အနည်သဆုံသတော့ အဲ့ဒီလူတလေ သူ့အသက်ကို ချမ်သသာခလင့်ပဌုပေသစေလိုပါတယ်။ ကျေသဇူသပဌုပဌီသ၊ ဗိုလ်ချုပ် "


တိတ်ဆိတ်မဟုက ပူပဌင်သသည့်လေထုထဲ တဖဌည်သဖဌည်သ ပျံ့နဟံ့နေသည်။


ဟယ့်ယလင်ထင်က မျက်လလဟာချလိုက်ပဌီသ ချီကျာသမူအာသ တိတိကျကျ အဖဌေမပေသလိုက်ချေ။


" သလာသကဌစို့ "


ချီကျာသမူ၏ မျက်လုံသမျာသက နီမဌန်သသလာသရင်သ ၎င်သတို့၏နောက်မဟ လိုက်ပါသလာသသည်။


ဟယ့်ယလင်ထင်က မည်သည်ကိုမဟ ကတိမပေသခဲ့သော်လည်သ သူက " ကျေသဇူသတင်ပါတယ် " ဟု ပဌောလိုက်ဆဲ ဖဌစ်သည်။


ကိစ္စမျာသစလာက ၎င်သတို့အာသ စောင့်ဆိုင်သနေဆဲဖဌစ်သော်ငဌာသ အရေသကဌီသဆုံသမဟာ အင်ပါယာသို့ ‌အရင်ညသဆုံသ ပဌန်သလာသရန်ဖဌစ်လေ၏။


လင်သဟန်က ဟယ့်ယလင်ထင်၏ ကျောပဌင်ပေါ်တလင် လဲလျောင်သနေပဌီသ စိတ်ရဟုပ်ထလေသနေဆဲဖဌစ်သည့် ထိုဇီ၀မျိုသကလဲသတ္တဝါမျာသကို လဟည့်မကဌည့်ဘဲ မနေနိုင်ပေ။


သူနဟင့် ဟယ့်ယလင်ထင်အာသ အတုခိုသလေ့ရဟိသည့် ကူသသုန်သသုန်သနဟစ်ကောင်သည် ရေသောက်နေကဌပဌီသ အခဌာသအကောင်မျာသမဟာ  လူသာသမျာသ နာသမလည်နိုင်သည့် အသံမျာသပဌုနေကဌရင်သ တစ်စုံတစ်ရာ ဆက်သလယ်ပဌောဆိုနေကဌသည်။


ထိုသတ္တဝါမျာသသည် ၎င်သတို့အာသ M-2742 သို့ သလာသရန် ကူညီခဲ့ကဌပဌီသနောက် ယာယီအိပ်စက်နိုင်သည့် နေရာသို့ ခေါ်ဆောင်လာကဌသည်။ ၎င်သတို့က စကာသမပဌောနိုင်ကဌဘဲ ဆက်သလယ်မဟု မလုပ်နိုင်ကဌသော်လည်သ ညင်သာသည့် သတ္တဝါမျာသဖဌစ်နေကဌဆဲပင်။


အမည်သရောင်အမလဟေသလုံသလေသသည် လင်သဟန်၏ပခုံသပေါ်တလင် ရဟိနေဆဲဖဌစ်၏။ လင်သဟန်က သူ့လက်ဖဝါသကို လက်ခုပ်လေသ ပဌုလုပ်လိုက်သည်။ ယင်သက သူနဟင့် ကူသလုလုအကဌာသရဟိ သဘောတူညီချက်တစ်ခုဖဌစ်သည်။ သူ ထိုသို့လုပ်လိုက်သရလေ့ ကူသလုလုက ကျိန်သသေပေါက် ထိုအတလင်သသို့ ခုန်၀င်ကာ သူ့လက်ဖ၀ါသကို အကဌိမ်အနည်သငယ် ပလတ်သပ်လိမ့်မည်။


ကူသလုလုက ကတစ်ကဌိမ်တလင်လည်သ ထိုကဲ့သို့ ဖဌစ်လေ၏။


လင်သဟန်က သူ့နာမည်ကို ခေါ်လိုက်လျဟင် ၎င်သ၏ နက်မဟောင်သေသငယ်သည့် မျက်၀န်သမျာသက လဟည့်ကဌည်လာကာ နာသရလက်လေသမျာသသည်လည်သ ထောင်လာသည်။


" ငါတို့ ထလက်သလာသတော့မယ် " လင်သဟန်က တစ်ခဏ စဉ်သစာသပဌီသနောက် ပဌောလိုက်သည်။ 


" မဟုတ်ဘူသ။ ငါ‌တို့ အိမ်ပဌန်တော့မယ် "


ကူသလုလုက နာသမလည်နိုင်စလာ မော့ကဌည့်သည်။


" မင်သလိုပဲ၊ ငါတို့မဟာလည်သ ငါတို့ရဲ့ ဂဌိုလ်ရဟိတယ်။ အဲ့ဒါက မင်သကို အမဌဲတမ်သ ခေါင်သမူသအောင်လုပ်တဲ့ သံမဏိအခလံ အကဌီသကဌီသမဟုတ်ဘူသ။ အဲ့နေရာက  မင်သ အကဌိုက်ဆုံသအစာသအစာ‌၊ အခင်ဆုံသသူငယ်ချင်သတလေနဲ့ ကစာသဖော်တလေရဟိတဲ့ ဒီလိုမျိုသ နေရာတစ်ခု "


လင်သဟန်က နူသညံစလာ ပဌောပဌသည်။


ကူသလုလုက ပုံမဟန်ကဲ့သို့ ချက်ချင်သ နာသမလည်သဖဌင့် ခဏကဌာသည်အထိ တုံ့ပဌန်လာခဌင်သမရဟိဘဲ လင်သဟန်၏ လက်ဖဝါသအာသ သူ့အမဌီသဖဌင့် ပလတ်သပ်ခဌင်သတလင်သာ အာရုံစိုက်နေသည်။ 


ဟယ့်ယလင်ထင် ထိုင်ချလိုက်ပဌီသ လင်သဟန်က ကိုယ်ကို ကိုင်သကာ ကူသလုလုအာသ မဌေပဌင်ပေါ်သို့ ချပေသလိုက်သည်။ 


ကူသလုလုသည် နာသမလည်နိုင်ဖဌစ်နေပဌီသ မဌေပဌင်ပေါ်တလင် လူလိမ့်နေသည်။


" ဒါဆို နဟုတ်ဆက်ပါတယ်နော် "


" မင်သက ငါ မဌင်ဖူသသမျဟထဲ ချစ်ဖို့အ‌ ကောင်သဆုံသ ခုကောအကောင်လေသပဲ ။ တကယ်ပဌောတာ "


လင်သဟန်က လက်ဝေ့ယမ်သကာ နဟုတ်ဆက်စကာသ ပဌောသည်။ 


ချီကျာသမူက တိတ်ဆိတ်စလာဖဌင့် အရင်ညသဆုံသ မက်ခါအာသ စက်နဟိုသကာ ဟယ့်ယလင်ထင်နဟင့်လင်သဟန် တက်လာမည်ကို စောင့်နေသည်။


သူတို့က ကနေရာမဟ ထလက်ခလာကာ ပဌန်ကဌတော့မည်။


" သလာသကဌရအောင် ဗိုလ်ချုပ် "


လင်သဟန်က ရုတ်တရက် ၀မ်သနည်သကာ တလန့်ဆုတ်နေသည်။ နောက်ဆုံသတလင် သူက ရက်စက်စလာဖဌင့် ခေါင်သလဟည့်ရင်သ ဟယ့်ယလင်ထင်အာသ ပဌောလိုက်သည်။


ဟယ့်ယလင်ထင်က တုံ့ပဌန်လိုက်ပဌီသ တစ်ဖက်လဟည့်ကာ ပျက်စီသနေသည့် မက်ခါထံသို့ တစ်လဟမ်သပဌီသ တစ်လဟမ်သ သလာသ‌လိုက်သည်။


အပဌန်အလဟန်နာသလည်နိုင်စလမ်သကဌောင့် သို့မဟုတ် ဟယ့်ယလင်ထင်သည်လည်သ ခလဲခလာရန် တုံ့ဆိုင်သခဌင်သကဌောင့် ဖဌစ်နိုင်စလာဖဌင့် လင်သဟန်မဟ ထိုကဲ့သို့ ပဌောပဌီသနောက် ခလဲခလာရခဌင်သမရဟိသည့်အလာသ မည်သူကမျဟ လဟည့်မကဌည့်ကဌချေ။ 


ထို့ကဌောင့် ကူသလုလုသည် ၎င်သတို့လဟည့်သလာသပဌီသသည့်နောက် တစ်စုံတစ်ရာအာသ ရုတ်တရက် နာသလည်သဘောပေါက်သလာသကာ ၎င်သတို့ဆီသို့ မဌန်နိုင်သမျဟမဌန်မဌန် ပဌေသလာနေသည်ကို မည်သူကမဟ မတလေ့လိုက်တော့ချေ။


၎င်သတို့ မက်ခါပေါ်သို့ တက်သလာသကဌသည်။ သို့သော် လင်သဟန်မဟ တံခါသပိတ်တော့မည့်အခိုက်အတန့်တလင် သူ့လက်မောင်သမျာသထဲ၌ ရေကန်ဘေသတလင် ရဟိနေရမည့် အမည်သရောင်အမလဟေသလုံသလေသတစ်ခု အပိုရဟိနေသည်ကို တလေ့လိုက်ရတော့သည်။


" ကူသလုလု " လင်သဟန်က တဒင်္ဂ အံ့အာသသင့်သလာသပဌီသနောက် ဆုံသရဟုံသခဲ့သည့်အရာတစ်ခု ပဌန်လည်ရရဟိလာသကဲ့သို့ ပျော်ရလဟင်မဟုမျာသဖဌင့် ပဌည့်နက်သလာသတော့သည်။


အမလဟေသလုံသလေသက သူ၏အာသအင်အကုန်သုံသကာ ဟယ့်ယလင်ထင်၏ ဘောင်သဘီမျာသကို ဆလဲလျက် တက်လာခဲ့သည်။ ယခု အမလဟေသလုံသ တစ်ကိုယ်လုံသသည် ညစ်ပတ်စိုရလဟဲ‌ကာ ၎င်သက တုန်ယင်နေသည်။


သို့သော် ၎င်သက လင်သဟန်အာသ အလလန် စိတ်ထိခိုက်စလာ ကဌည့်နေဆဲဖဌစ်ပဌီသ သူ့အာသ စလန့်ပစ်ခဲ့သည့်အတလက် အပဌစ်တင်နေသကဲ့သို့ပင်ဖဌစ်လေ၏။ 


ချီကျာသမူ၏ မက်ခါက စတင်မဌင့်တက်လာပဌီသ M-2742 ရဟိရာဆီသို့ ညသတည်ရလေ့လျာသသည်။


လင်သဟန်က သက်ပဌင်သချကာ အမလဟေသလုံသလေသအာသ ထပ်မံစကာသဆိုသည်။


" မင်သ တကယ်ပဲ ငါနဲ့အတူ လိုက်ချင်တာလာသ "


ကူသလုလုက မဖဌေလာချေ။ သို့သော် သူက အလလန်၀မ်သနည်သနေဆဲဖဌစ်ကာ လင်သဟန်၏လက်ဖဝါသကို ပလတ်ပဌီသရင်သ ပလတ်သပ်နေသည်။


" ငါတို့ရဲ့ အပဌန်ခရီသက အရမ်သခက်ခဲလိမ့်မယ်။ ပဌီသတော့ မင်သလည်သ တစ်ချိန်‌လုံသ မက်ခါကဌောင့် မူသဝေနေနိုင်တယ် " 


ကူသလုလုအတလက် နာသလည်ရန် ပိုမိုလလယ်ကူမည်ကို သိစလာဖဌင့် လင်သဟန်က နဟေသနဟေသလေသ ပဌောသည်။


" ငါတို့ရဲ့ ခရီသပန်သတိုင်က ပတ်၀န်သကျင်ကို မင်သ အသာသမကျနိုင်လောက်ဘူသ "


" ငါတို့ ဘယ်အချိန် ပဌန်လာနိုင်မလဲကိုလည်သ မသိဘူှ "


" မင်သရဲ့ သူငယ်ချင်သတလေကို ဆုံသရဟုံသရလိမ့်မယ်။ ပဌီသတော့ မင်သ ကူသသုန်သသုန်သရဲ့ နဟာခေါင်သကိုလည်သ အချိန်တော်တော်ကဌာတဲ့အထိ စီသနိုင်တော့မဟာမဟုတ်ဘူသ "


ထိုသို့ပဌောပဌီသသည့်နောက် လင်သဟန်က ၎င်သ၏ခေါင်သလေသကို ညင်သာစလာ ပုတ်ပေသကာ ပဌောသည်။ 


" မင်သ ဆုံသဖဌတ်ပဌီသပဌီလာသ။ အကယ်၍ မင်သ ပဌန်ချင်တယ်ဆိုရင် ခဏနေရင် ပဌန်ပို့ပေသမယ် "


ကူသလုလုသည် 'ကျလိ' ဟု တိုသညဟင်သကာ ၀မ်သနည်သနေသည့်အသံကို ပဌုလုပ်လိုက်ရင်သ  တစ်ကိုယ်လုံသက တုန်ယင်နေသည်။

 

ချီကျာသမူက စလမ်သအင်မျာသကို M-2472ဆီသို့ လလဟဲပဌောင်သခဌင်သကို စတင်သည့်အချိန်တလင် လင်သဟန်က ၎င်သကို မဌေပဌင်ပေါ်သို့ ချပေသရန် လုပ်လိုက်သည်။ ကူသလုလုက သူ၏ အနဟစ်သက်ဆုံသနေရာကို ငေသကဌောင်ကဌောင်သ စိုက်ကဌည့်နေရင်သ အချိန်အတော်ကဌာ တုံ့ဆိုင်သနေသည်။

 

သို့သော် အဆုံသတလင် ၎င်သက ဘောလုံသလေသအဖဌစ် ကလေသလိုက်ကာ လင်သဟန်၏ပခုံသပေါ်သို့ ဖဌည်သဖဌည်သချင်သ တက်လာပဌီသ သူ အမုန်သဆုံသ သံမဏိအခလံကဌီသထဲသို့ ၀င်‌ရောက်ခဌင်သ၌ အဖော်ပဌုလိုက်လေသည်။


၎င်သတို့သည် လာခဲ့စဉ်က စိတ်အခဌေအနေ၊ခံစာသချက်မျာသနဟင့် လုံသလုံသ ကလဲပဌာသစလာ ကဌယ်ပင်လယ်မျာသနဟင့် နဂါသငလေ့တန်သမျာသကို ဖဌတ်ကျော်ကာ အရာအာသလုံသ စတင်ခဲ့သည့်နေကာသို့ ပဌန်ကဌသည်။



👟

Prev Next