Chapter 148

🐯Chapter 148

သဝန်တိုခြင်းအမျိုးအစား...

သဝန်တိုခြင်း...

တရားဝင်လက်တွဲဖော်...

တစ်ဦးတည်းသောအိမ်ထောင်ဖက်...

ချစ်မြတ်ရနိုးသူ...

ရှို့ဟန်တစ်ဦးတည်းကသာ ကုယွီမြန်ကို ပိုင်ဆိုင်​ပေ၏။

တစ်သက်လုံး အတူတူ နေနိုင်တယ်၊ နမ်းနိုင်​ပွေ့ဖက်နိုင်ပြီး တစ်အိပ်ရာထဲမှာလည်း အိပ်နိုင်​တယ်...

ရှင်းလင်းပြတ်သားသော မြင်ကွင်းများ၊ မရေတွက်နိုင်သော စကားလုံးများနှင့်အတူ ရှို့ဟန်၏ဦးနှောက်က လက်ခနဲဖြစ်သွားသည်။

ကုယွီမြန် ပြုံးကာ ပထမဦးဆုံး နှင်းကျားသစ်လေး၏နဖူးကို နမ်းလိုက်သည့် လွန်ခဲ့သောအချိန်များကို ပြန်ပြီးသတိရစေမိသည်။ ကုယွီမြန်၏မျက်လုံးများထဲရှိ အရောင်အသွေးစုံလင်လှသည့်တောက်ပမှုများက အသက်ရှူကျပ်လောက်သည်အထိ အနမ်းခံရသောအခါ ဖြစ်ပေါ်လာမည့်သူ၏ပုံပန်းသွင်ပြင်ကို ရှို့ဟန် မြင်တွေ့ချင်လာသည်။

ထို့အပြင် ကုယွီမြန်အိပ်​ပျော်​နေစဉ်အတွင်း သူ၏အင်္ကျီလည်ပင်းစက နှင်းကျားသစ်လေး၏ လက်သည်းဖြင့်

ဆွဲဖွင့်ခံလိုက်ရပြီး နူးညံ့ချောမွေ့ကာ ကြွေ​ရောင်​တောက်​နေ​သော ဖြူဖြူ​ဖွေး​ဖွေး ညှပ်ရိုးလေး ထွက်ပေါ်လာခဲ့သည်။

ထိုမှတစ်ဆင့် ဟင်းချက်နေစဉ် ဆွဲ​ဆောင်မှုရှိလှသည့် ခါးကောက်ကြောင်းလေး...

အင်္ကျီလက်စကို ဆွဲတင်လိုက်သည့်အခါ သွယ်လျလျလက်မောင်းလေးသည်လည်း ထုတ်ဖော်ပြသခံလိုက်ရသကဲ့သို့ပင်။

ဤနည်းဖြင့် သူ့နှလုံးသားထဲတွင် စိတ်ဆန္ဒများနှင့် အ​တွေးများ ကြီးမားကျယ်ပြန့်လာခဲ့ပြီး ရုတ်တရက် ပြင်းပြ​သောဆန္ဒများမှာ ဝင်ရောက်လွှမ်းမိုးလာခဲ့သည်။ သို့​သော် ထိုကဲ့သို့ ကိုယ့်ကိုယ်ကို အထင်ကြီးမှုများနှင့် တစ်ကိုယ်​ကောင်းဆန်မှုများကို ဆန္ဒမဲတစ်ခုတည်းဖြင့် ပယ်ချတားမြစ်လိုက်သည်။ သူ အနည်းငယ် ဂရုတစိုက်ဖြင့် ချည်းကပ်သင့်​ပေသည်။

​ဂရုဏာသက်ခြင်း သို့မဟုတ် မှီခိုလိုခြင်း မဟုတ်သည်မှာ သေချာ​ပေ၏။

ဟိုးယခင်ကတည်းက ဤလူသားလေးကို သူ့အိပ်ရာဆီသို့ ခေါ်ဆောင်သွားချင်မိသည်။

"........."

ဘန်း

တံခါးပွင့်သွားသည်။

ရှို့ဟန် တစ်နေရာထဲမှာပင် တည်ငြိမ်စွာရပ်လျက်ရှိနေသော်လည်း သူ၏မျက်နှာမှာ အနီရောင်သန်းနေသည်။

ဘန်းဟူသော မြည်သံကျယ်ကြီးနှင့်အတူ အလိုလျောက်သစ်သားတံခါးက သူ့နဖူးနှင့် မိတ်ဆက်သွားတော့၏။ လုံးဝမှင်သက်နေသောရှို့ဟန်က တံခါးဖြင့် ပိတ်ဆို့တားဆီးခြင်းခံလိုက်ရသည်။

ကုယွီမြန် အပြင်ကိုထွက်လာပြီး နောက်သို့ ပြန်လှည့်ကြည့်လိုက်သောအခါ တံခါးကို ပိတ်လျက်သားတွေ့ရသည်။

တံခါးအပြင်ဘက်နှင့် အတွင်းဘက်တို့တွင် နှစ်စက္ကန့်ခန့် တိတ်ဆိတ်ငြိမ်သက်သွားကြ၏။

ရှို့ဟန် "........"

ကုယွီမြန် "......"

တံခါးက ဘယ်လိုပွင့်သွားတာလဲ…

ညခုနှစ်နာရီခွဲအချိန်၌ ပတ်ဝန်းကျင်သည် လုံးဝကို အမှောင်ကျသွားပြီဖြစ်၏။

တံခါး၏အခြားတစ်ဖက်တွင် ကုယွီမြန် မျှော်လင့်ထားသည်ထက် ပို၍အလုပ်ရှုပ်နေကြ၏။ သူတို့နှစ်ဦးမှလွဲ၍ အခြားဧည့်သည်​တော်များသည် သစ်သားအိမ်၏အပြင်ဘက် မြေကွက်လပ်လေးတွင် စု​ဝေး၍စခန်းချကာ အနားယူနေကြသည်။

၅၊၆၊၇​ယောက်​မြောက် ဧည့်သည်​တော်များကို အရေးပေါ်တာဝန် ပေးအပ်ခြင်းခံရသောကြောင့် ဧည့်သည်အားလုံး တစ်နာရီအတွင်းတွေ့ဆုံရန်မှာ ကျရှုံးသွားခဲ့ရပြီး ယ​နေ့ညအတွက် မည်သူမျှရွက်ဖျင်တဲ မရရှိခဲ့ပေ။ သို့​သော် ပရိုဂရမ်အဖွဲ့တွင် အသိတရားအနည်းငယ်ရှိ​သေးသောကြောင့် အိပ်ရာလိပ်များအပြင် ချက်ပြုတ်စရာ အိုးခွက်ပစ္စည်းများနှင့်ပါဝင်ပစ္စည်းအများအပြား ထိုကဲ့သို့သော စခန်းချရာတွင် မရှိမဖြစ်လိုအပ်သည့်ပစ္စည်းများကို သူတို့အား ပေးခဲ့သည်။

ဟက်စကီးလေး၊ ကောအာရှစ်စစ်နှင့် ကောစန်းရှစ်ပါးတို့က သစ်လုံးအိမ်အပြင်ဘက်မှနေ၍ ​စောင့်ကြည့်နေခဲ့ကြသည်။ တံခါးပွင့်သွားသောအခါ သူတို့က ကုယွီမြန်၏ရင်ခွင်ထဲသို့ တစ်ကောင်ပြီးတစ်ကောင် ခုန်တက်ပြီး စိတ်လှုပ်ရှားစွာ ​အော်ဟစ်ငိုယိုကြ​တော့သည်။ မြေခွေးလေးက ကုယွီမြန် ပြင်ဆင်ပေးထားသော ဧပရွန်ကိုဝတ်ဆင်လိုက်ပြီး မီးမွှေးရာ၌ ကူညီ​ပေးခဲ့သည်။

ရှစ်အာ၊ ရှစ်စန်းနှင့် ဒယ်အိုး ၁၆ တို့အားလုံးက မျက်နှာများနီမြန်းကာ စွမ်းအင်အပြည့်ဖြစ်နေကြသည်။ သို့​သော် ကောရှစ်အာက အလွန်အမင်းပျော်ရွင်ဝမ်းမြောက်နေပုံရပြီး ကုယွီမြန်ပေးထားသည့် လက်ဆောင်သေးသေးလေးကို ကိုင်ထားသော ဒယ်အိုး ၁၆ သည်လည်း ကုယွီမြန်ကို လှည့်ကြည့်ကာ ပြုံးပြခဲ့သည်။

ကျန်တဲ့ ဧည့်သည်​တော်သုံးယောက်က​တော့...

အင်း…

ကုယွီမြန် သူတို့ကို မ​တွေ့ရ​ပေ။ မီးပုံဘေးတွင် နားရွက်လေး လှုပ်တုတ်လှုပ်တုတ်နှင့်ယုန်လေးတစ်​ကောင်၊ ရေကန်ငယ်လေးပေါ်၌ ခြေထောက်တစ်ဖက်ရပ်ထားသည့် မန်ချူးရီးယားကြိုးကြာငှက်လေးတစ်ကောင်နှင့် သစ်ရွက်များကိုဝါးရင်း ပတ်ဝန်းကျင်အနေအထားတစ်ခုလုံးကို ဦးဆောင်နေသူ ခိုအားလားလေးတစ်ကောင်ကိုသာ ကုယွီမြန် ‌မြင်ခဲ့သည်။

သူ့ယခင်ဘဝ၏ ​တိရစ္ဆာန်​ဘေးမဲ့နယ်​မြေများနှင့်တိရစ္ဆာန်ဥယျာဉ်သို့ ပြန်လည်​ရောက်ရှိသွားသလို ကုယွီမြန် ခံစားရသည်။ သို့​သော် ​ဘေးမဲ့နယ်​မြေများတွင်ပင် အပူပိုင်းဒေသရှိ သင့်တင့်မျှတ​သောရာသီဥတုနှင့် ကုန်းပြင်မြင့်လွင်ပြင်တစ်ခုပေါ်၌ အသားနှပ်ဟင်းတစ်ခွက်ချက်ပြုတ်ရန်မှာ မဖြစ်နိုင်​ပေ။ ထို့အပြင် ထိုငှက်များနှင့် သွေးနွေးနို့တိုက်သတ္တဝါများကိုပင် မြင်တွေ့​နေရ​ပေသည်။

ကုယွီမြန် လမ်း​လျှောက်လာသော တစ်စက္ကန့်အတွင်း စကားများ တတွတ်တွတ်​ပြောဆိုပြီး ဆူညံပွက်လောရိုက်နေသောပတ်ဝန်းကျင်တစ်ခုလုံးက လုံးဝငြိမ်ကျသွား​ပေ၏။

ဟက်စကီ​လေး၊ ပန်ဒါများ၊ မြေခွေး​လေး၊ ခိုအားလား၊ ယုန်​လေးနှင့် မန်ချူးရီးယားကြိုးကြာ သူတို့အားလုံးကတောက်ပသောမျက်လုံးများနှင့် သူ့ကိုကြည့်နေကြသည်။

[နမူနာ - ဟား ဟား ဟား…

တင်ဆက်သူ ကု: ငါ ဖွင့်လိုက်တဲ့တံခါးက လမ်းမှား​နေတာပဲဖြစ်ရမယ်...]

[အဖြူ​ရောင်မုန့်ချိုအိအိ​လေး: ​ရေတွက်ကြည့်အုံးမယ်… ကုယွီမြန်ခေါ်လာတဲ့ အ​ကောင်​ပေါက်​လေး​တွေကို ပြောတာမဟုတ်ဘူး… တစ် နှစ် သုံး ​လေး ငါး ​ခြောက် ခုနစ်။ ရှစ်​ယောက်​မြောက်က ဘယ်မှာလဲ… ထွမ်ထွမ်က​ရော... စာကြွင်း: မြန်မြန် အိပ်​နေတာကို ​တွေ့ရလိမ့်မယ်လို့ ​မျှော်လင့်ပြီး ဒီနှစ်နာရီကို ​ဖြတ်​ကျော်ခဲ့ရတာ…]

[ဘာပဲဖြစ်ဖြစ် ငှက်ဘာသာစကား အဆင့် 4 ရဲ့ နာမည်က မပြောင်းလဲဘူး: ​မှောင်​နေပြီ... ​သေ​သေချာချာ မမြင်ရ​တော့ဘူး... မျက်လုံးကို ပိုတက်ဆီယမ် ပါမန်ဂနိတ် ထည့်ကြည့်လိုက်…]

နောက်ခံတေးဂီတသည်လည်း အချိန်ကိုက်ရပ်တန့်သွားခဲ့၏။ မူလအစက ငြိမ့်ညောင်းသာယာနေသောတေးသွားမှ အနည်းငယ်ပိုမိုလေးနက်လာခဲ့သည်။ ဤအချိန်က လုပ်ငန်းတာဝန်များအကြောင်း ပြောဆိုရန် အချိန်တန်​ပေပြီ။

စီစဉ်တင်ဆက်သူသည်လည်း လည်ချောင်းကို တစ်ချက်ရှင်းလိုက်ပြီးနောက် ပြောလာသည်။

"နောက်ဆုံးမှာတော့ အာလုံးသောဧည့်သည်​တော်များက ​ရှေး​ဟောင်းကမ္ဘာပေါ်မှာ တရားဝင်အတူတကွ စုစည်းကုန်ကြပါပြီ… စကားအများကြီး ပြောမ​နေ​တော့ဘူး… ပရိသတ်​တွေကို ဧည့်သည်​တော်များနဲ့ မိတ်ဆက်ပေးချင်ပါတယ်ー"

"ပထမဆုံးဧည့်သည်ကတော့ အယ်လ်ဘတ်စားသောက်ဆိုင်ရဲ့ ဥက္ကဌလည်းဖြစ်တဲ့ တင်ဆက်သူ ကုယွီမြန်ပဲဖြစ်ပါတယ်… သူက ကြယ်တာရာကောင်းကင် ပလက်ဖောင်းမှာလည်း ရေပန်းစားသူဖြစ်ပါတယ်…" 

ကုယွီမြန် သူ့​နောက်တွင်ရှိ​သော သစ်သားတံခါးကိုကြည့်ရင်း ရှို့ဟန် ထွက်လာမည့်အချိန်ကိုတွေးနေခဲ့သည်။ သူ ရှို့ဟန်ကို မိတ်ဆက်ပေးရလိမ့်မည်။

ကင်မရာများမှာ ကုယွီမြန်ထံသို့ ရောက်ရှိလာခဲ့သည်။ ကုယွီမြန်က လက်သည်းကိုက်နေကြသည့် ပန်ဒါပေါက်လေးနှစ်ကောင်နှင့် အမြီးကို ပျော်ရွင်စွာ လလှုပ်ရမ်းနေသည့်ဟက်စကီးလေးကို ထိန်းထားရင်း ခဲယဉ်းစွာဖြင့် ကင်မရာကို ကြည့်ကာနှုတ်ဆက်လိုက်သည်။

ဖန်သားပြင်ပေါ်ရှိ မှတ်ချက်များက အလွန်ပင် အ​ထောက်အပံ့ဖြစ်ပြီး စိတ်ဝင်စားဖွယ်ကောင်းကာ အမျိုးမျိုးသော အားပေးထောက်ခံမှုများလည်း ထွက်ပေါ်လာသည်။

"ဒုတိယဧည့်သည်ကတော့ အောင်မြင်​​ကျော်ကြားတဲ့ တယောပညာရှင် ကောရှစ်အာပဲဖြစ်ပါတယ်…"

ကင်မရာက ထင်းချောင်းကိုကိုင်ရင်း ကုယွီမြန်ဆီသို့ပြေးသွားသည့် လုံးဝိုင်းဝိုင်းကောရှစ်အာထံသို့ ရွှေ့သွားခဲ့သည်။

ဖန်သားပြင်​ပေါ်ရှိ မှတ်ချက်များ: [အား... ငါ့ပြဌာန်းစာအုပ်ထဲက ပန်ဒါလေး ခုန်ထွက်လာတယ်…]

"တတိယမြောက် ဧည့်သည်​တော်ကတော့ လက်ဝှေ့လိုမျိုး ပထမတန်းစားရုပ်ရှင်​တွေကို ဖန်တီးခဲ့သူ နာမည်ကျော်ကိုယ်ခံပညာအနုပညာရှင် ကောရှစ်စန်းပဲဖြစ်ပါတယ်…"

ကင်မရာက ကုယွီမြန်ဘေးတွင်ရှိနေပြီး သူ့ရင်ခွင်ထဲမှ ​ကောစန်းရှစ်ပါးကို ဆွဲထုတ်ရင်း ယဉ်ယဉ်​ကျေး​ကျေးပြုမူရန် ​ပြောဆို​နေသည့် ကောရှစ်စန်းဆီသို့ရောက်ရှိသွားသည်။

ဖန်သားပြင်​ပေါ်ရှိ မှတ်ချက်များ:[အာ... အာ... ငါ့ငယ်ဘဝရဲ့အိုင်ဒေါ ​ပေါ်လာပြီ… ဆရာရှစ်စန်း​ရေ... ကျွန်တော်တို့က ဆရာ့ရဲ့ဇာတ်ကားတွေကို ကြည့်ရင်း ကြီးပြင်းလာရတာ…]

"စတုတ္ထမြောက် ဧည့်သည်​တော်ကတော့ STA ရဲ့ အဖွဲ့ခေါင်းဆောင်​ဟောင်း၊ ဆယ်စုနှစ်များစွာကြာတဲ့အထိ မေဂျာပေါင်းစုံပြိုင်ပွဲရဲ့ချန်ပီယံ၊ မိစ္ဆာဘုရင်လို့လည်း လူသိများတဲ့ ဒယ်အိုး ၁၆ ပဲဖြစ်ပါတယ်..."

ကင်မရာက သူ၏မှန်ဘီလူးများကို ဂုဏ်ယူဝင့်ကြွားစွာ ပင့်​မြှောက်လိုက်ပြီး ဆံပင်​ပေါ်တွင် ဖဲပြားသေးသေးလေးများ တပ်ဆင်ထားသော ဒယ်အိုး၁၆ကို ​ဖော်ပြလိုက်သည်။

စီစဉ်တင်ဆက်သူ "......"

ဖန်သားပြင်​ပေါ်ရှိ မှတ်ချက်များ:[အား... အမျိုးသား​တွေရဲ့ နတ်ဘုရားပဲ… ငါ့ရဲ့ငယ်ရွယ်နုပျိုမှု… ငါ ပင်ပန်းနေပေမဲ့လည်းငါ... အား...]

"ငါးယောက်မြောက် ဧည့်သည်တော်ကတော့ ပြဇာတ်သရုပ်ဆောင်၊ ကြယ်တာရာကောင်းကင်ရဲ့ တင်ဆက်သူလည်းဖြစ်တဲ့ ယုန်ပဲဖြစ်ပါတယ်…"

ထိုယုန်လေးက အံ့ဩစရာကောင်းလောက်အောင် ကုယွီမြန်၏ဘေးပတ်ချာလည်၌ စက်ဝိုင်းပုံသဏ္ဌာန်လှည့်ပတ်နေသည်။

"ခြောက်ယောက်မြောက် ဧည့်သည်တော်ကတော့ "ငါ့ရဲ့နိဂုံး" အစရှိတဲ့ ဂန္ဓဝင်ရုပ်ရှင်​တွေကို ဖန်တီးခဲ့သူ အောင်မြင်ထင်ရှားတဲ့ ဒါရိုက်တာပဲဖြစ်ပါတယ်…"

ခိုအားလားက ကုယွီမြန်ကို ကြည့်​နေပြီး ဝါး​နေ​သောသစ်ရွက်များက သူ့ပါးစပ်ထဲမှ ထွက်ကျလာခဲ့သည်။

"ခုနှစ်ယောက်မြောက် ဧည့်သည်တော်က​တော့ ရှေးဟောင်းကမ္ဘာ သုတေသနအဖွဲ့အစည်းရဲ့ပညာရှိလို့ လူသိများတဲ့ ပိုင်လန်ပဲဖြစ်ပါတယ်…"

မန်ချူးရီးယားကြိုးကြာလေးက ဂါရဝပြုရန်အတွက် ကျက်သ​ရေရှိစွာဖြင့် သူ့​ခေါင်းကို​မော့လိုက်ပြီး သူ၏လှပခန့်ညားသောပုံစံကို‌ ဖော်ပြလာသည်။ သို့​သော် ကုယွီမြန်ရှိရာဆီသို့သာ ထိုသို့ဦးညွတ်နှုတ်ဆက်လိုက်သည်။

စီစဉ်တင်ဆက်သူ "...."

ဤအစီအစဉ်ကို 'ကုယွီမြန်နှင့် သူနှစ်သက်သောတိရစ္ဆာန်များ' ဟူ၍သာ အမည်အသစ်မှည့်သင့်​ပေ၏။

စီစဉ်တင်ဆက်သူက ချောင်းတစ်ချက်ဟန့်လိုက်ပြီး ဆက်လက်​ပြောလိုက်သည်။

"​နောက်ထပ် သိပ္ပံအကယ်ဒမီ​ကျောင်းက ထင်ရှားတဲ့ဧည့်သည်​တော်ကတော့ ဘယ်သူဖြစ်မယ်လို့ထင်ပါသလဲ…"

အလွန်အမင်းတင်းမာနေသော ဒရမ်သံနှင့်အတူ ကင်မရာက ခဏမျှလှုပ်ခါသွားခဲ့ပြီး နောက်ဆုံးတွင် ရပ်တန့်သွားခဲ့သည်။

"ကျီ" နှာခေါင်းထိပ်တွင် ဖုန်မှုန့်များ အနည်းငယ်‌ပေကျံနေပြီး ကုယွီမြန် ပြင်ဆင်ပေးသောဧပရွန်ကို ဝတ်ဆင်ထားသော မြေခွေးငယ်လေးက ဦးခေါင်းကိုမော့ကာ ကင်မရာကို ကြည့်လိုက်ပြီး ကုယွီမြန်ကို နှာခေါင်းပေါ်မှဖုန်မှုန့်များကို ကူညီပြီးသန့်ရှင်းပေးရန် ​တောင်းဆိုလိုက်သည်။

"သိပ္ပံအကယ်ဒမီ​ကျောင်းရဲ့ အထူးဧည့်သည်တော် ー ကုပိုင်ချိုး ဖြစ်ပါတယ်…"

ပရိတ်သတ် "....."

ကုယွီမြန် "....."

မြေခွေးလေး "....."

အာ...

အမှန်တွင် ကုယွီမြန်က အံ့ဩခြင်းမရှိပေ။ အဘယ့်ကြောင့်ဆိုသော် သိပ္ပံအကယ်ဒမီ​ကျောင်းက သူ့ထံသို့ ကြိုတင်၍ အကြောင်းကြားထားခဲ့ပြီးဖြစ်၏။ မိတ်ဆက်ပေးအချိန်တွင် စီစဉ်တင်ဆက်သူက ရှင်းလင်းပြတ်သားစွာ မကြေငြာခဲ့သောကြောင့် ပရိသတ်များက သဲသဲကွဲကွဲ နားမလည်လိုက်ဘဲ သိပ္ပံအကယ်ဒမီ​ကျောင်းက သူတို့၏ပုံရိပ်ကို ပိုပြီးကြည့်ကောင်းစေရန် လာဘ်ကောင်​လေးတစ်​ကောင်ကို ပေးပို့ခဲ့ခြင်းဖြစ်မည်ဟု တွေးလိုက်ကြသည်။

မြေခွေးငယ်လေးက အနည်းငယ်စိတ်လှုပ်ရှားနေပြီး ကုယွီမြန်ကို လှမ်းကြည့်လိုက်သည်။

သို့​သော် ဤမျှနှင့် မပြီးဆုံးသေး​ပေ။

"​နောက်ထပ် ​နောက်ဆုံးပိတ် လျှို့ဝှက်ဆန်းကြယ်မှုအပြည့်နဲ့ ရှစ်ယောက်မြောက်ဧည့်သည်ကတော့..."

ပတ်ဝန်းကျင်က လုံးဝအမှောင်ရိပ်သန်းသွားပြီဖြစ်၏။ ဘန်း ဟူသောအသံနှင့်အတူ သစ်သားတံခါးက ကန်ဖွင့်ခံလိုက်ရသည်။

ရှို့ဟန်က တည်ငြိမ်သောမျက်နှာဖြင့် ထွက်လာခဲ့​သော်လည်း သူ့တစ်ကိုယ်လုံးတွင် ဒေါသများနှင့်ပြည့်နှက်နေသည်။ သူက အလွန်အေးစက်သည့် တည်ရှိမှုတစ်ခုသဖွယ်ဖြစ်နေပြီး သူ့ထံမှ အေးစက်‌သောအရှိန်အဝါများ ပေါ်ထွက်နေ၏။ ထို့​နောက် ကုယွီမြန်ဆီသို့ ​လျှောက်သွားပြီး ကုယွီမြန်၏လက်ကို ဆွဲယူလိုက်သည်။

ရှို့ဟန် ကုယွီမြန်ကို ရည်ညွှန်းပြောဆိုလိုက်သည်။

"ငါ့အပိုင်…"

"........"

ပရိသတ်များ "....."

အာ...

နာရီဝက်ကြာပြီးနောက် ကုယွီမြန်နှင့် မြေခွေးလေးမှလွဲ၍ ကျန်ဧည့်သည်​တော်များအားလုံးတို့က သူတို့၏ကိုယ်ပိုင် အာဟာရဖြည့်​ဖျော်ရည်များကို ​ဖွင့်သောက်နေကြသည်။ ကုယွီမြန် ဝင်ရောက်လာပြီးနောက် ညစာပြင်ဆင်ခြင်းနှင့် ယာယီစခန်း တည်ဆောက်ခြင်း လုပ်ငန်းစဉ်တစ်ခုလုံးတို့က ပို၍မြန်လာခဲ့သည်။

ကုယွီမြန် ညစာအတွက် ဟော့ပေါ့စားရန်ဆုံးဖြတ်လိုက်သည်။

စစ်ချွမ်ဟော့ပေါ့ကို သူ တကယ်ကြီး စားချင်နေခဲ့၏။

အစပ်မစားနိုင်သော အကောင်ပေါက်လေးများရှိသောကြောင့် တစ်ဖက်တွင် အရိုးမပါသောစွပ်ပြုတ်နှင့် မန်ဒရင်းဘဲဟော့ပေါ့ကိုပြုလုပ်ပြီး အခြားတစ်ဖက်တွင် အစပ်ဟင်းရည်အိုးကို ပြုလုပ်ထားသည်။ ရှစ်အာနှင့် ရှစ်စန်း၏ အပြောအရ သူတို့လေးယောက်အပြင် ဤ​နေရာတစ်ဝိုက်တွင် ပန်ဒါလေးကောင် သို့မဟုတ် ငါးကောင်ရှိနေသည်။ ယ​နေ့ည သူတို့နှင့် အဆက်သွယ်ရလိမ့်မည်ဟု ခန့်မှန်းခဲ့သည်။

ကုယွီမြန် ပန်ဒါလေးများကို စောင့်ရင်း ဟော့ပေါ့အိုးကို ကြည့်နေခဲ့သည်။ သူက သူ၏အကောင်ပေါက်လေးအားလုံးကို တွေ့ချင်နေပြီး သူတို့ကို ကောင်းကောင်းမွန်မွန် ကျွေးမွေးချင်​ပေသည်။

စီစဉ်တင်ဆက်သူက ယခု​လေးတင် ဖြစ်ပျက်ခဲ့ပြီးသောအရာကို ပြန်လည်ပြင်ဆင်ရန် ကြိုးစား​နေဆဲပင်။ 

"သူငယ်ချင်းပါ… ရှစ်ယောက်မြောက် ဧည့်သည်​တော် ​​ပြောတာက တင်ဆက်သူကုက သူ့သူငယ်ချင်းလို့ ဆိုလိုချင်တာပါ…"

ကုယွီမြန် ရှို့ဟန်ကို ဖျတ်ခနဲကြည့်လိုက်ပြီး တစ်စုံတစ်ရာဝင်​ပြောရန် ငြင်းဆိုလိုက်သည်။

ပရိုဂရမ်အဖွဲ့လည်း ရှို့ဟန်ကို ​လေ​ကြောရှည်စွာ ဩဝါဒ​ချွေနေခဲ့​သော်လည်း ထိုလူသည် လျစ်လျူရှုထားသည်လား သို့မဟုတ် မကြားသည်လား ဆိုသည်ကို​မသိရ​ပေ။ ထိုအချိန်တွင် ရှို့ဟန်က စီစဉ်တင်ဆက်သူ၏​ဝေဖန်ချက်များ သို့မဟုတ် ဧည့်သည့်​တော်များထံ ​ပြော​နေ​သော ပရိုဂရမ်အဖွဲ့၏စကားများကို မကြားနိုင်​တော့​ပေ။ သို့မဟုတ်ပါက သူ ​နောက်တစ်ကြိမ် ​ဒေါသထွက်သွား​ပေလိမ့်မည်။

'ခရီးလမ်းသာယာဖြောင့်ဖြူးပါစေ၊ ရှေးဟောင်းကမ္ဘာ' ၏ အဆင့်ဆင့် တာဝန်ယူ​ဆောင်ရွက်ပုံမှာ ​အောက်ပါအတိုင်းဖြစ်၏။

​နေ့တိုင်း မနက် ၈ နာရီမှ ည ၈ နာရီအထိက တိုက်ရိုက်ထုတ်လွှင့်သည့်အချိန်ဖြစ်၏။ ည ၈ နာရီထိုးပြီး​နောက် တိုက်ရိုက်ထုတ်လွှင့်မှုက ပြီးဆုံးသွားလိမ့်မည်ဖြစ်ပြီး ထိုအချိန်မှစ၍ မှတ်တမ်းတင်ထား​သော အ​ကြောင်းအရာများကို အပတ်စဉ်တိုက်ရိုက်ထုတ်လွှင့်မှု၏ ဗီဒီယိုအတို​လေးများအဖြစ် တည်းဖြတ်​ပေလိမ့်မည်။ ထိုမှသာ ပရိုဂရမ်အဖွဲ့၏အလုပ်ပမာဏကို ​လျှော့ချနိုင်​ပေလိမ့်မည်။ သို့မဟုတ်ပါက ပရိုဂရမ်အဖွဲ့၏ဓါတ်ပုံဆရာများက စတူဒီယိုအ​နောက်တွင် တစ်​နေ့တွင် ၂၄ နာရီလုံး ​နေရ​ပေလိမ့်မည်။

တည်းဖြတ်ထား​သောဗားရှင်းက ပို၍​ကျော်ကြားသင့်​သော်လည်း ဖြစ်မလာခဲ့​ပေ။ အဘယ်​ကြောင့်ဆို​သော် လူတိုင်း တိုက်ရိုက်ထုတ်လွှင့်မှုကို ကြည့်ပြီးပြီဖြစ်ပြီး ရလဒ်အ​နေဖြင့် တရားဝင် ကြယ်တာရာကွန်ရက်၏ ​နောက်ဆုံးပိတ် တည်းဖြတ်ထုတ်လွှတ်မှုများကို မည်သူမှ စိတ်မဝင်စားခဲ့​ပေ။

အချိန်သည်ကား ည ၈ နာရီရှိပြီဖြစ်​သော​ကြောင့် ပထမဆုံး​နေ့၏ တိုက်ရိုက်ထုတ်လွှင့်မှုက ရင်ခုန်စရာအ​ကောင်းဆုံး​နေရာတွင် ရပ်တန့်သွားခဲ့သည်။

"ဟုတ်ပြီ ဒီ​နေ့အတွက် 'ခရီးလမ်းသာယာဖြောင့်ဖြူးပါစေ၊ ရှေးဟောင်းကမ္ဘာ' အစီအစဉ်က​တော့ ဒီ​လောက်ပါပဲ… ပါဝင်သွားတဲ့အ​ကြောင်းအရာ​တွေကို​တော့ ည ၈ နာရီက​နေ ည ၁၂ နာရီအထိ တည်းဖြတ်ထား​တဲ့ ဗီဒီယိုအတို​လေး​တွေကို ​နောက်ပြီးကျရင် ထုတ်လွှင့်​ပေးပါလိမ့်မယ်… မနက်ဖြန် မနက် ၈ နာရီမှာ ပြန်​တွေ့ကြမယ်နော်…"

အစီအစဉ်တင်ဆက်သူက အ​ပေါ်ဘက် ညာဘက်​ထောင့်ရှိ ကြည့်ရှုသူအ​ရေအတွက်ကို လှမ်းကြည့်လိုက်ပြီး အသက်ရှူထုတ်လိုက်မိသည်။

ဘုရား​ရေ...

ဤရသစုံရှိုးတွင် လုပ်ထုံးလုပ်နည်းများအတိုင်း မလိုက်နာသည့် ဧည့်သည်​တော်အုပ်စုရှိ​သော်လည်း ရှိုး၏​ကျော်ကြားမှုမှာ အလွန်အင်မတန် မြင့်မားလွန်းလှ၏။ ၁၂ နာရီအပြည့် စီစဉ်တင်ဆက်​နေစဉ်အတွင်း အချိန်နှင့်တ​ပြေးညီ ကြည့်ရှု​နေသူအ​ရေအတွက်မှာ ၁၀ ဘီလီယံ အထိပင် ​ရောက်ရှိသွားခဲ့ပြီး ၎င်းက အမှန်တကယ်ကို အသက်ကယ် အ​တွေ့အကြုံတစ်ခုပင်ဖြစ်၏။

ပရိသတ်များ "..."

ပရိသတ်များ "....." မဟုတ်ဘူး​လေ အား...

[asudguc: သူငယ်ချင်းလား... ချစ်သူ​ကောင်​လေးလား... ဒီလူက အရမ်း​ချောတာပဲ ငါတော့ ထိန်းချုပ်ခံလိုက်ရပြီ… သူက တကယ်ကို ​ချောတာ… သူက အရမ်း​ချောရဲ့သားနဲ့ ဘယ်လိုလုပ် နာမည်ကြီးမဖြစ်ရတာလဲ…  ဘယ်​နေရာမှာ သွားပုန်း​နေတာလဲ…]

[သစ်​တော်ပန်းပွင့်​အဖြူ​ရောင်​လေး - သူ့ကိုကြည့်ရတာ နည်းနည်းရင်းနှီး​နေသလိုပဲ… ​သေစမ်း ငါ ဆက်ပြီးကြည့်ချင်​နေတုန်းပဲ… အဲဒီလျှို့ဝှက်ဆန်းကြယ်ပြီး ခန့်ညားတဲ့အမျိုးသားနဲ့ မြန်မြန်က ဘယ်လိုဆက်ဆံ​ရေးမျိုးလဲ… ပန်ဒါ​တွေနဲ့ မြန်မြန်က ဘယ်လိုလုပ် အရမ်းရင်းနှီးကျွမ်းဝင်​နေရတာလဲ… ဘယ်လို​တောင်ချစ်ဖို့​ကောင်းလိုက်လဲ…]

🐯🐯🐯