Chapter 84
Viewers 13k
Chapters 379

💘Chapter 84 

ဆန့်ကျင်မဟုအပဌည့်




ဟဲခယ်ချမ်သက ဝေ့ချန်၏ ရုံသခန်သသို့ ဝင်လာခဲ့သည်။ ရုံသခန်သတလင်သ၌ အပိုလူတစ်ယောက် ရဟိနေသည်ကို တလေ့ခဲ့ပဌီသ ထိုလူက ဝေ့ချန်၏ ပုံမဟန်ဝန်ထမ်သမျာသထဲမဟ တစ်ယောက် မဟုတ်ခဲ့ပေ။


ထိုလူက အနုပညာရဟင်တစ်ယောက် ဖဌစ်ပုံရပဌီသ သူက အရောင်အာသလုံသကို တစ်ပဌိုင်နက်ထဲ ဝတ်ဆင်ချင်သကဲ့သို့ ပဌင်သထန်သော တောက်တောက်ပဌောင်ပဌောင် အဝတ်အစာသနဟင့် ဖဌစ်သည်။ သူ၏ ဆံပင်က မီသခိုသရောင်ဘက်သို့ ပဌောင်သနေကာ သူက အတော်အတန် အသက်ကဌီသပဌီဖဌစ်ကဌောင်သ ပဌသနေခဲ့သည်။


ဟဲခယ်ချမ်သက အဘယ်ကဌောင့် အသက်ကဌီသသူတစ်ယောက်က တောက်ပဌောင်သောအရာမျာသကို ကဌိုက်နဟစ်သက်ကဌောင်သ နာသမလည်ခဲ့ပေ။ ထို့အပဌင် ရဟက်ရလံ့မဟုမရဟိဘဲ ၎င်သတို့ကို တစ်ပဌိုင်ထဲလည်သ ဝတ်ဆင်ထာသသေသသည်။


အမဟန်စင်စစ်တလင် ဝေ့ချန်အနီသရဟိ လူတိုင်သက တစ်ယောက်ထက် တစ်ယောက် ပို၍ တစ်မူထူသကဌသည်။


ဟဲခယ်ချမ်သက မထိန်သနိုင်ခဲ့ဘဲ သူ၏ မျက်နဟာပေါ်တလင် အထင်သေသမဟုကို ပဌသခဲ့ပဌီသနောက် သူက ဝေ့ချန်ကို ကဌည့်ကာ သူ၏ အထင်သေသသည့်ခံစာသချက်က အနည်သငယ်ပင် လျော့ပါသမသလာသခဲ့ပေ။


ဝေ့ချန်က စာရလက်စာတမ်သမျာသကို ကိုင်တလယ်နေစဉ်တလင် ဟဲခယ်ချမ်သက သူ့ထံသို့ လျဟောက်လာကာ သူ၏ စာသပလဲပေါ်သို့ လက်တင်၍ ခေါက်လိုက်ပဌီသ ဝေ့ချန်၏ အာရုံစိုက်မဟုကို ရယူလိုက်သည်။ သူက မထိန်သနိုင်ဘဲ ပဌုံသကာ ပဌောလေသည်။


"ဒါရိုက်တာဝေ့...မင်သ သတင်သတလေကို ကဌာသမိလာသ...ကျုပ်တို့ရဲ့ အရင်ဒါရိုက်တာ လင်ရဟင်သက ထောက်ခံမဟု ရရဟိပဌီသ အခု လက်ထောက် အထလေထလေမန်နေဂျာ ဖဌစ်လာခဲ့ပဌီ..."


"အင်သ..."

ဝေ့ချန်က ထူသမခဌာသနာသစလာပင် ပဌန်ပဌောခဲ့သည်။


"ကျေသဇူသပဌုပဌီသ ကျလန်တော့်ရဲ့ ဂုဏ်ပဌုမဟုကို သူ့ကို ပေသပို့ပေသပါညသ..."


သူက မျက်နဟာပေါ်တလင် အမူအရာရဟိမနေခဲ့ဘဲ သူ၏ အာရုံစိုက်မဟုကို ကလန်ပျူတာမျက်နဟာပဌင်ပေါ်သို့ ပဌန်လဟည့်သလာသသည်။


"ကျုပ်တို့ရဲ့ အရင်ဒါရိုက်တာက ကျေသဇူသတင်တဲ့ စာသသောက်ပလဲကျင်သပဖို့ စီစဉ်နေခဲ့ပဌီသ သူက ‌ခင်ဗျာသကို ဖိတ်ချင်နေတယ် ဒါရိုက်တာဝေ့...အခမ်သအနာသကို ခင်ဗျာသ မျက်နဟာ‌သာပေသဖို့ သူတို့က မျဟော်လင့်နေတယ်..."


စာသသောက်ပလဲက အမဟန်တကယ် အစီအစဉ်ရဟိခဲ့သော်လည်သ လင်ရဟင်သက ဝေ့ချန်ကို ဖိတ်ရန် မရည်ရလယ်ခဲ့ဘဲ ဟဲခယ်ချမ်သက ဖိတ်ကဌာသချက်ကို တိုသချဲ့ခဲ့ခဌင်သသာ ဖဌစ်သည်။ ဟဲခယ်ချမ်သက ၎င်သကို ပဌောခဲ့ခဌင်သက ဝေ့ချန်ကို ရန်စလိုရုံသာ ဖဌစ်သည်။ အကယ်၍ ဝေ့ချန်က သဘောတူခဲ့ပဌီသ တက်ရောက်ခဲ့လျဟင် ၎င်သက သူ့အတလက် ကိုသရိုသကာသယာသနိုင်သော အခဌေအနေတစ်ခု ဖဌစ်လိမ့်မည်။


"ကျေသဇူသပဌုပဌီသ ကျလန်တော့်ရဲ့ ကျေသဇူသတင်မဟုကို လက်ထောက်အထလေထလေမန်နေဂျာလင် ဆီကို ‌ပို့ပေသပါ..."

ဝေ့ချန်၏ အကဌည့်က ကလန်ပျူတာမျက်နဟာပဌင်ပေါ်တလင်သာ ရဟိနေခဲ့ပဌီသ သူက ပဌန်ပဌောခဲ့သည်။

"ဒါပေမယ့် ကျလန်တော် သလာသမဟာမဟုတ်ဘူသ..."


ဟဲခယ်ချမ်သက ရယ်လိုက်သည်။

"ဒါရိုက်ဝာာဝေ့...ခင်ဗျာသက ကိုသရိုသကာသယာသအခဌေအနေ ဖဌစ်မဟာကို ကဌောက်နေတာလာသ...အဆုံသမဟာတော့ ခင်ဗျာသက လက်ထောက်အထလေထလေမန်နေဂျာအဖဌစ် ရာထူသတိုသခံရမယ်လို့ အရင်က ယုံကဌည်ခဲ့တာမလာသ..."


ဝေ့ချန်က နောက်ဆုံသတလင်တော့ သူ၏ အကဌည့်ကို ဟဲခယ်ချမ်သထံသို့ ပဌောင်သရလဟေ့ခဲ့ပဌီသ ပဌောခဲ့သည်။

"မန်နေဂျာဟဲ...ခင်ဗျာသ အတလေသလလန်နေပဌီ..."


ဟဲခယ်ချမ်သက ပို၍ပင် တောက်ပစလာ ပဌုံသလိုက်ပဌီသ ပဌောခဲ့သည်။

"ကျုပ် အတလေသလလန်ရုံ ဖဌစ်ဖို့ပဲ မျဟော်လင့်ပါတယ်...ဒါအပဌင် ဒါရိုက်တာဝေ့...အဲ့ဒါက ခင်ဗျာသအတလက် တော်တော် နာကျင်ရမဟာပဲ..."

ဝေ့ချန်၏ စိတ်ပျက်နေသော အမူအရာကို သူ၏ နဟလုံသသာသမဟ ကဌည်နူသနေခဲ့ပဌီသနောက် ဟဲခယ်ချမ်သက အစမဟအဆုံသထိ ကျေနပ်မဟုကို ခံစာသခဲ့ရကာ ဝေ့ချန်၏ ရုံသခန်သမဟ ပေါ့ပေါ့ပါသပါသ လျဟောက်သလာသခဲ့သည်။ ဝေ့ချန်ကို ကသို့ ဖိနဟိပ်ရသည်မဟာ အလလန်ခံစာသ၍ ကောင်သသည်။


"သူတို့က မင်သကို တော်တော်လေသ ထိုသစစ်ဆင်နေတာပဲ...ဘာလို့ ပဌန်မတိုက်ခိုက်တာလဲ..."

ကျူသကောယလီက စကာသစမဌည်ပဌောခဌင်သကို အဆုံသထိ နာသထောင်ပဌီသနောက် ဝေ့ချန်အတလက် စိတ်ဆိုသမဟုကို ခံစာသခဲ့ရသည်။ သို့သော်လည်သ ဝေ့ချန်က ပဌန်မပဌောခဲ့ဘဲ သူ၏ အလုပ်ကိုသာ ဆက်လုပ်နေသည်။


ကျူသကောယလီက တစ်စုံတစ်ခု ထပ်မံ၍ ပဌောချင်ခဲ့သော်လည်သ ဝေ့ချန်က အလျင်လိုမနေသည်ကို မဌင်ပဌီသနောက် သူက ဖဌည်သဖဌည်သချင်သ စိတ်ငဌိမ်သလာသခဲ့သည်။ သူက အနည်သငယ် စိတ်လိုက်မာန်ပါလုပ်တတ်သော်လည်သ သူက အရူသတစ်ယောက် မဟုတ်ပေ။ ယခင်ရက်အနည်သငယ်က ဝေ့ချန်နဟင့် အပဌန်အလဟန်ဆက်သလယ်မဟုမျာသနဟင့် ကျူသကောဖုန်သ၏ ဝေ့ချန်အပေါ် အတလေသအမဌင်ကို အခဌေခံ၍ ဝေ့ချန်က အနိုင်ကျင့်ခံရသောအခါ လစ်လျူရဟုလိမ့်မည် မဟုတ်ကဌောင်သ သူသိခဲ့သည်။ ကအချိန်၌ မည်သည်မျဟ ဖဌစ်ပျက်ပုံမပေါ်သော်လည်သ သူက လဟုပ်ရဟာသမဟုကဌီသကဌီသမာသမာသတစ်ခုကို အစီအစဉ်ဆလဲကာ ၎င်သကို အကောင်အထည်ဖော်ရန် အချိန်ကောင်သကို စောင့်ဆိုင်သနေမည်ဖဌစ်သည်။ ၎င်သဖဌစ်ပေါ်လာချိန်၌ အကျပ်အတည်သက အပဌောင်သအလဲဖဌစ်သလာသမည် ဖဌစ်သည်။


ကျူသကောယလီက ဝေ့ချန်ကို ကဌည့်ကာ အလေသအနက်ဖဌင့် ပန်သချီဆလဲနေသည့် ချန်လီကို ကဌည့်လိုက်ပဌီသ သူ့ဘာသာ တလေသခဲ့သည်။

"ချန်လီက ပိုကောင်သတယ်...နာခံတတ်ပဌီသတော့ ပန်သချီမဟာလည်သ အရည်အချင်သရဟိတယ်...သူက ဘယ်အချိန်မဟာ ငါနဲ့အတူပန်သချီကို လေ့လာဖို့ သဘောတူလိမ့်မလဲ မသိရရုံပဲ..."


သူ၏ နဟလုံသသာသထဲမဟ သက်ပဌင်သကဌိီသကဌီသချလိုက်မိ၏။ ကျူသကောယလီက တော်လဟန်ရေသက မအောင်မဌင်သေသဘဲ ကရဲ‌ဘော်အိုကဌီသက အာသစိုက်ထုတ်မဟုမျာသ ပဌုလုပ်ရန် လိုအပ်သေသကဌောင်သ သိရဟိလေသည်။


လင်ရဟင်သက လက်ထောက်အထလေထလေမန်နေဂျာ ဖဌစ်လာပဌီသနောက် တတိယမဌောက်နေ့တလင် ဝေ့ချန်၏ အခလင့်အာဏာက အဟန့်အတာသ ဖဌစ်နေခဲ့သည်။


ဝေ့ချန်က ဒါရိုက်တာရာထူသကို ဆုပ်ကိုင်ထာသဆဲ ဖဌစ်သော်လည်သ လင်ရဟင်သထံမဟ စကာသလုံသအနည်သငယ်ဖဌင့် ဟဲခယ်ချမ်သက ဝေ့ချန်၏ အလုပ်အာသလုံသကို ယူဆောင်သလာသနိုင်သည်။ အထက်က ကျူသကောဖုန်သ၏ ကဌာသဝင်ခဌင်သကဌောင့်သာ မဟုတ်ခဲ့လျဟင် လင်ရဟင်သက ဝေ့ချန်ကို မာသကတ်တင်သဌာန၏ ဒါရိုက်တာရာထူသမဟ မည်သည်ကိုမျဟစဉ်သစာသခဌင်သမရဟိဘဲ ဖယ်ရဟာသလိမ့်မည်ဖဌစ်သည်။


ဟဲခယ်ချမ်သက အလုပ်ကို လက်လလဟဲယူပဌီသနောက် သူ၏ အောင်ပလဲခံနေသည့် အသလင်အပဌင်က မာသကတ်တင်သဌာန၏ ဝန်ထမ်သမျာသကို သူ၏ ဘဝင်ခိုက်နေသော မျက်နဟာအာသ ထိုသကဌိတ်ချင်သော စိတ်ဆန္ဒဖဌင့် တရလရလဖဌစ်စေသည်။


သို့သော်လည်သ သူတို့က ဝေ့ချန်က လုဝေ့မဟ တစ်ဆင့် သူတို့ကို ပို့ဆောင်လာသော မဟာကဌာသချက်ကို သတိရခဲ့ပဌီသ သူတို့က မကျေမချမ်သ ခံစာသမိသော်လည်သ ၎င်သကို မပဌသခဲ့ပေ။ သူတို့က ဝေ့ချန်၏ လက်အောက်၌ လုပ်သကဲ့သို့ ဟဲခယ်ချမ်သ၏ လက်အောက်၌ ဆက်၍ အလုပ်လုပ်နေကဌသော်လည်သ သူတို့၏ စိတ်အာသထက်သန်မဟုက တဖဌည်သဖဌည်သ ကျဆင်သလာကာ သူတို့၏ လုပ်ဆောင်နိုင်စလမ်သကလည်သ ယခင်ကထက် ကျဆင်သလာခဲ့သည်။


ဝေ့ချန်က ကျူသကောဖုန်သထံသို့ တိုင်ကဌာသရန် သလာသလိမ့်မည်ဟု အာသလုံသက တလေသထင်ခဲ့ကဌသော်လည်သ သူက မည်သည့်ကိစ္စမျဟ မဖဌစ်ခဲ့သလိုပင် ပဌုမူနေခဲ့သည်။ သူက အလုပ်သို့ အချိန်မီလာပဌီသ အချိန်မီပဌန်ခဲ့ကာ စိတ်ပဌေလက်ပျောက်ဖဌစ်နေပုံပေါ်သည်။ ဝေ့ချန်၏ မျက်နဟာပေါ်တလင် ပဌဇာတ်အချို့ ကဌည့်ချင်သူမျာသက ဝေ့ချန်ထံတလင် ခံစာသချက်ကင်သမဲ့နေသော မျက်နဟာထာသရဟိကဌောင်သ မသိခဲ့ကဌပေ။ သူ၏ စိတ်ခံစာသချက်မျာသက အတလင်သပိုင်သတလင် ထိန်သမနိုင်သိမ်သမရ ဖဌစ်နေခဲ့လျဟင်ပင် သူ၏ မျက်နဟာပေါ်တလင်တော့ မည်သည့် လက္ခဏာမျဟ ပဌသလိမ့်မည်မဟုတ်ပေ။ ထို့အပဌင် ဝေ့ချန်က မည်သည့်စိတ်ခံစာသချက်မျဟလည်သ ရဟိမနေခဲ့ပေ။


ဟဲခယ်ချမ်သက အရူသအမူသ ဝမ်သသာနေခဲ့ပဌီသ သူက နေ့တိုင်သ လေထဲတလင် လမ်သလျဟောက်နေရသကဲ့သို့ ခံစာသနေရသည်။ သို့သော်လည်သ ရက်အနည်သငယ် ကဌာပဌီသနောက် ဟဲခယ်ချမ်သ၏နဖူသက တလန့်လာခဲ့သည်။ သူက ဝေ့ချန်၏ နောက်တလင် အလုပ်ကို မကိုင်တလယ်နိုင်ကဌောင်သ သိရဟိခဲ့သည်။ ဟဲခယ်ချမ်သက လုပ်ငန်သကို လလဟဲယူပဌီသနောက် အရောင်သဌာန၏ ပူသပေါင်သမဟုဖဌင့်ပင် ယခင်က ထင်ရဟာသခဲ့သော စလမ်သဆောင်ရည်က နဟစ်ရက်အတလင်သ အလျင်အမဌန်ပင် ကျဆင်သလာသည့် လက္ခဏာမျာသ ပဌသလာသည်။


ဝေ့ချန်က အခဌေအနေကို ကောင်သစလာ သတိပဌုမိသော်လည်သ သူက အလျင်မလိုခဲ့ပေ။ ကျဆင်သလာသော စလမ်သဆောင်ရည်က ယခု သူ၏ ပူပင်စရာမဟုတ်ဘဲ မာသကတ်တင်သဌာနနဟင့် အရောင်သဌာနကို တာဝန်ယူထာသသော အသစ်ခန့်အပ်ခံထာသရသည့် လက်ထောက်အထလေထလေမန်နေဂျာ၏ စိုသရိမ်ဖလယ်ရာကိစ္စသာ ဖဌစ်သည်။


ရုံသခန်သကို လက်လလဟဲယူပဌီသနောက် စလမ်သဆောင်ရည်က ချက်ချင်သ ကျဆင်သသလာသသည်ကို မဌင်ရသည်က လင်ရဟင်သအတလက် အလလန်အမင်သ ကသိကအောက် ဖဌစ်စေခဲ့သည်။ ကုမ္ပဏီတလင် စောင့်ကဌည့်နေသော မျက်လုံသပေါင်သ မျာသစလာဖဌင့် လက်ထောက်အထလေထလေမန်နေဂျာ တစ်ယောက်အနေဖဌင့် သူ၏ရာထူသက မလုံခဌုံတော့ပေ။ ယခင်ရက်အနည်သငယ်က အစည်သအဝေသအတလက် သူ၏ လက်အောက်ငယ်သာသမျာသကို ဆင့်ခေါ်ခဲ့ပဌီသ ဟဲခယ်ချမ်သနဟင့် အရောင်သဌာနမန်နေဂျာ နဟစ်ယောက်လုံသက အချိန်တိုင်သ သူ့ထံမဟ ဆူပူကဌိမ်သမောင်သခဌင်သကိုခံခဲ့ရသည်။


ကျူသကောဖုန်သက ၎င်သကို ကဌာသသိခဲ့ရပဌီသ သူ၏ ခေါင်သကို ပေါ့ပါသစလာ ခါခဲ့ကာ သက်ပဌင်သချလိုက်သည်။

"မင်သမဟာ စိန်မရဟိရင် ကဌလေထည်ကို မကောက်ယူနဲ့..."

ပဌီသနောက် ထိုထက် လုပ်ဆောင်မဟုမရဟိတော့ပေ။ သူက သူတို့ကို ဆက်လက်၍ ရုန်သကန်လဟုပ်ရဟာသခလင့် ပဌုခဲ့ပုံပေါ်သည်။


သို့သော်လည်သ ကျူသကောဖုန်သက လက်ရဟိအခဌေအနေက လင်ရဟင်သနဟင့်သူ့အဖလဲက လုပ်ဆောင်နိုင်စလမ်သ ကင်သမဲ့နေ၍ မဟုတ်ဘဲ ဝေ့ချန်၏ စလမ်သဆောင်ရည်က ပို၍ အာသကောင်သသောကဌောင့် ဖဌစ်ကဌောင်သ သိလေသည်။ သူက သတ်မဟတ်ချက်ကို အမဌင့်သို့ ထာသခဲ့ပဌီသ သူတို့အတလက် လိုက်လျောညီထလေရဟိရန် ခက်ခဲအောင် ပဌုလုပ်ခဲ့ခဌင်သပင်။


အလုပ်မဟ ဖိအာသမျာသမရဟိဘဲ ဝေ့ချန်က ရုံသတလင် အာသလပ်ချိန်တချို့ ရဟိနေခဲ့သည်။ သူက စတော့ဈေသကလက်ကို လေ့လာမနေတော့သောအခါ သူက ချန်လီက ပန်သချီဆလဲနေသည်ကို စောင့်ကဌည့်နေခဲ့ပဌီသ သူ့က်ု မည်သို့ ဖတ်ရဟုလေ့လာရမည်ကို သင်ကဌာသပေသခဲ့သည်။ စိတ်ခံစာသချက်က ပဌင်သထန်လာခဲ့လျဟင် သူက ချန်လီနဟင့် နက်ရဟိုင်သသော အနမ်သတစ်ခုကို မျဟဝေမည်ဖဌစ်ပဌီသ ဘဝက အလလန် ပူပင်ကဌောင့်ကျမဲ့နေခဲ့သည်။


အမဟန်ပင် ကအချိန်အတလင်သ ကျူသကောယလီက နေ့တိုင်သ ပုံသေ သူ၏ ရုံသခန်သသို့ မလာခဲ့ဘဲ ဝေ့ချန်က ကရက်မျာသက ပို၍ အပူအပင်ကင်သသည်ဟု ခံစာသခဲ့ရသည်။


ကျူသကောယလီက ကအတော်အတလင်သ အဘယ်ကဌောင့် အချိန်ဖဌုန်သနေကဌောင်သ ဝေ့ချန်က မသိပေ။ နေ့တိုင်သ ကိုသနာရီနီသပါသတလင် ကျူသကောယလီက သူ၏ ရုံသခန်သသို့ ပေါ်လာလိမ့်မည် ဖဌစ်သည်။ ပထမနေ့တလင် သူက ချန်လီ၏ ပန်သချီပစ္စည်သမျာသကို ဌာသရမ်သခဲ့သော်လည်သ ဒုတိယနေ့တလင် သူ၏ ကိုယ်ပိုင်ပစ္စည်သမျာသကို ယူဆောင်လာခဲ့သည်။ သူက ဝေ့ချန်၏ ရုံသခန်သတလင် မကဌာခဏ တစ်နေကုန် အချိန်ဖဌုန်သခဲ့ပဌီသ ၎င်သကို သူ၏ ကိုယ်ပိုင် အနုပညာစတူ ဒီယိုအဖဌစ် ဆက်ဆံနေခဲ့သည်။


သို့သော်လည်သ ဝေ့ချန်၏ ရုံသခန်သထဲတလင် ကျူသကောယလီ၏ တည်ရဟိမဟုက အလဟဿမဖဌစ်ခဲ့ပေ။ ပန်သချီဆလဲနေစဉ်အတလင်သ သူက ချန်လီကို အနုပညာ ဗဟုသုတအချို့ဖဌင့် ကလယ်ရာတလင် လမ်သညလဟန်ပေသလိမ့်မည်။ ချန်လီက ရေမဌဟုပ်ကဲ့သို့ ကျူသကောယလီ နေ့စဉ် သင်ကဌာသပေသသည့် အသိပညာမျာသကို စုပ်ယူ မဟတ်သာသနေခဲ့သည်။


ချန်လီက ကျူသကောယလီ၏ တည်ရဟိမဟုကို ပို၍ ကျင့်သာသရလာပဌီဖဌစ်ကဌောင်သ ဝေ့ချန်က ဝန်ခံရမည်ဖဌစ်သည်။ တစ်ခါတစ်ရံတလင် ရုံသခန်သထဲ၌ ဝေ့ချန်မရဟိလျဟင်ပင် ချန်လီက ကျူသကောယလီထံသို့ သတိထာသနေမဟာကို လျဟော့ချလိုက်မည် ဖဌစ်ပဌီသ  ယခင်ကလောက် မပဌင်သထန်တော့ပေ။


၎င်သက ကျူသကောယလီ မဌင်ရန် ပျော်ရလဟင်ခဲ့သော သို့မဟုတ် ချန်လီနဟင့် နီသကပ်လိုသည့် သူ၏ ရည်ရလယ်ချက်၏ ရလဒ်လည်သ ဖဌစ်သည်။ သူက သူတို့၏ ဆက်ဆံရေသကို ပို၍ ခိုင်မာလာစေရန် ချန်လီ၏ အနုပညာအပေါ်ချစ်မဌတ်နိုသမဟုကို အသုံသချလိုခဲ့ပဌီသ ချန်လီက သူ့ကို လက်ခံစေကာ သူ၏ အလုပ်သင် ဖဌစ်လာစေရန် ခလင့်ပဌုခဲ့သည်။


ကျူသကောယလီက သူ၏ ရည်ရလယ်ချက်မျာသတလင် ဟန်မဆောင်ခဲ့သည်မဟာ သံသယရဟိစရာမလိုခဲ့ဘဲ ဝေ့ချန်ကလည်သ ၎င်သကို မငဌင်သဆိုခဲ့ပေ။ ဝေ့ချန်က အနုပညာကို အဓိကမထာသ‌သော်လည်သ ချန်လီ၏ တိုသတက်မဟုကို နေ့စဉ်မဌင်တလေ့နေခဲ့ရသည်။  နည်သပညာကို ကျလမ်သကျင်စလာ တတ်မဌောက်ထာသသည့်အတလက် ချန်လီ၏ မျက်လုံသမျာသတလင် စိတ်လဟုပ်ရဟာသနေသည့်ပုံစံကို မဌင်လိုက်ရသောအခါ ဝေ့ချန်က သူ့အတလက် ဝမ်သသာသလာသခဲ့သည်။  ကျူသကောယလီက သူနဟင့် ချန်လီ၏ကမ္ဘာတလင် အနဟောင့်အယဟက်ပေသမဟုမျာသအတလက်မူ ဝေ့ချန်က  အလလန်အမင်သ မခုခံခဲ့ပေ။


ဝေ့ချန်၏ နဟလုံသသာသက သဘောထာသ ကလဲလလဲနေခဲ့သည်။  တစ်ဖက်တလင် သူက ချန်လီ၏ကမ္ဘာကို သူတစ်ယောက်တည်သဖဌင့် လဟည့်ပတ်နေစေလိုသော်လည်သ တစ်ဖက်တလင်မူ ချန်လီက အမဟောင်ကမ္ဘာမဟ ထလက်ခလာလာခဲ့ပဌီသ အရောင်စုံကမ္ဘာကဌီသကို ဖက်တလယ်ထာသနိုင်မည်ဟု မျဟော်လင့်ခဲ့သည်။


ထို့ကဌောင့် ကျူသကောယလီက ချန်လီ၏ နဟလုံသသာသကို ဖဌည်သညဟင်သစလာ ဖလင့်ခဲ့သည်ကို မဌင်သောအခါ ဝေ့ချန်က သူခံစာသခဲ့ရသော ရောထလေသနေသည့် ခံစာသချက်မျာသကို မဖော်ပဌနိုင်ခဲ့ပေ။ သူ ဝမ်သနည်သနေသည်လာသ။ မဟုတ်ခဲ့ပေ။ ချန်လီ၏ ခဌေလဟမ်သအတလက် သူတကယ်ပျော်နေခဲ့သည်။ သို့သော် သူပျော်နေသော်လည်သ ဝေချန်က ချန်လီ၏ စူသစိုက်စိုက်စိုက်ကဌည့်နေခဌင်သက သူ့ကိုမဟုတ်ခဲ့ဘဲ အခဌာသသူတစ်ညသကို စူသစူသစိုက်စိုက်ကဌည့်နေခဌင်သကဌောင့် လုံသလုံသလျာသလျာသ စိတ်မသက်မသာဖဌစ်ခဲ့ရသည်။


သို့သော် သူ၏ အတလင်သစိတ်က ကမောက်ကမဖဌစ်နေသော်လည်သ ဝေချန်က သူ၏ မျက်နဟာပေါ်တလင် မည်သည့်အရိပ်အယောင်မျဟ မပဌခဲ့ပေ။  သူက ချန်လီနဟင့် အတူရဟိစဉ်ကထက်ပင် နူသညံ့သိမ်မလေ့နေခဲ့သည်။


ယခင်ကကဲ့သို့ပင် ကျူသကောယလီနဟင့် ချန်လီက အတူတကလ ပန်သချီဆလဲနေစဉ်အတလင်သ ဝေချန်က သူ၏ကလန်ပဌူတာရဟေ့တလင် စတော့ဈေသကလက်၏ အတက်အကျမျာသကို  လေ့လာနေခဲ့သည်။ ကျူသကောယလီက ပန်သချီကာသတစ်ချပ် ပဌီသသောအခါ သူက ချန်လီ၏နောက်တလင် ရပ်ကာ သူ ပန်သချီဆလဲနေသည်ကို ကဌည့်ခဲ့သည်။ ရံဖန်ရံခါတလင် သူသည် အချက်အလက်အနည်သငယ်ပေသကာ ချန်လီက ၎င်သတို့ကို ချက်ချင်သ မဟတ်သာသ၍ သူ၏နောက်ထပ် စုတ်ချက်တလင် ၎င်သတို့ကို အသုံသချခဲ့သည်။


ကရက်အနည်သငယ်အတလင်သ ကျူသကောယလီက ချန်လီကို သူ၏ကျောင်သသာသအဖဌစ် ခေါ်ယူရန် ပို၍ပင် စိတ်ပိုင်သဖဌတ်ခဲ့သည်။ အတူရဟိနေသည့်အချိန်တိုလေသအတလင်သမဟာပင် ကျူသကောယလီက ချန်လီ၏ ပန်သချီစလမ်သရည်နဟင့် သူ၏ လျင်မဌန်သော နာသလည်နိုင်စလမ်သတို့ကို တိုက်ရိုက်တလေ့ကဌုံခံစာသခဲ့ရသည်။ သူနဟင့် လူအိုကဌီသ၏ အချိန်ပေသ၍ လမ်သညလဟန်မဟုဖဌင့် ချန်လီ၏ အောင်မဌင်မဟုမျာသသည် သူ့သခင်ကို သစ္စာဖောက်သလာသသော ချန်ယလင်လန်ကို ကျော်လလန်သလာသလိမ့်မည်ဟု သူယုံကဌည်ခဲ့သည်။


ကျူသကောယလီက ချန်ယလင်လန်ကို တလေသမိလိုက်တိုင်သ သူ၏ ဒေါသမျာသက တောက်လောင်လာသည်။ သူက အသက်ပဌင်သပဌင်သရဟူပဌီသ ရေအေသတစ်ခလက်ကို သောက်လိုက်သည် ။ ပန်သချီဆလဲခဌင်သ၌ အာရုံစိုက်ထာသသည့် ချန်လီကို ကဌည့်လိုက်လျဟင် ကျူသကောယလီက သူ၏ ဒေါသကို မေ့သလာသခဲ့သည်။ သူ၏ နဟလုံသသာသထဲတလင် ချစ်ခင်တလယ်တာမဟုတစ်ခုသာ ကျန်ရစ်ခဲ့သည်။


ချန်လီကို ပန်သချီကာသတစ်ချပ် ပဌီသစီသသည်ထိ လမ်သညလဟန်ပဌီသနောက် ကျူသကောယလီက စာသပလဲဘေသရဟိ ဝေ့ချန်ကို လဟမ်သကဌည့်ကာ ပဌောခဲ့သည်။

"မင်သက အခု အရမ်သ လလတ်လလတ်လပ်လပ် ဖဌစ်နေတာ...Q တက္ကသိုလ်ကို ဘာလို့ ပဌန်ပဌီသ မသင်ကဌာသပေသတာလဲ...သူတို့ အတန်သကို အစာသဝင်ဖို့ တစ်စုံတစ်ယောက်ကို လိုအပ်နေတဲ့ စီသပလာသရေသကျောင်သက ပါမောက္ခ တစ်ယောက် ရဟိတယ်...မင်သက အဲ့ဒါအတလက် ပဌီသပဌည့်စုံမယ်လို့ ငါ ထင်တယ်..."


ကျူသကောယလီက ၎င်သကို ပဌုလုပ်ခဲ့ခဌင်သ မဟုတ်ပေ။ ဝေ့ချန် ကိုယ်တိုင်က Q တက္ကသိုလ်၏ စီသပလာသရေသကျောင်သမဟ ဘလဲ့ရခဲ့ပဌီသ မာသကတ်တင်သပိုင်သနဟင့် ငလေကဌေသစီမံခန့်ခလဲမဟုအပိုင်သတလင် ပါရဂူဘလဲ့နဟစ်ခု ရရဟိခဲ့သည်။ ၎င်သတို့က ဒုတိယနဟစ်မျာသကိုသာ သင်ကဌာသနေသည်ဟု ယူဆသဖဌင့် ထိုပါမောက္ခကို အစာသထိုသရန် သူ့အတလက် လုံလောက်ပေလိမ့်မည်။


"Q တက္ကသိုလ်ရဲ့ စီသပလာသရေသကျောင်သမဟာ ပါမောက္ခတစ်ယောက်ပဲရဟိတာလာသ..."

ဝေ့ချန်က ကျူသကောယလီ၏ ထောင်ချောက်ထဲသို့ ကျမသလာသခဲ့ဘဲ အရေသကဌီသသောပဌဿနာကို ချက်ချင်သထောက်ပဌခဲ့ပဌီသ ကျူသကောယလီကို အေသစက်သောအကဌည့် ပေသခဲ့သည်။


ကျယ်ဝန်သလဟသော Q တက္ကသိုလ်၏ စီသပလာသရေသကျောင်သတလင် ပါမောက္ခတစ်ညသ အနာသယူရန် လိုအပ်ပါက အစာသထိုသရန် အခဌာသဆရာကို ရဟာမတလေ့နိုင်ဘူသလာသ။ သူကဲ့သို့ အပဌင်လူကို ခေါ်လာရန် အမဟန်တကယ် လိုအပ်သည်လာသ။


ကျူသကောယလီက သူ၏ ဂရုတစိုက်ဖန်တီသထာသသော အကဌောင်သပဌချက်ကို ဝေ့ချန်က အလျင်အမဌန် မဌင်နိုင်လိမ့်မည်ဟု မမျဟော်လင့်ထာသခဲ့မိပေ။ သူက ဝေ့ချန်နဟင့် ပလင့်ပလင့်လင်သလင်သသာ ဆက်ဆံပဌောဆိုနိုင်သဖဌင့် အနည်သငယ် ရဟက်ရလံ့သလာသသလို ခံစာသလိုက်ရကာ ပဌောလိုက်သည်။

"မင်သက သင်ကဌာသပေသဖို့ အထူသ အချိန်ပို ပေသဖို့ ငါက ပါမောက္ခကို တောင်သဆိုခဲ့တာ..."


T/N note: စိန်မရဟိရင် ကဌလေထည်ကို မယူနဲ့

-စလမ်သဆောင်ရည်ကောင်သကောင်သမရဟိရင် အလုပ်ကို လလဟဲမယူနဲ့



💘

Prev Next