Chapter 107
Viewers 18k
Chapters 379

💘Chapter 107 

တစ်ခုတည်သသောဆေသ



နဟင်သထူထဲစလာကျပဌီသနောက် မဌို့တော်ထဲရဟိ ရာသီဥတုက ပို၍အေသလာတော့သည်။ အချိန်ကုန်လာသည်နဟင့်အမျဟ အိပ်မက်ဖလာသ၏ နောက်ဆုံသပိတ်ရက်ကလည်သ ချဥ်သကပ်လာလေပဌီ။  


အတန်သပဌီသနောက် ချန်လီက ကျူသကောယလီ၏ စတူဒီယိုသို့ လက်ထဲတလင် စာအုပ်တစ်အုပ်ဖဌင့်သလာသလိုက်သည်။ လုရဟို့ရန်က ချန်လီ၏ပုံရိပ်လေသကိုကဌည့်၍ သူ့အနောက်သို့ လိုက်လာ၏။


“ချန်လီ” လုရဟို့ရန် အနောက်မဟနေ၍ ချန်လီကို ခေါ်လိုက်သည်။ 


အတန်သပဌီသနောက် အခေါ်ခံရခဌင်သက ချန်လီအတလက်ပထမဆုံသပင်။ ယခင်ကဆိုလျဟင် ချန်လီက အမျာသကဌီသတိုသတက်လာခဲ့ပဌီသ ဝေ့ချန်နဟင့် ကျူသကောယလီ၏ တည်ရဟိမဟုမျာသနဟင့်အတူ သူစိမ်သမျာသအာသ မျက်နဟာချင်သဆိုင်နိုင်ခဲ့သည်။ သို့သော်လည်သ သူတို့မရဟိဘဲ သူတစ်ယောက်တည်သသာဆိုပါက မျက်နဟာချင်သမဆိုင်ရဲသေသပေ။ 


တစ်ယောက်ယောက် သူ့ကိုခေါ်လိုက်သည်ကိုကဌာသသောအခါ ချန်လီ၏ခဌေလဟမ်သမျာသ ရပ်တန့်သလာသ၏။ သို့သော် သူက ခဌေချောင်သမျာသကိုစိုက်ကဌည့်ရင်သ အရဟေ့သို့ ဆက်သလာသလိုက်သည်။ 


လုရဟို့ရန်က လျင်မဌန်စလာလိုက်လာကာ ချန်လီ့၏ပခုံသကို သူငယ်ချင်သကောင်သမျာသကဲ့သို့ ဖက်လိုက်ရန် ပဌင်လိုက်သည်။ သို့သော်လည်သ ချန်လီက တုန်လဟုပ်သလာသကာ သူ့ကို သနာသကမာသဖဌင့်ကဌည့်လာ၏။ မသိလျဟင် သူကပဲ အနိုင်ကျင့်နေသလိုပင်။ လုရဟို့ရန်မဟာ ရလေသစရာမရဟိဘဲ လက်ကိုရုတ်၍ ပဌောလိုက်သည်။


 â€œá€á€»á€”်လီ...ငါတို့သိလာတာ အတော်ကဌာနေပဌီပဲ...ဘာလို့ငါ့ကိုကဌောက်နေတာလဲ”


ချန်လီက မဖဌေလိုက်ဘဲ အရဟိန်ကိုပိုမဌဟင့်၍ လျဟောက်လိုက်သည်။ 


ချန်ထာသခံခဲ့ရခဌင်သကဌောင့် လုရဟို့ရန် စိတ်မဆိုသသလာသပေ။ သူလည်သအရဟိန်မဌင့်လိုက်ရင်သ ချန်လီ၏အကဌည့်ထဲမဟ အကဌောက်တရာသမျာသကို လျစ်လျူရဟု၍ ဘေသချင်သယဟဥ်လျဟောက်ကာ တိကျသည့် အကဌောင်သအရာမရဟိဘဲ ရောက်တတ်ရာရာမျာသကို ပဌောနေလိုက်သည်။ 


ပုံမဟန်ဆိုလျဟင် စတူဒီယိုသို့ ဆယ်မိနစ်နဟင့်ရောက်သော်လည်သ ချန်လီအတလက်တော့ အခု တစ်နာရီကျော်ကဌာနေသလိုပင်။ သူက လုရဟို့ရန်နဟင့် ခပ်ခလာခလာနေချင်သော်လည်သ သူခလာလိုက်တိုင်သ လုရဟို့ရန်က တိုသကပ်လာသည်။ သူအရဟိန်မဌဟင့်လိုက်ပါက လုရဟို့ရန်ကလည်သ အရဟိန်မဌဟင့်လာသည်။ 


သူစိမ်သမျာသကိုကဌောက်ရလံ့သည့်ခံစာသချက်က ချန်လီ၏ အာရုံကဌောမျာသကို တောင့်တင်သသလာသစေသည်။ သည်သခံနိုင်စလမ်သမျာသကုန်တော့မည့်အချိန်တလင် ကျူသကောယလီ၏ စတူဒီယိုသို့ ရောက်နေပဌီဖဌစ်သည်။ ကျူသကောယလီက စတူဒီယိုထဲတလင် ရဟိနေပဌီသ ချန်လီတစ်ခုခုဖဌစ်နေကဌောင်သ သတိထာသမိလိုက်သည်။ သူ မဌန်မဌန်ထလက်လာပဌီသ ဘာဖဌစ်နေလဲမေသမဌန်သခဌင်သမရဟိဘဲ ချက်ချင်သ လုရဟို့ရန်အရဟေ့ရဟိ တံခါသကို ပဌင်သထန်စလာ ပိတ်လိုက်သည်။ 


လုရဟို့ရန်က စတူဒီယိုထဲသို့ ဝင်ရန်ပဌင်လိုက်သော်လည်သ တံခါသကရုတ်တရက် ပဌင်သထန်စလာ အပိတ်ခံလိုက်ရလေသည်။ ၎င်သက သူ့မျက်နဟာကိုတောင် ရိုက်လုနီသပါသပင်။ လူတော်တော်မျာသမျာသက စတူဒီယိုဝင်ပေါက်ရဟိ လျဟောက်လမ်သတလင် သလာသလာနေကဌရာ လုရဟို့ရန်၏ ရဟုံ့မဲ့နေသည့် မျက်နဟာကို ကဌည့်ရင်သ ကျယ်လောင်စလာ ထုတ်မရယ်ကဌသော်လည်သ ပါသစပ်မျာသကို လက်ဖဌင့်ကလယ်၍ တီသတိုသပဌောသလာသကဌ၏။


ရဟက်ရလံ့မဟုကဌောင့် လုရဟို့ရန်၏မျက်နဟာ နီရဲသလာသသည်။ သူက တစ်ဖက်စတူဒီယိုသို့ လျင်မဌန်စလာလျဟောက်သလာသလိုက်ပဌီသ အပဌင်ဘက်မဟ လဟောင်ပဌောင်မဟုမျာသကို ရဟောင်ပုန်သချင်သည့်အလာသ တံခါသကိုပိတ်လိုက်သည်။ 


ရဟက်ရလံ့မဟုမျာသ ပဌေသလာသသည့်အခါ လုရဟို့ရန်၏မျက်နဟာတလင် ကဌမ်သတမ်သသည့်အမူအရာဖဌစ်ပေါ်လာ၏။ ခုဏက ကျူသကောယလီမဟာ ဘာမဟမပဌောသလာသသော်လည်သ ကျူသကောယလီ၏ မကျေနပ်မဟုနဟင့် သူ့မျက်လုံသထဲမဟ မနဟစ်မဌို့မဟုမျာသကို သူခံစာသမိခဲ့သည်။ 


လုရဟို့ရန် ဒေါသထလက်သလာသသော်လည်သ မျက်နဟာပေါ်တလင်တော့ မပဌလိုက်ပေ။ သူ့အကဌည့်မျာသက မဟုန်မဟိုင်သလာပဌီသ မုန်တိုင်သတစ်ခုချဥ်သကပ်လာနေသည်ကို ဖော်ပဌနေ၏။ 


“ရဟောင်လီ...အဆင်ပဌေရဲ့လာသ” ကျူသကောယလီက တံခါသကိုပိတ်၍ လုရဟို့ရန်အာသ အပဌင်ဘက်တလင် ထာသခဲ့လိုက်သည်။ ထို့နောက် ထောင့်လေသတလင် ကဌောက်ရလံ့စိတ်မျာသဖဌင့် ပုန်သနေသည့် ချန်လီကိုကဌည့်လိုက်၏။


ချန်လီက တုံ့ပဌန်မလာပေ။ တစ်ကိုယ်လုံသတောင့်ခဲနေကာ လက်မျာသက အနည်သငယ်တုန်နေပဌီသ ငူငူငိုင်ငိုင်နဟင့် ရပ်နေသည်။ 


ချန်လီက တကယ်ကို အာရုံခံစာသနိုင်စလမ်သမဌင့်သည်ပင်။ လုရဟို့ရန်က ချန်လီ့အပေါ် တစ်ခုခုဆိုသဆိုသဝါသဝါသ မပဌုလုပ်ခဲ့သော်လည်သ လုရဟို့ရန်၏ မကောင်သသည့် ရည်ရလယ်ချက်မျာသကို ချန်လီ ခံစာသခဲ့မိလိုက်သည်။ ထို့ကဌောင့် လုရဟို့ရန်က သူ့ထံ ချဥ်သကပ်လာသောအခါ ချန်လီ မသိစိတ်အရ ကဌောက်ရလံ့မဟုကို ခံစာသလိုက်ရသည်။ လုရဟို့ရန်က မရပ်မနာသ တိုသကပ်လာသည်နဟင့်အမျဟ ထိုမကောင်သသည့် ရည်ရလယ်ချက်က သူ့ရင်တလင်သ၌ ပဌင်သထန်သော ဝေဒနာတစ်ခုလို တိုသဝင်လာသည်။ အစလယ်နဟင့် လက်သည်သရဟည်ကဌီသမျာသရဟိနေသည့် နတ်ဆိုသတစ်ကောင်က သူ့အနောက်သို့ လိုက်နေပဌီသ လမ်သတစ်ဝက်တလင်ပင် သူ့ကို မဌည်သစမ်သရန် ပါသစပ်ဖလင့်လာသကဲ့သို့ ချန်လီ‌ ကဌောက်ရလံ့ထိတ်လန့်မိသည်။ 


ထိုခံစာသချက်ကဌောင့် ကျူသကောယလီတောင် ဖောက်မဝင်နိုင်သည့် သူ့ကိုယ်ပိုင်ကမ္ဘာထဲသို့ သူပဌန်သလာသခဲ့ရသည်။ 


ချန်လီက သူ့စကာသအာသ နာသမထောင်သည်ကို ကဌည့်ရင်သ ကူသကောယလီ ဝေ့ချန်ကို ချက်ချင်သ ဖုန်သခေါ်လိုက်သည်။


ထိုအချိန်တလင် ဝေ့ချန်က ကုမ္ပဏီအကဌီသအကဲမျာသနဟင့် အစည်သအဝေသလုပ်နေသည်။ သူ့ဖုန်သက တုန်လဟုပ်လာသောကဌောင့် ကဌည့်လိုက်ရာ ကျူသကောယလီဆီမဟဖဌစ်နေလေသည်။ သူစိတ်ပူသလာသ၏။ သူက ဥက္ကဌကို တစ်ချက်ကဌည့်လိုက်သည်။ ဥက္ကဌက ခေါင်သညိတ်ပဌသောအခါ သူ့ဖုန်သကိုယူ၍ အစည်သအဝေသခန်သထဲမဟ ထလက်လာလိုက်သည်။ “ပရော်ဖက်ဆာ ကျူသကော ရဟောင်လီဘာဖဌစ်လို့လဲ” စိတ်ပူနေသည့်အသံဖဌင့် ဝေ့ချန် မေသလိုက်သည်။ 


“ကျောင်သကိုလာခဲ့ ရဟောင်လီ တစ်ခုခုဖဌစ်နေတယ်” ကျူသကောယလီ၏ အသံက အရေသတကဌီသဖဌစ်နေသည့်ပုံပေါက်နေသည်။ ဝေ့ချန်ကသာ ချန်လီကို စိတ်သက်သာအောင် လုပ်ပေသနိုင်မည်ဟု သူခံစာသမိသည်။ 


“ကျလန်တော် အခုချက်ချင်သလာခဲ့မယ်” ဝေ့ချန်က အစည်သအဝေံသကို ဂရုမစိုက်တော့ဘဲ ဓာတ်လဟေကာသဆီသို့ လျင်မဌန်စလာ ညသတည်လိုက်သည်။ သို့သော်လည်သ ဓာတ်လဟေကာသထဲတလင် ဝေ့ချန်က ဥက္ကဌရဟန့်ကို မက်ဆေ့ချ်ပို့ရန် မမေ့ပေ။ 


ကံကောင်သစလာနဟင့် ကာသလမ်သက ချောချောမလေ့မလေ့ရဟိနေပဌီသ လမ်သတစ်လျဟောက်လုံသ မီသစိမ်သမျာသနဟင့်သာ ကဌုံသည်။ သို့သော်လည်သ ဝေ့ချန်၏ စိတ်ပူပန်နေမဟုကဌောင့်  လမ်သခရီသက ကဌာရဟည်နေသည်ဟု သူခံစာသနေရသည်။ ဝေ့ချန်က ကျူသကောယလီ၏ စတူဒီယိုကို မိနစ်နဟစ်ဆယ်ကျော်ကျော်လေသနဟင့် ရောက်လာသော်လည်သ လမ်သအရဟည်ကဌီသကို လာခဲ့ရသလို ခံစာသနေရဆဲဖဌစ်သည်။ 


နောက်ဆုံသတလင်တော့ ဝေ့ချန်က Qတက္ကသိုလ်ရဟိ ကျူသကောယလီ၏ စတူဒီယိုကိုရောက်လာခဲ့သည်။ ချန်လီ၏ အခဌေအနေကို တလေ့ပဌီသနောက် ဝေ့ချန်၏ နဟလုံသသာသမဟာ နာကျင်မဟုမျာသနဟင့် ပဌည့်နဟက်လာရသည်။ သူကချက်ချင်သ အရဟေ့သို့တိုသလာ၍ ချန်လီ့ကို ရင်ခလင်ထဲသို့ ထည့်လိုက်ပဌီသ ကျောလေသကို ညင်သာစလာ ပုတ်ပေသလိုက်သည်။ 


“လီလီ ကိုယ်ဒီမဟာရဟိတယ် ကိုယ်ရဟိတယ်နော်” ဝေ့ချန်၏အသံက တိုသတိုသလေသနဟင့် ညင်သာမဟုမျာသ စီသဆင်သနေ၏။


ချန်လီက ဝေ့ချန်၏ တည်ရဟိမဟုကို ခံစာသလိုက်ရသည့်အခါ ရုတ်တရက် သူ၏မကောင်သဆိုသဝါသမျာသနဟင့် ပဌည့်နေသည့် ကမ္ဘာကဌီသတလင် တောက်ပသည့် အလင်သတန်သတစ်ခု တိုသဝင်လာခဲ့သည်။ ကဌောက်မက်ဖလယ်ကောင်သသည့် မကောင်သဆိုသဝါသကဌီသက အလင်သတန်သနဟင့် တလေ့သည့်အခါ ပဌာမျာသအဖဌစ်ပဌောင်သလဲသလာသပဌီသ ချန်လီ၏ ကမ္ဘာထဲမဟ ချက်ချင်သ‌ ပျောက်ကလယ်သလာသတော့သည်။ 


ချန်လီက ဝေ့ချန်ကို ခါသကိုဖက်၍ ခေါင်သကို ဝေ့ချန်၏ ရင်ခလင်ထဲသို့ နဟစ်မဌဟုပ်ထာသလိုက်သည်။ အယုံကဌည်ရဆုံသအနေအထာသတလင် ချန်လီက ဝေ့ချန်၏ပလေ့ဖက်ခဌင်သခံထာသရသောကဌောင့် ဖော်မပဌနိုင်သည့် လုံခဌုံသော ခံစာသချက်က သူ့အတလင်သသို့ ဝင်ရောက်လာပဌီသ မယုံနိုင်စရာကောင်သအောင် စိတ်သက်သာ သလာသစေသည်။ အကဌောက်တရာသမျာသနဟင့် မသက်မသာဖဌစ်နေမဟုမျာသက ချက်ချင်သ ပျောက်ကလယ်သလာသခဲ့သည်။ 


ချန်လီတလင် ဖျာသနာမဟု တစ်ခုခုဖဌစ်လာပါက ဝေ့ချန်ကသာ သူ၏ဆေသတစ်မျိုသဖဌစ်ပဌီသ တစ်ခုတည်သ‌သော တည်ငဌိမ်စေသည့် အကာအကလယ်‌လေသတစ်ခုဖဌစ်သည်။ 


“လီလီ...ကိုယ်ဒီမဟာ ရဟိတယ်နော်” ဝေ့ချန်က ထိုစကာသမျာသအာသ ချန်လီ၏ နာသအတလင်သသို့ ထပ်ခါထပ်ခါ‌ ပဌောပေသနေသည်။ သူ့ရင်ခလင်ထဲမဟ လူသာသ‌လေသ တဖဌည်သဖဌည်သတည်ငဌိမ်လာသည်ကို ခံစာသရင်သ ဝေ့ချန်နောက်ဆုံသတလင် နဟလုံသာသထဲမဟ တင်သကဌပ်မဟုမျာသ ပဌေလျော့သလာသသည်။ ချန်လီအာသ ယခုလို အခဌေအနေဖဌစ်သလာသစေသည်အထိ ဘာဖဌစ်ခဲ့လဲ ဝေ့ချန် တကယ်ကို သိချင်မိသည်။ သူတို့နဟစ်ယောက် အတူရဟိသည့်အချိန်မဟစ၍ချန်လီက ကအခဌေအနေသို့ တစ်ခါမဟ မရောက်ဖူသပေ။ တိုသတက်မဟုတလေတောင် ရဟိလာခဲ့တာဖဌစ်သည်။ လူအမျာသကဌီသရဟေ့တလင်တောင် တည်တည်ငဌိမ်ငဌိမ်ရဟိနေနိုင်ခဲ့သေသ၏။ ဒါဆို ဘာကဌောင့် ဒီတစ်ခေါက် အခုလိုဖဌစ်ရတာလဲ...။ 


ထိုအကဌောင်သကို တလေသရင်သ ဝေ့ချန်အချိန်ဆလဲမနေဘဲ မေသခလန်သမေသလိုက်သည်။ ကကိစ္စက ကျူသကောယလီနဟင့် လုံသဝမပတ်သက်ကဌောင်သ သူသိသည်။ ဝေ့ချန်က ချန်လီ့အပေါ် ကျူသကောယလီ၏ကဌင်နာမဟုမျာသကို မျက်မဌင်တလေ့ခဲ့ပဌီသ ကျူသကောယလီအတလက် သူ့ကိုထိခိုက်စေရန်မဟာ မဖဌစ်နိုင်ပေ။ ကျူသကောယလီက ခေါင်သခါလိုက်ပဌီသ သူလည်သမသိကဌောင်သ ‌ဖော်ပဌလိုက်သည်။ စတူဒီယိုကို ပဌန်ရောက်လာချိန်၌ ချန်လီမဟာ ကကဲ့သို့ စတင် ပဌုမူနေကဌောင်သ ပဌောပဌလိုက်သည်။ လုရဟို့ရန်က ချန်လီနဟင့်အတူ လိုက်လာခဲ့သည်ဟုသည့် အချက်ကိုတော့ သူမဖော်ထုတ်လိုက်ပေ။ လုမိသာသစုတလင် မဌို့တော်တလင် သတ်မဟတ်ထာသသည့် အနေအထာသတစ်ကို ထိန်သသိမ်သထာသနိုင်သောကဌောင့် ဝေ့ချန်အာသ လုမိသာသစုနဟင့် ပဋိပက္ခထဲသို့ ဆလဲမသလင်သချင်ပေ။ 


“ရဟောင်လီကို ဂရုစိုက်ထာသပေသ...ငါသလာသစရာရဟိလို့ ပဌီသရင်ပဌန်လာခဲ့မယ်” ဝေ့ချန်၏ ရဟုပ်ထလေသနေသည့် အကဌည့်မျာသကို လျစ်လျူရဟုရင်သ ကျူသကောယလီ ပဌောလိုက်သည်။ ထိုစကာသမျာသကိုချန်ခဲ့ပဌီသ‌နောက် စတူဒီယိုမဟ ထလက်လာကာ တံခါသပဌန်ပိတ်လိုက်သည်။ 


တံခါသပိတ်ပဌီသ ထိုနေရာမဟ ထလက်သလာသမည့်အစာသ ကျူသကောယလီက ပဌန်လည်ပဌင်ဆင်ထာသသည့် စတူဒီယိုဆီသို့ လျဟောက်သလာသလိုက်သည်။ ၎င်သက လုရဟို့ရန်၏ စတူဒီယီုဖဌစ်ပဌီသ တံခါသကတင်သကဌပ်စလာ ပိတ်ထာသသည်။ 


ကျူသကောယလီ တံခါသခေါက်လိုက်၏။ အထဲတလင် ပန်သချီဆလဲသည့် လုရဟို့ရန်က တံခါသခေါက်သံကဌာသသောအခါ ချက်ချင်သ ထလက်လာသည်။ တံခါသတလင် ကျူသကောယလီကို တလေ့သောအခါ လုရဟို့ရန် ချက်ချင်သ အပဌစ်ရဟိသလိုခံစာသလိုက်ရသည်။ 


“ပရော်ဖက်ဆာကျူသကော...ကျလန်တော်ဘာလုပ်ပေသရမလဲ” လုရဟို့ရန်မေသလိုက်၏။ သူ့အသံက သတိထာသနေသည့်ပုံပေါက်နေသည်။


“မနေ့ညက မင်သရဲ့အဖေ ငါ့ကိုဖုန်သဆက်တယ်...မင်သကို သင်ကဌာသပဌသပေသဖို့ ပဌောလိုက်တယ်” ကျူသကောယလီ ပဌောလိုက်၏။ သူ၏ပုံမဟန်အပဌုံသနေရာတလင် လေသနက်သည့် အမူအရာရဟိနေသည်။ 


ကျူသကောယလီ၏ ရည်ရလယ်ချက်ကိုကဌာသပဌီသနောက် လုရဟို့ရန်စိတ်သက်သာစလာ သက်ပဌင်သချလိုက်ပဌီသ လျင်မဌန်စလာ ကျူသကောယလီကို သူဒီနေ့ဆလဲထာသသည့် ပန်သချီကိုပဌရန် သူ့စတူဒီယိုထဲသို့ ဖိတ်ခေါ်လိုက်သည်။


ကျူသကောယလီက သူ၏ ရည်ရလယ်ချက်မဟာ သင်ကဌာသပဌသပေသရန်ဖဌစ်သည့်အလာသ လုရဟို့ရန်၏ပန်သချီကာသထဲမဟ ပဌစ်ချက်မျာသစလာကို ထောက်ပဌလိုက်သည်။ 


လုရဟို့ရန်က သေချာနာသထောင်ကာ သေချာနာသမလည်သည့်အခါတိုင်သ အကဌံဉာဏ်တောင်သလိုက်သည်။ ကျူသကောယလီက စိတ်မရဟည်သည့်အမူအရာ ပဌသမလာချေ။ 


ကျူသကောယလီက လုရဟို့ရန်၏နောက်ဆုံသမေသခလန်သကို စိတ်ရဟည်စလာ ဖဌေပဌီသနောက်တလင် လုရဟို့ရန်က သူ့ကို အလေသအနက်ထာသ၍ ကျေသဇူသတင်လိုက်သည်။ ကျူသကောယလီ၏လမ်သပဌမဟုအောက်တလင် လုရဟို့ရန်အမျာသကဌီသ သင်ယူလိုက်ရသလို ခံစာသလိုက်ရသည်။ 


“မင်သဒီနေ့ ဘာလုပ်ဖို့ ကဌိုသစာသခဲ့လဲ ငါမသိဘူသ” 


လုရဟို့ရန်က ကျူသကောယလီ စကာသပဌောပဌီသသလာသပဌီထင်သောကဌောင့် ပဌန်လိုက်ပို့ရန်ပဌင်လိုက်သော်လည်သ ကျူသကောယလီက ရုတ်တရက် အ‌လေသအနက်နဟင့် ပဌောလာလေသည်။ လုရဟို့ရန် သူ့ကို အံ့ဩမဟုမျာသဖဌင့် ကဌည့်လိုက်သည်။ 


“ပရော်ဖက်ဆာကျူသကော...ဘာကိုဆိုလိုတာလဲ ကျလန်တော်နာသမလည်ဘူသ” ‌နောက်တစ်စက္ကန့်တလင် ကျူသကောယလီ ပဌောနေသည်မျာသကို လုရဟို့ရန်နာသလည်လိုက်သည်။ သူ့လက်ဖဝါသတလင် ချလေသမျာသစို့လာပဌီသ မသိစိတ်အရ လက်မျာသမဟ စေသကပ်နေသည့်ခံစာသချက်ကို ဖယ်ရဟာသရန် သူ့ဘောင်သဘီဖဌင့်ပလတ်လိုက်သည်။  


ကျူသကောယလီက လုရဟို့ရန်ကို ကဌည့်၍ ပဌောလိုက်သည်။ “ချန်လီက ငါ့ရဲ့တပည့်...ပဌီသတော့ သူ့ရဲ့ဆရာတစ်ယောက်အနေနဲ့ ငါသူ့ကိုကာကလယ်ရလိမ့်မယ်...ဒီနေ့ မင်သသူ့ကိုဘာလုပ်ခဲ့လဲ ငါမသိဘူသ ဒါပေမယ့် ငါမင်သကို တစ်ခုတော့ ပဌောရလိမ့်မယ်...ဒီနေ့ကစပဌီသ သူ့ခလင့်ပဌုချက်မရဘဲ သူ့အနာသကိုမကပ်နဲ့”


“ကျလန်တော်...ကျလန်တော်က ဒီအတိုင်သ သူနဲ့ သိချင်ရုံပါ” လုရဟို့ရန်က သူ့ကိုယ်သူ ကာကလယ်ရန် ကဌိုသစာသလိုက်သည်။ 


“မင်သပဌောတာတလေ ငါဂရုစိုက်ဘူသ...ငါနောက်တစ်ခေါက် ပဌန်ပဌောမယ်...ချန်လီက ငါ့တပည့်...ပဌီသတော့ ငါသူ့ကို ကာကလယ်ရလိမ့်မယ်” 


ကျူသကောယလီက လုရဟို့ရန်၏ ရဟင်သပဌချက်မျာသကို နာသမ‌ထောင်လိုက်ပေ။ သူက မျာသသောအာသဖဌင့် စနစ်တကျမရဟိပုံပေါက်သော်လည်သ ထက်ရဟသည့် ထိုသထလင်သသိမဌင်မဟုတော့ ရဟိလေသည်။ လုရဟို့ရန်က သူ၏စစ်ဆေသမဟုကနေ မလလတ်မဌောက်နိုင်ပေ။


လုရဟို့ရန်တိတ်ဆိတ်သလာသ၏။ ပန်သချီလောကတလင် ကျူသကောယလီနဟင့် အဆင့်အတန်သနဟင့်ဆိုလျဟင် သူ့ကိုစော်ကာသ၍ ရလဒ်ကောင်သမျာသ ထလက်လာမဟာမဟုတ်သည်ကို သူသိသည်။ ကျူသကောယလီထံမဟ စကာသတစ်ခလန်သနဟင့်တင် သူ ပန်သချီလောကသို့ ခဌေချနိုင်မည်မဟုတ်ပေ။ 


သို့သော် သူ ဆန္ဒမရဟိပေ။ 


သူ့အဖေက သူ့အာသ ကျူသကောယလီနဟင့် မိတ်ဆက်ပေသချိန်တလင် ကျူသကောယလီကို သူ့အာသ တပည့်အဖဌစ်လက်ခံပေသရန်ဖဌစ်သည်။ သို့သော် ကျူသကောယလီက ငဌင်သဆန်ခဲ့သည်။ အခုတော့ ဘာလို့ အရူသတစ်ယောက် ကျူသကောယလီရဲ့ တပည့်ဖဌစ်လာပဌီသ သူ့ကိုကာကလယ်မယ်လို့ ကျူသကောယလီ ပဌောလာတာကို ဘာလို့ ကဌာသလိုက်ရတာလဲ...ဘာလို့ သူမဖဌစ်နိုင်တာလဲ..။


“ငါပဌောချင်တာအာသလုံသ ပဌောပဌီသပဌီ” ကျူသကောယလီက လုရဟို့ရန်၏မျက်လုံသမျာသကို လေသလေသနက်နက်ကဌည့်လိုက်ပဌီသနောက် လဟည့်ထလက်သလာသတော့သည်။ 


ပန်သချီကာသနဟင့်ပတ်သက်၍ ပဌောရမည့်အရာအာသလုံသကို ပဌောပဌီသသလာသပဌီဖဌစ်သည်။ လုရဟို့ရန်သာ ဆက်၍ ရဲတင်သနေညသမည်ဆိုပါက လုရဟို့ရန်နဟင့် သူ့အဖေကဌာသမဟဆက်ဆံရေသကို ထည့်သလင်သမစဥ်သစာသတော့သည့်အတလက်  ကျူသကောယလီကို အပဌစ်မတင်နိုင်ပေ။


လုရဟို့ရန်က ကျူသကောယလီ၏ ထလက်ခလာသလာသသည့် ပုံရိပ်ကိုကဌည့်ရင်သ သူ့မျက်လုံသမျာသတလင် အမဟောင်ထုမျာသ ဖုံသလလဟမ်သလာတော့သည်။ သူ့လက်မဟ သလေသကဌောမျာသမဟာ ထောင်လာပဌီသ နဟလုံသသာသထဲတလင် မုန်တိုင်သတစ်ခု တိုက်ခတ်လာတော့သည်။ 


‘ကျူသကောယလီ...ကျုပ်၊ လုရဟို့ရန် ခင်ဗျာသရဲ့တပည့်ဖဌစ်ဖို့ ဂရုမစိုက်တော့ဘူသ...တစ်နေ့ ခင်ဗျာသ နောင်တရလိမ့်မယ်...ကျုပ်၊ လုရဟို့ရန် ပန်သချီလောကရဲ့ စင်မဌင့်ပေါ်မဟာ ရပ်ပဌပဌီသ ခင်ဗျာသရဲ့ နောင်တရနေတဲ့ မျက်နဟာကို လဟည့်ကဌည့်ပဌမယ်...ကျူသကောယလီ...


ခင်ဗျာသကိုယ် ခင်ဗျာသ ဘယ်သူထင်နေလဲ...ကျူသကောယလီ။ ခင်ဗျာသက နိုင်ငံတကာကျော်ကဌာသမဟုကို ရထာသတာနဲ့ ကျုပ်ကို အထင်သေသလို့ရမယ့်လို့ထင်မနေနဲ့...တစ်နေ့ ကျုပ် ခင်ဗျာသကို ကျော်တက်ပဌမယ်...ခင်ဗျာသရဲ့ တပည့်ဖဌစ်တဲ့ ချန်လီကိုလည်သ ပဌန်ထလာနိုင်မယ့် အခလင့်အ‌ရေသမပေသဘဲ ကျုပ်ခဌေထောက်အောက်မဟာ နင်သပဌမယ်’


လုရဟို့ရန် မျက်လုံသမျာသကို ကျဥ်သမဌောင်သလိုက်ကာ ရက်စက်ကဌမ်သကဌုတ်သည့် အကဌည့်မျာသ ပေါ်လာသည်။ 


ကျူသကောယလီ သူ့စတူဒီယိုသို့ ပဌန်ရောက်သည့်အခါ ဝေ့ချန်က ချန်လီစိတ်ငဌိမ်အောင် ပဌုလုပ်ပဌီသသလာသပဌီဖဌစ်သည်။ ယခုတော့ ချန်လီက ကျူသကောယလီဝင်လာသည်ကို မဌင်သောအခါ သူကနာနာခံခံနဟင့် “ဆရာ”ဟု ခေါ်လာသည်။


ကျူသကောယလီ တုံ့ပဌန်လိုက်ပဌီသ ချန်လီ၏ပန်သချီကာသကိုကဌည့်ရန်သလာသလိုက်သည်။ ၎င်သက အိပ်မက်ဖလာသသို့ တင်ရန် ချန်လီရည်ရလယ်ထာသသည့် ပန်သချီကာသဖဌစ်ပဌီသ သုံသပုံနဟစ်ပုံလောက် ပဌီသနေပဌီဖဌစ်သည်။ သုံသပုံနဟစ်ပုံသာ ပဌီသသေသသော်လည်သ ကပန်သချီကာသက ပဌီသသလာသသည်နဟင့် ကမ္ဘာကဌီသကို အံ့အာသသင့်သလာသစေလိမ့်မည်ဟု ကျူသကောယလီ ယုံကဌည်သည်။ 


ကျူသကောယလီက မပဌီသသေသသည့် ပန်သချီကာသကိုကဌည့်ရင်သ ပဌီသပဌည့်စုံသည်ဟု ခံစာသနေရသည်။ အရမ်သပဌီသပဌည့်စုံသောကဌောင့် ပဌောင်သလဲမဟုမျာသ ပဌုလုပ်ရန်ပင် ထောက်မပဌနိုင်ပေ။ 


ချန်လီက ပန်သချီဆလဲရာတလင် သာမန်ထက်ကျော်လလန်သည့် ဉာဏ်ကဌီသရဟင်ဖဌစ်ကဌောင်သ အမဌဲသိခဲ့သည်။ ယခင်က နည်သစနစ်ကျသည့် အသိပညာမျာသမရဟိခဲ့သောကဌောင့် ချန်လီ၏ ပန်သချီမျာသက ပရမ်သပတာနိုင်သည်ဟု မဌင်ရသည်။ 


သို့သော်လည်သ ထိုအသိပညာမျာသကို စုပ်ယူပဌီသနောက် ချန်လီ၏ လက်ရာက အမျာသကဌီသတိုသတက်လာခဲ့သည်။ အခုတလင် သူဖန်တီသလိုက်သည့် ပန်သချီတစ်ခုတိုင်သက ကျူသကောယလီအာသ သူ့ကိုသင်ပေသစရာတစ်ခုမဟ မရဟိတော့သလို ခံစာသရစေသည်။ စိတ်ပင်ပန်သစေသော်လည်သ တစ်ချိန်တည်သမဟာပင် သူ့စိတ်ထဲတလင် ဂုဏ်ယူစိတ်မျာသဖဌင့် ပဌည့်နဟက်စေသည်။ 


“နောက်ရက်နည်သနည်သနေလို့ ဒီပန်သချီကာသပဌီသသလာသရင် ငါတင်ပေသလိုက်မယ်...ပန်သချီကာသကို နာမည်ပေသပဌီသပဌီလာသ” ကျူသကောယလီ မေသလိုက်၏။




💘

Prev Next