အပိုင်း၇၄
Viewers 8k
Chapters 270

🥰 Chapter 74 ✅


မင်လျိုရီက ယောင်ကျိကျိုးဘေးတွင် ရပ်နေရင်း သူမ၏အတွေးထဲတွင် ကြောက်မက်ဖွယ်မြင်ကွင်းများဖြင့်ပြည့်နှက်လာသောကြောင့် ကြက်သီးထမိသွားသည်။ ယောင်ကျိကျိးက ဘာမှပြန်မပြောဘဲ သက်တော်စောင့်များကို အိမ်အကူဟောင်းအား ခေါ်ထုတ်သွားရန် လက်ဝှေ့ယမ်းပြလိုက်သည်။ သက်တော်စောင့်များသည် သူတို့သခင်မကို မည်သည့်ရက်စက်သည့်မြင်ကွင်းကိုမဆို ပြခွင့်မရှိပေ။မင်လျိုရီက ရှောင်လန်အားခေါ်သွားသည်ကိုတွေ့တော့ မနေနိုင်ဘဲမေးကြည့်လိုက်သည်။


"သူ့ကိုဘာလုပ်ကြမလို့လဲ"


ယောင်ကျိကျိုး၏ မျက်နှာကတည်ငြိမ်နေသည်။ ထိုမိန်းမသည် သူ့အိမ်တွင်အလုပ်လာလုပ်သည်ဆိုထဲက သူ့လက်အောက်မှ ၀န်ထမ်းဖြစ်ရမည်။ သို့သော် ထိုမိန်းမက သူ့အားသစ္စာဖောက်ကာ အဆိပ်ခတ်ရန်ကြံရွယ်ခဲ့သည်မှာ တစ်ခါနှစ်ခါမဟုတ်ပေ။ သူမက ထိုသို့လုပ်ရခြင်းအပေါ် ဂုဏ်ယူနေခဲ့သေးသည်။ 


မင်လျိုရီ၏ကာကွယ်တားဆီးပေးမှုကြောင့်သာ မဟုတ်ရင် ယောင်ကျိကျိးသည် ယခုအချိန်တွင်သေလူဖြစ်နေလောက်ပြီဖြစ်သည်။ 


"ဘာလုပ်ရမလဲ သူ့အရိုးတွေကို တစ်ချောင်းချင်းစီချိုး၊ အရေခွံစုတ်၊ အရွတ်တွေဆွဲထုတ်ပြီး တောထဲသွားပစ်ထားလိုက်မှာပေါ့"


ယောင်ကျိကျိုးစကားဆုံးသည်နှင့် မင်လျိုရီကြောက်လန့်ကာတုန်ယီသွားသည်ကို ခံစားမိလိုက်သည်။ သို့သော် ခုနကစကားများသည် အမှန်တကယ်ကို ရည်ရွယ်ခဲ့ခြင်းဖြစ်သည်။ 


သူ့ဇနီးလေးက သူ့ကိုနတ်ဆိုးတစ်ကောင်ကဲ့သို့ထင်မြင်ပြီးထွက်ပြေးမည်ကိုစိုးရိမ်သွားမိသည်။  သူကပြုံးကာမေးလိုက်သည်။ 


"ငါ့ကိုယုံလား"


ဒါပေါ့ မင်လျိုရီယုံတာပေါ့။ သူမက မူလဇာတ်ကြောင်းကို မဖတ်ဖူးတာမှမဟုတ်တာ... ယောင်ကျိကျိုးနိုးလာပြီးနောက် သူ့ကိုသတ်ချင်ခဲ့သည့်လူမှန်သမျှအားလုံးကို ရူးသွပ်စွာကလဲ့စားပြန်ချေခဲ့သည်။  ရှောင်လန်အား ယခုလိုဆက်ဆံခြင်းသည်ယောင်ကျိကျိုးအတွက်တော့ ပုံမှန်ဟုဆိုရပေမည်။ မင်လျိုရီတွင် မယုံကြည်စရာအကြောင်းမရှိပေ။ 


သူမက မျက်၀န်းထဲတွင် အကြောက်တရားများနှင့် ခေါင်းငုံ့လိုက်ပြီး တိုးညှင်းစွာဖြေလိုက်သည်။ 


"ဒ-ဒါပေါ့ ယုံပါတယ်" 


ယောင်ကျိကျိးက သူမထိုကဲ့သို့အဖြေပေးမည်ဟုထင်ခဲ့သော်လည်း လူ့အသိုင်းအဝိုင်းသည် တရားဥပဒေစိုးမိုးထားသည်မဟုတ်ပါလား။ အရာအားလုံးကိုဥပဒေဖြင့်ထိန်းချုပ်ထားပြီး သက်သေမှတ်တမ်းများလဲ ကျန်ခဲ့မည်ဖြစ်သည်။ ထို့ကြောင့်အလွယ်လေးနှင့် ယောင်ကျိကျိုး ပြုလုပ်လိုက်မည်မဟုတ်ပေ။ သို့ရာတွင် သူသည် ရှောင်လန်ထိုသို့လုပ်ရဲသည့်အပေါ် ဒေါသထွက်နေတုန်းဖြစ်သည်။ 


မင်လျိုရီ၏ ပြန်ဖြေသံအားနားထောင်ပြီး ယောင်ကျိကျိုး အနည်းငယ်စိတ်ဓာတ်ကျသွားမိသည်။ 


'ဒီသခင်မလေးက တကယ်ကြီးယုံလိုက်တယ်လား...' 


ယောင်ကျိကျိုးက အေးစက်စွာပြောလိုက်သည်။ 


"မင်းကငါ့ကို အဲ့လိုလူမျိုးလို့ထင်တယ်ပေါ့"


မင်လျိုရီက နှလုံးသားထဲတွင် အော်ဟစ်လိုက်သည်။ 


'သူက ဘယ်လိုလူမျိုးဖြစ်ချင်သေးတာလဲ...မူလဇာတ်ကြောင်းမှာ ယောင်ကျိကျိုးက ကလဲ့စားချေလိုစိတ်ပြင်းထန်ပြီး ဆုံးရှုံးသမျှအကုန်ပြန်ယူတဲ့လူလို့ ရှင်းရှင်းလင်းလင်းကြီး ရေးထားတာကို...သူ့ကို အပြစ်ပြုမိတာနဲ့ နှစ်ဆပြန်ပေးဆပ်ရအောင်လုပ်တဲ့လူလေ အဲ့အပြင် သူ့နည်းလမ်းတွေက မတရားရက်စက်လွန်းတယ်...ယောင်ကျိကျိုးမလုပ်နိုင်တဲ့ ကိစ္စဆိုတာ ရှိသေးလို့လား...'


နှလုံးသားထဲတွင် အော်ဟစ်နေခဲ့သော်လည်း ပါးစပ်မှတော့ လေသံဖျော့ဖျော့ဖြင့်ပြောလိုက်သည်။


"ဘယ်ဟုတ်မလဲ...ရှင်ကဘယ်လိုလုပ် အဲ့လိုလူမျိုးဖြစ်နိုင်မှာလဲ"


ယောင်ကျိကျိုးက သူမစကားကြောင့် ရယ်ချင်မိသွားသည်။ သူက အဲ့လောက်တောင်ကြောက်ဖို့ကောင်းနေတာလား... သူသည် မင်လျိုရီအား ကြောက်လန့်စေခဲ့သော်လည်း ဒီအတောအတွင်းဖြစ်ပျက်ခဲ့သမျှကိုတော့ သေချာအရေးယူရမည်ဖြစ်သည်။ သက်သေများကိုတင်ပြပြီး ရှောင်လန်အားထောင်ထဲသို့ ပို့ဆောင်ရမည်ဖြစ်သည်။ လွယ်တော့မလွယ်ပေမဲ့ပေါ့လေ...


ယောင်ကျိကျိူက မင်လျိုရီကို ထပ်ပြီးမစနောက်တော့ဘဲ ပြောလိုက်သည်။ 


"စိတ်မပူပါနဲ့...လူသတ်မှုနဲ့ မီးရှို့တာက ပြစ်မှုမြောက်တယ် အဲ့လိုအရာတွေမလုပ်ပါဘူး"


မင်လျိုရီက သူမနှလုံးသားထဲတွင် နောက်တစ်ဖန် အော်ဟစ်လိုက်သည်။


'ပြစ်မှုမြောက်တယ်ဆိုတာသိလို့တော်သေးတာပေါ့... တရားမ၀င်တာတွေကျ အများကြီးလုပ်ထားပြီးတော့... ကိုယ်ပိုင်လွတ်လပ်ခွင့်ကိုပိတ်ပင်ပြီး ပြန်ပေးဆွဲထားတာကလဲ တရားဥပဒေကိုဆန့်ကျင်တာ မဟုတ်ဘူးလား အဲ့ဒါကိုသိတာတောင်မှ ဆက်ပြီးလုပ်နေသေးတယ်ပေါ့...'


မင်လျိုရီသည် အခုချိန်တွင်အကြောက်တရားကိုသာ ခံစားမိနေတော့သည်။ 


သူမက စိတ်ကိုတည်ငြိမ်‌အောင်ထားလိုက်ပြီး ညင်သာစွာပြောလိုက်သည်။ 


"ဟုတ်တာပေါ့ တရားမ၀င်တာတွေဘယ်လုပ်ဖို့ဖြစ်မလဲ..."


ယောင်ကျိကျိုး ရယ်လိုက်သည်။ မင်လျိုရီထိုစကားများကို ပြောရာတွင်စိတ်ထဲက တကယ်မဆိုလိုမှန်း သူသိပါသည်။ သူမသည်သူ့ကိုကြောက်နေရုံကလွဲ၍ တခြားအကြောင်းရင်းမရှိနိုင်ပေ။ ယခုချိန်တွင် သူ့အပေါ်ကြောက်နေသော မင်လျိုရီ၏စိတ်ကိုပြောင်းလဲရန်ခက်ခဲသော်လည်း အနာဂတ်တွင်သူ့အားနားလည်လာပြီး မကြောက်တော့ရန် မျှော်လင့်မိသည်။


ယောင်ကျိကျိုးက မင်လျိုရီ၏ လက်ခုံကိုပုတ်ပြီး နူးညံ့စွာပြောလိုက်သည်။ 


"မနက်ဖြန်လဲ ဒီလိုအချိန် နောက်ထပ်တစ်ယောက်ထပ်လာလိမ့်မယ်" 


မင်လျိုရီက စကားလုံးများဆွံ့အသွားခဲ့သည်။ 


'ဘုရားရေ ဒါကိုနောက်ဆုံးတစ်ယောက်လို့ ထင်ထားတာ... ဘယ်ကဘယ်လို ဒါကြီးက တစ်နေ့တစ်ပိုင်းပြတဲ့ ဒရာမာစီးရီးလို ဖြစ်လာတာလဲ...'


သူမ မကြည့်ချင်သော်လည်း ကြည့်ဖို့ရာနေ့တိုင်း ဖိအားပေးခံရပေတော့မည်။ သူမအတွက်ဒါကြီးက မတရားကို ခက်ခဲလွန်းသည်...။ ဖြစ်နိုင်လျှင် မနက်ဖြန်လာမည့်အပိုင်းသည် ဇာတ်သိမ်းပိုင်းဖြစ်ဖို့မျှော်လင့်မိသည် ဒါမှ သူမနေ့တိုင်းကြောက်လန့်စွာမဖြတ်သန်းရမှာဖြစ်သည်။ 


အကယ်၍တီဗွီဇာတ်လမ်းတွဲတစ်ခုသာဆိုလျှင် ဗီလိန်နှင့်တူသည့် ယောင်ကျိရန်သည် "အင်အားကြီးဗီလိန်" ဖြစ်မည်ဟု မင်လျိုရီခန့်မှန်းမိပြီး သူသာပေါ်လာလျှင် ပြီးခါနီးဇာတ်သိမ်းနီးပြီဟု ပြောလို့ရသည်။ သို့သော် ထို့နေ့‌ နေ့လယ်မှာလဲ ယောင်ကျိရန်အမှန်တကယ်ကြီး ရောက်ချလာမည်ဟု မထင်ခဲ့မိပေ။


ယောင်ကျိရန်သည် ဖြစ်ပျက်ခဲ့သမျှကို မေ့ပစ်လိုက်ပုံရပြီး သစ်သီးခြင်းနှင့်ပန်းစည်းများပင်ယူလာသည့်အပြင် ချစ်လှစွာသောညီလေးမှ အိမ်လာလည်သည့်ပုံရိပ် ဖမ်းထားခဲ့သည်။


ယောင်ကျိရန်ရောက်နေသည်ဟုသိရှိပြီးနောက် ယောင်ကျိကျိုးသည် အောက်သို့ပင်မဆင်းချင်ပေ။ သူတို့နှစ်ယောက်ကြားမှဆက်ဆံရေးသည် သိပ်မကောင်းမွန်ပေ။ ယောင်ကျိကျိုးက ဝှီးချဲပေါ်တွင်ထိုင်ကာ မင်လျိုရီအား တွန်းပေးစေခဲ့ပြီး ယောင်ကျိရန်နှင့် စကားပြောဖို့ ဆုံးဖြတ်ခဲ့သည်။


ယောင်ကျိကျိုးက အေးစက်စက်ပြောလိုက်သည်။ 


"ဒီနေရာကို ပြန်လာရဲသေးတယ်ပေါ့"



🥰

Prev Next