MM Story Teller

Chapter 54

Viewers 6k

🥘Chapter 54

နောက်ဆုံး၌ ပိုင်ရှန်းကျစ်၏ မွေးစားခွင့် တရားဝင်အထောက်အထားလက်မှတ်ကို အွန်လိုင်းမှ စစ်ဆေးလိုက်သည်။ ရှောင်လုံက ပိုင်ရှန်းကျစ်နှင့်အတူနေထိုင်ချင်ကြောင်း ရှင်းရှင်းလင်းလင်း ဖော်ပြပြီးနောက် ဝန်ထမ်းများက ကြောက်လန့်နေသော်လည်း ကလေးက ပိုင်ရှန်းကျစ်နှင့်အတူ နေသင့်ကြောင်းသတ်မှတ်လိုက်လေသည်။

ရှောင်လုံ၏မွေးမိဘများ အနေဖြင့် သုံးထောင်စားတော်ဆက်မှာ နေသော ရှောင်လုံထံ လည်ပတ်နိုင်ပြီး ကလေး၏ သဘောတူညီချက်ရမှသာလျှင် ထိန်းသိမ်းစောင့်ရှောက်ခွင့် ရနိုင်မည်ဖြစ်သည်။

ဤကာလအတွင်း မိဘအရင်းများလာလည်သည်ကို ပိုင်ရှန်းကျစ်မှ ငြင်းခွင့်မရှိပေ။

ဆုံးဖြတ်ချက်ကို ကြေညာပြီးနောက် ဝန်ထမ်းများကသူတို့ နောက်ဆက်တွဲကိစ္စရပ်များ ဆက်လက်ဆောင်ရွက်ရမည်ဖြစ်၍ လူတိုင်း စည်းမျဥ်းလိုက်နာရန် မျှော်လင့်ပါကြောင်း တုန်ယင်စွာပြောလာခဲ့သည်။

ဝန်ထမ်းများ ထွက်ခွာသွားသည်နှင့် တစ်ပြိုင်နက် ကျိမိသားစုက လှောင်ရယ်ကာ ဖုန့်ယဲ့အားပြောလိုက်သည်။

"ခေါင်းဆောင်ဖုန့်က တကယ်ကို အထင်ကြီးစရာပါပဲ....အချိန်-အာကာသစီမံခန့်ခွဲမှုဌာနရဲ့ လုပ်ပိုင်ခွင့်က ဘယ်သူ့မှာရှိလဲ အခုဆို ထင်ရှားနေပြီပဲ..."

ဖုန့်ယဲ့ သူ့အား မထူးခြားနား တစ်ချက်ကြည့်ကာ ပြောလိုက်သည်။

"ကြည့်ရတာ ကျိချန်ဖုန်း, မင်းက သဘောတူစာချုပ်လက်မှတ်ထိုးရတာကို လုံးဝ မကျေနပ်တဲ့ပုံပဲ..."

ထိုနာမည်ကို ကြားလိုက်ရသည့်အခိုက် ကျိမိသားစုဝင်နှစ်ဦး၏ မျက်နှာအမူရာများက ချက်ချင်း ပြောင်းလဲသွားသည်။

သူတို့စကားပြောနေသည်ကိုရပ်လိုက်ပြီး ဖုန့်ယဲ့က သူတို့၏ စူးစိုက်ကြည့်နေသော အကြည့်များကို ရှောင်ဖယ်ကာ ပိုင်ရှန်းကျစ်နှင့်အတူ ထွက်ခွာသွားလသည်။

သုံးထောင်စားတော်ဆက်သို့ ပြန်ရောက်သည့်နောက် ရှောင်လုနှင့် တုလင်လင်က သူတို့ထံ ကမန်းကတန်းပြေးလာကြသည်။ ရှောင်လုကငိုနေရာ တုလင်လင်က မထိန်းနိုင်ဘဲ သူမမျက်ရည်များကို သုတ်ပေးလိုက်သည်။

ပိုင်ရှန်းကျစ်၏ရှင်းပြမှုကို ကြားပြီးနောက် တုလင်လင်က စိုးရိမ်သွားမိသည်။

"ဒါဆို အနာဂတ်ကျရင် ရှောင်လုံ့ကို သူ့မိဘတွေက ခေါ်သွားမှာလို့ ဆိုလိုတာလား..."

ထိုသည်ကိုကြားပြီး ရှောင်လု ရှောင်လုံ့ကို တင်းကျပ်စွာ ဖက်ကာပြောလိုက်သည်။

"ရှောင်လုံ ငါနင့်ကို မထွက်သွားစေချင်ဘူး..."

ရှောင်လုံ သူမကို ပြန်ဖက်လိုက်ပြီး ခိုင်ခိုင်မာမာဆိုလိုက်သည်။

"ငါ မထွက်သွားဘူး...ငါ့မှာဖေဖေရှိပြီးသား။ ငါဘယ်မှသွားမှာ မဟုတ်ဘူး..."

ရှောင်လုံ ပျောက်သွားပြီးနောက် လျင်လျင်မြန်မြန်ပြန်ရှာနိုင်သည့်အတွက် ဖုန့်ယဲ့က်ို ကျေးဇူးတင်ရပေမည်။ ဖုန့်ယဲ့ကို ကျေးဇူးဆပ်ရန် ပိုင်ရှန်းကျစ် လုပ်နိုင်သည့် တစ်ခုတည်းသော အရာမှာ အရသာရှိသော ဟင်းလျာတစ်ဝိုင်း ချက်ပြုတ်ပေးခြင်း ဖြစ်သည်။ ယခုအချိန်မှစပြီး သုံးထောင်စားတော်ဆက်က ဖုန့်ယဲ့၏ စားသောက်အိမ် ဖြစ်ပြီး သူစားချင်သည့် အချိန်တိုင်း လာစားနိုင်သည်ဟု ပိုင်ရှန်းကျစ် အလေးအနက်ပြောလိုက်သည်။ ပိုင်ရှန်းကျစ် သူ့ဆီမှ မည်သည့် စားသောက်စရိတ်မှ လက်ခံမည် မဟုတ်ပေ။

ဤငွေပမာဏက ဖုန့်ယဲ့အတွက် အသေးအမွှားလေးသာဖြစ်ကြောင်း ပိုင်ရှန်းကျစ် သိပေသည်။ သို့သော်ငြား သူ့တွင် အခြား ကမ်းလှမ်းစရာ ဘာမှမရှိချေ။ သူ ဘာပေးနိုင်သေးလဲ တွေးနေစဥ် ဖုန့်ယဲ့က တိုက်ရိုက် ပြောလိုက်သည်။

"မင်းရဲ့ကမ္ဘာအကြောင်း ငါ့ကိုပြောလို့ရတယ်..."

ပိုင်ရှန်းကျစ် : "..."

သူ ဖျစ်ညှစ်ပြုံးပြကာ မေးလိုက်လေသည်။

"...ခင်ဗျား ဘာကိုဆိုလိုတာလဲ..."

သူ့ငွေရောင်မျက်ဝန်းများတွင် နားလည်ရခက်သောခံစားချက်များနှင့် ဖုန့်ယဲ့ သူ့ကိုကြည့်လိုက်သည်။ ပြန်ဖြေရမည့်အစား သူမေးလိုက်သည်။

"ကမ္ဘာသုံးထောင်မှာ အချိန်-အာကာသစီမံခန့်ခွဲမှုဌာနရဲ့ အခန်းကဏ္ဍက ဘာလဲဆိုတာ မင်းသိလား..."

ပိုင်ရှန်းကျစ် ကြက်သေ သေသွားသည်။

"ဘာ..ဘာလဲ..."

ဖုန့်ယဲ့ သူ့အား အဓိပ္ပါယ်များနှင့် စိုက်ကြည့်လိုက်၏။

"အချိန်-အာကာသစီမံခန့်ခွဲမှုဌာနက ကမ္ဘာသုံးထောင်ကို စီရင်ပိုင်ခွင့်ရှိတယ်ဆိုပေမဲ့ လက်ရှိမှာ သားရဲကလန်နဲ့ တစ္ဆေကလန်တွေကိုပဲ အောင်အောင်မြင်မြင် အုပ်စိုးထားနိုင်သေးတာ...နဂါးကလန်၊ ဝိညာဥ်ကလန် လိုမျိုး အဆင့်မြင့်ကလန်တွေမှာ ကလန်အတွင်းက လူကြီးတွေရဲ့အာဏာနဲ့ယှဥ်ရင် သူတို့ရဲ့အာဏာက အရေးမပါတော့ဘူး...ဒီကမ္ဘာတွေမှာ ခွန်အားပေါ် အခြေခံပြီး ကိစ္စတွေကို ကိုင်တွယ်ကြတယ်...စွမ်းအားအကြီးဆုံးသူကသာ အမှန်ဆုံးလို့ သတ်မှတ်ထားတာ...အချိန်-အာကာသစီမံခန့်ခွဲမှုဌာန ရှိနေတာတောင် သူတို့မပြောင်းလဲနိုင်တဲ့ ကိစ္စတွေ အများကြီးရှိတယ်...အဲ့ဒီ မတော်တဆဖြစ်ရပ်တွေက ဌာနရဲ့မကောင်းသတင်းတွေပဲ...တရားဝင်မှတ်တမ်းတွေ ဖျက်ထားပေမဲ့ ကမ္ဘာသုံးထောင်ကလူတိုင်း ဒီအကြောင်းတွေ သိတယ်...နဂါးကလန်နဲ့ ရင်ဆိုင်ရတုန်းက မင်းချက်ချင်း လုပ်လိုက်တာက သူတို့ကို ရှာတာပဲ..."

ပိုင်ရှန်းကျစ်မျက်နှာ တောင့်တင်းသွားသည်။

ဖုန့်ယဲ့ကဆက်လက်ပြီး

"အဲ့ဒါအပြင် အာကာသအက်ကွဲကြောင်းက ဌာနရဲ့လုပ်ပိုင်ခွင့်ထဲမှာပဲ...သုံးထောင်စားတော်ဆက် ပိုင်ရှင်တစ်ယောက်အနေနဲ့ မင်းက ဥပဒေအကြောင်းကို သားရဲကလန်နဲ့ တစ္ဆေကလန်တို့ထက် ပိုသိမှာပါ...အရေးကြီးဆုံးအချက်က သုံးထောင်စားတော်ဆက်က လူတွေက အာကာသအက်ကြောင်းကို မရောက်နိုင်ဘူး..."

အာကာသအက်ကြောင်းအကြောင်း ထပ်ခါတလဲလဲ ပြောခြင်းနှင့် ဒုက္ခရောက်သည့် အချိန်တိုင်းတွင် "ရဲဦးလေးကြီးများ"(အချိန်အာကာသဝန်ထမ်း) ထံမှ အကူအညီတောင်းလေ့ ရှိသည့် သူ့အကျင့်ကို ကြည့်၍ သိသာထင်ရှားစွာပင် သူနှင့်ပတ်သက်ပြီး တစ်ခုခုမှားနေကြောင်း မည်သူမဆို ပြောနိုင်ပေသည်။

သက်ပြင်းချလိုက်ပြီးနောက် ပိုင်ရှန်းကျစ် အင်တင်တင်ဖြင့် ပြောလိုက်သည်။

"ကောင်းပါပြီ...ကျွန်တော့်ကမ္ဘာ အကြောင်းနည်းနည်း ပြောပြပါ့မယ်... ဒါပေမဲ့ ခင်ဗျား ဘာလို့ ဒါတွေသိချင်ရတာလဲဆိုတာ ကျွန်တော့်ကို ပြောပြရမယ်..."

အမှန်တကယ်တွင် ဖုန့်ယဲ့ သူ့အား အန္တာရယ်ပေးမည်ကို သူ မစိုးရိမ်ပေ။ ဖြစ်ကောင်းဖြစ်နိုင်တာက သူတို့အချိန်အကြာကြီး အတူတူ ကုန်ဆုံးခဲ့သည်ကြောင့် ဖြစ်လိမ့်မည်။ သို့မဟုတ် ဖုန့်ယဲ့ကို အကူအညီတောင်းသည့်အချိန် သူစိတ်ပြင်ဆင်ခဲ့ပြီးလို့ ဖြစ်နိုင်ပေသည်။ ယခု သူ့အထောက်အထားက ဖော်ထုတ်ခံလိုက်ရသည်။ သူ့နှလုံးသားတွင် ကြောက်ရွံ့မှု မရှိခဲ့ဘဲ စိတ်သက်သာရာ ရသွားခဲ့သည်။ နောင်တွင် သူတစ်ယောက်တည်း မဟုတ်တော့ပေ။

"ကိုယ် မျိုးနွယ်တိုင်း/ကမ္ဘာတိုင်းမှာ အချိန်-အာကာသစီမံခန့်ခွဲမှုဌာနကို လွှမ်းမိုးမှု ရှိစေချင်တယ်...အဲ့ဒါက နဂါးကလန်, နတ်ဘုရားကလန်, စိတ်ဝိညာဥ်ကလန်ပဲဖြစ်ဖြစ်...အဲ့ဒါမှ လူတိုင်း စည်းမျဥ်းစည်းကမ်းအတိုင်း နေနိုင်ပြီး စွမ်းအားက ကမ္ဘာသုံးထောင်မှာ အမှန်အမှားကို ဆုံးဖြတ်နိုင်တဲ့ တစ်ခုတည်းသော အရာ မဟုတ်တော့မှာ..."

ဝိုး...ဒီအကြံက တကယ့်ကို ကြီးကျယ်ခမ်းနားတာပဲ...

လူတိုင်း လိုက်နာရမည့် ကြီးမားကျယ်ပြန့်ပြီးစည်းလုံးသော ဥပဒေများ တည်ထောင်ရန်...

၎င်းက ကမ္ဘာသုံးထောင်လုံးကို ပေါင်းစည်းသွားစေနိုင်သည်။

၎င်းကို တွေးကြည့်ရုံနှင့်ပင် ဤခရီးလမ်းက ဘယ်လောက် ခက်ခဲကြမ်းတမ်းလိမ့်မည်လဲဟူသည်ကို ပိုင်ရှန်းကျစ် ခံစားမိသည်။ ထုံထုံနက်ဝေါ့မှ သူလေ့လာထားမိသလောက် ကမ္ဘာသုံးထောင်ထဲက အမျိုးမျိုးသောမျိုးနွယ်များကြားက ဆက်ဆံမှုသည် လိုက်လျောညီထွေမရှိကြပေ။ အချို့သောမျိုးနွယ်များက လေးစားကြည်ညိုခံရစဥ်တွင် အချို့က ခွဲခြားဆက်ဆံခံရပေသည်။ အချို့မျိုးနွယ်က သဘာဝအလျောက် ရန်လိုရဲတင်းလျက် အချို့ကမူ တွန့်ဆုတ် ကြောက်ရွံ့တတ်သည်။

သေစမ်း! ဒါက လူမျိုးရေး ခွဲခြားဆက်ဆံတာတွေ၊ စိတ်ကူးယဥ် သတ္တဝါတွေ၊ မျိုးနွယ် အလေ့အကျင့်တွေနဲ့ မျိုးနွယ် ဓလေ့ထုံတမ်းတွေ အကုန်လုံး တစ်ခုတည်း ပေါင်းထားတာနဲ့ တူနေပြီ...

သိသည့်အတိုင်းပင် အမေရိကန်ပြည်ထောင်စုက လူမျိုးရေးခွဲခြားဆက်ဆံမှုကို ကိုင်တွယ် ဖြေရှင်းရန် နှစ်ပေါင်းများစွာ အချိန်ယူခဲ့ရသည်။

ထိုကဲ့သို့သော ကမ္ဘာအားလုံးကို တစ်ခုတည်းအဖြစ် ပေါင်းစည်းရန် ဆိုသည်မှာ...

ပိုင်ရှန်းကျစ် သူ ယုံကြည်မှု မရှိသလို ခံစားလိုက်ရသည်။ ထိုပန်းတိုင်ကို အောင်မြင်ရန် ဆင်းရဲဒုက္ခနှင့် အခက်အခဲများက သူတွေးနိုင်သည်ထက် ကျော်လွန်နေသည်။

"အာ...ကောင်းပြီလေ...ကျွန်တော် သိထားတာတွေက ခင်ဗျားအတွက် သိပ်အကူအညီ မရလောက်ဘူးလို့ ထင်တာပဲ..."

ဖုန့်ယဲ့ ပြုံးလိုက်ပြီး

"အဆင်ပြေပါတယ်...ပြဿနာနဲ့တွေ့တဲ့အခါ အင်အားသုံးမယ့်အစား လူတွေ အကူအညီတောင်းလို့ရတဲ့ ကမ္ဘာကြီးက ဘယ်လိုမျိုးလဲဆိုတာ နားလည်ချင်ရုံပါ..."

ပိုင်ရှန်းကျစ် ခက်ခက်ခဲခဲ ခေါင်းညိတ်ပြလိုက်သည်။

ဖုန့်ယဲ့ ဆက်ပြီး

"သေချာတာပေါ့...ကိုယ် မင်းကို လျော်ကြေးပေးမှာပါ...မင်း သုံးထောင်စားတော်ဆက်ကို တိုးချဲ့ဖို့ အမြဲစဥ်းစားနေတာမလား.."

သုံးထောင်စားတော်ဆက်ကို တိုးချဲ့မယ်...

ပိုင်ရှန်းကျစ် ထိုအကြောင်းကို တကယ်တွေးဖူးသည်။ သူက ချက်ပြုတ်ပြီး အသစ်အဆန်းများတီထွင် ဖန်တီးရသည်ကို နှစ်သက်သော်လည်း အကြိုက်ဆုံးအစားအစာကို အမြဲတမ်း မစားနိုင်သကဲ့သို့ပင် သူကြိုက်သောအရာများက သူ့တစ်ဘဝလုံးကို သိမ်းပိုက်ပြီး အတင်းအကျပ် အသက်ရှင်နေရပါက ထပ်ဖန်တလဲလဲနှင့် ငြီးငွေ့လာကာ သူ၏ စိတ်အားထက်သန်မှုများလည်း ပျောက်ကွယ်သွားပေလိမ့်မည်။

ထို့ပြင် ချက်ပြုတ်ခြင်းနှင့်ယှဥ်ပါက ပိုင်ရှန်းကျစ် ဟင်းလျာအသစ်များ ဖန်တီးကာ အနည်းငယ် ဆင်တူသော ဟင်းချက်နည်းများကို ပါးပါးနပ်နပ် ပြောင်းလိုက်လျက် အရသာ ကွာခြားမှုများကို ရှာဖွေရန် ပိုစိတ်အားထက်သန်ပေသည်။

အရေးကြီးဆုံးမှာ ယောက်ျားတစ်ယောက် အနေဖြင့် သူ့တွင်လည်း ရည်မှန်းချက် ရှိပေသည်။ သေးငယ်သောသုံးထောင်စားတော်ဆက်က သူ၏ပြင်းပြသောဆန္ဒများကို မကျေနပ်စေနိုင်ပေ။ ယခင်က စားတော်ဆက်ကို တိုးချဲ့ရန်အတွေးကို ချောင်ထိုးထားခဲ့ရသည်။ အဘယ့်ကြောင့်ဆိုသော် သုံးထောင်စားတော်ဆက်၏ ထူးခြားသောသဘာဝကြောင့် သာမည စားသောက်ရာ နေရာလေးတစ်ခုသာ ဖြစ်နိုင်သည်ပင်။ အလွန် ဖွံ့ဖြိုး တိုးတက်လွန်းလျှင် အာရုံစိုက်မှု ခံရနိုင်ပြီး တစ်ကြိမ် ဖော်ထုတ်ခံလိုက်ရပါက ဖြစ်လာမည့် အကျိုးဆက်များကို ကြိုတင်မခန့်မှန်းနိုင်ချေ။

သို့ပေသည့် ယခုမူ ဖုန့်ယဲ့က သုံးထောင်စားတော်ဆက်ကို တိုးချဲ့ရန် နည်းလမ်းရှိသည်ဟု ပြောကာ ကမ္ဘာနှစ်ခုလုံးကိုလည်း ဟန်ချက်ညီအောင် ထိန်းနိုင်ပေသည်။

သီအိုရီအားဖြင့် နည်းလမ်းမှာ ရိုးရှင်းလှပေသည်--ကမ္ဘာနှစ်ခုကို ခွဲထုတ်ရန်ပင်။ ကမ္ဘာသုံးထောင်မှ စားသုံးသူများနှင့် ဝန်ထမ်းများမှာ ပိုင်ရှန်းကျစ်၏ကမ္ဘာမှ စားသုံးသူများနှင့် ကွဲသွားမည်ဖြစ်သည်။

ကြားရသည်မှာ လွယ်ကူသော်လည်း လက်တွေ့တွင်မူ မဖြစ်နိုင်ပေ။ သုံးထောင်စားတော်ဆက်တွင် ဝင်ပေါက်တစ်ခုသာရှိပြီး ကမ္ဘာနှစ်ခုလုံးမှ စားသုံးသူများက ဤဝင်ပေါက်ကိုသာ သုံးနေရပေသည်။ သို့သော် စားတော်ဆက်က သေးငယ်လွန်းလှသည်။ ဤသို့ ခွဲထုတ်လိုက်ရန်မှာ မဖြစ်နိုင်ပေ။

ဖုန့်ယဲ့၏ ဖြေရှင်းနည်းမှာ အာကာသအစွန်းထပ်ကိရိယာကိုသုံး၍ အရှေ့မှာတစ်ယောက်ရှိပြီး အနောက်မှာ အခြားတစ်ယောက်ကို ထားလို့ရသည့် မှန်နေရာလွတ်ကို ဖန်တီးကာ ဆိုင်တွင်းမှ နေရာကို တိုးချဲ့လိုက်ရန် ဖြစ်သည်။

ဝင်ပေါက်၌ စစ်ဆေးရေးစက်ပါဝင်သော တယ်လီပို့တ် အသေးစား တစ်ခုကိုလည်း တပ်ဆင်ထားမည် ဖြစ်သည်။

စစ်ဆေးစက်ကို ဝင်သွားသော စိတ်ဝိညာဥ်စွမ်းအား မရှိသူတိုင်းက ချက်ချင်းပင် မှန်နေရာလွတ်ကို ရွှေ့ပြောင်းသွားမည် ဖြစ်သည်။ အဘယ့်ကြောင့်ဆိုသော် သူတို့၌ စိတ်ဝိညာဥ်စွမ်းအား မရှိသောကြောင့် သူတို့အား တယ်လီပို့တ်စနစ်ဖြင့် ရွှေ့ပြောင်းခံလိုက်ရသည်ကိုပင် သိမည် မဟုတ်ပေ။

ပိုင်ရှန်းကျစ် မျက်လုံးပြူးလေးများဖြင့် နားထောင်နေကာ လေးစားမှု အပြည့်ဖြင့် ချီကျူးလိုက်သည်။

ထိုအကြံနှင့် ပိုင်ရှန်းကျစ်က သုံးထောင်စားတော်ဆက်ကို ယာယီပိတ်ထားကြောင်း ထုံထုံနက်ဝေါ့တွင် ကြေညာပြီး အသစ် ပြန်လည်မွမ်းမံခြင်းကို သီးသန့် လုပ်ဆောင်ခဲ့သည်။ အာကာသအစွန်းထပ်ကိရိယာတပ်ဆင်ရန် နေရာတစ်ခု လိုအပ်သောကြောင့် ဝူထုန်လမ်းက သုံးထောင်စားတော်ဆက်တွင် ပြုပြင်မှုများလုပ်ခဲ့သည်။

တစ်ချိန်တည်းမှာပင် ဖုန့်ယဲ့ ခေါ်ဆောင်လာသော လူများက အာကာသအက်ကြောင်းအတွင်း တိုးချဲ့မှုများလုပ်ကာ နှစ်ဖက်လုံး အဆက်မပြတ် အလုပ် လုပ်ခဲ့ကြရသည်။

တစ်ချိန်တည်းမှာပင် ဝန်ထမ်းသစ်ခန့်ရန် ပိုင်ရှန်းကျစ်က XX အလုပ်စျေးကွက်တွင် အလုပ်ကြော်ငြာပို့စ် တစ်ခုတင်ခဲ့သည်။ မည်သည့်စိတ်ပူစရာမှမရှိဘဲ S မြို့တွင် စားသောက်ဆိုင်ဖွင့်နိုင်မည် ဆိုကတည်းက သေသေချာချာလုပ်ရန် ဆုံးဖြတ်လိုက်သည်။ အလုပ်သင် 2ယောက်၊ စားပွဲထိုး 2 ယောက်နှင့် ပန်းကန်ဆေးသမား 1 ယောက် ခေါ်ရန် ဆုံးဖြတ်ထားသည်။

တုလင်လင်၊ ကျိုးလုံတို့နှင့် ဆွေးနွေးတိုင်ပင်ပြီးနောက် ပိုင်ရှန်းကျစ် ထုံထုံနက်ဝေါ့တွင် လူသစ်စုဆောင်းရေးကြော်ငြာများကို တင်ခဲ့သည်။ တုလင်လင်က အချက်အပြုတ်ပညာကို သင်ယူလိုသောဆန္ဒရှိသောကြောင့် စားပွဲထိုး 2 ယောက်နှင့် အလုပ်သင် 1ယောက် ရလာခဲ့သည်။ ထို့ပြင် ပန်းကန်ဆေးသမား 2 ယောက်ကို ခန့်ထားခဲ့ပြီး သုံးထောင်စားတော်ဆက် တိုးချဲ့လာပြီး ဝန်ထမ်းများ တိုးများလာသည်နှင့် တစ်ပြိုင်နက် စာရင်းများလည်း ရှုပ်ထွေးလာမည် ဖြစ်သောကြောင့် ငွေကြေးနှင့် လူ့စွမ်းအားအရင်းအမြစ် မန်နေဂျာ(HR manager) တစ်ယောက်ကိုပင် ခန့်အပ်ခဲ့သေးသည်။

စီစဥ်မှုများအားလုံး နေရာတကျ ဖြစ်သွားပြီးနောက် ပိုင်ရှန်းကျစ် သူ့ဘဏ်အကောင့်ကို ကြည့်ကာ သွေးအနှစ်ဟော့ပေါ့နှင့် အချိန်လဟိုတယ် ရှိနေခြင်းကို နက်နက်ရှိုင်းရှိုင်းပင် ဝမ်းမြောက်မိသွားလေသည်။

(T/N- သူ့ပိုက်ဆံတွေကုန်သွားလို့)

🥘

Prev Next