Welcome To MM Storyteller
LOGIN
Chapter 231
ရှအန်းက ရှကျင်းအား ထိုစကားများကို တီးတိုးပြောလိုက်သည်။ သူမရင်မဆိုင်ချင်သည့် မသိချင်သည့် အရာတိုင်းကို ထုတ်ပြောလိုက်သည်။
ယခုတွင် ရှကျင်းက မူလကိုယ်အပေါ် အတော်လေးမကောင်းခဲ့ကြောင်း စတင်တွေးနေမိပြီဖြစ်သည်။ သူမ ထိုကိစ္စများအားလုံးကို အင်တာနက်ပေါ်တွင် တင်ခဲ့သင့်သည်။
"ဘာ...."
ရှကျင်း လုံးဝပုံကျသွားသည်။
ရှအန်းက သူမ၏ အတိတ်ဆိုးအားလုံးနှင့် ကြုံတွေ့ခဲ့သော အရာအားလုံးကို ပြောခဲ့သည်။
သူမအော်ဟစ်လိုက်သည်။
"နင်ပဲ.. နင်ပဲ... နင့်ကြောင့်ပဲ... နင်သာ ရှိမနေခဲ့ရင် ငါအဲ့လိုတွေ ကြုံတွေ့ရမှာမဟုတ်ဘူး... နင်ပဲဖြစ်သင့်တာ ပြန်ပေးဆွဲခံရပြီး ကလေးသတို့သမီးလုပ်ရမယ့်လူက နင်ပဲဖြစ်သင့်တာ.. နင်က ဘာလို့ငါပိုင်ဆိုင်ရမဲ့ ပျော်ရွှင်စရာ ဘဝကို ပိုင်ဆိုင်ခဲ့ရတာလဲ.... ငါက အရမ်းခံစားခဲ့ရတာ နင်ကကြတော့ဘာလို့လဲ..."
ရှကျင်းက လက်ဆန့်ထုတ်ကာ ရှအန်းမျက်နှာကို ကုတ်ဆွဲရန် လုပ်လိုက်သည်။
သို့သော် သူမလက်ဖဝါးက ရှအန်းဆီမရောက်မီ ရှအန်းက သူမကိုကန်ထုတ်လိုက်၍ ရှကျင်း နောက်သို့ ပျံထွက်သွားသည်။
ဘုန်း
ရှကျင်းက နံရံနှင့်ပြင်းထန်စွာတိုက်မိပြီး အေးစက်နေသော မြေပြင်ပေါ် ပြုတ်ကျသွားသည်။
ထိုမိန်းမက ခဏမျှထမလာနိုင်ပဲ ဖြစ်နေပြီး ရှအန်းက သူမ ဒေါက်မြင့်ဖိနပ်စီးမလာမိ၍ နောင်တရသွားခဲ့သည်။
မဟုတ်ပါက ရှကျင်းက ဤနေရာတွင်ပင် မသန်မစွမ်းဖြစ်သွားနိုင်သည်။
"ရှကျင်း... ငါနင့်ကို သတိပေးလိုက်မယ်... ငါ့ကိုထပ်ပြီး ရန်လာမစတာ ကောင်းမယ်နော်.. မဟုတ်လို့ကတော့ နင်အကြောက်ဆုံးအရာတွေအကုန်လုံး ဖြစ်လာစေရမယ်လို့ အာမခံတယ်..."
ရှအန်း ထေ့ငေါ့လိုက်သည်။ ဤတစ်ကြိမ်တွင် သူမ နောက်ကိုလှည့်မကြည့်ပဲ ထွက်သွားလိုက်လေသည်။
ရှကျင်း အံ့အားသင့်ရင်း ကျန်ခဲ့ရသည်။ နာလွန်း၍ မတ်တတ်ပင်မရပ်နိုင်ပဲ စကားတစ်ခွန်းပင် ထုတ်မပြောနိုင်ပေ။
သူမလုပ်နိုင်သည်မှာ ရှအန်းကို ငေးစိုက်ကြည့်နေရုံသာဖြစ်သည်။
...
"ရှအန်းကျဲ အဆင်ပြေရဲ့လား...."
ရှအန်း ကားပေါ်ပြန်ရောက်သည်နှင့် သူမ၏လက်ထောက်လေးက စိုးရိမ်တကြီးမေးလာသည်။
ရှအန်းဘေးမှလူတိုင်းက ရှကျင်းက သူမကိုပစ်မှတ်ထားနေကြောင်း သိကြသည်။
"အဆင်ပြေပါတယ်... အိမ်ပြန်ကြတာပေါ့... ရှောင်ရှင်းက ကျဲကိုမတွေ့ရင် စိုးရိမ်နေလိမ့်မယ်..."
ရှအန်းက ခေါင်းသာခါလိုက်ပြီး အိမ်သို့မောင်းခိုင်းလိုက်သည်။
သို့သော် အိမ်ပြန်လမ်းတွင် ရှအန်း၏ စိတ်အခြေအနေက တည်ငြိမ်မနေခဲ့ပေ။
သူမက မူလကိုယ်၏ ကလေးကို ဂရုပင်မစိုက်ပေ။ ရှရှင်းချန်ကိုသာ သူမ၏ကလေးအဖြစ် အသိအမှတ်ပြုပေသည်။
သို့သော် သူမက မူလကိုယ်၏ကလေးအရင်းကို မသိပေ။
ရှကျင်းက သူမကို ထိုကလေးအရင်းအကြောင်း သိခွင့်ပေးခဲ့သည်။
စာအုပ်ထဲတွင် ရှရှင်းချန်က ရှအန်း၏ ကလေးမဟုတ်ကြောင်း ပြောမထားခဲ့ပေ။ ရှကျင်းပြောတာသာမှန်လျှင် သူမ မူလကိုယ်၏သမီးက ဘယ်သူလဲသိသွားလေပြီ။
သူမသာ အသေအချာစုံစမ်းလျှင် ထိုကလေးမလေးကို အလျှင်အမြန်ရှာဖွေနိုင်မည်ဖြစ်သည်။
အိမ်သို့ပြန်ရောက်သောအခါတွင် ရှအန်း ပထမဆုံးလုပ်သည့်အရာမှာ အိပ်ခန်းထဲတွင်အိပ်နေသည့် ကောင်ငယ်လေးကို သွားကြည့်ခြင်းဖြစ်သည်။
ကောင်ငယ်လေး အိပ်နေသည်ကိုမြင်မှ စိတ်သက်သာရာ ရသွားခဲ့သည်။
သူမ စာကြည့်ခန်းထဲတွင် လမ်းပတ်လျှောက်နေမိသည်။
သူမက ရှရှင်းချန်ကသာ သူမ၏ကလေးဟု ပြောခဲ့သော်လည်း သူမရှရှင်းချန်ကို လက်ခံခဲ့သည်မှာ မူလကိုယ်ကို သူမကို ခန္ဓာကိုယ်ပေးသည့်အတွက် ကျေးဇူးတင်သည့်အနေဖြင့် ကူညီပေးခြင်းဖြစ်သည်။
ယခုတွင် ရှရှင်းချန်က မူလကိုယ်၏ကလေးမဟုတ်ပဲ မူလကိုယ်တွင် အခြားကလေးတစ်ယောက်ရှိနေကြောင်း သိလိုက်ရလေပြီ။
ဘယ်သူလဲ သူမ မသိခဲ့လျှင် အဆင်ပြေမည်ဖြစ်သည်။ သို့သော် သူမက သိပြီးသွားပြီဖြစ်ပြီး ထိုကလေး၏ အနာဂတ်က မည်သို့ဖြစ်မည်နှင့် မည်သို့အဆုံးသတ်ရှိမည်ကိုပါ သိနေပြီဖြစ်သည်။ သူမ ၎င်းကို လျစ်လျူရှုမထားနိုင်ပေ။
စာကြည့်ခန်းထဲသို့ ဝင်ပြီးနောက်တွင် ရှအန်းက သူမအယုံကြည်ရဆုံး အေးဂျင့်ဖြစ်သူ ရှုထျန်းထျန်းကို ဖုန်းဆက်လိုက်သည်။
"ဟဲလို...ရှအန်းကျဲ... တစ်ခုခုဖြစ်လို့လား... ကျဲ ရှကျင်းကို သွားတွေ့တယ်လို့ ကြားတယ်... တစ်ခုခုဖြစ်လို့လား... "
ဖုန်းဝင်သွားသည်နှင့် ရှုထျန်းထျန်းက မေးခွန်းများစွာမေးလာသည်။
"တကယ်တော့... တစ်ခုခုဖြစ်ခဲ့တယ်..."
ရှအန်းက ငြင်ငြင်သာသာလေးပြောလိုက်သည်။
ရှအန်းက ဘာမှမထူးခြားသလို ပြောနေ၍ ရှုထျန်းထျန်းက ကိစ္စကြီးတစ်ခုမဟုတ်ဟု ထင်ခဲ့သည်။
ဒါပေမဲ့ အဲ့ဒီ့ကိစ္စက နောက်ရက်အနည်းငယ်အကြာအထိ သူမကိုခေါင်းခဲနေစေမယ်လို့ ဘယ်သူထင်မှာလဲ...
"ဘာဖြစ်လို့လဲ...."
"ကျဲကို တစ်ယောက်ယောက်ကို ကူရှာပေးဦး...သူက ရှရှင်းနဲ့အတူ ဆေးရုံတစ်ခုတည်းမှာပဲ မွေးပြီး ရှရှင်းနဲ့ အသက်အရွယ်တူတဲ့ ကောင်မလေးတစ်ယောက်ပဲ... ဒါပေမဲ့ သူမက ဆေးရုံနားက အမှိုက်ပုံးနားမှာ စွန့်ပစ်ခံထားခဲ့ရတာ...."
ရှအန်း၏ ဖော်ပြချက်ကိုနားထောင်ပြီး ရှုထျန်းထျန်း ဘာပြန်ပြောရမလဲပင်မသိတော့ချေ။
ရှအန်းက အဘယ်ကြောင့် ထိုကဲ့သို့သော ကလေးမလေးကို ရှာနေလဲ သူမသိပေ။
အဲ့ကလေးမလေးနဲ့ လုပ်စရာရှိလို့လား...
ဘာလို့ ရှာနေရတာလဲ...
ရှုထျန်းထျန်းက ထိုကိစ္စက ရှကျင်းနှင့် သက်ဆိုင်နေမည်ဟု ခန့်မှန်းမိသည်။
"ရှအန်းကျဲ.... ဘာလို့ အဲ့ကလေးမလေးကို ရှာနေရတာလဲ..."
ရှုထျန်းထျန်း၏ လေသံက သံသယအပြည့်နှင့်ဖြစ်သည်။
"အရင်ရှာလိုက်ပါ... ရှာတွေ့ရင် ပြောပြမယ်..."
ရှအန်းက ရှုထျန်းထျန်းကို ထိုကလေးမလေးက သူမ၏သမီးဖြစ်နိုင်သည်ဟု မပြောခဲ့ပေ။ သူမက ရုတ်တရက် အရေးပေါ်ထွက်ပေါ်လာသည့် သမီးအရင်းဆိုသည့် ခေါင်းစဉ်ကို မည်သို့ ကိုင်တွယ်ရမလဲမသိသေးပေ။
လက်ရှိ သူမတွင် ကလေးငယ်နှစ်ယောက်ရှိနေပြီဖြစ်သော်လည်း တစ်ယောက်ကိုပျိုးထောင်သည်နှင့် နှစ်ယောက်ကို ပျိုးထောင်သည်က မကွာခြားလှပဲ ယခုတွင် နောက်တစ်ယောက် တိုးလာလေပြန်ပြီ။
သို့သော် သူမစိတ်ပိုင်းဆိုင်ရာပင် မပြင်ဆင်ရသေးပဲ ရုတ်တရက်ကြီး ထွက်ပေါ်လာသည့် ကလေးမလေးတစ်ယောက်ကို ပျိုးထောင်ပေးရသည်မှာ အတော်လေး ကိုးရိုးကားရားနိုင်လှသည်။
ရှအန်း သက်ပြင်းချလိုက်သည်။
သူမတွင် သားကောင်းတစ်ယောက်ရခဲ့သော်လည်း ယခုတွင် သူက အဖေရော အမေပါ မည်သူမှန်းမသိသော ကလေးတစ်ယောက်ဖြစ်လာလေပြီ။
ပြီးတော့ မူလပိုင်ရှင်ရဲ့ ကလေးကလည်း ဗီလိန်ကနေ အမြှောက်စာဇာတ်ကောင်လေးဖြစ်သွားတယ်လား...
သူမအတော်လေး ဆွံအနေမိလေပြီ။
ဘယ်လို ဇာတ်ကြောင်းကြီးလဲဟ....
ရှအန်း စိတ်အခြေအနေ အတော်လေး ဆိုးဝါးသွားသည်။
အမှန်အတိုင်းပြောရလျှင် မည်သူ့ကိုမှ အပြစ်တင်မရပဲ... ဇာတ်ကြောင်းကိုက စိတ်ပျက်စရာကောင်းနေခြင်းဖြစ်သည်။
စာအုပ်ထဲတွင် မူလပိုင်ရှင်တွင် ရှရှင်းချန်ဟူသော သားတစ်ယောက်သာရှိခဲ့သည်။ သူက ဗီလိန်အကြီးစားတစ်ယောက်ဖြစ်သော်လည်း နောက်ဆုံးပိုင်းအထိ အသက်ရှင်သန်ပြီး ဇာတ်လိုက်များကို သေသည်အထိ နှိပ်စက်ညှဉ်းပန်းခဲ့သူဖြစ်သည်။
အရွယ်ရောက်ပြီးနောက်တွင် ရှရှင်းချန်က သူချစ်သည့် ဇာတ်လိုက်မယူဆောင်လာသော ပြဿနာများမှအပ အခြားသော အခက်အခဲများကို မရင်ဆိုင်ရပေ။
မူလပိုင်ရှင်က သေသွားပြီဖြစ်သော်လည်း ဇာတ်လိုက်များကို နှိပ်စက်သည့် သားတစ်ယောက်ရှိရခြင်းမှာ မဆိုးလှပေ။ အခြားနည်းဖြင့်ပြောရလျှင် ၎င်းကို မူလကိုယ်အတွက် လက်စားချေသည်ဟုပင် မှတ်ယူ၍ရသေးပေသည်။
အဆုံးတွင် ရှရှင်းချန်က မူလကိုယ်၏သားမဟုတ်ခဲ့ပေ။ မူလကိုယ်၏ ကလေးမှာ မကောင်းတာတစ်ခုမှ မလုပ်ခဲ့သော အမြှောက်စာဇာတ်ကောင်လေးဖြစ်နေသည်။
Welcome To MM Storyteller
LOGIN
Welcome To MM Storyteller
REGISTER