Chapter 92

💘Chapter 92 

ပြန်လည်တိုက်ခိုက်မှု

လူနာတင်ယာဥ်က လျင်မြန်စွာ ရောက်လာခဲ့ပြီး လျင်လျင်မြန်မြန်နှင့်ပင် ပြန်ထွက်သွားခဲ့သည်။ လူအိုကြီးကို ကယ်ခဲ့သည့် လူငယ်လေးကတော့ ထွက်သွားပြီဖြစ်ရာ လူအုပ်ကြီးက သူ့အတွက် လက်ခုပ်ပင်မတီးပေးလိုက်ရပေ။ 

အတူတကွစုအုံနေခဲ့ကြသည့် သူများက သက်ပြင်းချပြီး အကြိမ်အနည်းငယ်လောက် လူငယ်လေးအား ချီးကျူးလိုက်ကြသည်။ ထို့နောက် သူတို့လုပ်စရာရှိသည်များကို ဆက်လုပ်ကြရင်း တဖြည်းဖြည်း လူစုကွဲသွားကြတော့၏။ လူအုပ်ကြီး အသက်အန္တရာယ်လုံခြုံသွားသောကြောင့် လူတိုင်းက စိတ်သက်သာရာ ရသွားခဲ့ကြသည်။ ကုန်တိုက် မန်နေဂျာကလည်း စိတ်သက်သာစွာဖြင့် သက်ပြင်းချလိုက်သည်။ ထိုလူငယ်လေး နောက်တစ်ကြိမ် ဈေးဝယ်လာသည်ကို တွေ့မိပါက သူ့အား သေချာပေါက် မန်ဘာကတ်များနှင့် များပြားသည့် လျှော့ဈေးများ ပေးပစ်လိုက်မည်။ 

မေ့လဲသွားသည့် လူအိုကြီးကိုသာ အာရုံစိုက်နေကြသည့် အခြားသူများနှင့်မတူဘဲ ချန်လီ၏ အာရုံများကတော့ သူ့ကိုကယ်ခဲ့သည့် လူငယ်လေးအပေါ်သို့သာ ကျရောက်နေခဲ့သည်။ ၎င်းက လူငယ်လေး၏ ထူးခြားသည့် အရည်အချင်းဖြစ်နိုင်၏။ သူက မယုံနိုင်စရာကောင်းအောင် တည်တည်ငြိမ်ငြိမ်နှင့် ထိတ်လန့်ခြင်း တစ်စုံတစ်ရာမရှိဘဲ အသက်ကယ်ပြုစုနည်းကို လုပ်ပေးခဲ့ပြီး လူအိုကြီးကို ကယ်တင်ခဲ့သည်။ ဤအချက်ကပင် လူများအား စိတ်သက်သာစေခဲ့၏။

ဆရာဝန်များ ရောက်လာသည့်အချိန်တွင် လူငယ်လေးက လူနာအား လူနာတင်ကတ်ပေါ်သို့ ကူ၍တင်ပေးခဲ့သည်။ သူထွက်သွားတော့မည့်အချိန်တွင် ချန်လီ၏အကြည့်များကို ခံစားမိသည့်အလား ချန်လီကို ကြည့်လာခဲ့၏။ လူငယ်လေးတွင် ချောမောသည့် အသွင်အပြင်ရှိသည်။ သူက ချန်လီအား ဖော်ရွေသည့်အပြုံးလေးပြုံးပြလာရာ ပို၍ပင် ချောမောသွားစေသည်။ 

ချန်လီက လူငယ်လေးကို ကြည့်လိုက်သော်လည်း ပြန်မတုံ့ပြန်ခဲ့ချေ။ 

လူငယ်လေးက တစ်ခုခုလုပ်စရာရှိသေးပုံရကာ ချန်လီကိုခေါင်းညိတ်ပြပြီးနောက် ထွက်သွားတော့သည်။ သိပ်မဝေးသည့်နေရာတွင် နောက်ထပ် ချောမောသည့် လူတစ်ယောက်ရပ်နေကာ လူအိုကြီးကို ကယ်ခဲ့သည့် လူငယ်လေးအား လက်မထောင်ပြလာသည်။ လူငယ်လေးက သူ့ကိုပြန်ပြုံးပြကာ နှစ်ယောက်သား ထွက်သွားကြတော့သည်။ 

“ဘာတွေကြည့်နေတာလဲ…လီလီ” ဝေ့ချန်က ချန်လီ၏ အကြည့်နောက်သို့လိုက်၍ ကြည့်လိုက်သော်လည်း လူငယ်လေးနှစ်ယာက်ကတော့ ပျောက်ကွယ်သွားကြပြီဖြစ်သည်။ 

ချန်လီ အတွေးယာဥ်ကြောထဲမှ ထွက်လာလိုက်ပြီး ဝေ့ချန်ကို ခေါင်းခါပြလိုက်သော်လည်း မျက်လုံးများကတော့ တမျိုးတဖုံ တောက်ပနေသည်။ 

ဝေ့ချန်က ချန်လီဆိုလိုသည်ကို ချက်ချင်းနားလည်လိုက်ပြီး ပြောလိုက်သည်။ “ကိုယ်လည်း အဲ့လူက အံ့ဩဖို့ ကောင်းတယ်လို့ ထင်တယ်”

ချန်လီက တစ်ယောက်ယောက်ကို ကယ်နေစဥ် လူငယ်လေး၏တည်ငြိမ်မှု၊ ကြိုးစားမှုများနှင့် သူရဲကောင်းကဲ့သို့ သူစိမ်းအား မျက်စိတစ်မှိတ်လေးအတွင်း ကယ်ခဲ့ခြင်းအား အံ့ဩနေတာပင်။

ချန်လီခေါင်းညိတ်လိုက်သည်။ ထိုလူက တကယ်ကို အသိအမှတ်ပြုဖွယ်ကောင်း၏။

ကံကြမ္မာက တကယ်ကို လျှို့ဝှက်ဆန်းကြယ်သည်။ သူ့ကိုယ်ပိုင်ကမ္ဘာလေးထဲတွင်သာ သူ့ကိုယ်သူ ပိတ်လှောင်ထားခဲ့သည့် ချန်လီက ဒီတစ်ကြိမ်တွင်တော့ သူစိမ်းတစ်ယောက်၏ လှုပ်ရှားမှုများကို လေ့လာကာ နှလုံးသားထဲတွင် မြဲနေအောင်ငြိတွယ်သွားခဲ့သည်။

 တစ်ယောက်ယောက်ကို ကယ်ခဲ့သည့် လူငယ်လေးက ချန်လီ၏ ဘဝတွင် အရေးပါသည့် လူတစ်ယောက်ဖြစ်လာပြီး သူနှင့်ဝေ့ချန်တို့အား အခက်အခဲများစွာကို ကျော်ဖြတ်နိုင်စေလိမ့်မည်။ 

လက်ရှိသို့…။

ဝေ့ချန်နှင့် ချန်လီတို့ ကုန်တိုက်တစ်ခုလုံးကို လျှောက်ကြည့်ခဲ့ကြပြီး ပစ္စည်းများစွာဖြင့် အိမ်သို့ ပြန်လာကြသည်။ ဝေ့ချန်ဝယ်ခဲ့သည့် ပစ္စည်းအများစုက ချန်လီအကြိုက်များဖြစ်ကာ အများကြီးဝယ်လာခဲ့ခြင်းက ဝေ့ချန်လည်း မြည်းစမ်းကြည့်ရန်ဖြစ်သည်။ ဝေ့ချန်၏ လက်ရှိရည်မှန်းချက်က ချန်လီ၏ခံတွင်းအရသာကို ကျေနပ်စေနိုင်သည့် ဟင်းလျာများ ဖန်တီးပေးရန်နှင့် သူ့ကိုအာဟာရရှိလာစေရန်ဖြစ်သည်။ လက်ရှိတွင် ချန်လီက ပိန်ပါးသေးသွယ်သေးကာ ဝေ့ချန်၏ စံနှုန်းများနှင့် မကိုက်ညီသေးပေ။ 

ချန်လီက အစားကြေးမများပေ။ ထို့အပြင် ချန်မိသားစုတွင် ရှိခဲ့သည့် အချိန်ကထက်ပင် ပို၍ကောင်းကောင်းစားလာသည်။ ချန်မိသားစုအိမ်တွင် ချန်လီမှာ ထမင်းစားချိန်ဖြစ်နေသော်လည်း ပန်းချီဆွဲနေရင်းနှင့် ထမင်းစားရန် မေ့သွားခဲ့သည့် အချိန်များစွာ ရှိခဲ့သည်။ ချန်မိသားစုမှ အိမ်အကူများကလည်း ချန်လီမှာ အနိုင်ကျင့်ရန် လွယ်ကူသောကြောင့် တစ်ခါတရံတွင် အစားအသောက်များ လာပို့ရန် လျစ်လျူရှုထားတတ်ကြသည်။ 

ချန်မိသားစုအိမ်တွင် နေ့တစ်နေ့အား အစာမစားဘဲ ဖြတ်သန်းရခြင်းက သာမန်ပင်ဖြစ်၏။ သူပိန်ပါးနေပြီး အာဟာရမပြည့်ဝသော အသွင်အပြင်ဖြစ်နေရသည့် အဓိကအကြောင်းအရင်းက လုံလုံလောက်လောက် မစားနိုင်သောကြောင့်သာဖြစ်သည်။ 

ဝေ့ချန်နှင့် အတူရှိပြီးနောက်တွင် ချန်လီ၏ အစားအသောက်များက ဖြည်းဖြည်းချင်း ပြောင်းလဲလာကာ ကိုယ်အလေးချိန်လည်း တိုးလာခဲ့၏။

လဝက်လောက်ကြာသွားပြီးနောက် ဝေ့ချန်က ချန်လီ၏ စာကြည့်ပါတနာဖြစ်လာကာ နေ့တိုင်း ကျောင်းသို့အတူသွားရသည်။ အတန်းမရှိသည့်အချိန်တွင် ဝေ့ချန်က ချန်လီအား Qတက္ကသိုလ်အား လှည့်ပတ်ပြရန် ခေါ်သွားလိမ့်မည်။ ကုမ္ပဏီကိစ္စများကတော့ ဝေ့ချန်က ခွဲထွက်နေသည့် မန်နေဂျာတစ်ယောက်ကဲ့သို့ ပြုမူကာ များများစားစား မလုပ်တော့ချေ။

ကျူးကောဖုန်းက ဝေ့ချန်အား လွန်ခဲ့သည့်လဝက်တွင် ဖြစ်ပျက်ခဲ့သည်များကို မေးလည်းမေးမလာဘဲ ဝေ့ချန်ကို ဈေးကွက်မြှင့်တင်ရေးဌာန ဒါရိုက်တာရာထူးမှ ဖယ်ရှားမပစ်သည်မှာ ထူးဆန်းလှသည်။ 

ကုမ္ပဏီတစ်ခုလုံးတွင် ကျူးကောဖုန်းနှင့် ဝေ့ချန်တို့ ဘာလုပ်ဖို့ ကြံနေကြသည်ကို တစ်ယောက်မှ မသိကြချေ။ ဘယ်သူကမှ သူတို့၏ စိတ်ရင်းအမှန်များကို မသိကြချေ။ 

ထို့ကြောင့်ပင် လက်ထောက်အထွေထွေမန်နေဂျာ သို့မဟုတ် အရောင်းဌာနဒါရိုက်တာဖြစ်သည့် လင်ရှင်း သို့မဟုတ် ဈေးကွက်မြှင့်တင်ရေးဌာနမန်နေဂျာဖြစ်သည့် ဟဲခယ်ချမ်းတို့မှာ မသက်မသာခံစားနေရသည်။ သူတို့ မမျှော်လင့်ထားသည့်အချိန်တွင် ဝေ့ချန်နှင့် ကျူးကောဖုန်းတို့က ကြီးမားသည့် လှုပ်ရှားမှုကို ထုတ်လွှတ်လာကြမည်ဟု သူတို့ ခံစားနေရ၏။ 

သူတို့က ကျူးကောဖုန်းနှင့် ဝေ့ချန်တို့ကို ဆန့်ကျင်ချင်သော်လည်း ထိုသို့လုပ်ရန် သူတို့တွင် အင်အားမရှိပေ။ သူတို့ကို ဆန့်ကျင်ရန် သူတို့၌ အချိန်ကိုမရှိချေ။ ကြီးမားသည့် ပြသနာကြီးက သူတို့အပေါ်သို့ ကျရောက်နေပြီး ဖြစ်၏။

လင်ရှင်းက လက်ထောက်အထွေထွေမန်နေဂျာ ဖြစ်ခါစလေးရှိသေးသည်။ “အသစ်ဝင်လာသည့် ဝန်ထမ်းများက မီးလောင်ရာလေပင့် လုပ်တတ်သည်” ဟုသည့် စကားရှိလေ၏။ သဘာဝကျစွာပင် လင်ရှင်းက မီးတောက်ကို ပိုတောက်စေချင်နေ၏။ ‘ဒီမီးက ဘယ်ကိုလောင်မှာလဲ…သေချာပေါက်ကို တခြားဌာနကိုပိုင်တဲ့ ဝေ့ချန်ကို လောင်မှာပဲ’

ဝေ့ချန်၏ အခွင့်အာဏာကို ပျက်ပြယ်နေခြင်းက ပထမဆုံးမီးဖြစ်ပြီး ၎င်းက သူတို့မျှော်လင့်ထားသလို စတင်နေပြီဖြစ်သည်။ ‘ကြည့်စမ်း…ဝေ့ချန်က ကုမ္ပဏီကိုတောင် မလာရဲတော့တဲ့အထိ ကြောက်သွားပြီ’

ဒုတိယမီးကတော့ ဈေးကွက်မြှင့်တင်ရေးဌာနတွင် ရှိနေစဥ်က ဝေ့ချန်ပြဌာန်းထားခဲ့သည့် ဗျူဟာများဖြစ်သည်။ သူတို့က ဝေ့ချန်၏ ဗျူဟာများ မှန်သလား၊ မှားသလား ဂရုစိုက်ကြချေ။ သူတို့က သူတို့ကိုယ်သူတို့ မျက်စိမှိတ်ယုံကာ ဝေ့ချန်၏ဗျူဟာများက မှန်သည်ဆိုလျှင်တောင်မှ သူတို့၏ ကိုယ်ပိုင်ဗျူဟာများက ပိုမှန်မည်ဟု တွေးကြ၏။ ထိုမီးက စတင်ရန် အနည်းငယ်ခက်ခဲသည်။ အကြောင်းမှာ ဈေးကွက်မြှင့်တင်ရေးဌာနတွင် ဝေ့ချန်ရှိခဲ့သည့် တစ်လ၌ သူက ချန်ဖုန်းအုပ်စုအတွက် စံနှုန်းများစွာ ဖန်တီးပေးခဲ့သောကြောင့်ဖြစ်သည်။ ထိုစံနှုန်းများကို ဖယ်ရှားပစ်ရန်က မဖြစ်နိုင်ဘဲ ဖိနှိပ်ပစ်ရန်လည်း အလွန်အမင်း ခက်ခဲလိမ့်မည်။ 

သူတို့၏ တတိယမီးကတော့ ဝေ့ချန်ကိုယ်တိုင်ကို ဦးတည်နေတာဖြစ်သည်။ သူတို့က ဝေ့ချန်အား ဈေးကွက်မြှင့်တင်ရေးဌာနဒါရိုက်တာနေရာမှာ ဖယ်ရှားပစ်ကာ ချန်ဖုန်းအုပ်စုမှ ထွက်သွားအောင် လုပ်ချင်ကြသည်။

သို့သော်လည်း သူတို့ တတိယမီးကို မစတင်နိုင်ခင်မှာပင် ဒုတိယမီးက မထင်မှတ်ထားဘဲ တစ်ဖက်လှည့်ကာ လင်ရှင်းနှင့် သူ့အုပ်စုကို လောင်မြိုက်၍ အဆုံးသတ်သွားသည်။ 

၎င်းမှာ ကျူးကောဖုန်းနှင့် ဝေ့ချန်တို့ ယုံကြည်ချက်ရှိရှိ တည်ရှိနေသည့်နေရာဖြစ်သည်။ ဘာလို့ သူတို့ မစိုးရိမ်ကြတာလဲ...။ သေချာသည်ကတော့ လင်ရှင်းမှာ ကျူးကောဖုန်းမဆိုထားနှင့်၊ ဝေ့ချန်တစ်ယောက်တည်းကိုတောင် ကိုင်လှုပ်ရန် စွမ်းရည်မရှိသောကြောင့်ဖြစ်သည်။ 

လင်ရှင်းဦးဆောင်ထားသည့် အုပ်စုက ဒုတိယမီးမှာ သူတို့ဘက်သို့ ပြန်လှည့်လာကြောင်း သတိမထားမိ၍ ဖြစ်သည်။ သူတို့က ဝေ့ချန်အား ဘေးထုတ်လိုက်နိုင်သည့် ‌အောင်မြင်မှု သေးသေးလေးအား ပျော်မွေ့နေကြဆဲဖြစ်သည်။ 

ချန်ဖုန်း အုပ်စုတွင် လက်ရှိအခြေအနေများက မည်သို့ ရှိနေသနည်း။ ဝေ့ချန် အလုပ်မသွားသော်လည်း လင်ရှင်းနှင့် သူ့အဖွဲ့သာ သူရေးဆွဲထားသည့်ဗျူဟာများကို ဝင်ရောက်နှောင့်ယှက်နိုင်လောက်သည်အထိ ထက်မြက်ကြမည်ဆိုပါက လင်ရှင်းနှင့်အတူ သူ၏နောက်ခံဖြစ်သည့် ကျိူးထုံဖမ်းတို့ကို ဆွဲချရန် ပို၍ခက်ခဲမည်မှန်း သူသေချာသိသည်။ 

သို့သော်လည်း လက်ရှိအခြေအနေမှာ လင်ရှင်းက တစောက်ကန်းကန်းနှင့် သူ၏ဗျူဟာများကို လာထိရာ သူကိုယ်တိုင် အောက်ခြေသို့ ကျဆင်းရတော့သည်။ အချန်ကျလာလျှင် ကျိုးထုံဖမ်းလည်း သူတို့ကို ကယ်နိုင်လိမ့်မည် မဟုတ်ပေ။ အချို့ကိစ္စရပ်များတွင် အစပြုလုပ်ဆောင်မှုများက ကျူးကောဖုန်း၏ လက်ထဲသို့ ရောက်သွားနေဆဲဖြစ်သည်။

သို့သော်လည်း လက်ရှိတွင် ချန်ဖုန်းအုပ်စုရှိ လူတော်တော်များများက ၎င်းကို သတိမထားမိကြသေးချေ။ ဝေ့ချန်၏ စွမ်းရည်များကို အားလုံးသိနေကြသောကြောင့် သူတို့က ဝေ့ချန်၏ အခြေအနေကို စာနာသနားနေကြသည်။  

ဥက္ကဌကြီးကလည်း အခြေအနေတို့အား အတိုင်းအတာတစ်ခုအထိ နားလည်သော်လည်း ပုံမှန်အတိုင်း ပွဲကြည့်သူအဖြစ်သာ နေသည်။ ကုမ္ပဏီ၏ အတိုးများ ထိခိုက်လာသည်အထိ ဌာနနှစ်ခု တစ်ခုနှင့်တစ်ခု တိုက်ခိုက်နေသည်ကိုကြည့်မည်။ ပြီးမှသာ သူတို့ ပဋိပက္ခများအား ဝင်ရောက်တားဆီးကာ ချန်ဖုန်းအုပ်စုအား လမ်းကြောင်းပေါ်သို့ ပြန်တင်ပေးမည်။ 

ထိုအချိန်တွင် ချန်ဖုန်းအုပ်စုမှ လူများ၏ စာနာသနားခြင်း ခံနေရသည့် ဝေ့ချန်က Qတက္ကသိုလ် စာသင်ခန်း၏ ခုံမြင့်ပေါ်တွင် ရပ်နေ၏။ သူက ဖတ်စာအုပ်များမှ သင်ယူ၍ မရနိုင်သည့် ဗဟုသုတများနှင့် လွန်ခဲ့သည့်နှစ်နှစ်တွင် အပြင်၌ ကြိုးကြိုးစားစားအလုပ်လုပ်ခြင်းမှ ရခဲ့သည့် ဗဟုသုတများကို အတန်းဖော်များနှင့် ဂျူနီယာများအား သင်ကြားပေးနေသည်။

အစားထိုးသင်ပေးရန် ကျူးကောယွီ၏ တောင်းဆိုချက်ကို ဝေ့ချန် လက်ခံခဲ့ခြင်းမဟုတ်ပေ။ ဖြစ်ချင်တော့ ဝေ့ချန်နှင့် ချန်လီတို့ ကျောင်းထဲတွင် လျှောက်ကြည့်နေကြချိန်၌ ဝေ့ချန်၏ ကြီးကြပ်ရေးမှူးနှင့် တွေ့ခဲ့သည်။ တုံ့ဆိုင်းမှုမရှိဘဲ ကြီးကြပ်ရေးမှူးက စီးပွားရေးဌာနမှ ကျောင်းသားများကို စုဝေးလိုက်ပြီး ဝေ့ချန်အား သူ၏အောင်မြင်သည့် သမိုင်းအား ကျောင်းသားများနှင့် မျှဝေပေးရန် ပြောခဲ့သည်။ 

ဝေ့ချန်က စင်ပေါ်သို့ အတင်းအကြပ်အပို့ခံလိုက်ရသည်။ သူ့ထက် နှစ်အနည်းငယ်သာ ငယ်သည့် Qတက္ကသိုလ် ကျောင်းသားများအား မျက်နှာမူရင်း သူ၏ဘဝအတွေ့အကြုံများကို ပြောပြရတော့သည်။

ကံကောင်းစွာနှင့် ဝေ့ချန်ကအမြဲတမ်း မျက်နှာတည်တည်နှင့် နေတတ်ပြီး အရင်ဘဝတွင် နေနခဲ့သည့် နှစ်များ၏ အတွေ့အကြုံများနှင့် ပေါင်းလိုက်သောအခါ သူစကားပြောတိုင်း သူ၏ သီးသန့်ဆန်နေသည့် အငွေ့အသက်က ကျောင်းသားများအား ရှိန်လောက်‌ရန် လုံလောက်နေသည်။ 

ချန်လီက စာသင်ခန်း၏ အရှေ့အဆုံးအတန်းတွင် ထိုင်နေကာ ဝေ့ချန် စင်ပေါ်တက်သွားသည်နှင့် သူ့အကြည့်များက ဝေ့ချန်အပေါ်သို့ ကျရောက်လာသည်။ ချန်လီ၏ မျက်လုံးထဲတွင် စင်မြင့်ပေါ်တွင် ရှိနေသည့် လူက တောက်ပသည့် အလင်းရောင်များ ထုတ်လွှင့်ပေးနေပြီး ယုံကြည်ချက်ရှိရှိ၊ ကျက်သရေရှိစွာနှင့် နက်ရှိုင်းပြီး ဩဇာပြည့်ဝသည့်အသံဖြင့် စကားပြောနေသည်။ အပြုံးတစ်ချက်မှမပါဘဲ တလေးတနက်ဖြစ်နေသည့် အမူအရာနှင့် ဝေ့ချန်ပြောနေသည်ကိုများကို ချန်လီနားမလည်နိုင်ပေ။ သို့သော်လည်း သူက ဝေ့ချန်၏ အပြည့်အဝဆွဲဆောင်ခံနေရသောကြောင့် အကြည့်မလွှဲနိုင်ဖြစ်နေ၏။

ချန်လီတစ်ယောက်သာ ဝေ့ချန်၏ ဆွဲဆောင်ခံထားရခြင်း မဟုတ်ပေ။ ဝေ့ချန် စင်ပေါ်သို့ တက်သွားသည်နှင့် အောက်တွင် ရှိနေသည့် ကျောင်းသားများမှာ လှုပ်ရှားမှု နည်းနည်းလေးမှ မလုပ်ရဲကြတော့ချေ။ ဝေ့ချန် စကားစပြောသည့်အခါ စည်းချက်မှန်ပြီး ဆွဲဆောင်မှုအားကောင်းသည့် သူ့အသံကသော်လည်းကောင်း၊ စိတ်ဝင်စားဖွယ်ကောင်းသည့် အကြောင်းအရာကသော်လည်းကောင်း သူတို့အားလုံး၏ အာရုံကို ဆွဲဆောင်လိုက်သည်။ သူတို့က မှတ်စုလိုက်မှတ်ရန်ပင် မေ့နေကြကာ ဝေ့ချန်၏ ပို့ချမှုကို စိတ်ဝင်တစား နားထောင်နေမိကြ၏။ 

၎င်းက အတန်းဆိုသည်ထက် ပို့ချမှုဟု ပြောလျှင် ပိုမှန်သည်။ ခုံမြင့်က ဝေ့ချန်၏ စွဲဖက်ဖွယ် ပင်ကိုစရိုက်ကို မီးမောင်းထိုးပြနေသည့် စင်မြင့်ဖြစ်လာခဲ့သည်။ အောက်ဖက်မှ ကျောင်းသားများမှာလည်း စိတ်ဝင်စားနေကြကာ နောက်ဆုံးတွင် ၎င်းမှ အကျိုးအမြတ်များစွာ ရကြမည်မှာ သေချာလှသည်။ 

အတန်းချိန်ပြီးရန် မိနစ်နှစ်ဆယ်လောက် ကျန်သေးသည်။ ဝေ့ချန်က ပို့ချခြင်းကို ရပ်လိုက်ကာ မေးခွန်းတစ်ခုမေးလိုက်သည်။ မေးခွန်းက အရမ်းမခက်ခဲဘဲ အဖြေကရိုးရှင်းပုံပေါ်သည်။ သို့သော်လည်း သူတို့၏ အဖြေများကို အမှတ်ပြည့်ရရန်အတွက် သူတို့က ဖတ်စာအုပ်ထဲမှ သီအိုရီများနှင့် နိုင်ငံတကာ အဖွဲ့အစည်းများ၏ လတ်တလော စီးပွားရေးလှုပ်ရှားမှုများကို သူတို့အဖြေများတွင် ဖြည့်စွက်ရန် လိုအပ်သည်။ တခြားနည်းဖြင့် ဆိုရလျှင် ဤမေးခွန်းက အမှတ်ရရန်လွယ်ရလည်း ပြီးပြည့်စုံသည့် အမှတ်ရရန်တော့ ခက်ခဲသည်။ 

ဝေ့ချန်က ကျောင်းသားအများစု၏ အဖြေများကို နားထောင်ခဲ့သော်လည်း သူတို့အားလုံးက အပေါ်ယံသာ ဖြေဆိုကြပြီး နက်ရှိုင်းမှုနှင့် ကျယ်ပြန့်မှုတို့ လိုနေသေးသည်။ 

ဤရလဒ်က အံ့ဩဖို့မကောင်းကြောင်း ဝေ့ချန်သိသည်။ အကြောင်းမှာ ဤကျောင်းသားများက လူထုအဖွဲ့အစည်း၏ အနိမ့်အမြင့်များကို မတွေ့ကြုံရသေးသောကြောင့်ဖြစ်သည်။ သူတို့ မေးခွန်းကို အပေါ်ယံသာ နားလည်သည်က သာမန်ပင်။ 

သို့သော်လည်း ဝေ့ချန်က အဖြေများကို ခွဲခြမ်းစိတ်ဖြာရန် အလျင်မလိုလိုက်ချေ။ ထိုအစား သူက အခြားယောက်ျားလေးတစ်ယောက်ကို ဖြေရန် ညွှန်ပြလိုက်သည်။ 

ထိုယောက်ျားလေး ထလိုက်သည်နှင့် တစ်တန်းလုံးက အာမေဋိတ်သံများထွက်လာ၏။

ဝေ့ချန် အံ့ဩသွားသော်လည်း ထို‌ကျောင်းသားလေး၏ အသွင်အပြင်များကိုမြင်ပြီးနောက် ဘာကြောင့် လှုပ်လှုပ်ရှားရှားဖြစ်လာလဲ နားလည်သွားရသည်။ ထိုကျောင်းသားလေးမှာ အလွန်ချောမောပြီး သာမန်အဝတ်အစားများကို ဝတ်ထားသည့်တိုင် သူ၏ချောမောမှုများကို လျော့မသွားစေ‌ပေ။ 

“ကျေးဇူးပြုပြီး မင်းရဲ့အဖြေကို ဝေမျှပါဦး...” ဝေ့ချန်ပြောလိုက်သည်။ သူက ကြည့်ကောင်းနေရုံနှင့်တင် အဖြေဖြေရန်ဝေ့ချန် လွှတ်ပေးလိမ့်မည်မဟုတ်ချေ။ 

ထိုကျောင်းသားလေးတွင် သာယာသည့်အသံရှိသော်လည်း သူ့အဖြေက ဝေ့ချန်ကို အံ့ဩသွားစေသည်။ 

💘