Chapter 72

👾Chapter 72

[ ရလား..လို့ ]

နောက်ဆုံးတွင် လင်းဟန်သည် တစ်ဖက်လူက "ချစ်တယ်" ဟု ဘယ်နှစ်ခါပြောမှန်းကိုတောင်မှ မမှတ်မိတော့ချေ။ အနမ်းများကြားတွင် ပြောခဲ့သည်လား၊ ဒါမှမဟုတ် စွမ်းရည်ပြန်ရလာသည့်သူ့လက်များမှ တစ်ဆင့် နှလုံးသားဆီသို့ တိုက်ရိုက်ပြောလာခဲ့သည်လား မပြောနိုင်တော့ပေ။ 

ဟယ့်ယွင်ထင်၏လက်ချောင်းများက သူ့နှုတ်ခမ်းထောင့်များကို ပွတ်သပ်ပေးနေခြင်းနှင့် သူ့ကိုယ်အတွင်းထဲသို့  ထည့်ထားချင်နေသည့် ပွေ့ဖက်မှုကိုသာ မှတ်မိနေတော့သည်။

နောက်ဆုံးတွင် သူသည် နှစ်သိမ့်ခြင်းဟူ‌သော၊ ပြုစုစောင့်ရှောက်ခြင်းဟူသော အကြောင်းပြချက်မရှိ သို့မဟုတ် မည်သို့မျှပင် အကြောင်းရင်းတစ်ခုမရှိစွာဖြင့် သူ ဖက်ချင်သလောက် ပွေ့ဖက်နိုင်လေပြီ။

လင်းဟန်က နောက်ဆုံးတွင် အငိုရပ်သွားသည်။ သူ့အခန်းထဲတွင် အာဟာရဖြည့်စွက်စာများနှင့် သောက်ရေရှိသောကြောင့် ဟယ့်ယွင်ထင်က မတ်တပ်ရပ်ကာ သူ့အတွက် ၎င်းတို့ကို သွားယူကာ ပေးလာသည်။

ဤရက်များတွင် အာဟာရဖြည့်စွက်စာပမာဏများစွာကို သောက်သုံးရခြင်းက လင်းဟန်အား ၎င်းအထုတ်များကို မြင်ရုံမျှဖြင့် ပျို့အန်လာစေသည်။  လွန်ခဲ့သည့်ရက်အနည်းငယ်အတွင်း သူက ပေကတ်ကတ်နိုင်စွာ မ သောက်သုံးခဲ့သော်လည်း သူ့ခန္ဓာကိုယ်အား ပြိုလဲမသွားစေလိုသည့်အပြင် နောက်ပိုင်းတွင် သူ၏စိတ်ဖတ်နိုင်သည့်စွမ်းရည်ကို ပြန်လည်ရရှိလာသောကြောင့် သူက အားတင်းကာ ပြန်လည်စားသုံးခဲ့သည်။

လင်းဟန် မျက်မှောင်ကြုတ်လိုက်မိသည်။ အကြောင်းရင်းမရှိစွာဖြင့် အာဟာရဓာတ်စာများကို ရုတ်တရက် အလွန်ရွံရှာလာသဖြင့် အရင်ဦးဆုံး ရေသောက်လိုက်ပြီး မျက်တောင်များကို တဖျတ်ဖျတ်ခတ်ရင်း ဟယ့်ယွင်ထင်ကို အာရုံစိုက်လိုက်သည်။

ဟယ့်ယွင်ထင်က သူ့အား ယခုလေးတင် ပြင်းပြင်းထန်ထန် နမ်းခဲ့ရာ ကြယ်သီးနှစ်လုံးပွင့်နေသည့်လင်းဟန်၏အင်္ကျီမှာ ယခုအခါ ပို၍ပင် မသပ်မရပ်ဖြစ်နေ၏။ အိုမီဂါခန္ဓာကိုယ်သည် နှိုးဆွခြင်းကို မခံနိုင်ပေ။ သူ့နှုတ်ခမ်းများက ပို၍နှင်းဆီရောင်သန်းကာ ဖူးဖူးပြည့်ပြည့်ရှိနေပြီး မျက်လုံးထဲတွင် ဟယ့်ယွင်ထင်၏ပုံရိပ်သည်သာ ရှိနေသည်။

သူတို့နှစ်ဦးသည် ယခင်လေထုအခြေအနေမှ အနည်းငယ် အနားယူပြီးရုံသာ ရှိသေးရာ ယခုအခိုက်အတန့်တွင်  နှစ်ယောက်လုံးက ရှက်ကိုးရှက်ကန်းဖြစ်နေကြသည်။

လင်းဟန်က ကသိကအောက်ဖြစ်မှုကိုဖြေဖျောက်ရန် ကုတင်ပေါ်တွင်ထိုင်ရင်း ရေနည်းနည်းချင်းစီ စုပ်သောက်နေသော်လည်း တစ်ခါသောက်တိုင်း ဟယ့်ယွင်ထင်အား လှမ်းကြည့်တတ်သည်။ဖန်ခွက်တစ်၀က်ခန့်ထိ သောက်ပြီးသွားသည့်အခါ သူက အာဟာရဖြည့်စွက်စာကို ချက်ချင်း မသောက်လိုသဖြင့် ကူကယ်ရာမဲ့ မော့ကြည့်လာကာ တစ်ခုခုပြောလိုနေသည်။

သို့သော် ဟယ့်ယွင်ထင်က ထိုအပြုအမူကို သတိထားမိသွားပြီး သူ့လက်ထဲမှ ရေခွက်ကိုယူကာ ဘေးတွင်ထားလိုက်သည်။ ထို့နောက် လင်းဟန်ဆီသို့ ပြန်လျှောက်လာပြီး ခဏကြာ ငုံ့ကြည့်လာပြီးနောက် သူ့အား လက်မောင်းထဲသို့ ဆွဲယူပွေ့လိုက်သည်။

ကိုယ်ဟန်အနေအထားကြောင့် လင်းဟန်သည် ဟယ့်ယွင်ထင်၏ရင်ဘတ်ကို ဘေးတိုက်မှီခိုထား‌နေပြီး တစ်ဖက်သူ၏ရင်ဘတ်ထဲမှ သိသာလှသည့် မြင့်ချည်နိမ့်ချည်ဖြစ်မှုများနှင့် တုန်ခါမှုများကို ကြားနေရသည်။ ဟယ့်ယွင်ထင်က လက်တစ်ဖက်ဖြင့် လင်းဟန်၏နားကို ညင်သာစွာ ပွတ်သပ်ရင်း နားသီးလေးကို တမင်သက်သက် ကုတ်လိုက်ပြီးနောက် ချက်ချင်း လွှတ်လိုက်သည်။

၎င်းမှာ တစ်ခဏမျှသာ ဖြစ်သော်လည်း လင်းဟန်က ထိုအချိန်ရှိ တစ်ဖက်သူ၏စိုးရိမ်ပူပန်မှုများကို ဖတ်မိလိုက်နိုင်သည်။

" သူ အဆင်ပြေမှာပါ " လင်းဟန်က ပြောသည်။ " ကျွန်တော် ခင်များနှင့်အတူ သူ့သတင်းကို စောင့်မယ် "

ဟယ့်ယွင်ထင်က တခဏ တိတ်ဆိတ်သွားပြီးနောက် ပြောလာသည်။

" သူ့ကိုယ်သူ ကာကွယ်နိုင်မှန်း ကိုယ် သိတယ်၊ ကိုယ် မသိတာက ...."

" ခင်များ ပါမောက္ခရူကိုပြောတာလား " 

လင်းဟန်က ခေတ္တ တွေးတောပြီးနောက် မေးလိုက်သည်။

ဟယ့်ယွင်ထင်က မငြင်းဆန်ပေ။

လင်းဟန်  မည်သို့ နှစ်သိမ့်ပေးရမည်ကိုမသိသောကြောင့် သူ့ကိုသာ ပြန်ဖက်ပေးလိုက်သည်။ နောက်ဆုံးမှာ‌တော့ သူက ယေဘုယျအကြောင်းရာကိုသာ ကြားသိခဲ့ပြီး အချို့သောအသေးစိတ်များကို နားမလည်ချေ။ 

" ခင်များ စိတ်မရှိဘူးဆိုရင် ကျွန်တော့်ကို ပြောပြလို့ရတယ် "

လင်းဟန်သည် ကောလိပ်တက်စဉ်က ရူကျစ်ဟန်၏အတန်းများအား အမြဲတစေ နှစ်သက်ခဲ့သည်။ ထိုသူက သူ့ကိုယ်ပိုင်သုတေသနပေါ်တွင်သာ အာရုံစိုက်ကာ အနည်းငယ် ခပ်တန်းတန်းဖြစ်ပုံ‌ပေါ်သော်လည်း အကယ်၍ ကျောင်းသားတစ်ယောက်မှ သူနှင့် ဆွေးနွေးလိုလျှင် ၎င်းတို့၏မေးခွန်းများကို ဖြေကြားရန် အချိန်ကြာကြာပေးတတ်သည်။

သို့သော် ၎င်းတို့၏အထူးပြုရာဘာသာရပ်များကွာခြားချက်မှုကြောင့် လင်းဟန်က နောက်ဘက်ဆုံးအတန်းတွင်သာ ထိုင်ကာ နားထောင်လေ့ရှိပြီး အတန်းပြီးဆုံးလျှင် မည်သည့်မေးခွန်းကိုမျှ မမေးမြန်းဘဲ ထွက်ခွာသွားလေ့ရှိခဲ့သည်။

လင်းဟန်က ပါမောက္ခရူမှ သူ့အား မှတ်မိနေလိမ့်မည်ဟု မထင်ထားသည့်အပြင် သူ့ဘက်ကပင်  လက်ဆွဲနှုတ်ဆက်ရန် စတင်ခဲ့သောကြောင့် လင်းဟန်မှာ အနည်းငယ် ၀မ်းသာမိခဲ့သည်။

လင်းဟန်သည် တစ်ချိန်က ရူကျစ်ဟန်၏ ပညာပါရမီရှိသောတွေးခေါ်ပုံနှင့် ဖော်ရွေသည့်သဘောထားကို အလွန်လေးစားခဲ့သည်။ သူက ယခုအကြိမ်မှလွဲ၍ အခြားမည်သည့်အရာကိုမျှ စိတ်ဆိုးသည့်ပုံ သို့မဟုတ် စိုးရိမ်ပူပန်သည့်ပုံမပေါ်ခဲ့ပေ။ 

ဤမီးလျှံသွေးကိစ္စကို လူအနည်းငယ်သာသိရှိသည့်အပြင်ွ ဟယ့်ယွင်ထင်မှ ချီကျားဇယ်အား သေဒဏ်အပြစ်ပေးမခံရစေရန် ကတိပေးခဲ့သောကြောင့် ချီကျားမူသည်လည်း ပါ၀င်လာခဲ့ရသည်။ ချီကျားဇယ်အား သူကိုယ်တိုင် သတ်ဖြတ်ခဲ့သည်ဟု သတင်းဖြန့်ပြီးနောက် အခြေအနေ ကောင်းလာနိုင်မည်လားကို ကြည့်ရှုရန် လုအန်းဟယ်မှတစ်ဆင့် ရူကျစ်ဟန်ဆီသို့ လျှို့ဝှက်စွာဖြင့် ပို့ခဲ့သည်။  

အကယ်၍ ရူကျစ်ဟန်ထံတွင် တစ်စုံတစ်ရာဖြစ်ပွားသွားလျှင် နောက်ဆက်တွဲအစီအစဉ်များအားလုံးမှာ ပြိုကွဲပျက်စီးသွားနိုင်သည်။

" လော့ချီက ဝမ်ထျန်းယောင်ကို အပြစ်ခံဖို့ တွန်းထုတ်ခဲ့တာ သိသာတယ်။ ကျွန်တော် စစ်သင်္ဘောမှာရှိ‌နေတုန်းက သူ့စိတ်ကို အကြိမ်ကြိမ် ဖတ်ခဲ့တယ်။ သူက လက်ရှိအခြေအနေနဲ့ပက်သက်ပြီး တကယ်ဘာမှမသိဘူး "

လင်းဟန်က ၎င်းကိုစဉ်းစားလိုက်ပြီးနောက် ဟယ့်ယွင်ထင်ကိုပြောသည်။ 

" ပြီးတော့  အဲ့အချိန်တုန်းက အခြားသူတွေကတော့ သံသယ၀င်စရာကောင်းတဲ့သူမရှိတာမို့လို့ အခြားသူတွေကို မထိခဲ့ဘူး "

သို့သော် လွန်ခဲ့သည့်ရက်ပိုင်းအတွင်း ဟယ့်ယွင်ထင်စုဆောင်းခဲ့သည့်အချက်အလက်များကို သုံးသပ်ကြည့်လျှင် သဲလွန်စအားလုံးမှာ ဖယ်ရှားခံထားရပြီး ဇာ့ဂ်များမှာ  မတော်တဆမှုကဲ့သို့သာ ဖြစ်နေသည်။ ပြန်ရောက်လာပြီးနောက် စက်ပိုင်းဆိုင်ရာအဖွဲ့မှ ဗိုလ်မှူးများသည် အပြစ်ဒဏ်ကို လက်ခံခဲ့ကြရသည။ 

ထိခိုက်မှုအားလုံးကို လက်ခံရန် ဆန္ဒရှိကြသော်လည်း အဆုံးသတ်တွင် ၎င်းတို့သည် မည်သူက အုပ်စု A ၏ လက်နက်များကို အစားထိုးခဲ့သည်ဆိုသည့် အမှန်တရားကိုဖုံးကွယ်နိုင်ခဲ့သည့်အပြင် ချီကျားဇယ်အား စစ်သင်္ဘောထံသို့ပင် ပို့ဆောင်နိုင်သည့် အင်အားရှိသောသူကိုလည်း ရှာမတွေ့ကြချေ။

သို့သော် လက်ရှိအ‌ချိန်တွင် မတော်တဆမှုအားလုံးမှာ ဟယ့်ယွင်ထင် တစ်ဦးတည်းကိုသာ ညွှန်ပြနေသည်။ ၎င်းတို့က အင်ပါယာ၏ နေမင်းကြီး ၎င်းတို့လက်ထဲ ကျဆုံးသွားမည်ကို ဂရုမစိုက်‌ကြပေ။ ဟယ့်ယွင်ထင်ပြန်ရောက်လာမည်ကို တားဆီးရန်  ၎င်းတို့က ဇာ့ဂ်ဖြစ်စေ၊ မီးလျှံသွေးဖြစ်စေ သို့မဟုတ် ကယ်ဆယ်ရေးအား ဖြတ်တောက်ခြင်းဖြင့်ဖြစ်စေ နည်းလမ်းမျိုးစုံကို အသုံးပြုရန်သာ စဉ်းစားခဲ့ကြသည်။

ထိုရှုထောင့်မှ ကြည့်သည့်အခါ အကယ်၍ ရူကျစ်ဟန်သာ ၎င်းတို့အောက်သို့ ၀င်ရောက်ရန် ဆန္ဒရှိလျှင် ရူကျစ်ဟန်အား ပြန်‌ပေးဆွဲမှုနှင့်အတူ  မီးလျှံသွေးသုတေသနမှာ ပိုမြင့်မားသည့်အဆင့်တစ်ဆင့်သို့  ရောက်ရှိနိုင်ပြီး တစ်ဖက်သူ၏အစီအစဉ်မှာ ပို၍ ပြီးပြည့်စုံသွားလိမ့်မည်။

မလိုအပ်လျှင် သို့မဟုတ် အကယ်၍ လုအန်းဟယ်ထံ၌ တစ်စုံတစ်ရာ မဖြစ်ပွားခဲ့လျှင် ဟယ့်ယွင်ထင်မှာ လူလုံးထွက်ပြ၍ မဖြစ်ချေ။

" ကျွန်တော် ခင်များနဲ့အတူ စောင့်နေမယ် "

 လင်းဟန် ထပ်ပြောလိုက်သည်။

ဟယ့်ယွင်ထင်က တုံ့ပြန်လိုက်သော်လည်း လင်းဟန်၏လက်ကိုမူ မလွှတ်လိုက်ချေ။

ဤတစ်ခါသည် ၎င်းတို့နှစ်ယောက်လုံး ပထမဆုံး ပွင့်ပွင့်လင်းလင်းချစ်ဖူးကြခြင်းဖြစ်သည်။ နှစ်ယောက်လုံးတွင် အတွေ့အကြုံမရှိကြသော်လည်း ယခုအချိန်တွင် ပင်ကိုစရိုက်အရ တစ်ယောက်ကို တစ်ယောက် ပိုမိုနီးကပ်ချင်နေကြပြီး အချိန်ရှိသရွေ့ အတူတကွ ပူးကပ်လိုကြသည်။ လင်းဟန်က အနည်းငယ် ရှက်ကိုးရှက်ကန်းဖြစ်သွားသော်လည်း ထိုအခိုက်အတန့်ရှိ နူးညံ့ကြင်နာမှုကို အမှန်တကယ် လက်မလွှတ်နိုင်ပေ။

သူက တစ်ခုခုကို စဉ်းစားနေဆဲဖြစ်ပြီး တစ်ခဏမျှကြပြီးသည့်နောက် ဟယ့်ယွင်ထင်၏အင်္ကျီအစွန်းကို ဆွဲကာ ပြောလိုက်သည်။

" ခင်များ မှတ်မိသေးလား.... ရှီးယွမ်ဆိုတဲ့ လက်ထောက်ကို "

၀မ်ထျန်းယောင်သည် သူ၏ဂုဏ်ကျက်သရေကိုဂရုစိုက်ကာ ၀င့်ကြွားခြင်းကို နှစ်သက်သူဖြစ်သည်။ ယခင်က လူအများ၏သဘောထားကို နားလည်ရန် ကြိုးပမ်းအားထုတ်မှုများမှာ ရင်းနှီးဖော်ရွေသည်ဟူသည့် သူ့ ပုံရိပ်ကို ပြရုပ်တင်ရန် ကြံစည်မှုတစ်ခုသာလျှင်ဖြစ်သည်။ ထို့ကြောင့် သူ့ပတ်၀န်းကျင်တွင် သူ့နောက်သို့ လိုက်ပါသည့်လူများရှိသည်မှာ ပုံမှန်ဖြစ်သည်။ 

ရှီးယွမ်က သူ့နောက်သို့လိုက်ပါသည့်သူများထဲမှ သက်တမ်းအကြာဆုံးဖြစ်၏။  ခပ်လျှိုလျှိုနေကာ စကားနည်းသော်လည်း စွမ်းဆောင်ရည်ရှိခြင်းကြောင့် ၀မ်ထျန်းယောင်၏ယုံကြည်မှုကို အနိုင်ရခဲ့သည်။

" သူကရော ပြဿနာရှိနိုင်မလား " လင်းဟန်က မော့ကြည့်ကာ သူ့ကိုမေးသည်။

" ကိုယ် စစ်ဆေးကြည့်ခဲ့ပြီးပြီ " ဟယ့်ယွင်ထင်မှ ပြန်ပြောသည်။ 

 " လုအန်းဟယ်က သူ့ကို ကိုယ်တို့‌တွေစစ်‌သင်္ဘောပေါ်ကနေ ထွက်လာကတည်းက စောင့်ကြည့်နေခဲ့တာ။ အင်ပါယာကိုပြန်ရောက်တဲ့အချိန်ကနေစပြီး အခုထိ သူ့အပြုအမူတွေနဲ့ပက်သက်ပြီး ထူးခြားတာမရှိဘူး။ သူက ၀မ်ထျန်းယောင်ကို ဆက်ကူညီနေပြီး ပုံမှန်လိုပဲ "

ဟယ့်ယွင်ထင်က သူ့လေသံကို ပြောင်းကာ ပြောသည်။ " ဒါပေါ့၊ အိမ်ရှေ့စံမင်းသားပါ၀င်တဲ့တချို့အရာတွေက သေသေချာချာ စုံစမ်းလို့မရနိုင်ဘူးလေ။ ဒါကြောင့် သူ့ကို မသင်္ကာစရာကောင်းမှုစာရင်းထဲကနေ လုံးလုံး မဖယ်ထားသေးဘူး "

လင်းဟန်က ထိုးဖောက်ကျော်ဖြတ်နိုင်မည့်အရာတစ်ခုကို ရှာတွေ့သွားသသည်။

 " ဒါဆို...ကျွန်တော် ခင်များကို ကူညီခွင့်ပြုပေးပါ "

သူက ဟယ့်ယွင်ထင်၏မျက်၀န်းထဲကို ကြည့်နေပြီး သူ့လေသံမှာ စိတ်ရင်းမှန်နှင့် ဖြစ်နေကာ  သဘောမတူမည်ကို စိုးရိမ်နေသည့်အလား အနည်းငယ်ပင် အသနားခံသည်။

" ကျွန်တော် လက်‌ဆွဲနှုတ်ဆက်ရုံ‌လေးပဲ လုပ်ပြီး ကျွန်တော် ကြားခဲ့တာကို ပြန်ပြောပြမယ် ၊ အဲ့လိုရမလား "

ဟယ့်ယွင်ထင်က မျက်လွှာချထားသည့်မျက်၀န်းများဖြင့် သူ့ကို ငုံ့ကြည့်လာပြီး လက်ရှိအခြေအနေနှင့် မသက်ဆိုင်သည့်တစ်ခုကို ရုတ်တရက်ပြောလာသည်။

" လင်းဟန် ၊ မင်း အခုထိ ဖြည့်စွက်စာ မသောက်ရသေးဘူး "

သူ့အား ခေါင်းကိုက်စေသည့် သူ့လက်ထဲမှ အထုတ်ကို ကြည့်လိုက်ရင်း လင်းဟန်၏မျက်နှာအမူအရာက ခဏတာ တောင့်ခဲသွားတော့သည်။ အမှန်တော့ ကိုယ့်ကိုယ်ကိုယ် တွန်းအားပေးကာ သောက်လိုက်လျှင် ပြီးဆုံးသွားမည်ဖြစ်ပြီး အများဆုံးမှာ ခဏတာ မသက်မသာဖြစ်ရုံပင်။

သို့သော် ၎င်းတို့နှစ်ယောက် အတူရှိခါစဖြစ်သောကြောင့် လင်းဟန်က ဟယ့်ယွင်ထင်၏လက်ကို ကိုင်ချင်ခဲ့သည့်အချိန်အား ရုတ်တရက် သတိရသွားသည်။

ထိုအချိန်တွင် သူက ဟယ့်ယွင်ထင်နှင့်ပက်သက်သည့်သူ့ခံစားချက်များကို နားမလည်သေးသော်လည်း ရိုးရှင်းစွာဖြင့် လက်မလွှတ်နိုင်ခဲ့ပေ။

သည်အကြိမ်တွင် သူက လုပ်လေ့‌လုပ်ထမရှိစွာဖြင့် တစ်ကြိမ်မျှ ခေါင်းမာလိုသည်။

" ကျွန်တော် မသောက်ချင်ဘူး "

လင်းဟန်က တစ်ဖက်သူ၏အင်္ကျီကို သူ့လက်ချောင်းများနှင့် မဝံ့မရဲ ဆွဲယူပြီးနောက် မျက်၀န်းများကို မော့ကြည့်လိုက်သည်။

" ကျွန်တော် အဲ့ဒါတွေကို ပမာဏအများကြီးသောက်နေရတာ ရက်တွေကြာပြီ၊ အဲ့ဒါက သောက်ဖို့ တကယ် ခက်ခဲတယ် "

ဟယ့်ယွင်ထင်မှ ဘာမှပြောမလာသည်ကို မြင်တော့ လင်းဟန်က သတိထားလျက် ထပ်ပြောသည်။

" တကယ်ပြောနေတာ "

ဟယ့်ယွင်ထင်စကားပြောတော့မည့်အချိန်လေးတွင် သူ၏ဆက်သွယ်ရေးစက်က ထမြည်လာ၏။

ချက်ချင်းဆိုသလို ဟယ့်ယွင်ထင်၏ကျောပြင်က သူ့အလိုလို ဖြောင့်တန်းသွားပြီး သူ့နှုတ်ခမ်းထောင့်များသည်လည်း ခါတိုင်းကဲ့သို့ အေးစက်၍ ဖြောင့်တန်းနေကာ နူးညံ့သည့်လေထုက ပျောက်ကွယ်သွားတော့သည်။

လင်းဟန်က ခလုတ်နှိပ်လိုက်သည့်  အေးစက်စက်မျက်နှာနှင့် သူကို ကြည့်နေမိသည်။

" ဘော့စ်၊ ကျွန်တော်ပါ "

လုအန်းဟယ်၏ပါးစပ်ဖွင့်လိုက်သည်နှင့် မူလက တောင့်တင်းနေသည့် ဟယ့်ယွင်ထင်၏ပခုံးများသည် နောက်ဆုံးတွင် အနည်းငယ် ပြေလျော့သွားသည်ကို လင်းဟန် မြင်လိုက်ရသည်။

" ပါမောက္ခရူ အဆင်ပြေပါတယ် "

လုအန်းဟယ်က အခြေအနေကို လိုရင်းတိုရှင်း အစီရင်ခံသည်။

" အဲ့ဒီအိုမီဂါက.... ချီကျားဇယ်နဲ့ မတူဘူး "

သူ့အသံထဲသည် အနည်းငယ် မတည်မငြိမ်ရှိနေပြီး သူက  ချီကျားဇယ် ကျည်‌သုံး‌တောင့်ဖြင့် ဆက်တိုက် အနီးကပ်ပစ်ခံရစဉ် သူငယ်အိမ်များ ပြူးကျယ်သွားသည့်အချိန်ကို ပြန်လည်သတိရမိသွားသည့်အလားပင်။

" ပုံမှန်မီးလျှံသွေးထက် ရင်ဆိုင်ဖို့  နည်းနည်းပိုခက်ခဲပေမဲ့ သူ့လောက်ထိတော့ မဟုတ်ဘူး " လုအန်းဟယ်က ဆက်ပြောလာသည်။ 

" ဆူပူမှုမရှိဘဲ ရှင်းခဲ့လိုက်ပြီ ၊ တစ်ဖက်သူက ကျွန်တော် ဘယ်သူဆိုတာ ရှာမတွေ့ခဲ့ဘူး။  ပြီးတော့ ပါမောက္ခရူကို လုံခြုံတဲ့နေရာဆီ ပို့ခဲ့ပြီးပြီ ။ တစ်ခုတည်းသောပြဿနာက အခု လေးတင် ဆက်သွယ်ရေးဖြတ်တောက်ခံရလို့ ချီကျားမူကို ဆက်သွယ်လို့မရဖြစ်နေတဲ့ဟာပါ "

သူ့အသက်ကိုစွန့်စားကာ ဟယ့်ယွင်ထင်အား နယ်စပ်ဒေသမှ ပြန်လည်ခေါ်ဆောင်ပေးလာသောကြောင့် သို့မဟုတ် သူ့၏အရည်အချင်းမှာ အမှန်တကယ် စိတ်အေးစေနိုင်သောကြောင့် ဖြစ်နိုင်သည်။ လုအန်းဟယ်က ချီကျားမူအပေါ်  ခံစားချက်ကောင်းရှိနေစွာဖြင့် ထပ်ပြောလာသည်။

" ဒါပေမဲ့ သူ အခင်းဖြစ်ရာနေရာကို ရောက်ခဲ့ရင်တောင်မှ ပါမောက္ခရူအဆင်ပြေတာကိုမြင်ရင် အချိန်မှီပြန်လာပြီး ဘာမှဖြစ်မှာမဟုတ်ဘူးလို့ ကျွန်တော်ယုံကြည်တယ် "

" ပြီးတော့ ဘယ်သူမှ မထိခိုက်ခဲ့ဘူး။ ကျွန်တော်က ပါမောက္ခရူကို ကာပေးဖို့လုပ်ခဲ့ပေမဲ့ သူက ကျွန်တော့်ကို မြေကြီးပေါ်  တွန်းချခဲ့တာမို့ နှစ်ယောက်လုံး ရှောင်တိမ်းနိုင်ခဲ့တယ် "

လုအန်းဟယ်ဘက်တွင် အလွန်တိတ်ဆိတ်နေပြီး ရူကျစ်ဟန်၏သီးသန့် သိပ္ပံစမ်းသပ်ခန်းထဲတွင် ရှိနေသည့်ပုံပေါ်လေသည်။ သူက ရူကျစ်ဟန်ကို တစ်ခုခုပြောနေပုံရပြီး ထိုဖြစ်စဉ်ကို ကြုံခဲ့ရပြီးသည်တောင်မှ တစ်ဖက်သူက ပျာယာခတ်မနေဘဲ လုအန်းဟယ်အား တည်ငြိမ်စွာဖြင့် ကျေးဇူးတင်နေဆဲဖြစ်သည်ကို လင်းဟန် ကြားနေရသည်။ 

လုအန်းဟယ်၏အစီရင်ခြင်းပြီးဆုံးပြီးနောက် သူက ဟယ့်ယွင်ထင်အား ခါတိုင်းကဲ့သို့ ကြိုတင်ကာကွယ်မှုအချို့ပြောလာပြီး ရူကျစ်ဟန်၏ဘေးကင်းမှုကို သေချာစေရန် အခြေစိုက်စခန်းသို့ သုံးရက်ကြာပြီးမှသာ ပြန်လာနိုင်ပေမည်။

ဟယ့်ယွင်ထင်က ဆက်သွယ်‌‌ရေးစက်ကို မပိတ်မီ စကားနှစ်ခွန်းပြောခဲ့သည်။

လင်းဟန်က လက်လှမ်းကာ ဟယ့်ယွင်ထင်၏လည်ပင်းကို ထိလိုက်သည်။ သူ့စိတ်ခံစားချက်များမှာ နောက်ဆုံးတွင် တည်ငြိမ်သွား‌ပြီး‌သည့်‌နောက် ပြောလာသည်။ 

" အဆင်ပြေပါတယ်။ လုအန်းဟယ်က အဆင်ပြေပြီး ပါမောက္ခရူလည်း အဆင်ပြေတယ် "

" ကျွန်တော် ချီကျားမူကို အရင်လေ့ကျင့်ရေးတွေတုန်းက အကြိမ်ကြိမ် တွေ့ခဲ့တယ်။ သူက အရမ်းဉာဏ်ကောင်းတယ်။ မကြာခင် ဘေးကင်းကင်းနဲ့ ပြန်ရောက်လာပါလိမ့်မယ် " 

လင်းဟန်ကပြောလိုက်သည်။

ဟယ့်ယွင်ထင်က ' အင်း 'ဟု  အသံပြုလိုက်ပြီး နောက်ဆုံးတွင် အနည်းငယ် စိတ်ပြေလျော့သွားသည့်အလား သူ့လက်များကို မြှောက်ကာ တစ်ဖက်သူအား ယခင်အနေအထားအတိုင်း ‌ဆက်လက်ပွေ့ဖက်လိုက်သည်။ သို့သော် စက္ကန့်အနည်းကြာပြီးသည့်နောက် သူက မပြီးဆုံးသေးသည့်စကားခေါင်းစဉ်ကို ပြန်မှတ်မိသွားသည်။

" မင်း အာဟာရဖြည့်စွက်စာ မသောက်ရသေးဘူး "

"……" 

လင်းဟန်မှာ သူ့အတွက် စောင့်နေဆဲဖြစ်မည်ဟု မမျှော်လင့်ထားမိချေ။ သူက ပါးဖောင်းကာ သူ့လက်ထဲတွင် ရှိနေသည့်အရာကို တုံ့ဆိုင်းစွာဖြင့် ကြည့်လိုက်သည်။

ဟယ့်ယွင်ထင်သည် လုအန်းဟယ် လုံခြုံသည်ကို သိရှိရပြီးနောက် လင်းဟန်၏ခေါင်းမာသည့် စိတ်အခြေအနေက တစ်ဖန်ပြန်ရောက်လာသည်။ သူက နှာခေါင်းရှုံ့ကာ အနည်းငယ် တွန်းလှန်နေသည်။

" ဟယ့်ယွင်ထင် ကျွန်တော် ဒါကို မသောက်ချင်ဘူး " 

သူက အနီးသို့ ကပ်သွားပြီး ကူးလုလုအား ပြောနေသကဲ့သို့သူ့လေသံကို ပျော့ပြောင်း‌လိုက်သော်လည်း ထိုအသံမှာ ကလူမြူဆွယ်သည့်အသံဟု မှတ်ယူနိုင်သည်။

" ရလား..လို့ "

လင်းဟန်က ဟယ့်ယွင်ထင် တောင့်တင်းသွားသည်ကို ခံစားမိလေ၏။

မည်သူကမှ ဟယ့်ယွင်ထင်အား ဤကဲ့သို့ ပြောရဲခဲ့ကြမည်မဟုတ်ပေ။ ၎င်းမှာ ကျိုးကြောင်းမဆီလျော်သည့်တောင်းဆိုချက်မှန်း သူက ရှင်းလင်းစွာဖြင့် သိရှိ၏။ ရုပ်ပိုင်းဆိုင်ရာနှင့်စိတ်ပိုင်းဆိုင်ရာကြံ့ခိုင်မှုအတွက်ဖြစ်သည့်အပြင် လင်းဟန်၏ကိုယ်ခန္ဓာမှာ မူလကတည်းက မကောင်းမွန်သဖြင့် အာဟာရဖြည့်စွက်များမှာ မရှိမဖြစ် လိုအပ်လေသည်။

အကယ်၍ တစ်ယောက်ယောက်သာ သူ့အား ထိုကဲ့သို့ ပြောလာမည်ဆိုလျှင် သူက ၎င်းတို့အား အေးစက်စက်သာ ကြည့်ကာ တုံ့ပြန်မည်ပင် မဟုတ်ချေ။ နောက်ဆုံးတွင် သူသည် ဤကဲ့သို့ အချိန်ကုန်ခံပြောဆိုစရာမျိုး လုံးဝမလိုအပ်ဘဲ တခြားသူများကို အတင်းအကြပ် သောက်စေနိုင်သည်။

" ရလား လို့ ‌" 

သူ မလှုပ်ရှားသည်ကိုမြင်တော့ လင်းဟန်က ပို၍ရဲတင်းလာကာ ထပ်ပြောလေသည်။ 

"....." ဟယ့်ယွင်ထင်က မိနစ်၀က်ခန့် တိတ်ဆိတ်နေ၏။

တခဏကြာပြီး‌သည့်နောက် သူက မာဆတ်ဆတ်ဖြင့် ပြောလာသည်။

" မရဘူး "

"...အို့" 

လင်းဟန်က အနည်းငယ် စိတ်ပျက်သွားသော်လည်း သူက သိပ်ပြီးဂရုမစိုက်ချေ။ နောက်ဆုံးတွင် သူက အာဟာရဖြည့်စွက်စာကို သောက်သုံးရဦးမည်ဖြစ်ပြီး သူက ထိုကဲ့သို့ ရုတ်တရက် ပြောချင်ခဲ့ရုံသာဖြစ်သည်။ သူက အာဟာရဖြည့်စွက်စာအား ဟယ့်ယွင်ထင်ထံ အားအင်ချည့်နဲ့စွာ ကမ်းလိုက်သည်။

" ဒါဆို ကျွန်တော့်ကို ကူဖွင့်ပေး "

နောက်ဆုံးတွင် ဟယ့်ယွင်ထင်က  သူ့ထံလှမ်းမပေးခင် အမြဲတမ်း ဖွင့်ပေးလေ့ရှိသည်။ လင်းဟန်က သူ၏ စိတ်သဘောထားမည်သို့ရှိနေသည်ကို ရှင်းမပြနိုင်။ သူက ဤဖြစ်ရပ်ဆိုးမှ မလွတ်မြောက်နိုင်သည်ဆိုမှတော့ ၎င်းမှ တစ်စုံတစ်ခု ရရန် နည်းလမ်းရှာရမည်ဟူ၍သာ သူက တွေးနေသည်။ ဤအတွေးက ကောင်းသည်၊မ‌ကောင်းသည်ကို မသိတော့သော်လည်း ၎င်းအား မစဉ်းစားလိုတော့ပေ။

ဤအကြိမ်တွင် နောက်ဆုံးမှာတော့ ဟယ့်ယွင်ထင်က မငြင်းဆန်‌ဘဲ နာခံစွာဖြင့် ယူလိုက်သည်။

လင်းဟန်က မော့မကြည့်။ ရုတ်တရက် ပူလောင်နေသည့်အသက်ရှုသံတစ်ခုနီးကပ်လာသည်ကို ခံစားမိသည့်အချိန်မှာတော့ သူက ဟယ့်ယွင်ထင်မှ သူ့အား အာဟာရ ဖြည့်စွက်စာ ပေးလာမည်ကို စောင့်နေရုံသာဖြစ်သည်။ 

နောက်တစ်စက္ကန့်တွင် သူ့နှုတ်ခမ်းနှင့် လျှာလေးမှာ ပိတ်ဆို့ခံလိုက်ရ၏။

 ဟယ့်ယွင်ထင်သည် သူ အမုန်းဆုံးဖြစ်သည့်အာဟာရဖြည့်စွက်စာအား ခံတွင်းထဲတွင် ငုံထားရင်း သူ့မျက်နှာကို ကိုင်ကာ သူ့အား နမ်းရန် နီးကပ်လာလေတော့သည်။

👾