MM Story Teller

Chapter 74

Viewers 5k

🌌Chapter 74

ကမ္ဘာအစစ်အမှန်ကို ပြန်သွားရခြင်းက လင်းကိုဆုံးရှုံးရခြင်းဆိုလျှင် သူ၏အတုအယောင် ပုံရိပ်ယောင်များထဲမှာသာ တစ်သက်တာလုံး နစ်မြှုပ်သွားစေရန်ကို ပို၍လိုလားပေသည်။

စနစ် : "..."

အဲ့ဒါကို ငါ နားမလည်ပေမဲ့ အရမ်းထိတ်လန့်စရာပဲ...

[ကောင်းပြီ ကောင်းပြီ...]

သူက တွန့်ဆုတ်စွာဖြင့်ပြောသည်။

"မင်းက ခိုင်ခိုင်မာမာ ပြောနေမှတော့ မင်းကိုမတားတော့ပါဘူး...ဒါပေမဲ့ မင်း သေသေချာချာတွေးသင့်တယ် ဟုတ်ပြီလား...ငါထွက်သွားတဲ့အခါကျ မင်းနောင်တရနေရင်တောင် အသုံးမဝင်တော့ဘူးနော်..."

လုမော့ တစိမ့်စိမ့် တွေးဆလိုက်သည်။

"အဲ့ဒါမတိုင်ခင် တစ်ခုရှိသေးတယ်..."

[ဘာလဲ...]

လုမော့ မရိုးမသား ပြုံးလိုက်သည်။

"မင်း မထွက်မသွားခင် ငါ့ကိုအဆင့်တက်အောင် ကူညီသွားပေးဦး...SSS အဆင့် ဒါမှမဟုတ် အဲ့လိုမျိုးတစ်ခုခုပေါ့..."

စနစ်က စိတ်လှုပ်ရှားသွားလွန်း၍ အကျယ်ကြီးအော်ငိုချင်သွားသည်။

[အိုးမိုင်ဂေါ့...လုမော့...မင်း နောက်ဆုံးတော့ ဆုံးဖြတ်ချက် ပြတ်ပြတ်သားသားကို ချပြပြီပေါ့...ရိုးရိုးသားသားပြောရရင် မင်းက အမြဲတမ်းရည်မှန်းချက် ကြီးကြီးမားမားမရှိလို့ ငါအရမ်းဝမ်းနည်းခဲ့ရတာ...စိုးရိမ်ပူပန်ရလွန်းလို့ ငါ့ဆံပင်တွေတောင် ကျွတ်သွားတယ်...အမ်း ဆံပင်သာရှိရင်ပေါ့...]

[ဘာမှ မစိုးရိမ်နဲ့...]

စနစ်က ယုံကြည်ချက်အပြည့်ဖြင့် လက်သီးဆုပ်လေးများအား အတူတူပူးကပ် ပွတ်တိုက်လိုက်သည်။

[ဒီအခန်းကဏ္ဍမှာဆို ငါ့ထက် ပရော်ဖက်ရှင်နယ်ဆန်တဲ့ စနစ်နောက်တစ်ခုရှိမှာ မဟုတ်ဘူး...ငါရဲ့လမ်းညွှန်စည်းကမ်းတွေအကုန်လုံးက လိုအပ်တာတွေချည်းပဲ... အဆင့်တက်ဖို့ ကမ္ဘာကြီးကို ဖျက်စီးရမယ်ဆိုရင်တောင် ဒီတိုင်းစောင့်ပြီးသာ ကြည့်လိုက်...]

လုမော့ : "..."

မဟုတ်ဘူး...ကျေးဇူးပြုပြီး အဲ့လိုတော့ မလုပ်လိုက်ပါနဲ့...

သူ့မျက်လုံးများကို မှိတ်လိုက်ပြီး အသိစိတ်က တဖြည်းဖြည်း ဝေဝါးလာခဲ့သည်။

တစ်ချိန်တည်း၌ ရှိနေကြသော ဇာ့ဂ်များက အတိတ်နိမိတ်တစ်ခုကဲ့သို့ ကြိုတင်သတိပေးချက်တစ်ခုကို စတင်ခံစားလာရသည်။

သူတို့က လုံးဝိုင်းနေသောဥကိုကြည့်ပြီး တစ်စုံတစ်ရာက မြေကြီးထဲမှ ဖောက်ထွက်လာတော့မလို ခံစားလိုက်ရသည်။ သူတို့နှလုံးသားများက ပြိုင်ပွဲဝင်နေရသကဲ့သို့ အခုန်မြန်နေသော်လည်း သူတို့၏ စိတ်လှုပ်ရှားမှုများကို ချေဖျက်စရာ နေရာမရှိပေ။ ထို့ကြောင့် သူတို့ကြွက်သားများက ဖိစီးစွာတင်းမာနေပြီး ခြေဖနောင့်များကို မြေပြင်နှင့်ပွတ်တိုက်လိုက်ကြသည်။

ထောင်စုနှစ်တစ်လျှောက်လုံးတွင် S အဆင့်အထိ ဖြတ်ကျော်ရန် ကြိုးပမ်းခဲ့သော အမျိုးသား ဇာ့ဂ်အများအပြားရှိခဲ့ကြောင်း သူတို့ ကောင်းကောင်းသိပေသည်။

သို့သော် ခြွင်းချက်မရှိ မည်သည့်အမျိုးသားဇာ့ဂ်မှ မအောင်မြင်ခဲ့ချေ။ တစ်ကြိမ် အဆင့်တက်မှုကျရှုံးသည်နှင့် တန်ဖိုးကြီးကြီးမားမား ပေးဆပ်ရပေသည်။ စိတ်ပိုင်းဆိုင်ရာ ချို့ယွင်းမှုမှလွဲ၍ A အဆင့်မှ ပိုနိမ့်သည့် အဆင့်သို့ အဆင့်ကျသွားလိမ့်မည်ပင်။

အစပိုင်းတွင် အဆင့်တက်ရန် အရွယ်ကောင်းကိုရောက်နေသည့် ယုံကြည်ချက်အပြည့်နှင့် ကောင်းကောင်းပြင်ဆင်ထားသည့် အလွန်အမင်း ထူးခြားသာလွန်သည့် စွမ်းရည်များရှိကြသည့် အမျိုးသားဇာ့ဂ်အချို့ ရှိပေသည်။ သို့သော် သူတို့ရရှိခဲ့သည့်အရာအားလုံးက ပြင်းထန်နာကျင်သည့် နောက်ဆက်တွဲများပင်ဖြစ်သည်။

ရှုံးနိမ့်မှုက ဇာ့ဂ်မျိုးနွယ်တစ်ခုလုံးအား မလှုပ်ခါနိုင်သည့် တိမ်စိုင်ကြီးကဲ့သို့ လွှမ်းမိုးထားလေသည်။

တဖြည်းဖြည်းနှင့် ဇာ့ဂ်တိုင်းက ၎င်းအား ကျင့်သားရသွားကြသည်။ အမျိုးသားဇာ့ဂ်များ အသက်အရွယ်ကြီးရင့်လာပြီး သေဆုံးခါနီးအချိန်ကျမှသာလျှင် အဆင့်တက်ရန် ကြိုးပမ်းလာကြတော့သည်။ ထိုအခိုက်တွင်မူ ဇာ့ဂ်မျိုးနွယ်က မျှော်လင့်ချက်မီးတောက် မှိန်မှိန်လေးတစ်ခု တစ်ဖန် တောက်လောင်လာပေလိမ့်မည်။

ထို့နောက်တွင်မူ မျှော်လင့်ချက်က တစ်ဖန် ငြှိမ်းသက်သွားပေလိမ့်မည်ပင်။

ထိုကဲ့သို့ ရက်စက်လှသည့် အချက်များကြောင့် နှစ်ပေါင်းထောင်ချီကြာပြီးနောက်တွင် သူတို့ စတင်အထင်မှားလာခဲ့ကြသည်။

ဖြစ်နိုင်တာက S အဆင့်အမျိုးသားဇာ့ဂ်ဆိုတာက တကယ် မတည်ရှိခဲ့လောက်တာများလား...

အဲ့ဒါက လုပ်ကြံဖန်တီးထားတဲ့ ဒဏ္ဍာရီတစ်ခုသာသာပဲ မဖြစ်နိုင်ဘူးလား..

နှစ်တစ်ထောင်ကြာအောင် ရှုံးနိမ့်ခဲ့ရမှုများ၊ နှစ်တစ်ထောင်ကြာအောင် မျှော်လင့်ချက်ပျက်သုန်းပြီးဝမ်းနည်းခဲ့ရမှုများက ဇာ့ဂ်မျိုးနွယ်အားလုံး၏ မျှော်လင့်ချက်များကို အောက်ဆုံးအထိ တွန်းချလိုက်ပေသည်။

ထို့ကြောင့် အမှန်တကယ် မျှော်လင့်ချက်ရောက်ရှိလာသည့်အခါ ဇာ့ဂ်အားလုံး၏နှလုံးသားထဲတွင် မျိုးဆက်တစ်ဆက်ပြီး တစ်ဆင့်ကျဆင်းလာခဲ့သည့် မျှော်လင့်ချက်နှင့် ပြင်းပြသောဆန္ဒများက ဆောင်းဦးနှောင်းပိုင်းတွင် ပေါက်နေသည့် မြက်ရိုင်းတစ်ပင်ကဲ့သို့ ငွားငွားစွင့်စွင့် ပွင့်လန်းလာခဲ့သည်။ မီးတောက်လေးတစ်စရှိနေသရွေ့ ကောင်းကင်ယံထိရောက်အောင် လောင်ကျွမ်းနိုင်သော မီးတောက်မီးလျှံများဖြစ်လာနိုင်သည်ပင်။

ဇာ့ဂ်တိုင်း လက်သီးကို ကျစ်ကျစ်ပါအောင်ဆုပ်၍ ရင်ဘတ်နားကပ်ကာ သူတို့၏ဦးခေါင်းများဦးညွှတ်လျက် ဆုတောင်းနေကြသည်။

အိုး ဇာ့ဂ်နတ်ဘုရား ဇာ့ဂ်မျိုးနွယ်အပေါ်မှာ သနားကြင်နာမှု ရှိပါသေးလျှင်...

ဇာ့ဂ်မျိုးနွယ်ကို လုံးဝ အပြီးပိုင် မစွန့်လွှတ်ပါသေးလျှင်...

တွယ်တာမှုတစ်စွန်းတစ်စမျှ ရှိပါသေးလျှင်...

ဤမြင့်မြတ်သည့် အမျိုးသားဇာ့ဂ်အပေါ် ကောင်းချီးများပေးသနားပြီး သူ့အတွက် အရာအားလုံးအဆင်ပြေချောမွေ့ပါစေလို့ အကျွန်ုပ်တို့ဆုတောင်းပါသည်...

ရပ်နေသည့်ဇာ့ဂ်များ တစ်ယောက်ပြီး တစ်ယောက် ခေါင်းများညွှတ်ကာ လည်ပင်းများ လေးလေးနက်နက် ငုံ့ကိုင်း၍ မှော်ဆန်သည့်အရာ ဖြစ်ပေါ်လာစေရန်ဆုတောင်းနေကြသည်။

အချို့သော ငယ်ရွယ်လွန်းလှသည့် ဇာ့ဂ်ငယ်လေးများက သူတို့ခေါင်းလေးများကို လှည့်ပတ်ကြည့်ကာ များများစားစား နားမလည်သေးသော်လည်း ပူးပေါင်းပါဝင်ကာ လက်များကို အတူတကွပူးကပ်ဆုပ်ကိုင်ပြီး မျက်လုံးလေးများမှိတ်၍ သူတို့၏ အပြစ်ကင်းစင်သည့် အသံလေးများဖြင့် ဆုတောင်းလိုက်ကြသည်။

အိုး ဇာ့ဂ်နတ်ဘုရား...သူ့ကိုသာ အောင်မြင်ခွင့်ပြုမယ်ဆိုရင် ကျွန်တော် တစ်နှစ်တာလုံး အချိုတွေမစားဘူးလို့ ကတိပေးပါတယ်...

ကျွန်တော် ကတိပေးတယ်...

နှစ်ပေါင်းထောင်ချီကြာပြီးနောက် မြင်ကွင်းက လွန်ခဲ့သော နှစ်ပေါင်းထောင်ချီက မြင်ကွင်းနှင့်တဖြည်းဖြည်းချင်း ထပ်တူကျသွားလေသည်။

လွန်ခဲ့သော နှစ်တစ်ထောင်က သူတို့ဝတ်ရုံဗြောင်များကိုဝတ်ဆင်ကာ ဧရာမရုပ်တူကြီးရှေ့ ဒူးထောက်ခဲ့ကြပြီး မီးပုံကြီးက ညတာ၏ တစ်ဝက်မျှကြာအောင် ထွန်းလင်းတောက်ပနေခဲ့သည်။

နှစ်တစ်ထောင်ကြာပြီးနောက် တောက်ပသော နေ့အလင်းရောင်အောက်တွင် သူတို့အတူတကွထိုင်ကာ ခေါင်းများကိုဦးညွှတ်၍ ကွယ်လွန်သွားခဲ့သော ဇာ့ဂ်နတ်ဘုရားအား တောင်းဆုပြုနေကြသည်။

လင်းက လုမော့နံဘေးတွင် တိတ်ဆိတ်စွာရပ်၍ သူ့အမူအရာက အေးဆေးတည်ငြိမ်နေပေသည်။

"ကိုယ်မကြာခင် ပြန်လာခဲ့မယ်..."

သူက စစိတ်လှုပ်ရှားမှုသာမက စိတ်ဖိစီးမှုပါ မခံစားရပေ။ လုမော့က ထိုသို့ပြောခဲ့၍ သသူစိတ်ရှည်စွာ စောင့်ဆိုင်းနေမည်ပင်။

အချိန်များ ဖြည်းညင်းစွာ ကုန်ဆုံးသွားပြီး နေမင်းကြီးက ပျင်းရိစွာဖြင့် အနောက်သို့ဝင်သွားခဲ့သည်။ ပထမဆုံး အနီရောင်အလင်းက မိုးကုတ်စက်ဝိုင်း၌ ထွက်ပေါ်လာချိန်၊ ပပင်ပန်းနေသော ငှက်လေးများက သူတို့အသိုက်သို့ ပြန်လာပြီး ပထမဆုံး ကျည်ကျည်ကျာကျာအသံလေးများ အော်မြည်လာချိန်၊ အဝေးမှ နာရီခေါင်းလောင်းထိုးသံကို ပထမဆုံးကြားလိုက်ရချိန်တွင်၊ ဖရိုဖရဲအသံများ အလယ်၌ လင်းက 'ခလွက်' ဟူသော ကြွပ်ဆတ်ဆတ်အသံတစ်ခုကို ကြားလိုက်ရသည်။

ဥခွံက အက်ကွဲလာသည်။

ဇာ့ဂ်အားလုံး၏ မျက်ဝန်းများ ပြူးကျယ်သွားပြီး ဥခွံအား စိတ်အားထက်သန်စွာ ကြည့်နေကြသည်။

ပထမတွင် အက်ကွဲရာသေးသေးလေးသာဖြစ်ပြီး ထို့နောက် ဥခွံမျက်နှာပြင်တစ်ခုလုံးကို လျင်မြန်စွာ ပြန့်နှံ့သွားပြီး အက်ကွဲရာများစွာ ဖြစ်သွားခဲ့သည်။

ခလွက်...

ကလပ်...

ခလွက်...

ဇာ့ဂ်တိုင်းက မစောင့်နိုင်တော့ဘဲ ရလဒ်ကို ဖြစ်နိုင်သမျှ မြန်မြန်မြင်နိုင်ရန် မျှော်လင့်နေကြသော်လည်း နှစ်များစွာ ရှုံးနိမ့်လာမှုက သူတို့အား နှောင့်နှေးကြန့်ကြာမှုကို အလိုရှိအောင် ပြုလုပ်ပေးနေသည်။ ရှုံးနိမ့်သွားခဲ့ပါက နာကျင်မှုကို တစ်စက္ကန့်မျှ ပိုကြာကြာနှောင့်နှေးစေနိုင်ပေသည်။

သို့သော်ငြား သူတို့ဆန္ဒနှင့် ဆန့်ကျင်စွာ ဥခွံ၏အက်ကွဲလာနှုန်းက ပို၍ ပို၍ မြန်လာပေသည်။

နောက်ဆုံး ရှည်လျားကျယ်လောင်သော အက်ကွဲသံနှင့် အတူ ဥခွံက နှစ်ခြမ်းကွဲသွားခဲ့သည်။

လူအုပ်ကြီး၏ မျှော်လင့်ချက်နှင့် ကြောက်ရွံ့မှုများရောယှက်နေသည့်အကြည့်များ အောက်တွင် အရပ်ရှည်ရှည်ပုံရိပ်တစ်ခုက ဇာ့ဂ်တိုင်း၏ မျက်စိရှေ့ပေါ်လာခဲ့သည်။

သူက ဥခွံ အကျိုးအပဲ့များအလယ်တွင် မတ်တတ်ရပ်၍ သူ၏အိမ်သူဘုရင်မထံ လက်ဆန့်ပေးလိုက်သည်။

သူ၏ အနက်ရောင် ဆံပင်များက အနည်းငယ် ကောက်ကွေးနေကာ အေးမြသော မြစိမ်းရောင်မျက်ဝန်းတစ်စုံကို ပေါ်လွင်နေစေသည်။ သူ့အမူအရာက ခက်ထန်နေကာ ယခင်ကနှင့် များစွာ ကွာခြားသွားပုံမပေါ်ပေ။

"လင်း...ကိုယ်ပြန်လာပြီ..."

သူက ဖိတ်ခေါ်သည့် လက်ဟန်ဖြင့် လက်ဖဝါးကို ဆန့်တန်းလိုက်သည်။

ငွေရောင်ဆံပင်နှင့် အနီရောင်မျက်လုံးရှိသည့် အမျိုးသမီးဇာ့ဂ်က တစ်စုံတစ်ခုကို အတည်ပြုနေသည့်အလား သူ့မျက်လုံးထဲသို့ စိုက်ကြည့်နေရသည်။

လုမော့က 'ကျစ်' ဟူသည့် အသံသေးသေးလေးကို ပြုလုပ်လိုက်မှသာလျှင် လင်းက နောက်ဆုံးတွင် ပြုံးလိုက်ပြီး သူ့လက်အား လုမော့ လက်ဖဝါးပေါ်တင်လိုက်သည်။

"ပြန်လည်ကြိုဆိုပါတယ်...ကျွန်တော့်ရဲ့သခင်..."

-------

ထိုအခိုက် ဇာ့ဂ်တိုင်း လုံးဝ ထိတ်လန့်သွားကြသည်။

သူ့ပုံပန်းသွင်ပြင်က ပြောင်းလဲသွားမှုမရှိဘဲ ယခင်အတိုင်း အေးစက်မှုများကို ထုတ်လွှတ်နေသေးသည်။ သို့သော်ငြား သူ့အပေါ် အကြည့်ရောက်သွားသည့်အခိုက် အလိုလို အညံ့ခံအရှုံးပေးလိုသည့် ခံစားချက်က မြင့်တက်လာခဲ့သည်။

မျှော်လင့်ထားသည်နှင့် လုံးဝကွာခြားပေသည်။

ဤမတိုင်ခင်က S အဆင့်အမျိုးသားဇာ့ဂ်ကို စိတ်ကူးထားမှုများက ဇာ့ဂ်မျိုးနွယ်များကြား အမျိုးမျိုးကွဲပြားကြသော်လည်း အားလုံးလက်ခံထားကြသည့် အမှန်တရားတစ်ခု ရှိပေသည်။

သူ့တွင် အပြီးပြည့်စုံဆုံးသော ရုပ်ရည်သွင်ပြင်နှင့် သူ့အား မြင်လိုက်သည့်ဇာ့ဂ်တိုင်းက သူ့ကို ချစ်ကျွမ်းမဝင်ဘဲ မနေနိုင်အောင်ထိ လွှမ်းမိုးနိုင်သော ဆွဲဆောင်မှု၊ ညှို့ဓါတ်အပြင်းဆုံး လက္ခဏာရှိရပေမည်။

ယခုကဲ့သို့ ဖြစ်လိမ့်မည်ဟု မည်သူကမှ မတွေးထားခဲ့ချေ။

ထိုသူက အချောဆုံး ရုပ်ရည်မရှိ၊ ပြီးပြည့်စုံသော စရိုက်လက္ခဏာ မရှိပါဘဲနှင့် ဇာ့ဂ်အားလုံး၏ အကြည့်များ

ကို အမှန်တကယ် ဆွဲဆောင်ခဲ့သည်။ သို့သော် သူ့အဆင့် ပိုမြင့်လာလေ သူတို့ ပိုကြောက်ရွံ့လာလေပင် ဖြစ်သည်။ သူတို့ ပို၍ နီးစပ်ချင်လာလေလေ သူတို့ မချည်းကပ်ရဲလေလေပင်။

သူတို့ကို စိတ်ပျက်သွားစေခဲ့လား...

သေချာပေါက် မဟုတ်ဘူးပေါ့…

ကနဦး ထိတ်လန့်မှု ပြီးသွားပြီးနောက် လုမော့အား ကြည့်နေသည့် သူတို့အကြည့်များက တဖြည်းဖြည်း ထက်သန်ပြင်းရှလာခဲ့သည်။

ဤသည်က S အဆင့်အမျိုးသားဇာ့ဂ်တစ်ယောက်ပိုင်ဆိုင်သည့် ရောင်ဝါဖြစ်သည်။ ဤသည်က ဇာ့ဂ်မျိုးနွယ်၏ စစ်မှန်သည့် အဓိကအဆီအနှစ်ပင်။

ငါမြင်တယ်...ငါခစားတယ်...ငါသိမ်းပိုက်စိုးမိုးတယ်...

"အဲ့...အဲ့ဒါက S အဆင့်ပဲ..."

နောက်ဆုံးတွင် တစ်စုံတစ်ယောက်က ထိုစကားများကို ဖွင့်ဟပြောဆိုလိုက်ပြီး ထိုအသံက ဇာ့ဂ်အားလုံးနှလုံးသားထဲရှိ ကြီးထွားလာနေသည့် စိတ်အားထက်သန်မှုများကို လောင်မြှိုက်သွားစေသည့် မီးပွားလေးတတစ်စကဲ့ငို့ပင်။

ဇာ့ဂ်အားလုံးက သူတို့ထိုင်ခုံများမှ ခုန်ပေါက်လိုက်ကြပြီး ဝမ်းသာအားရနှင့်အော်ဟစ်မှုများ၊ ချီးကျူးသြဘာပေးမှုများ၊ ဝမ်းသာလွန်းပြီး မျက်ရည်များ ကျလာသည်များက အတူတကွ ရောနှောသွားကြသည်။

သူတို့အချင်းချင်း ပွေ့ဖက်နမ်းရှုပ်ကာ တစ်ယောက်၏မျက်နှာပေါ်မှ မျက်ရည်များကို သုတ်ပေးလိုက်ကြသည်။

နှစ်ပေါင်းတစ်ထောင်ကြာပြီးနောက် အဆုံးတွင်တော့

S အဆင့်အမျိုးသားက တစ်ဖန်ထပ်ပေါ်လာခဲ့လေပြီဖြစ်သည်။

ဇာ့ဂ်နတ်ဘုရားက နောက်ဆုံးတွင် ဇာ့ဂ်မျိုးနွယ်ကို မစွန့်ပစ်ခဲ့ချေ။

တိုက်ရိုက်ထုတ်လွှင့်မှုကမူ အချိန်အကြာကြီးကတည်းက ပြတ်တောက်သွားခဲ့ခြင်း ဖြစ်သည်။ စကားပြောခန်းတွင်းရှိ ကြည့်ရှူသူများက ရှိုက်ကြီးတငင် ငိုကြွေးနေခြင်း သို့မဟုတ် ယုံကြည်အားကိုး၍ မရသည့် ဆာဗာအား ကျိန်ဆဲနေကြသည်။

သူတို့၏ စိတ်နှလုံးထဲတွင် ရင်သပ်ရှုမောဖွယ်ရာ မြင်ကွင်းကို ပြန်လည်အမှတ်ရတွေးတောပြီး ပေ့ချ်အား ထပ်ခါထပ်ခါ ပြန်ပြန်ဝင်ရောက်ရုံသာ တတ်နိုင်ပေသည်။

သို့သော်ငြား သူတို့နောက်ထပ် မည်သည့်အဖြစ်ပျက်ကို လွဲချော်ခဲ့ရသည်ကို သိခဲ့ပါက သူတို့က ညတွင်းချင်း လုပ်ကြံသတ်ဖြတ်သူအဖြစ် ပြောင်းလဲပြီး ဆာဗာစီမံခန့်ခွဲသူကို လုပ်ကြံချင်လောက်သည်အထိ ဒေါသထွက်နိုင်လောက်ပေသည်။

ပြိုင်ပွဲကွင်းတစ်ခုလုံး ဂုဏ်ယူဝံ့ကြွားမှုများဖြင့် ပြည့်နှက်နေချိန်တွင် ခံ့ညားသည့်ပုံရိပ်တစ်ခုက အမြင့်ဆုံးနေရာတွင် ပေါ်လာခဲ့သည်။ ထိုသူက အံချီးဖွယ် ခမ်းနားထည်ဝါသည့် ဝတ်ရုံတစ်ထည်ကို ဝတ်ဆင်ထားပြီး လူအုပ်ကြီးကို ဖြတ်လျှောက်ကာ လုမော့ထံ လျှောက်လမ်းလာခဲ့သည်။

ဝတ်ရုံပေါ်တွင် ရွှေချည်မျှင်များကို နေလုံးသဏ္ဍာန်ရက်လုပ်ထားပြီး ငွေချည်မျှင်များကို လတစ်စင်းပုံစံရက်လုပ်ထားကာ မရေမတွက်နိုင်သော ကြယ်အစုအဝေးများက နေနှင့်လအား ဝန်းရံထားလေသည်။

ဇာ့ဂ်ဧကရာဇ်၏ အဝါရောင်မျက်ဝန်းများက လုမော့အား နက်နက်ရှိုင်းရှိုင်း စိုက်ကြည့်ကာ ကြင်နာစွာပြောလိုက်သည်။

"ကိုယ်တော့်ရဲ့ချစ်ကလေးငယ် မင်းအတွက် ကိုယ်တော် ဂုဏ်ယူမိတယ်..."

လုမော့ : "..."

သူ့နှလုံးသားတွင်းတွင် စိတ်တထင့်ထင့်ဖြစ်သည့် ခံစားမှုတစ်ခုက လျှပ်တပြက် ဖြတ်ပြေးသွားခဲ့သည်။

ကံမကောင်းစွာပင် ကပ်ဘေးတစ်ခုပေါ်ပေါက်လာသည့် အချိန်တွင် သူ၏ကြိုတင်ခန့်မှန်းချက်များက အမြဲတမ်း မှန်ကန်တိကျလွန်းပေသည်။

သေချာပေါက် မှန်ကန်စွာပင် ဇာ့ဂ်ဧကရာဇ်က ဆက်ပြောလိုက်သည်။

"ဇာ့ဂ်မျိုးနွယ်အတွက် မင်းလုပ်ပေးခဲ့တဲ့ အရာရာတိုင်းအတွက် ကျေးဇူးတင်ပါတယ်...အခုပဲဖြစ်ဖြစ် အတိတ်တုန်းကပဲဖြစ်ဖြစ်...မင်းအတွက် ဂုဏ်ယူပါတယ် ကိုယ်တော့်ကလေးငယ်..."

လုမော့ : ...

လုမော့ : =□=

ခင်ဗျား ဘာပြောချင်တာလဲ...ကျွန်တော် သတ်ိပေးမယ်နော် ကိစ္စဟောင်းတွေကို သယ်မလာနဲ့...

ခင်ဗျား ဗီလိန်ကြီး ကျွန်တော်နဲ့ဝေးဝေးမှာနေ အား...

-------------------------------------

စာရေးသူ၏မှတ်ချက် -

ဇာ့ဂ်ဧကရာဇ် : ကိုယ်တော် သူ့ကို ထိန်းချုပ်ချင်တယ်...

လုမော့ : ငါ့နားကို မလာခဲ့နဲ့နော်...

✅✅✅

Prev Next