အပိုင်း ၁၄၂

Part 142

ထို့ကြောင့် တစ်မနက်အတွင်းတွင် ဝမ်ယွီ ဗီဒီယိုအစည်းအဝေးနှစ်ခုကျင်းပခဲ့ရလေသည်။

သူပြန်ရောက်လာသည့်နောက်တွင် ချီကျန်းကျန်းမနေနိုင်တော့ဘဲ မေးလိုက်၏ " ရှင်အဲ့လောက်အလုပ်များတယ်ဆိုရင်လည်း ဘာလို့ကုမ္ပဏီကိုမသွားတာလဲ…"

သူမ၏မျက်လုံးများထဲတွင် အံ့ဩနေခြင်းများရှိနေခဲ့၏။

ဝမ်ယွီလက်ကိုမြောက်အား သူမ၏ခေါင်းအားပွတ်ပေးလိုက်ပြီး " ကိုယ်ကမင်းကိုအနှောင့်အယှက်ဖြစ်သွားစေခဲ့လို့လားဟင်…" 

" ဟင့်အင်းမဖြစ်ပါဘူး…ကျွန်မဒီတိုင်းသိချင်နေတာ ရှင့်ရဲ့ပုံစံအမှန်လဲပေါ်သွားပြီပဲကို ဘာလို့အိမ်မှာအလုပ်လုပ်နေသေးတာလဲလို့လေ…" သူမသည် ဘောပင်၏ထောင့်အား ဝေခွဲမရသောအမူအယာဖြင့်ကိုက်နေခဲ့သည်။

မူလဇာတ်ကြောင်းတွင်မူ ဝမ်မိသားစုပြိုကွဲသွားပြီးနောက် ဝမ်ယွီ၏ ကြီးစိုးရေးလမ်းကြောင်း တရားဝင်စတင်ခဲ့လေသည်။

သူသည်ဝမ်အိမ်မှထွက်လာခဲ့ပြီး ကုမ္ပဏီသို့တရားဝင် ဝင်ထွက်ကာ ယွီတင်း၏တိုးတက်ရေးအတွက် ကုမ္ပဏီတွင်သာ အမြဲတမ်းအလုပ်လုပ်နေခဲ့၏။

သူသည် အပြည့်အဝကို ရက်စက်သောအလုပ်လုပ်စက်မျိုးဖြစ်သွားခဲ့တာဖြစ်သည်။

" မင်းကိုအဖော်ပြုပေးတာမလိုချင်လို့လား…" ဝမ်ယွီ၏လက်များခဏတာမျှတုံ့ဆိုင်းသွားခဲ့သည်။

ချီကျန်းကျန်း သူမ၏ခေါင်းအားအလျှင်အမြန်ခါလိုက်ကာ လေးနက်နေသည့်အမူအယာဖြင့် " သေချာပေါက် ကျွန်မကိုအဖော်လုပ်ပေးစေချင်တာပေါ့ ဒါပေမယ့် ရှင့်မှာလဲ လုပ်စရာကိစ္စတွေရှိသေးတယ်လေ ရှင်သာကျွန်မကြောင့် ရှင့်ရဲ့စီးပွားရေးကိစ္စတွေနှောင့်နှေးသွားခဲ့ရရင် ကျွန်မအပြစ်ရှိသလိုခံစားနေရမှာ… ဘယ်လိုပဲဖြစ်ဖြစ် ရှင်ထမင်းသုံးနပ်လုံးကိုအိမ်ပြန်လာစားတာပဲဟာ ပြီးတော့ နေ့လည်ခင်းဆိုလဲအိမ်ပြန်လာသေးတယ်လေ အဲ့တော့ရှင်ကျွန်မနဲ့တစ်နေကုန်အိမ်မှာနေပေးဖို့မလိုပါဘူး…"

သေချာတာပေါ့ သူမ ဝမ်ယွီအားခံစားချက်ကင်းမဲ့နေသည့် အလုပ်လုပ်စက်ရုပ်ဖြစ်မသွားစေချင်ပေ။ ထို့အတူသူမကိုလည်းအဖော်ပြုပေးစေချင်သည်။ သို့သော် သူမကြောင့် သူ့အလုပ်များနှောင့်နှေးသွားရမှာကိုတော့ သူမမလိုချင်ပါ။

ထိုအရာမှာ ချီကျန်းကျန်းအား အပြစ်ရှိစိတ်ကိုဖြစ်ပေါ်စေသည်။ သူသည် သူမအတွက်ကြောင့် အလုပ်မသွားပဲ‌အိမ်မှာနေနေခြင်းကို သူမတကယ်မလိုလားခဲ့ပေ။

ဝမ်ယွီ၏မျက်လုံးများအား အနည်းငယ်နိမ့်လိုက်ပြီး တိုးညှင်းစွာပြောလာခဲ့သည် " ကိုယ်နေ့လည်ကျရင် ကုမ္ပဏီသွားရမှာလေ… ဒီနေ့မနက်ကတော့ ကိုယ်အလုပ်သွားရမှာဒီတိုင်းပဲနည်းနည်းပျင်းနေလို့ပါ… ကိုယ်အပြင်မထွက်ချင်ဘူး…"

ချီကျန်းကျန်းမျက်လုံးများမှာ မယုံသင်္ကာဖြစ်သွားခြင်းကြောင့် ပြူးကျယ်သွားပြီး " ရှင့်ကျွန်မကိုစနေတာလား…" " အဲ့လိုကြီးကော ရလို့လား…" ဟူသည့်အမူအယာဖြစ်နေခဲ့သည်။

ဝမ်ယွီအပြင်မထွက်ရသည့်အကြောင်းမှာ ပျင်းရိနေခဲ့လို့ပေါ့…

သူမရှော့ရသွားတော့သည်…

ဝမ်ယွီ : " ကိုယ်ကသူဌေးလေ သေချာတာပေါ့ ကိုယ်ဘာလုပ်လုပ် ရတယ်…"

ချီကျန်းကျန်းသည် သူ့အား တိတ်တိတ်ကလေး လက်မသာပေးမိတော့သည်။ ထို့နောက်သူ၏လက်တစ်ဖက်အားကိုင်ကာ " အဲ့ဒါဆိုရှင့်အလုပ်ဆက်လုပ်လိုက်ဦး ကျွန်မလဲကျန်တာဆက်ပြီးဘာသာပြန်လိုက်ဦးမယ်… ပြီးရင်အောက်ဆင်းပြီး အတူစားကြတာပေါ့…"

သူမခဏအကြာစဉ်းစားပြီးနောက် ထပ်မေးလိုက်လေသည် " အလုပ်ဆင်းတဲ့အချိန်ကျ ကျွန်မတို့ဒိတ်လုပ်ကြရင်ကော…"

ဝမ်ယွီ၏မျက်မှာပေါ်တွင် အပြုံးတစ်ခုဖြစ်လာကာ သူတို့၏နောက်ဆုံးဒိတ်လုပ်ခဲ့သည့်အကြောင်းအား စဉ်းစားနေလျက် သူ၏မျက်ခုံးများမှာပြေလျော့သွားတော့သည် " ကောင်းပြီ လျောက်လည်ကြတာပေါ့…"

" အဲ့ဒါဆို ကျွန်မလိုလိုမယ်မယ် ရုပ်ရှင်လက်မှတ်တချို့ဖြတ်ထားလိုက်မယ်…ရုပ်ရှင်ရုံသွားပြီး ရုပ်ရှင်ကြည့်ရအောင်… အိမ်ကရုပ်ရှင်ရုံလေးကတစ်ခုခုလိုနေတယ်လို့ ကျွန်မအမြဲခံစားနေရတာ အဲ့ဒါကတကယ့်ဒိတ်နဲ့မတူနေဘူးရယ်…" ချီကျန်းကျန်း ခါးသီးစွာတွေးနေခဲ့လေသည်။

ဝမ်ယွီနားထောင်နေပြီး နူးညံ့သိမ်မွေ့သောအမူအရာဖြင့် သူမလက်အား တင်းတင်းကြပ်ကြပ်ဆုပ်ကိုင်လိုက်လေသည်။

သူမစကားပြောပြီးသည့်နောက်တွင် သူမကိုယ်သူမ ဘာသာပြန်ရာတွင်သာ အားစိုက်လိုက်ပြီး ပြင်းပြင်းထန်ထန်အလုပ်လုပ်နေခဲ့သည်။

ဘာသာပြန်ရသည့်အလုပ်မှာသိသိသာသာပင် ခက်ခဲလှ၏။ သူမအနည်းငယ်မျက်မှောင်ကြုတ်လိုက်ပြီးနောက် အဘိဓာန်အားတစ်ကြိမ်ပြီး တစ်ကြိမ်လှန်ကာ ကြိမ်ဖန်များစွာနစ်မြုပ်နေခဲ့၏။

ဝမ်ယွီသူမအား ခဏကြာစောင့်ကြည့်ပြီးနောက်တွက် မတတ်သာတော့ပဲ ပြောလာခဲ့လေသည် " အဲ့ဒါကအရမ်းခက်နေရင် မပြန်နဲ့တော့လေ…"

ချီကျန်းကျန်းသူမခေါင်းအားမရွေ့ဘဲ " မဟုတ်ဘူး အချက်အလက်တွေပဲ နည်းနည်းခက်နေတာ ပေးတာကလည်းများတော့ ကျွန်မပိုက်ဆံရဖို့လိုတယ်လေ…"

သူမကိုယ်ပိုင်အတွက်သုံးရန်စုထားသောအရင်ပိုက်ဆံမှာ ဝမ်စီစီအားတိုက်ခန်းငှားရန်ပေးလိုက်သောကြောင့် သူမပိုက်ဆံအချို့စုရန်အမြန်လို‌အပ်နေခဲ့သည်။

သူမချီမိသားစုမှပေးလာသော ပိုက်ဆံများအားလည်း ပြန်ပေးလိုက်ပြီး ချီယန်မှသူမ၏မုန့်ဖိုးအားဆက်ပေးချင်ခဲ့သည်ဟူ၍ ပြောလာခဲ့သည်ကိုပင် သူမငြင်းပယ်ခဲ့လေသည်။

ထို့ကြောင့် သူမယခုပိုက်ဆံပြတ်လပ်နေပြီဖြစ်၏။

သေချာပေါက်ကို သူမဒီအလုပ်ကို အချိန်တိုင်းလုပ်မည်မဟုတ်ပေ။ ယခုအချိန်တွင် အင်္ဂလိပ်စာသို့တပြိုင်နက်တည်းဘာသာပြန်ပေးနိုင်သည့်ဈေးကွက်မှာ လူမလုံလောက်နေချေ။ ထို့အတူသူမ၏ဂျာမန်ဘာသာပြန်အရည်အသွေးမှာငွေရှာနိုင်ရန်လုံလောက်နေပြီဖြစ်သော်လည်း တပြိုက်နက်တည်းဘာသာပြန်ရန်တွင်မူမလုံလောက်နေခဲ့ပေ။ သူမထပ်မံလေ့လာရန်လိုအပ်နေသေးသည်။

သူမဝယ်လာခဲ့သည့်စာအုပ်များအား လေ့လာနိုင်ရန်အတွက် အချိန်ဖယ်ထားရန်လည်းလုပ်နေခဲ့ရသည်။

တစ်ဆင့်ပြီး တစ်ဆင့်ဖြင့် ကမ္ဘာကြီးပေါ်တွင် ထမင်းတစ်ပန်းကန်အတွက် အလုပ်ကြိုးစားနေကြသောသူများမှာ မည်သည့်အချိန်မှ ပြတ်လတ်မည်မဟုတ်ပေ။

ချီကျန်းကျန်းသူမ၏ခေါင်းကိုငုံ့ကာ ခေါင်းကုတ်နေလျက် ဆက်လက်ဘာသာပြန်နေတော့သည်။

ဝမ်ယွီကွန်ပြူတာအားရိုက်နေရင်းမှ ခဏအကြာတွင် ချီကျန်းကျန်းကွန်ပြူတာ၏ရှေ့သို့ရွှေ့လာခဲ့သည်။

သူချောင်းဆိုးလိုက်မိပြီး ရုတ်တရက်ပြောလာခဲ့လေသည် " ကျန်းကျန်း အဲ့ဒါကကိုယ့်ရဲ့စီးပွားရေးအခြေအနေ…"

" ဘာ…" ချီကျန်းကျန်း သူ့အားစိတ်ပျက်နေသည့်အမူအယာဖြင့်မော့ကြည့်လာခဲ့သည်။

" အဲ့ဒါ ယွီတင်းရဲ့ရှယ်ယာတွေ… သူတို့ကအခုလက်ရှိ ၂၈.၉ဘီလီယံလောက်တန်တယ်… ပြီးတော့ကိုယ် မင်းရှားနည်းပညာကိုလည်းကိုင်ထားတာဆိုတော့ အဲ့ဒါက…ပုံသေပိုင်ဆိုင်‌မှုတွေက… နောက်အိမ်ခြံမြေစုစုပေါင်းက…" ဝမ်ယွီသည် လေးနက်သော အမူအယာဖြင့် သူ၏ပိုင်ဆိုင်မှူများကို ချီကျန်းကျန်းအား အသေးစိတ်ရှင်းပြနေခဲ့သည်။ 

အနှစ်ချုပ်ပြီးသောအခါ စုစုပေါင်းကိန်းဂဏန်းကို ချီကျန်းကျန်းအား နှစ်ပိုင်းခွဲ၍ ပြလိုက်ပြီး " ဒါကကိုယ့်လက်ရှိပိုင်ဆိုင်မှုပဲ တကယ်လို့နှစ်ပိုင်းခွဲလိုက်ရင် ဒီလိုပုံထွက်လာမယ်… သေချာတာပေါ့ ဒါကတရားဝင်ဘယ်လိုခွဲခြမ်းရတယ်ဆိုတာလေ…"

တရားဝင်အခြေအနေ၌ ထိမ်းမြားလက်ထပ်ခြင်းဆိုင်ရာကိစ္စရပ်များတွင် မည်သို့ပင်ဆိုစေကာမူ လင်နှင့်မယား၏ ဘုံပိုင်ဆိုင်မှုမှာ တဝက်စီဖြစ်သည်။

သေချာပေါက်ကို ချီကျန်းကျန်းလိုချင်သည်ဆိုလျှင် သူသည်ပျော်ပျော်ပါးပါးခွဲဝေပေးလိုက်မည်သာဖြစ်သည်။

ထိုသို့ပြောပြီးနောက် သူ ချီကျန်းကျန်းအားစိတ်လှုပ်ရှားစွာကြည့်နေခဲ့လေသည်။

ချီကျန်းကျန်းမျက်တောင်ခတ်လိုက်ပြီးနောက် သူမအတွက် နက္ခတ်ဗေဒင်ဆိုင်ရာကိန်းဂဏန်းကဲ့သို့ဖြစ်နေသော သုညအတန်းလိုက်ကြီးအား ကြည့်နေမိတော့သည်။

သူမဘာစကားမှမပြောသည်ကို ဝမ်ယွီမြင်ပြီးနောက် သူစိုးရိမ်တကြီးပြောလာခဲ့လေသည် " ဒါကသေချာပေါက် ကိုယ့်ပိုင်ဆိုင်မှု အကုန်မဟုတ်သေးဘူး… ကိုယ့်ရဲ့အကြီးမားဆုံးပိုင်ဆိုင်မှုက အနာဂတ်မှာလေ ယွီတင်းရဲ့ကျယ်ပြန့်ပုံနဲ့ဆိုရင် နှစ်တိုင်းကိုထပ်တိုးလာမှာက…"

သူသည် သူ၏အနာဂတ်ပိုင်ဆိုင်မှုအား ချီကျန်းကျန်းအတွက် အလျှင်အမြန်တွက်ချလိုက်ပြီး သုညတန်းကြီးမှာ တိုးလာသည်မှာ ပို၍ ပို၍ ပို၍ ပို၍ ပို၍…

ထပ်မံတိုးလာသောသုညအတန်းကြီးအား ချီကျန်းကျန်းမရေတွက်နိုင်တော့သည့်အချိန်တွင် ဝမ်ယွီရေတွက်နေသည်မှာလည်းရပ်တန့်သွားခဲ့သည်။

သူပြောပြီးနောက်တွင် ဝမ်ယွီသည် ချီကျန်းကျန်းအားရင်တုန်းပန်းတုန်ဖြင့် စောင့်ကြည့်နေခဲ့၏။

သူမကျေနပ်ရဲ့လား မသိဘူး…

သူမသူ့ကိုမကြိုက်ဘူးလား…

ချီကျန်းကျန်း ဖြည်းဖြည်းချင်းလှည့်လာကာ သူမအနားရှိ  အလေးအနက်ထားနေသော မျက်နှာနှင့်အမူအယာပိုင်ရှင်ဝမ်ယွီအား မျက်နှာချင်းဆိုင်ကာကြည့်လိုက်မိလေသည်။

ထို့နောက် သူမဖြည်းဖြည်းချင်းလက်လှမ်းလိုက်ပြီး " ဒီနားလာဦး…"

ဝမ်ယွီ အနည်းငယ်ရှုပ်ထွေးနေသည့်အမူအယာဖြင့် သူ၏ခေါင်းကိုသူမအနားသို့ကပ်လာခဲ့၏။

ချီကျန်းကျန်း : " ရှင်… အာ… ရှင်ဘယ်လောက်ချမ်းသာကြောင်း ကျွန်မကိုလာကြွားနေတာလား…" သူမဒေါသတကြီးဖြင့် သူ၏လည်ပင်းအား ထညစ်မိလေတော့သည်။

xxxxxx