Chapter 104

💘Chapter 104 

ဝန်ထမ်းပြောင်းလဲခြင်း

ဝေ့ချန်၏ ဝန်ခံချက်က ရုတ်တရက်ထွက်ပေါ်လာသောကြောင့် ချန်လီ ခဏလောက် မှင်သက်သွားကာ ခေါင်းညိတ်ပြလာသည်။ 

ဝေ့ချန်က ခေါင်းမာစွာနှင့် မေးလိုက်၏။ “လီလီ...ခေါင်းညိတ်တာက ဘာဆိုလိုတာလဲ”

“ချစ်တယ်” ချန်လီ ရှက်ရွံ့မှုတစ်စိုးတစိမရှိဘဲ အ‌လေးအနက်ပြောလိုက်၏။ သူ့ကမ္ဘာတွင် ဝေ့ချန်ကို ထိုစကားလုံးသုံးလုံး ပြောခြင်းက သဘာဝပင်။ (T/N တရုတ်နဲ့အင်္ဂလိပ်လို စကားလုံးသုံးလုံး ဆိုပေမယ့် မြန်မာလိုကတော့ နှစ်လုံးပဲပေါ့နော်...)

ချန်လီ သူ့ကိုသဘောကျမှန်း ဝေ့ချန်သိသော်လည်း ချန်လီ့ပါးစပ်က ထိုစကားလုံးသုံးလုံးထွက်လာသည့်အခါ ဝေ့ချန် ပျော်ရွှင်သွားသည်။ စိတ်ထဲတွင် မီးရှူးမီးပန်းများ ‌ပေါက်ကွဲနေပြီး စိတ်ဝိညာဥ်ကတော့ တုန်ယင်နေကာ ချန်လီအား သူ့ကိုယ်ထဲသို့ နစ်မြုပ်သွားစေချင်သည့်အလား တင်းကြပ်စွာ ဖက်ထားလိုက်တော့သည်။ 

ထိုရိုးရှင်းသည့် စကားလုံးလေးသုံးလုံးကပင် ဝေ့ချန်၏စိတ်ခံစားချက်များကို လှုပ်လှုပ်ရှားရှားဖြစ်သွားစေသည်။ သူက ချန်လီကို ပွေ့ဖက်၍ နမ်းရှိုက်လိုက်ကာ ညင်သာစွာ ထိတွေ့ရင်း နောက်ဆုံးတွင် သူ့ကိုယ်သူ ထိန်းချုပ်လိုက်သည်။ 

လက်ရှိရှုပ်ထွေးမှုအခြေအနေတွင် ရှိနေသည့် ချန်လီက ဘာကိုမှနားမလည်ပေ။ သူ ရိုးအနေသည့်အား ဝေ့ချန် အခွင့်ကောင်းမယူချင်ပေ။ ပြင်းထန်သည့်နာကျင်မှုကို ဝေ့ချန်လိုလိုလားလားနှင့် သည်းခံနေလိုက်သည်။ 

ဆေးရုံမှဆင်းပြီးနောက် ဝေ့ချန်ဘဝမှာ ပုံမှန်သို့ ပြန်ရောက်သွား၏။ သူက ချန်လီကို ကျောင်းပို့ပြီး အလုပ်လုပ်ကာ အလုပ်ဆင်းလျှင် ချန်လီကိုကြို၍ အိမ်ပြန်သည်။ ငယ်ရွယ်ချိန်၏ ပျော်ပါးမှုများကင်းရှင်းသည့် နေ့စဥ်ဘဝဖြစ်၏။ 

ကုမ္ပဏီမှ ဝန်ထမ်းများက ဝေ့ချန်နှင့် ရင်းနှီးသွားကြသောအခါ နောက်ကွယ်တွင် သူ့အကြောင်းကို ဆွေးနွေးကြပြီး အပြောအများဆုံးခေါင်းစဥ်ကတော့ ဝေ့ချန်က ကိုယ်ကျင့်တရားပြည့်စုံသည့် နတ်ဘုရားတစ်ပါးဖြစ်ကြောင်းပင်။ 

သူ့အင်္ကျီကြယ်သီးများက အမြဲတမ်း ထိပ်ဆုံးအလုံးထိ တပ်ထားကာ နက်ကတိုင်ကိုလည်း သေချာစည်းပြီး ဝတ်စုံတွင် တွန့်ကြေနေသည်မျိုးမရှိချေ။ သူက ပြုံးလဲပြုံးခဲသလို စကားလည်းသိပ်မပြောပေ။ ထို့အပြင် သူက ပါတီများမတက်သလို နိုက်ကလပ်များကိုလည်းမသွားပေ။ သူ့တွင် ကိုယ်ပိုင်ဘဝဆိုသည်မျိုး မရှိချေ။ တစ်ယောက်ယောက်သာ သတိမပေးဘဲနေလျှင် ‌ဝေ့ချန်က အသက်နှစ်ဆယ်အစောပိုင်းတွင်သာရှိသေးသည့် ဈေးကွက်မြှင့်တင်ရေးဌာန၏ အငယ်ဆုံးဝန်ထမ်းဖြစ်ကြောင်း ဝန်ထမ်းများအားလုံး မေ့သွားကြလိမ့်မည်ပင်။ သို့‌သော်လည်း ‌ဝေ့ချန်၏ အမူအရာကင်းမဲ့သည့် မျက်နှာကိုကြည့်လိုက်ခြင်းဖြင့် သူက အသက်နှစ်ဆယ့်လေးနှစ်ဆိုသည့် သာမန်လူများ တက္ကသိုလ်မှ ဘွဲ့ရပြီးခါကအရွယ်ဖြစ်ကြောင်း ဘယ်သူက သတိထားမိလိမ့်မည်နည်း။

တကယ်ကို ကွာခြားချက်က ကြီးမားလေသည်။

ဝန်ထမ်းများက ဆွေးနွေးမှုများလုပ်ကြသော်လည်း သူတို့က အလုပ်ကိုတော့ ဂရုတစိုက်လုပ်ကြသည်။ ဝေ့ချန် ကုမ္ပဏီကို ပြန်ရောက်လာသည့်အချိန်မှစ၍ လုပ်ဆောင်စွမ်းရည်များမှာ သိသိသာသာ တိုးတက်လာခဲ့၏။ ရလဒ်အနေနှင့် ဈေးကွက်မြှင့်တင်ရေးဌာနက ကုမ္ပဏီတစ်ခုလုံးတွင် ရေပန်းအစားဆုံးဌာနဖြစ်လာခဲ့သည်။ အချိန်ပိုဆင်းရန် မလိုအပ်သည့်ဌာန။ အခြား မည်သည့်ဌာနကများ ထိုသို့ လုပ်နိုင်မည်နည်း။ သူတို့က တကယ်ကို ကံကောင်းကြသည်ပင်။ 

ဤစကားများက အတိုင်းအတာတစ်ခုလောက်အထိ ဝေ့ချန်၏ နားထဲသို့ ပြန်ရောက်သွားကြလိမ့်မည်။ သို့သော် ဝေ့ချန်က သူတို့ကို ဂရုသိပ်မစိုက်ပေ။ သူ့ဝန်ထမ်းများက သူတို့၏ လုပ်ဆောင်ရည်များကို တိုးမြှင့်နိုင်ပြီး ကုမ္ပဏီ၏ လုပ်ဆောင်များကို တိုးမြှင့်နိုင်နေသရွေ့ အားလပ်ချိန်တွင် ပြောနေကြသည့် အတင်းအဖျင်းများကို ဂရုမစိုက်ပေ။ 

ဒီနေ့တွင် ဝေ့ချန် ကုမ္ပဏီသို့ ‌ရောက်လာသည့်အခါ ဝင်လာသည့်နှင့်ချက်ချင်း ဝန်ထမ်းများအားလုံးက သူ့ကိုကြည့်လာကြသည်။ ဒီတစ်ကြိမ်တွင် သူတို့က သူ့ကို နှုတ်ဆက်လာသည်သာမက သူ့ကို ဝိုင်းဝန်း၍ မတ်တပ်ရပ်၍ လက်ခုပ်လက်ဝါးတီးရင်း ဂုဏ်ပြုပေးကြသည်။ သူတို့က ဝေ့ချန်ကို စနောက်လာရဲကြကာ ဝေ့ချန်ဆီမှ စာအိတ်နီမှ ထွက်လာအောင်ကြိုးပမ်းနေကြ၏။

‌ဝေ့ချန်က ဖြစ်ပျက်နေကြသည်များကို အကြမ်းဖျင်းသာနားလည်သည်။ ဝန်ထမ်းများကို နှုတ်ဆက်ပြီးနောက် သူက သူ့ရုံးခန်းဆီသို့ သွားလိုက်သည်။ 

ဝန်ထမ်းများက တွေးလိုက်ကြ၏။ ‘သေချာတာကတော့ ငါတို့ရဲ့ ဒါရိုက်တာဝေ့က မပျော်ပါးတတ်ဘူးပဲ...။’ အားလုံးစိတ်ထဲတွင် ထိုအတွေးဖြတ်ပြေးသွားပြီးနောက် ဈေးကွက်မြှင့်တင်ရေးဌာန အုပ်စုဖွဲ့စကားပြောခန်းသို့ စာတစ်စောင်ရောက်လာ၏။ 

“ဒါရိုက်တာက စာအိတ်နီတွေ တကယ်ကြီး ပေးနေတာပဲ...အားလုံး...မြန်မြန်သွားယူကြ” စာအိတ်နီများကို အရင်ရှာတွေ့သွားသည့် စိတ်လှုပ်ရှားနေသော ဝန်ထမ်းတစ်ယောက်က ပြောလာ၏။ 

လူတိုင်းက ဝေ့ချန်ပေးထားသည့် စာအိတ်နီများအား လွတ်သွားမည်ကို စိုးရိမ်၍ လျင်မြန်စွာနှင့် ဖုန်းများကိုထုတ်ပြီး စုဆောင်းကြသည်။ စာအိတ်နီများကို ဖွင့်လိုက်သည့်အခါ ဝေ့ချန်က လူတိုင်းအား ယွမ်နှစ်ရာဆီ ပေးထားကြောင်း သိသွားကြသည်။ ၎င်းက အများကြီး မဟုတ်သော်လည်း ဈေးကွက်မြှင့်တင်ရေးဌာနတွင် ဝန်ထမ်းဘယ်လောက်များများ ရှိလိုက်သနည်း။ တစ်ယောက်ကို ယွမ်နှစ်ရာနှင့် ဆိုလျှင် ရုတ်တရက် ၎င်းက သူတို့၏တစ်လစာ လခနှင့် ညီမျှသည်။

ခဏလေးအတွင်းမှာပင် လူတိုင်းက ချမ်းသာသည့်အကျိုးပြုသူ၏ နှစ်သက်ခြင်းခံလိုက်ရသလို ခံစားလိုက်ရသည်။ သူတို့အားလုံးက ဒါရိုက်တာဝေ့၏ ရက်ရောမှုအားကျေးဇူးတင်သည့်အနေနှင့် အီမိုဂျီများကို ပို့လာကြသည်။ 

သို့သော်လည်း နောက်တစ်စက္ကန့်တွင် ဝေ့ချန်ဆီမှ စာတစ်စောင်က သူတို့၏လှုပ်ရှားမှုများကို အေးခဲသွားစေပြီး ချက်ချင်း စာများကိုပြန်ဖျက်ကုန်ကြသည်။ 

 [ကုမ္ပဏီက အလုပ်ချိန်မှာ ဖုန်းသုံးခွင့်ပြုထားလို့လား]

စာများကို ပြန်ဖျက်ပြီးနောက် သူတို့က ဖုန်းကိုသိမ်းလိုက်ကြပြီး ဘာမှမဖြစ်သကဲ့သို့ နာနာခံခံနှင့် ထိုင်ခုံများစီသို့ ပြန်သွားလိုက်ကြသည်။ 

ဝေ့ချန်က စခရင်မှ ပြန်ဖျက်သွားသည့် စာများကိုကြည့်ရင်း ခေါင်းခါလိုက်သည်။ အပြင်ဘက်မှ နေရောင်ခြည်၏နွေးထွေးမှုကြောင့်သော်လည်း သူ့မျက်လုံးများတွင် နွေးထွေးမှုများနှင့် ပြည့်နေ၏။ ထို့နောက် ဝေ့ချန်၏ အကြည့်များက ကွန်ပျူတာစခရင်ပေါ်သို့ ပြန်ရောက်သွားတော့သည်။ စခရင်ပေါ်တွင် ဝန်ထမ်းလွှဲပြောင်းသည့်ကြေညာစာရှိနေ၏။ ဝေ့ချန်က ရာထူးတိုးသွားခြင်းမရှိဘဲ ဈေးကွက်မြှင့်တင်ရေးဌာန၏ ဒါရိုက်တာအဖြစ် ဆက်လက်တည်ရှိနေသည်။ သို့သော်လည်း လက်ရှိဈေးကွက်မြှင့်တင်ရေးဌာနက ယခင်ကနှင့် လုံးလုံးကွာခြားသွားလေသည်။ 

လက်ရှိ ဈေးကွက်မြှင့်တင်ရေးဌာနက သီးသန့်ဌာနအဖြစ်မတည်ရှိတော့သည့် အရောင်းဌာနနှင့် ပေါင်းစည်းထား၏။

သို့သော်လည်း ၎င်းက ဈေးကွက်မြှင့်တင်‌‌ရေးဌာန၏ သဘာဝများကို ပြောင်းလဲပစ်သည့် ပေါင်းစည်းမှုမျိုးမဟုတ်ဘဲ သတင်းပို့ရသည့်လုပ်ငန်းစဥ်များကတော့ ဌာနနှစ်ခုကြားတွင် ပြောင်းလဲသွားသည်။ ယခင်က ၎င်းမှာ လင်ရှင်း၏ရာထူးဖြစ်သည့် လက်ထောက်အထွေထွေမန်နေဂျာ၏ တာဝန်ဖြစ်သည်။ ဌာနနှစ်ခု ပြောင်းလဲပြီးနောက် ဈေကွက်မြှင့်တင်ရေးဌာနက ဘုတ်ဒါရိုက်တာအဖွဲ့များဆီသို့ တိုက်ရိုက်သတင်းပို့ရသည်။ 

ဈေးကွက်မြှင့်တင်ရေးဌာနက အခြားဌာနများနှင့် တစ်ဆင့်တည်းဟုထင်ရသော်လည်း ဌာနများထဲတွင် တိုက်ရိုက်သတင်းပို့ရသည့် ပြောင်းလဲမှုက ဌာန၏ အဆင့်အတန်းကို မြှင့်တင်ပေးလိုက်၏။ ၎င်းက အရောင်းမြှင့်တင်ရေးဌာနအား အထွေထွေမန်နေဂျာအဆင့်လောက်အထိ တစ်ဆင့်တိုးသွားစေပြီး အခြားသူများ တိုက်ရိုက် အမိန့်ပေး၍ မရတော့ချေ။ 

ဝန်ထမ်းလွှဲပြောင်းရေးကြေညာစာထွက်လာသည်နှင့် လူတိုင်းက ကုမ္ပဏီနှင့် ဝေ့ချန်၏ရာထူးမှာ သာမန်မဟုတ်တော့ကြောင်း ချက်ချင်း သတိထားမိသွားကြသည်။ ဥက္ကဌ၏မျက်လုံးထဲတွင် သူက လေးစားဖွယ်ကောင်းသည့် လူတစ်ယောက်ဖြစ်လာခဲ့သည်။ 

ဝေ့ချန်ကတော့ ၎င်းကို အာရုံမစိုက်ချေ။ အရေးအကြီးဆုံးအရာက သူ့အလုပ်ကို သေချာလုပ်ရန်သာဖြစ်သည်။ 

ဝေ့ချန်၏ ရွှေ့ပြောင်းအမိန့်နှင့်အတူ လက်ထောက်အထွေထွေမန်နေဂျာ၏ပြောင်းရွှေ့မှု အမိန့်လည်းပါလာ၏။ 

ဝေ့ချန်က လက်ထောက်အထွေထွေမန်နေဂျာနေရာရှိ လူကိုကြည့်လိုက်သည်။ ထိုလူမှာ ကျိုးထုံဖမ်း၏လူ၊ မျိုးရိုးနာမည်လီနှင့် လီမင်ချန်းဖြစ်ကြောင်းသိလိုက်၏။

ဤကား ဥက္ကဌရှန့်၏ မျှတမှုနှင့် ကြားနေရေးမူဝါဒအား ဖော်ပြသည့်ပုံစံဖြစ်သည်။ ကျိုးထုံဖမ်းဘက်မှ အရင် အမှားလုပ်ခဲ့သော်လည်း သူတို့တွင် ကျိုးထုံဖမ်း၏လူအား လက်ထောက်အထွေထွေမန်နေဂျာအဖြစ် ခန့်အပ်နိုင်သည့် အခွင့်အာဏာရှိသေးကာ နှစ်ဖက်စလုံးအတွက် အခွင့်အရေးများကို မျှတစေသည်။ 

သို့သော်လည်း ကျိုးထုံဖမ်းက ဥက္ကဌရှန့်ဆီမှ ဤစေတနာအား လက်ခံလိမ့်မည်မဟုတ်ပေ။ လက်ထောက်အထွေထွေမန်နေဂျာက ဈေးကွက်မြှင့်တင်ရေးဌာနနှင့် အရောင်းဌာနတို့ကို မကြီးကြပ်ရတော့ပေ။ ထို့ကြောင့် သူ၏အခွင့်အာဏာက လုံးဝလျော့ကျသွားလေသည်။ သေချာသည်ကတော့ ပါဝင်နေသည့် အကျိုးအမြတ်များနှင့် ဆက်နွှယ်မှုများက ယခုအချိန်တွင် ဝေ့ချန်နှင့်ပတ်သက်စရာမလိုပေ။ ယခုတွင် ဝေ့ချန်လုပ်ရန် လိုအပ်နေသည်က ဘာမှမလုပ်သေးခင် အရောင်းဌာနနှင့် ဈေးကွက်မြှင့်တင်ရေးဌာနများကို ပေါင်းစည်းရန်သာဖြစ်သည်။ 

ဝန်ထမ်းပြောင်းရွှေ့ရေးအမိန့်ထွက်လာသည့် ပထမဆုံးနေ့တွင် ဝေ့ချန်က ဈေးကွက်မြှင့်တင်ရေးဌာနှင့် အရောင်းဌာတို့၏ စီမံခန့်ခွဲရေးဝန်ထမ်းများကို အစည်းအဝေးခေါ်လိုက်သည်။ ဈေးကွက်မြှင့်တင်ရေးဌာနမှုလူများက ဝေ့ချန်ကို လေးစားကြပြီး အသိအမှတ်ပြုကြသော်လည်း အရောင်းဌာနမှ လူများကတော့ အပေါ်ယံမျှသာ တုံ့ပြန်ကြလေသည်။ 

သေချာတာတစ်ခုကတော့ သူတို့က ဝေ့ချန်အတွက် ကိစ္စများအား ခက်ခဲအောင် မလုပ်ရဲကြချေ။ ကုမ္ပဏီထဲတွင် ဝေ့ချန်၏ရာထူးက အငြင်းပွား၍မရချေ။ ၎င်းက သူနှင့်ထိပ်တိုက်ရင်ဆိုင်ခြင်းသာဖြစ်ပြီး နောက်ဆုံးတွင် သူတို့၏ အကျိုးစီးပွားကိုသာ ထိခိုက်စေလိမ့်မည်။ 

ဝေ့ချန်က လက်ရှိအခြေအနေကို ကောင်းကောင်းသတိထားမိပြီး ပြောင်းလဲရန် အလျင်မလိုနေချေ။ ဤအစည်းအဝေး၏ အဓိကရည်ရွယ်ချက်က ဌာနနှစ်ခုမှလူများအား တစ်ယောက်နှင့်တစ်ယောက် သိစေချင်ကြသောကြောင့်ဖြစ်သည်။ အရောင်းဌာနက ဈေးကွက်မြှင့်တင်ရေးဌာန၏ ညွှန်ကြားချက်များကို လိုက်နာလာရန်ကတော့ ညတွင်းချင်းဖြစ်မလာနိုင်သည့်အရာဖြစ်သည်။ ဝေ့ချန်တွင် ဖြေးဖြေးချင်း လုပ်ဆောင်သွားရန် အချိန်ရှိ၏။

အစည်းအဝေးက နာရီဝက်သာကြာခဲ့ပြီး ပြီးသွားသည့်အခါ အရောင်းဌာန၏ စီမံခန့်ခွဲသူများက အနည်းငယ် ရှုပ်ထွေးနေကြ၏။ ဝေ့ချန်မှာ သူတို့အပေါ်အာဏာပြလိမ့်မည်ဟု ထင်ထားသောကြောင့် တုံ့ပြန်မှုများကို ပြင်ဆင်ထားခဲ့သော်လည်း ဘာမှဖြစ်မလာခဲ့ချေ။

ဝေ့ချန်က လုံလုံလောက်လောက် မစွမ်းဆောင်နိုင်တာကြောင့်များလား…ဒါမှမဟုတ် သူ့ရဲ့အကွက်တွေကို နောက်ပိုင်းအတွက် သိမ်းထားတာများလား…။

အရောင်းဌာနမှလူများက ဒုတိယအချက်ကိုသာ ယုံကြည်လိုက်ကြ၏။ နောက်ဆုံးတော့လည်း ဤငယ်ရွယ်သည့် ဒါရိုက်တာက လွန်ခဲ့သည့် လအနည်းငယ်ကမှ ကုမ္ပဏီသို့ ရောက်လာခဲ့ပြီး လက်ထောက်အထွေထွေမန်နေဂျာရာထူးရှိသည့် ပြိုင်ဘက်ကိုတောင် အနိုင်ယူခဲ့သည်ပင်။ 

ထိုအကြောင်းနှင့်ပတ်သက်၍ မသက်မသာခံစားနေရသောကြောင့် အရောင်းဌာန၏မန်နေဂျာများက ချက်ချင်း အလုပ်ပြီးနောက် ဈေးကွက်မြှင့်တင်ရေးဌာနမှလူများကို ညစာစားရန်ဖိတ်ခေါ်လိုက်ကြသည်။ သူတို့က ဝေ့ချန်၏ တိုးမြှင့်ရေးမူဝါဒများနှင့် အရောင်းဌာနအား မည်သို့ကိုင်တွယ်မည်နည်းဆိုသည့် သတင်းအချက်အလက်များ စုဆောင်းရမည်။ 

အစည်းအဝေးအဆုံး၌ ဈေးကွက်မြှင့်တင်ရေးဌာနမှ လူများက ဘာကြောင့် သူတို့၏ဒါရိုက်တာဖြစ်သည့် ဝေ့ချန်က အရမ်းညင်သာနေရလဲ သိချင်နေကြ၏။ သူက ဘာမှသိပ်မပြောမသွားဘဲ တစ်ယောက်ပြီးတစ်ယောက် မိတ်ဆက်ပေးပြီးနောက် အစည်းအဝေးကို အဆုံးသတ်လိုက်သည်။ 

ယခုတော့ သေချာတွေးတောဆန်းစစ်ပြီးသည့်အခါ သူတို့၏ဒါရိုက်တာမှာ ကျွမ်းကျင်လှကြောင်း သဘောပေါက်သွားရ၏။ သူက စတင်ချဥ်းကပ်ခြင်းကို လွယ်လွယ်လေးနှင့် ထိန်းချုပ်လိုက်သည်ပင်။ 

အရသာရှိလှသည့် ညစာစားပွဲအပြီးတွင် ဈေးကွက်မြှင့်တင်ရေးဌာနနှင့် အရောင်းဌာနမှလူများကပို၍ရင်းနှီးလာကြသည်။ ယဥ်ကျေးမှုဖလှယ်ခြင်း၏ စွမ်းအားကို လျှော့တွက်၍မရချေ။ 

ညစာစားနေသည့် စားပွဲတွင် ဈေးကွက်မြှင့်တင်ရေးဌာနမှလူများက ဝေ့ချန်၏ အောင်မြင်မှုများကို အရောင်းဌာနမှလူများအား ပြန်လည်မျှဝေကြပြီး သူတို့ကို အံ့အားသင့်စေလိုက်သည်။ ဝေ့ချန်ရောက်လာပြီးသည့်နောက်တွင် ဈေးကွက်မြှင့်တင်ရေးဌာန၌ အချိန်ပိုဆင်းစရာမလိုကြောင်း သူတို့လည်းကြားမိ၏။ ဝေ့ချန်အပေါ် အရောင်းဌာန၏ တွန်းကန်မှုများက တဖြည်းဖြည်းနှင့် ပျောက်ကွယ်လာခဲ့သည်။

နောက်ဆုံးတော့လည်း သူတို့အားလုံးက တခြားတစ်ယောက်ယောက်အတွက် အလုပ်လုပ်ပေးနေကြတာဖြစ်သည်။ အထက်လူကြီးရဲ့အောက်မှာ ဘယ်သူကအလုပ်မလုပ်ကြလို့လဲ…။ သို့သော်လည်း နားလည်နိုင်စွမ်းရှိပြီး ပြိုင်ဆိုင်စိတ်ပြင်းထန်သည့် အထက်လူကြီးရှိနေခြင်းက ဘာကြောင့် ပြဿနာဖြစ်စေမလဲ…။ အဆုံးတွင်တော့ သူတို့က အရှုံးကလွဲ၍ ဘာမှရလိမ့်မည်မဟုတ်ပေ။ 

ညစာစားပွဲတွင် လူတိုင်းပျော်ရွှင်နေကြပြီး အရောင်းဌာန၏ ခေါင်းဆောင်က ဘေလ်ရှင်းရန်ပြင်သောအခါ ဈေးကွက်မြှင့်တင်ရေးဌာနမှ လူများ၏ တားဆီးခြင်းကိုခံလိုက်ရသည်။ 

“ဒုက္ခမခံပါနဲ့…ဒါရိုက်တာဝေ့က ငါတို့ညစာသွားစားတာကို တာဝန်ယူပေးမယ်လို့ ပြောလိုက်တယ်…ဒါက အရောင်းဌာနနဲ့ ဈေးကွက်မြှင့်တင်ရေးဌာတို့ တရားဝင် တစ်မိသားစုတည်းဖြစ်လာတာကြောင့် အောင်ပွဲခံတာလို့လည်းပြောလိုက်တယ်” ပြောလာသူက လုဝေ့ဖြစ်၏။ သူက နည်းနည်းသောက်ထားသောကြောင့် အနည်းငယ် ဝေဝေဝါးဝါးဖြစ်နေသော်လည်း အသိစိတ်ကတော့ ရှင်းရှင်းလင်းလင်းရှိနေသေးသည်။ သူက ဝေ့ချန်အား ကိုးကွယ်ရလောက်သည်အထိ လေးစားသည်။ 

ဝေ့ချန်က သူတို့အား အရောင်းဌာနနှင့် ညစာသွားစားရလိမ့်မည်ဟုပင် ခန့်မှန်းခဲ့၏။ သူက လုဝေ့အကောင့်ထဲသို့ ပိုက်ဆံလွှဲပေးလိုက်ပြီး ညစာအတွက် ရှင်းပေးရန်ပြောခဲ့သည်။ ပမာဏက အကန့်အသတ်မရှိကာ ပိုက်ဆံစိုက်ပေးလိုက်ရလျှင်တောင် ဝေ့ချန်ဆီသို့ နောက်ပိုင်းတွင် ပြန်တောင်းနိုင်သေးသည်။ 

ညစာစားပွဲပြီးနောက် အရောင်းဌာန၏ ဝေ့ချန်နှင့် ဈေးကွက်မြှင့်တင်ရေးဌာနများအပေါ် တွန်းကန်မှုများက လုံးဝပျောက်ကွယ်သွားတော့သည်။ ထိုကဲ့သို့ ရလဒ်များ ရရှိခဲ့ခြင်းက ဝေ့ချန်၏ ထိုးထွင်းသိမြင်မှုများကြောင့်ဖြစ်သော်လည်း ဤရလဒ်အား အမှန်တကယ် ယူဆောင်ပေးခဲ့သည်ကတော့ လုဝေ့၏ နှုတ်ရည်နှုတ်သွေးနှင့် ခံစားချက်ပိုင်းဆိုင်ရာအသိဉာဏ်မြင့်မားမှုများကြောင့်ပင်။

သူတို့က အရောင်းဌာနမှလူများနှင့် လျင်မြန်စွာ ပေါင်းစည်းနိုင်ခဲ့သည်သာမက စကားပြောရင်း စနောက်ကြသည့်ကြားတွင် အရောင်းဌာန၏ ဈေးကွက်မြှင့်တင်ရေးဌာနနှင့် ဝေ့ချန်အပေါ်ရှိနေသည့် အတွေးအမြင်များကိုလည်း ပြောင်းလဲနိုင်ခဲ့သည်။ သူတို့က အောင်မြင်စွာနှင့် အရောင်းဌာန၏ နှလုံးသားများကို သိမ်းပိုက်နိုင်ခဲ့သည်။ 

ထို့ကြောင့် နောက်တစ်နေ့တွင် လုဝေ့ကုမ္ပဏီသို့လာသောအခါ ဝေ့ချန်ကိုလုပ်ကြသလိုပင် ဈေးကွက်မြှင့်တင်ရေးဌာနမှလူများက သူ့ကိုဝိုင်းဝန်း ဂုဏ်ပြုကြပြီး စာအိတ်နီများပင် တောင်းလာကြသည်။ 

လုဝေ့မှာ ပထမတွင် ရှုပ်ထွေးနေသောကြောင့် ကွန်ပျူတာကိုဖွင့်၍ ဝန်ထမ်းရွှေ့ပြောင်းရေးကြေညာစာကိုတွေ့သောအခါ နောက်ဆုံးတော့ သူက လက်ထောက်ဆိုသည့် ဦးထုပ်ကိုချွတ်ရပြီဖြစ်ကြောင်း သဘောပေါက်သွား၍ ရုံးခန်းထဲတွင် အော်ဟစ်ဂုဏ်ယူနေတော့သည်။ ထို့နောက် သူက ဝေ့ချန်၏ စတိုင်ကိုလိုက်၍ အုပ်စုဖွဲ့စကားပြောခန်းထဲတွင် စာအိတ်နီများ ဝေပေးလိုက်သေးသည်။ 

သူကတော့ ဝေ့ချန်လောက် အသုံးမများပေ။ သူ၏စာအိတ်နီကတော့ ကံအပေါ်အခြေခံထားခြင်းဖြစ်ပြီး အခုတစ်ရာလောက်ခွဲထားသောကြောင့် စာအိတ်နီကိုရသည့်လူများနှင့် မရသည့်သူများက လုဝေ့ကို ကပ်စေးနှဲခြင်းအတွက် စနောက်ကြတော့သည်။

💘