Chapter 105

💘Chapter 105 

ပထမဆုံးရွှေအိုး 

ဝေ့ချန်၏ ရာထူးတိုးသွားခြင်းက ကိစ္စတစ်ခုအဖြစ် လူတော်တော်များများ၏ ထင်မြင်ခြင်းခံနေရသည်။ သူက ငယ်ရွယ်သော်လည်း သူ့နည်လမ်းများက ထူးချွန်ပြီး အတွေးအမြင်များက ထူးခြားကာ ခေါင်းဆောင်နိုင်စွမ်းများက ချန်ဖုန်းအုပ်စုတစ်ခုလုံးကို သတိထားမိသွားစေ၏။ 

ဈေးကွက်မြှင့်တင်ရေးနှင့် အရောင်းဌာနတို့ ပေါင်းစည်းလိုက်သည့်အခါ လူအများစုက ဝေ့ချန်၏ ကျဆုံးခြင်းကို တွေ့မြင်လိုကြသည်။ မူလတွင် ရာထူးများက တန်းတူဖြစ်သော်လည်း ရုတ်တရက် သူတို့က လွှမ်းမိုးခံလိုက်ရသည်။ မည်သူ့အတွက်မဆို ၎င်းက လက်ခံရန်ခက်ခဲလိမ့်မည်ပင်။ ထို့ကြောင့် အချို့လူများက ဝေ့ချန်အား အရောင်းဌာနနှင့် ပဋိပက္ခဖြစ်ရန်စောင့်ဆိုင်းနေကြပြီး ဈေးကွက်မြှင့်တင်ရေးဌာန၏ ဒါရိုက်တာဖြစ်ရသည်က လွယ်ကူသည့်တာဝန်တစ်ခုမဟုတ်ကြောင်း ပြသချင်ကြသည်။ 

ဈေးကွက်မြှင့်တင်ရေးနှင့် အရောင်းဌာနတို့ ပေါင်းစည်းခဲ့သည်မှာ တစ်ပတ်ရှိသွားပြီဖြစ်သော်လည်း ပဋိပက္ခများကို တွေ့မြင်ရမည့်အစား ဌာနနှစ်ခုက လိုက်ဖက်ညီစွာဖြင့် သေချာပူးပေါင်းနေသည်ကိုသာ တွေ့လိုက်ရသည်။ တစ်ပတ်တည်းနှင့်တင် ဌာနနှစ်ခုမှ လူများက သေချာအသားကျသွားကာ ကောင်းမွန်သည့်နားလည်မှုဖြင့် ပူးပေါင်းလုပ်ဆောင်ကြသည်။ အခြားသူများသာ ကိစ္စများကိုမသိကြလျှင် သူတို့အား ယခင်တည်းက ဌာနတစ်ခုတည်းဟု ထင်ကြလိမ့်မည်ပင်။ 

ဤရလဒ်က အံ့ဩစရာကောင်းခဲ့၏။ အံ့ဩသွားကြပြီးနောက်တွင် လူတိုင်းက ဝေ့ချန်အား ပိုမြင့်သည့်လေးစားမှုများရှိသွားကြတော့သည်။ ဤအသက်နှစ်ဆယ်အစောပိုင်းတွင် ရှိနေသည့် လူငယ်လေးအား အထင်မသေးရဲကြတော့ပေ။ 

အတွေအကြုံအရဆိုလျှင် ဝေ့ချန်က သူတို့နှင့် မယှဥ်နိုင်သော်လည်း လုပ်နိုင်စွမ်းများကတော့ ဝေ့ချန်က သူတို့ထက် ပို၍စွမ်းဆောင်နိုင်ခဲ့သည်ကို ဝန်ခံရမည်ပင်။ 

ဌာနနှစ်ခုကို အောင်မြင်စွာ ပေါင်းစည်းခဲ့ပြီးနောက်တွင် ဝေ့ချန်၏ အလုပ်က လမ်းကြောင်းပေါ်သို့ ပြန်ရောက်လာခဲ့သည်။ ဌာနပေါင်းစည်းပြီးတစ်လအကြာတွင် ချန်ဖုန်းအုပ်စု၏ သုံးလပတ်အတွက် စွမ်းဆောင်ရည်များမှာ သုံးရာခိုင်နှုန်းတိုးလာခဲ့သည်။

လွန်ခဲ့သည့် သုံးဆယ်ရာခိုင်နှုန်းနှင့်ယှဥ်လျှင် ဤတိုးတက်လာမှုက လုံးဝမသိသာချေ။ သို့သော်လည်း အစပိုင်း သုံးဆယ်ရာခိုင်နှုန်းက ထူးခြားသည့်နည်းလမ်းများဖြင့် ရယူခဲ့ကြောင်းနှင့် လတိုင်း ထိုကဲ့သို့ ရလဒ်ကို ရနိုင်လိမ့်မည်မဟုတ်ကြောင်းကို လူတိုင်းသိကြသည်။ 

ချန်ဖုန်းအုပ်စုကဲ့သို့ ကုမ္ပဏီကတော့ လုပ်ဆောင်ချက်များတွင် တိုးလာသည့် တစ်ရာခိုင်နှုန်းတိုင်းက မီလီယံအပြင် ဘီလီယံချီသည့် အကျိုးအမြတ်များကပိုယူဆောင်လာပေး၏။ အတိတ်တွင် လတိုင်း၌ တစ်ရာခိုင်နှုန်းစီ တိုးလာရန်က ကုမ္ပဏီတစ်ခုလုံး၏ အားထုတ်မှုလိုအပ်ခဲ့ပြီး တစ်ခါတရံတွင် အချိန်ပိုများပင်ဆင်းခဲ့ရသည်။ လုပ်ဆောင်ချက်ကတိုးလာသည်နှင့်အမျှ ဝန်ထမ်းများ၏ အားအင်များလည်း ဆုံးရှုံးရသည်။ 

ဌာနနှစ်ခု ပူးပေါင်းလိုက်ပြီးနောက် ဌာနနှစ်ခုကြားတွင် ပူးပေါင်းမှုကိုအသားကျရန်နှင့် ပြောင်းလဲမှုများကို ဝေ့ချန်က ရက်အနည်းငယ်ဖြင့်သာ ချောမွေ့စေခဲ့သည်။ ယခုလတွင် သူတို့က ပင်ပင်ပန်းပန်း မကြိုးစားခဲ့ရဘဲနှင့် လုပ်ဆောင်ချက်အား သုံးရာခိုင်နှုန်းအထိ တိုးမြှင့်နိုင်လိုက်၏။ ဩချလောက်စရာကောင်းသည်က ဤသုံးရာခိုင်နှုန်းတိုးလာခြင်းက လင်ရှင်းထားသွားခဲ့သည့် အရှုပ်များကြား၌ ရရှိခဲ့ခြင်းပင်။ တစ်နည်းဆိုရလျှင် ဝေ့ချန်သာ ဈေးကွက်မြှင့်တင်ရေးဌာနအား တိုက်ရိုက် ဦးဆောင်ပါက ဤသုံးလပတ်၏ တိုးတက်မှုမှာ သုံးရာခိုင်နှုန်းထက်ပိုနေနိုင်သည်။ 

ယခုတွင် ဝေ့ချန်၏ အရည်အချင်းများက ချန်ဖုန်းအုပ်စုအတွင်းတွင် သေချာအသိအမှတ်ပြုခံရ၏။ ဝေ့ချန်အပေါ် သံသယများရှိပြီး ဥက္ကဌရှန့်၏ ဆုံးဖြတ်ချက်ကို မကျေနပ်ခဲ့ကြသည့် ဘုတ်အဖွဲ့ဝင်များက ဤရလဒ်များကိုမြင်ပြီးနောက် တိတ်ဆိတ်နေကြတော့သည်။ သူတို့က ဝေ့ချန်ကို စတင်၍ အထင်ကြီးလာကြလေသည်။ 

စီးပွားရေးလုပ်ငန်းရှင်များက အကျိုးအမြတ်ကိုသာ ဦးစားပေးကြပြီး အကျိုးအမြတ်ရယူနိုင်သည့်သူများကို သူတို့ကိုယ်တိုင်ဖြစ်သည်ဟု ယူဆကြသည်။ 

ဝေ့ချန်၏ အလုပ်အကိုင်လမ်းကြောင်းက ပြေပြစ်နေချိန်တွင် ချန်လီလည်း ကောင်းကောင်းလုပ်နေ၏။ သူ၏ ပထမဆုံးဝင်ငွေကိုရရှိကာ ၎င်းက မီလီယံပင်ချီနေလေပြီ။ 

ကျူးကောယွီက ချန်လီက တကယ်ဂရုစိုက်၏။ ထိုနေ့က စတူဒီယိုထဲတွင် ချန်လီက သူ့အား “ဆရာ” ဟု ခေါ်သည်ကို ကြားလိုက်သောအခါ ဘဝကုန်ဆုံးတော့မည့် ကျူးကောယွီမှာ ကလေးတစ်ယောက်ကဲ့သို့ မျက်ရည်များကျလာတော့သည်။ ၎င်းက ချန်လီအား အနည်းငယ် တုန်လှုပ်သွားစေသည်။ 

ကံကြမ္မာဆိုသည့်အရာက တကယ်ကိုထူးဆန်းသည်ပင်။ ကျူးကောယွီက ချန်လီ၏လက်ရာကို မြင်လိုက်သည့်အချိန်မှစ၍ ဤကလေးအား သူ့အတောင်အောက်သို့ခေါ်၍ ကိုယ်တိုင်လမ်းပြပေးမည်ဟု ဆုံးဖြတ်ခဲ့သည်။ 

အကြိမ်များစွာ တွေ့ဆုံပြီးနောက် ကျူးကောယွီမှာ ချန်လီ၏အခြေအနေကို အကြမ်းဖျင်းနားလည်လာခဲ့ပြီး သူ့အပေါ် ကရုဏာနှင့် ကာကွယ်ပေးချင်စိတ်များ ဖြစ်ပေါ်လာခဲ့သည်။

ချန်လီအား သူ့တပည့်အဖြစ် ရယူသည့်လုပ်ငန်းစဥ်က မလွယ်ခဲ့ဟုဆိုနိုင်သည်။ သို့သော်လည်း သူ့ဆန္ဒက နောက်ဆုံးတွင် ပြည့်ဝသွားခဲ့ကာ ကျူးကောယွီ စိတ်လှုပ်ရှားမှုများဖြင့် ပြည့်ခဲ့ရသည်။ ထို စိတ်လှုပ်ရှားရသည့် ခံစားချက်က သူကိုယ်ပိုင်လက်ရာများ ပထမဆုံးအကြိမ်အဖြစ် နိုင်ငံတကာပြိုင်ပွဲတွင် နိုင်သွားသည့်အချိန်က ခံစားချက်နှင့် ဆင်တူ၏။

ထိုအချိန်မှစ၍ ကျူးကောယွီက ချန်လီအား သူ့သားအရင်းကဲ့သို့ ဆက်ဆံပေးသည်။ ချန်လီအား သာမန်ဘဝတွင် နေထိုင်နိုင်ရန် အခြားသူများထက် ကျူးကောယွီ ပိုမျှော်လင့်မိ၏။ ချန်လီအား ထိုအမှောင်ထုထဲမှ ထွက်လာနိုင်ရန်လည်း မျှော်လင့်မိသည်။ ချန်လီ၏ပန်းချီဆွဲသည့် ပါရမီနှင့်ဆိုလျှင် ဖော်ပြနိုင်သည့် အနုပညာအကြောင်းအရာများမှာ မှောင်မိုက်ခြင်းနှင့် ကြောက်ရွံ့ခြင်းများသာမဟုတ်ဘဲ ချန်လီစူးစမ်းလေ့လာနိုင်သည့် နောက်ထပ် စိတ်ခံစားချက်များစွာ ရှိနေကြောင်း ကျူးကောယွီ ယုံကြည်သည်။

ထို့ကြောင့် ကျူးကောယွီက ချန်လီ၏ “ဆရာ”ဆိုသည့် အက်ရှရှအသံကိုကြားသောအခါ စိတ်လှုပ်ရှားစွာဖြင့် စတူဒီယိုထဲတွင် လျှောက်ပတ်နေမိသည်။ သူကချက်ချင်း ကျူးကောဖုန်းကို ဖုန်းဆက်၍ နာရီဝက်လောက်ကြာအောင် ကြွားလုံးထုတ်လိုက်၏။ သူ့အသံက ခံစားချက်များဖြင့်ပင် ပြည့်နေ၏။

ကျူးကောယွီက တကယ်ကို ချန်လီအား သူ့သားအရင်းကဲ့သို့ ဆက်ဆံကာ အချစ်များကိုလည်းထုတ်ပြတတ်သည်။ ရလဒ်အနေနှင့် ချန်လီက ပျော်ရွှင်မှုနှင့် ဂုဏ်ယူမှုများကိုယူလာလေသည်။

တစ်နေ့တင် ကျူးကောယွီက လှုံ့ဆော်မှုခံစားရပြီး ချန်လီ၏ သဘောတူညီချက်ကိုရယူကာ သူ့၏လက်ရာတစ်ခုအား သူ့သူငယ်ချင်း၏ အနုပညာခန်းတွင် ပြသထားခဲ့သည်။ 

အံ့ဩစရာကောင်းသည်က တစ်ပတ်အတွင်းတွင် ကျူးကောယွီက သူ့သူငယ်ချင်းများထံမှ ဖုန်းခေါ်ဆိုမှု အများအပြားများ လက်ခံရရှိပြီး ပန်းချီကားကို ‌ရောင်းရန်ရှိလားဟု မေးလာကြသည်။ လူများစွာက ထိုပန်းချီလက်ရာကို ဝယ်ယူချင်သည့် ဆန္ဒများကို ဖော်ပြလာကြသည်။ 

ကျူးကောယွီက ချက်ချင်း ငြင်းလည်းမငြင်းသလို၊ လက်လည်းလက်မခံနိုင်ပေ။ ပန်းချီကားက ချန်လီပိုင်သောကြောင့် သူက သေချာပေါက် ချန်လီ၏အတွေးကိုလည်း စဥ်းစားရန်လိုအပ်သည်။ အကယ်၍ ချန်လီသာ ပန်းချီကားကို ရောင်းရန် ဆန္ဒရှိပါက ကျူးကောယွီ ငြင်းဆိုလိမ့်မည်မဟုတ်ပေ။ 

ကျူးကောယွီက ထိုအကြောင်း ချန်လီအားပြောပြသည့်အခါ ချန်လီက ခေါင်းလေးစောင်း၍ ကျူးကောယွီအား ရှုပ်ထွေးမှုအချို့ဖြင့် ကြည့်လာ၏။

“ချန်လီ...သူတို့ကမင်းရဲ့ လက်ရာကို အသိအမှတ်ပြုပြီး ကြိုက်ကြတယ်...ပြီးတော့ မင်းရဲ့ပန်းချီကားက သူတို့စုဆောင်းချင်တဲ့ တန်ဖိုးမျိုးရှိတယ်လို့ ယုံနေကြတယ်...အဲ့ဒီ့အပြင် ပန်းချီဆရာတွေအနေနဲ့ ငါတို့က ငါတို့ကိုယ်ငါတို့ ဒီကမ္ဘာကြီးကနေ အပြည့်အဝ ဖယ်ရှားမထားကြဘူး...ပိုက်ဆံရှာဖို့လည်းလိုပြီး ငါတို့လက်ရာတွေရဲ့ တန်ဖိုးတွေကို နည်းအမျိုးမျိုးနဲ့ သက်သေပြကြရတယ်...အိပ်မက်ဖလားက ငါတို့ရဲ့ တန်ဖိုးကိုပြနိုင်တဲ့ နည်းလမ်းတစ်ခုပဲ...လူတွေအများကြီးက ငါတို့ရဲ့လက်ရာတွေကို ဈေးအမြင့်ကြီးတွေပေးပြီး ဝယ်ယူကြလိမ့်မယ်...ဒါပေမယ့် အဲ့ဒီ့ ဈေးနဲ့ တန်ဖိုးဆိုတာက အဓိပ္ပာယ်မတူဘူးဆိုတာ သိထားရမယ်...ပိုက်ဆံအတွက်နဲ့ ငါတို့က ငါတို့ရဲ့တန်ဖိုးကို လျှော့ချပစ်စရာမလိုဘူး”

ကျူးကောယွီက သူ့စကားလုံးများအား စိတ်ရင်းမှန်များဖြင့် ဖော်ပြလိုက်သည်။ သူက ချန်လီ၏ပန်းချီကားများကို သူ့သူငယ်ချင်း၏ ပန်းချီပြခန်းသို့ ယူသွားပြီး ချန်လီကိုလည်း အိပ်မက်ဖလားတွင် ဝင်ပြိုင်စေချင်သည်က ချန်လီ၏တည်ရှိမှုအတွက် တန်ဖိုးတစ်ခု ဖန်တီးပေးရန်ဆိုသည့် ဤရည်ရွယ်ချက်ကြောင့်ဖြစ်သည်။

သူက အနာဂတ်ကိုမခန့်မှန်းနိုင်သလို ဝေ့ချန်၏အကျင့်စရိုက်ကိုလည်း အာမမခံနိုင်ချေ။ ဝေ့ချန်က ယခုတွင် ချန်လီကို မြတ်မြတ်နိုးနိုး ချစ်ပြနေပြီး ချန်လီ့အပေါ်တွင်သာ သူ့နှလုံးသားတစ်ခုပေးအပ်ထားသော်လည်း အနာဂတ်တွင် မည်သို့ဖြစ်လာကို မည်သူမှမသိချေ။ 

မခန့်မှန်းနိုင်သည့် အနာဂတ်တွင် ကျူးကောယွီက အရာအားလုံးက ပျက်ဆီးလွယ်သည်ဟုသာ ယူဆသည်။ ချန်လီ၏ဘဝတစ်ခုလုံးအား မသေချာမ‌ရေရာသည့် အနာဂတ်တစ်ခုကို လွှဲအပ်မည့်အစား ချန်လီအား တန်ဖိုးရှိသည့်ဘဝတစ်ခုတွင် နေထိုင်ရန် လုပ်ကိုင်ပေးပြီး ဝေ့ချန်အတွက်သေးနုပ်နေသည့်အရာတစ်ခု မဖြစ်စေခြင်းက ပိုကောင်းလိမ့်မည်။ အနာဂတ်၌ သူတို့နှစ်ယောက်ကြားတွင် မမျှော်လင့်သည့်ဖြစ်ရပ်များ ဖြစ်လာပါက အနည်းဆုံးတော့ ချန်လီသည် ဝေ့ချန်နှင့်အတူမရှိသောကြောင့် ဘဝတွင်မရပ်တည်နိုင်သည်မျိုး ရှိလိမ့်မည်မဟုတ်ပေ။ 

ကျူးကောယွီက ချန်လီနှင့် ဝေ့ချန်တို့၏ ဆက်ဆံရေးကို အထင်သေးသည်မျိုးမဟုတ်ချေ။ သူက အချစ်မြူခိုးထဲတွင် နစ်မြုပ်သည့် အတွေ့အကြုံသိပ်မရှိသော လေ့လာသူတစ်ယောက်သာဖြစ်သည်။ ထို့ကြောင့် သဘာဝကျစွာပင် သူက ပို၍ ရှင်းရှင်းလင်းလင်းမြင်နိုင်ပြီး ရေရှည်ကိုပိုတွေးနိုင်သည်။

သူက ဝေ့ချန်နှင့် ချန်လီတို့ ကြာရှည်သည့်ဆက်ဆံရေးမျိုး ရှိသွားရန်မျှော်လင့်မိ၏။ သို့သော်လည်း ထိုကဲ့သို့ ရှည်ကြာသည့် ဆက်ဆံရေးက ဝေ့ချန်တစ်ယောက်တည်း မထိန်းသိမ်းနိုင်ချေ။ ချန်လီလည်း အရွယ်ရောက်လာပြီး သူတို့အနာဂတ်၏ အ‌ထောက်အပံ့အလွှာအဖြစ် တစ်ခုခုအောင်မြင်ရရှိထားရန်လိုအပ်သည်။

ချန်လီက ကျူးကောယွီ၏ စကားများကြောင့် ရှုပ်ထွေးနေပြီး သူ့ကိုယ်ပိုင်တန်ဖိုးကို နားမလည်ချေ။ ချန်လီ၏စိတ်ထဲတွင် ချန်မိသားစုမှ ကိစ္စများကြောင့် သူ့ကိုယ်သူ တန်ဖိုးမဲ့သလို ခံစားနေရတာဖြစ်နိုင်သည်။ 

သိမ်ငယ်သည့်စိတ်ခံစားချက်ကို သူနားမလည်နိုင်သော်လည်း ထိုသိမ်ငယ်မှုမျိုးစေ့က ချန်လီ၏ နှလုံးသားတွင် အမြစ်တွယ်နေပြီးဖြစ်သည်။ အကယ်၍ ကျူးကောယွီသာ ချန်လီအား သူ့ဘဝထဲတွင် တန်ဖိုးဖန်တီးမပေးပါက အနာဂတ်တွင် ဝေ့ချန်က အမြင့်သို့ မြင့်သထက်မြင့်အောက်တက်သွားချိန်၌ ဝေ့ချန်က မည်မျှပဲ ချန်လီအား ချစ်ခင်နှစ်သက်မှု၊ မြတ်နိုးမှုများနှင့် ဆက်လက်ဆက်ဆံနေပါစေ၊ ထိုနက်ရှိုင်းစွာအမြစ်တွယ်နေသည့် သိမ်ငယ်မှုမျိုးစေ့လေးက အညှောက်ထွက်လာလိမ့်မည်။ ထိုအချိန်တွင် ခံစားရမည့်သူမှာ ချန်လီသာဖြစ်လိမ့်မည်။ 

အချစ်က လူနှစ်ယောက်တန်းတူညီနေခြင်း သို့မဟုတ် တူညီသည့်နောက်ခံမှဆင်းသက်လာခြင်းမျိုး မဟုတ်ပေ။ သို့သော်လည်း ခိုင်ခံ့သည့်အုတ်မြစ်တော့ တည်ဆောက်ထားရန်လိုအပ်၏။ လက်ရှိတွင် အခြေခံအုတ်မြစ်က ပျောက်ဆုံးနေကာ ခိုင်ခံ့သည့်အုတ်မြစ်မရှိသည့် အိမ်တစ်လုံးနှင့်တူနေသည်။ အစပိုင်းတွင် လှပသည့်အိမ်တစ်လုံးတည်ဆောက်နိုင်သော်လည်း အိမ်ကကြီးလာသည်နှင့်အမျှ အုတ်မြစ်က နောက်ဆုံးတွင် ယိုင်နဲ့ကာ ပြိုလဲသွားလိမ့်မည်။ 

ကျူးကောယွီက ထိုကိစ္စများကို ချန်လီနှင့်ဆွေးနွေးလိမ့်မည်မဟုတ်ချေ။ ဝေ့ချန်လည်း ထိုကိစ္စများအား ချန်လီကို သိစေချင်လိမ့်မည်မဟုတ်မှန်း ကျူးကောယွီသိသည်။ ဝေ့ချန်၏အမြင်တွင် ချန်လီအား ပြင်ပလောက၏ မုန်တိုင်းများအားလုံးမှ ကာကွယ်ပေးသည့် ပတ်ဝန်းကျင်တစ်ခု တည်ဆောက်ပေးချင်နေ၏။ ကျူးကောယွီ ဝေ့ချန်၏အမြင်ကို လေးစားသော်လည်း ဘဝတစ်ဝက်လောက်နေလာခဲ့သည့် သူတစ်ယောက်အနေနှင့် ဘဝက နတ်သမီးပုံပြင်ကဲ့သို့ မဟုတ်မှန်း ကျူးကောယွီ သေချာသိသည်။ ဝေ့ချန်က တစ်နှစ်၊ ဆယ်နှစ် တောင့်ခံနိုင်သော်လည်း ဘဝတစ်သက်တော့ တောင့်ခံနိုင်မည်လား…။ ပင်ပန်းငြီးငွေ့လာသည့်အချိန်မျိုး ရှိလာနိုင်သည်ပင်။

ကျူးကောယွီလည်း ချန်လီအား ထိုလုံခြုံသည့် ပတ်ဝန်းကျင်တွင် ကောင်းစွာရှင်သန်နေစေချင်သော်လည်း ထိုမတိုင်ခင် ချန်လီ သန်မာလာစေရန်မျှော်လင့်မိသည်။ ဝေ့ချန်က အပြင်ရောက်နေပြီး မုန်တိုင်းဒဏ်ခံရ၍ ပင်ပန်းနွမ်းနယ်သည့်အရိပ်အယောင်များပြလာသည့်အခါ ဝေ့ချန်မှီခိုနားနေနိုင်ရန် ချန်လီတွင် သန်မာသည့်ပခုံးတစ်ဖက်ရှိလာစေချင်သည်။ 

အချစ်က ပြင်းပြပြီး မဆင်မခြင်နိုင်သောကြောင့် တစ်ယောက်က အခြားတစ်ယောက်အတွက် အခက်အခဲနှင့် ကြမ်းတမ်းမှုများကို သည်းခံပေးကာ အရာအားလုံးစွန့်လွှတ်နိုင်လိမ့်မည်။ သို့သော်လည်း ဘဝနှင့် အိမ်ထောင်ရေးက ဘဝတစ်သက်သာ တစ်ယောက်ကိုတစ်ယောက် အဖော်ပြုနိုင်ရန် အပြန်အလှန်ထောက်ပံ့မှု လိုအပ်၏။ 

ချန်လီက ကျူးကောယွီပြောသည့် တန်ဖိုးကို သေချာနားမလည်သေးသော်လည်း စိတ်ထဲတွင် အကြံသေးသေးလေး ရှိနေသည်။ ထိုအကြံကြောင့်ပင် အိပ်မက်ဖလားကို ဝင်ပြိုင်ရန် သဘောတူခဲ့ကာ ထိုအကြံကြောင့်ပဲ ကျူးကောယွီက သူ့ပန်းချီကားများကို ရောင်းနိုင်လားဟု မေးလာသည့်အခါ ချန်လီခေါင်းညိတ်လိုက်သည်။ 

တစ်ခါက ကျူးကောယွီ သူ့ကိုပြောခဲ့ဖူးသည့် စကားတစ်ခွန်းရှိ၏။ သူအရွယ်ရောက်ကြီးပြင်းပြီး သန်မာလာမှသာ သူနှင့် ဝေ့ချန်က စိတ်ပူပန်မှုများမရှိဘဲ ထာဝရအတူရှိသွားနိုင်မှာဖြစ်သည်။ 

ပြခန်းပိုင်ရှင်က ကျူးကောယွီ၏ တုံ့ပြန်ချက်ကိုရသောအခါ ချက်ချင်း ချန်လီ၏ပန်းချီကားကို ဝယ်ယူနေချင်သူများအား ဆက်သွယ်လိုက်ပသည်။ ပြခန်းပိုင်ရှင်က ဤနယ်ပယ်တွင် အတွေ့အကြုံရှိပြီး တန်ဖိုးကို ဘယ်လိုတိုးမြှင့်ရမလဲ သေချာသိသည်။ သူ့တွင် ကိုယ်ပိုင်နည်းလမ်းများရှိ၏။

သုံးရက်ကြာပြီးနောက် ပြခန်းပိုင်ရှင်က ဂဏာန်းခုနစ်လုံး ပမာဏရှိသည့် ပိုက်ဆံစုစုပေါင်းကို ကျူးကောယွီဆီသို့ လွှဲပေးလိုက်သည်။ ပြခန်းကော်မရှင်ခကိုနုတ်ပြီးသည်နှင့် အားလုံးက ချန်လီရရှိမည့်ပမာဏပင်။

ပိုက်ဆံပမာဏကိုကြည့်ရင်း ကျူးကောယွီ အံ့ဩသွား၏။ ယခုခေတ်တွင် နာမည်ကြီးလူသိများသည့် ပန်းချီဆရာများတောင် သူတို့၏ ပန်းချီကားများအား ဤဈေးနှင့် မရောင်းနိုင်ကြချေ။ ချန်လီကတော့ နာမည်ကြီးဖို့မပြောနှင့်၊ ယခင်က ဈေးကွက်ထဲတွင် သူ့ပန်းချီကားများအား တင်ဖူးသည်တောင်မရှိချေ။ ဘယ်လိုလုပ် ဂဏာန်းခုနစ်လုံးပမာဏနဲ့တောင် ရောင်းထွက်သွားရတာလဲ…။ ကျူးကောယွီ ယုံကြည်ရန် ခက်ခဲနေ၏။

“ငါလည်း အံ့ဩသွားတာ…ဒါပေမယ့် ဒီလူတွေက မင်းတပည့်ရဲ့ ပန်းချီကားကို တကယ်ကြိုက်ကြတာကွ…သူတို့က အဆက်မပြတ်ငြင်းခုံကြရင်း လေလံဈေးကို တောက်လျှောက် တင်နေခဲ့ကြတယ်လေ…ဒါတောင် မင်းတပည့်က လူသိမများသေးဘူးနော်…အဲ့ဒီပန်းချီကားက ကျူးကောယွီရဲ့ တပည့်ဆွဲထားတာလို့တောင် ငါတစ်ခွန်းမှမဟခဲ့ရဘူး” 

ကျူးကောယွီနှင့် ပြခန်းပိုင်ရှင်တို့ မည်မျှ မယုံနိုင်ဖြစ်‌နေစေကာမူ ချန်လီ၏ပန်းချီကားက ရောင်းထွက်သွားရုံသာမက ဈေးနှုန်းကြီးမြင့်စွာဖြင့် ရောင်းထွက်သွားသည်ကတော့ အမှန်ပင်ဖြစ်လေသည်။

💘